Fugugame

రాష్ట్ర ప్రభుత్వం కీలక నిర్ణయం తీసుకుంది. ఆధార్ లింక్ చేయని ఉద్యోగుల జీతాలను నిలిపివేయాలని ఆర్థికశాఖ నిర్ణయించింది. ఈ మేరకు ఉత్తర్వులు జారీ చేసింది. ఈనెల 25వ తేదీ అర్థరాత్రి లోపు తప్పనిసరిగా ఆధార్ నెంబర్‌ను ఐఎఫ్‌ఎంఐఎస్ వెబ్‌సైట్‌లో నమోదు చేయాలని ఆర్థికశాఖ ఇప్పటికే ఆదేశించింది. ఈ నేపథ్యంలోనే రాష్ట్ర ప్రభుత్వంలో పనిచేస్తున్న ఉద్యోగులందరూ ఆధార్, సెల్‌ఫోన్ నంబర్లు నమోదు చేయకపోతే ఈ నెల జీతం రాదని ఇప్పటికే ఆర్థికశాఖ అన్ని ప్రభుత్వశాఖల అధిపతులకు ఆదేశాలను జారీ చేసింది.

అన్ని శాఖల్లో కలిపి శాశ్వత, తాత్కాలిక ఉద్యోగులు మొత్తం 10.14 లక్షల మంది ఉన్నారు. వారి పేర్లు, హోదా, ఆధార్, ఫోన్ నంబర్లు తదితర వివరాలన్నీ ప్రతి నెల 10వ తేదీ వరకు ఆర్థికశాఖ నిర్వహణ పోర్టల్ (ఐఎఫ్‌ఎంఐఎస్)లో నమోదు చేయాలని గత నెలలో ఉత్తర్వులు జారీ చేసింది. కానీ, ఈ నెల 16వ తేదీ వరకు సగం మంది వివరాలు కూడా నమోదు చేయలేదు. ఈ క్రమంలోనే వివరాలివ్వని వారి జీతాలను ఈ నెల బిల్లులను నిలిపివేసింది. మిగిలిన వారు వెంటనే వివరాలు ఇవ్వాలని లేకపోతే ఇదే ట్రీట్‌మెంట్ అమలవుతుందని ఆర్థికశాఖ హెచ్చరించింది.

ఫేస్ చూసి మోసపోవద్దు

హైదరాబాద్ సిపి ఫొటోతో సైబర్ నేరస్థుల మోసాలు

నమ్మవద్దని కోరిన సిపి విసి సజ్జనార్

మన తెలంగాణ/ సిటిబ్యూరో: తన ఫొటో పెట్టి సైబర్ నేరస్థులు డబ్బులు వసూలు చేస్తూ మోసాలు చేస్తున్నారని, ఫేస్ చూసి మోసపోవద్దని హైదరాబాద్ పోలీస్ కమిషనర్ విసి సజ్జనార్ కోరారు. సైబర్ నేరస్థులు హైదరాబాద్ పోలీస్ కమిషనర్ విసి సజ్జనార్ ఫొటోను వాట్సాప్ డిపిగా పెట్టుకుని మోసాలు చేస్తున్నారు. కమిషనర్‌కు తెలిసిన వారికి మెసేజ్‌లు పంపి డబ్బులు అడుగుతున్నారు.

ఈ విషయం తెలిసిన పోలీస్ కమిషనర్ విసి సజ్జనార్ తన ఫొటోతో ఉన్న వాట్సాప్ డిపితో వచ్చిన సందేశాలను నమ్మవద్దని, అవి నకలీ ఖాతాలని, మోసపూరితమైనవని, ఇలాంటి మెసేజ్‌లకు స్పందించవద్దని కోరారు. వెంటనే ఆ నంబర్లను బ్లాక్ చేసి సైబర్ క్రైం పోలీసులకు ఫిర్యాదు చేయాలని కోరారు. డబ్బులు అడిగితే పంపవద్దని, నకిలీ వాట్సాప్ ఖాతాల గురించి 1930కి ఫోన్ చేసి ఫిర్యాదు చేయాలని కోరారు.

కాంగ్రెస్ ప్రభుత్వంపై మాజీ మంత్రి, సిద్దిపేట ఎంఎల్‌ఎ తన్నీరు హరీశ్‌రావు అబద్ధపు ప్రచారాలు చేస్తూ విషం చిమ్ముతున్నారని ఎస్‌సి, ఎస్‌టి, మైనారిటీ సంక్షేమ శాఖ మంత్రి అడ్లూరి లక్ష్మణ్ కుమార్ మండిపడ్డారు. శనివారం సిద్దిపేట జిల్లా కేంద్రంలోని మోహినిపుర వేంకటేశ్వరస్వామి దేవాలయాన్ని దర్శించుకున్న అనంరతం విలేకరుల సమావేశంలో ఆయన మాట్లాడారు. రాష్ట్ర మంత్రివర్గ సమావేశంలో చర్చకు రాని మాటలు మాట్లాడారని హరీశ్‌రావు అనడం సబబు కాదని అన్నారు. మంత్రివర్గ సమావేశంపై అనుచితంగా మాట్లాడిన వ్యాఖ్యలను వెనక్కి తీసుకోవాలని డిమాండ్ చేశారు. 20 నెలల కాంగ్రెస్ పాలనపై బిఆర్‌ఎస్ నాయకులకు ఇంత ఆక్రోషం ఎందుకని మండిపడ్డారు. ప్రజా పాలనలో తమ ప్రభుత్వం అన్ని రకాల సంక్షేమ పథకాలను సక్రమంగా అందిస్తోందని, ఇకపై కూడా ప్రజలకు అనుగుణంగా పాలన కొనసాగుతుందని అన్నారు. ‘పదేళ్ల రాష్ట్ర ప్రజలకు మీరేం చేశారో.. 20 నెలల్లో కాంగ్రెస్ ప్రభుత్వం ఏం చేసిందో సచివాలయం దగ్గర ఉన్న

అంబేద్కర్ విగ్రహం వద్దకు చర్చకు రావాలి’ అని సవాల్ హరీశ్‌రావుకు విసిరారు. మాజీ సిఎం కెసిఆర్ చర్చకు వస్తే తమ ముఖ్యమంత్రి రేవంత్‌రెడ్డి వస్తారని, లేదంటే హరీశ్‌రావుకు తాను చర్చకు సరిపోతానని పేర్కొన్నారు. గత సర్కార్ చేసిన అప్పులకు ఇపుడు తమ ప్రభుత్వం వడ్డీలు కడుతూనే ప్రజలకు సంక్షేమ పథకాలు అందిస్తోందని అన్నారు. తెలంగాణ రాష్ట్రం ఇచ్చిన మాదిరిగా బిసిలకు 42 శాతం రిజర్వేషన్లు అమలు బాధ్యత కాంగ్రెస్ తీసుకుంటోందని అన్నారు. సుదీర్ఘ రాజకీయ అనుభవం కలిగిన హరీశ్‌రావు తమ మంత్రి వర్గాన్ని దండుపాళ్యం బ్యాచ్ అనడం సరికాదని అన్నారు. జూబ్లీహిల్స్ ఉప ఎన్నికలో, రానున్న స్థానిక సంస్థల ఎన్నికలలో ప్రజలు ఏ పార్టీకి పట్టం కడతారో త్వరలోనే తెలుస్తుందని పేర్కొన్నారు. ఈ సమావేశంలో పార్టీ నాయకులు గంప మహేందర్, గూడూరి శ్రీనివాస్, దరిపల్లి చంద్రం, సాకి ఆనంద్, బొమ్మల యాదగిరి, మార్క సతీష్ తదితరులు పాల్గొన్నారు.

మంచిర్యాల జిల్లాలో ఎసిబి వలలో మరో అవినీతి చేప చిక్కింది. కొమురం భీం జిల్లా ఇన్‌ఛార్జి జిల్లా సహకార సంఘం అధికారి (డిసిఓ) రాథోద్ బిక్కు మంచిర్యాలలోని తన నివాసంలో శనివారం రూ.2 లక్షలు లంచం తీసుకుంటుండగా ఎసిబి అధికారులు దాడి చేసి పట్టుకున్నారు. వివరాల్లోకి వెళ్తే.. జిల్లాలోని బెజ్జూర్ సహకార సంఘంలో సస్పెన్షన్‌కు గురైన ఉద్యోగి జక్కుల వెంకటేశ్వర్‌గౌడ్ ఉద్యోగ విషయంలో జిల్లా ఇన్‌ఛార్జి సహకార సంఘం అధికారి రాథోడ్ బిక్కును సంప్రదించాడు. ఇందుకు ఆయన రూ.10 లక్షలు డిమాండ్ చేశాడు. అయితే, బాధితుడు రూ.5 లక్షలకు ఒప్పందం కుదుర్చుకొని రెండు విడతలలో డబ్బులు ఇచ్చేందుకు అంగీకరించాడు. ఈ విషయమై బాధితుడు ఎసిబి అధికారులకు తెలియజేశాడు. వారి సూచనల మేరకు శనివారం ఎసిబి అధికారులు డిసిఒ రాథోడ్ బిక్కు నివాసంలో వెంకటేశ్వర్‌గౌడ్ రూ.2 లక్షలు ఇస్తుండగా రెడ్‌హ్యాండెడ్‌గా పట్టుకున్నారు. ఆయనపై కేసు నమోదు చేసినట్లు ఎసిబి అధికారులు తెలిపారు.

న్యూఢిల్లీ : అదానీ గ్రూప్ కంపెనీల్లో జీవిత బీమా సంస్థ (ఎల్‌ఐసి) పెట్టుబడుల విషయంలో ప్రభుత్వ ప్రమేయం ఉందంటూ వచ్చిన ఆరోపణలపై జీవిత బీమా సంస్థ స్పందించింది. ఈ పెట్టుబడులపై తమది స్వతంత్ర నిర్ణయమని, ఇందులో ఎవరి ఒత్తిళ్లు లేవని స్పష్టం చేసింది. ఓవైపు అప్పులు, మరోవైపు అమెరికా సంస్థల నుంచి ఒత్తిళ్లు ఎదుర్కొంటున్న పరిస్థితుల్లో ఈ ఏడాది మొదట్లో అదానీ గ్రూప్ కంపెనీల్లో జీవిత బీమా సంస్థ భారీ మొత్తంలో పెట్టుబడి పెట్టిందని వాషింగ్టన్ పోస్ట్ తాజాగా ఓ కథనం వెలువరించింది. ప్రభుత్వ అధికారులు రూపొందించిన ప్రణాళిక ప్రకారమే భారీగా పెట్టుబడులు పెట్టడమైందని ఆరోపించింది.

దీనిపై ఎల్‌ఐసీ స్పందిస్తూ ఈ ఆరోపణలు నిరాధారమని, ఇందులో ఆర్థిక మంత్రిత్వశాఖ గానీ, ఇతర శాఖల ప్రమేయం గానీ లేదని స్పష్టం చేసింది. ఎల్‌ఐసీ బోర్డు ఆమోదించిన విధానాల ప్రకారమే పెట్టుబడులపై స్వతంత్రంగా నిర్ణయం తీసుకోవడమవుతుందని పేర్కొంది. వాటాదారుల ప్రయోజనాలకు అనుగుణంగా అత్యుత్తమ ప్రమాణాలు ఎల్‌ఐసీ పాటిస్తూ వస్తోందని, అలాంటి సంస్థపై బురద జల్లే ప్రయత్నాలు మానుకోవాలని సూచించింది. దేశం లోని టాప్ 500 కంపెనీల్లో ఎల్‌ఐసికి పెట్టుబడులు ఉన్నాయి.

2014లో ఈ మొత్తం రూ.1.56 లక్షల కోట్లు ఉండగా, ప్రస్తుతం ఈమొత్తం 15.6 లక్షల కోట్లకు అంటే గత పదేళ్లలో 10 రెట్లు పెరిగింది. అదానీ సంస్థ ఒక్కటే కాదు, రిలయన్స్, ఐటీసీ, టాటా గ్రూపు కంపెనీల్లోనూ ఎల్‌ఐసీకి భారీ మొత్తంలో వాటాలు ఉన్నాయి. అదానీ గ్రూపులో 4 శాతం వాటా అంటే రూ. 60 వేల కోట్ల పెట్టుబడి ఉండగా, రిలయన్స్‌లో 6.94 శాతం వాటా అంటే రూ.1.34 లక్షల కోట్లు, ఐటీసీలో 15.86 శాతం (రూ. 82,800 కోట్లు ), హెచ్‌డీఎఫ్‌సీ బ్యాంక్‌లో 4.89 శాతం (రూ. 64,725 కోట్లు, ఎస్‌బీఐలో 9.50 శాతం (రూ. 79,361 కోట్లు ) పెట్టుబడులు ఉన్నాయి. టాటా గ్రూప్‌నకు చెందిన ఐటీ సేవల సంస్థ టిసీఎస్‌లోనే 5.02 శాతానికి సమానమైన రూ.5.7 లక్షల కోట్ల పెట్టుబడులు ఎల్‌ఐసీకి ఉన్నాయి.

 గ్రామీణ నిరుద్యోగ యువతకు ఉద్యోగ అవకాశాలు కల్పించడమే ధ్యేయంగా సూర్యాపేట జిల్లా, హుజూర్‌నగర్‌లో మెగా జాబ్‌మేళాను నిర్వహించినట్లు రాష్ట్ర నీటిపారుదల, పౌరసరఫరాల శాఖ మంత్రి నలమాద ఉత్తమ్‌కుమార్‌రెడ్డి తెలిపారు. తాము తలపెట్టిన జాబ్‌మేళా విజయవంతమైనందుకు సంతోషం వ్యక్తం చేశారు. తెలంగాణ పట్టణ ప్రాంతాల కన్నా, గ్రామీణ ప్రాంతాలలో నిరుద్యోగ యువతకు ఉద్యోగ అవకాశాలు కల్పించడమే చాలా ముఖ్యమని భావించామని, అందుకే హుజూర్‌నగర్ లాంటి గ్రామీణ ప్రాంతంలో ఈ జాబ్‌మెళాను నిర్వహించినట్లు చెప్పారు. శనివారం ఆయన సూర్యాపేట హుజూర్‌నగర్‌లోని పెర్ల్ ఇన్ఫినిటి ఇంటర్నేషనల్ సూల్‌లో ఏర్పాటు చేసిన మెగా జాబ్‌మేళా ఇప్పటివరకు రాష్ట్రంలో ఎక్కడా నిర్వహించలేదని, ఇది అతి పెద్ద జాబ్‌మేళా అని అన్నారు. దీనివల్ల హుజూర్‌నగర్, కోదాడ, నియోజకవర్గాలు ఉమ్మడి నల్గొండ జిల్లా నిరుద్యోగులకు ఎంతోమందికి ఉద్యోగ అవకాశాలు వచ్చాయని తెలిపారు.

పలు కంపెనీలు అక్కడికక్కడే ఉద్యోగాలలో నియమిస్తూ అభ్యర్థులకు ఆఫర్ లెటర్లు కూడా ఇచ్చాయని తెలిపారు. నీళ్లు, నిధులు, నియామకాలు అనే మూడు అంశాలపై తెలంగాణ వచ్చిందని, దానిని దృష్టిలో ఉంచుకుని రాష్ట్ర ప్రభుత్వం ఉద్యోగాల కల్పనకు అత్యంత ప్రాధాన్యత ఇస్తోందని అన్నారు. అందులో భాగంగా ఇప్పటివరకు ప్రభుత్వ రంగంలో 75 వేల ఉద్యోగాలు కల్పించామని, ప్రైవేట్ సెక్టార్లో సైతం పెద్ద ఎత్తున ఉద్యోగాలు ఇచ్చేందుకు ఈ జాబ్‌మేళాను చేపట్టినట్లు తెలిపారు. జిల్లా కలెక్టర్ తేజస్ నంద్‌లాల్ పవార్ మాట్లాడుతూ.. రెండు రోజుల పాటు నిర్వహించే మెగా జాబ్‌మేళాలో సుమారు 275 కంపెనీలు పాల్గొని గ్రామీణ నిరుద్యోగ యువతకు ఉద్యోగ అవకాశాలు కల్పిస్తున్నాయని అన్నారు. ముఖ్యంగా డిజిటల్ ఎంప్లాయిమెంట్ ఎక్సేంజ్ ఆఫ్ తెలంగాణ సింగరేణి కాలరీస్ సహకారంతో ఈ జాబ్‌మేళాను ఏర్పాటు చేశామని, ఐటి సర్వీస్ సెక్టార్, మ్యానుఫ్యాక్చరింగ్, ఆటోమొబైల్స్, ఫార్మా సిమెంట్ తదితర కంపెనీలన్నీ హుజూర్‌నగర్‌కు వచ్చి గ్రామీణ నిరుద్యోగ యువతకు ఉద్యోగ అవకాశాలు కల్పిస్తున్నాయని తెలిపారు.

శుక్రవారం నాటికి జాబ్‌మేళాకు 40 వేల మంది రిజిస్ట్రేషన్ చేసుకున్నారని, దీనిని దృష్టిలో ఉంచుకొని రెండు రోజుల పాటు జాబ్‌మేళా నిర్వహించాలని నీటిపారుదల శాఖ మంత్రి ఉత్తమ్‌కుమార్‌రెడ్డి నిర్ణయం మేరకు నిర్ణయించారని, అందుకు తగ్గట్టుగానే అభ్యర్థులకు భోజన, వసతి సౌకర్యాల కల్పించామని చెప్పారు. డిజిటల్ ఎంప్లాయిమెంట్ ఎక్సేంజ్ ఆఫ్ తెలంగాణ డైరెక్టర్ రాజేశ్వర్‌రెడ్డి, సింగరేణి కాలరీస్, సంస్థ హెచ్‌ఆర్ మేనేజర్ చంద్ర తదితరులు మాట్లాడారు. ఈ కార్యక్రమంలో మిర్యాలగూడ, నకిరేకల్ బత్తుల లకా్ష్మరెడ్డి, శాసనసభ్యులు వేముల వీరేశం, ఎంఎల్‌సి శంకర్ నాయక్, సూర్యాపేట నల్గొండ, ఖమ్మం జిల్లాల ఎస్‌పిలు, అదనపు కలెక్టర్ సీతారామరావు, ఇతర అధికారులు, ప్రజాప్రతినిధులు పాల్గొన్నారు. అనంతరం నిరుద్యోగులకు జాబ్ ఆఫర్ లెటర్‌లను మంత్రి అందజేశారు.

మద్యం షాపుల డ్రాకు హైకోర్టు అనుమతి ఇచ్చింది. హైకోర్టు ఆదేశాలతో ఈ డ్రాకు అడ్డంకులు తొలగాయి. ఈ నెల 27వ తేదీన మద్యం షాపులకు డ్రా నిర్వహించడానికి ఎక్సైజ్ శాఖ అధికారులు ఏర్పాట్లను మొదలెట్టారు. హైకోర్టు నుంచి మద్యం షాపులకు అనుమతి రావడంతో డ్రా ఏర్పాట్లను చేసుకోవాలని అధికారులకు ప్రొహిబిషన్ అండ్ ఎక్సైజ్ కమిషనర్ సి.హరికిరణ్ అదేశాలిచ్చారు. రాష్ట్రంలోని 2,620 మద్యం షాపులకు 95,137 దరఖాస్తులు వచ్చాయి. మద్యం షాపులకు వచ్చిన దరఖాస్తులను డ్రా (లాటరీ) పద్దతిలో మద్యం షాపుల లైసెన్స్‌ల ఎంపిక జరుగుతుంది. జిల్లాల వారీగా ఈ నెల 27వ తేదీన ఉదయం 11 గంటలకు దరఖాస్తులు దాఖలు చేసిన వారి సమక్షంలో జిల్లా కలెక్టర్ల చేతుల మీదుగా ఈ డ్రా ప్రక్రియ కొనసాగనుంది.

జిల్లాల వారీగా మద్యం షాపుల వివరాలు

అదిలాబాద్‌లో 40 మద్యం షాపులకు 771 దరఖాస్తులు రాగా, కోమురం భీం అసిఫాబాద్‌లో 32 షాపులకు 680 దరఖాస్తులు, మంచిర్యాలలో 73 షాపులకు 1,712, నిర్మల్‌లో 47 షాపులకు 3,002 దరఖాస్తులు, జగిత్యాలలో 71 షాపులకు 1,966 దరఖాస్తులు, కరీంనగర్‌లో 94 షాపులకు 2,730 దరఖాస్తులు, పెద్దపల్లిలో 77 షాపులకు 1,507 దరఖాస్తులు, రాజన్న సిరిసిల్లలో 48 షాపులకు 1,381 దరఖాస్తులు, ఖమ్మంలో 122 షాపులకు 4,430 దరఖాస్తులు, కొత్తగూడెంలో 88 షాపులకు 3,922 దరఖాస్తులు, జోగులాంబ గద్వాలలో 36 షాపులకు 774 దరఖాస్తులు, మహబూబ్‌నగర్‌లో 90 షాపులకు 2,487 దరఖాస్తులు, నాగర్‌కర్నూల్‌లో 67 షాపులకు 1,518 దరఖాస్తులు, వనపర్తిలో 37 షాపులకు 757 దరఖాస్తులు, మెదక్‌లో 49 షాపులకు 1,920 దరఖాస్తులు, సంగారెడ్డి 101 షాపులకు 4,432 దరఖాస్తులు,

సిద్దిపేట్ లో 93 షాపులకు 2,782, నల్లగొండ 155 షాపులకు 4,906 దరఖాస్తులు, సూర్యాపేట్‌లో 99 షాపులకు 2,771 దరఖాస్తులు, యాదాద్రి భువనగరిలో 82 షాపులకు 2,776 దరఖాస్తులు, కామారెడ్డిలో 49 షాపులకు 1,502 దరఖాస్తులు, నిజామాబాద్‌లో 102 షాపులకు 2,786 దరఖాస్తులు, మల్కాజిగిరిలో 88 షాపులకు 5,168 దరఖాస్తులు, మేడ్చల్‌లో 114 షాపులకు 6,063 దరఖాస్తులు, సరూర్‌నగర్‌లో134 షాపులకు 7,845 దరఖాస్తులు, శంషాబాద్‌లో100 షాపులకు 8,536 దరఖాస్తులు, వికారాబాద్‌లో 59 షాపులకు 1,808 దరఖాస్తులు, జనగాంలో 47 షాపులకు 1,697 దరఖాస్తులు, భూపాలపల్లిలో 60 షాపులకు 1,863 దరఖాస్తులు, మహబూబాబాద్‌లో 59 షాపులకు 1,800 దరఖాస్తులు, వరంగల్ రూరల్‌లో 63షాపులకు 1,958 దరఖాస్తులు, వరంగల్ అర్బన్‌లో 65 షాపులకు 3,175 దరఖాస్తులు వచ్చాయని అధికారులు తెలిపారు.

గత బిఆర్‌ఎస్ ప్రభుత్వ హయాంలో భారీ ఎత్తున అవినీతి జరిగిందని స్వయాన మాజీ ముఖ్యమంత్రి కె. చంద్రశేఖర్ రావు కుమార్తె జాగృతి అధ్యక్షురాలు కల్వకుంట్ల కవిత చేసిన ఆరోపణలపై సమగ్ర విచారణ జరిపి చర్యలు తీసుకోవాల్సిందిగా కాంగ్రెస్ ఎమ్మెల్సీ బల్మూరి వెంకట్ పోలీసులకు ఫిర్యాదు చేశారు. ఈ మేరకు బల్మూరి వెంకట్ శనివారం నారాయణగుడా పోలీసు స్టేషన్లో లిఖితపూర్వకంగా ఫిర్యాదు చేశారు. అనంతరం ఎమ్మెల్సీ వెంకట్ మీడియాతో మాట్లాడుతూ రాష్ట్ర ప్రభుత్వం కవిత ఆరోపణలపై చర్యలు తీసుకుని, బిఆర్‌ఎస్ నేతలు దోచుకున్న ప్రజాధనాన్ని వెనక్కి తీసుకోవాలని డిమాండ్ చేశారు. అవినీతిలో ఎమ్మెల్యే, మాజీ మంత్రి టి. హరీష్ రావు, మాజీ ఎంపి సంతోష్ కుమార్, ఇతర నాయకులు నవీన్ రావు, పోచంపల్లి శ్రీనివాస్‌పై ఆరోపణలు చేశారని ఆయన గుర్తు చేశారు. కాంగ్రెస్ బాకీ కార్డు పేరిట బిఆర్‌ఎస్ ఆరోపిస్తూ హడావుడి చేస్తున్నదని, నిజానికి రాష్ట్రాన్ని దివాళ తీయించి బాకీల పాలు చేసిందని ఆయన దుయ్యబట్టారు. బిఆర్‌ఎస్ ముఖ్య నేతలు దోచుకుని దాచుకున్న సొమ్ముతో తెలంగాణ బాకీలన్నీ తీరుతాయని ఎమ్మెల్సీ బల్మూరి వెంకట్ అన్నారు.