Latest News

తెలంగాణను 2030 నాటికి దేశ ‘ఏరో-ఇంజిన్‘ రాజధానిగా తీర్చిదిద్దాలన్నదే తమ ప్రభుత్వ సంకల్పమని అని ఐటి, పరిశ్రమల శాఖ మంత్రి శ్రీధర్ బాబు పేర్కొన్నారు. ఈ లక్ష్య సాధనకు అంతర్జాతీయ, జాతీయ దిగ్గజ ఏరో సంస్థలు రాష్ట్రంలో కొత్తగా పెట్టుబడులు పెట్టేలా సమగ్ర ‘రోడ్ మ్యాప్’ను సిద్ధం చేస్తున్నామన్నారు. ‘టాటా అడ్వాన్స్‌డ్ సిస్టమ్స్ లిమిటెడ్’, ‘సాఫ్రాన్ ఎయిర్‌క్రాఫ్ట్ ఇంజిన్స్‘ సంయుక్తంగా రూ.425 కోట్ల పెట్టుబడితో ఆదిభట్లలో ఏర్పాటు చేసిన ‘ఏరో ఇంజిన్ రొటేటివ్ కాంపోనెంట్స్‘ న్యూ మాన్యుఫ్యాక్చరింగ్ ఫెసిలిటీని మంగళవారం హైటెక్ సిటీలోని ఐటీసీ కోహినూర్‌లో నిర్వహించిన కార్యక్రమంలో వర్చువల్‌గా ఆయన ప్రారంభించారు. గ్లోబల్ ‘ఏరోస్పేస్-డిఫెన్స్ – స్పేస్’ హబ్ గా తెలంగాణ ను మార్చేందుకు రాష్ట్ర ప్రభుత్వం తరఫున తీసుకుంటున్న చర్యలను ఈ సందర్భంగా ఆయన వివరించారు. హైదరాబాద్ అంటే కేవలం ‘సిటీ ఆఫ్ పెరల్స్’ మాత్రమే కాదని, ప్రొపల్షన్, ప్రెసిషన్, ప్రోగ్రెస్ నగరంగా మార్చేందుకు చిత్తశుద్ధితో కృషి చేస్తున్నామన్నారు. ఏరోస్పేస్, రక్షణ రంగాల ఎగుమతులు 2023 -24లో రూ.15,900 కోట్లు ఉండగా, 2024- 25 ఆర్థిక సంవత్సరంలో మొదటి 9 నెలల్లోనే రూ. 30,742 కోట్లకు పెరిగాయన్నారు.

ఇవి కేవలం అంకెలు మాత్రమే కాదని, తమ ప్రభుత్వ హయాంలో ఈ రంగం సాధించిన వృద్ధి రేటుకు నిదర్శనమన్నారు.ఈ ‘న్యూ మాన్యుఫ్యాక్చరింగ్ ఫెసిలిటీ’ లో ఎయిర్‌బస్, బోయింగ్ సంస్థలు లీప్ ఇంజిన్ల తయారీలో వినియోగించే బేరింగ్ హౌసింగ్ (స్టేషనరీ కాంపోనెంట్), లో ప్రెషర్ టర్బన్ షాఫ్ట్ (రోటేటివ్ కాంపోనెంట్) తయారవుతాయన్నారు. ఫలితంగా తెలంగాణ బ్రాండ్ విశ్వవ్యాప్తమవ్వడంతో పాటు కొత్తగా 500 మందికి ఉపాధి లభిస్తుందన్నారు. విమాన ప్రయాణ భవిష్యత్తును నిర్మించాలనుకుంటే – దానిని తెలంగాణలో నిర్మించాలని ఈ వేదికగా అంతర్జాతీయ దిగ్గజ ఏరో సంస్థలకు పిలుపునిచ్చారు. ఇంజిన్స్, కాంపోనెంట్స్, ఎమ్మార్వో, కన్వర్షన్స్, స్పేస్, డ్రోన్స్, డిజిటల్, ఏఐ మాన్యుఫ్యాక్చరింగ్ తదితర రంగాల్లో పెట్టుబడులు పెట్టాలని ఆహ్వానించారు. కార్యక్రమంలో టాటా అడ్వానస్డ్ సిస్టమ్స్ లిమిటెడ్ సీఈవో, ఎండీ సుకరన్ సింగ్, ఈడీ మసూద్ హుస్సేన్, సాఫ్రాన్ ఎయిర్ క్రాఫ్ట్ ఇంజిన్స్ వైస్ ప్రెసిడెంట్ డొమినిక్ డూప్, టీజీఐఐసీ ఎండీ శశాంక, తెలంగాణ ఏరో స్పేస్ అండ్ డిఫెన్స్ డైరెక్టర్ ప్రవీణ్ తదితరులు పాల్గొన్నారు.

టిఆర్‌ఎస్ వర్కింగ్ ప్రెసిడెంట్ కె. తారక రామారావు ఆటో అవతారం ఎత్తారని కాంగ్రెస్ ఎంపీ చామల కిరణ్‌కుమార్ రెడ్డి విమర్శించారు. బిఆర్‌ఎస్ అధికారంలో ఉన్న పదేళ్ళలో ఏనాడూ ఆటోవాలాల గురించి పట్టించుకోని కెటిఆర్ ఇప్పుడు జూబ్లీహిల్స్ ఉప ఎన్నిక నేపథ్యంలో వారిపై ఎనలేని ప్రేమ కురిపిస్తూ, కొత్త డ్రామా ప్రారంభించారని ఆయన మంగళవారం విలేకరుల సమావేశంలో దుయ్యబట్టారు. పదేళ్ళలో బిఆర్‌ఎస్ ప్రభుత్వం ఆటోలపై సుమారు నలభై కోట్ల రూపాయల చలాన్లు విధించారని ఆయన తెలిపారు. తాము అధికారంలోకి వచ్చిన తర్వాత వంట గ్యాస్ సిలిండర్‌పై ధరలు తగ్గించామని, మహిళలకు ఉచిత బస్సు సౌకర్యం కల్పించామని ఆయన చెప్పారు. లక్షకుపైగా జీరో టిక్కెట్స్ మహిళలకు ఇవ్వడం జరిగిందని ఆయన తెలిపారు. ఇలా చెప్పుకుంటూ పోతే చాలా ఉన్నాయన్నారు.

తెలంగాణను న్యూయార్క్, ఇస్తాంబుల్ చేస్తామని చివరకు చేతులెత్తేశారని ఆయన విమర్శించారు. కాళేశ్వరం ప్రాజెక్టుపై చూపిన శ్రద్ధ దేనిపైనా చూపించలేదన్నారు. నీరు కెసిఆర్ ఫామ్ హౌస్‌కు, నిధులు కెసిఆర్ కుటుంబ సభ్యులకు వెళ్ళాయని ఆయన విమర్శించారు. ఇక నియామకాల విషయానికి వస్తే ఎమ్మెల్సీ, ఎంపీ పదవులు కెసిఆర్ కుటుంబ సభ్యులకే దక్కాయని ఎంపి చామల విమర్శించారు. తమ ఉద్యమ ఫలితంగానే తెలంగాణ రాష్ట్ర ఏర్పాటైందని కెటిఆర్ మాయ మాటలు చెబుతున్నారని ఆయన విమర్శించారు. కేంద్ర, రాష్ట్ర ప్రభుత్వాల మధ్య సత్సంబంధాలు లేకపోవడంతో కేంద్రం నుంచి ఆశించిన విధంగా నిధులు రావడం లేదని ఆయన తెలిపారు. అప్పుల రాష్ట్రంగా మార్చకుండా ఉంటే ఎప్పుడో అభివృద్ధి చెందేదని ఎంపి చామల అన్నారు.

దివ్యాంగుల సంక్షేమాన్ని రాష్ట్ర ప్రభుత్వం ఏ మాత్రం పట్టించుకోవడం లేదని బిజెపి రాష్ట్ర అధ్యక్షుడు ఎన్. రాంచందర్ రావు విమర్శించారు. బిజెపి దివ్యాంగుల విభాగం రాష్ట్ర కన్వీనర్ కొల్లి నాగేశ్వర్ రావు అధ్వర్యంలో మంగళవారం నాంపల్లిలోని పార్టీ కార్యాలయంలో సమావేశం జరిగింది. ఈ సమావేశానికి ముఖ్యఅతిథిగా హాజరైన రాంచందర్ రావు ప్రసంగిస్తూ సార్వత్రిక ఎన్నికలకు ముందు కాంగ్రెస్ పార్టీ ఇచ్చిన హామీలను అధికారంలోకి వచ్చిన తర్వాత తుంగలో తొక్కిందని దుయ్యబట్టారు. వారికి లభిస్తున్న పెన్షన్‌ను నాలుగు వేల రూపాయల నుంచి ఆరు వేలకు పెంచుతామన్న హామీని నిలబెట్టుకోలేదని ఆయన విమర్శించారు.

ఆధునిక ఉపకరణాల పంపిణీ, ప్రత్యేక ఉపాధి కోటా వంటి హామలు గాలిలో కలిసాయని దివ్యాంగులు ఆందోళనతో ఉన్నారని ఆయన తెలిపారు. దివ్యాంగులకు సమాన హక్కులు, గౌరవం, అవకాశాలు కల్పించేందుకు తాము కృషి చేస్తున్నామని రాంచందర్ రావు వివరించారు. కేంద్ర ప్రభుత్వం దివ్యాంగుల కోసం చేపట్టిన సంక్షేమ కార్యక్రమాల గురిచి వివరించారు. దివ్యాంగులకు ట్రై సైకిళ్ళు, హియరింగ్ ఎయిడ్ల వంటి ఆధునిక ఉపకరణాలు ఉచితంగా పంపిణీ చేస్తున్నదని ఆయన తెలిపారు. జూబ్లీహిల్స్ ఎన్నికల్లో దివ్యాంగులు బిజెపి అభ్యర్థి విజయానికి కృషి చేయాలని రాంచందర్ రావు కోరారు.

ఎన్టీఆర్ జిల్లా నందిగామ నియోజకవర్గంలో దారుణం చోటు చేసుకుంది. నలుగురు యువకులు ఒక మైనర్ బాలికపై సామూహిక అత్యాచారం చేశారు. చందర్లపాడు మండలం ముప్పాళ్ళ గ్రామంలో ఈ దారుణం చోటు చేసుకుంది. గ్రామానికి చెందిన ముగ్గురు యువకులు, మరో యువకుడితో కలిసి బాలికపై అఘాయిత్యానికి పాల్పడ్డారని బాలిక తల్లి పోలీసులకు ఫిర్యాదు చేశారు. ఆమె ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు. ఇంట్లో ఒంటరిగా ఉన్న సమయంలో ముప్పాళ్ల గ్రామానికి చెందిన ముగ్గురు యువకులతో పాటు విజయవాడకు చెందిన మరో యువకుడు బాలికపై సామూహిక అత్యాచారానికి పాల్పడ్డారని తెలుస్తోంది. బాలిక శరీరంలో నిందితులు కొరికిన గాయాలు ఉన్నాయని బాధితురాలి కుటుంబ సభ్యులు ఫిర్యాదులో వెల్లడించారు. ప్రస్తుతం బాధితురాలిని ఆసుపత్రికి తరలిం చి చికిత్స అందిస్తున్నారు. తల్లి ఫిర్యాదు ఆధారంగా పోలీసులు వేగంగా స్పందించారు.

మైనర్ బాలిక కావడంతో పోలీసులు పోక్సో, ఎస్సీ/ఎస్టీ అట్రాసిటీ చట్టాల కింద కేసులు నమోదు చేసి విచారణ చేపట్టారు. పోలీసులు కావాలనే ఈ కేసును నీరు గార్చే ప్రయత్నం చేస్తున్నారని బాలిక కుటుంబ సభ్యులు ఆరోపించారు. పోలీసులు ముగ్గురు యువకులను అదుపులోకి తీసుకున్నట్లు తెలుస్తోంది. నాల్గవ నిందితుడి కోసం పోలీసులు గాలింపు చర్యలు తీవ్రతరం చేశారు. తాము పనులకు వెళ్లిన సమయంలో ఇంట్లో ఎవరూ లేరని గమనించి నలుగురు యువకులు తన కూతురిపై పశు వులా ప్రవర్తించారని బాధితురాలి తల్లి ఆవేదన వ్యక్తం చేశారు. ఇంటికి వచ్చి చూడగా చాలా మంది అక్కడ ఉన్నారని, లోపలికి వెళ్లి చూడగా కూతురు భయపడుతూ గాయాలతో కనిపించిందన్నారు. కింద పడి దెబ్బలు తగిలాయని చెప్పే ప్రయత్నం చేశారని ఆవేదన వ్యక్తం చేశారు. కూతురి శరీరంపై గాయాలు చూస్తే ఎంతగానో వేధించారని తెలుస్తుందని, నిందితులను అరెస్ట్ చేసి చర్యలు తీసుకోవాలని డిమాండ్ చేశారు. బాలికకు న్యాయం చేయాలని ఆమె మేనమామ డిమాండ్ చేశారు. ఆసుపత్రికి తీసుకెళ్లిన కొన్ని గంటల తరువాత డాక్టర్లు ఆమెకు చికిత్స చేశారని వెల్లడించారు.