Breaking News,తాజా వార్తలు,రాష్ట్ర వార్తలు

హైదరాబాద్: తెలంగాణ ప్రభుత్వం ఆర్టిసి ప్రయాణికులకు షాకింగ్ న్యూస్ ఇచ్చింది. మహాలక్ష్మి పథకంతో మహిళలకు ఉచిత బస్సు ప్రయాణం కల్పించిన విషయం తెలిసిందే. ఇప్పుడు సామాన్యులపై భారం వేసేందుకు రెడీ అయింది. హైదరాబాద్‌లో ఆర్టిసి బస్సుల టికెట్ ధరలు భారీగా పెంచేసింది. ఇప్పటికే బస్ పాస్, టి-24 టికెట్ ధరలను పెంచిన ప్రభుత్వం.. తాజాగా నగరంలో టికెట్ ధరలను కూడా పెంచింది. మొదటి 3 స్టేజీలక రూ.5, ఆ తర్వాత నుంచి రూ.10కి పెంచారు. దీనిపై బిఆర్ఎస్ వర్కింగ్ ప్రెసిడెంట్ కెటిఆర్ తీవ్రస్థాయిలో మండిపడ్డారు.

ఈ మేరకు ఆయన ఎక్స్‌లో పోస్ట్ పెట్టారు. ‘‘సిటీ బస్సు చార్జీలను ఒకటి కాదు రెండు కాదు.. ఏకంగా ఒకేసారి 10 రూపాయలు పెంచి జంట నగరంలోని పేద మధ్యతరగతి ప్రయాణికుల జేబులను కొల్లగొట్టాలని చూస్తున్న రేవంత్ రెడ్డి నిర్ణయాలు దుర్మార్గమైనవి. పెరిగిన నిత్యావసర వస్తువుల ధరలతో అల్లాడుతున్న తరుణంలో.. ప్రతి ప్రయాణికుడిపై నెలకు 500 రూపాయల అదనపు భారం మోపితే బడుగుజీవులు ఎలా బతకాలో ముఖ్యమంత్రే సమాధానం చెప్పాలి.

ఇప్పటికే విద్యార్థుల బస్ చార్జీలు, టీ-24 టిక్కెట్ చార్జీలను పెంచింది చాలదన్నట్టు.. ఇప్పుడు కనీస చార్జీపై కనికరం లేకుండా 50 శాతంటిక్కెట్టు ధరలను పెంచడం రేవంత్ అసమర్థ విధానాలకు నిదర్శనం. రాజధాని వాసుల నడ్డివిరిచి ప్రతినిత్యం దాదాపు కోటి రూపాయల భారం మోపాలని చూస్తున్న ముఖ్యమంత్రి హైదరాబాద్ ప్రజలపై కక్ష పెంచుకుంటున్నట్టు అర్థమవుతోంది. తుస్సుమన్న ఫ్రీ బస్సు పథకంతో దివాళా తీసిన ఆర్టీసిని గట్టెక్కించాల్సిందిపోయి, సామాన్య ప్రయాణికుల నడ్డి విరచాలని చూడటం క్షమించరానిది’’ అని కెటిఆర్ పోస్ట్ చేశారు.

హైదరాబాద్: దేశంలో పెద్ద ఎత్తున ఓట్ చోరీ జరిగిందని టిపిసిసి అధ్యక్షుడు మహేశ్‌కుమార్ గౌడ్ అన్నారు. రాష్ట్ర కాంగ్రెస్ నేతలతో మహేశ్‌కుమార్ గౌడ్ జూమ్ మీటింగ్ నిర్వహించారు. టిపిసిసిలోని ప్రతినిధులతో జరిగిన వీడియో కాన్ఫరెన్స్‌లో ఆయన పాల్గొన్నారు. ఈ సందర్భంగా ఆయన మాట్లాడుతూ.. ఎన్నికల కమిషన్ బిజెపికి అనుబంధ సంఘంగా పని చేస్తోందని ఆరోపించారు. రాహుల్ గాంధీ అన్ని ఆధారాలతో ఓట్ చోరీలను బయటపెట్టారని పేర్కొన్నారు. ఆధారాలు చూపించినా ఇసి నుంచి ఎలాంటి స్పందన లేదని మండిపడ్డారు.

రాష్ట్రంలో సంతకాల సేకరణ కార్యక్రమం ఆలస్యమైందని మహేశ్‌కుమార్ గౌడ్ వెల్లడించారు. భారీ వర్షాల దృష్ట్యా సంతకాల సేకరణ ప్రారంభించలేదని అన్నారు. ఇప్పటి నుంచి ప్రతి గ్రామంలో సంతకాల సేకరణ చేపట్టాలని నేతలను ఆదేశించారు. గ్రామంలో కనీసం వంద మందితో సంతకాలు చేయించాలని తెలిపారు. బిజెపి ఓట్ చోరీ ఎలా చేసిందో ప్రజలకు వివరించాని అన్నారు. ఎమ్మెల్యేలు, డిసిసి అధ్యక్షులు ప్రతి గ్రామంలో సంతకాల సేకరణ చేపట్టాలని పేర్కొన్నారు. 

హైదరాబాద్: ఆమెరికాలో పెరిగిపోతున్న గన్‌ కల్చర్ మరో అమాయకుడిని బలి తీసుకుంది. డల్లాస్‌లో నగరంలో ఓ దుండగుడు జరిపిన కాల్పుల్లో హైదరాబాద్‌కు చెందిన ఓ విద్యార్థి మృతి చెందాడు. ఎల్బీ నగర్ పరిధిలోని బిఎన్ రెడ్డి నగర్‌కు చెందిన పోలే చంద్రశేఖర్ 2023లో బిడిఎస్ పూర్తి చేసి.. ఆ తర్వాత ఉన్నత చదువుల కోసం విదేశాలకు వెళ్లాడు. అయితే నేటి తెల్లవారుజామున దుండగుడి కాల్పుల్లో అతను కన్నుమూశాడు. కాల్పులకు పాల్పడింది ఓ నల్ల జాతీయుడని సమాచారం. ఈ ఘటనపై భారత రాయబార కార్యాలయం స్పందించాల్సి ఉంది.

ఈ ఘటనపై మంత్రి హరీశ్ రావు ఎక్స్‌లో పోస్ట్ పెట్టారు. బాధిత కుటుంబాన్ని వాళ్ల ఇంటికి స్థానిక ఎమ్మెల్సే సుధీర్ రెడ్డితో వెళ్లి ఆయన పరామర్శించారు. ఉన్నత చదువులు చదివి ఉన్నత స్థాయిలో ఉంటాడనుకున్న కొడుకు ఇక లేడు అన్న విషయం తెలిసి ఆ తల్లిదండ్రులు పడుతున్న ఆవేదన చూసి గుండె తరుక్కపోతుందని పేర్కొన్నారు. వారి కుటుంబాని తన ప్రగాఢ సానుభూతి తెలియజేశారు. రాష్ట్ర ప్రభుత్వం చొరవ తీసుకొని చంద్రశేఖర్ మృతదేహాన్ని త్వరగా స్వస్థలానికి తరలించేలా కృషి చేయాలని డిమాండ్ చేశారు. 

హైదరాబాద్: దసర పండగ అంటేనే తెలంగాణ వ్యాప్తంగా ఫుల్ మద్యం అమ్మకాలు జరుగుతాయి. మందుబాబులు మత్తులో మునిగి తేలుతుంటారు. అయితే ఈసారి దసరా పండగ, గాంధీ జయంతి ఒకే రోజు రావడంతో మద్యం షాపులు మూతబడ్డాయి. కానీ, చాలా వరకూ ముందే రోజే మద్యం కొనుగోలు చేసి పండగ రోజు ఎంజాయ్ చేశారు. దీంతో మరోసారి రాష్ట్ర వ్యాప్తంగా మద్యం కొనుగోళ్లు రికార్డు స్థాయిలో జరిగాయి.

సెప్టెంబర్ 30, అక్టోబర్ 1 తేదీల్లో రాష్ట్ర వ్యాప్తంగా ఏకంగా రూ.419 కోట్ల మద్యం అమ్మకాలు జరిగాయి. ఇందులో సెప్టెంబర్‌ 30వ తేదీన రూ. 333 కోట్ల మద్యాన్ని మందుబాబులు కొనుగోలు చేయగా, అక్టోబర్‌ 1వ తేదీన రూ. 86 కోట్ల మద్యం సేల్స్‌ జరిగాయి. ఇక సెప్టెంబర్ 26 తేదీ నుంచి మద్యం అమ్మకాలు రెట్టింపు అయ్యాయి. శుక్రవారం మళ్లీ మద్యం దుకాణాలు తెరుచుకోవడంతో మద్యం విక్రయాలు ఊపందుకున్నాయి. ఈ ఒక్కరోజే రూ.300 కోట్ల మద్యం కొనుగోళ్లు జరగవచ్చని అంచనా వేస్తున్నారు.

హైదరాబాద్: రాష్ట్రంలో గ్రూప్-2 ఫలితాలు విడుదలయ్యాయి. ఆదివారం మధ్యాహ్నం తెలంగాణ పబ్లిక్ సర్విస్ కమిషన్ ఛైర్మన్ బుర్రా వెంకటేశం ఫలితాలు విడుదల చేశారు. 783 పోస్టులకు గాను 782 మంది ఎంకయ్యారు. ఒక పోస్ట్ మాత్రం భర్తీ కాలేదు. గ్రూప్-2 అబ్బాయిలలో 1.హర్ష వర్ధన్, 2.⁠సచిన్, 3.మనోహర్ రామ్, 4.శ్రీరామ మధు, 5.ప్రితం రెడ్డి టాపర్స్‌లో నిలవగా.. అమ్మాయిలలో 1.వినిషా రెడ్డి, 2.⁠సుస్మిత, 3.⁠శ్రీవేణి, 4.శ్రీలత, 5.⁠స్నేహ నిలిచారు.

గ్రూప్-2 సర్విసులకు సంబంధించి 18 కేటగిరీల్లో 783 ఉద్యోగాల భర్తీకి 2022 డిసెంబర్ 29న టిజివిఎస్సి నోటిఫికేషన్ విడుదల చేసింది. 2023 జనవరి 18నుంచి ఫిబ్రవరి 16వ తేదీ వరకు… దాదాపు నెలరోజుల పాటు ఆన్‌లైన్‌ పద్ధతిలో దరఖాస్తులు స్వీకరించింది. 5,51,855 మంది ధరఖాస్తు చేసుకున్నారు. అయితే పరీక్షలు మూడుసార్లు వాయిదా పడ్డాయి. చివరకు గతేడాది డిసెంబర్ 15, 16 తేదీల్లో పరీక్షలు నిర్వహించారు. రాష్ట్ర వ్యాప్తంగా 33 జిల్లాల్లో 1,368 పరీక్షా కేంద్రాలు ఏర్పాటు చేసి పరీక్షలు నిర్వహించారు. 

హైదరాబాద్: కాంగ్రెస్ అడ్డగోలు హామీలిచ్చి అధికారంలోకి వచ్చిందని బిఆర్ఎస్ వర్కింగ్ ప్రెసిడెంట్ కెటిఆర్ మండిపడ్డారు. అన్ని వర్గాలకు కాంగ్రెస్ ద్రోహం చేసిందని దుయ్యబట్టారు. జూబ్లీహిల్స్ ఉప ఎన్నికల సందర్భంగా షేక్ పేట ప్రాంతం సమతా నగర్ లో కెటిఆర్ పర్యటించారు. ఈ సందర్భంగా ఆయన మీడియాతో మాట్లాడారు. మహిళలకు నెలకు రూ.2,500 హామీ ఏమైందని ప్రశ్నించారు. దొంగమాటలు చెప్పి తప్పించుకుంటున్నారని, ప్రజలు మళ్లీ కెసిఆర్ నాయకత్వం కోరుకుంటున్నారన్నారు. ఫోర్త్ సిటీని కాదు ఉన్న సిటీని పట్టించుకోవాలని, రియల్ ఎస్టేట్ వ్యాపారం కోసమే ఫోర్త్ సిటీని రేవంత్ రెడ్డి తీసుకొచ్చారని కెటిఆర్ దుయ్యబట్టారు. జూబ్లీహిల్స్‌ ఉప ఎన్నికలలో మాగంటి సునీతను గెలిపించాలని ప్రజలను కోరారు. వంద రోజుల్లో హామీలను అమలు చేస్తామని నోటికొచ్చిన వాగ్ధానాలు చేసి, అరచేతిలో వైకుంఠం చూపెట్టి, గద్దెనెక్కిన తర్వాత కాంగ్రెస్ నాయకులు తప్పించుకోవాలని చూస్తున్నారని ధ్వజమెత్తారు. కాంగ్రెస్ ఇచ్చిన హామీలను ప్రజలకు గుర్తుచేసేందుకు బాకీ కార్డులను ప్రజలకు అందజేస్తున్నామని కెటిఆర్ వివరించారు. ప్రతీ వర్గాన్ని వంచించిన కాంగ్రెస్ పార్టీకి బుద్ధి చెప్పడానికి తెలంగాణ ప్రజలకు జూబ్లీహిల్స్ ఉపఎన్నికల రూపంలో మంచి అవకాశం దొరికిందన్నారు. 

వరంగల్‌: సద్దుల బతుకమ్మ వేడుకల విషయంలో గందరగోళం నెలకొంది. కొందరు పండితులు సోషల్ మీడియాలో బతుకమ్మ పండుగపై వివాదం సృష్టిస్తున్నారు. పండితుల భిన్న ప్రకటనలతో మహిళలు అయోమయంలో పడేస్తున్నారు. ఈ నెల 30న అష్టమిరోజు శాస్త్ర ప్రకారం సద్దుల బతుకమ్మ వేడుకలు జరుపుకోవచ్చని పండితులు చెబుతున్నారు. ఈ నెల 29న వేడుకలు జరపాలంటున్న మరికొందరు పండితులు చెబుతున్నారు. 9రోజులే ప్రామాణికం కావడంతో శాస్త్రం వర్తించదని వాదనలు వస్తున్నాయి. 30న సద్దుల బతుకమ్మ వేడుకలు జరుపుకోవాలని ప్రభుత్వం ప్రకటించిన విషయం తెలిసిందే. 

హైదరాబాద్: మూసీ సదికి భారీ వరద కారణంగా ఎంజిబిఎస్ ప్రాంగణంలో భారీగా వరద నీరు వచ్చి చేరింది. దీంతో అక్కడి నుంచి బస్సుల రాకపోకలను తాత్కాలికంగా నిలిపివేశారు. ఈ నేపథ్యంలో ఆర్టిసి ఎండి సజ్జనార్ ఎక్స్ వేదికగా ప్రయాణికులకు సూచనలు ఇచ్చారు. ఎంజిబిఎస్‌ నుంచి బయలుదేరే బస్సులను హైదరాబాద్‌లోని వివిధ ప్రాంతాల నుంచి సంస్థ నడుపుతోందని సజ్జనార్ తెలిపారు. ‘‘ఆదిలాబాద్, కరీంనగర్, మెదక్, నిజామాబాద్ వైపునకు వెళ్లే సర్వీసులు జెబిఎస్ నుంచి నడుస్తున్నాయి. వరంగల్, హనుమకొండ వైపునకు వెళ్లే బస్సులు ఉప్పల్ క్రాస్‌ రోడ్స్ నుంచి వెళ్తున్నాయి. సూర్యాపేట, నల్గొండ, విజయవాడ వైపు వెళ్లే బస్సులు ఎల్బీనగర్‌ నుంచి మహబూబ్‌నగర్, కర్నూలు, బెంగళూరు వైపు వెళ్లే బస్సులు ఆరాంఘర్‌ నుంచి వెళ్తున్నాయి’’ అని సజ్జనార్ పేర్కొన్నారు.

పొరపాటున ఎవరైనా ప్రయాణికులు ఎంజిబిఎస్‌కు వస్తే.. వారిని తరలించేందుకు అవసరమైనన్నీ లోకల్ బస్సులు అందుబాటులో ఉంచామని తెలిపారు. వారిని ఆయా బోర్డింగ్ ప్రాంతాలకు లోకల్ బస్సుల్లో తరలించేందుకు సిద్ధంగా ఉన్నామని పేర్కొన్నారు. వర్షాలు, వరద తగ్గుముఖం పట్టేవరకూ ఎంజిబిఎస్‌కు రావొద్దు అని విజ్ఞప్తి చేశారు.

హైదరాబాద్: తెలంగాణలో గత పదేళ్లలో టూరిజం పాలసీ లేదని సిఎం రేవంత్ రెడ్డి అన్నారు. శిల్పారామంలో టూరిజం కాంక్లేవ్‌కి సిఎం హాజరయ్యారు. ఈ సందర్భంగా పర్యాటక రంగంలో సేవలు అందిస్తున్న పలువురికి అవార్డులు ప్రధానం చేశారు. అనంతరం ఆయన మాట్లాడుతూ.. తమ ప్రభుత్వ హయాంలో నూతన టూరిజం పాలసీని తీసుకొచ్చామని తెలిపారు.

‘‘గోల్కొండ, రామోజీ ఫిల్మ్ సిటీ వంటి ప్రముఖ పర్యాటక స్థలాలు హైదరాబాద్‌లో ఉన్నాయి. ఎకో, మెడికల్, హెల్త్, టెంపుల్ టూరిజాన్ని ప్రోత్సాహించాలని నిర్ణయించాం. హైదరాబాద్ ఓల్డ్ సిటీ కాదు.. ఒరిజినల్ సిటీ. ప్రపంచ ప్రఖ్యాత నగరాలతో హైదరాబాద్ పోటీ పడుతోంది. హైదరాబాద్‌లో రక్షణ, శాంతి భద్రతల గురించి ఆలోచించాల్సిన అవసరం లేదు. ఆపరేషన్ సింధూర్ సమయంలోనూ.. ప్రపంచ సుందరీమణుల పోటీలను విజయవంతంగా నిర్వహించాం’’ అని సిఎం రేవంత్ అన్నారు. 

హైదరాబాద్: విద్యార్థులకు చదువుతో పాటు నైపుణ్యాలు అవసరమని భావించామని సిఎం రేవంత్ రెడ్డి తెలిపారు. యువతలో నైపుణ్యాల పెంపు కోసం టాటా టెక్నాలజీస్ తో చర్చలు జరిపామని అన్నారు. మల్లేపల్లి ఐటిఐ ప్రాంగణంలో అడ్వాన్స్ డ్ టెక్నాలజీ సెంటర్, రాష్ట్ర వ్యాప్తంగా ఉన్న65 ఎటిసిలను సిఎం ప్రారంభించారు. ఈ సందర్భంగా ఆయన మీడియాతో మాట్లాడుతూ.. టాటా టెక్నాలజీస్ సహకారంతో ఐటిఐలుగా ప్రభుత్వం తీర్చిదిద్దిందని, రాష్ట్రంలో స్కిల్స్ ఉన్న ఉద్యోగులు దొరకటం లేదని ఆటోమొబైల్ వ్యాపారులు అన్నారని చెప్పారు. రూ. 2400 కోట్ల వ్యయంతో 65 ఎటిసిలను ఏర్పాటు చేశామని, ఒక్కొక్క ఎటిసిలో దాదాపు 200 మంది ప్రవేశాలు పొందుతున్నారని తెలియజేశారు.

ఎటిసిల్లో శిక్షణ పొందుతున్న అందరికి ఉద్యోగాలు లభిస్తున్నాయని, ఇదే స్ఫూర్తితో మరో 51 ఎటిసిలను మంజూరు చేస్తున్నామని పేర్కొన్నారు. ఎటిసి శిక్షణ పొందిన వారికి ఉద్యోగాలు ఇప్పించే బాధ్యత ప్రభుత్వానిదేనని, విదేశీ ఉద్యోగాలకు పాస్ పోర్టు, వీసా ఇప్పించే బాధ్యత తమదేనని హామీ ఇచ్చారు. జర్మనీ, జపాన్, దక్షిణ కొరియా లాంటి దేశాల్లో మంచి అవకాశాలు ఉన్నాయని, నెలకు రూ. 40 వేల నుంచి రూ. 4 లక్షల వేతనం పొందే ఉద్యోగాలు దొరుకుతాయని రేవంత్ రెడ్డి స్పష్టం చేశారు.