Trending

పరిపాలన చేతగాని ముఖ్యమంత్రి రేవంత్ రెడ్డి తన పదవికి రాజీనామా చేస్తే ఇద్దరు రెడ్లు ఆ పదవిని చేపట్టడానికి రెడీగా ఉన్నారని బిఆర్‌ఎస్ రాష్ట్ర నాయకుడు, మాజీ మంత్రి ఎర్రబెల్లి దయాకర్ రావు అన్నారు. హనుమకొండ జిల్లా కేంద్రం, రాంనగర్‌లోని తన నివాసంలో శుక్రవారం ఏర్పాటు చేసిన విలేకరుల సమావేశంలో ముఖ్యమంత్రిపై ఆయన తీవ్రస్థాయిలో విరుచుకుపడ్డారు. తుపాకీ రాముడుకి, రేవంత్ రెడ్డి మాటలకు తేడా లేకుండా ఉందన్నారు. స్థానిక సంస్థల ఎన్నికల్లో బిసిలకు 42 శాతం రిజర్వేషన్ కల్పిస్తానని అడ్డగోలు జిఒలను తీసుకొచ్చి ప్రజలను తప్పుదోవ పట్టించడమే కాకుండా ఆ పార్టీని కూడా ధోకా చేసిన ఘనుడు రేవంత్ రెడ్డి అని వ్యాఖ్యానించారు. స్థానిక సంస్థల ఎన్నికల కోసం ఎన్నికల కమిషన్‌పై వత్తిడి చేసి ఎన్నికల షెడ్యూల్‌ను ప్రకటింపజేసి, అదే స్థాయిలో 42 శాతo రిజర్వేషన్‌కు 9 జిఒను విడుదల చేయడంతో హైకోర్టు తప్పు బట్టి స్టే విధించిందని అన్నారు. దానివల్ల పోటీ చేయాలనుకునే ఆశావహులు గందరగోళానికి గురయ్యారన్నారు. బిసి రిజర్వేషన్లపై పొంతనలేని మాటలు మాట్లాడిన రేవంత్ రెడ్డి సిఎం కాకముందు బిసి రిజర్వేషన్లపై రాష్ట్రాలకు రిజర్వేషన్లపై హక్కు ఉండకూడదని, అలా అడిగిన వారిని జైల్లో పెట్టాలని అన్న మాటలను దయాకర్ రావు మీడియా ముందు వీడియో క్లిప్పింగ్ ను చూపించారు.

అదేవిధంగా అసెంబ్లీలో మాజీ మంత్రి కెటిఆర్ బిసిలకు 42 శాతం రిజర్వేషన్లు ఏ విధంగా ఇస్తారని ప్రశ్నించారు. అందుకు సంబంధించిన అంశాలను, విధానాన్ని చెప్పాలని నిలదీసినప్పటికీ ముఖ్యమంత్రి మాట్లాడలేదన్న వీడియో క్లిప్పింగ్ కూడా విలేకరులకు చూపించారు. రేవంత్ రెడ్డి పదవీ కాంక్షతో నిత్యం అబద్ధాలతో గ్రామాల్లోని బ్రోకర్లను తలదన్నే విధంగా మాటలు మార్చి కాంగ్రెస్ అధిష్టానాన్ని మభ్యపెట్టి పిసిసి పదవి తెచ్చుకుని పార్టీలోని సీనియర్లను కాదని ముఖ్యమంత్రి పదవిని చేపట్టారని ఆరోపించారు. ఇటు ప్రజలను, అటు పార్టీ నాయకులను, సోనియా, రాహుల్, ప్రియాంక గాంధీలను కూడా తెలంగాణ ప్రజల ముందు హామీలు ఇస్తున్నట్లు ఇరికించి వారిని కూడా మోసం చేసిన ఘనుడు అని అన్నారు. ఆచరణకు సాధ్యం కాని హామీలు ఇచ్చి ప్రజలను ముంచడానికి బిసి రిజర్వేషన్లలో కూడా ఆ వర్గాల ప్రజలను నట్టేట ముంచడానికి కంకణం కట్టుకున్నారని మండిపడ్డారు. తమిళనాడు రాష్ట్రం అమలు చేస్తున్న రిజర్వేషన్లను ఇక్కడ అమలు చేయాలంటే దానికి రాజ్యాంగ సవరణ, కేంద్ర ప్రభుత్వ అనుమతి అవసరం అన్నారు. రాష్ట్రంలో అధికారంలో ఉన్న కాంగ్రెస్ కేంద్రంలో ప్రతిపక్ష పార్టీగా ఉన్నప్పుడు కేంద్రం ఏ విధంగా ప్రతిపక్ష ప్రభుత్వానికి సహకరిస్తుందా చెప్పాలన్నారు. అయినప్పటికీ కాంగ్రెస్ పెద్దలను కాదని బిజెపితో దోస్తాను చేస్తూ మాయమాటలతో కోటలు కడితే.. అవి నేడు పేకమేడల్లా కూలిపోయాయని, దాని ఫలితం ప్రజలు అనుభవించాల్సి వస్తోందన్నారు. ఈ సమావేశంలో మాజీ ఎంఎల్‌ఎలు తాటికొండ రాజయ్య, విడుదల సతీష్, శంకర్ నాయక్ తదితరులు పాల్గొన్నారు.

న్యూఢిల్లీ : దేశ రాజధాని ఢిల్లీలో జరిగిన అఫ్ఘన్ విదేశాంగ మంత్రి అమీర్ ఖాన్ ప్రెస్‌మీట్‌కు మహిళా జర్నలిస్టులను అనుమతించలేదు. వారికి ఆహ్వానాలు కూడా పంపించలేదు. దీనితో తాలిబన్ల నుంచి లింగ విద్వేషం ఇప్పటికీ కొనసాగుతోందనేది వెల్లడైంది. జర్నలిస్టులు, రాజకీయ నాయకుల నుంచి తీవ్రస్థాయిలో ఖండనలు వెలువడ్డాయి. అనూహ్య రీతిలో అఫ్ఘన్ మంత్రి భారత్ పర్యటనకు వచ్చారు. ప్రెస్‌మీట్‌కు మహిళా జర్నలిస్టులు రాకుండా జాగ్రత్తలు తీసుకున్నారు. ఇది దారుణం అని, ఇతర జర్నలిస్టులు ప్రెస్‌మీట్ బహిష్కరించి ఉండాల్సిందని కొందరు విలేకరులు తెలిపారు. కాంగ్రెస్ ప్రతినిధి షమా మెహ్మద్ స్పందిస్తూ మన దేశానికి వచ్చి ఇక్కడ తాలిబన్ల హుకుం చలాయించడం జరిగింది. ఇక్కడ మహిళలపై వివక్షతకు ఎవరు అనుమతించారని ప్రశ్నించారు. 

 ప్రపంచంలోనే అతి పెద్ద విమానం శంషాబాద్ ఎయిర్‌పోర్ట్ రన్‌వేపై శుక్రవారం ల్యాండింగ్ అయింది. ఈ విమానం పేరు ఇంటోనోవ్. ఈ విమానానికి నాలుగు శక్తివంతమైన టర్బోఫ్యాన్స్ ఇంజన్‌లు ఉన్నాయి. ఈ విమానం బరువు 1,81,000 కిలోలు. ఇందులో లాంగ్‌ట్రక్కులు నేరుగా లోడింగ్, అన్‌లోడింగ్ కోసం ర్యాంపులను ఉపయోగించి ప్రవేశించగలవు. విమానం వింగ్ 6,760 చదరపు అడుగులు. సైనిక కార్యకలాపాల నుండి మానవతా సహాయం వరకు ఇది ఖండాల అంతటా ప్రపంచంలోని భారీ ఆశలను మోస్తుంది. విమానం సామర్ధ్యత ఎక్కువ ఉండడంతో కార్గోకు చాలా ఉపయోగకరంగా ఉంటుంది. ప్రపంచంలో అత్యంత డిమాండ్ ఉన్న రవాణా అవసరాలకు ఈ విమానం ఉపయోగ పడుతోంది. కాగా, శంషాబాద్ ఎయిర్‌పోర్ట్‌లో ఈ భారీ విమానం ల్యాండింగ్ కావడం పట్ల జిఎంఆర్ సంస్థ చాలా సంతోషం వ్యక్తం చేసింది. ఎయిర్‌పోర్ట్ రన్‌వేపై ల్యాండింగ్ కావడంతో విమానయాన ప్రియులను అమితాశ్చర్యానికి గురిచేసింది.

స్టాక్‌హోమ్ : నోబెల్ శాంతి బహుమతికి ఎంపికైన వెనెజువెలా హక్కుల కార్యకర్త మరియా కొరీనా మచాడో తాజాగా తన సోషల్ మీడియాలో స్పందిస్తూ ట్రంప్‌పై ప్రశంసలు కురిపించారు. వెనెజువెలాప్రజలతోపాటు తమ ఉద్యమానికి మద్దతుగా నిలుస్తోన్న ట్రంప్‌నకు నోబెల్ శాంతి బహుమతి అంకితం ఇస్తున్నానని చెప్పారు. అంతకుముందు నార్వే నోబెల్ ఇన్‌స్టిట్యూట్ డైరెక్టర్ క్రిస్టియన్ బ్రెగ్ హార్ఫ్‌క్వెన్‌తో ఫోన్‌లో ఆమె మాట్లాడుతూ.. తీవ్ర భావోద్వేగానికి గురయ్యారు. శాంతి పురస్కారాన్ని ఇవ్వనున్న విషయాన్ని ఆమెకు ముందుగానే తెలియజేశారు.

సాధించాల్సింది ఎంతో ఉంది

“నాకు ఈ పురస్కారం రావడం నమ్మలేకపోతున్నా. మాటలు రావట్లేదు. వెనెజువెలా ప్రజల తరఫున ధన్యవాదాలు. మేము సాధించాల్సింది ఇంకా ఎంతో ఉంది. ఇందుకోసం తీవ్రంగా కృషి చేస్తున్నాం. తప్పకుండా విజయం సాధిస్తాం .. ఇదో ఉద్యమం అని మీరు అర్థం చేసుకున్నారని భావిస్తున్నా. అయితే ఇది నా ఒక్కరి గెలుపు కాదు. వ్యక్తిగతంగా నేను దీనికి అర్హురాలిని కాదని అనుకుంటున్నా. ఇది సమాజం మొత్తం సాధించిన విజయం. మా ప్రజలకు లభించిన అతి పెద్ద గుర్తింపు ” అని మరియా కొరీనా పేర్కొన్నారు. 

కిలోల కొద్ది బంగారం, వెండి

తోట విడిదిలో 17 టన్నుల పుట్టతేనె

అవినీతి మాయా మెహ్రా బినామీ వ్యాపారాలు

లంచాలలో రిటైర్డ్ చీఫ్ ఇంజనీరు రికార్డు

లోకాయుక్త విచారణలో వెలుగులోకి అక్రమాలు

భోపాల్ : మధ్యప్రదేశ్‌లో ఓ పబ్లిక్ వర్క్ డిపార్ట్‌మెంట్ విశ్రాంత చీఫ్ ఇంజనీరు అవినీతి సొమ్ము లెక్కించడానికి పెద్ద ఎత్తున నోట్ల లెక్కింపు యంత్రాలను రప్పించాల్సి వచ్చింది. గతంలో అధికారిగా చక్రం తిప్పిన ఈ జిపి మెహ్రా అవినీతి వ్యవహారాలపై లోకాయుక్త విచారణ జరిపింది. ఆదాయానికి మించిన ఆస్తుల ఈ కేసులో ఆయన నివాసాలపై జరిపిన దాడుల్లో అధికారులు నివ్వెరపొయ్యేలా నోట్ల కట్టలు గుట్టలు గుట్టలుగా దొరికాయి. ఇవి ఏ మేరకు ఉన్నాయనేది లోకాయుక్త సిబ్బంది కష్టపడి లెక్కలు తేల్చే పనిలో పడ్డారు.

కాగా రూ 3 కోట్ల విలువైన బంగారం, వెండి.. కిలోల కొద్ది తిజోరీలు, ఇతర చోట్ల దొరికాయి. ఇక ఏకంగా 17 టన్నుల తేనె కూడా ఆయన తోట విడిదిలో జరిపిన దాడుల్లో దొరికిందని అధికారులు తెలిపారు. ఈ అవినీతి అనకొండ గుట్టులాగేందుకు భోపాల్, నర్మదాపురంల్లోని ఆయన నివాసాలలో సోదాలు నిర్వహించారు. లోకాయుక్తకు చెందిన డిఎస్‌పి ర్యాంక్ అధికారుల బృందం దర్యాప్తు చేపట్టింది. ఈ బృందం భారీ పోలీసు బందోబస్తు నడుమ సోదాలకు దిగింది. మణిపురం కాలనీలోని ఆయనకు చెందిన ఇంట్లో అధికారులు రూ 9 లక్షల నగదు, దాదాపు అరకోటి బంగారం దొరికించుకున్నారు. రూ 56 లక్షల విలువైన ఎఫ్‌డి పత్రాలు స్వాధీనపర్చుకున్నారు.

ఇంతటితో అయిపోలేదు. ఆయనకే చెందిన కళ్లు చెదిరేలా ఉన్న రెండో ఇల్లు ఓపాల్ రెగెన్సీలో 26లక్షల నగదు, రూ మూడున్నర కోట్లకు పైగా విలువ చేసే 2.6 కిలో గ్రాముల బంగారం , ఐదున్నర కిలోల వెండిని స్వాధీనపర్చుకున్నారు. వీటన్నింటికి కలిపి లెక్కకట్టే పనిలో పడ్డారు. ఇంతటితో ఆగిపోలేదు. ఆయన అవినీతి కార్యకలాపాలు ఎంతబాగా సాగాయనేది నర్మదాపురం శివార్లలోని ఆయనకు చెందిన ఫార్మ్‌హౌస్ వైభవంతో వెలుగులోకి వచ్చింది. ఇక్కడ టన్నుల కొద్ది తేనె, ట్రాక్టర్లు, నిర్మాణంలో ఉన్న 32 కాటేజ్‌లు , ఏడు పూర్తి అయిన కాటేజీలు, పైగా ఓ వ్యక్తిగత కొలను, అందులో బోలెడు చేపలు పట్టే యంత్రాలు, పలు రకాల సామాగ్రి ఉన్నాయి. పైగా ఓ గోశాల, ఓ గుడి, ఫోర్డ్ , స్కోడా , క్లా సోనెట్, మారుతి క్లాజ్ వంటి అనేక విలువైన కార్లు ఆయన కుటుంబ సభ్యుల పేర్లపై రిజిస్టర్ అయి ఉన్నాయని గుర్తించారు. ఈ తోట విడిది గృహం ఏ సౌదీ రాజు విలాసాల నివాసాలకు ఏ కోశానా తీసిపోని రాజరికంతో ఉంది.

మెహ్రా తన వ్యాపారాన్ని విస్తరించుకుని స్థానిక గోవిందాపుర ఇండిస్ట్రియల్ ప్రాంతంలో కెటి ఇండస్ట్రీ పేరిట పలు సముదాయాలను నిర్వహిస్తున్నాడు. ఇక్కడ విరివిగా పలు పరికరాలు, ముడిసరుకులు కోట్లాది రూపాయల విలువచేసేవి కనుగొన్నారు. ఇక అనేక చోట్ల ఆయన సంబంధిత కీలక పత్రాలను అధికారులు స్వాధీనం చేసుకుని , సాగిన వ్యాపార లావాదేవీల ఆరాపనిలో పడ్డారు. పలు బినామి వ్యాపారాలను కూడా చల్లగా నిర్వహిస్తున్నాడని నిర్థారణ అయింది.

ఈ మొత్తం ఆస్తులు విలువ, పట్టుబడ్డ కోటానుకోట్ల నగదు, బంగారం, వెండి ఇతరత్రా విలువైన ఆస్తులు, పైగా ఎఫ్‌డిల లెక్కలు అన్నీ తేలి, ఈ మొత్తం ఎంత మేర వరకూ ఉంటుందనేది తెలియడానికి తమకు ఎంతకాలం పడుతుందో తెలియదని లోకాయుక్త అధికారి ఒకరు చెప్పారు. తాము ఇంతవరకూ అవినీతి వ్యవహారాలపై సాగించిన దర్యాప్తు క్రమంలో వెలుగులోకి వచ్చిన మొత్తం , ఇప్పుడు ఈ ఒక్క మాజీ అధికారి సాగించిన వ్యవహారంలో దక్కించుకున్న మొత్తంతో పోలిస్తే దిగదుడుపే అవుతుందని ఓ అధికారి వ్యాఖ్యానించారు.

“నా దేశం కుప్పకూలుతుంటే … నేను ఇంట్లో కూర్చుని చూడలేను. ప్రజల జీవితాల్లో మార్పు రావాలి. బుల్లెట్ల బదులు బ్యాలెట్లను ఎంచుకుందాం” దాదాపు పాతికేళ్ల క్రితం మరియా కొరీనా చెప్పిన మాటలివి. నాటి నుంచి ప్రజాస్వామ్య హక్కులను కాపాడటం కోసం ఆమె నిరంతరం పోరాడుతున్నారు. అణచివేతలకు వెరవకుండా ప్రజల తరఫున గళం వినిపిస్తూనే ఉన్నారు. నియంతృత్వ శృంఖలాల నుంచి దేశాన్ని కాపాడేందుకు ఆమె చేస్తోన్న ఈ పోరాటమే … ప్రతిష్ఠాత్మక నోబెల్ పురస్కారాన్ని అందించింది. ఈ ఏడాది నోబెల్ శాంతి బహుమతిని వెనెజువెలా విపక్ష నేత మరియాకు అందిస్తున్నట్టు అకాడమీ ప్రకటించింది.

స్వచ్ఛంద సంస్థతో మొదలై…

మరియా కొరీనా మచాడో 1967 అక్టోబరు 7న జన్మించారు. తల్లి కొరీనా పరిస్కా సైకాలజిస్ట్. తండ్రి హెన్రిక్ మచాడో జులావోగా స్టీల్ వ్యాపారవేత్త. ఆమె పూర్వీకులు వెనెజువెలా స్వతంత్ర పోరాటంలో పాల్గొన్నారు. మరియా ఇండస్ట్రియల్ ఇంజినీరింగ్‌లో డిగ్రీ, ఫైనాన్స్‌లో మాస్టర్ డిగ్రీ పూర్తి చేశారు. 1992 లో వీధి బాలలు, అనాథ చిన్నారుల కోసం అటెనియా ఫౌండేషన్‌ను స్థాపించారు. ఇక్కడ పనిచేస్తున్నప్పుడే వెనెజువెలాలో ప్రజాస్వామ్య హక్కుల కోసం గళమెత్తారు. ఆ సమయంలో దేశ ద్రోహం , కుట్ర కేసులను ఎదుర్కొన్నారు.

అత్యధిక మెజార్టీతో పార్లమెంట్‌కు..

2002 లో సుమేట్ అనే స్వచ్ఛంద సంస్థకు సహ వ్యవస్థాపకురాలిగా పనిచేశారు. ఈ సంస్థ ప్రజల ఓటింగ్ హక్కులను కాపాడటం, పారదర్శక ఎన్నికల నిర్వహణ కోసం పనిచేసింది. దాదాపు పదేళ్ల పాటు ఈ స్వచ్ఛంద సంస్థతో కలిసి పనిచేసిన ఆమె, సొంతంగా వెంటే మెనెజువెలా పేరుతో లిబరల్ పొలిటికల్ పార్టీని స్థాపించారు. 2010 లో జాతీయ అసెంబ్లీకి పోటీ చేశారు. ఆ ఎన్నికల్లో అత్యధిక ఓట్లు సాధించి విజేతగా నిలిచిన అభ్యర్థిగా చరిత్ర సృష్టించారు. 2011 లో తొలిసారి జాతీయ అసెంబ్లీలో అడుగుపెట్టారు.

బహిష్కరణకు గురై..

2014 మార్చిలో వెనెజువెలా లో తీవ్ర స్థాయిలో ఆందోళనలు జరుగుతున్న సమయంలో పనామాలో జరిగిన ఆర్గనైజేషన్ ఆఫ్ అమెరికన్ స్టేట్స్ సదస్సులో పాల్గొన్నారు. అక్కడ వెనెజువెలా పరిస్థితిని గురించి ప్రసంగించారు. ఇది స్వదేశంలో పాలకులకు ఆగ్రహం తెప్పించింది. అన్ని రాజకీయ పార్టీల నుంచి ఆమెపై ఒత్తిడి రావడంతో మరో ఏడాది పదవీ కాలం ఉండగానే మరియాను జాతీయ అసెంబ్లీ నుంచి బహిష్కరించారు. అనంతరం ఆమెపై పలు కేసులు నమోదు చేశారు.

నికోలస్ మదురోపై పోటీకి దిగి…

2014 నుంచి 2021 వరకు స్థానిక రేడియో స్టేషన్‌లో ప్రసారకర్తగా పని చేశారు. రాజకీయ విశ్లేషణలకు సంబంధించిన టాక్‌షోకు హోస్ట్‌గా వ్యవహరించారు. 2023 లో మళ్లీ రాజకీయాల్లోకి తిరిగి వచ్చారు. ప్రతిపక్ష పార్టీ ప్రైమరీ ఎన్నికల్లో 90 శాతం మెజార్టీ సాధించారు. 2024 లో జరిగిన అధ్యక్ష ఎన్నికల్లో నికోలస్ మదురోకు పోటీగా ఆమె అభ్యర్థిత్వం కూడా ఖరారైంది. కానీ కేసులు , ఇతరత్రా ఆరోపణలు చూపించి వెనెజువెలా సర్కారు ఆమెపై 15 ఏళ్ల పాటు అనర్హత వేటు వేసింది. దీన్ని ఆ దేశ సుప్రీం కోర్టు కూడా సమర్థించింది. దీంతో అధ్యక్ష ఎన్నికల్లో పోటీ చేసే అవకాశాన్ని కోల్పోవాల్సి వచ్చింది.

అజ్ఞాతంలో ఉంటూనే..

అనర్హత కారణంగా వైదొలిగినా, ప్రజల పక్షాన పోరాడటం మాత్రం ఆమె ఆపలేదు. ప్రజాస్వామ్య హక్కుల కోసం డిమాండ్ చేస్తూ నియంతృత్వ పాలనపై ఆమె ఆందోళనలు చేపట్టారు. ఈ క్రమం లోనే ఈ ఏడాది జనవరిలో మరియాను భద్రతా దళాలు అదుపు లోకి తీసుకున్నట్టు వార్తలు వచ్చాయి. ఆ తరువాత ఆమెను విడిచిపెట్టి , సురక్షిత ప్రాంతానికి తరలించినట్టు కథనాలు వెలువడ్డాయి. అయితే వాటి నుంచి ఆమె ప్రజా జీవితంలో కన్పించట్లేదు. కానీ సామాజిక మాధ్యమాల వేదికగా ప్రజలను చైతన్యపర్చేందుకు పోరాటం చేస్తూనే ఉన్నారు. ప్రజల కోసం ఆమె చూపిన తెగువ ఎంతో మందితో స్ఫూర్తి నింపిందని నోబెల్ అకాడమీ వెల్లడించింది.

కన్న తల్లిని కొట్టి.. ఆ తర్వాత మనస్తాపంతో ఓ బిజెపి నేత ఆత్మహత్య చేసుకున్నాడు. ఈ విషాద సంఘటన హైదరాబాద్ నగరంలోని ఉప్పల్ లో చోటుచేసుకుంది. వివరాల్లోకి వెళితే.. ఇటీవల కుటుంబ కలహాల కారణంగా ఉప్పల్ బిజెపి లీడర్ రేవల్లి రాజు.. తన తల్లిని కొట్టినట్లు తెలుస్తోంది. ఈ ఘటనకు సంబంధించిన వీడియోను ఎవరో సోషల్ మీడియాలో పోస్ట్ చేశారు. తల్లిని కొట్టిన వీడియో నెట్టింట వైరల్ కావడంతో రేవల్లి రాజు మనస్తాపానికి గురై.. బీబీనగర్ పెద్ద చెరువులో దూకి ఆత్మహత్య చేసుకున్నాడు. సమాచారం అందుకున్న పోలీసులు వెంటనే సంఘటనాస్థలానిక చేరుకుని స్థానికుల సాయంతో మృతదేహాన్ని బయటకు తీసుకొచ్చారు. అనంతరం పోస్ట్ మార్టం కోసం ఆస్పత్రికి తరలించారు. 

ఆత్మహత్యకు ముందు రేవల్లి రాజు సెల్ఫీ వీడియో తీసుకున్నాడు. ప్రపంచంలో ఏ కొడుకు కూడా తన తల్లిని కొట్టాలనుకోడని.. తనను మోసం చేసిందని భాద, కోపంతో తన తల్లిపై చేయి చేసుకున్నానని.. అందుకు తనను క్షమించాలని సెల్పీ వీడియోలో ఆవేదన వ్యక్తం చేశాడు. తన భార్య, పిల్లలు అమాయకులని.. తాను చనిపోయిన తర్వాత తన కుటుంబ సభ్యులకు అండగా ఉండాలని తన మిత్రులను వేడుకున్నాడు. రేవల్లి రాజు ఆత్మహత్యతో అతని భార్య, పిల్లలు కన్నీరు మున్నీరుగా విలపిస్తున్నారు. కాగా, ఈ ఘటనపై కేసు నమోదు చేసి దర్యాప్తు చేస్తామని పోలీసులు పేర్కొన్నారు.

ద్దపల్లి జిల్లా, రామగిరి మండలం, సెంటినరీకాలనీ పరిధిలో యువకుడి దారుణ హత్య సంచలనం రేపుతోంది. శుక్రవారం మధ్యాహ్నం సెంటినరీకాలనీ సిటూ200 నంబర్ గల క్వార్టర్ వద్ద కోట చిరంజీవి (38) అనే యువకుడిని గుర్తు తెలియని ముగ్గురు వ్యక్తులు ఇనుపరాడ్, కత్తితో దాడి చేసి అతి కిరాతకంగా హతమార్చారు. స్థానికుల కథనం ప్రకారం.. న్యూమారేడుపాక పోతనకాలనీకి చెందిన చిరంజీవి మీసేవా కేంద్రం నిర్వహిస్తూ జీవనం సాగిస్తున్నాడు. హత్య జరిగిన సమయంలో సెంటినరీకాలనీలోని ఐకెపి కార్యాలయానికి ఆయన రాగానే అదే సమయంలో ముగ్గురు దుండగులు అతనిపై దాడి చేసి, రాళ్లతో అతిదారుణంగా హత్య చేసినట్లు తెలుస్తోంది. పోలీసుల ప్రాథమిక దర్యాప్తులో మృతుని భార్య కొంతకాలం క్రితమే మృతి చెందిందని, అనంతరం మరో మహిళతో సన్నిహితంగా ఉంటున్నట్లు సమాచారం. ఇదే పరిణామం ఈ హత్యకు దారితీసి ఉండొచ్చని అనుమానాలు వ్యక్తమవుతున్నాయి. ఘటనా స్థలానికి చేరుకున్న గోదావరిఖని ఎసిపి మడత రమేష్, మంథని సిఐ రాజు, రామగిరి ఎస్‌ఐ టి.శ్రీనివాస్ కేసు నమోదు చేసి, విచారణ ప్రారంభించారు. నిందితుల కోసం గాలింపు చర్యలు చేపట్టారు. పట్టపగలు యువకుడి హత్య మండలంలో సంచలనంగా మారింది. 

డిగ్రీ చదువుతున్న విద్యార్థిని ఆత్మహత్య చేసుకున్న ఘటన లాలాగూడ పోలీస్‌స్టేషన్ పరిధిలో చోటు చేసుకుంది. పోలీసులు, బంధువులు తెలిపిన వివరాల ప్రకారం…. లాలాపేట సాయిబాబా దేవాలయం సమీపంలో నివాసముంటున్న రిటైర్ట్ రైల్వే ఉద్యోగి ప్రమోద్‌కుమార్ పెద్ద కూతురు మౌలిక (19) అలియాస్ వెన్నల తార్నాకలోని రైల్వే డిగ్రీ కళాశాలలో బిఏ ద్వితీయ సంవత్సరం చదువుతుంది. మౌలిక బుధవారం సాయంత్రం 5 గంటల ప్రాంతంలో ఇంట్లో ఎవరూ లేని సమయంలో సీలింగ్ ఫ్యాన్‌కు ఉరేసుకుని ఆత్మహత్య చేసుకుంది. సమాచారం తెలుసుకున్న పోలీసులు ఘటనా స్ద్థలానికి చేరుకుని మృతదేహాన్ని పోస్టుమార్టం నిమిత్తం గాంధీ ఆసుపత్రికి తరలించారు.

మాణికేశ్వర్‌నగర్‌కు చెందిన ఓ వ్యక్తి కొన్ని నెలల నుండి రైల్వే డిగ్రీ కాలేజీలో వాలీబాల్ కోచ్‌గా ఉంటూ మౌలికను ప్రేమ పేరుతో వేధిస్తున్నాడని బంధువులు ఆరోపిస్తున్నారు. ఈ మేరకు కేసు నమోదు చేసుకున్న పోలీసులు దర్యాప్తు చేపట్టారు. మృతురాలి సెల్‌ఫోన్‌లో కూడా డేటా పూర్తిగా డిలీట్ చేసి ఉందని, డేటాను రిట్రీవ్ చేస్తున్నట్లు తెలిపారు. మౌలిక ఆత్మహత్య కేసులో అనుమానిస్తున్న వ్యక్తి పరారీలో ఉన్నాడని, అతడి కోసం గాలిస్తున్నట్లు సీఐ తెలిపారు.