Breaking News,క్రీడలు,తాజా వార్తలు

కోల్‌కతా: సయ్యద్ ముస్తాక్ అలీ ట్రోఫీ టి20 టోర్నమెంట్‌లో హైదరాబాద్ వరుసగా మూడో విజయం నమోదు చేసింది. గురువారం కోల్‌కతాలో జరిగిన మ్యాచ్‌లో హైదరాబాద్ 4 వికెట్ల తేడాతో జమ్ముకశ్మీర్ టీమ్‌ను ఓడించింది. ఓవరాల్‌గా హైదరాబాద్‌కు ఈ టోర్నీలో ఇది నాలుగో విజయం కావడం విశేషం. తొలుత బ్యాటింగ్ చేసిన జమ్ము టీమ్ 19.3 ఓవర్లలో 112 పరుగులకు ఆలౌటైంది. కెప్టెన్ శుభమ్ ఖజురియా (35), కవల్‌ప్రీత్ సింగ్ (21), నసీర్ లోనె(17) పరుగులు చేశారు. ప్రత్యర్థి జట్టు బౌలర్లలో నితిన్ సాయి యాదవ్, కెప్టెన్ సివి మిలింద్ మూడేసి వికెట్లు పడగొట్టారు. తర్వాత బ్యాటింగ్‌కు దిగిన హైదరాబాద్ 15.1 ఓవర్లలో ఆరు వికెట్లు కోల్పోయి విజయాన్నిఅందుకుంది. వికెట్ కీపర్ ప్రఘ్నయ్ రెడ్డి (31) నాటౌట్, తనయ్ త్యాగరాజన్ (50) అద్భుత బ్యాటింగ్‌తో హైదరాబాద్‌ను గెలిపించారు.

టీమిండియాకు తప్పని కష్టాలు

మన తెలంగాణ /క్రీడా విభాగం: సౌతాఫ్రికాతో రాయ్‌పూర్ వేదికగా జరిగిన రెండో వన్డేలో భారత్ ఘోర పరాజయం చవిచూసిన సంగతి తెలిసిందే. విరాట్ కోహ్లి, రుతురాజ్ గైక్వాడ్‌లు శతకాలతో చెలరేగడంతో తొలుత బ్యాటింగ్ చేసిన టీమిండియా 359 పరుగుల రికార్డు స్కోరును సాధించింది. అయితే ఇంత పెద్ద లక్ష్యాన్ని ఉంచినా సౌతాఫ్రికా మరో 4 బంతులు మిగిలివుండగానే దీన్ని ఛేదించి ఔరా అనిపించింది. అంతకుముందు తొలి వన్డేలో కూడా భారత్ ప్రత్యర్థి ముందు క్లిష్టమైన 350 పరుగుల లక్ష్యాన్ని ఉంచింది. ఈ లక్ష్యాన్ని కాపాడుకోవడానికి సయితం భారత్ తీవ్రంగా శ్రమించాల్సి వచ్చింది. చివరికి అతి కష్టం మీద 17 పరుగుల తేడాతో విజయం అందుకుంది.

కొన్ని రోజుల క్రితం సౌతాఫ్రికాతో జరిగిన టెస్టు సిరీస్‌లో కూడా భారత బౌలర్లు విఫలమయ్యారు. పేలవమైన ప్రదర్శనతో నిరాశ పరిచారు. తాజాగా వన్డే సిరీస్‌లోనూ టీమిండియాకు బౌలింగ్ కష్టాలు తప్పడం లేదు. సిరాజ్, బుమ్రాలను తప్పిస్తే మరే బౌలర్ కూడా మెరుగైన ప్రదర్శన చేయడం లేదు. ఇప్పటి వరకు జరిగిన రెండు వన్డేల్లోనూ భారత బౌలర్లు ఘోర వైఫల్యం చవిచూశారు.ప్రసిద్ధ్ కృష్ణ, కుల్దీప్ యాదవ్, అర్ష్‌దీప్ సింగ్, హర్షిత్ రాణా, సుందర్ తదితరులు పేలవమైన బౌలింగ్‌తో నిరాశ పరిచారు. పరిస్థితులను గమనిస్తే టీమిండియా పేస్ దళం మసకబారిందనడంలో ఎలాంటి సందేహం లేదు. ఇప్పటికైన జట్టు యజమాన్యం బౌలింగ్‌ను మెరుగు పరచడంపై దృష్టి సారించాలి. సీనియర్ బౌలర్లు షమి, బుమ్రా, సిరాజ్‌లను ప్రతి సిరీస్‌లోనూ ఆడించాలి. అనవసర ప్రయోగాలకు స్వస్తి పలికి బౌలింగ్ బలోపేతం చేసేందుకు ప్రయత్నించాలి. అప్పుడే భారత్‌కు గెలుపు అవకాశాలు మెరుగ్గా ఉంటాయి.

హైదరాబాద్: ఈ ఏడాది జరిగిన ఆసియాకప్ సూపర్‌-4లో శ్రీలంకతో జరిగిన మ్యాచ్‌లో టీం ఇండియా ఆల్‌ రౌండర్ హార్థిక్ పాండ్యాకు గాయమైన విషయం తెలిసిందే. అప్పటి నుంచి అతడు జట్టుకు దూరంగా ఉంటున్నాడు. ఇటీవల గాయం నుంచి కోలుకున్న అతడు ప్రస్తుతం సయ్యద్ ముస్తాక్ అలీ ట్రోఫీలో పాల్గొంటున్నాడు. ఈ టోర్నమెంట్‌లో బరోడా జట్టు తరఫున ప్రాతినిధ్యం వహిస్తున్న హార్థిక్, పంజాబ్‌తో ఉప్పల్ స్టేడియం వేదికగా జరిగిన మ్యాచ్‌లో చెలరేగిపోయాడు.

ఈ మ్యాచ్‌లో టాస్ గెలిచి బ్యాటింగ్ ఎంచుకున్న పంజాబ్ 20 ఓవర్లలో 8 వికెట్లు కోల్పోయి 222 పరుగులు చేసింది. అభిషేక్ శర్మ (50, 19 బంతుల్లో) మెరుపు హాఫ్ సెంచరీ చేయగా.. అన్మోల్‌ప్రీత్ సింగ్ (69), నమన్ ధీర్(39) స్కోర్ బోర్డును పరుగులు పెట్టించారు. ఆ తర్వాత బ్యాటింగ్ ప్రారంభించిన బరోడా 19.1 ఓవర్లలో 224 పరుగులు చేసి లక్ష్యాన్ని చేధించింది. హార్థిక్ పాండ్యా (77, 42 బంతుల్లో) అదిరిపోయే కమ్‌బ్యాక్ ఇచ్చాడు. శివలిక్ శర్మ (47), విష్ణు సోలంకి(43) రాణించారు. దీంతో బరోడా ఈ టోర్నమెంట్‌లో రెండో విజయాన్ని సొంతం చేసుకుంది. హార్థిక్ బ్యాటింగ్ చూస్తే.. సౌతాఫ్రికాతో జరిగే టి-20 సిరీస్‌కి హార్థిక్ సిద్ధంగా ఉన్నాడని తెలుస్తోంది.

యువ సంచలనం వైభవ్ సూర్యవంశీ దూకుడైన బ్యాటింగ్ కొనసాగిస్తున్నాడు. అండర్-19 జట్టులో అద్భుతమైన ప్రదర్శన చేసిన అతడు ప్రస్తుతం సయ్యర్ ముస్తాక్ అలీ ట్రోఫీలో అతడు మరో రికార్డు సెంచరీ చేశాడు. ఏడు ఫోర్లు, ఏడు సిక్సుల సాయంతో 61 బంతుల్లో 108 పరుగులు చేశాడు. ఈ క్రమంలో అతి చిన్న వయస్సులో ఈ టోర్నమెంట్‌లో సెంచరీ చేసిన ఆటగాడిగా చరిత్ర సృష్టించాడు. మహారాష్ట్ర, బిహార్‌ మధ్య జరిగిన ఈ మ్యాచ్‌లో వైభవ్ ఈ రిరకార్డును 14 ఏళ్ల 250 రోజుల్లో సెంచరీ చేసి మరోసారి తన సత్తా నిరూపించుకున్నాడు. గతంలో ఈ రికార్డు విజయ్ జోల్ పేరిట ఉండేది. జోల్ 18 ఏళ్ల, 118 రోజుల వయస్సులో సెంచరీ సాధిచాడు. ఈ సందర్భంగా వైభవ్‌పై సోషల్‌మీడియాలో ప్రశంసల వర్షం కురుస్తోంది.

భారత్‌లో క్రికెట్‌పై ఉన్నంత అభిమానం మరే ఆట మీద ఉండదు. కానీ, ఇతర ఆటల్లో మనవాళ్లు ఏదైనా ఘనత సాధిస్తే.. అది పూర్తి దేశానికే తలమానికం అవుతుంది. అదే ఇప్పుడు యంగ్ ఇండియా జట్టు చేసింది. సౌదీ అరేబియాలో వచ్చే ఏడాది జరిగే ఆసియా కప్‌కు భారత అండర్-17 పురుషుల ఫుట్‌బాల్ జట్టు అర్హత సాధించింది. ఆదివారం జరిగిన క్వాలిఫయర్ మ్యాచ్‌లో అత్యంత బలమైన ఇరాన్‌ ఓడించి చరిత్ర సృష్టించింది. అహ్మదాబాద్‌లోని ఎకె ఏరినాలో జరిగిన ఈ మ్యాచ్‌లో భారత్ 2-1 తేడాతో ఘన విజయం సాధించింది. గత 20 ఏళ్లో భారత్ ఆసియా కప్ ఫైనల్స్‌కు చేరడం ఇది మూడోసారి. ఆసియా కప్‌లో భారత్‌ ఇదే సంచలన ప్రదర్శనలు చేసి టాప్-4లో నిలిస్తే, 2027 FIFA U-17 వరల్డ్ కప్ (ఖతార్) అర్హత సాధిస్తుంది.  

ఇండియన్ ప్రీమియర్ లీగ్ 2026 కోసం డిసెంబర్ 16న అబుదాబిలో మినీ వేలం జరుగనుంది. అయితే, చాలా మంది ఆటగాళ్లు వివిధ కారణాలతో ఈ వేలం నుంచి తప్పుకుంటున్నారు. తాజాగా ఆస్ట్రేలియా ఆల్‌ రౌండర్ గ్లెన్ మ్యాక్స్‌వెల్ ఈ వేలానికి తన పేరును నమోదు చేసుకోలేదని తెలుస్తోంది. గత ఐపిఎల్ సీజన్‌లో పంజాబ్ కింగ్స్ జట్టు తరఫున ఆడిన మ్యాక్స్‌వెల్ పేలవ ప్రదర్శన చేశాడు. ఏడు మ్యాచుల్లో కేవలం 48 పరుగులు మాత్రమే చేసి.. నాలుగు వికెట్లు పడగొట్టాడు. ఆ తర్వాత గాయం కారణంగా ట్రోర్నమెంట్‌కి దూరమయ్యాడు.

ఇప్పటికే వెస్టిండీస్ దిగ్గజ ఆటగాడు ఆండ్రీ రస్సెల్ ఐపిఎల్ 2026 నుంచి రిటైర్‌మెంట్ ప్రకటించిన విషయం తెలిసిందే. రస్సెల్‌ని కోల్‌కతా నైట్‌రైడర్స్ జట్టు ‘పవర్ కోచ్‌’గా నియమించింది. అంతేకాక సౌతాఫ్రికా ఆటగాడు ఫాఫ్ డుప్లెసిస్, ఇంగ్లండ్ ఆటగాడు మొయిన్ అలీ ఐపిఎల్‌లో ఆడటం లేదని ప్రకటించారు. వీరిద్దరు పాకిస్థాన్ సూపర్ లీగ్‌లో పాల్గొంటామని పేర్కొన్నారు. ఇక ఈసారి వేలంలో 1,355 మంది పేర్లు నమోదు చేసుకున్నారు. అన్ని జట్లలో కలిపి 77 స్లాట్లు ఖాళీగా ఉన్నాయి. ఇందులో విదేశీ స్లాట్లు 31. కోల్‌కతా నైట్‌రైడర్స్ వద్ద అత్యధికంగా రూ.64.3 కోట్లు పర్స్ ఉండగా.. చెన్నై సూపర్ కింగ్స్ వద్ద రూ.43.4 కోట్ల పర్స్ ఉంది.

యువ క్రికెటర్ ఇషాన్ కిషన్ దేశవాళీ టి-20 టోర్నమెంట్ సయ్యద్ ముస్తాక్ అలీ ట్రోఫీలో అద్భుతంగా రాణిస్తున్నాడు. ఈ టోర్నమెంట్‌లో తన సొంత జట్టు జార్ఖండ్‌కు అతడు కెప్టెన్‌గా వ్యవహరిస్తున్న విషయం తెలిసిందే. ఈ టోర్నీలో ఎలైట్ గ్రూప్ ‘డి’లో భాగంగా ఆదివారం జార్ఖండ్, త్రిపుర జట్టుతో తలపడింది. అహ్మదాబాద్ వేదికగా జరిగిన ఈ మ్యాచ్‌లో త్రిపుర జట్టు టాస్ ఓడి బ్యాటింగ్‌కి దిగింది. నిర్ణీత 20 ఓవర్లలో 7 వికెట్ల నష్టానికి 182 పరుగులు చేసింది.

అనంతరం జార్ఖండ్ జట్టు 17.3 ఓవర్లలో కేవలం రెండు వికెట్లు మాత్రమే కోల్పోయి 185 పరుగులు చేసి విజయం సాధించింది. జార్ఖండ్ బ్యాటింగ్‌లో ఇషాన్ కిషన్ 50 బంతుల్లో 10 ఫోర్లు, 8 సిక్సుల సాయంతో 113 పరుగులు చేసి అద్భుత శతకాన్ని సాధించాడు. దీంతో అతడికే ప్లేయర్ ఆఫ్ ది మ్యాచ్ అవార్డు దక్కింది. దీంతో టి-20 ఫార్మాట్‌లో కెప్టెన్‌గా, వికెట్ కీపర్‌గా వ్యవహరిస్తూ అత్యధిక సెంచరీలు చేసిన ఆటగాడిగా రికార్డు సాధించాడు. ఇషాన్ కెప్టెన్, కీపర్‌గా ఉంటూ సాధించిన సెంచరీలు మూడు. గతంలో సయ్యద్ ముస్తాక్ అలీ ట్రోఫీ 2018-19 సీజన్‌లో జార్ఖండ్ కెప్టెన్‌గా, కీపర్‌గా అతడు రెండు సెంచరీలు చేయగా.. ఈ సీజన్‌లో మరో సెంచరీ సాధించాడు. అంతకు ముందు ఈ రికార్డు ఆస్ట్రేలియా దిగ్గజం ఆడం గిల్‌క్రిస్ట్ పేరిట ఉండేది. గిల్‌క్రిస్ట్ మిడిల్‌స్సెక్స్, కింగ్స్ ఎలెవన్ పంజాబ్ జట్ల తరఫున కీపర్‌గా, కెప్టెన్‌గా ఉంటూ రెండు శతకాలు సాధించాడు.

రాంచీ వేదికగా సౌతాఫ్రికాతో జరిగిన తొలి వన్డే మ్యాచ్‌లో టీం ఇండియా స్టార్ బ్యాట్స్‌మెన్ విరాట్ కోహ్లీ అద్భుత శతకం బాదిన విషయం తెలిసిందే. 11 ఫోర్లు, 7 సిక్సుల సాయంతో 135 పరుగులు చేసి కోహ్లీ జట్టు విజయంలో కీలక పాత్ర పోషించాడు. కాగా, కోహ్లీ చాలా కాలం తర్వాత సెంచరీ చేయడంతో అటు అభిమానులే కాదు.. సహచర ఆటగాళ్లు, కోచింగ్ స్టాఫ్ కూడా సంతోషంలో మునిగిపోయారు. తొలి వన్డేలో నాలుగు వికెట్ల తీసిన కుల్దీప్ కూడా తన సంతోషాన్ని పంచుకున్నాడు.

‘‘కోహ్లీ భాయ్ కెప్టెన్‌గా ఉన్నప్పుడు నా కెరీర్ ప్రారంభమైంది. అతడు బ్యాటంగ్ చేసిన విధానం చూస్తే నేను 8-9 సంవత్సరాలు వెనక్కి వెళ్లినట్లు అనిపించింది. 2017, 2018, 2019లో ఆడినట్లు ఈ మ్యాచ్‌లో ఆడాడు. ఇది చాలా మంది ఇన్నింగ్స్, అతడు చాలా ఆత్మ విశ్వాసంతో కనిపించాడు. కోహ్లీతో కలిసి ఆడటం చాలా బాగుంది. అతడి నుంచి చాలా నేర్చుకుంటాం. బౌలర్లకు కూడా మద్దతిస్తూ ఇన్‌పుట్స్ ఇస్తుంటాడు. ఆటగాళ్లలో ఉత్సహాన్ని నింపుతాడు. అతను జట్టులో ఉండటం మా అదృష్టం’’ అని కుల్దీప్ అన్నాడు.

రాంచీలో జరిగిన వన్డేలో టీం ఇండియా స్టార్ ఆటగాళ్లు విరాట్ కోహ్లీ, రోహిత్ శర్మ అద్భుత ప్రదర్శన చేసిన విషయం తెలిసిందే. విరాట్ కోహ్లీ (135) సెంచరీలో కదం తొక్కగా.. రోహిత్ (57) తనదైన శైలీ ధనాధన్ మెరుపులతో అర్థ శతకం చేశారు. దీంతో వీరిద్దరు తమ ఫిట్‌నెస్‌పై వచ్చిన ప్రశ్నలుకు సమాధానం ఇచ్చినట్లైంది. అంతేకాక 2027 ప్రపంచకప్ వరకూ జట్టులో కొనసాగాలని అనుకుంటున్న అభిమానులకు భరోసా ఇచ్చారు.

ఈ నేపథ్యంలో భారత మాజీ క్రికెటర్ కృష్ణమాచారి శ్రీకాంత్ కీలక వ్యాఖ్యలు చేశారు. విరాట్-రోహిత్‌లు లేకుంటే వన్డే ప్రపంచకప్ గెలవడం సాధ్యం కాదని ఆయన పేర్కొన్నారు. వారిద్దరూ వేరే లెవల్‌లో క్రికెట్ ఆడుతున్నారని పేర్కొన్నారు. ‘‘ఇక ప్రపంచకప్‌లో రోహిత్-విరాట్‌లు ఆడుతారా? ఫిట్‌నెస్‌తో ఉంటారా? వంటి ప్రశ్నలు వేయొద్దు. వాళ్లిద్దరు కలిసి 20 ఓవర్లు బ్యాటింగ్ చేస్తే ప్రత్యర్థి కథ సమాప్తమైనట్లే. రాంచీలో అదే జరిగింది. వారిద్దరు తమ బ్యాటింగ్‌తో సౌతాఫ్రికా ఓటమిని శాసించారు. వాళ్లు నెలకొల్పిన భాగస్వామ్యం దక్షిణాఫ్రికాను మానసికంగా దెబ్బతీసింది. రో-కో జోడి చాలా కష్టపడుతున్నారు. కేవలం ఒకే ఫార్మాట్‌లో ఆడుతూ తమ రిథమ్‌ను కొనసాగించడం అంత సులువు కాదు. ప్రపంచకప్‌లో వారిద్దరు కీలకం కానున్నారు’’ అని శ్రీకాంత్ అన్నారు.

కాగా, ఆదివారం జరిగిన మ్యాచ్‌లో భారత్ 349 పరుగులు చేసి దక్షిణాఫ్రికా 350 పరుగుల విజయలక్ష్యాన్ని ముందుంచింది. ఈ లక్ష్యాన్ని చేధించడంతో సఫారీలు విఫలమయ్యారు. 332 పరుగులకే సౌతాఫ్రికా ఆలౌట్ కావడంతో భారత్ ఈ మ్యాచ్‌లో 17 పరుగుల తేడాతో విజయం సాధించింది. రెండో వన్డే రాయ్‌పూర్ వేదికగా జరుగనుంది. 

మూడు వన్డేల సిరీస్‌లో భాగంగా రాంచీ వేదికగా జరిగిన తొలి వన్డేలో టీం ఇండియా ఘన విజయం సాధించి సిరీస్‌లో 1-0 తేడాతో ఆధిక్యం సాధించిన విషయం తెలిసిందే. రెండో వన్డే రాయ్‌పూర్‌లో జరుగనుంది. ఈ మ్యాచ్‌కి ముందు భారత్‌కు గుడ్‌న్యూస్ వచ్చింది. గాయం కారణంగా సౌతాఫ్రికాతో జరిగిన రెండో టెస్ట్, తొలి వన్డేకి దూరమైన శుభ్‌మాన్ గిల్.. నెమ్మదిగా కోలుకుంటున్నాడని తెలిసింది.

డిసెంబర్ 1న బెంగళూరులోని బిసిసిఐ సెంటర్ ఆఫ్ ఎక్సలెన్స్‌లో గిల్ రిహాబ్ కార్యక్రమం ప్రారంభమైందని తెలుస్తోంది. ముంబైలో విస్తృత ఫిజియోథెరపి పూర్తి చేసిన గిల్, కుటుంబంతో కొద్ది రోజులు గడిపి.. ప్రస్తుతం బిసిసిఐ వైద్య బృందం పర్యవేక్షణలో ఉన్నాడని సమాచారం. వైద్యులు ప్రత్యేక ఫిట్‌నెస్ ప్రొగ్రామ్, వర్క్‌లోడ్ మేనేజ్‌మెంట్ ప్లాన్ సిద్ధం చేసినట్లు వార్తలు వినిపిస్తున్నాయి. గాయం కారణంగా బ్యాటింగ్‌కి దూరమైన గిల్ త్వరలోనే తేలికపాటి నెట్ సెషన్స్‌లో పాల్గొనే అవకాశం ఉంది. అయితే ఈ వన్డే సిరీస్‌కి దూరమైన గిల్.. తిరిగి సౌతాఫ్రికాతో జరిగే టి-20 సిరీస్‌లో పాల్గొంటాడని సమాచారం.