Latest News

లక్నో: సౌతాఫ్రికాతో బుధవారం జరిగే నాలుగో టి20 మ్యాచ్‌కు ఆతిథ్య టీమిండియా సమరోత్సాహంతో సిద్ధమైంది. ఈ మ్యాచ్‌లోనూ గెలిచి సిరీస్‌ను సొంతం చేసుకోవాలనే పట్టుదలతో కనిపిస్తోంది. కిందటి పోరులో ఓడిన సౌతాఫ్రికాకు ఈ మ్యాచ్ సవాల్‌గా మారింది. సిరీస్ అవకాశాలను సజీవంగా ఉంచుకోవాలంటే ఈ మ్యాచ్‌లో కచ్చితంగా గెలవాల్సిన పరిస్థితి నెలకొంది. తీవ్ర ఒత్తిడి నెలకొన్న నేపథ్యంలో సఫారీ టీమ్ ఎలా ఆడుతుందనేది ఆసక్తికగా తయారైంది. అయితే ఎటువంటి పరిస్థితి ఎదురైనా తట్టుకుని ముందుకు సాగే సత్తా దక్షిణాఫ్రికాకు ఉంది. ఇప్పటికే రెండో మ్యాచ్‌లో ఈ విషయం స్పష్టమైంది. ఇలాంటి స్థితిలో భారత్ ఏమాత్రం నిర్లక్షంగా ఆడినా భారీ మూల్యం చెల్లించుకోక తప్పదు.

గిల్, సూర్యలకు కీలకం..

వరుస వైఫల్యాలు చవిచూస్తున్న కెప్టెన్ సూర్యకుమార్ యాదవ్, వైస్ కెప్టెన్ శుభ్‌మన్ గిల్‌లకు ఈ మ్యాచ్ సవాల్‌గా తయారైంది. ఇప్పటి వరకు ఆడిన మూడు మ్యాచుల్లోనూ వీరు ఆశించిన స్థాయిలో బ్యాట్‌ను ఝులిపించలేక పోయారు. గిల్ కిందటి మ్యాచ్‌లో 28 పరుగులు చేసి కాస్త పర్వాలేదనిపించాడు. అయితే సూర్య 12 పరుగులకే ఔటయ్యాడు. ఈ పరిస్థితుల్లో ఇద్దరిపై ఒత్తిడి నెలకొంది. దీన్ని తట్టుకుని జట్టును ముందుండి నడిపించాల్సిన బాధ్యత వీరిపై ఉంది. ఇందులో వీరు ఎంతవరకు సఫలమవుతారో వేచి చూడక తప్పదు. యువ సంచలనం అభిషేక్ శర్మ ఫామ్‌లో ఉండడం భారత్‌కు కలిసి వచ్చే అంశంగా చెప్పాలి. హార్దిక్ పాండ్య కూడా జోరుమీదున్నాడు. శివమ్ దూబె, తిలక్ వర్మ, జితేశ్ శర్మ తదితరులతో భారత బ్యాటింగ్ బాగానే ఉంది. అంతేగాక అర్ష్‌దీప్, హర్షిత్, హార్దిక్, వరుణ్, కుల్దీప్‌లతో బౌలింగ్ కూడా పటిష్టంగానే ఉన్న సంగతి తెలిసిందే. దీంతో భారత్ ఈ పోరులో ఫేవరెట్‌గా బరిలోకి దిగుతోంది.

 ఉపాధ్యాయ అర్హత పరీక్ష(టిజి టెట్) 2026 పరీక్ష షెడ్యూల్ విడుదలైంది. 2026 జనవరి 3వ తేదీ నుంచి 20వ తేదీ వరకు కంప్యూటర్ బేస్డ్ విధానంలో టెట్ పరీక్షను నిర్వహించనున్నారు. 15 రోజుల పాటు రోజుకు రెండు సెషన్లలో టెట్ పరీక్షలు నిర్వహించనున్నట్లు టిజి టెట్ చైర్మన్, పాఠశాల విద్యాశాఖ సంచాలకులు నవీన్ నికోలస్ తెలిపారు. ఉదయం 9 గంటల నుంచి 11.30 వరకు మొదటి సెషన్, మధ్యాహ్నం 2 నుంచి సాయంత్రం 4.30 వరకు రెండో సెషన్ నిర్వహించనున్నట్లు పేర్కొన్నారు. టెట్ పరీక్షకు మొత్తం 2,37,754 దరఖాస్తులు రాగా, అందులో పేపర్ 1కు 85,538, పేపర్ 2కు 1,52,216 మంది అభ్యర్థులు దరఖాస్తులు సమర్పించారు. ఈసారి టెట్‌కు 1,66,084 మంది ఇన్ సర్వీస్ టీచర్లు దరఖాస్తు చేసుకోగా, అందులో పేపర్ 1కు 58,149 మంది, పేపర్ 2కు 1,52,216 మంది దరఖాస్తు చేసుకున్నారు.

టెట్ పరీక్ష షెడ్యూల్

2026 జనవరి 3 పేపర్ 2 మ్యాథ్స్ అండ్ సైన్స్ (సెషన్ -1)

2026 జనవరి 3 పేపర్ 2 మ్యాథ్స్ అండ్ సైన్స్ (సెషన్ -2)

2026 జనవరి 4- పేపర్ 2 మ్యాథ్స్ అండ్ సైన్స్ (సెషన్ -1)

2026 జనవరి 4- పేపర్ 2 మ్యాథ్స్ అండ్ సైన్స్(సెషన్ -2)

2026 జనవరి 5 పేపర్ 2 సోషల్ స్టడీస్ (సెషన్ -1)

2026 జనవరి 5- పేపర్ 1 సోషల్ స్టడీస్ (సెషన్ -2)

2026 జనవరి 6- పేపర్ 1 సోషల్ స్టడీస్ (సెషన్ -1)

2026 జనవరి 6- పేపర్ 2 సోషల్ స్టడీస్ (సెషన్ -2)

2026 జనవరి 8 పేపర్ 1 (సెషన్ -1)

2026 జనవరి 8 పేపర్ 1 (సెషన్ 1)

2026 జనవరి 9 పేపర్ 1 (సెషన్ -1)

2026 జనవరి 11 పేపర్ 1 (సెషన్ -1)

2026 జనవరి 11 పేపర్ 1 (సెషన్ 2)

2026 జనవరి 19 పేపర్ 1(మైనర్) (సెషన్ -1)

2026 జనవరి 20 పేపర్ 2 మ్యాథ్స్ అండ్ సైన్స్ అండ్ సోషల్ స్టడీస్(సెషన్ -1)

సినిమాల పైరసీ కేసులో అరెస్టు అయిన ఐ బొమ్మ వెబ్‌సైట్, బప్పం టివి నిర్వాహకుడు ఇమంది రవిని పోలీస్ కస్టడీకి మరోసారి నాంపల్లి కోర్టు అనుమతించింది. సినిమాలను పైరసీ చేసి వెబ్‌సైట్‌లో అప్‌లోడ్ చేసిన కేసులో హైదరాబాద్ సైబర్ క్రైం పోలీసులు అరెస్టు చేశారు. రవిపై హైదరాబాద్ సైబర్ క్రైం పోలీసులు నాలుగు కేసులు నమోదు చేశారు. దీంతో గతంలో నాంపల్లి కోర్టును హైదరాబాద్ పోలీసులు కస్టడీకి కోరగా రెండు సార్లు అనుమతి ఇచ్చింది. పోలీసులు రవిని చంచల్‌గూడ జైలు నుంచి అదుపులోకి తీసుకుని రెండు సార్లు విచారణ చేసి పలు విషయాలు రాబట్టింది. అయితే కస్టడీలో రవి పూర్తిగా సహకరించకుండా అడిగన వాటికి సమాధానాలు దాటవేయడంతో విచారణలో కీలక విషయాలు రాబట్టలేదని హైదరాబాద్ సైబర్ క్రైం పోలీసులు మరోసారి కస్టడీకి ఇవ్వాలని నాంపల్లి కోర్టులో పిటిషనల్ దాఖలు చేశారు. దీనిపై రవి తరఫు న్యాయవాదులు, పబ్లిక్ ప్రాసిక్యూటర్ మధ్య వాదనలు విన్న కోర్టు 12 రోజులు పోలీసుల కస్టడీకి అనుమతి ఇస్తూ మంగళవారం అనుమతి ఇచ్చింది. మూడు కేసుల్లో ఒక కేసుకు మూడు రోజుల చొప్పున 12 రోజులు విచారించేందుకు కోర్టు పోలీసులకు అనుమతి ఇచ్చింది. దీంతో పోలీసులు రవిని చంచల్‌గూడ జైలు నుంచి బుధవారం కస్టడీలోకి తీసుకుని మూడు కేసుల్లో విచారణ చేయనున్నట్లు తెలిసింది. మరో వైపు ఇప్పటికే రెండు సార్లు కస్టడీలోకి తీసుకుని విచారించారని, మరోసారి రవిని కస్టడీకి ఇవ్వకుండా బెయిల్ ఇవ్వాలని ఆయన తరఫున వాదిస్తున్న న్యాయవాది కోర్టును కోరారు.

మెల్‌బోర్న్: ఆస్ట్రేలియాలోని సిడ్నీలో బోండీ బీచ్‌లో కాల్పులు జరిపిన నిందితుల్లో ఒకడైన సాజిద్ అక్రమ్ (50) వద్ద భారత పాస్‌పోర్ట్ ఉన్నట్టు ఆస్ట్రేలియ అధికారులు గుర్తించారు. అతడు హైదరాబాద్ నుంచి పాస్‌పోర్టు పొందినట్టు తెలిపారు. ఈ నేపథ్యంలో తెలంగాణ డీజీపీ కార్యాలయం సాజిత్‌అక్రమ్ హైదరాబాద్ వ్యక్తి అని వెల్లడించింది.

“బికామ్ చదివిన సాజిద్ 27 ఏళ్ల క్రితం 1998 లో విద్యార్థి వీసాపై ఆస్ట్రేలియా వెళ్లాడు. యూరోపియన్ యువతి వెనెరా గ్రోసోను వివాహం చేసుకున్నాడు. వీరికి ఒక కుమారుడు నవీద్ అక్రమ్, కుమార్తె, వీరిద్దరూ ఆస్ట్రేలియా పౌరులే, సాజిద్ అక్రమ్ ఇప్పటికీ భారత పాస్‌పోర్టునే వినియోగిస్తున్నాడు. అయితే హైదరాబాద్‌తో అతడికి అతి తక్కువ కాంటాక్ట్ ఉన్నాయి. ఆస్ట్రేలియాకు వలస వెళ్లినసాజిద్ ఆరుసార్లు భారత్‌కు వచ్చాడు. కుటుంబ, ఆస్తులకు సంబంధించిన వ్యవహారాల కోసమే ఇక్కడకు వచ్చాడు. హైదరాబాద్‌లో ఉన్నప్పుడు అతడికి ఎలాంటి నేర చరిత్ర లేదు. ఉగ్రవాదులతో సాజిద్‌కు సంబంధాలపై తమకేమీ తెలియదని హైదరాబాద్ లోని కుటుంబ సభ్యులు తెలిపారు” అని తెలంగాణ డిజిపి కార్యాలయం తమ ప్రకటనలో వెల్లడించింది.

ఇస్లామిక్ స్టేట్ ప్రభావం

ఈ ఉగ్రదాడి వెనుక ఇస్లామిక్ స్టేట్ ప్రభావం ఉందని ఆస్ట్రేలియా ఫెడరల్ పోలీస్ కమిషనర్ క్రిస్సీ బార్రెట్ మంగళవారం వెల్లడించారు. నిందితులు తండ్రీ కొడుకులని, తండ్రి కాల్పుల్లో మృతి చెందగా, కొడుకు ఆస్పత్రిలో చికిత్స పొందుతున్నాడని పేర్కొన్నారు. వారి దగ్గర లభించినసాక్షాల ఆధారంగా వారు ఇస్లామిక్ స్టేట్ ప్రభావితులని మొదటిసారి తాము వెల్లడిస్తున్నామని పాత్రికేయుల సమావేశంలో వివరించారు.

ముగ్గురు భారతీయ విద్యార్థులకు గాయాలు

ఈ ఉగ్రదాడి కాల్పులకు గాయపడినవారిలో ముగ్గురు భారతీయ విద్యార్థులు ఉన్నారు. ఈ దాడిలో 15 మంది ప్రాణాలు కోల్పోగా, మొత్తం 40 మంది గాయపడ్డారు. ఈ ముగ్గురిలో ఇద్దరు ఆస్పత్రిలో చికిత్స పొందుతున్నారు. వీరిపేర్లు కానీ ప్రస్తుత ఆరోగ్య పరిస్థితి కానీ బయటకు వెల్లడి కాలేదు. 

కొమురం భీం ఆసిఫాబాద్ జిల్లా, చింతలమానెపల్లి మండలం, బాలాజీ అనుకోడ గ్రామంలో రెండో విడత పంచాయతీ ఎన్నికల్లో ఓడిపోయిన సర్పంచ్ అభ్యర్థి వగాడి శంకర్ మంగళవారం గ్రామంలో విచిత్రమైన రీతిలో నిరసన వ్యక్తం చేశారు. ఈ ఎన్నికల్లో తనకు ఓటు వేయని వారు.. తాను ఇచ్చిన డబ్బులు తిరిగి ఇవ్వాలంటూ, లేదంటే తనకు ఓటు వేశారని గుర్తుగా పసుపు బియ్యం పట్టాలంటూ భార్యాపిల్లలతో కలిసి మంగళహారతిలో పసుపు, బియ్యం తీసుకొని ఇంటింటికీ తిరిగారు. ఈ సమాచారం అందుకున్న పోలీసులు సంఘటనా స్థలానికి చేరుకొని వారిని అదుపులోకి తీసుకొని ఇంటికి పంపించారు.

మెగా పవర్‌స్టార్ రామ్‌చరణ్ మరోసారి స్టార్ పవర్‌తో అదరగొట్టారు. ఆయన అప్ కమింగ్ ’పెద్ది’ చిత్రం నుంచి విడుదలైన ఫస్ట్ సింగిల్ ’చికిరి చికిరి’ ఆన్‌లైన్‌లో సంచలనం సృష్టిస్తోంది. ఈ పాట ఇప్పుడు ప్రపంచవ్యాప్తంగా ఒక పెద్ద సంచలనంగా మారింది. విడుదలైన కేవలం ఒక నెలలోనే, ఒక్క తెలుగు వర్షన్ లోనే 100 మిలియన్ల వ్యూస్‌ను దాటగా, ఐదు భాషల్లో కలిపి మొత్తం 150 మిలియన్లకు పైగా వ్యూస్‌ను సాధించింది. ఈ పాట ప్రజాదరణ రోజురోజుకు పెరుగుతూనే ఉంది. ఏఆర్ రెహమాన్ స్వరపరిచిన ఈ పాటలోని పవర్ ఫుల్ బీట్స్, ఆకట్టుకునే రిథమ్ అన్ని వర్గాల ప్రేక్షకులను ఆకట్టుకున్నాయి.

రామ్‌చరణ్ అదిరిపోయే డ్యాన్స్ మూమెంట్స్‌తో అందరినీ అలరిస్తున్నాడు. దర్శకుడు బుచ్చిబాబు సానా చూపించిన స్టైలిష్ విజువల్స్, ప్రతి ఫ్రేమ్‌లో కనిపించే గ్రాండియర్ ఈ పాటకు మరింత ప్లస్ అయ్యాయి. భారీ స్థాయిలో తెరకెక్కుతున్న ఈ చిత్రాన్ని వృద్ధి సినిమాస్ బ్యానర్‌పై వెంకట సతీష్ కిలారు నిర్మిస్తున్నారు. ఈ చిత్రంలో జాన్వీ కపూర్ కథానాయికగా నటిస్తుండగా, శివ రాజ్‌కుమార్ కీలక పాత్రలో కనిపించనున్నారు.

న్యూఢిల్లీ: బీమా రంగంలోకి 100 శాతం విదేశీ ప్రత్యక్ష పెట్టుబడులు (ఎఫ్‌డిఐ) తీసుకు వచ్చేందుకు రూపొందించిన బిల్లును లోక్‌సభలో కేంద్ర ప్రభుత్వం మంగళవారం విపక్షాల తీవ్ర నిరసనల మధ్య ప్రవేశ పెట్టింది. సబ్‌కా బీమా సబ్‌కీ రక్షా (బీమా చట్టాల సవరణ)చట్టం , 2025 పేరుతో ఈ బిల్లును ప్రవేశ పెట్టింది. దీనికింద ఇన్సూరెన్స్ యాక్ట్ (1938),ఇన్సూరెన్స్ కార్పొరేషన్ యాక్ట్ (1956). ఇన్సూరెన్స్ రెగ్యులేటరీ అండ్ డెవలప్‌మెంట్ అథారిటీ యాక్ట్ (1999)ను సవరించడమైంది.

కేంద్ర ఆర్థిక మంత్రి నిర్మలాసీతారామన్ దీనిపై మాట్లాడుతూ.. సామాన్య ప్రజలకు బీమా సౌకర్యం విస్తరింప చేయడమే మోడీ ప్రభుత్వ లక్షమని ఆమె పేర్కొన్నారు. కొవిడ్ మహమ్మారి సమయంలో కూడా బలహీనవర్గాలకు బీమా కల్పించినట్టు ఉదహరించారు. విపక్ష సభ్యులు కొంతమంది అభ్యంతరాలు తెలియజేయడం చర్చల్లో భాగమని, ఈ సందర్భంగా వచ్చిన ప్రశ్నలకు తాను సమాధానం చెప్పడానికి సిద్ధంగా ఉన్నానని చెప్పారు. ఆర్‌ఎస్‌పి సభ్యుడు ఎన్‌కె ప్రేమచంద్రన్, డిఎంకె సభ్యులు టి. సుమతి, టిఎంసి సభ్యులు సౌగతా రాయ్, ఈ బిల్లు వల్ల ప్రజలకు ఒరిగేదేమీ లేదని విమర్శించారు. ఈ బిల్లు ప్రకారం ఎఫ్‌డిఐ పరిధి 74 శాతం నుంచి 100 శాతం వరకు పెరుగుతుంది.

71 కాలం చెల్లిన చట్టాల రద్దుకు బిల్లు

కేంద్ర ప్రభుత్వం 71 కాలం చెల్లిన చట్టాలను రద్దు చేయడానికి లోక్‌సభలో మంగళవారం ‘ విలీనం మరియు సవరణ బిల్లు 2025ను ప్రవేశ పెట్టింది. ఇందులో చాలావరకు సవరణ చట్టాలే (65) , మరికొన్ని ప్రధాన చట్టాలు (6) ఉన్నాయి. ప్రభుత్వ పనితీరును మెరుగుపర్చడానికి, చట్టపరమైన వ్యవస్థను సరళీకృతం చేయడానికి ఈ బిల్లు ఉద్దేశించబడింది. మూజువాణి ఓటుతో ఈ బిల్లును ఆమోదించారు. కేంద్ర న్యాయమంత్రి అర్జున్ రామ్ మేఘ్వాల్ ఈ బిల్లు వల్ల పౌరుల జీవన పరిస్థితులు సరళమవుతాయని చెప్పారు. 

న్యూఢిల్లీ: దట్టమైన పొగమంచు రాజధాని ఢిల్లీని ఉక్కిరిబిక్కిరి చేస్తోంది. కాలుష్యంపై యుద్ధం ప్రకటించిన ఢిల్లీ ప్రభుత్వం కాలుష్య నివారణ చర్యల్లో భాగంగా డిసెంబర్ 18 నుంచి కాలుష్య నియంత్రణ సర్టిఫికెట్ (పియుసి) లేని వాహనాలకు పెట్రోల్ బంకుల్లో ఇంధనం సరఫరా చేయబడదని ఢిల్లీ పర్యావరణ మంత్రి మంజిందర్ సింగ్ సిర్సా ప్రకటించారు. అంతేకాకుండా బిఎస్6 ప్రమాణాల కంటే తక్కువ ఉన్న ఢిల్లీయేతర వాహనాల ప్రవేశాన్ని పూర్తిగా నిషేధిస్తున్నట్టు తెలిపారు. అత్యవసర సేవల్లో లేని ట్రక్కులు, వాణిజ్య వాహనాలకు నగరంలో ప్రవేశం నిరాకరిస్తారు. ల్యాండ్‌ఫిల్ సైట్‌ల ఎత్తును 15 మీటర్లు తగ్గించామని, సుమారు 8 వేల పరిశ్రమలను కఠినమైన కాలుష్య నియంత్రణ నిబంధనల కింద తీసుకు వచ్చామన్నారు. కాలుష్యానికి పాల్పడిన పరిశ్రమలకు రూ. 9 కోట్ల జరిమానా విధించామని చెప్పారు.

ప్రజలకు క్షమాపణలు

తొమ్మిది,పది నెలల్లో ఢిల్లీలో కాలుష్యాన్ని పూర్తిగా నిర్మూలించడం ఏ ప్రభుత్వానికైనా సాధ్యం కాదని మంత్రి అంగీకరిస్తూ ఈ విషయంలో ప్రజలకు ఆయన క్షమాపణలు చెప్పారు. ఆమ్ ఆద్మీ పార్టీ ప్రభుత్వ హయాంతో పోలిస్తే రోజువారీ గాలి నాణ్యత సూచీ తగ్గించేందుకు అవిశ్రాంతంగా కృషి చేస్తామని హామీ ఇచ్చారు. 

మధుర: యమునా ఎక్స్‌ప్రెస్ రహదారిపై పొగమంచు కారణంగా మంగళవారం తెల్లవారు జామున 4.30 గంటల ప్రాంతంలో ఎనిమిది బస్సులు, మూడు కార్లు ఒకదాన్నొకటి ఢీ కొనడంతో భారీగా మంటలు చెలరేగి 13 మంది కాలిన గాయాలతో మృతి చెందారు. 43 మంది గాయపడ్డారు. బలదేవ్ పోలీస్ స్టేషన్ పరిధిలో ఈ ప్రమాదం జరిగింది. ఆగ్రా-నొయిడా వైపు యమునా ఎక్స్‌ప్రెస్ వే వద్ద దట్టమైన పొగమంచు వల్ల వాహనాలు ఒకదానినొకటి ఢీకొన్నాయని దీంతో మంటలు చెలరేగి, బస్సులు, కార్లు నిమిషాల్లోనే దగ్ధమయ్యాయని గాయపడిన వారిని ఆస్పత్రికి తరలించామని మధుర సీనియర్ సూపరింటెండెంట్ ఆఫ్ పోలీస్ ష్లోక్ కుమార్ తెలిపారు. మృతుల్లో గుర్తించిన ఇద్దరిలో ఒకరు ప్రయాగ్ రాజ్‌కు చెందిన 44 ఏళ్ల అఖిలేంద్ర ప్రతాప్ కాగా, మరొకరు మహరాజ్‌గంజ్ జిల్లాకు చెందిన 75 ఏళ్ల రామ్‌పాల్ అని బలదేవ్ పోలీస్ స్టేషన్ ఎస్‌హెచ్‌ఒ రంజన సచన్ చెప్పారు.

మూడో వ్యక్తి గోండా జిల్లాకు చెందిన 62 ఏళ్ల సుల్తాన్ అహ్మద్‌గా బృందావన్ చీఫ్ మెడికల్ ఆఫీసర్ గుర్తించారు. కాలిన బస్సులు, కార్లు శిథిలాలుగా మారాయి.రోడ్డుపై నుంచి వీటిని తొలగించడానికి క్రేన్లను రప్పించారు. కాలిన మృతదేహాల డిఎన్‌ఎను భద్రపరిచామని, సంబంధిత కుటుంబీకులు వస్తే వారితో పోల్చి పరీక్షిస్తామని, ఇంతవరకు గుర్తించిన ముగ్గురి మృతుల బంధువులకు తెలియజేస్తున్నామని ష్లోక్ కుమార్ వివరించారు. గుర్తించిన ముగ్గురి మృతుల అంత్యక్రియలకు ఏర్పాట్లు చేస్తున్నట్టు జిల్లా మెజిస్ట్రేట్ చంద్రప్రకాష్ సింగ్ చెప్పారు. ఈప్రమాదంపై దర్యాప్తునకు నలుగురితో బృందాన్ని ఏర్పాటు చేశారు. రెండు రోజుల్లో కమిటీ నివేదిక సమర్పించ వలసి ఉంది. ఇంకా గుర్తించని డ్రైవర్‌పై బలదేవ్ పోలీస్ స్టేషన్‌లో కేసు నమోదైందని ఎస్‌ఎస్‌పి తెలిపారు. మృతదేహాల పోస్ట్‌మార్టమ్‌కు, డిఎన్‌ఎ నమూనాల సేకరణకు, రెండు వైద్య బృందాలను ఏర్పాటు చేశారు. తీవ్రంగా గాయపడిన వారిని ఆగ్రా లోని ఎస్‌ఎన్ మెడికల్ కాలేజీ, ఆస్పత్రికి పంపించారు. మంగళవారం మధ్యాహ్నం వైద్య చికిత్స కోసం 43 మందిని బృందావన్ లోని జాయింట్ డిస్ట్రిక్ట్ ఆస్పత్రికి తీసుకురావడమైందని సిఎంఒ తెలిపారు.

యూపి సిఎం యోగి ఆదిత్యనాథ్ సంతాపం

ఉత్తరప్రదేశ్ ముఖ్యమంత్రి యోగి ఆదిత్యనాథ్ మృతుల కుటుంబాలకు తీవ్ర సంతాపం తెలియజేశారు. గాయపడిన వారికి సరైన చికిత్స అందేలా చూడాలని జిల్లా అధికార యంత్రాంగాన్ని ఆదేశించారు. మృతుల కుటుంబాలకు రూ. 2 లక్షలు, గాయపడిన వారికి రూ. 50 వేలు వంతున ముఖ్యమంత్రి ఎక్స్‌గ్రేషియో ప్రకటించారు.

పొగమంచుతో మరికొన్ని ప్రమాదాలు

హర్యానా లోని సోనిపట్, నూహ్ జిల్లాల్లో పొగమంచు కారణంగా సోమవారం రోడ్డు ప్రమాదాలు సంభవించి ఇద్దరు పోలీసు అధికారులతో సహా ముగ్గురు మృతి చెందారు. ఢిల్లీ ముంబై ఎక్స్‌ప్రెస్ వేపై వాహనాలు ఢీకొని సిఐఎస్‌ఎఫ్‌ఇన్‌స్పెక్టర్‌తోసహా ఇద్దరు చనిపోయారు. సోనిపట్‌లో మహిళా అసిస్టెంట్ సబ్ ఇన్‌స్పెక్టర్ తాను ప్రయాణిస్తున్న కారుకు ట్రక్కు ఢీకొనడంతో ప్రాణాలు కోల్పోయారు.

విమానాల రాకపోకలపై ప్రభావం

వాయు కాలుష్యంతోపాటు దట్టంగా పొగమంచు కారణంగా ఢిల్లీ ఇందిరాగాంధీ విమానాశ్రయంలో పెద్ద ఎత్తున ఇండిగో, ఎయిర్ ఇండియా విమానాలు రద్దయ్యాయి. ఈ సందర్భంగా ఢిల్లీ ఎయిర్‌పోర్టు ప్రయాణికులకు అడ్వైజరీ చేసింది. ఢిల్లీ విమానాశ్రయంలో విమాన సర్వీసుల కార్యకలాపాలు యథావిధిగా కొనసాగుతున్నాయని పేర్కొంది. అయితే పలు విమానాల రాకపోకలపై ప్రభావం ఉండవచ్చని, ప్రయాణికులకు సహాయం అందించేందుకు తమ సిబ్బంది అన్ని టెర్మినల్స్‌లో అందుబాటులో ఉన్నారని పేర్కొంది.