Latest News

 గ్రామీణ ప్రాంత నిరుద్యోగ యువత కోసం ఈ నెల 25న హుజూర్‌నగర్‌లో నిర్వహించే మెగా జాబ్‌మేళాకు ఎక్కువ సంఖ్యలో హాజరయ్యేలా చర్యలు తీసుకోవాలని మంత్రి ఉత్తమ్ కుమార్‌రెడ్డి గ్రామ పాలనాధికారులు, గ్రామ పోలీసు అధికారులు సూచించారు. సమాజంలో అతిపెద్ద సమస్యగా మారిన నిరుద్యోగ సమస్యను తమవంతుగా కొంతవరకైనా తీర్చాలన్న ఉద్దేశంతో ఉమ్మడి నల్లగొండ జిల్లా నిరుద్యోగ యువతకు ఉద్యోగ, ఉపా ధి అవకాశాలు కల్పించే నిమిత్తం హుజూర్‌నగర్‌లో ఈ జాబ్ మేళాను నిర్వహిస్తున్నట్లు తెలిపారు. బుధవారం కలెక్టరేట్ కార్యాలయం నుం డి ఆర్‌డిఒలు, తహశీల్దార్లు, వ్యవసాయ విస్తరణ అధికారులు, ఎంపిడిఒలు, గ్రామ పాలనాధికారులు, పంచాయతీ కార్యదర్శులు, గ్రామ పోలీసు అధికారులతో జాబ్‌మేళాపై నిర్వహించిన వీడియో కాన్ఫరెన్స్ లో మంత్రి సుదీర్ఘంగా మాట్లాడారు. గ్రామీణ ప్రాంత తల్లిదండ్రులు పిల్లల్ని కష్టపడి చదివిస్తున్నప్పటికీ ఉద్యోగావకాశాలు సరిగా లేకపోవడం, అవగాహన లేకపోవడం వల్ల వారికి ఉద్యోగ అవకాశాలు సరి గా రావడం లేదని అన్నారు.దీనిని దృష్టిలో ఉంచుకుని తమ వంతు ప్రయత్నంగా కొంతవరకైనా నిరుద్యోగ సమస్యను తీర్చాలన్న ఉద్దేశం తో సింగరేణి కాలరీస్,

డిజిటల్ ఎంప్లాయ్‌మెంట్ ఎక్సేంజ్ ఆఫ్ తెలంగాణ సంయుక్త సహకారంతో మెగా జాబ్‌మేళా నిర్వహిస్తున్నామని తెలిపారు.250 వరకు కంపెనీలు ఈ మెగా జాబ్‌మేళాలో పాల్గొననున్నాయని తెలిపారు. గ్రామీణ ప్రాంతానికి వెళ్లి నిరుద్యోగ యువతకు ఉద్యోగ అవకాశాలు కల్పించాలన్న ఉద్దేశంతో ఆయా కంపెనీలు హుజూర్‌నగర్‌కు వస్తున్నట్లు తెలిపారు. అభ్యర్థులు 5 కాపీల రెజ్యూ మ్ తో పాటు రెండు పాస్‌పోర్ట్‌సైజ్ ఫొటోలను తీసుకుని జాబ్‌మేళాకు రావాలని సూచించారు. జాబ్‌మేళా నిర్వహించే పెర్ల్ ఇన్ఫినిటీ ఇంటర్నేషనల్ స్కూల్‌లో హెల్ప్‌డెస్క్‌లు, రిజిస్ట్రేషన్ డెస్క్‌లు ఏర్పాటు చేస్తున్నామని తెలిపారు. జాబ్‌మేళాకు హాజరయ్యే నిరుద్యోగులకు స్వర్ణ వేదిక ఫంక్షన్ హాలులో ఉదయం అల్పాహారం, మధ్యాహ్నం భోజ నం, సాయంత్రం టిఫిన్ కూడా ఏర్పాట్లు చేస్తున్నామని తెలిపారు. ఈ సమావేశంలో జిల్లా కలెక్టర్ తేజస్ నంద్‌లాల్ పవార్, జిల్లా ఎస్‌పి నరసింహ, డిజిటల్ ఎంప్లాయ్‌మెంట్ ఎక్సేంజ్ ఆఫ్ తెలంగాణ డైరెక్టర్ రాజేశ్వర్ రెడ్డి, మంత్రి ఉత్తమ్ ఒఎస్‌డి ప్రవీణ్, అదనపు కలెక్టర్ కె.సీతారామారావు, ప్రజా ప్రతినిధులు సర్వోత్తంరెడ్డి, చెవిటి వెంకన్న యాదవ్, కొప్పుల వేణారెడ్డి, పోతు భాస్కర్, చింతల లక్ష్మీనారాయణరెడ్డి, చకిలం రాజేశ్వరరావు తదితరులు పాల్గొన్నారు.

న్యూఢిల్లీ : హెచ్1 బీ వీసా ఫీజు లక్ష డాలర్లను పెంచుతూ అమెరికా అధ్యక్షుడు డొనాల్డ్ ట్రంప్ తీసుకున్న నిర్ణయం అక్కడి కంపెనీల్లో తీవ్ర గందరగోళానికి దారి తీసింది. దీంతో వీసా అభ్యర్థులను నియమించుకునే విషయంలో వెనకడుగు వేస్తున్నాయి. తాజాగా అమెరికాకు చెందిన రిటైల్ దిగ్గజం వాల్‌మార్ట్ కూడా అలాంటి కీలక నిర్ణయమే తీసుకుంది. హెచ్1 బీ వీసా అభ్యర్థుల నియామకాన్ని నిలిపివేయాలని వాల్‌మార్ట్ నిర్ణయించుకున్నట్టు తెలుస్తోంది. ఈమేరకు బ్లూమ్ బర్గ్ తన కథనంలో పేర్కొంది. వాల్‌మార్ట్‌లో ప్రస్తుతం 2 వేల కంటే ఎక్కువ మంది హెచ్1 బీ వీసా హోల్డర్లు ఉన్నట్టు ప్రభుత్వ లెక్కలు చెబుతున్నాయి. దీనిపై ఆ సంస్థ ప్రతినిధి ఒకరు మాట్లాడుతూ , హెచ్1 బీ వీసా అభ్యర్థుల నియామకాల విధానాలను జాగ్రత్తగా పరిశీలిస్తున్నామన్నారు.

ఈ క్రమంలో తమ కస్టమర్లకు ఉత్తమమైన సేవలు అందించేందుకు గాను ప్రతిభావంతులను నియమించుకునేందుకు కట్టుబడి ఉన్నామన్నారు. హెచ్1 బీ వీసా ఫీజును లక్ష డాలర్లకు పెంచుతూ ట్రంప్ చేసిన ప్రకటన ప్రపంచ వ్యాప్తంగా సంచలనం సృష్టించిన సంగతి తెలిసిందే. అయితే హెచ్1 బీ వీసాపై విధించిన లక్ష డాలర్ల రుసుము వార్షిక ఫీజు కాదని, దరఖాస్తు చేసుకొనే సమయంలో కట్టాల్సిన వన్‌టైమ్‌ఫీజు అని వైట్‌హౌస్ ఆ తర్వాత స్పష్టతనిచ్చింది.

ట్రంప్ నిర్ణయాన్ని సవాల్ చేస్తూ అమెరికా ఛాంబర్ ఆఫ్ కామర్స్ న్యాయస్థానాన్ని ఆశ్రయించింది. ఈ క్రమంలో ట్రంప్ సర్కారు మార్గదర్శకాలను సవరిస్తూ కొత్త ఉత్తర్వులు జారీ చేసింది. తాజా మార్గదర్శకాల ప్రకారం అమెరికా లోనే ఉండి వీసా స్టేటస్‌ను మార్చుకునే వారికి, ఇప్పటికే హెచ్1 బీ ఉండి, కొనసాగింపు కోరే వారికి ఈ లక్ష డాలర్ల ఫీజు వర్తించదని పేర్కొంది. విదేశాల నుంచి నేరుగా హెచ్1 బీ వీసాలకు దరఖాస్తు చేసుకునే వారు మాత్రమే ఈ మొత్తం చెల్లించాల్సి ఉంటుందని స్పష్టం చేసింది. 

ఇక్కడి ప్రఖ్యాత లౌవ్రే మ్యూజియంలో భారీ చోరీ జరిగింది. అత్యంత పటిష్ట భద్రతతో ఉండే ఈ మ్యూజియంలో జరిగిన చోరీలో దాదాపు రూ 895 కోట్ల విలువైన నగలు వజ్రాలు దుండగులు కేవలం నిమిషాల వ్యవధిలో ఎత్తుకెళ్లారు. తనిఖీల క్రమంలో ఈ చోరీ విషయం ఇప్పుడు ప్రపంచవ్యాప్తంగా వెలుగులోకి వచ్చింది. దుండగులు అత్యంత తెలివిగా , ఎవరికి అంతుచిక్కకుండా తమ పనులు సాగించే పింక్ ప్యాంథర్స్ గ్యాంగ్ వారే అయి ఉండవచ్చునని ప్రాధమిక దర్యాప్తులో వెల్లడైంది. అత్యంత నైపుణ్యశిక్షణ కల వారిని ఎంచుకుని ఈ గ్యాంగ్‌లో చేర్చుకుంటారు. వీరు మాములు యాత్రికులుగానే మ్యూజియంలు ఇతర చోట్లలోకి ప్రవేశించి విలువైన నగలు ఎత్తుకుని వెళ్లుతారు. వేగంగా సరిహద్దులు దాటుతారు. తాము దొంగిలించిన నగలను కరిగించి వేరే రూపంలో భారీ ధరకు విక్రయిస్తుంటారు. ఇప్పటి వరకూ ఈ గ్యాంగ్ 35 దేశాలలో 500 మిలియన్ డాలర్ల విలువైన ఆభరణాలను ఎత్తుకెళ్లింది. వీరు పట్టుబడటం చాలా అరుదు అయింది. పారిస్ చోరీ ఘటనపై అధికార యంత్రాంగం వెంటనే రంగంలోకి దిగింది. దుండగులను పట్టుకునేందుకు గాలింపు తీవ్రతరం చేశారు. ఒకటి రెండు అరెస్టులు జరిగినట్లు అనధికారికంగా నిర్థారణ అయింది. 

మైక్రోసాఫ్ట్ సిఇఒసత్య నాదెళ్ల 2024-25 ఆర్థిక సంవత్సరానికి 96.5 మిలియన్ డాలర్లు (సుమారు రూ.847 కోట్లు) జీతం అందుకున్నారు. ఇది ఇప్పటివరకు ఆయనకు లభించిన అత్యధిక వేతనం కాగా, గత సంవత్సరం 79.1 మిలియన్ డాలర్లు (రూ.694 కోట్లు) వేతనం కంటే 22% ఎక్కువగా ఉంది. కంపెనీ బోర్డు ప్రకారం, నాదెళ్ల వేతనం పెరుగుదలకు కారణం మైక్రోసాఫ్ట్ ఆర్టిఫిషియల్ (ఎఐ) రంగంలో సాధించిన విశేష పురోగతి, అయితే నాదెళ్ల జీతం ప్యాకేజీలో 2.5 మిలియన్ డాలర్లు (రూ.22 కోట్లు) మూల వేతనం కాగా, మిగిలిన 90% షేర్ల రూపంలో ఉంది. ఆయనతో పాటు సిఎఫ్‌ఒ అమీ హుడ్‌కి రూ.259 కోట్లు, కమర్షియల్ హెడ్ జడ్సన్ ఆల్థాఫ్‌కి రూ.247 కోట్లు వేతనాలు లభించాయి.

నాదెళ్ల నాయకత్వంలో మైక్రోసాఫ్ట్ క్లౌడ్, ఎఐ రంగాల్లో ఆధిపత్యాన్ని సాధించింది. అజూర్ క్లౌడ్ వ్యాపారం అమెజాన్‌తో పోటీపడుతూ వేగంగా ఎదుగుతోంది. ఈ సంవత్సరం మైక్రోసాఫ్ట్ షేర్లు 23% పెరిగాయి. గిట్‌హబ్, లింక్డ్‌ఇన్, యాక్టివిజన్ బ్లిజార్డ్ వంటి కొనుగోళ్లతో కంపెనీ వ్యాపారాన్ని విస్తరించారు. నాదెళ్ల 2019లో ఓపెన్ ఎఐలో పెట్టుబడి పెట్టి, చాట్ జిపిటి విజయంతో ఎఐ రంగంలో మైక్రోసాఫ్ట్ స్థానాన్ని బలపరిచారు. హైదరాబాద్‌లో జన్మించిన ఆయన మంగళూరు విశ్వవిద్యాలయం నుండి ఇంజనీరింగ్, అమెరికా విస్కాన్సిన్ విశ్వవిద్యాలయం నుండి మాస్టర్స్ పూర్తి చేశారు. 1992లో మైక్రోసాఫ్ట్‌లో చేరి, 2014లో కంపెనీ మూడో సిఇఒగా బాధ్యతలు చేపట్టారు.

ఇండోర్: మహిళల వన్డే ప్రపంచకప్‌లో డిఫెండింగ్ ఛాంపియన్ ఆస్ట్రేలియా జైత్రయాత్ర కొనసాగుతోంది. బుధవారం ఇండోర్‌లో జరిగిన మ్యాచ్‌లో ఆస్ట్రేలియా ఆరు వికెట్ల తేడాతో ఇంగ్లండ్‌ను ఓడించింది. తొలుత బ్యాటింగ్ చేసిన ఇంగ్లండ్ 50 ఓవర్లలో 9 వికెట్ల నష్టానికి 249 పరుగులు చేసింది. ఓపెనర్ టామీ బ్యూమౌంట్ (78) జట్టును ఆదుకుంది. కాప్సె (38), చార్లి డీన్ (26) పరుగులు సాధించారు. తర్వాత బ్యాటింగ్‌కు దిగిన ఆస్ట్రేలియా 40.3 ఓవర్లలోనే 4 వికెట్లు మాత్రమే కోల్పోయి విజయాన్ని అందుకుంది. ఒక దశలో 68 పరుగులకే నాలుగు వికెట్లు కోల్పోయిన ఆస్ట్రేలియాను సదర్లాండ్, అష్లే గార్డ్‌నర్ ఆదుకున్నారు. చెలరేగి ఆడిన గార్డ్‌నర్ 73 బంతుల్లోనే 16 ఫోర్లతో అజేయంగా 104 పరుగులు చేసింది. సదర్లాండ్ 9 ఫోర్లు, ఒక సిక్స్‌తో 98 పరుగులు చేసి నాటౌట్‌గా నిలిచింది. దీంతో ఆస్ట్రేలియా అలవోక విజయాన్ని అందుకుంది.

రాష్ట్రంలో ఫీజు రీయింబర్స్‌మెంట్ నిధుల విడుదల జాప్యాన్ని నిరసిస్తూ వృత్తి విద్య సహా డిగ్రీ, కాలేజీలు మరోసారి కాలేజీల బంద్‌కు సిద్ధమవుతున్నాయి. ప్రభుత్వం ఇచ్చిన హామీ నిధులు విడుదల కాకపోవడంతో నవంబర్ 3 నుంచి కాలేజీలు బంద్ చేయాలని ఫెడరేషన్ ఆఫ్ అసోసియేషన్ ఆఫ్ తెలంగాణ హయ్యర్ ఎడ్యుకేషన్(ఫతి) నిర్ణయించింది. ఈ మేరకు బుధవారం ప్రభుత్వానికి సమ్మె నోటీసు అందించారు. ప్రభుత్వ ప్రధాన కార్యదర్శి రామకృష్ణారావు, ఉప ముఖ్యమంత్రి భట్టి విక్రమార్కకు ఈ నోటీసుసు అందించారు. ఈ నెల 24న ప్రొఫెషనల్ అక్రిడేటెడ్ కాలేజెస్ అసోసియేషన్ సమావేశం నిర్వహించాలని, 25న విద్యార్థి సంఘాల సమావేశం నిర్వహించి, 26న జనరల్ బాడీ సమావేశం నిర్వహించాలని, నవంబర్ 1న అన్ని రాజకీయ పార్టీలతో సమావేశం నిర్వహించాలని యాజమాన్యాలు నిర్ణయించాయి. 2026 ఏప్రిల్ 1వ తేదీ నాటికి మొత్తం ఫీజు రీయింబర్స్‌మెంట్ బకాయిలు చెల్లించాలని, నవంబర్ 1 నాటికి ప్రభుత్వం హామీ ఇచ్చిన రూ.700 కోట్లు చెల్లించాలని పేర్కొన్నారు.

ఇస్లామాబాద్ : పాకిస్థాన్ ఆర్మీ చీఫ్ ఆసిం మునీర్‌పై ఆ దేశ మాజీ ప్రధాని ఇమ్రాన్ ఖాన్ మరోసారి విరుచుకుపడ్డారు. సైనిక బలంతో వ్యవస్థలన్నిటినీ నాశనం చేస్తున్నాడని మండిపడ్డారు. జైల్లో తనతోనూ దారుణంగా వ్యవహరిస్తున్నారని విమర్శించారు. తనను ఒంటరిగా ఉంచారని, కనీస సదుపాయాలు కూడా కల్పించడం లేదని వాపోయారు. ఈమేరకు ఎక్స్ వేదికగా పాక్ ఆర్మీ చీఫ్‌పై మాజీ ప్రధాని నిప్పులు చెరిగారు.

“చట్టం పేరుతో అకృత్యాలకు పాల్పడుతూ ప్రజాస్వామ్య పునాదులను బలహీన పరుస్తున్నారని విమర్వించారు.“ జైల్లో నన్ను పూర్తిగా ఒంటరిగా ఉంచారు. ఇలా రాజకీయ బాధితులను చేయడం పాక్ చరిత్రలో ఎప్పుడూ లేదు. జైలు నిబంధనల ప్రకారం కనీస వసతులు కూడా కల్పించడం లేదు. కుమారులతోనూ కొన్ని నిమిషాలే మాట్లాడనిస్తున్నారు. రాజకీయ సహచరులతోనూ భేటీ కానివ్వడం లేదు. ప్రస్తుత పాలకుల తీరుతో సరిహద్దులో పరిస్థితులు దిగజారుతున్నాయి. అఫ్గాన్‌తో ఉద్రిక్త పరిస్థితులు ఆందోళన కలిగిస్తున్నాయి ” అని ఇమ్రాన్ వాపోయారు.

మరోవైపు ఇమ్రాన్ సన్నిహితుడు జుల్ఫీ బొఖారీ స్పందిస్తూ జైలు అధికారులు అత్యంత దారుణంగా వ్యవహరిస్తున్నారని మండిపడ్డారు. బుష్రా బీబీని ఆరు గంటలకు పైగా జైలు బయట వేచి ఉండేలా చేశారని, ఇమ్రాన్‌తో భేటీ కాకుండా చూస్తున్నారని విమర్శించారు. 

ఈగల్ టీం దూకుడు పెంచింది. ప్రభుత్వ లక్షాలకు అనుగుణంగా రాష్ట్రంలో గంజాయి, మాదకద్రవ్యాలపై ఈగల్ టీం ఉక్కుపాదం మోపుతోంది. తాజాగా ఈగల్ టీం మరో భారీ ఆపరేషన్ నిర్వహించింది. సినీ రేంజ్‌లో జరిగిన ఈ ఆపరేషన్‌లో ఈగల్ టీమ్, ఖమ్మం నార్కోటిక్స్ బ్యూరో అధికారులు సంయుక్తంగా జాయింట్ ఆపరేషన్ చేపట్టి దాదాపు 500 కిలోల గంజాయి పట్టుకున్నారు. కేసుకు సంబం ధించిన వివారల్లోకి వెళితే ఒడిశా నుంచి తెలంగాణ మీదుగా లారీలో 500 కేజీల గంజాయి వారణాసి తరలిస్తున్నట్లు ఈగల్ టీమ్‌కు విశ్వస నీయ సమాచారం అందింది. వెంటనే రంగంలోకి దిగిన ఈగల్ టీమ్ నిందితులను పట్టుకునేందుకు ఖమ్మం నార్కోటిక్స్ బ్యూరో అధికారులతో కలిసి జాయింట్ ఆపరేషన్ నిర్వహించింది. మంగళవారం రాత్రి మొత్తం నిందితుల వాహనాన్ని పోలీసులు ఛేజ్ చేశారు.

పోలీసుల రాకను పసిగట్టిన నిందితులు లారీ వేగం పెంచారు. అయినప్పటికీ పోలీసులు వెంటాడటంతో పోలీసుల కళ్లు గప్పి ట్రక్‌ను దారి మళ్లించారు. వెంటనే అప్రమత్తమైన ఈగల్ టీమ్ తెలివిగా జిపిఎస్ ద్వారా లారీ అడ్రస్‌ను ట్రాక్ చేశారు. ట్రక్ జార్ఖండ్‌లో ఉన్నట్లు గుర్తించి ఈ మేరకు రాంచీ ఎన్‌సిబికి తెలంగాణ పోలీసులు సమాచారం అందించారు. వెంటనే రంగంలోకి దిగిన రాంచీ ఎన్‌సిబి అధికారులు గంజాయ్ లోడ్‌తో వెళ్తున్న లారీని రాంచీ-జార్ఖండ్ మధ్యలో పట్టుకున్నారు. అనంతరం నిందితులను తెలంగాణ పోలీసులకు రాంచీ అధికారులు అప్పగించారు. లారీతో పాటు 500 కేజీల గంజా యిని తెలంగాణ పోలీసులు స్వాధీనం చేసుకున్నారు. నిందితులు హర్యానాకు చెందిన నసీమ్ కమ్రుద్దీన్ పోలీసులకు పట్టుబడగా, ఉత్తరప్రదేశ్ వారణాసి నివాసులు రిసీవర్లు అయన ముఫ్తాక్ ఖాన్, ఆరిఫ్‌లు పరారీలో ఉన్నారు.

మేడ్చల్ మల్కాజిగిరి జిల్లా, పోచారం ఐటి కారిడార్ పోలీస్ స్టేషన్ పరిధిలోని కిటీ స్టీల్ సమీపంలో గోరక్షక సభ్యుడిపై కాల్పుల సంఘటన బుధవారం సాయంత్రం తీవ్ర కలకలం సృష్టించింది. పోలీసులు, స్థానికులు తెలిపిన వివరాల ప్రకారం.. గోరక్షక సభ్యుడు ప్రశాంత్ సింగ్ సోను పశువుల తరలింపుపై బిజెపి నాయకులకు సమాచారం ఇస్తున్నాడంటూ బహదూర్‌పూర్‌కు చెందిన ఇబ్రహీం అనే వ్యక్తి యంనంపేట్ కిటీ స్టీల్ సమీపంలోని శ్రీ రంగనాయకస్వామి ఆలయం వెనుక వెంచర్‌లోకి చర్చల నిమిత్తం తీసుకువెళ్లాడు. అనంతరం ప్రశాంత్ సింగ్ సోనుపై కాల్పులు జరిపి పారిపోయాడు. దీంతో సోను రోడ్డు మీదకు వచ్చి పడిపోగా సమాచారం తెలుసుకున్న పోలీసులు సంఘటన స్థలానికి చేరుకొని క్షతగాత్రుడిని ఆస్పత్రికి తరలించారు. ఈ సంఘటనపై రాచకొండ కమిషనర్ సుధీర్ బాబు సిఐ రాజు ద్వారా వివరాలు అడిగి తెలుసుకున్నారు. ఈ మేరకు కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు.