Breaking News,తాజా వార్తలు,రాష్ట్ర వార్తలు

హైదరాబాద్: గ్రూప్-1 విషయంలో ప్రభుత్వంపై ఒత్తిడి కార్యక్రమాలు చేపడుతామని ఎంఎల్‌సి కవిత తెలిపారు. 15న డివిజన్ బెంచ్ తీర్పుపై విద్యార్థుల భవిష్యత్ ఆధారపడి ఉందని తెలియజేశారు. సోమాజిగూడ ప్రెస్‌క్లబ్‌లో గ్రూప్-1 నియామకాల్లో అవకతవకల అంశంపై రౌండ్ టేబుల్ సమావేశం జరిగింది. ఈ సమావేశంలో ఆమె మాట్లాడారు. ఈ నెల 15 వరకు కార్యక్రమాలు చేపట్టాలని నిర్ణయం తీసుకున్నామని, ప్రభుత్వ తప్పులు ఎత్తిచూపేందుకు రౌండ్ టేబుల్ భేటీ ఏర్పాటు చేశామన్నారు. గ్రూప్-1 విషయంలో అడుగడుగునా తప్పులు జరిగాయని, ప్రస్తుతం ఇచ్చిన ఉద్యోగాలు రద్దు చేసి మళ్లీ పరీక్ష పెడతారని భావిస్తున్నామని, రౌండ్ టేబుల్ భేటీ తీర్మానాన్ని గవర్నర్, ముఖ్యమంత్రి రేవంత్ రెడ్డికి పంపిస్తామన్నారు. తెలంగాణ విద్యార్థులకు అన్యాయం జరిగితే ఊరుకునేది లేదని కవిత హెచ్చరించారు. విద్యార్థులకు జాగృతి భరోసా ఉంటుందని హామీ ఇస్తున్నామన్నారు. 

మనతెలంగాణ/హైదరాబాద్ : తెలంగాణ రాష్ట్రంలో ఎంపిటిసి, జడ్‌పిటిసి ఎన్నికలకు నామినేషన్ల స్వీకరణ ప్రారంభమైంది. తొలి విడత ఎంపిటిసి, జెడ్‌పిటిసి ఎన్నికల నామినేషన్ల స్వీకరణకు రిటర్నింగ్ అధికారి నోటిఫికేషన్ జారీ చేశారు. ఇవాళ్టి నుంచే నామినేషన్ల ప్రక్రియ ప్రారంభమైంది. ఈ నెల 11 వరకు అభ్యర్థుల నుంచి నామినేషన్లు స్వీకరించనున్నారు. తొలి విడతలో 292 జడ్‌పిటిసిలు, 2964 ఎంపిటిసి స్థానాలకు ఎన్నికలు జరుగనున్నాయి. 

ఎంపిటిసి, జెడ్‌పిటిసి, ఎన్నికల తొలివిడత నామినేషన్లు

నామినేషన్ల స్వీకరణ: అక్టోబర్ 9

స్వీకరణకు చివరి తేదీ: అక్టోబర్ 11

పరిశీలన: అక్టోబర్ 12

నామినేషన్ల ఉపసంహరణ- :అక్టోబర్ 15

ఎన్నికల తేదీ- :అక్టోబర్ 23

ఓట్ల లెక్కింపు- : నవంబర్ 11 ఉదయం 8 గంటలకు ప్రారంభం

మొత్తం ఐదు దశల్లో ఎన్నికలు నిర్వహించనున్నట్లు ఆమె తెలిపారు. తొలి రెండు దశల్లో ఎంపిటిసి, జెడ్‌పిటిసి, మిగతా మూడు దశల్లో గ్రామ పంచాయతీ ఎన్నికలు నిర్వహించనున్నారు. ఎంపిటిసి, జెడ్‌పిటిసిలకు అక్టోబర్ 23న తొలివిడత, 27న రెండో విడత ఎన్నికల పోలింగ్ నిర్వహిస్తారు. గ్రామ పంచాయతీలకు తొలి విడత అక్టోబర్ 31న, రెండో విడత నవంబర్ 4న, మూడో విడత నవంబర్ 8న నిర్వహిస్తారు. పోలింగ్ పూర్తయిన తర్వాత అదేరోజు గ్రామ పంచాయతీల ఓట్ల లెక్కింపు చేపడతారు. నవంబర్ 11న ఎంపిటిసి, జెడ్‌పిటిసి ఓట్ల లెక్కింపు జరుగనుంది. రాష్ట్రంలో 31 జిల్లాల్లోని 565 మండలాల్లో ఎన్నికలు నిర్వహిస్తామని చెప్పారు. 5,749 ఎంపిటిసి, 565 జెడ్‌పిటిసి స్థానాలకు ఎన్నికలు జరుగుతాయన్నారు. 12,733 గ్రామపంచాయతీలు, 1,12,288 వార్డుల్లో ఎన్నికలు నిర్వహిస్తారు. 

ఎంపిటిసి, జెడ్‌పిటిసి ఎన్నికల రెండో విడత నామినేషన్లు:

రెండో విడత నామినేషన్ల స్వీకరణ: అక్టోబర్ 13

స్వీకరణకు చివరి తేదీ: అక్టోబర్ 15

పరిశీలన: అక్టోబర్ 16

నామినేషన్ల ఉపసంహరణ :- అక్టోబర్ 19

ఎన్నికల తేదీ- : అక్టోబర్ 27

ఓట్ల లెక్కింపు- : నవంబర్ 11 ఉదయం 8 గంటలకు ప్రారంభం

హైదరాబాద్: ఇవాళ్టి నుంచి లోకల్ బాడీ ఎన్నికల నామినేషన్ల ప్రక్రియ మొదలవుతుండడంతో టిపిసిసి సమావేశమైంది. ఈ సమావేశంలో రాష్ట్ర కాంగ్రెస్‌ వ్యవహారాల ఇన్‌చార్జి మీనాక్షి నటరాజన్, పిసిసి ప్రెసిడెంట్ మహేష్ కుమార్ గౌడ్, మంత్రులు, ఎంఎల్‌ఎలు, ఎంపిలు, ఎంఎల్‌సిలు, డిసిసి అధ్యక్షులు పాల్గొన్నారు. నామినేషన్ల స్వీకరణ సందర్భంగా నేతలు తీసుకోవాల్సిన జాగ్రత్తలపై దిశానిర్దేశం చేశారు.

ఇవాళ, రేపు జడ్‌పిటిసి అభ్యర్థులను ఖరారు చేస్తామని మహేష్ కుమార్ గౌడ్ తెలిపారు. టికెట్ ఎవరికిచ్చినా కలిసి పని చేసేందుకు సిద్ధంగా ఉండాలని టిపిసిపి ప్రెసిడెంట్ మహేష్‌కుమార్ గౌడ్ తెలిపారు. క్షేత్రస్థాయిలోకి ప్రభుత్వ సంక్షేమ అభివృద్ధి పథకాలు తీసుకెళ్లాలని పిలుపునిచ్చారు. స్థానిక సంస్థల ఎన్నికల్లో అత్యధిక స్థానాల్లో గెలుపునకు కృషి చేయాలన్నారు. శాస్త్రీయంగానే బిసి రిజర్వేషన్ల ప్రక్రియ పూర్తి చేశామని, హైకోర్టులో బిసి రిజర్వేషన్ల కేసు గెలుస్తామని, అడ్వకేట్లు ప్రభుత్వం తరపున బలమైన వాదనలు వినిపించారని తెలియజేశారు. లోకల్ బాడీ ఎన్నికల్లో దాదాపు 90 శాతం సీట్లను గెలుచుకుంటామని, బిసి రిజర్వేషన్ల విషయంలో కాంగ్రెస్ చిత్తశుద్ధితో ముందుకెళ్తోందన్నారు.  

హైదరాబాద్: ముఖ్యమంత్రి రేవంత్ రెడ్డి పాలనలో ఆర్‌టిసి పూర్తిగా నిర్వీర్యమైందని మాజీ మంత్రి హరీష్ రావు విమర్శలు గుప్పించారు. మహాలక్ష్మి డబ్బులు ఆర్‌టిసికి ప్రభుత్వం సకాలంలో చెల్లించడంలేదని దుయ్యబట్టారు. కాంగ్రెస్‌ ప్రభుత్వం పెంచిన బస్సు చార్జీలను తక్షణమే తగ్గించాలని డిమాండ్‌ చేస్తూ చలో బస్సు భవన్ కు బిఆర్‌ఎస్‌ పిలుపునిచ్చింది. ఈ క్రమంలో మాజీ మంత్రి హరీష్ రావు మెహదీపట్నం నుంచి బస్సులో బస్ భవన్‌కు వచ్చారు. ఈ సందర్భంగా ఆయన మీడియాతో మాట్లాడారు.  ఆర్‌టిసి కార్మికులకు సకాలంలో జీతాలు, బకాయిలు చెల్లించడంలేదని, ఆర్‌టిసి లాభాల్లో ఉంటే ఎందుకు కొత్త బస్సులు కొనడం లేదని కాంగ్రెస్ ప్రభుత్వాన్ని హరీష్ రావు ప్రశ్నించారు. ఆర్‌టిసి ఆస్తులను ఎందుకు అమ్ముతున్నారని, మియాపూర్, ఉప్పల్ వర్క్‌షాపులను అమ్మకానికి పెట్టారని, ఆర్‌టిసి కార్గోను తన అనుయాయులకు కట్టబెట్టే ప్రయత్నం చేస్తున్నారని, కాంగ్రెస్ మేనిఫెస్టో ప్రకారం ఆర్‌టిసి సిబ్బందిని ప్రభుత్వ ఉద్యోగులుగా గుర్తించాలని హరీష్ రావు డిమాండ్ చేశారు. ఆర్‌టిసి ఉద్యోగుల పెండింగ్ బకాయిలు చెల్లించాలని, ఎలక్ట్రిక్ బస్సుల పేరిట ఆర్‌టిసి కార్మికుల పొట్ట కొట్టకూడదని ఆగ్రహం వ్యక్తం చేశారు. బిఆర్ఎస్ నేతలు హరీష్ రావు, కెటిఆర్, తలసాని శ్రీనివాస్ యాదవ్, పద్మారావులు రైతిఫైల్ బస్టాండ్ నుంచి బస్ భవన్‌కు చేరుకున్నారు. బస్సు ఛార్జీలు తగ్గించాలంటూ ఆర్‌టిసి ఎండికి నేతలు వినతిపత్రం ఇవ్వనున్నారు. 

హైదరాబాద్: బిఆర్‌ఎస్ పార్టీ తలపెట్టిన “చలో బస్ భవన్” కార్యక్రమాన్ని పోలీసులు అడ్డుకున్నారు. మేడ్చల్ జిల్లా బిఆర్‌ఎస్ పార్టీ అధ్యక్షులు, ఎమ్మెల్సీ శంబీపూర్ రాజు, మాజీ శాసనమండలి చైర్మన్ స్వామి గౌడ్, ఉప్పల్ ఎమ్మెల్యే బండారి లక్ష్మారెడ్డి, తదితర బిఆర్ఎస్ నేతల నివాసాల వద్ద పోలీసులు చుట్టుముట్టి హౌస్ అరెస్ట్ చేశారు. ఈ సందర్భంగా శంబీపూర్ రాజు స్పందించారు.  శాంతియుతంగా జరగాల్సిన ప్రజా కార్యక్రమానికి అడ్డంకులు సృష్టించడం ద్వారా  ప్రజాస్వామ్య హక్కులను ప్రభుత్వం ఉల్లంఘించిందని శంబీపూర్ రాజు తీవ్రంగా మండిపడ్డారు. పెంచిన చార్జీలపై ప్రజలకు జవాబు చెప్పలేని ప్రభుత్వమే ఈ విధమైన అణచివేత చర్యలకు దిగుతోందని వారు విమర్శించారు. బిఆర్‌ఎస్ పార్టీ తలపెట్టిన ఛలో బస్ భవన్ కార్యక్రమం ప్రజల వాణిని వినిపించేందుకు, ప్రజా సమస్యలను ప్రభుత్వ దృష్టికి తీసుకెళ్లేందుకు చేపట్టిన ఉద్యమం అని తెలియజేశారు. పోలీసులు చేసిన హౌస్ అరెస్ట్‌తో తాము వెనక్కి తగ్గబోమని, ప్రజా హక్కుల కోసం బిఆర్‌ఎస్ పోరాటం కొనసాగుతుందని ఆయన స్పష్టం చేశారు.

 ప్రజల సమస్యలపై పోరాడుతున్న తమను హౌస్ అరెస్టు చేయడం భావ్యం కాదని మాజీ శాసన మండలి చైర్మన్ స్వామి గౌడ్ తెలిపారు. ప్రజాస్వామ్యంలో ఇలాంటి చర్యలు పాలకులకు మంచిది కాదని హెచ్చరించారు. ప్రజలకు మెరుగైన ఆర్ టిసి సౌకర్యాలను అందించే బదులు రేట్లు పెంచడం దారుణమని మండిపడ్డారు. ప్రభుత్వం ఇప్పటికైనా స్పందించి పెంచిన ధరలను తగ్గించాలని ఆయన డిమాండ్ చేశారు.

రాష్ట్రంలో రెండు దగ్గు మందులను నిషేధిస్తూ ప్రభుత్వం ఉత్తర్వులు జారీ చేసింది. రీలైఫ్, రెస్పీఫ్రెష్- టీఆర్ కఫ్ సిరప్‌లను విక్రయించొద్దంటూ అందులో డ్రగ్ కంట్రోల్ అడ్మినిస్ట్రేషన్(డిసిఎ) పేర్కొంది. మధ్యప్రదేశ్,రాజస్థాన్‌లోని భోపాల్‌లోని లేబరేటరీల నుంచి ఈ రెండు దగ్గు మందుల్లోనూ కల్తీ జరిగినట్లు తమ సమాచారం లభించినట్లు డిసిఎ డైరెక్టర్ జనరల్ షహనాజ్ ఖాసీం పేర్కొన్నారు. ప్రజలు వెంటనే ఈ రెండు దగ్గు మందులు వాడకాన్ని నిలిపివేయాలని సూచించారు. ఎక్కడైనా ఈ రెండు దగ్గు మందులు విక్రయిస్తే వెంటనే డిసిఎ టోల్ ఫ్రీ నెంబర్ 1800 599 6969కు ఫోన్ చేసి సమాచారం అందజేయాలని కోరారు.

హైదరాబాద్: జడ్పిటిసి, ఎంపిటిసి ఎన్నికల ప్రక్రియ గురువారం(అక్టోబర్ 9) ప్రారంభం కానుంది. తొలి విడత జడ్పిటిసి, ఎంపిటిసి ఎన్నికలకు గురువారం రిటర్నింగ్ అధికారులు నోటీసులు జారీ చేయనున్నారు. ఉదయం 10.30 నుంచి జడ్పిటిసి, ఎంపిటిసి ఎన్నికల నామినేషన్‌లు స్వీకరిస్తారు. మొదటి విడత నామినేషన్లు ఈ నెల 11 వరకూ స్వీకరిస్తారు. మొదటి విడతలో 292 జడ్పిటిసి, 2,963 ఎంపిటిసిల స్థానాలకు ఎన్నికలు జరుగుతాయి.

మరోవైపు బిసి రిజర్వేషన్ల అంశంపై హైకోర్టులో విచారణ గురువారానికి వాయిదా పడింది. గురువారం మధ్యాహ్నం 2.15 గంటలకు హైకోర్టులో విచారణ ప్రారంభం కానుంది. స్థానిక ఎన్నికలపై రేపు జారీ కానున్న నోటిఫికేషన్‌పై పిటిషనర్ స్టే కోరారు. అయితే పిటిషనర్ విజ్ఞప్తిని హైకోర్టు పరిగణలోకి తీసుకోలేదు. ఎన్నికల షెడ్యూల్‌ని గెజిట్‌లో చేర్చారా అని హైకోర్టు ప్రశ్నించింది. అనంతరం హైకోర్టు ధర్మాసనం విచారణను రేపటికి వాయిదా వేసింది.

హైదరాబాద్: బిసి రిజర్వేషన్లపై హైకోర్టులో విచారణ కొనసాగుతోంది. భోజన విరామం తర్వాత హైకోర్టులో ఇరు పక్షాలు తమ వాదనలు వినిపిస్తున్నాయి. 42 శాతం రిజర్వేషన్లకు శాస్త్రీయ ఆధారాలు చూపలేదని పిటిషనర్లు తెలిపారు. బిసి కులగణన చేశారు కానీ బహిర్గతం చేయలేని పిటిషనర్ల తరఫు న్యాయవాది అన్నారు. బిసి కులగణన ఆధారంగా 42 శాతం రిజర్వేషన్లు అంటున్నారని.. ఎస్సీ, ఎస్టీల రిజర్వేషన్లకు మాత్రం 2011 జనాభా ఆధారం అంటున్నారని తెలిపారు. ఎస్సీ, ఎస్టీల జనాభా పెరిగిందా? తగ్గిందా? ఆ లెక్కలు ప్రభుత్వం వద్ద లేవని అన్నారు. ఎస్సీ ఎస్టీల జనాభాను లెక్కలోకి తీసుకోకుండా బిసి రిజర్వేషన్లు ఎలా అని ప్రశ్నించారు. 2018లో 34 శాతం బిసి రిజర్వేషన్లను ఇదే కోర్టు కొట్టివేసిందని గుర్తు చేశారు. రాజ్యాంగబద్ధంగా ఎన్నికల నిర్వహణకు మేం వ్యతిరేకం కాదని పిటిషనర్లు పేర్కొన్నారు. రాజ్యంగ విరుద్ధంగా ఎన్నికలు ఎలా నిర్వహిస్తారని పిటిషనర్ల తరఫు న్యాయవాది ప్రశ్నించారు. 

హైదరాబాద్: సామాజిక న్యాయానికి ఛాంపియన్ కాంగ్రెస్ పార్టీ అని మంత్రి పొన్నం ప్రభాకర్ తెలిపారు. కాంగ్రెస్ పార్టీ లో పుట్టి పెరిగానని, మంత్రి అడ్లూరి లక్ష్మణ్ కుమార్ కు, తనకు మధ్య ఎటువంటి దురుద్దేశం లేదని, మాకు పార్టీ సంక్షేమం గురించే ఆలోచన చేస్తున్నామని స్పష్టం చేశారు. తాను ఆ మాట అనకపోయినా పత్రికల్లో వచ్చిన దాని ప్రకారం ఆయన బాధ పడిన దానికి తాను క్షమాపణలు కోరుతున్నానన్నారు. తనకు అలాంటి ఆలోచన లేదని, తాను ఆ ఒరవడి లో పెరగలేదని, కాంగ్రెస్ పార్టీ తనకు ఆ సంస్కృతి నేర్పలేదన్నారు. సామాజిక న్యాయానికి పోరాడే సందర్భంలో వ్యక్తిగత అంశాలు పక్కన ఉంచామని, సామాజిక న్యాయంలో బలహీనవర్గాల బిడ్డగా ఇవాళ సిఎం రేవంత్ రెడ్డి, పిసిసి చీఫ్ మహేష్ కుమార్ గౌడ్ నాయకత్వంలో రాహుల్ గాంధీ సూచన మేరకు 42 శాతం రిజర్వేషన్ల కోసం పోరాటం చేస్తున్నామన్నారు. తామంతా ఐక్యంగా భవిష్యత్ లో కాంగ్రెస్ పార్టీ సామాజిక న్యాయం కోసం పని చేస్తామని స్పష్టం చేశారు.  లక్ష్మణ్ కు వ్యక్తిగతంగా క్షమాపణలు చెబుతున్నానని, కరీంనగర్ లో మాదిగ సామాజిక వర్గంతో తాను కలిసి పెరిగానని, ఆ అపోహ ఉండవద్ధని విజ్ఞప్తి చేస్తున్నానన్నారు. 

 హైదరాబాద్: సిఎం సొంత జిల్లా వికారాబాద్ లో జీతాలు రాకపోవడంతో ఇంటర్ కళాశాలల గెస్ట్ లెక్చరర్స్ ఇబ్బందులు పడుతుంటే కాంగ్రెస్ ప్రభుత్వం పట్టించుకోకపోవడం దుర్మార్గం అని మాజీ మంత్రి హరీష్ రావు మండిపడ్డారు. గెస్ట్ లెక్చరర్స్ కు తొమ్మిది నెలల నుంచి జీతాలు చెల్లించడం లేదని ముఖ్యమంత్రి రేవంత్ రెడ్డికి మాజీ మంత్రి హరీష్ రావు లేఖ రాశారు. బతుకమ్మ, దసరా పండుగలు కూడా జరుపుకోకుండా లెక్చరర్లు పస్తులు ఉండేలా చేసిన పాపం ఈ పాపిష్టి కాంగ్రెస్ ప్రభుత్వానికే దక్కుతుందని విమర్శించారు. నెలల తరబడి జీతాలు పెండింగ్ లో ఉంటే వారి బతుకు ఎలా సాగుతుందని, కుటుంబ పోషణ ఎలా జరుగుతుందని ప్రశ్నించారు. అధికారులను కలిసి ఎన్నిసార్లు విన్నవించుకున్నా ఫలితం లేకపోవడంతో, ఓపిక నశించి కళాశాలకు వెళ్లకూడదని గెస్ట్ లెక్చరర్స్ నిర్ణయం తీసుకున్నారన్నారు.

లెక్చరర్లు కళాశాలలకు వెళ్లకుంటే విద్యార్థులకు పాఠాలు ఎవరు చెబుతారు? సిలబస్ ను ఎవరు పూర్తి చేస్తారు? అని నిలదీశారు. కాంగ్రెస్ ప్రభుత్వం నిర్లక్ష్యంతో లెక్చరర్లే కాదు, విద్యార్థులు నష్టపోవాల్సి వస్తుందన్నారు. పాఠాలు చెప్పే గురువులకే గౌరవం ఇవ్వని ప్రభుత్వం, ఇక విద్యార్థుల భవిష్యత్తు గురించి ఎలా ఆలోచిస్తుంది? అని ప్రశ్నించారు. సిఎం సొంత జిల్లాలోనే పరిస్థితి ఇంత దారుణంగా ఉంటే, రాష్ట్రంలోని ఇతర జిల్లాల్లోని గెస్ట్ లెక్చరర్ల వేతనాల పరిస్థితి ఇంకెంత దారుణమో ఊహించుకోవచ్చని చురకలంటించారు. ముఖ్యమంత్రి రేవంత్ రెడ్డి కోతలు కోయడం ఆపేసి, ఉద్యోగులకు జీతాలు చెల్లించడంపై దృష్టి సారించాలని డిమాండ్ చేశారు. రేవంత్ రెడ్డి సొంత జిల్లాతో పాటు రాష్ట్ర వ్యాప్తంగా పెండింగ్ లో ఉన్న ఇంటర్ కళాశాలల గెస్ట్ లెక్చరర్ల వేతనాలు వెంటనే విడుదల చేసి పరువు కాపాడుకోవాలని హరీష్ రావు సలహా ఇచ్చారు.