Breaking News,తాజా వార్తలు,రాష్ట్ర వార్తలు

హైదరాబాద్: మరికొన్ని రోజుల్లో సంక్రాంతి పండుగ వస్తుంది. ఈ పండగకి అందరూ తమ సొంతుళ్లకు వెళ్లి కుటుంబసభ్యులతో సంబరాలు జరుపుకోవాలని భావిస్తుతుంటారు. అలాంటి వారి కోసం దక్షిణ మధ్య రైల్వే ప్రత్యేక రైళ్లను డిసెంబర్ 14 నుంచి ఉదయం 8 గంటల నుంచి అడ్వాన్స్ బుకింగ్స్ ఓపెన్ చేస్తున్నట్లు పేర్కొంది. ఈ సదుపాయాన్ని ఉయోగంచుకోవాలని విజ్ఞప్తి చేసింది. 2026 జనవరి నుంచి ప్రత్యేక రైళ్లను నడుపుతున్నట్లు దక్షిణ మధ్య రైల్వే పేర్కొంది. సికింద్రాబాద్‌ నుంచి విజయవాడ మీదుగా.. ఏపీలోని ఇతర ప్రాంతాలకు, అలాగే ఇతర రాష్ట్రాలకు ఈ రైళ్లు నడపనున్నారు. ఈ ప్రత్యేక రైళ్లలో 1AC, 2AC, 3AC, స్లీపర్, జనరల్, సెకండ్ క్లాస్ కోచ్‌లు ఉంటాయి.

హైదరాబాద్: తెలంగాణలో తొలి విడత పంచాయతీ ఎన్నికల కౌంటింగ్ ప్రారంభమైంది. తొలి విడత పంచాయతీ ఎన్నికలలో కాంగ్రెస్ హవా కొనసాగుతోంది. కాంగ్రెస్ ఇప్పటి వరకు 279 స్థానాలలో గెలుపొందగా బిఆర్ఎస్ 45, బిజెపి 5, ఇతరులు 61 స్థానాలలో విజయం సాధించారు.

తెలంగాణ రాష్ట్రంలో జరుగుతున్న పంచాయతీ ఎన్నికలు మొత్తం మూడు దశల్లో జరుగుతున్నాయి. తొలి దశ పోలింగ్ గురువారం(డిసెంబర్ 11) జరుగుతుండగా.. రెండో దశ ఈనెల 14న, మూడో దశ ఈనెల 17వ తేదీన పంచాయతీ ఎన్నికలు జరగనున్నాయి.

హైదరాబాద్: తెలంగాణలో తొలి విడత పంచాయతీ ఎన్నికల పోలింగ్ ముగిసింది. గురువారం ఉదయం 7 గంటల నుంచి మధ్యాహ్నం 1 గంట వరకు ముగిసింది. కొన్ని గ్రామాలలో సమయంలో లైన్‌లో నిలబడిన ఓటర్లకు ఓటు వేయవచ్చును. రెండు గంటల నుంచి ఓట్ల లెక్కింపు ఉంటుంది. తెలంగాణ వ్యాప్తంగా యువత, పెద్దలు, వృద్ధులు ఓటు వేసేందుకు ఉత్సాహం చూపించారు. తొలి విడత పంచాయతీ ఎన్నికలలో భారీగా ఓటింగ్ శాతం నమోదైనట్టు తెలుస్తోంది. ఉదయం 11 గంటల వరకు 52 శాతం పోలింగ్ నమోదైన విషయం తెలిసిందే. అక్కడక్కడ స్వల్ప ఘర్షణలు చోటుచేసుకున్నాయి. నల్గొండ జిల్లా కోర్లపహాడ్, ఉరుమండ్ల గ్రామంలో ఘర్షణలు చెలరేగాయి. గజ్వేల్ మండలం అక్కారంలో ప్రలోభాల పర్వం కొనసాగింది. కారులో తరలిస్తున్న రూ. 2.25 లక్షలను పోలీసులు పట్టుకున్నారు.

అమరావతి: ఆంధ్రప్రదేశ్ రాష్ట్రం కాకినాడ జిల్లా పిఠాపురంలో మహిళపై దుండగులు కత్తులతో దాడికి పాల్పడ్డారు. సీతయ్యగారి తోట శివారు నరసింగపురం రోడ్డు వద్ద ఘటన జరిగింది. రాత్రి విధులు ముగించుకుని ఇంటికి వెళ్తున్న అల్లం సునీతను బైక్ తో వెంబడించి ఇద్దరు దుండగులు దాడి చేశారు.  ఓ ప్రైవేటు ఆసుపత్రిలో ఆపరేషన్ థియేటర్ అసిస్టెంట్ గా సునీత పని చేస్తున్నారు. వాహనదారులు గమనించి ఆమెను ఆస్పత్రికి తరలించారు. పోలీసులు ఆస్పత్రికి చేరుకొని కేసు నమోదు చేసి దర్యాప్తు చేస్తున్నారు.

హైదరాబాద్: తెలంగాణ ఆర్టీసీ ఉద్యోగుల సేవాభావం, నిజాయితీ ఎప్పుడూ ప్రత్యేకమేనని మరోసారి నిరూపితమైందని మంత్రి పొన్నం ప్రభాకర్ ప్రశంసించారు. హుస్నాబాద్ ఆర్టీసీ డిపోకు చెందిన మహిళా కండక్టర్ కరుణ, డ్రైవర్ యూసీ మౌళి విధుల్లో చూపిన నిబద్ధత నిజంగా అభినందనీయమని కొనియాడారు. వర్కుల్–కోహెడ రూట్‌లో ప్రయాణించిన ఒక మహిళా ప్రయాణికురాలు పోగొట్టుకున్న విలువైన పుస్తెలతాడును బస్సులో వెతికి గుర్తించి, డిపోకు తీసుకెళ్లి అధికారుల సమక్షంలో యజమానికి అప్పగించారు. ఆర్ టిసి ఉద్యోగుల నిజమైన మానవత్వం, ధర్మబద్ధతకు నిలువెత్తు నిదర్శనమని పొన్నం మెచ్చుకున్నారు. రోజూ వేలాది మంది ప్రయాణికులు ఆధారపడే ఈ ప్రజా రవాణ సేవను మరింత విశ్వసనీయంగా నిలబెట్టేది ఇలాంటి ఉద్యోగుల నిజాయితీ, నిబద్ధతే అని కొనియాడారు. ప్రయాణికుల భద్రత, వారి వస్తువుల పరిరక్షణను అత్యంత బాధ్యతగా చూసుకుంటున్నామని,  ఆర్ టిసి సిబ్బందికి మనస్ఫూర్తిగా వందనం తెలియజేస్తున్నామని, కరుణ, మౌళి వంటి ఉద్యోగులు ఉంటేనే ఆర్ టిసి ప్రజల హృదయాల్లో మరింత స్థానం సంపాదిస్తుందన్నారు. నిజాయితీ, సేవాభావానికి హృదయపూర్వక అభినందనలు పొన్నం తెలిపారు. 

హైదరాబాద్: తెలంగాణలో తొలి విడత పంచాయతీ ఎన్నికలు పోలింగ్ ప్రారంభమైంది. గురువారం ఉదయం 7 గంటల నుంచి మధ్యాహ్నం ఒంటి గంట వరకు పోలింగ్ జరగనుంది. 3,834 సర్పంచ్, 27,628 వార్డు సభ్యుల ఎన్నికలు జరుగుతాయి. 37,562 పోలింగ్ కేంద్రాలలలో 56,19,430 మంది ఓటర్లు తమ ఓటు హక్కును వినియోగించుకోనున్నారు. మధ్యాహ్నం 2 గంటలకు ఓట్ల లెక్కింపు జరుగుతుంది. లెక్కింపు తర్వాత వార్డు సభ్యులతో సమావేశం ఏర్పాటు చేసి ఉప సర్పంచ్ ను ఎన్నుకుంటారు. 

ఉ.7 గంటలకు పోలింగ్ ప్రారంభం

ఎక్కడున్నా ఓటర్లందరూ తమ ఓటు

హక్కు వినియోగించుకోవాలని అధికారుల విజ్ఞప్తి

మనతెలంగాణ/హైదరాబాద్ : రాష్ట్రంలో గురువారం(డిసెంబర్ 11) మొదటి విడత గ్రామ పంచాయతీ ఎన్నికలు జరుగనున్నాయి. ఉదయం 7.00 గంటల నుంచి మధ్యాహ్నం ఒంటి గంట వరకు పోలింగ్ జరుగనుండగా, మధ్యాహ్నం 2 తర్వాత ఓట్ల లెక్కింపుతో పాటు ఉప సర్పంచ్ ఎన్నిక జరుగుతుంది. పంచాయతీ ఎన్నికలు ప్రశాంతంగా నిర్వహించేందుకు అధికారులు ఇప్పటికే ఏర్పాట్లు పూర్తి చేశారు. ఓటర్లు ఎక్కడున్నా సొంతూరులో ఓటు హక్కు ఉంటే తప్పకుండా వెళ్లి సద్వినియోగం చేసుకోవాలని అధికారులు కోరుతున్నారు. పల్లె ప్రగతికి బాధ్యతగా ఓటేయాలని, గ్రామాన్ని అభివృద్ధి పథంలో నడిపించడానికి శక్తి సామర్థ్యాలున్న నాయకుడిని ఎంచుకోవాలని అభ్యర్థులు విజ్ఞప్తి చేస్తున్నారు. సాధారణ ఎన్నికల్లో అందరూ ఇవిఎంలలో ఓటే వేస్తుండగా, గ్రామ పంచాయతీ ఎన్నికల్లో బ్యాలెట్ ఓటింగ్ ఉంటుంది. నచ్చిన అభ్యర్థి గుర్తుపై స్వస్తిక్ ముద్ర వేస్తే మీ ఓటు వారికి పడ్డట్లే. తెలిసీ తెలియక లేదా ఏమరుపాటుతో ముద్ర సరిగ్గా పడకపోయినా, ఇద్దరు అభ్యర్థుల మధ్య అటూ ఇటూ కాకుండా ముద్ర పడితే మీ ఓటు మాత్రం చెల్లుబాటు కాదు. ఖాళీ బ్యాలెట్ వేసినా అది చెల్లుబాటు కాదు. బ్యాలెట్‌లోని అభ్యర్థులెవరూ నచ్చకపోతే నోటా గుర్తుపై కూడా ఓటు వేయొచ్చు.

సమాచారం అందిస్తున్న అభ్యర్థులు

ఇప్పటికే సర్పంచి, వార్డు సభ్యులుగా పోటీ చేస్తున్న పలువురు అభ్యర్థులు తమ బంధువులు, స్నేహితులు, మద్దతుదారులకు ఫోన్లు చేస్తున్నారు. ఓటేయడానికి తప్పకుండా రావాలంటూ విజ్ఞప్తి చేస్తున్నారు. ఓటర్ల జాబితాలు చేతపట్టుకుని వీరంతా ఎక్కడున్నారో తెలుసుకుంటున్నారు. వారి అడ్రస్, ఫోన్ నెంబర్లు కనుక్కుంటున్నారు. బస్ ఛార్జీలతో పాటు కూలీ పనులకు వెళ్లేవారికి ఎలాంటి నష్టం కాకుండా చూసుకుంటామని భరోసా ఇస్తున్నారు.

మూడు దశల్లో పోలింగ్..

రాష్ట్రంలో జరుగుతున్న పంచాయతీ ఎన్నికలు మొత్తం మూడు దశల్లో జరుగుతున్నాయి. తొలి దశ పోలింగ్ గురువారం(డిసెంబర్ 11) జరుగుతుండగా.. రెండో దశ ఈనెల 14న, మూడో దశ ఈనెల 17వ తేదీన పంచాయతీ ఎన్నికలు జరగనున్నాయి.

స్టార్టప్‌ల కోసం రూ.1,000 కోట్ల ఫండ్

హైదరాబాద్ నుంచి 100 యూనికార్న్ సంస్థలు రావాలి

రాష్ట్రంలో ఎకో సిస్టమ్‌ను సృష్టించాలనుకుంటున్నాం

టీహబ్‌లో గూగుల్ ఫర్ స్టార్టప్స్ కేంద్రం ప్రారంభోత్సవంలో సిఎం రేవంత్‌రెడ్డి

మనతెలంగాణ/హైదరాబాద్:  గూగుల్ సంస్థ అంత ఎత్తుకు ఎదిగేలా స్టార్టప్‌లు కష్టపడాలని సిఎం రేవంత్‌రెడ్డి సూచించారు. స్టార్టప్‌ల కోసం ప్రభుత్వం రూ.1,000 కోట్ల ఫండ్ ఏర్పాటు చేయనున్నట్టు ఆయన చెప్పారు. ప్రస్తుతం హైదరాబాద్ స్టార్టప్‌లపైనే కాకుండా యూనికార్న్‌పై దృష్టి పెట్టిందని ఆయన పేర్కొన్నారు. కనీసం హైదరాబాద్ నుంచి 100 యూనికార్న్ సంస్థలు రావాలని ఆయన ఆకాంక్షించారు. 2034 నాటికి వాటిల్లో కనీసం 10 సూపర్ యూనికార్న్ కంపెనీలుగా ఎదగాలని, అందుకోసం రాష్ట్రంలో ఒక మంచి ఎకో సిస్టమ్‌ను సృష్టించాలనుకుంటున్నామని సిఎం రేవంత్‌రెడ్డి తెలిపారు. హైదరాబాద్‌లోని టీహబ్‌లో గూగుల్ ఫర్ స్టార్టప్స్ కేంద్రాన్ని సిఎం రేవంత్‌రెడ్డి బుధవారం ప్రారంభించారు.

ఈ కేంద్రం ప్రారంభోత్స వానికి సిఎం రేవంత్‌రెడ్డి ముఖ్య అతిథిగా హాజరు కాగా, ఈ కార్యక్రమంలో మంత్రి శ్రీధర్ బాబు తదితరులు పాల్గొన్నారు. ఈ సందర్భంగా సిఎం రేవంత్ రెడ్డి మాట్లాడుతూ 1998లో గూగుల్ ప్రస్థానం ఒక స్టార్టప్‌గానే మొదలైందని ముఖ్యమంత్రి తెలిపారు. గూగుల్ విజయ ప్రస్థానం తమకు నిత్యం స్ఫూర్తిదాయకమని ఆయన అన్నారు. గూగుల్‌కు రాష్ట్ర ప్రభుత్వం తరపున అవసరమైన సహకారం అందించడానికి సిద్దంగా ఉన్నామని సిఎం తెలిపారు. గూగుల్, యాపిల్, అమెజాన్, టెస్లా వంటివి గొప్ప స్టార్టప్‌లని ఆయన కొనియాడారు. 100 స్టార్టప్‌లను 1 బిలియన్ జాబితాలో చేర్చేలా కృషి చేస్తామన్నారు. 25 సంవత్సరాల క్రితం హైదరాబాద్‌లో ప్రారంభించిన సాఫ్ట్‌వేర్ సర్వీసెస్, ఫార్మా, లైఫ్ సైన్సెస్ రంగాలకు సంబంధించిన చాలా స్టార్ట్-ప్‌లు ప్రస్తుతం పెద్ద కంపెనీలుగా ఎదిగాయని సిఎం రేవంత్‌రెడ్డి తెలిపారు.

ప్రపంచానికి తెలంగాణ బ్రాండ్‌ను పరిచయం చేయాలని

ఈ సందర్భంగా యువతకు స్ఫూర్తి కలిగించే విషయాన్ని సిఎం చెబుతూ యువకులు, శక్తివంతులు సాధారణంగా వారి కలలను సాకారం చేసుకోవాలనుకుంటారన్నారు. అందులో భాగంగా ఉన్నత ఆశయాలతో 1998లో ఇద్దరు స్టాన్ఫోర్డ్ యూనివర్సిటీ మిత్రులు కలిసి కాలిఫోర్నియాలో ఒక గ్యారేజీలో ఓ స్టార్టప్‌ను ప్రారంభించారని, అదే నేటి ప్రఖ్యాత గూగుల్ కంపెనీగా అవతరించిందని ఆయన తెలిపారు. తెలంగాణ భవిష్యత్ అభివృద్ధిని ఆకాంక్షించి, ప్రపంచానికి తెలంగాణ బ్రాండ్‌ను పరిచయం చేయాలని రెండు రోజులు గ్లోబల్ సమ్మిట్‌ను నిర్వహించామని ఆయన తెలిపారు. జాతీయ అంతర్జాతీయ కార్పొరేట్ల సమక్షంలో తెలంగాణ భవిష్యత్ కోసం మన విజన్‌ను ఆవిష్కరించామని ఆయన తెలిపారు. 2034 నాటికి 1 ట్రిలియన్ డాలర్లు ఆర్థిక వ్యవస్థగా, 2047 నాటికి 3 ట్రిలియన్ డాలర్ల ఆర్థికవ్యవస్థగా తెలంగాణను తీర్చిదిద్దాలని లక్ష్యంగా పెట్టుకున్నామని ఆయన పునరుద్ఘాటించారు. తెలంగాణ రైజింగ్ విజన్ స్టార్టప్ కోసం మీ ప్రణాళికలు ఏంటని అడిగితే స్టార్టప్‌ను ఫుట్‌బాల్ ఆటతో పోల్చుతానని, తాను కూడా ఫుట్‌బాల్ ఆడతానని, ఈ ఆటలోనూ సమష్టి కృషి అవసరమని, పట్టుదలతో సాధన చేయాలని, ఇది టీమ్ వర్క్, కానీ, చివరకు గెలుపు చాలా ముఖ్యమని, స్టార్టప్‌లు కూడా అదే విధంగా ఉండాలని ఆయన సూచించారు.

ఒక లక్ష్యం ఉంటేనే ప్రగతి పథంలో దూసుకెళతాం: మంత్రి శ్రీధర్‌బాబు

తాము అధికారంలోకి వచ్చి రెండేళ్లయిన సందర్భంగా ఈ కేంద్రం ప్రారంభించుకోవడం సంతోషంగా ఉందని మంత్రి శ్రీధర్ బాబు హర్షం వ్యక్తం చేశారు. ఇదో కొత్త ప్రారంభమని, ఇదో కొత్త ప్రయాణమని ఆయన కొనియాడారు. స్టార్టప్స్ రంగంలో ఎన్నో అవకాశాలు ఉన్నాయని, తమ స్టార్టప్‌లకు గూగుల్ మెంటార్‌గా ఉండటం చాలా సంతోషకరమన్నారు. ఇక ఇప్పుడు యూనికార్న్ సంస్థలకు ఏర్పాటు చేసే అవకాశం వచ్చిందని ఆయన సంతోషించారు. యూనికార్న్‌ను తయారు చేయడం కోసమే ఈ కేంద్రం ఉందని మంత్రి శ్రీధర్‌బాబు తెలిపారు. 3 ట్రిలియన్ డాలర్ల ఎకానమీ లక్ష్యంగా పెట్టుకోవడంపై విమర్శలు వచ్చాయని, ఒక లక్ష్యం ఉంటేనే ప్రగతి పథంలో దూసుకెళతామని ఆయన పేర్కొన్నారు. కొత్త టెక్నాలజీలను అందిపుచ్చుకోవాలని ఆయన సూచించారు. దేశంలోని మొదటి ప్రైవేటు రాకెట్ హైదరాబాద్‌లోనే తయారైందన్న విషయాన్ని మంత్రి శ్రీధర్‌బాబు గుర్తు చేశారు. టీహబ్‌కు గూగుల్‌ను రప్పించేందుకు చాలా శ్రమించామని, కానీ, ఇది దేశంలోనే మొట్టమొదటి గూగుల్ స్టార్టప్స్ కేంద్రమని ఆయన సంతోషం వ్యక్తం చేశారు. ఇది ప్రపంచంలోనే ఐదో గూగుల్ స్టార్టప్స్ కేంద్రమని ఆయన తెలిపారు.

గూగుల్ ఫర్ స్టార్టప్స్ చేసే పని

ఇన్వెస్టర్లు, పార్ట్‌నర్లు, ప్రభుత్వానికి గూగుల్ ఫర్ స్టార్టప్స్ వారథిగా నిలవనుంది. ప్రపంచస్థాయి ఆవిష్కరణలను గూగుల్ ఫర్ స్టార్టప్ ప్రోత్సహించనుంది. ప్రాంతీయ అంకుర పరిశ్రమలను ప్రపంచ స్థాయికి గూగుల్ ఫర్ స్టార్టప్స్ పరిచయం చేయనుంది. ఏడాది పాటు టీహబ్‌లో అంకుర పరిశ్రమలకు ఉచితంగా సీటింగ్ కల్పించనుంది. స్టార్టప్‌లకు అవసరమైన సలహాలు, సూచనలు, నైపుణ్యం గూగుల్ ఫర్ స్టార్టప్స్ పెంపొందించనున్నాయి.

‘జీరో కార్బన్ సిటీ’గా

భారత్ ఫ్యూచర్ సిటీ నిర్మాణం

ఈ నగరం అంతటా అర్బన్ ఫారెస్ట్లు, రెయిన్ హార్వెస్టింగ్ వ్యవస్థల ఏర్పాటు

డేటా సెంటర్ల కోసం 400 ఎకరాలు

నిర్మాణం పూర్తయితే 13 లక్షల మందికి ఉద్యోగాలు

9 లక్షల జనాభా కోసం నివాస సముదాయాల నిర్మాణం

వచ్చే ఏడాది ఫిబ్రవరి నుంచి నిర్మాణాలను ప్రారంభించనున్న పలు కంపెనీలు

మనతెలంగాణ/హైదరాబాద్:  రాష్ట్ర ప్రభుత్వం ప్రతిష్టాత్మకంగా నిర్మించ తలపెట్టిన భారత్ ఫ్యూచర్ సిటీకి అరుదైన ప్రాముఖ్యతను సొంతం చేసుకుంది. 13,500 ఎకరాల్లో సువిశాలంగా రూపుదిద్దుకోనున్న ఈ నగరం రానున్న రోజుల్లో 13 లక్షల ఉద్యోగాలను కల్పించనుంది. వచ్చే ఫిబ్రవరి చివరిలో భారత్ ఫ్యూచర్ సిటీ నిర్మాణం రూపుదిద్దుకోనుంది. తొమ్మిది విభాగాలుగా దీని నిర్మాణాన్ని చేపట్టాలని ప్రభుత్వం భావిస్తోంది. ఈనెల 8,9వ తేదీల్లో రెండు రోజుల పాటు జరిగిన తెలంగాణ రైజింగ్ గ్లోబల్ సమ్మిట్-2025తో ప్రపంచ పారిశ్రామిక పటంలో ఈ నగరం కీలక గమ్యస్థానంగా నిలిచింది. ఈ సమ్మిట్‌లో 44 దేశాల ప్రతినిధులు హాజరుకావడం, రూ.5.75 లక్షల కోట్ల పెట్టుబడుల ఒప్పందాలు జరగడం, ఫ్యూచర్ సిటీ పట్ల పెట్టుబడిదారుల విశ్వాసానికి నిదర్శనంగా నిలుస్తోంది. ఈ సమ్మిట్‌తో ఈ నగరానికి ప్రపంచ స్థాయి గుర్తింపు లభించింది. దేశంలో ఇప్పటికే అనేక స్మార్ట్ సిటీలు, కొత్త నగరాల నిర్మాణ ప్రతిపాదనలు వచ్చినా దశాబ్దాలుగా కేవలం అవి కాగితాలకే పరిమితమయ్యాయి. కానీ, భారత్ ఫ్యూచర్ సిటీ నిర్మాణానికి వేదికగా గ్లోబల్ సమ్మిట్‌ను నిర్వహించడం సిఎం రేవంత్ రెడ్డి నేతృత్వంలోని కాంగ్రెస్ ప్రభుత్వ దార్శనికత, కార్యాచరణ వేగానికి నిదర్శనమని, రానున్న రోజుల్లో ఈ నగరం ప్రపంచపటంలో నిలిచిపోతుందని పెట్టుబడిదారులు పేర్కొంటున్నారు.

నెల రోజుల్లో యంగ్ ఇండియా స్కిల్స్ యూనివర్సిటీ కార్యక్రమాలు

ప్రస్తుతం సమ్మిట్ ముగిసిన వెంటనే ‘భారత్ ఫ్యూచర్ సిటీ’ నిర్మాణానికి అడుగులు పడుతున్నాయి. డీప్‌టెక్, గ్రీన్ ఎనర్జీ, ఏరోస్పేస్, ఇన్ఫ్రా, ఎంటర్‌టైన్‌మెంట్, డిఫెన్స్, ఏఐ, విద్యా, క్రీడలు వంటి రంగాలకు లక్షల కోట్ల పెట్టుబడులు తరలివస్తున్నాయి. ఈ నేపథ్యంలోనే ఈ ప్రాంతాన్ని నివాస కేంద్రంగా, వ్యాపార – పరిశోధన కేంద్రంగా అభివృద్ధి చేయాలని ప్రభుత్వం ప్రణాళికలు రచిస్తోంది. అందులో భాగంగా ఆరు విభాగాలుగా భారత్ ఫ్యూచర్ సిటీని నిర్మించాలని ప్రభుత్వం భావిస్తోంది. ఈ నిర్మాణంలో భాగంగా ఆర్టిఫీషియల్ ఇంటెలిజెన్స్, హెల్త్ సిటీ, ఎంటర్‌టైన్‌మెంట్, క్రీడలు, డేటా సెంటర్స్, అంతర్జాతీయ స్థాయి ఉన్నత విద్యా సంస్థలకు నిలయంగా (ఆరు విభాగాలుగా), వచ్చే ఫిబ్రవరి చివరిలో ఈ నగర నిర్మాణం ప్రారంభం కానుంది. ముఖ్యమైన నిర్మాణ ప్రక్రియలో భాగంగా డేటా సెంటర్ల కోసం 400 ఎకరాలను ప్రభుత్వం కేటాయించనుంది. ఇక, మరో నెల రోజుల్లో యంగ్ ఇండియా స్కిల్స్ యూనివర్సిటీ కార్యక్రమాలు సైతం ఇక్కడ మొదలవుతాయి.

పరిశోధన, మ్యాన్యుఫ్యాక్చరింగ్ కేంద్రాలు

13,500 ఎకరాల భారత్ ఫ్యూచర్ సిటీని ‘జీరో కార్బన్ సిటీ’గా రూపొందించే లక్ష్యంతో నగరం అంతటా అర్బన్ ఫారెస్ట్లు, రెయిన్ హార్వెస్టింగ్ వ్యవస్థ ఏర్పాటు చేయనున్నారు. లైఫ్ సైన్సెస్, గ్రీన్‌ఫార్మా, ఎలక్ట్రిక్ వాహనాల రంగాల్లో పరిశోధన, మ్యాన్యుఫ్యాక్చరింగ్ కేంద్రాలు ఇక్కడ ఉంటాయి. ఈ నగరం సమగ్ర జీవన కేంద్రంగా ఉంటుంది. ఇక్కడ 13 లక్షల మందికి ఉద్యోగాలు, 9 లక్షల జనాభా కోసం నివాస సము దాయాలు ఏర్పాటు అవుతున్నాయి. అంతేకాకుండా, రిలయన్స్ ఫౌండేషన్ ‘వంతార’తో వన్యప్రాణుల సంరక్షణ కేంద్రం ఏర్పాటుతో పాటు ఎంటర్‌టైన్‌మెంట్ డిస్ట్రిక్ట్లో అంతర్జాతీయ కన్వెన్షన్ సెంటర్లు, స్టార్ హోటళ్లు, రేసింగ్ ట్రాక్‌లు వంటి వినోద, క్రీడా సౌకర్యాలు కూడా అందుబాటులోకి రానున్నాయి. భారత్ ఫ్యూచర్ సిటీ నిర్మాణం అద్భుతమైన మౌలిక వసతులు, ఆధునిక రవాణా వ్యవస్థలతో ఒక ఆర్కిటెక్చర్ అద్భుతంగా నిలువనుంది. సమ్మిట్ విజయం తర్వాత, దేశంలో ఏ కొత్త నగరానికి దక్కని ప్రాముఖ్యత ఈ ప్రాజెక్టుకు దక్కింది. ఇది తెలంగాణ విజన్-2047 లక్ష్యాలకు అనుగుణంగా, 3 ట్రలియన్ డాలర్ల ఎకానమీగా తెలంగాణను తీర్చిదిద్దడంలో ఫ్యూచర్ సిటీ కీలక పాత్ర పోషించనుంది.

15 వేల ఎకరాల రిజర్వ్ ఫారెస్ట్‌తో గ్రీనరీతో…..

15 నిమిషాల్లో వాక్ టు వర్క్ కాన్సెఫ్ట్‌తో ఈ సిటీని నిర్మించాలని ప్రభుత్వం భావిస్తోంది. సుమారు 30 వేల ఎకరాల్లోని ఈ ప్రాంతంలో 15 వేల ఎకరాల రిజర్వ్ ఫారెస్ట్‌తో గ్రీనరీగా ఉండనుంది. మిగిలిన 15 వేల ఎకరాల్లో ఫ్యూచర్ సిటీని 9 జోన్లుగా విభజించారు. నివాసాలు, డేటా సెంటర్లు, కృత్రిమ మేధస్సు (ఏఐ), విద్యా, క్రీడలు, ఎలక్రానిక్స్, లైఫ్ సైన్సెస్ ఇలా అన్ని రంగాలకు ఫోర్త్ సిటీలో భూములను కేటాయించారు. ఫిబ్రవరిలో (ఎఫ్‌డిసి) ఫ్యూచర్ సిటీ డెవలప్‌మెంట్ అథారిటీ ఆఫీసు ప్రారంభం కానుంది. ఈ నిర్మాణానికి సంబంధించి పనులు శరవేగంగా జరుగుతున్నాయి. 5 ఎకరాల్లో జీ+1 అంతస్తుల్లో నిర్మిస్తున్న ఈ భవనం వచ్చే ఏడాది ఫిబ్రవరి నాటికి అందుబాటులోకి వస్తుంది. ఎఫ్‌డిసి అధికారులు, సిబ్బంది ఇక్కడి నుంచే విధులు నిర్వర్తిస్తారు. ఫ్యూచర్ సిటీలో నివాస సముదాయాలకు 1,300 ఎకరాలను కేటాయించారు. ఇందులో సామాన్య, మధ్యతరగతి వర్గాలకు చెందిన అందుబాటు గృహాలతో పాటు లగ్జరీ నివాసాలు కూడా ఉంటాయి. ఇప్పటికే ఫ్యూచర్ సిటీ డెవలప్‌మెంట్ అథారిటీ (ఎఫ్‌డిసి) ఫ్యూచర్ సిటీలో లే ఔట్లు, అపార్ట్‌మెంట్లకు నిర్మాణ అనుమతులు మంజూరు చేస్తోంది.