Trending

పాన్ ఇండియా స్టార్ ప్రభాస్ రెండు సినిమా షూటింగ్‌లతో బిజీ బిజీగా ఉన్నాడు. ఓ వైపు రాజాసాబ్.. మరోవైపు ఫౌజీ చిత్రాలకు డేట్లు కేటాయించి పగలు, రాత్రి పని చేస్తున్నాడు. ఫౌజీ మొదలైన అనంతరం తాత్కాలికంగా రాజాసాబ్‌ని కొన్ని నెలల పాటు పక్కన బెట్టినా? ఆలస్యమవ్వడంతో ఆ చిత్రాన్ని కూడా ఫౌజీతో పాటు మళ్లీ తిరిగి ప్రారంభించాడు. ప్రస్తుతం ఫౌజీ, రాజాసాబ్ సినిమాల షూటింగ్‌లు రామోజీ ఫిలింసిటీలోనే వేర్వేరు ప్రదేశాల్లో జరుగుతున్నాయి. దీంతో ప్రభాస్ రెండు సినిమా షూటింగ్‌లకు హాజరవుతుండడం విశేషం. ఒకేసారి ఒకే రోజు రెండు సినిమా షూటింగ్ లకు హాజరవ్వడం అంత సులభం కాదు.

ఈ రెండు చిత్రాలకు సంబంధించి కీలక సన్నివేశాల చిత్రీకరణ కావడంతో ప్రభాస్ తో పాటు ఇతర తారాగణం పాల్గొంటోంది. ఈ నేపథ్యంలో ప్రభాస్ ఒక రోజు పూర్తిగా ఫౌజీకి కేటాయిస్తే మరో రోజు రాజాసాబ్‌కి కేటాయిస్తున్నట్లు తెలుస్తోంది. ఒకే రోజు రెండు షూటింగ్‌లకు ప్రభాస్ హాజరైతే కొంత ఇబ్బంది అవుతుందన్న నేపథ్యంలో మేకర్స్ ఇలా ప్లాన్ చేసుకుని ముందుకెళ్తున్నారు. ఇక పీపుల్ మీడియా ఫ్యాక్టరీ బ్యానర్‌పై టీజీ విశ్వప్రసాద్ నిర్మిస్తున్న రాజాసాబ్ సినిమా తెలుగు, హిందీ, తమిళం, కన్నడం, మలయాళం భాషల్లో జనవరి 9న విడుదలకానుంది.

నేషనల్ క్రష్ రష్మిక మందన్న ఇటు సౌత్‌లో అటు బాలీవుడ్‌లో సినిమాలు చేస్తూ స్టార్ హీరోయిన్‌గా దూసుకుపోతోంది. ప్రస్తుతం ఈ అమ్మడు కాక్ టెయిల్ 2, తామ్మా షూటింగ్‌లతో బిజీగా ఉంది. ఈ నేపథ్యంలో తాజాగా సంచలన ప్రాంచైజీ దోస్తానా 2 చిత్రంలో హీరోయిన్ గా అమ్మడికి అవకాశం వచ్చినట్లు తెలుస్తోంది. విక్రాంత్ మాస్సే కథానాయకుడిగా కరణ్ జోహార్ ప్రతిష్టాత్మకంగా దోస్తానా 2 ని తెరకెక్కిస్తున్నారు. తొలుత ఈ సినిమాలో కార్తీక్ ఆర్యన్ ని హీరోగా తీసుకుని అటుపై అతడిని తప్పించి విక్రాంత్ కు అవకాశం ఇచ్చారు.అయితే ఈ సినిమా కోసం పలువురు హీరోయిన్లను పరిశీలించారు ఫిల్మ్‌మేకర్స్.

తాజాగా రష్మిక మందన్నను కరణ్ సంప్రదించాడు. ఈ సినిమా చేసేందుకు రష్మిక సానుకూలంగా స్పందించినట్లు తెలిసింది. తుది నిర్ణయం చెప్పడానికి మాత్రం కొంత గడువు కావాలని కోరిందట. అందుకు కరణ్ కూడా ఓకే చెప్పినట్లు సమాచారం. ప్రస్తుతం రష్మిక కూడా సీరియస్ గా బాలీవుడ్ కెరీర్ పై దృష్టి పెట్టడంతో దొస్తానా 2కి ఎలాంటి అడ్డకులు చెప్పే అవకాశం లేదు.