Trending

హర్యానాలోని రొహతక్‌లో ఉన్న మహార్షి దయానంద యూనివర్శిటీ (ఎండియు) అధికారులు మహిళా పారిశుద్ధ కార్మికులు ఇద్దరి పట్ల రాక్షసంగా, జుగుప్సాకరంగా వ్యవహరించారు. పారిశుద్ధం పనుల్లో వేగంగా పనిచేయని వారిని నిలిపివేసి అవమానించారు. తమకు నెలసరి రోజులు అని , కడుపు నొప్పితో పనిచేయలేకపోతున్నామని చెప్పగా , ఈ అధికారులు వితండవాదానికి దిగారు. మీకు అదే ..అని నమ్మడానికి ఏదైనా ఆధారం ఉందా? బాత్‌రూంకు వెళ్లి మీ లోపలి భాగాలు, శాపిటరీ ప్యాడ్స్ ఫోటోలు తీసుకుని రండి, చూసి నిజమైతే పనిలో ఉంచుతాం లేకపోతే ఏకంగా ఉద్యోగం నుంచి ఊడబెరుకుతామని బెదిరించారు. దీనితో వారు చేసేది లేక ఆ పని చేశారు. తరువాత విషయం ఇతర సిబ్బందికి తెలియడం, పెద్ద ఎత్తున విద్యాసంస్థలో పలువురు గుమికూడి ఆందోళనకు దిగడంతో పరిస్థితి ఉద్రిక్తతకు దారితీసింది. దీనితో అధికారులు రంగంలోకి దిగి ఇద్దరు శానిటరీ సూపర్‌వైజర్లు వితేందర్, వినోద్ హుండాను , అసిస్టెంట్ రిజిస్ట్రార్ శ్యామ్ సుందర్‌ను సస్పెండ్ చేశారు. తరువాత స్థానిక పోలీసు స్టేషన్‌లో వారిపై కేసులు నమోదు చేశారు. నాలుగైదు రోజుల క్రితమే దారుణ ఘటన జరిగింది. అయితే ఉన్న ఉపాధి పోతుందనే భయంతో బాధితులు తమ ఇబ్బందిని తెలియచేసుకోలేదు. 

పెళ్లి వేడుక ముగించుకుని తిరిగి వస్తున్న ఓ కుటుంబంలో ఘోర రోడ్డు ప్రమాదం రూపంలో అంతులేని విషాదం చోటుచేసుకుంది. హనుమకొండ జిల్లా, భీమదేవరపల్లి మండలం, కొత్తపల్లి గ్రామ శివారులో గురువారం రాత్రి అతివేగంగా వచ్చిన డిసిఎం వాహనం బొలెరో వాహనాన్ని బలంగా ఢీకొంది. ఈ ప్రమాదంలో ముగ్గురు వ్యక్తులు అక్కడికక్కడే మృతి చెందగా, మరో 10 మందికి తీవ్ర గాయాలయ్యాయి. పోలీసులు తెలిపిన వివరాల ప్రకారం.. మెదక్ జిల్లా, వెంకటాపురం గ్రామానికి చెందిన రెడ్డబోయిన శ్రీకాంత్ కుటుంబ సభ్యులు మహబూబాబాద్ జిల్లా, కురవి మండలం, సుధన్‌పల్లికి చెందిన నాగల, సిద్దిపేట జిల్లా, వెంకటాపురంనకు చెందిన భాస్కర్ వివాహ నిమిత్తం సుధన్‌పల్లి వెళ్లారు. పెళ్లి పూర్తయ్యాక, మరుసటిరోజు మారుపెళ్లి కోసం వెంకటాపురం వచ్చి,

అక్కడ నుండి రాత్రి 8 గంటలకు మళ్లీ సుధన్‌పల్లికి బొలెరో వాహనంలో బయలుదేరారు. మార్గమధ్యంలో భీమదేవరపల్లి మండలం, కొత్తపల్లి గ్రామ శివారులో మూత్రవిసర్జన కోసం వాహనాన్ని రోడ్డు పక్కకు ఆపారు. సరిగ్గా అదే సమయంలో, ఎల్కతుర్తి వైపు అతివేగంగా, అజాగ్రత్తగా వచ్చిన డిసిఎం వాహనం బలంగా ఢీకొట్టింది. ఈ ఘోర ప్రమాదంలో రెడ్డబైన స్వప్న (16), శ్రీనాథ్ (6), కలమ్మ (55) అక్కడికక్కడే మృతి చెందారు. అనసూయ, అక్షయ, మారుతి, రమాదేవి, దేవేందర్, నవలోక్, రిత్విక్, సరోజన, కార్తిక్, శ్రీరామ్ సహా మొత్తం 10 మందికి తీవ్ర గాయాలయ్యాయి. క్షతగాత్రులను వెంటనే వరంగల్‌లోని ఎంజిఎం ఆసుపత్రి, రాజు గార్డెన్ ఆసుపత్రికి తరలించి చికిత్స అందిస్తున్నారు. వీరిలో కొందరి పరిస్థితి విషమంగా ఉన్నట్లు సమాచారం.

బాధితులకు అండగా నిలిచిన డిప్యూటీ స్పీకర్ రామచంద్రనాయక్

రోడ్డు ప్రమాదంలో డోర్నకల్ నియోజకవర్గం, కురవి మండలానికి చెందిన మృతులతోపాటు బాధితుల ఎక్కువగా ఉండడంతో ఎంఎల్‌ఎ, శాసనసభ డిప్యూటీ స్పీకర్ రామచంద్రనాయక్ బాధితులకు అండగా నిలిచారు. శుక్రవారం మధ్యాహ్నం మృతదేహాలతోపాటు ఎంజిఎంతోపాటు ప్రైవేటు ఆసుపత్రిలో చికిత్స పొందుతున్న బాధితులను పరామర్శించి వారి బంధువులను ఆయన ఓదార్చారు. బాధిత కుటుంబాలకు ప్రభుత్వం అండగా ఉంటుందని, వారిని అన్నివిధాలుగా ఆదుకుంటామని హామీనిచ్చారు.

ఎంజిఎం ప్రధాన రహదారిపై రాస్తారోకో బాధిత కుటుంబ సభ్యుల ఆందోళన

ఇదిలాఉంటే బాధితులను పోలీస్ శాఖ పట్టించుకోవడంలేదని ఆక్రోశంతో గ్రామస్థులంతా ఎంజిఎం ప్రధాన రహదారిపై రాస్తారోకో చేశారు. కలెక్టర్ వచ్చి తమకు న్యాయం చేసే వరకు ఇక్కడి నుండి కదిలేది లేదని డిమాండ్ చేశారు. అదే సందర్భంలో డాక్టర్ రామచంద్రనాయక్ బాధితులతో మాట్లాడినప్పటికీ వారు ఆగ్రహంతో ఊగిపోయారు. ముఖ్యమంత్రి పర్యటన ఉండడంతో పోలీసు ఉన్నతాధికారులు హుటాహుటిన అక్కడికి చేరుకొని పరిస్థితిని అర్థం చేసుకొని బాధితులకు తగిన న్యాయం చేస్తామని డిప్యూటీ స్పీకర్ రామచంద్రనాయక్‌తో కలిసి ఎంజిఎంలోని బాధితుల వద్దకు వెళ్లారు. దీంతో రాస్తారోకోను విరమించారు.

 ఆటో డ్రైవర్ హత్య కేసును టోలీచౌకి పోలీసులు 24 గంటల్లోనే ఛేదించారు. హత్య చేసిన నిందితుడిని అరెస్టు చేశారు. ఎడిసిపి టోలీచౌకి పోలీస్ స్టేషన్‌లో శుక్రవారం ఏర్పాటు చేసిన విలేకరుల సమావేశంలో వివరాలు వెల్లడించారు. టోలీచౌకి, హకీం పేటకు చెందిన మహ్మద్ ముజామిల్ అలియాస్ ఆయుబ్ ఆటోడ్రైవర్‌గా పనిచేస్తున్నాడు. ఈ నెల 30 తేదీన ఎస్‌ఎస్ ఫంక్షన్ హాల్ సమీపంలో ఆటోలో హత్యకు గురయ్యాడు. బాధితుడి సోదరుడి ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేసి నిందితుడిని అదుపులోకి తీసుకున్నారు. నగరంలోని చాంద్రాయణగుట్ట, వాహిద్ ముస్తాఫా కాలనీకి చెందిన మహ్మద్ ఇషాక్ అలియాస్ ఖలీద్ ఎలక్ట్రిషన్‌గా పనిచేస్తున్నాడు.

ఇషాక్, ముజామిల్, మరికొంత మంది స్నేహితులు కలిసి ఆటోలో రాత్రి 2 గంటల వరకు మద్యం తాగారు. మద్యం తాగే సమయంలో ఇద్దరి మధ్య మొబైల్ ఫోన్ కోసం గొడవ జరగడంతో ఖలీద్ తాడును ముజామిల్ మెడకు బిగించి హత్య చేసినట్లు పోలీసులు గుర్తించారు. హత్య చేసిన తర్వాత నిందితుడు హకీం పేటలోని ఓయో రూంలో ఉన్నట్లు గుర్తించారు. వెంటనే నిందితుడిని అదుపులోకి తీసుకుని రిమాండ్‌కు తరలించారు. ఇన్స్‌స్పెక్టర్ రమేష్ నాయక్, ఎస్సైలు సతీష్ కుమార్, రాఘవేందర్ తదితరులు నిందితుడిని పట్టుకున్నారు.

ముఖ్యమంత్రి ప్రజావాణి చొరవతో బాలిక సౌమ్యకు పునర్జన్మ లభించింది. ఊపిరితిత్తులు పూర్తిగా దెబ్బ తిని ప్రాణాపాయ స్థితిలో ఉన్న సౌమ్యకు సిఎం ప్రజావాణి కొండంత అండగా నిలిచి ఆ బాలిక చికిత్సకు అవసరమైన రూ. 9 లక్షలు ఆర్థిక సాయం సమకూర్చి ఆ బాలిక నిండు ఆరోగ్యంతో ఉండేందుకు సహకారాన్ని అందించింది. శుక్రవారం ప్రజాభవన్‌లో నిర్వహించిన సిఎం ప్రజావాణికి సౌమ్య తన తండ్రి తల్లిదండ్రులతో కలిసి వచ్చి సీఎం ప్రజావాణి ఇన్చార్జి, రాష్ట్ర ప్రణాళికా సంఘం వైస్ చైర్మన్ డాక్టర్ జి చిన్నారెడ్డి, స్టేట్ నోడల్ అధికారి దివ్యలకు ధన్యవాదాలు తెలిపారు. సిఎం రేవంత్ రెడ్డి చల్లని దీవెనలు తన ఆయుష్షును పెంచిందని సౌమ్య సంతోషాన్ని వ్యక్తం చేసింది.

ఈ సందర్భంగా సీఎం ప్రజావాణిలో సౌమ్యకు రూ. 4 లక్షల సిఎంఆర్‌ఎఫ్ చెక్కును చిన్నారెడ్డి, దివ్య అందించారు. సొసైటీ ఫర్ ఎలిమినేషన్ ఆఫ్ రూరల్ పావర్టి ( సెర్ప్ ) నుంచి మరో రూ. 5 లక్షల ఆర్థిక సహాయాన్ని సౌమ్యకు అందించారు. కర్ణాటక రాష్ట్రం బెంగళూరు ఆసుపత్రిలో శస్త్రచికిత్స విజయవంతమైంది. జనగాం జిల్లా వెంకిర్యాల గ్రామానికి చెందిన ఈర్ల శ్రీనివాస్, అనురాధ తమ కుమార్తె సౌమ్య అనారోగ్య సమస్యను రెండు నెలల క్రితం సిఎం పజావాణి దృష్టికి తీసుకువచ్చారు. తల్లి అనురాధ స్వయం సహాయక గ్రూపు సభ్యురాలు కాగా తండ్రి ఈర్ల శ్రీనివాస్ సన్నకారు రైతు. సౌమ్య దీనస్థితి గమనించి సిఎం ప్రజావాణి అండగా నిలిచింది.

మంత్రిగా ప్రమాణ స్వీకారం చేసిన క్రికెట్ మాజీ కెప్టెన్ అజహరుద్దీన్ క్రికెట్‌లోనే కాదు రాజకీయాల్లోనూ మ్యాచ్ ఫిక్సింగ్‌కు పాల్పడిన ఫిక్సరేనని బజెపి శాసనసభాపక్షం నాయకుడు ఏలేటి మహేశ్వర్ రెడ్డి విమర్శించారు. మజ్లీస్ పార్టీ అధినేత అసదుద్దీన్ ఒవైసీ అండదండలతో, ఆశీస్సులతో మంత్రి పదవి దక్కిందని ఆయన శుక్రవారం విలేకరుల సమావేశంలో అన్నారు. జూబ్లీహిల్స్ ఉప ఎన్నికలో ఓటమి భయంతోనే కాంగ్రెస్ పార్టీ మస్లింల ఓట్ల కోసం ఉన్నఫళంగా అజహరుద్దీన్‌కు మంత్రి పదవి ఇచ్చిందని ఆయన విమర్శించారు.

అజహరుద్దీన్‌ను భారత దేశ క్రికెట్ కెప్టెన్‌గా చేస్తే, ఆయన దేశం కోసం కాకుండా డబ్బుల కోసం కక్కుర్తితో మ్యాచ్ ఫిక్సింగ్‌కు పాల్పడ్డారని ఆయన విమర్శించారు. దీంతో రెండు వేల సంవత్సరంలో మ్యాచ్ ఫిక్సింగ్ ఆరోపణల నేపథ్యంలో బిసిసిఐ జీవితకాలం నిషేధం విధించిందని ఆయన గుర్తు చేశారు. కాంగ్రెస్‌కు మైనారిటీ ఓట్లు మాత్రమే కావాలి కానీ వారి బాగోగులు పట్టించుకోదని ఆయన తూర్పరబట్టారు. మైనారిటీల పట్ల చిత్తశుద్ధి ఉంటే రెండేళ్ళుగా మంత్రివర్గంలోకి మైనారిటీ నాయకునికి ప్రాతినిథ్యం ఎందుకు కల్పించ లేదని ఆయన ప్రశ్నించారు. ముఖ్యమంత్రి ఎ. రేవంత్ రెడ్డి హైదరాబాద్‌ను మజ్లీస్ పార్టీకి రాసి ఇచ్చేస్తారేమోనన అనుమానాన్ని మహేశ్వర్ రెడ్డి వ్యక్తం చేశారు. కాంగ్రెస్ బుజ్జగింపు రాజకీయాలకు, మజ్లీస్ ఆగడాలకు వ్యతిరేకంగా బిజెపికి ఓటు వేయాలని ఆయన ఓటర్లను కోరారు.

భారీ వర్షాల కారణంగా పంటలు నష్టపోయిన రైతులకు ఎకరాకు రూ.50 వేల పరిహారం అందించాలని -తెలంగాణ జాగృతి అధ్యక్షురాలు కల్వకుంట్ల కవిత డిమాండ్ చేశారు. తాను చేపట్టిన జనంబాట పర్యటనలో భాగంగా శుక్రవారం మొదటి రోజు కరీంనగర్ జిల్లా, తిమ్మాపూర్ మండలం, మక్తపల్లిలో ఆమె పర్యటించారు. ఈ సందర్భంగా గ్రామంలో వర్షాలకు దెబ్బతిన్న పంట పొలాలను, ధాన్యం కొనుగోలు కేంద్రాన్ని పరిశీలించారు. ఈ సందర్భంగా ఆమె మాట్లాడుతూ.. వరి కోతలు పూర్తయి నెల రోజులు దాటినా ఇప్పుటివరకు కూడా కొనుగోలు కేంద్రాలు ప్రారంభించలేదంటే రైతుల పట్ల కాంగ్రెస్ ప్రభుత్వానికి ఎంతటి ప్రేమ ఉందో అర్థమవుతోందని మండిపడ్డారు.మొంథా తుఫాన్ కారణంగా వరి పంటలు బాగా దెబ్బతిన్నాయి, చాలా జిల్లాల్లో వరి పంట మొత్తం ఒరిగిపోయిందని,

అసలు కోసే పరిస్థితి కూడా లేదని ఆందోళన వ్యక్తం చేశారు. కొనుగోలు కేంద్రాల్లో గత నెల రోజులుగా ధాన్యం కుప్పలు పోసి ఉన్నవి, ఇటీవల అకాల వర్షానికి పంటలు దెబ్బతినడంతో పాటు ధాన్యం రాశులు తడిసి ముద్దాయని, అపార నష్టంతో రైతుల పరిస్థితి దారుణంగా ఉందని ఆవేదన వ్యక్తం చేశారు. ప్రభుత్వం వెంటనే వడ్లు కొనుగోలు కేంద్రాలను ప్రారంభించి, మానవతా దృక్పథంతో రైతులను ఆదుకోవాలని డిమాండ్ చేశారు. తడిసిన, మొలకెత్తిన, బూజు పట్టిన, తేమ శాతం ఎక్కువ ఉన్నా ధాన్యం కొనుగోలు చేయాలని డిమాండ్ చేశారు. కౌలు రైతులను అన్నివిధాలుగా ఆదుకోవాలని కోరారు.

క్రికెట్ మాజీ కెప్టెన్ అజహరుద్దీన్‌ను రాష్ట్ర మంత్రి వర్గంలోకి తీసుకున్నందుకు కేంద్ర బొగ్గు గనుల శాఖ మంత్రి జి. కిషన్ రెడ్డికి అంత అక్కసు ఎందుకని ప్రదేశ్ కాంగ్రెస్ కమిటీ అధ్యక్షుడు, ఎమ్మెల్సీ బి. మహేష్ కుమార్ గౌడ్ ప్రశ్నించారు. శుక్రవారం రాజ్‌భవన్‌లో అజహరుద్దీన్ మంత్రిగా ప్రమాణ స్వీకారోత్సవానికి పిసిసి అధ్యక్షుడు, ఎమ్మెల్సీ మహష్ కుమార్ గౌడ్ హాజరయ్యారు. అనంతరం మహేష్ కుమార్ గౌడ్ మీడియాతో మాట్లాడుతూ అజహరుద్దీన్‌పై కిషన్ రెడ్డి చేసిన వ్యాఖ్యలను ఖండించారు. అజహరుద్దీన్‌పై కేసులు ఉన్నాయని, దేశ ద్రోహి అని కిషన్ రెడ్డి వ్యాఖ్యానించడం సమంజసం కాదన్నారు. ఎక్కడ కేసులు ఉన్నాయో చెప్పాలని ఆయన డిమాండ్ చేశారు. క్రికెట్ మాజీ కెప్టెన్‌గా ప్రఖ్యాతి చెందిన, ఎంపీగా సేవలందించిన అజర్ గురించి కేంద్ర మంత్రికి తెలియకపోవడం బాధాకరమని అన్నారు. మైనారిటీ వర్గానికి చెందిన అజర్‌ను మంత్రివర్గంలోకి తీసుకుంటే అక్కసు ఎందుకని ఆయన ప్రశ్నించారు. జూబ్లీహిల్స్ ఎన్నికలకు ముందు మంత్రివర్గంలోకి తీసుకున్నారని విపక్షాలు చేస్తున్న విమర్శలను ఆయన తోసిపుచ్చారు. అజర్‌ను మంత్రివర్గంలోకి తీసుకోవాలని తమ పార్టీ అధిష్టానం మూడు నెలల ముందే నిర్ణయం తీసుకున్నదని తెలిపారు. మైనారిటీ నాయకున్ని అవమానించడం భావ్యం కాదని మహేష్ కుమార్ గౌడ్ అన్నారు.

 మొంథా తుఫాన్ యువ దంపతులను మింగేసిన విషాదకర ఘటన మెదక్ జిల్లా, అక్కన్నపేట మండలంలో చోటుచేసుకుంది. వివరాల్లోకి వెళ్తే… మండలంలోని మోత్కులపల్లి వాగులో భీమదేవరపల్లి మండలానికి చెందిన దంపతులు ఈసంపల్లి ప్రణయ్ (28), కల్పన (24) గురువారం గల్లంతయ్యారు. వాగు ప్రవాహంలో మల్లంపల్లి గ్రామానికి చెందిన గొర్ల సమ్మయ్య పశువుల షెడ్డు వద్ద బైకు లభ్యమైంది. రెస్క్యూ టీంతో గురువారం రోజంతా పకడ్బందీగా గాలింపు చర్యలు చేపట్టినప్పటికీ మృతదేహాల ఆచూకీ దొరకలేదు. ఎట్టకేలకు శుక్రవారం తెల్లవారుజామున ఎన్‌డిఆర్‌ఎఫ్, ఎస్‌డిఆర్‌ఎఫ్ బృందాలు ముమ్మరంగా గాలింపు చర్యలు కొనసాగించడంతో భార్యాభర్తల మృతదేహాలు లభ్యమయ్యాయి. మృతదేహాలను చూసిన కుటుంబీకులు, బంధువులు ఆర్తనాదాలు మల్లంపల్లి చెరువు పరిసరాల్లో విషాదఛాయలు అలుముకున్నాయి. బాధిత కుటుంబ సభ్యుల ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్‌ఐ చాతరాజు ప్రశాంత్ తెలిపారు. పోస్టుమార్టం నిమిత్తం మృతదేహాలను హుస్నాబాద్ ప్రభుత్వ ఆసుపత్రికి తరలించామని తెలిపారు.

ఉద్యోగుల బకాయిలు, పెండింగ్ బిల్లులను కాంగ్రెస్ ప్రభుత్వం విడుదల చేసింది. మొత్తం రూ.1,032 కోట్లను రాష్ట్ర ఆర్థిక శాఖ విడుదల చేసింది. ఆర్థికశాఖ అధికారులతో పెండింగ్ బిల్లులు, బకాయిలపై ఉప ముఖ్యమంత్రి భట్టి విక్రమార్క శుక్రవారం సమీక్ష నిర్వహించారు. ఈ సందర్బంగా డిప్యూటీ సిఎం భట్టీ ఆదేశాల మేరకు అధికారులు నిధులను విడుదల చేశారు. ఇందులో ప్రభుత్వ ఉద్యోగుల బకాయిల కోసం రూ.712 కోట్లు కాగా.. ఆర్ అండ్ బీ, పంచాయతీరాజ్ శాఖ పెండింగ్ బిల్లుల కోసం రూ.320 కోట్లు విడుదల చేశారు. గత ప్రభుత్వం పెండింగ్ లో పెట్టిన ఉద్యోగుల బకాయిలను కాంగ్రెస్ ప్రభుత్వం దశలవారీగా విడుదల చేస్తోంది.