Breaking News,జిల్లాలు,తాజా వార్తలు,నిజామాబాద్

యాదాద్రి భువనగిరి: నవదంపతులు ప్రమాదవశాత్తు రైలు నుంచి జారిపడి మృతి చెందిన సంఘటన యాదాద్రి భువనగిరి జిల్లా వంగపల్లి-ఆలేరు రైలు మార్గంలో గురువారం అర్థరాత్రి జరిగింది. రైల్వే పోలీసులు తెలిపిన వివరాల ప్రకారం… ఎపిలో పార్వతీపురం మన్యం జిల్లాకు చెందిన సింహాచలం(25), భవాని(22) రెండు నెలల క్రితం పెళ్లి చేసుకున్నారు. సింహాచలం హైదరాబాద్‌లో ఓ రసాయన పరిశ్రమలో పని చేస్తూ జీవనం సాగిస్తున్నాడు. జగద్గిరిగుట్టలోని గాంధీనగర్‌లో అద్దె ఇల్లు తీసుకొని నివాసం ఉంటున్నారు. విజయవాడలోని బంధువుల ఇంటికి వెళ్లేందుకు మచిలీపట్నం ఎక్స్‌ప్రెస్ రైలును ఎక్కారు. వంగపల్లి రైల్వే స్టేషన్ దాటిని తరువాత ఇద్దరు డోర్ వద్ద నిల్చొని ఉన్నారు. డోర్ నుంచి ఇద్దరు కిందపడడంతో ఘటనా స్థలంలోనే మృతి చెందారు. ట్రాక్‌మెన్ గమనించి రైల్వే పోలీసులకు సమాచారం ఇచ్చాడు. రైల్వే పోలీసులు కేసు నమోదు చేసి మృతదేహాలను స్వాధీనం చేసుకున్నారు. దంపతుల కుటుంబ సభ్యులకు సమాచారం ఇచ్చారు. 

మంచిప్ప గ్రామంలో తీవ్ర ఉద్రిక్తత

నిజామాబాద్: దేశ రక్షణ కోసం సరిహద్దుల్లో ప్రాణాలకు తెగించి పనిచేసే ఓ సిఆర్ పిఎఫ్  జవానుకు సొంత గ్రామంలో ఓటు హక్కు వినియోగించుకునే అవకాశం దక్కలేదు. నిజామాబాద్ జిల్లాలో రెండో విడత ఎన్నికల పోలింగ్ సందర్భంగా మంచిప్ప గ్రామానికి చెందిన జవాన్ ప్రవీణ్ ఎదుర్కొన్న ఈ చేదు అనుభవం ఎన్నికల అధికారుల నిర్లక్ష్యానికి అద్దం పడుతోంది. పోలింగ్ రోజున తన ఓటు హక్కు వినియోగించుకోవడానికి ప్రవీణ్ ప్రత్యేకంగా గ్రామానికి వచ్చారు. తీరా పోలింగ్ కేంద్రానికి వెళ్లగా అక్కడి అధికారులు చెప్పిన మాట విని ఆయన కంగుతిన్నారు. “మీ ఓటు పోస్టల్ బ్యాలెట్ ద్వారా ఇప్పటికే రాజమండ్రికి పంపబడింది” అని అధికారులు తేల్చి చెప్పారు. అధికారుల నిర్వాకంతో తీవ్ర ఆవేదనకు గురైన జవాన్ ప్రవీణ్ అక్కడే నిరసనకు దిగారు. దేశ సేవలో ఉన్న తన ఓటును, తన అనుమతి లేకుండా మరొక ప్రాంతానికి ఎలా కేటాయిస్తారంటూ అధికారులను నిలదీశారు. తన ఓటు హక్కు వినియోగించుకునేందుకు వెంటనే అనుమతి ఇవ్వాలని ఆయన డిమాండ్ చేశారు. ఈ అన్యాయంపై ఉన్నతాధికారుల జోక్యం కోరుతూ, ప్రవీణ్ వెంటనే జిల్లా కలెక్టర్‌కు విజ్ఞప్తి చేశారు. దేశ భక్తుడైన తనకు ఓటు వేసే అవకాశం కల్పించాలని, ఇందుకోసం అధికారులకు తగిన ఆదేశాలు జారీ చేయాలని ఆయన అభ్యర్థించారు. ఎన్నికల కమిషన్ నిబంధనల అమలులో జరిగిన ఈ ఘోర తప్పిదంపై విచారణ జరిపి, తక్షణమే న్యాయం చేయాలని సర్వత్రా డిమాండ్లు వినిపిస్తున్నాయి.

హైదరాబాద్: నిజామాబాద్ జిల్లాలో గ్రామ పంచాయతీ ఎన్నికల పోలింగ్ కొనసాగుతోంది. ఉదయం 9 గంటల వరకు 20.49 శాతం పోలింగ్ నమోదైంది. ఓటర్లు తమ ఓటు హక్కును వినిగియోగించుకునేందుకు బారులు తీరారు. ధర్పల్లి(20.99), దిచ్‌పల్లి(13.52), ఇందల్వాయి(19.95), జక్రాన్‌పల్లి(23), మక్లూర్(22.31), ముగ్పాల్(19.43), నిజామాబాద్ రూరల్(26.49), సిరకొండ(23.24) మండల్లాలో పోలింగ్ శాతం నమోదైంది. ఎనిమిది మండలాల్లో పంచాయతీ ఎన్నికల పోలింగ్ ప్రశాంతంగా జరుగుతుంది. వృద్ధులు సైతం పోలింగ్ కేంద్రాలకు చేరుకుని తమ ఓటు హక్కును వినియోగించుకుంటున్నారు. జిల్లా ఎన్నికల అధికారి, కలెక్టర్ టి.వినయ్ కృష్ణారెడ్డి మోపాల్, ముల్లంగి, ధర్మారం పోలింగ్ కేంద్రాలను సందర్శించి ఓటింగ్ తీరును, పోలింగ్ ఏర్పాట్లను పరిశీలించారు. ఎన్నికల పరిశీలకులు శ్యాంప్రసాద్ లాల్ సైతం మోపాల్, మాక్లూర్, గుండారం తదితర పోలింగ్ కేంద్రాలను సందర్శించి పోలింగ్ ప్రక్రియను పరిశీలించారు.

నల్లగొండ: బిఆర్ఎస్ పార్టీకి పోలైన బ్యాలెట్ పేపర్ ఓట్లు డ్రైనేజీ కాల్వలో కనిపించిన సంఘటన నల్లగొండ జిల్లా చిట్యాల మండలం చిన్నకాపర్తి గ్రామంలో జరిగింది. ఈ ఘటనలో ఆర్ఒను కలెక్టర్ సస్పెండ్ చేశారు. దీనికి సంబంధించిన వీడియో సోషల్ మీడియాలో వైరల్ గా మారింది.  చిన్నకాపర్తి గ్రామంలో  బిఆర్ఎస్ పార్టీకి పోలైన బ్యాలెట్ పేపర్ ఓట్లు ఓ డ్రైనేజీ కాల్వలో కనిపించడంతో గ్రామస్థులు షాక్ కు గురయ్యారు.  గ్రామస్థుల సమాచారం మేరకు మాజీ మంత్రి, ఎమ్మెల్యే జగదీష్ రెడ్డి, మాజీ ఎమ్మెల్యేలు చిరుమర్తి లింగయ్య, భూపాల్ రెడ్డి ఘటనా స్థలానికి చేరుకొని ఎన్నికల అధికారులకు, పోలీసులకు ఫిర్యాదు చేశారు. పేపర్లను బయటకు తీసుకొచ్చిన తెలియని వ్యక్తిపై 233 సెక్షన్ కింద ఎఫ్ఐఆర్ నమోదు చేశారు. స్టేజ్ టు ఆర్వోను సస్పెండ్ చేస్తున్నామని జిల్లా కలెక్టర్ ఇలా త్రిపాఠి వెల్లడించారు. ఈ ఘటనపై విచారణ నిర్వహించేందుకు గాను నల్గొండ ఆర్డీవోను అధికారికంగా నియమించారు. మిగిలిపోయిన బ్యాలెట్ పత్రాలన్నింటిని ఆర్డిఒ సమక్షంలో భద్రపరచాలని, దానిని వీడియోగ్రఫీ చేయించాలని ఆదేశాలు జారీ చేశారు. ఓడిపోతామని ముందే తెలిసి రిగ్గింగ్ కు పాల్పడి ఉంటారని బిఆర్ఎస్ కార్యకర్తలు ఆరోపణలు చేస్తున్నారు. రిగ్గింగ్ కు ఎన్నికల సిబ్బంది సహకరించారనే అనుమానాలు కూడా వ్యక్తమవుతున్నాయని గ్రామస్థులు ఆరోపణలు చేస్తున్నారు. పోలింగ్ బూత్ లో ఉండాల్సిన బ్యాలెట్ పేపర్లు బయటకు ఎలా వచ్చాయని నెటిజన్లు ప్రశ్నిస్తున్నారు. ఎన్నికల అధికారులు డబ్బులు తీసుకొని ఈ దారుణానికి పాల్పడిన ఉంటారని నెటిజన్లు అనుమానాలు వ్యక్తం చేస్తున్నారు. 

హైదరాబాద్: తెలంగాణ పంచాయతీ ఎన్నికలలో రసవత్తర పోరుగా కొనసాగుతోంది. ఎంఎల్‌ఎ, ఎంపి, కార్పొరేషన్ సొంతూర్లలో విరుద్ధమైన ఫలితాలు వస్తుండడంతో షాక్‌కు గురవుతున్నారు. తెలంగాణ టూరిజం కార్పొరేషన్ చైర్మన్ పటేల్ రమేష్ రెడ్డి స్వగ్రామంలో బిఆర్‌ఎస్ అభ్యర్థి ఘన విజయం సాధించారు. సూర్యాపేట మండలం బాలెంలో కాంగ్రెస్ అభ్యర్థిపై బిఆర్‌ఎస్ అభ్యర్థి 260 ఓట్ల తేడాతో ఘన విజయం సాధించారు. జడ్చర్ల ఎంఎల్‌ఎ అనిరుధ్ రెడ్డి గ్రామంలో కాంగ్రెస్ అభ్యర్థిపై బిజెపి అభ్యర్థి 31 ఓట్ల మెజార్టీతో గెలుపొందారు. ప్రజాప్రతినిధులు బలపరిచిన అభ్యర్థులు ఓడిపోవడంతో ఒక్కసారిగా వారు ఆందోళనకు గురవుతున్నారు. 

హైదరాబాద్: నల్గొండ జిల్లా కోర్లపహాడ్ లో బిఆర్ఎస్- కాంగ్రెస్ కార్యకర్తల మధ్య ఘర్షణ చెలరేగింది. బిఆర్ఎస్- కాంగ్రెస్ కార్యకర్తలు పరస్పరం కొట్టుకున్నారు. ఈ దాడిలో కొందరికి తీవ్రంగా గాయపడ్డారు. క్షతగాత్రులను నకిరేకల్ ప్రభుత్వ ఆస్పత్రికి తరలించారు. కోర్లపహాడ్ గ్రామంలో పోలీసులు భారీగా మోహరించారు. చిట్యాల మండలం ఉరుమండ్ల గ్రామంలో ఘర్షణలు చెలరేగాయి. కాంగ్రెస్, బిఆర్ఎస్ పార్టీ కార్యకర్తలు కొట్టుకున్నారు. పోలీసులు ఇరు వర్గాల కార్యకర్తలను చెదరగొట్టారు. బిఆర్ఎస్ నేత, మాజీ ఎంఎల్ఎ కంచర్ల భూపాల్ రెడ్డి, డైరీ కార్పొరేషన్ ఛైర్మన్ గుత్తా అమిత్ రెడ్డి మాటల యుద్ధానికి తెరలేపారు. ఉరమడ్లలో కంచర్ల భూపాల్ రెడ్డి పోలింగ్ బూత్ వద్దకు రావడంతో అడ్డుకోవడంతో వివాదం చెలరేగింది. దీంతో ఘర్షణ వాతావరణం తగ్గించడానికి పోలీసులు బలగాలు భారీగా మొహరించాయి. గజ్వేల్ మండలం అక్కారంలో ప్రలోభాల పర్వం కొనసాగుతోంది. కారులో తరలిస్తున్న రూ. 2.25 లక్షలను పోలీసులు పట్టుకున్నారు. జగదేవ్పూర్ సర్పంచ్ అభ్యర్థి డబ్బుగా పోలీసుల అనుమానం వ్యక్తం చేస్తున్నారు.

రాజకీయాలను సహించేది లేదు

బిఆర్‌ఎస్ వర్కింగ్ ప్రెసిడెంట్ కెటిఆర్

మనతెలంగాణ/హైదరాబాద్ : ప్రజాస్వామ్య పద్ధతిలో ఎన్నికలను ఎదుర్కోలేక, భౌతిక దాడులకు దిగడం కాంగ్రెస్ పార్టీ దిగజారుడుతనానికి నిదర్శనం అని బిఆర్‌ఎస్ వర్కింగ్ ప్రెసిడెంట్ కెటిఆర్ మండిపడ్డారు. అధికార మదంతో కాంగ్రెస్ గూండాలు సాగిస్తున్న అరాచకాలను బిఆర్‌ఎస్ పార్టీ ఎట్టి పరిస్థితుల్లోనూ ఉపేక్షించని హెచ్చరించారు. సూర్యాపేట జిల్లా తుంగతుర్తి నియోజకవర్గంలో కాంగ్రెస్ పార్టీ సాగిస్తున్న హత్యా రాజకీయాలపై ఆయన తీవ్ర ఆగ్రహం వ్యక్తం చేశారు. పంచాయతీ ఎన్నికల నేపథ్యంలో నూతనకల్ మండలం లింగంపల్లి గ్రామంలో బిఆర్‌ఎస్ శ్రేణులపై జరిగిన దాడిని తీవ్రంగా ఖండించారు.

ఈ దాడిలో బిఆర్‌ఎస్ కార్యకర్త ఉప్పుల మల్లయ్య ప్రాణాలు కోల్పోవడం పట్ల కెటిఆర్ తీవ్ర దిగ్భ్రాంతి వ్యక్తం చేశారు. గత రాత్రి లింగంపల్లి గ్రామంలో సుమారు 70 మంది కాంగ్రెస్ కార్యకర్తలు కర్రలు, రాళ్లతో బిఆర్‌ఎస్ నాయకులే లక్ష్యంగా విచక్షణారహితంగా దాడికి పాల్పడ్డారు. ఈ ఘటనలో ఉప్పుల మల్లయ్య మృతి చెందగా,బిఆర్‌ఎస్ మండల అధ్యక్షుడు మున్నా మల్లయ్య యాదవ్‌తో పాటు మరో 15 మంది కార్యకర్తలకు తీవ్ర గాయాలయ్యాయి.

ఈ ఘటన తెలిసిన వెంటనే కెటిఆర్ మాజీ మంత్రి జగదీష్ రెడ్డి, స్థానిక మాజీ ఎంఎల్‌ఎ గాదరి కిషోర్‌లతో ఫోన్లో మాట్లాడి క్షేత్రస్థాయి పరిస్థితులను అడిగి తెలుసుకున్నారు. పార్టీ కోసం పనిచేసే ప్రతి కార్యకర్తకు, నాయకుడికి బిఆర్‌ఎస్ పార్టీ అండగా ఉంటుందని భరోసా ఇచ్చారు. ఎవరూ అధైర్య పడవద్దని, మరణించిన కార్యకర్త కుటుంబానికి, గాయపడిన వారికి పార్టీ అన్ని విధాలా అండగా నిలుస్తుందని తెలిపారు. దాడికి పాల్పడిన వారిపై పోలీసులు వెంటనే కఠిన చర్యలు తీసుకోవాలని, బాధితులకు తక్షణమే న్యాయం చేయాలని కెటిఆర్ డిమాండ్ చేశారు.

తుంగతుర్తి: లింగంపల్లి గ్రామంలో బిఆర్ఎస్ కార్యకర్త మల్లయ్య హత్యకు గురయ్యారని మాజీ మంత్రి జగదీశ్ రెడ్డి తెలిపారు.  ఆరు నెలల క్రితమే కాంగ్రెస్ పార్టీ అంతర్గత తగదాలతో ఒక హత్య జరిగిందని, పోలీసుల నిర్లక్ష్యంతో ఇవాళ మరో హత్య జరిగిందని, తాను ఆ రోజే పోలీసులకు చెప్పానని మండిపడ్డారు. సూర్యాపేట జిల్లా తుంగతుర్తి నియోజకవర్గం నూతనకల్ మండలం లింగంపల్లి గ్రామంలో కాంగ్రెస్ నాయకుల చేతిలో హత్యకు గురైన బిఆర్ఎస్ కార్యకర్త మల్లయ్య భౌతికకాయానికి మాజీ మంత్రి, ఎమ్మెల్యే జగదీష్ రెడ్డి, మాజీ ఎమ్మెల్యే గాదరి కిషోర్ నివాళులర్పించారు. మృతుడి కుటుంబానికి దైర్యం చెప్పారు. అనంతరం జగదీశ్ రెడ్డి మీడియాతో మాట్లాడారు. ఈ గడ్డపై గతంలో కాంగ్రెస్ పార్టీ నాయకులు హత్యలు చేసిన సంస్కృతి ఉందని, తాము పదేళ్లలో ఆ సంస్కృతిని రూపుమాపడానికి ఎంతో కృషి చేశామన్నారు. కానీ అధికారంలోకి రాగానే మళ్ళీ హత్యలు మొదలు పెట్టారని దుయ్యబట్టారు. హత్యకు గురైన మల్లయ్య కుటుంబానికి బిఆర్ఎస్ పార్టీ తరపున తాము ఎల్లప్పుడూ అండగా ఉంటామన్నారు. సర్పంచ్ ఎన్నికల్లో ఓడిపోతామనే భయంతో బిఆర్ఎస్ కార్యకర్తను కాంగ్రెస్ నాయకులు దారుణంగా హతమార్చారని దుయ్యబట్టారు.

సూర్యాపేట జిల్లా నూతనకల్ మండలం లింగంపల్లి గ్రామంలో బీఆర్ఎస్ కార్యకర్తలపై కాంగ్రెస్ నాయకులు విచక్షణారహితంగా దాడి చేశారని ఆగ్రహం వ్యక్తం చేశారు. సర్పంచ్ ఎన్నికల్లో ఓడిపోతామనే భయంతో దాడి చేయడంతో బిఆర్ఎస్ కార్యకర్త ఉప్పుల మల్లయ్య  అక్కడికక్కడే మృతి చెందారని ఆరోపణలు చేశారు. 15 మంది బిఆర్ఎస్ కార్యకర్తలపై కాంగ్రెస్ నాయకుల దాడికి పాల్పడ్డారన్నారు. కాంగ్రెస్ నాయకులు దాడి చేస్తుంటే పోలీసులు చోద్యం చూస్తున్నారని, గ్రామంలో గొడవలు జరుగుతున్నాయని ముందుగానే చెప్పినా పోలీసులు పెడచెవిన పెట్టారని బిఆర్ఎస్ కార్యకర్తలు మంత్రి వద్ద ఆవేదన వ్యక్తం చేశారు. ఎన్నికల సంఘం అధికారులు, పోలీసుల నిర్లక్ష్యం వల్లే బిఆర్ఎస్ కార్యకర్త ప్రాణాలు కోల్పోయాడని, ఉన్నతాధికారులు స్పందించి కఠిన చర్యలు తీసుకోవాలని డిమాండ్ చేశారు. మల్లయ్య కుటుంబాన్ని పరామర్శించడానికి మాజీ మంత్రి కెటిఆర్ వస్తానన్నారు కానీ ప్రస్తుత పంచాయతీ ఎన్నికల వేళ పరిస్థితులు ఉద్రిక్తం అవ్వకూడదని తాము తర్వాత పరమర్శించాలని కోరామన్నారు. 

ఆలూర్: నిజామాబాద్ జిల్లా ఆలూర్ మండల కేంద్రంలో ఓ వ్యక్తి దారుణ హత్యకు గురయ్యాడు. గుర్తు తెలియని దుండగులు గంగారామ్ ను కిరాతంగా హత్య చేశారు. తన ఇంటి ముందు పడుకున్న గంగారంను గురువారం రాత్రి సమయంలో గుర్తు తెలియని దుండగులు గొడ్డలితో నరికి చంపినట్టు సమాచారం. గతంలో ఓ మహిళను హత్య చేసిన కేసులో గంగారం నిందితుడిగా ఉన్నాడు. మహిళా హత్య కేసులో గంగారం జైలుకు వెళ్లి వచ్చాడు. పోలీసులు సంఘటన స్థలానికి చేరుకొని కేసు నమోదు చేసి దర్యాప్తు చేస్తున్నారు. 

బోధన్: సాలూర మండలం సాలంపాడ్ గ్రామంలో బుధవారం విషాదం చోటు చేసుకుంది. ఆటో బోల్తా పడి ఏడాదిన్నర చిన్నారి మృతి చెందింది. ఇంటి ముందు ఆటోలో ఉల్లిగడ్డలు అమ్ముకుంటూ వచ్చిన బోధన్‌కు చెందిన వ్యాపారి అబ్ధుల్ ఖాదర్ వద్దకు తల్లి అయేషా బేగం వెళ్లింది. ఆమె వెనకే చిన్నారి కూడా పాకుతూ బయటకు వచ్చింది. ఉల్లిగడ్డల బేరం కుదరకపోవడంతో తల్లి పక్కకు వచ్చింది. చిన్నారిని గమనించని ఖాదర్ ఆటోని ముందుకు పోనిచ్చాడు. దీంతో ఆటో టైరు పాప తలపై నుంచి వెళ్లింది. పాపకు తీవ్ర గాయాలు కావడంతో అక్కడికక్కడే మృతి చెందింది. అప్పటివరకూ కళ్లముందే ఆడిన పసి పాప విగత జీవిగా మారడంతో తల్లి కన్నీరుమున్నీరుగా విలపించింది. మృతి చెందిన చిన్నారి సాలంపాడ్ గ్రామానికి చెందిన ఇర్ఫాన్, అయేషాబేగం దంపతులకు మూడో సంతానం. ఈ ఘటనపై కేసు నమోదు చేసి దర్యాప్తు చేస్తున్నట్లు గ్రామీణ ఎస్సై తెలిపారు.