Breaking News,జాతీయ వార్తలు,తాజా వార్తలు

ఢిల్లీ: సుప్రీంకోర్టు ప్రధాన న్యాయమూర్తిగా జస్టిస్‌ సూర్యకాంత్‌ ప్రమాణ స్వీకారం చేశారు. రాష్ట్రపతి భవన్ లో  సూర్యకాంత్‌ తో రాష్ట్రపతి ద్రౌపదీ ముర్ము ప్రమాణం స్వీకారం చేయించారు. 53వ ప్రధాన న్యాయమూర్తి గా 2027 ఫిబ్రవరి 9 వరకు ఆయన కొనసాగనున్నారు. సుప్రీంకోర్టు ప్రధాన న్యాయమూర్తిగా బాధ్యతలు చేపడుతున్న తొలి హర్యానా వాసిగా ఆయన రికార్డు సృష్టించారు. ఈ కార్యక్రమంలో ప్రధాని నరేంద్ర మోడీ, పలువురు కేంద్ర మంత్రులు, అధికారులు హాజరయ్యారు. సూర్యకాంత్ 1962 ఫిబ్రవరి 10న హర్యానాలోని హిస్సార్‌ జిల్లాలో జన్మించారు. 53వ ప్రధాన న్యాయమూర్తిగా కొనసాగనున్నారు. 

ముంబై: మహారాష్ట్రలో ఘోర రోడ్డు ప్రమాదం చోటు చేసుకుంది. కారు డ్రైవర్‌కి గుండెపోటు రావడంతో కారు అదుపు తప్పి బైక్‌లపైకి దూసుకెళ్లింది. ఈ ప్రమాదంలో ఓ బైక్ గాల్లో ఎగిరి కిందపడింది. ఈ ఘటనలో నలుగురు ప్రాణాలు కోల్పోగా.. మరికొందరు గాయపడ్డారు. శుక్రవారం సాయంత్రం ఠాణెలోని అంబర్‌నాథ్ ఫ్లైఓవర్‌పై ఈ ఘటన చోటు చేసుకుంది.

పోలీసులు తెలిపిన వివరాల ప్రకారం.. శివసేన పార్టీకి చెందిన స్థానిక ఎన్నికల అభ్యర్థి కిరణ్ చాబే ఎన్నికల ప్రచారం నుంచి తిరిగి వస్తుండగా.. కారు డ్రైవర్ లక్ష్మణ్ షిండేకు గుండెపోటు వచ్చింది. దీంతో కారు నియంత్రణ కోల్పోయి.. ముందున్న బైక్‌లతో పాటు ఇతర వాహనాలను ఢీకొట్టింది. ఈ ఘటనలో ఓ వ్యక్తి బైక్‌తో సహా ఎగిరి ఫ్లైఓవర్ కింద పడ్డాడు. ఈ ఘటనలో డ్రైవర్ షిండేతో పాటు మరో ముగ్గురు అక్కడికక్కడే ప్రాణాలు కోల్పోయారు. మరికొందరు గాయపడగా.. స్థానికులు వారిని ఆస్పత్రికి తరలించారు. కిరణ్ చాబేను కూడా బయటకు తీసి ఆస్పత్రికి తరలించారు. ప్రస్తుతం ఆమె పరిస్థితి నిలకడగానే ఉన్నట్లు తెలుస్తోంది. ఈ ఘటనపై పోలీసులు కేసు నమోదు చేసి దర్యాప్తు చేపట్టారు.

పాట్నా: బిహార్‌లో కొత్త ప్రభుత్వం కొలువుదీరేందుకు రంగం సిద్ధమైంది. మరోసారి బిహార్ ముఖ్యమంత్రిగా నితీశ్ కుమార్ ఖరారయ్యారు. ఈ మేరకు ఎన్డిఎ శాసనసభాపక్ష సమావేశంలో పాల్గొన్న ఎమ్మెల్యేలు.. తమ కూటమి నేతగా నితీశ్‌ను ఎన్నుకున్నారు. మరికొద్ది సేపట్లో గవర్నర్‌ను కలిసి ప్రభుత్వ ఏర్పాటుకు సిద్ధంగా ఉన్నామని లేఖ అందించనున్నట్లు తెలుస్తోంది. మరోవైపు గురువారం పదోసారి రాష్ట్ర ముఖ్యమంత్రిగా నితీశ్ ప్రమాణస్వీకారం చేసే అవకాశం ఉంది.

న్యూఢిల్లీ: పలు కేసుల్లో ప్రధాన నిందితుడుగా ఉన్న గ్యాంగ్‌స్టర్ అన్మోల్ బిష్ణోయ్‌ని ఎన్ఐఎ అధికారులు అమెరికా నుంచి ఇండియాకు తీసుకువచ్చారు. బిష్ణోయ్‌ని తీసుకువచ్చిన ఓ ప్రత్యేక విమానం కాసేపటి క్రితం ఢిల్లీలో ల్యాండ్ అయింది. ఎన్‌సిపి నేత బాబాసిద్ధిఖ్ హత్య కేసులో అన్మోల్ బిష్ణోయ్ ప్రధాన నిందితుడిగా ఉన్నాడు. గతేడాది సల్మాన్ ఖాన్ ఇంటిపై కాల్పుల కేసులోనూ అతడు నిందితుడిగా ఉన్నాడు. 

న్యూఢిల్లీ: జూబ్లీహిల్స్ ఉప ఎన్నికలో ఘన విజయం సాధించిన నవీన్ యాదవ్ కాంగ్రెస్ పార్టీ అగ్రనేత రాహుల్ గాంధీని కలిశారు. నవీన్‌తో పాటు సిఎం రేవంత్ రెడ్డి, డిప్యూటీ సిఎం భట్టి విక్రమార్క, టిపిసిసి అధ్యక్షుడు మహేశ్ కుమార్ గౌడ్, రాష్ట్ర వ్యవహారాల ఇంచార్జ్ మీనాక్షి నటరాన్ కూడా ఈ కార్యక్రమంలో పాల్గొన్నారు. ఈ సందర్భంగా రాహుల్ గాంధీ ఉప ఎన్నికలో పార్టీ విజయం కోసం కృషి చేసి రాష్ట్ర కాంగ్రెస్ నేతలను అభినందించారు. ఉప ఎన్నికలో విజయం సాధించిన నవీన్ యాదవ్‌కు రాహుల్ శుభాకాంక్షలు తెలిపారు. ఈ విజయం కోసం కష్టపడిన ప్రతీ ఒక్కరిని రాహుల్ కృతజ్ఞతలు తెలిపారు. జూబ్లీహిల్స్ ఎన్నిక విజయం గురించి రాష్ట్ర నేతలు రాహుల్‌కు వివరించారు.

శ్రీనగర్: జమ్మూకాశ్మీర్‌ రాష్ట్రం నౌగామ పోలీస్ స్టేషన్ ఆవరణంలో అర్ధరాత్రి భారీ పేలుడు సంభవించింది. ఈ పేలుళ్లలో తొమ్మిది మంది మృతి చెందగా 29 మంది తీవ్రంగా గాయపడ్డారు. గాయపడిన వారిని వివిధ ఆస్పత్రులకు తరలించారు. మృతుల్లో పోలీసులు, ఫోరెన్సిక్‌ సిబ్బంది ఉన్నారు. సీజ్‌ చేసిన పేలుడు పదార్థాలు పరిశీలిస్తుండగా ఈ ఘటన చోటుచేసుకుంది. పేలుడు ధాటికి పోలీస్‌ స్టేషన్‌ ధ్వంసమైంది. ఫరీదాబాద్ ఉగ్ర కుట్రకు సంబంధించిన పేలుడు పదార్థాలను శనివారం రాత్రి 11 గంటలకు ఫోరెన్సిక్ సిబ్బంది పరిశీలిస్తున్నారు. భారీ పేలుడు సంభవించడంతో శరీర భాగాలు మూడు వందల మీటర్ల దూరంలో పడిపోయాయి. పోలీస్ స్టేషన్ ఆవరణంలో ఉన్న వాహనాలు కాలిబూడిదగా మారాయి.  పేలుడు పదార్థాలు 360 కిలోలు ఉన్నట్టు సమాచారం. 

ఢిల్లీ: ఎర్రకోట వద్ద జరిగిన బాంబు దాడిలో 12 మంది మృతి చెందగా పలువురు గాయపడ్డారు. ఈ దాడిపై దర్యాప్తు సంస్థలు ముమ్మరంగా విచారణ చేపట్టాయి. ఈ దాడికి సంబంధించిన కీలక విషయాలు వెలుగులోకి వచ్చాయి. కారులో సీటు పక్కన శరీర భాగాలు వైద్యుడు ఉమర్ నబీ డిఎస్‌ఎ మ్యాచ్ అయినట్లు తెలుస్తోంది. ఎర్రకోట వద్ద పేలుడు సంబంధించిన కారు నడుపుతున్న వ్యక్తి ఉమర్ గా గుర్తించిన విషయం విధితమే. కారులో ఉన్న ఉమర్ చనిపోయి ఉంటారని పోలీసులు అనుమానం వ్యక్తం చేశారు. పుల్వామాలో అతడి తల్లి నుంచి డిఎన్‌ఎ నమూనాలు తీసుకొని పరీక్షించారు. కారులో శరీర భాగాల డిఎన్‌ఎ నమూనాలకు సరిపోవడంతో అతడు వాహనంలో ఉన్నట్టు నిర్థారణకు వచ్చారు. పేలుడు జరగక ముందు ఎర్రకోట సమీపంలోని ఫైజ్ ఎ ఇలాహి మసీదులోకి అతడు వెళ్లాడు. దీనికి సంబంధించిన దృశ్యాలు సిసిటివిలో నమోదయ్యాయి.  ఫరీదాబాద్ ఉగ్ర కుట్రలో భాగంగా నాలుగు నగరాల్లో దాడులకు చేయాలని ప్లాన్ చేశారు. ఒక్కో నగరంలో ఇద్దరు చొప్పున ఎనిమిది మంది నిందితులను సిద్ధం చేశాని దర్యాప్తు సంస్థలు వెల్లడించాయి. మరో రెండు పాత కార్లను కూడా పేలుళ్లకు సిద్ధం చేసినట్టు అనుమానాలు వ్యక్తమవుతున్నాయి.

చెన్నై: తమిళనాడు రాష్ట్రం శివగంగ జిల్లాలో రోడ్డు ప్రమాదం జరిగింది. తిరుప్పువనమ్‌లోని సక్కుడిలో ద్విచక్రవాహనాన్ని పోలీసులు వాహనం ఢీకొట్టడంతో ముగ్గురు మృతి చెందారు. ఈ ప్రమాదంలో మరో మహిళ తీవ్రంగా గాయపడడంతో మదురైలోని ప్రభుత్వా ఆస్పత్రికి తరలించారు. పోలీసులు ఘటనా స్థలానికి చేరుకొని కేసు నమోదు చేసి దర్యాప్తు చేశారు. అనంజియూర్ లోని బంధువుల ఇంట్లో వేడుకకు వెళ్లివస్తుండగా ఈ ప్రమాదం చోటుచేసుకుంది. మృతులు ఒకే కుటుంబానికి చెందిన ప్రసాద్, సత్య అనే దంపతులు, కూతరు అశ్విన్ గా గుర్తించారు. గాయపడిన మహిళ పేరు ఈశ్వర్ గా గుర్తించారు. మృతులు మేలురు ప్రాంతంలోని చిత్తపాటి గ్రామానికి చెందిన వారు అని పోలీసులు వెల్లడించారు.  

న్యూఢిల్లీ: ఎర్రకోట మెట్రో స్టేషన్ సమీపంలో భారీ పేలుడు సంభవించింది. మెట్రో స్టేషన్‌లోని పార్కింగ్ స్థలంలో ఉన్న కారులో పేలుడు సంభవించడంతో పలు వాహనాలకు మంటలు అంటుకున్నాయి. పేలుడు కారణంగా చుట్టుపక్కల ఉన్న పలు కార్లు, బైక్‌లు ధ్వంసమయ్యాయి. సమాచారం అందుకున్న అగ్నిమాపక సిబ్బంది ఘటనస్థలికి చేరుకున్నారు. సాయంత్రం 6.55 గంటలకు పోలీస్ కంట్రోల్ రూంకు, అగ్నిమాపక సిబ్బందికి సమాచారం అందినట్లు తెలుస్తోంది. ఏడు ఫైరింజన్లతో మంటలను అదుపు చేస్తున్నారు. ఎర్రకోట గేట్ నెం.1 వద్ద పేలుడు జరిగినట్లు సమాచారం వచ్చిందని ఫైర్ సిబ్బంది తెలిపారు. ఘటన స్థలికి చేరుకున్న క్లూస్ టీమ్, ఇతర దర్యాప్తు బృందాలు ఘటనస్థలిలో తనిఖీలు నిర్వహిస్తున్నాయి. పేలుడు నేపథ్యంలో ఎర్రకోట సమీపంలో పోలీసులు హై అలర్ట్ ప్రకటించారు. 

పాట్నా: బిహార్ రాష్ట్రం పాట్నా జిల్లా అకిల్‌పూర్ పోలీస్ స్టేషన్ పరిధిలోని మానస్ గ్రామంలో పాత ఇల్లు కూలిపోయింది. ఇల్లు కూలిన ఘటనలో ఒకే కుటుంబానికి చెందిన ఐదుగురు మృతి చెందారు. స్థానికులు తెలిపిన వివరాల ప్రకారం… మానస్ గ్రామంలో బాబుఖాన్, రోషన్ ఖటూన్ అనే దంపతలు తమ పిల్లలు మహ్మద్ చంద్, రుక్సార్, చండ్నీ కలిసి ఉంటున్నారు. 30 సంవత్సరాల క్రితం ఇందిరా అవాస్ యోజనలో నిర్మించిన ఇంట్లో వారు ఉంటున్నారు. ప్రస్తుతం ఆ ఇల్లు శిథిలావస్థకు చేరుకుంది. ఆదివారం రాత్రి భోజనం చేసిన తరువాత సదరు కుటుంబం నిద్రకు ఉపక్రమించింది. ఒక్కసారిగా వారిపై భవనం కప్పు కూలింది. గ్రామస్థులు వెంటనే శిథిలాల నుంచి వారిని బయటకు తీసి ఆస్పత్రికి తరలించారు. అప్పటికే ఐదుగురు మృతి చెందారని ఆస్పత్రి వర్గాలు వెల్లడించాయి. సదరు గ్రామంలో30 ఏళ్లు కిత్రం ఇందిరా అవాస్ యోజన కింద ప్రభుత్వం ఇండ్లు నిర్మించింది. ఇప్పుడు ఆ ఇండ్లు శిథిలావస్థకు చేరుకున్నాయి. ౩౦ ఏళ్ల కిత్రం ఇచ్చి ఇండ్లు మాత్రమే ఉన్నాయి, కొత్త ఆ గ్రామం ఇండ్ల నిర్మాణం ప్రభుత్వం చేపట్టలేదని ప్రతిపక్షాలు ఆరోపణలు చేస్తున్నాయి.