Auto Added by WPeMatico
తిమ్మాజిపేట: నాగర్ కర్నూలు జిల్లా తిమ్మాజిపేట మండలం అవంచలో ఉద్రిక్తత చోటుచేసుకుంది. అవంచ గ్రామంలో ఆదివారం తెల్లవారుజామున రెండు వర్గాల మధ్య ఘర్షణ చోటుచేసుకుంది. సర్పంచ్ అభ్యర్థులు సౌమ్య, చంద్రకళ వర్గీయుల మధ్య గొడవలు జరిగాయి. బిఆర్ఎస్, కాంగ్రెస్ వర్గాలకు చెందిన శ్రేణుల మధ్య ఘర్షణ వాతావరణం నెలకొంది. బిఆర్ఎస్ నేతలు డబ్బులు పంచుతున్నారని కాంగ్రెస్ శ్రేణులు అడ్డుకున్నాయి. ఈ ఘర్షణలో ఇద్దరు గాయపడడంతో జడ్చర్ల ఆస్పత్రికి తరలించారు.
నాగర్కర్నూలు: మటన్ ముక్క ఓ వ్యక్తి ప్రాణం తీసిన సంఘటన నాగర్ కర్నూలు జిల్లా లో జరిగింది. స్థానికులు తెలిపిన వివరాల ప్రకారం… బొందలపల్లి గ్రామంలో ఓ వ్యక్తి కొత్త ఇళ్లు నిర్మించుకున్నాడు. మేస్త్రీ కష్టపడి ఇళ్లు నిర్మాణం పూర్తి చేయడంతో అతడి, పనివాళ్లకు దావత్ ఇచ్చాడు. ఇంటిపక్కన ఉండే లక్ష్మయ్యను కూడా దావత్కు పిలిచాడు. లక్ష్మయ్య మద్యం తాగిన అనంతరం మటన్ ముక్క తింటుండగా గొంతుల్లో ఇరుక్కుపోయింది. ఊపిరాడకపోవడంతో అపస్మారక స్థితిలోకి పడిపోయాడు. వెంటనే అతడిని స్థానిక ఆస్పత్రికి తరలించారు. పరీక్షించిన వైద్యులు అప్పటికే అతడు మృతి చెందాడని తెలిపారు. దీంతో గ్రామంలో విషాదచాయలు అలుముకున్నాయి. లక్ష్మయ్య కుటుంబ సభ్యులు శోకసంద్రంలో మునిగిపోయారు.
అచ్చంపేట: నాగర్ కర్నూల్ జిల్లా వ్యాప్తంగా ఎడతెరిపి లేకుండా భారీ వర్షాలు కురుస్తున్నాయి. మొంథా తుఫాన్ నేపథ్యంలో భారీ వర్షాలు కురవడంతో వాగులు వంకలు పొంగిపోర్లుతున్నాయి. చెరువులు, కుంటలు ఆలుగు పారుతున్నాయి. రోడ్లన్నీ జలమయంగా మారాయి. ఉప్పునుంతల మండల పరిధిలోని వెల్టూరు గ్రామం సమీపంలో శ్రీశైలం- హైదరాబాద్ జాతీయ రహదారి పైనుంచి వరద నీరు ప్రవహించడంతో రాకపోకలను నిలిపివేశారు. పూర్యనాయక్ తండ సమీపంలోని చంద్రవాగులో రెండు ఆవులు, బర్రెలు చిక్కుకొనిపోయాయి. మూగజీవాలు సహాయం కోసం ఎదురుచూస్తున్నాయి. డోంట్ల దగ్గర మహాసముద్రం చెరువు అలుగు పారుతోంది. కల్వకుర్తి మండలంలోని కుర్మిద్ద తండాలో ఇండ్లలోకి వర్షపు నీరు చేరింది. చిన్న కాల్వలను రైతులు మూసీ ఉంచడంతోనే పంట పొలం, ఇండ్లలోకి వర్షపు నీరు చేరింది. అచ్చంపేట నియోజకవర్గంలో ఉప్పునుంతల మండలంలో 20 సెంటీమీటర్ల వర్షపాతం నమోదయింది. రోడ్లపై వరద నీరు ప్రవహిస్తుండడంతో అచ్చంపేట నుండి ఉప్పునుంతల మండల కేంద్రానికి రాకపోకలను పూర్తిగా బంద్ చేశారు. ఉప్పునుంతల – అచ్చంపేట ప్రధాన రహదారిపై ఉన్న మల్లప్ప వాగు వరద ఉధృతి ఎక్కువగా ఉండడంతో రాకపోకలను నిలిపివేశారు. ఉప్పునుంతల మండలం కేంద్రంలోని గ్రామపంచాయతీ, ప్రాథమిక వ్యవసాయ సహకార బ్యాంకు ఎదురుగా ఉన్న కాలనీలో వర్షపు నీటితో జలమయమైంది.