Breaking News,తాజా వార్తలు,రాష్ట్ర వార్తలు

హైదరాబాద్: తెలంగాణలో బిసి సంఘాల బంద్ కొనసాగుతుంది. రాష్ట్ర వ్యాప్తంగా ఆర్ టిసి డిపోల ముందు బిసి సంఘాలు ఆందోళన చేపట్టాయి. బిసిలకు 42 శాతం రిజర్వేషన్‌ ఇవ్వాలని డిమాండ్ చేస్తున్నారు. కేంద్ర ప్రభుత్వానికి వ్యతిరేకంగా నినాదాలు చేస్తున్నారు. హైదరాబాద్‌లో ఆర్ టిసి బస్సులు డిపోలకే పరిమితం కావడంతో రోడ్లన్నీ నిర్మానుష్యంగా మారిపోయాయి. బిసి సంఘాలు, రాజకీయ పార్టీల పిలుపు మేరకు ఉదయం నుంచి సాయంత్రం వరకు అన్ని వ్యాపార సంస్థలు, వాణిజ్య సముదాయాలు, ప్రభుత్వ, ప్రైవేటు కార్యాలయాలు, విద్యాసంస్థలన్నీ మూసివేయాలని నిర్ణయించాయి. ప్రైవేటు విద్యాసంస్థలు సైతం స్వచ్ఛందగా బంద్‌కు మద్దతు ప్రకటించి పాఠశాలలను మూసివేస్తున్నట్లు ప్రకటించాయి. ఇదిలావుండగా కాంగ్రెస్, బిజెపి, బిఆర్‌ఎస్, వామపక్షాలతో పాటు తెలంగాణ ఉద్యోగుల జెఎసి బంద్ లో పాల్గొన్నాయి. 

హైదరాబాద్: జూబ్లీహిల్స్‌ కాంగ్రెస్‌ అభ్యర్థిగా నవీన్‌ యాదవ్‌ నామినేషన్ వేశారు. షేక్‌పేట్ తహశీల్దార్ కార్యాలయంలో నవీన్ మొదటి సెట్‌ నామినేషన్‌ వేశారు. యూసుఫ్‌గూడ చెక్‌పోస్ట్ నుంచి ర్యాలీగా షేక్ పేట్ కు వెళ్లారు. ఈ నామినేషన్ కార్యక్రమంలో మంత్రులు పొన్నం ప్రభాకర్, వివేక్‌, ఎంపి అనిల్‌ పాల్గొన్నారు. రెండు రోజుల క్రితం జూబ్లీహిల్స్ ఉప ఎన్నికల సందర్భంగా బిఆర్‌ఎస్ పార్టీ అభ్యర్థి మాగంటి సునీత గోపీనాథ్ నామినేషన్ దాఖలు చేసిన విషయం తెలిసిందే.  బిజెపి నుంచి లంకల దీపర్ రెడ్డి జూబ్లీహిల్స్ ఉప ఎన్నికలలో పోటీ చేస్తున్న విషయం విధితమే. జూబ్లీహిల్స్ నియోజకవర్గంలో బిఆర్‌ఎస్ ఎమ్మెల్యే మాగంటి గోపీనాథ్ గుండెపోటుతో మరణించడంతో ఉపఎన్నిక అనివార్యమైంది.

న్యూఢిల్లీ: రాష్ట్రంలో కలకలం రేపిన ఫోన్ ట్యాపింగ్ కేసులో మరో కీలక పరిణామం చోటు చేసుకుంది. ప్రధాన నిందితుడు ప్రభాకర్ రావు సిట్ అధికారులు అడిగిన సమాచారం ఇవ్వాల్సిందే అని సుప్రీం కోర్టు ఆదేశించింది. ఈ కేసులో క్లౌడ్, యాపిల్ క్లౌడ్ సమాచారం కూడా ఇవ్వాల్సిందే అని పేర్కొంది. యూజర్, పాస్‌వర్డ్‌ల సమాచారం ఇవ్వాల్సిందే నని జస్టిస్ నాగరత్న ధర్మాసనం ఆదేశించింది. ఫోరెన్సిక్ నిపుణుల సమక్షంలో సమాచారం తీసుకోవాలని సిట్‌కు సూచించింది. సమాచారం చెరిపేందుకు యత్నించినట్లు తేలితే తదుపరి చర్యలపై నిర్ణయం తీసుకుంటామని కోర్టు స్పష్టం చేసింది.

వరంగల్: మంత్రి పొంగులేటి శ్రీనివాస రెడ్డి వరంగల్ జిల్లా రాజకీయాల్లో జోక్యం చేసుకుంటున్నారంటూ కాంగ్రెస్ నేత కొండ మురళి ఆగ్రహం వ్యక్తం చేశారు. ఈ జిల్లాలో పొంగులేటి పెత్తనం ఏంటని ఆయన ప్రశ్నించారు. దీనిపై మురళి ఎఐసిసికి ఫిర్యాదు చేశారు. కొండ సురేఖ శాఖ అయిన దేవాదాయ శాఖలో పొంగులేటి జోక్యంపై ఆయన ఎఐసిసి అధ్యక్షుడు మల్లిఖార్జున ఖర్గేకు ఫిర్యాదు చేశారని.. మేడారం టెండర్ల వ్యవహారంపై ఫిర్యాదు చేసినట్లు తెలుస్తోంది. పొంగులేటి సొంత కంపెనీలకు టెండర్ల పనులు ఇప్పించుకున్నారని ఫిర్యాదులో ఆరోపించారు. ఈ వ్యవహారంపై ఆయన సోనియా గాంధీ, రాహుల్ గాంధీలతో పాటు రాష్ట్ర వ్యవహారల ఇంచార్జ్ మీనాక్షి నటరాజన్‌కు సైతం ఫిర్యాదు చేశారు. ఈ విషయంలో హైకమాండ్ నుంచి సానుకూల స్పందన వచ్చినట్లు కొండ మురళి తెలిపారు.

నిజామాబాద్:  బనక చర్ల విషయంలో మాజీ మంత్రి హరీష్ రావు మైల కడుక్కునే ప్రయత్నం చేస్తున్నారని టిపిసిసి ప్రెసిడెంట్ ఎమ్మెల్సీ మహేష్ కుమార్ గౌడ్ తెలిపారు. బిఆర్ఎస్ ప్రభుత్వం నిర్లక్ష్యం కారణంగానే బనక చర్ల జిఒలు వెలువడ్డాయన్నారు. బనకచర్ల, బిసి రిజర్వేషన్లు, బిజెపి – బిఆర్ఎస్ ద్వంద్వ వైఖరిపై మహేష్ గౌడ్ తీవ్రంగా స్పందించారు. రాయలసీమను రత్నాల సీమను చేస్తానన్నది, బనకచర్ల జిఓలపై ఆంధ్రా హక్కులను కాపాడతానన్నది మాజీ సిఎం కెసిఆర్ కాదా? అని ప్రశ్నించారు. ఎపి మాజీ ముఖ్యమంత్రి జగన్‌తో కెసిఆర్ చెట్టాపట్టాలు వేసుకుని విందులు, వినోదాలు చేసుకున్నారని, అప్పుడు ప్రజల హక్కుల విషయంలో మాత్రం మౌనం వహించారని దుయ్యబట్టారు. బనక చర్ల విషయంలో ఒక చుక్క నీటిని కూడా వదులుకునే ప్రసక్తే లేదని మహేష్ కుమార్ గౌడ్ స్పష్టం చేశారు. 

స్థానిక సంస్థల ఎన్నికల్లో బిసిలకు 42% రిజర్వేషన్లను కట్టుబడి అమలు చేస్తామని, హైకోర్టు స్టే ఇచ్చిన నేపథ్యంలో సుప్రీంకోర్టుకు వెళ్ళి అప్పీల్ చేసే యోచనలో ఉన్నామని, బిసిల రిజర్వేషన్ల విషయంలో రాజీ పడే ప్రసక్తే లేదని, బిసి రిజర్వేషన్లను అడ్డుకోవడంలో ప్రధాన ముద్దాయి బిజెపి అని ధ్వజమెత్తారు. తెలంగాణలో కుల సర్వే చారిత్రాత్మక నిర్ణయమని, పారదర్శకంగా నిర్వహించామని, బిజెపి – బిఆర్ఎస్ కలిసి బిసి రిజర్వేషన్లను అడ్డుకునే కుట్ర చేస్తున్నాయని విమర్శలు గుప్పించారు. మూడు చట్టాలు, ఒక ఆర్డినెన్స్ గవర్నర్ వద్ద పెండింగ్‌లో ఉన్నాయని, బిసిల నోటి కాడ ముద్దను లాగే ప్రయత్నం బిజెపి, బిఆర్ఎస్ చేస్తున్నాయని, ఢిల్లీ బిసి రిజర్వేషన్ ధర్నాకు బిజెపి నేతలు ఎందుకు ముఖం చాటేశారని మహేష్ కుమార్ గౌడ్ నిలదీశారు. 

కాంగ్రెస్ నాయకులకు దమ్ము ధైర్యం ఉంది కాబట్టే బిసి రిజర్వేషన్లకు కట్టుబడి ఉన్నామని, సిఎం రేవంత్ రెడ్డి గురించి మాట్లాడే అర్హత బిజెపి, బిఆర్ ఎస్ నేతలకు లేదని మహేష్ కుమార్ గౌడ్ చురకలంటించారు. హైదరాబాద్ నుంచి ముంబయి వయా నిజామాబాద్ రైల్వే లైన్ తో విషయమై సిఎం చర్చించానని, నిజామాబాద్ జిల్లా అభివృద్ధి విషయంలో పార్టీలకు అతీతంగా కృషి చేస్తానని, కామారెడ్డి బిసి సభ తప్పకుండా ఉంటుందని స్పష్టం చేశారు. 42 శాతం రిజర్వేషన్లు ఇచ్చాకే ఎన్నికలకు వెళ్తామన్నారు. 

హైదరాబాద్: రిజర్వేషన్లు 50% దాటకుండా స్థానిక సంస్థల ఎన్నికలు నిర్వహించుకోవచ్చని హైకోర్టు తెలిపింది. బిసి రిజర్వేషన్లపై హైకోర్టు గురువారం స్టే విధించగా ఆ ఉత్తర్వుల పూర్తి వివరాలు అర్ధరాత్రి అందుబాటులో వచ్చాయి. గడువు తీరిన స్థానిక సంస్థలకు పాత విధానం ప్రకారం రిజర్వేషన్లు 50% దాటకుండా ఎన్నికలు నిర్వహించుకోవచ్చని వివరించింది. పెంచిన 17% సీట్లను ఓపెన్ కేటగిరీగా నోటిఫై చేసి ఎన్నికలు జరుపుకోవచ్చని వెల్లడించింది. దీంతో ఎన్నికల నిర్వహణపై ప్రభుత్వం తదుపరి మంత్రివర్గ సమావేశంలో నిర్ణయం తీసుకోనుంది.

స్థానిక ఎన్నికల నోటిఫికేషన్‌ను నిలిపివేస్తూ హై కోర్టు గురువారం సంచలన నిర్ణయం తీసుకున్న విషయం తెలిసిందే. ఈ ఎన్నికలలో బిసిలకు రిజర్వేషన్ల శాతాన్ని పెంచుతూ రాష్ట్ర ప్రభు త్వం జారీ చేసిన జీవో 9 పై స్టే విధించింది. దీంతో బిసి రిజర్వేషన్లపెంపుపై నెల కొన్న ఉత్కంఠకు హైకోర్టు మధ్యంతర ఉత్తర్వులతో తాత్కాలికంగా తెరపడింది. హైకోర్టు ప్రధాన న్యాయమూర్తి జస్టిస్ అపరేష్ కుమార్ సింగ్, మెహియుద్దీన్‌లతో కూడిన ధర్మాసనం స్థానిక ఎన్నికల నోటిఫికేషన్ పై మధ్యంతర ఉత్తర్వులు జారీ చేయడంతో ఎన్నికల ప్రక్రియ ప్రారంభమైన తొలిరోజే నిలిచిపోయింది. ప్రభుత్వం తరఫున వాదనలు వినిపించిన మరో సీనియర్ న్యాయవాది రవివర్మ వర్చువల్‌గా తన వాదనలు వినిపించారు. రాజ్యాంగంలో 50 శాతం రిజర్వేషన్లపై ఎక్కడా సీలింగ్ లేదన్నారు. రిజర్వేషన్ల సీలింగ్ అనే పదానికి నిర్వచనం లేదని వివరించారు. కేవలం సుప్రీం కోర్టు తీర్పులు మాత్రమే ఉన్నాయన్నారు. రిజర్వేషన్లను వ్యతిరేకించే పిటిషనర్లకు ఎటువంటి ఆధారం లేదని, ఏ ఆధారంతో ఈ పిటిషన్ దాఖలు చేశారో చెప్పాలన్నారు. రిజర్వేషన్ల పరిమితిపై సుప్రీం కోర్టు తీర్పు మాత్రమే ఉందని, అందుకు స్పష్టమైన ఎటువంటి పునాది లేదన్నారు. ఎస్సీ, ఎస్టీ, బిసిల మొత్తం జనాభా 85 శాతం జనాభాకు 67 శాతం రిజర్వేషన్లు కల్పిస్తే, మిగతా 15 శాతం జనాభాకు 33 శాతం రిజర్వేషన్లు ఉన్నాయని, అలాంటప్పుడు బీసీలకు 42 శాతం రిజర్వేషన్లు కల్పిస్తే తప్పేంటనీ రవివర్మ వాదించారు. స్థానిక సంస్థల ఎన్నికలలో బీసీలకు రిజర్వేషన్ల శాతాన్ని పెంచుతూ ప్రభుత్వం జారీ చేసి న జీఓను కొట్టివేయాలని మాదవ్ రెడ్డి, స ముద్రాల రమేష్ అనే వ్యక్తులు హైకోర్టు ను ఆశ్రయించిన విషయం విధతమే. 

హైదరాబాద్: రాష్ట్రంలో మాదకద్రవ్యాల అణిచివేత కోసం ఏర్పాటు చేసిన ఈగల్‌ టీమ్ మరో ఆపరేషన్‌ని విజయవంతంగా పూర్తి చేసింది. నైజీరియా డ్రగ్స్ ముఠా డబ్బు బదిలీ నెట్‌వర్క్‌ను చేధించింది. డ్రగ్స్ దందాకు సంబంధించి రూ.3 కోట్ల హవాలా డబ్బును ముంబైలో పోలీసులు స్వాధీనం చేసుకున్నారు. డ్రగ్స్ ముఠాల డబ్బును బదిలీ చేస్తున్న దగ్గారం ప్రజాపతి అనే వ్యక్తిని అరెస్ట్ చేశారు. ఈ వ్యవహారంలో ఇప్పటివరకూ 25 మందిని అరెస్ట్ చేసినట్లు పోలీసులు తెలిపారు. నకిలీ పాస్‌పోర్ట్‌లతో విదేశీయులు భారత్‌లోకి వస్తున్నట్లు గుర్తించారు.

హైదరాబాద్: బిసి రిజర్వేషన్లపై రెండో రోజు హైకోర్టులో వాదనలు కొనసాగుతున్నాయి. బిసి కులగణనపై అసెంబ్లీ ఏకగ్రీవ తీర్మానం చేసిందని హైకోర్టుకు ఎజి సుదర్శన్ రెడ్డి తెలిపారు. స్వాతంత్య్రం తరువాత సమగ్ర కులగణన సర్వే తెలంగాణలోనే జరిగిందని, ఇంటింటికెళ్లి సర్వే చేశారని, సర్వే ఎవరూ అభ్యంతరం వ్యక్తం చేయలేదన్నారు. బిసి జనభా 57.6 శాతం ఉన్నారనడంలో ఎవరూ కాదనడం లేదన్నారు. 57.6 శాతం జనాభా ఉన్నా 42 శాతం రిజర్వేషన్లు ఇవ్వాలని ప్రభుత్వం నిర్ణయం తీసుకుందని ఎజి తెలియజేశారు. బిసిలకు 42 శాతం రిజర్వేషన్లు ఇవ్వాలని అసెంబ్లీ కూడా ఏకగ్రీవంగా నిర్ణయం తీసుకుందని, రాజకీయ వెనుకబాటుతనం ఉందని అసెంబ్లీ గుర్తించి తీర్మానం చేసిందని, గ్రామీణ, పట్టణ సంస్థల్లో బిసిలకు 42 శాతం ఇవ్వాలని అసెంబ్లీ నిర్ణయం తీసుకుందని వివరించారు. రాష్ట్రపతి బిల్లుకు ఆమోదం తెలపలేదు కాబట్టి సుప్రీంకోర్టు తీర్పు ప్రకారం బిల్లు ఆమోదం పొందినట్టేనని, ఒకవేళ బిల్లుకు రాష్ట్రపతి ఆమోదం తెలిపి ఉంటే అప్పుడు రాష్ట్ర ప్రభుత్వం నోటిఫై చేసి ఉండేదన్నారు. గడువులోగా గవర్నర్ ఆమోదించకపోతే చట్టంగా భావించాల్సి ఉంటుందని, తమిళనాడు ప్రభుత్వం, సుప్రీం కోర్టు తీర్పు ప్రకారం నోటిఫై చేయనక్కర్లేదని, అసెంబ్లీ చేసిన చట్టానికి సూత్రప్రాయ ఆమోదం ఉందని ఎజి స్పష్టం చేశారు. 

హైదరాబాద్: బిసి రిజర్వేషన్లపై రెండో రోజు హైకోర్టులో వాదనలు కొనసాగుతున్నాయి. బిసి కులగణనపై అసెంబ్లీ ఏకగ్రీవ తీర్మానం చేసిందని హైకోర్టుకు అడ్వకేట్‌ జనరల్‌ సుదర్శన్‌రెడ్డి తెలిపారు. స్వాతంత్య్రం తరువాత సమగ్ర కులగణన సర్వే తెలంగాణలోనే జరిగిందని, ఇంటింటికెళ్లి సర్వే చేశారని, సర్వే ఎవరూ అభ్యంతరం వ్యక్తం చేయలేదన్నారు. బిసి జనభా 57.6 శాతం ఉన్నారనడంలో ఎవరూ కాదనడం లేదన్నారు. 57.6 శాతం జనాభా ఉన్నా 42 శాతం రిజర్వేషన్లు ఇవ్వాలని ప్రభుత్వం నిర్ణయం తీసుకుందని ఎజి తెలియజేశారు. బిసిలకు 42 శాతం రిజర్వేషన్లు ఇవ్వాలని అసెంబ్లీ కూడా ఏకగ్రీవంగా నిర్ణయం తీసుకుందని, రాజకీయ వెనుకబాటుతనం ఉందని అసెంబ్లీ గుర్తించి తీర్మానం చేసిందని, గ్రామీణ, పట్టణ సంస్థల్లో బిసిలకు 42 శాతం ఇవ్వాలని అసెంబ్లీ నిర్ణయం తీసుకుందని వివరించారు. రాష్ట్రపతి బిల్లుకు ఆమోదం తెలపలేదు కాబట్టి సుప్రీంకోర్టు తీర్పు ప్రకారం బిల్లు ఆమోదం పొందినట్టేనని, ఒకవేళ బిల్లుకు రాష్ట్రపతి ఆమోదం తెలిపి ఉంటే అప్పుడు రాష్ట్ర ప్రభుత్వం నోటిఫై చేసి ఉండేదన్నారు. గడువులోగా గవర్నర్ ఆమోదించకపోతే చట్టంగా భావించాల్సి ఉంటుందని, తమిళనాడు ప్రభుత్వం, సుప్రీం కోర్టు తీర్పు ప్రకారం నోటిఫై చేయనక్కర్లేదని, అసెంబ్లీ చేసిన చట్టానికి సూత్రప్రాయ ఆమోదం ఉందని ఎజి స్పష్టం చేశారు.