Trending

ముఖ్యమంత్రి రేవంత్‌రెడ్డి సగం పాలనతో రాష్ట్ర ప్రజలతో పాటు రైతులు ఆగమాగం అవుతున్నారని మాజీ మంత్రి, సిద్దిపేట ఎంఎల్‌ఎ తన్నీరు హరీశ్‌రావు మండిపడ్డారు. బుధవారం జిల్లా కేంద్రంలోని మార్కెట్ యార్డులో ధాన్యం కొనుగోలు కేంద్రాన్ని ఆయన ప్రారంభించి మాట్లాడారు. రేవంత్‌రెడ్డి ఏ పని చేసినా సగమే చేస్తారు తప్ప పూర్తిగా చేసింది ఎక్కడా లేదని ఎద్దేవా చేశారు. రైతులు పండించిన ప్రతి పంటను రాష్ట్ర సర్కారే కొనుగోలు చేయడంతో పాటు బోనస్ ఇస్తామని గొప్పలు చెప్పి, ్డ ధాన్యం కొనుగోలుపై నిబంధనలు పెట్టడం సిగ్గుచేటని అన్నారు. ప్రతి ఎకరాకు 18 క్వింటాళ్ల మక్కను కొనుగోలు చేస్తామని రైతుల ఉసురు పోసుకుంటున్నారని మండిపడ్డారు. రైతులు పండించిన సగం పంటను కొనుగోలు చేసి మిగతా పంట బయట అమ్ముకోవాలంటే రైతులు తీవ్రంగా నష్టపోతారని అన్నారు.

రైతులు పండించిన పంటను కొనుగోలు చేస్తామని ఎన్నికల ముందు గొప్పలు చెప్పి, అధికారంలోకి రాగానే రైతుల పట్ల నిర్లక్ష్యం వహిస్తున్నారని ఆగ్రహం వ్యక్తం చేశారు. ఎకరానికి కనీసం 25 నుంచి 30 ఎకరాల మక్కా పంట వస్తుందని అన్నారు. రైతులు పండించిన ప్రతి గింజను రాష్ట్ర సర్కారే కొనుగోలు చేయాలని డిమాండ్ చేశారు. అడగంగా అడగంగా అరిగోస పెట్టి ధాన్యం కొనుగోలు కేంద్రాలను ఆలస్యంగా ప్రారంభించడంతో దళారులకు తక్కువ దొరకే రైతులు ధాన్యాన్ని విక్రయించి ఎంతో నష్టపోయారని ఆవేదన వ్యక్తం చేశారు. ఒక్క సిద్దిపేట మార్కెట్ యార్డులోనే 14 వేల క్వింటాళ్ల మక్క దళారుల పాలైందని అన్నారు. ఒక పంటకు బోనస్ ఇచ్చి మరొక పంటకు ఎగ్గొట్టారని, సగం మంది రైతులకు రుణమాఫీ చేయలేదన్నారు. ఆయన వెంట వ్యవసాయ, మార్కెటింగ్ శాఖ అధికారులు, నాయకులు మచ్చ వేణుగోపాల్ రెడ్డి, నల్ల నరేందర్ రెడ్డి, ఎడ్ల అరవింద్ రెడ్డి, నర్సింలు, రమేష్ తదితరులు ఉన్నారు.

పశ్చిమ బెంగాల్ లోని ఉలుబేరియాలో ప్రభుత్వ ఆసుపత్రిలో మహిళా వైద్యురాలిపై దాడి చేసి, ఆత్యాచారం చేస్తామని బెదిరించారనే ఆరోపణపై ముగ్గురు వ్యక్తులను అరెస్ట్ చేశారు.కోల్ కతాలోని ఆర్ జి కర్ మెడికల్ కాలేజీ, హాస్పిటల్ లో వైద్యురాలిపై దారుణ అత్యాచారం, హత్య జరిగినన ఏడాది తర్వాత ఈ సంఘటన జరగడంతో అధికార తృమమూల్ కాంగ్రెస్, ప్రతిపక్ష బీజేపీ మధ్య పరస్పర విమర్శలకు ఆజ్యం పోసింది.హౌరా జిల్లాలోని ఉలుబేరియాలోని శరత్ చంద్ర చటోపాధ్యాయ ప్రభుత్వ వైద్యకళాశాల, ఆస్పత్రిలో సోమవారం నాడు ఈ సంఘనట జరిగింది. ఆసుపత్రిలో చికిత్సపొందుతున్న రోగి బంధువులే నిందితులు. వారు సోమవారం మధ్యాహ్నం వైద్యురాలితో ఘర్షణ పడి ఆమెపై దాడి చేశారని ఆరోపించారు. ఆ మహిళా డాక్టర్ ఫిర్యాదు మేరకు పోలీసులు వారిని అరెస్ట్ చేశారు. అరెస్ట్ అయిన వారిలో షేక్ హసిబుల్ అనే వ్యక్తి హోమ్ గార్డ్ గా పనిచేస్తున్నాడు.అతడితో పాటు షేక్ సామ్రాట్, షేక్ బాబులాల్ అనే వారిని అరెస్ట్ చేశారు. ఈ సంఘటన తెలియడంతోనే బెంగాల్ లోని వైద్యులకు చెందిన జాయింట్ ఫోరం ఆఫ్ డాక్టర్స్ ఉలుబేరియా ఆస్పత్రిని సందర్శించింది.

విధినిర్వహణలో ఉన్న డాక్టర్ల భద్రతపై ఆందోళన వ్యక్తం చేసింది.రాష్ట్రంలో మహిళలు, మహిళా డాక్టర్ల భద్రత విషయంలో నిర్లక్ష్య వైఖరి పట్ల రాష్ట్ర ప్రభుత్వాన్ని బీజేపీ దుమ్మెత్తి పోసింది. ఆర్ జి కర్ ఆస్పత్రి ఘటన నుంచి మమత సర్కార్ ఎలాంటి గుణపాఠం నేర్చుకోలేదని బీజేపీ రాష్ట్ర అధ్యక్షుడు, రాజ్యసభ ఎంపీ సమిక్ భట్టాచార్య విమర్శించారు. తృణమూల్ ఒక దారుణ సమాజాన్ని సృష్టించిందని, ఇక్కడ హోమ్ గార్డ్ లు, పౌర వలంటీర్లు పార్టీలో భాగం అయ్యారని, వారికి పోలీసులు అన్నా లెక్కలేదని ఆయన అన్నారు. ఆస్పత్రులలో డాక్టర్లపై దాడులు అరికట్టే ఏర్పాట్లు లేవని, సిసిటివి కెమెరాలే లేవని ఆయన విమర్శించారు. బెంగాల్ లో మమతా బెనర్జీ పాలనలో మహిళలకు రక్షణలేకుండా పోయిందని కేంద్ర మంత్రి సుకాంత మజుందార్ అన్నారు. ఉలుబేరియా సంఘటన ను తృణమూల్ ప్రతినిధి అరుణ్ చక్రవర్తి ఖండించారు. ఇది దురదృష్టకరమైనదని అన్నారు. నిందితులు అందరినీ అరెస్ట్ చేసినట్లు తెలిపారు.

మంత్రివర్గం రేపు మరోసారి సమావేశం కానుంది. గురువారం మధ్యాహ్నం 3 గంటలకు సచివాలయంలో సిఎం రేవంత్ అధ్యక్షతన ఈ భేటీ జరుగనుంది. బిసి రిజర్వేషన్ల విషయంలో హైకోర్టు, సుప్రీంకోర్టు ఆదేశాలపై అధికారుల కమిటీ నివేదికపై మంత్రివర్గం చర్చించనుంది. అలాగే ప్రభుత్వం తీసుకోవాల్సిన తదుపరి చర్యలపై కూడా ఈ సమావేశంలో నిర్ణయం తీసుకోనున్నారు. ఇదే జరిగితే స్థానిక సంస్థల ఎన్నికలపై నెలకొన్న గందరగోళానికి తెరపడనుంది. పాత పద్ధతిలోనే ఎన్నికలకు వెళ్లే అవకాశం ఉందని రాజకీయ వర్గాల్లో ఊహాగానాలు వినిపిస్తుండగా మంత్రివర్గ సమావేశంపై సర్వత్రా ఆసక్తి నెలకొంది. కాళేశ్వరం ప్రాజెక్టు, ఎస్‌ఎల్‌బిసి పునరుద్ధరణ, ఎస్‌ఆర్‌ఎస్‌పి రెండో దశ పనులపై కూడా ఈ భేటీలో చర్చ జరిగే అవకాశం ఉందని తెలుస్తోంది. అలాగే రైతు భరోసా స్కీమ్‌కు సంబంధించి కీలక నిర్ణయం తీసుకునే అవకాశం ఉన్నట్టుగా సమాచారం. ఈనెల 16వ తేదీన కేబినెట్ సమావేశం కాగా, నేడు మరోసారి కేబినెట్ భేటీ జరుగనుంది.

భారత మేటి జావెలిన్ త్రోయర్ , ఒలింపిక్ పతక విజేత నీరజ్ చోప్రాకు అరుదైన గౌరవం దక్కింది. భారతీయ ఆర్మీలో గౌరవ ప్రదమైన లెఫ్టినెంట్ కల్నల్ ర్యాంక్‌ను ఆయనకు అందజేశారు. ఢిల్లీ లోని సౌత్ బ్లాక్‌లో ఆయన్ను ఆ ర్యాంక్‌తో సన్మానించారు. కేంద్ర రక్షణ మంత్రి రాజ్‌నాథ్ సింగ్, చీఫ్ ఆఫ్ ఆర్మీ స్టాఫ్ జనరల్‌ఉపేంద్రద్వివేది ఈ కార్యక్రమంలో పాల్గొన్నారు. నీరజ్‌చోప్రా కుటుంబీకులు కూడా ఈ ఈవెంట్‌ను ప్రత్యక్షంగా వీక్షించింది. పట్టుదలకు, దేశభక్తికి నీరజ్‌చోప్రా నిదర్శనమని రాజ్‌నాథ్ అన్నారు. ప్రభుత్వగెజిట్ ప్రకారం నీరజ్ చోప్రా నియామకం ఏప్రిల్ 15 న జరిగింది.

జూనియర్ కమీషన్ ఆఫీసర్‌గా నయిబ్ సుబేదార్ ర్యాంకుతో నీరజ్ చోప్రా 2016 ఆగస్టులో భారతీయ సైన్యంలో చేరారు. చోప్రాకు గతంలో పద్మశ్రీ,మేజర్ ధ్యాన్ చంద్ ఖేల్ రత్న ,అర్జున అవార్డులు దక్కాయి. పరమ విశిష్ట సేవా మెడల్, విశిష్ట సేవా మెడల్ కూడా ఆయన గెలుచుకున్నారు. 2020 లో టోక్యోలో జరిగిన ఒలింపిక్ క్రీడల్లో జావెలిన్ త్రోయర్ నీరజ్ చోప్రా స్వర్ణ పతకం గెలుచుకుని చరిత్ర సృష్టించారు. ఆ తర్వాత 2024 వరల్డ్ అథ్లటిక్స్‌లో గోల్డ్ మెడల్ కొట్టారు. ఏషియన్ , కామన్‌వెల్త్ గేమ్స్‌తో పాటు డైమండ్ లీగ్‌ల్లోనూ అతను స్వర్ణ పతకాలు సాధించారు.నీరజ్ చోప్రా తన జావెలిన్‌ను అత్యుత్తమంగా 90.23 మీటర్లదూరం విసిరి రికార్డు సృష్టించారు.

శ్రీలంకకు చెందిన ఓ రాజకీయ నేత పార్టీ ఆఫీస్‌లో దారుణ హత్యకు గురయ్యారు. వెలిగామా కౌన్సిల్ ఛైర్మన్ లసంత విక్రమ శేఖర (38) బుధవారం తన కార్యాలయంలో ప్రజల సమస్యలు తెలుసుకుంటున్న సమయంలో ఇద్దరు దుండగులు ఆఫీస్ లోకి చొరబడ్డారు. తమ వద్ద ఉన్న గన్‌తో విక్రమశేఖరపై అనేక రౌండ్లు కాల్పులు జరిపారు. అనంతరం పరారయ్యారు. తీవ్రంగా గాయపడిన విక్రమశేఖరను ఆస్పత్రికి తరలిస్తుండగా, ప్రాణాలు కోల్పోయారు. సమాచారం అందుకున్న పోలీసులు సంఘటన స్థలానికి చేరుకుని దర్యాప్తు ప్రారంబించారు. కేసు నమోదు చేసుకొని విచారణ చేపట్టామని, దుండగుల కోసం గాలింపు చర్యలు కొనసాగుతున్నాయని పోలీసులు వెల్లడించారు. దాడికి కారణాలు తెలియాల్సి ఉంది. వెలిగామా కౌన్సిల్ నియంత్రణపై ప్రతిపక్ష సొమాగి జన బలవేగయ (ఎస్‌జెబి) పార్టీకి అధికార పార్టీ నేషనల్ పీపుల్స్ పవర్ పార్టీకి మధ్య తీవ్ర పోరు ఉన్న నేపథ్యంలో కౌన్సిల్ ఛైర్మన్ హత్యకు గురికావడం అక్కడి రాజకీయాల్లో తీవ్ర చర్చనీయాంశమైంది. 

 వ్యవసాయానికి, రైతుల సంక్షేమానికి తెలంగాణ రాష్ట్ర ప్రభుత్వ పెద్ద పీట వేస్తుందని స్టేషన్ ఘన్‌పూర్ ఎమ్మెల్యే కడియం శ్రీహరి అన్నారు. రఘునాథపల్లి మండలంలో ఖిలాషాపూర్, జాఫర్‌గూడెం, మంగల్‌తండా, వెల్ది గ్రామాల్లో ఐకేపీ ఆధ్వర్యంలో ఏర్పాటుచేసిన ధాన్యం కొనుగోలు కేంద్రాలను బుధవారం ఎమ్మెల్యే కడియం శ్రీహరి ప్రారంభించారు. ఈ సందర్భంగా ఎమ్మెల్యే మాట్లాడుతూ.. ధాన్యం కొనుగోలు కేంద్రాల్లో రైతులకు ఎలాంటి ఇబ్బందులు కలుగకుండా నిర్వాహకులు చూడాలన్నారు. కొనుగోలు కేంద్రానికి వచ్చిన ధాన్యం తడవకుండా సరిపడే టార్పాలిన్లను అందుబాటులో ఉంచాలన్నారు. మహిళా సంఘాలకు ధాన్యం కొనుగోలు కేంద్రాలను కేటాయిస్తున్నట్లు తెలిపారు. ధాన్యం కొనుగోలు కేంద్రాల నిర్వాహకులు ఎవరికీ ఒక్క పైసా ఇవ్వకూడదన్నారు. రైతులు ప్రభుత్వం ఏర్పాటుచేసిన కేంద్రాల్లోనే ధాన్యం అమ్ముకోవాలని, దళారుల వద్దకు వెళ్లి నష్టపోవద్దన్నారు. ఏ గ్రేడ్ రకానికి ధాన్యానికి క్వింటాళుకు రూ. 2389, గ్రేడ్. 2కు 2369 మద్దతు ధరతోపాటు ప్రతీ క్వింటాళు సన్న ధాన్యానికి రూ. 500 రైతు ఖాతాలో జమ చేయడం జరుగుతుందన్నారు.

కాంగ్రెస్ ప్రభుత్వ రైతు పక్షపాతి అని దేశంలోనే ఎక్కడాలేని విధంగా సంక్షేమ పథకాలను కాంగ్రెస్ అమలుచేస్తుందన్నారు. 20 లక్షల మంది రైతులకు రూ. 21 వేల కోట్ల రుణమాఫీ చేసినట్లు తెలిపారు. రాష్ట్రంలో ఆరు గ్యారంటీలను అమలుచేస్తున్నామన్నారు. నియోజకవర్గ అభివృద్ధి కోసం ఇప్పటి వరకు రూ. 1075 కోట్ల అభివృద్ధి పనులు చేపట్టినట్లు తెలిపారు. అనునిత్యం నియోజకవర్గ అభివృద్ధి కోసమే పనిచేస్తానని, కొంత మంది నాయకులు పని పాటా లేక ప్రెస్ మీట్లను ఏర్పాటుచేసి అక్కరకు రాని మాటలు మాట్లాడుతున్నారన్నారు. అనంతరం రఘునాథపల్లి ఎంపీడీఓ కార్యాలయం ఆవరణలో వనిత టీ స్టాల్, ఇందిరమ్మ నమూనా ఇంటిని ప్రారంభించారు. ఈ కార్యక్రమంలో జిల్లా గ్రంథాలయ సంస్థ ఛైర్మన్ మారుజోడు రాంబాబు, జిల్లా కాంగ్రెస్ ఉపాధ్యక్షుడు లింగాల జగదీశ్‌రెడ్డి, వర్కింగ్ ప్రెసిడెంట్ మాసంపెల్లి లింగాజీ, జిల్లా వ్యవసాయాధికారి, జిల్లా డ్వామా పీడీ జనగామ ఆర్డీవో గోపిరామ్, తహసీల్దారు ఫణికిషోర్, మండల కాంగ్రెస్ అద్యక్షుడు కోళ్ల రవిగౌడ్, మేకల నరేందర్ వరలక్ష్మి, గాద మహేందర్‌రెడ్డి, మార్కెట్ డైరెక్టర్ ఎండీ భాషుమియా, తోటకూర రమేశ్, పర్శ సిద్దేశ్వర్, లోనె శ్రవణ్‌కుమార్, మంద రమేశ్, హుస్సేన్ నాయక్, కావటి భాస్కర్, అలీ బిల్ నర్సయ్య, ఈశ్వరయ్య, రేణుగౌడ్, వివిధ గ్రామాల నాయకులు తదితరులు పాల్గొన్నారు.