Breaking News,క్రీడలు,తాజా వార్తలు

దాదాపు ఏడు నెలల విరామం తర్వాత మళ్లీ టీం ఇండియా జెర్సీలో మైదానంలోకి అడుగుపెట్టిన రోహిత్ శర్మ తన సత్తా చాటాడు. ఆస్ట్రేలియాతో జరిగిన వన్డే సిరీస్‌లో ప్రత్యర్థులపై తన ప్రతాపం చూపించాడు. ఈ సిరీస్‌లో ఓ సెంచరీ, ఓ అర్థ శతకం సాధించి.. ప్లేయర్ ఆఫ్ ది సిరీస్‌గా నిలిచాడు. అయితే తాజాగా ఐసిసి వన్డే ర్యాంకింగ్స్‌లో నెం.1 ర్యాంకును సాధించాడు. 36 రేటింగ్ పాయింట్ల మెరుగుపర్చుకొని తొలిసారి వన్డే ర్యాంకింగ్స్‌లో అగ్రపీఠాన్ని అధిరోహించాడు.

తద్వారా అతి లేటు వయస్సులో నెం.1 ర్యాంకు సాధించిన ఆటగాడిగా రోహిత్ అరుదైన ఘనతను తన ఖాతాలో వేసుకున్నాడు. 38 ఏళ్ల 182 రోజుల వయస్సులో నెంబర్ వన్ బ్యాటర్‌గా నిలిచి చరిత్ర సృష్టించాడు. ఈ క్రమంలో నెం.1గా ఉన్న తన సహచరుడు, వన్డే కెప్టెన్ శుభ్‌మాన్ గిల్‌ను రోహిత్ వెనక్కి నెట్టాడు. ఆసీస్ సిరీస్‌లో విఫలమైన గిల్ రెండు స్థానాలు కోల్పోయి మూడో స్థానంలో స్థిరపడ్డాడు. ఇక విరాట్ ఒక స్థానం కోల్పోయి.. ఆరో స్థానానికి పడిపోగా.. ఈ సిరీస్‌ రెండో వన్డేలో అర్థ శతకంతో రాణించిన శ్రేయస్ అయ్యర్ ఓ స్థానం మెరుగుపర్చుకొని తొమ్మిదో స్థానానికి ఎగబాకాడు.

బౌలర్లలో అఫ్గానిస్థాన్ స్టార్ రషిద్ ఖాన్ మొదటిస్థానంలో కొనసాగుతుండగా.. టాప్ 10లో టీం ఇండియా నుంచి కుల్దీప్ యాదవ్ మాత్రం ఏడో స్థానంలో ఉన్నాడు. ఆల్ రౌండర్ల ర్యాంకింగ్స్‌లో అక్షర్ పటేల్ నాలుగు స్థానాలు మెరుగుపర్చుకొని ఎనిమిదో స్థానానికి చేరగా.. అప్గానిస్థాన్ ప్లేయర్ అజ్మతుల్లా ఒమర్‌జాయ్ ప్రథమ స్థానంలో సెటిల్ అయ్యాడు.

కాన్‌బెర్రా: భారత్-ఆస్ట్రేలియా మధ్య జరుగుతున్న తొలి ట్వి20 మ్యాచ్‌లో ఆసీస్ ఐదు ఓవర్లలో ఒక వికెట్ కోల్పోయి 43 పరుగులతో ఆటను కొనసాగిస్తోంది. వర్షం కురవడంతో ఆటకు అంతరాయం ఏర్పడింది. అభిషేక్ శర్మ 14 బంతుల్లో 19 పరుగులు చేసి నాథన్ ఎలిస్ బౌలింగ్‌లో టిమ్ డెవిడ్‌కు క్యాచ్ ఇచ్చి వెనుదిరిగాడు. ప్రస్తుతం క్రీజుల్ శుభ్‌మన్ గిల్(16), సూర్యకుమార్ యాదవ్(08) పరుగులతో బ్యాటింగ్ చేస్తున్నారు. 

కాన్‌బెర్రా: ఆస్ట్రేలియా పర్యటనలో ఉన్న భారత్.. ఆతిథ్య జట్టుతో ఐదు టి-20ల సిరీస్‌లో తలపడేందుకు సిద్ధమైంది. కాన్‌బెర్రా వేదికగా తొలి టి-20 మ్యాచ్ మరికాసేపట్లో ప్రారంభం కానుంది. ఈ మ్యాచ్‌లో టాస్ గెలిచిన ఆసీస్ కెప్టెన్ మిచెల్ మార్ష్.. బౌలింగ్ ఎంచుకొని.. భారత్‌ను బ్యాటింగ్‌కు ఆహ్వానించాడు. కానీ, కొద్ది రోజుల క్రితం ఇరు జట్లు మధ్య జరిగిన వన్డే సిరీస్‌ని ఆస్ట్రేలియా 2-1 తేడాతో కైవసం చేసుకున్న విషయం తెలిసిందే. దీంతో టి-20 సిరీస్‌ని దక్కించుకొని ప్రతీకారం తీర్చుకోవాలని సూర్యకుమార్ సేన భావిస్తోంది.

తుది జట్ల వివరాలు:

భారత్: అభిషేక్ శర్మ, శుభ్‌మాన్ గిల్, సూర్యకుమార్ యాదవ్(కెప్టెన్), తిలక్ వర్మ, సంజూ శాంసన్(కీపర్), శివమ్ దూబే, అక్షర్ పటేల్, హర్షిత్ రాణా, కుల్దీప్ యాదవ్, వరుణ్ చక్రవర్తి, జస్ప్రీత్ బుమ్రా.

ఆస్ట్రేలియా: మిచెల్ మార్ష్(కెప్టెన్), ట్రావిస్ హెడ్, జోష్ ఇంగ్లిస్(కీపర్), టిమ్ డేవిడ్, మిచెల్ ఓవెన్, మార్కస్ స్టొయినిస్, జోష్ ఫిలిప్, జేవర్ బర్ట్‌లెట్, నాథన్ ఎల్లిస్, మాథ్యూ కుహ్నేమాన్, జోష్ హేజిల్‌వుడ్.

ఏ ఆటలో అయినా.. క్రీడాస్పూర్తి చాలా ముఖ్యం. మన ఆట మనం ఆడుతూనే.. ప్రత్యర్థి ఆటను కూడా గౌరవించాలి. ప్రత్యర్థులు ఏదైనా ఘనత సాధిస్తే.. దాన్ని అభినందించే మనస్సు ఉండాలి. అంతేకానీ, ఒకరని ఒకరు దూషించుకోవడం.. వాగ్వాదానికి, గొడవకు దిగడం వంటి పనులు చేయకూడదు. అయితే మొదట చెప్పిన అంశాలు దాదాపు అంరూ పాటిస్తారు.. ఎవరో కొందరు మాత్రం రెండోసారి చెప్పిన విధంగా ప్రవర్తిస్తుంటారు. అయితే యువ క్రికెటర్ రుతురాజ్ గైక్వాడ్ చేసిన ఓ పనికి సోషల్‌మీడియాలో ప్రశంసల వర్షం కురిపిస్తున్నారు.

ప్రస్తుతం రంజీ ట్రోపీ జరుగుతున్న విషయం తెలిసిందే. రుతురాజ్, పృథ్వీ షాలు మహారాష్ట్ర తరఫున ఆడుతున్నారు. ఛండీగఢ్‌తో జరిగిన మ్యాచ్‌లో పృథ్వీ డబుల్ సెంచరీ (222) చేయగా.. రుతురాజ్ సెంచరీతో (116) చెలరేగడడంతో ఛంఢీగడ్‌పై మహారాష్ట్ర 144 పరుగుల తేడాతో గెలిచింది. ఈ మ్యాచ్ అనంతరం ప్రేయర్ ఆఫ్ ది మ్యాచ్ అవార్డును రుతురాజ్‌కి ఇచ్చారు. అయితే ఈ మ్యాచ్‌లో డబుల్ సెంచరీ చేసిన పృథ్వీ షాను పిలిచి అతడితో కలిసి పంచుకున్నాడు. ప్రస్తుతం ఈ వీడియో సోషల్‌మీడియాలో వైరల్ అవుతోంది. రుతురాజ్ క్రీడాస్పూర్తిని మెచ్చుకుంటూ నెటిజన్లు కామెంట్లు చేస్తున్నారు. 

టీం ఇండియా ప్రస్తుతం ఆస్ట్రేలియాలో పర్యటిస్తోంది. ఆతిథ్య జట్టుతో జరిగిన వన్డే సిరీస్‌ని 2-1 తేడాతో చేజార్చుకున్న భారత్.. ఇప్పుడు టి-20 సిరీస్‌కి సిద్ధమవుతోంది. ఈ రోజు (అక్టోబర్ 29) తొలి టి-20 మ్యాచ్ ప్రారంభం కానుంది. అయితే తన దృష్టిలో వన్డేల్లో టాప్-5 భారత బ్యాటర్ల ఎవరా అనే విషయాన్ని ఆసీస్ మాజీ పేసర్ గ్లెన్ మెక్‌గ్రాత్ వెల్లడించాడు. అయితే ఇందులో టీం ఇండియా క్రికెట్ దిగ్గజం సచిన్ టెండూల్కర్‌కి చోటు కల్పించినప్పటికీ.. టాప్-2 ప్లేస్‌లు మాత్రం ఇప్పటితరం స్టార్లకు ఇచ్చాడు. టాప్-2 లో విరాట్‌కి మొదటి స్థానం, రోహిత్‌కి రెండో స్థానం ఇచ్చిన మెక్‌గ్రాత్.. ఆ తర్వాతి స్థానాల్లో సచిన్, ధోనీ, యువరాజ్ సింగ్‌లకు చోటు కల్పించాడు.

ఈ సందర్భంగా రోహిత్‌పై మెక్‌గ్రాత్ ప్రశంసల వర్షం కురిపించాడు. వన్డే క్రికెట్‌లో రోహిత్ గణాంకాలు చాలా బాగున్నాయని అన్నాడు. ‘‘వన్డేల్లో రోహిత్‌కి మూడు డబుల్ సెంచరీలు ఉన్నాయి. వన్డేల్లో అత్యధిక స్కోర్ 264 రికార్డు కూడా అతడి పేరిటే ఉంది. ఇప్పటివరకు 276 మ్యాచుల్లో 11 వేలకు పైగా పరుగులు చేశాడు. టెస్టులతో పోలిస్తే వన్డేల్లోనే అత్యుత్తమ ఆటతీరు కనబర్చాడు. రోహిత్ ఒక క్లాస్ ప్లేయర్. అందుకే అతడికి రెండో స్థానం ఇచ్చాను. ఇక ఈ లిస్ట్‌లో తొలి ప్లేస్ విరాట్‌కే. అతడిని కాదని మరొకరికి ఇవ్వడం చాలా కష్టం. అతడి స్ట్రైక్‌రేట్, సగటు అద్భుతం’’ అని మెక్‌గ్రాత్ అన్నాడు.

హైదరాబాద్: టీమిండియా-ఆస్ట్రేలియా మధ్య ఐదు టి20ల సిరీస్ జరగనుంది. భారత జట్టు కెప్టెన్ సూర్యకుమార్ బ్యాటింగ్ ఫామ్‌పై ఆందోళన ఉంది. ఈ సంవత్సరం 12 టి20 మ్యాచ్‌లు ఆడాడు కానీ ఒక్క హాఫ్ సెంచరీ కూడా చేయలేదు. ఆసియా కప్‌లో పాకిస్థాన్‌పై చేసిన 47 పరుగులే అత్యధికం కావడం గమనార్హం. అభిషేక్ శర్మ కంటే ముందు టి20ల్లో నంబర్ వన్ బ్యాట్స్‌మెన్‌గా రికార్డులో ఉన్నాడు. ఇప్పుడు ఆ రికార్డులకు అందనంత దూరంలో ఉండిపోయాడు. గత సంవత్సరం ఐపిఎల్‌లో 700 పరుగులు చేసి పర్వాలేదనిపించాడు. ఈ సందర్భంగా సూర్యకుమార్ ఫామ్‌పై అభిషేక్ నాయర్ స్పందించారు. ఆసీస్ పిచ్ కండిషన్, బౌన్స్ తప్పకుండా సూర్యకుమార్ బ్యాటింగ్‌కు అనుకూలంగా ఉంటాయన్నారు.

గత 12 మ్యాచ్‌లలో అతడి పేలవ బ్యాటింగ్ తీరు, ఇప్పటి మ్యాచ్‌లపై పడదు అనుకుంటున్నానని వివరణ ఇచ్చాడు. కొన్ని సార్లు జట్టు విజయాలు వ్యక్తిగత ప్రదర్శనలను కప్పేస్తాయని, ఫలితాల్లో వ్యత్యాసం వచ్చినప్పుడే ప్రశ్నిస్తారని తెలిపారు. టి20ల్లో చాలా సంవత్సరాల పాటు సూర్య నంబర్ వన్ బ్యాట్స్‌మెన్ ఉన్న విషయాన్ని నాయర్ గుర్తు చేశారు. అతడి ఆటతీరు జట్టులో స్క్రూటినీ జరిగి ఉంటుందని భావిస్తున్నానన్నారు. ఆస్ట్రేలియాలో సూర్య రాణిస్తే ఈ సిరీస్ మరింత ఆసక్తికరంగా మారుతుందన్నారు. గత ఐపిఎల్‌లో అతడి ఆటతీరును మర్చిపోకూడదని అభిషేక్ తెలియజేశారు. పాత సూర్యను చూస్తామని బ్యాటింగ్ తోనే సమాధానం చెబుతాడని ధీమా వ్యక్తం చేశారు. 

టీం ఇండియా ఎంపిక విషయంలో ఫాస్ట్ బౌలర్ మహ్మద్ షమీకి బిసిసిఐ సెలక్టర్ల మధ్య ఘర్షణ జరిగిన విషయం తెలిసిందే. షమీ ఫామ్ గురించి తమ వద్ద సమాచారం లేదంటూ.. చీఫ్ సెలక్టర్ అజిత్ అగార్కర్ అనగా.. షమీ తన ఫామ్ గురించి అందరూ చూస్తున్నారని కౌంటర్ ఇచ్చాడు. అయితే తాజాగా షమీ తన ప్రదర్శనతో సెలక్టర్లకు దిమ్మతిరిగే సమాధానం ఇచ్చాడు.

ప్రస్తుతం జరుగుతున్న రంజీ ట్రోఫీలో షమీ బెంగాల్ జట్టు తరఫున ప్రాతినిథ్యం వహిస్తున్నాడు. సీజన్ రెండో మ్యాచ్‌లో బెంగాల్.. గుజరాత్ జట్టుతో పోటీ పడింది. ఈ మ్యాచ్‌లో షమీ ఏకంగా ఎనిమిది వికెట్ల పడగొట్టాడు. ఈ మ్యాచ్‌లో టాస్ గెలిచిన గుజరాత్ బౌలింగ్ ఎంచుకోవడంతో తొలుత బ్యాటింగ్‌కు దిగిన బెంగాల్.. తొలి ఇన్నింగ్స్‌లో 279 పరుగులు చేసి ఆలౌట్ అయింది. అయితే తొలి ఇన్నింగ్స్‌లో గుజరాత్ కేవలం 167 పరుగులకే ఆలౌట్ అయింది. బెంగాల్‌ బౌలర్లలో షాబాజ్‌ అహ్మద్‌ ఆరు వికెట్లు కూల్చగా.. షమీ మూడు, ఆకాశ్‌ దీప్‌ ఒక వికెట్‌ దక్కించుకున్నారు.

112 పరుగుల ఆధిక్యంతో రెండో ఇన్నింగ్స్‌ను ప్రారంభించిన బెంగాల్ ఎనిమిది వికెట్ల నష్టానికి 214 పరుగులు చేసి ఇన్నింగ్స్ డిక్లేర్డ్ చేసింది. తొలి ఇన్నింగ్స్‌ ఆధిక్యంతో కలుపుకొని బెంగాల్.. గుజరాత్‌కు 327 పరుగుల లక్ష్యాన్ని ముందుంచింది. ఈ ఇన్నింగ్స్‌లో చెలరేగిన షమీ గుజరాత్ ఓపెనర్‌ అభిషేక్‌ దేశాయిని డకౌట్‌ చేశాడు. జయమీత్‌ పటేల్‌ (45), విశాల్‌ జైస్వాల్‌ (1), సిద్దార్థ్‌ దేశాయ్‌ (0), అర్జాన్‌ నాగ్వాస్వల్లా (0)లను ఔట్ చేశాడు. దీంతో 10 ఓవర్లలో కేవలం 38 పరుగులు ఇచ్చి ఐదు వికెట్లు తీశాడు. దీంతో 185 పరుగులకే గుజరాత్ ఆలౌట్ అయింది. బెంగాల్ 141 పరుగులతో విజయం సాధించింది. మొత్తానికి ఈ మ్యాచ్‌లో ఎనిమిది వికెట్లు తీసిన షమీ.. తన ఫిట్‌నెస్ గురించి మాట్లాడిన వారందరి నోళ్లు మూయించాడు.

కాన్‌బెర్రా: ఆస్ట్రేలియా పర్యటనలో ఉన్న భారత్ జట్టు 2-1 తేడాతో వన్డే సిరీస్‌ని చేజార్చుకుంది. ఇప్పుడు ఆతిథ్య జట్టుతో టి-20 సిరీస్‌లో తలపడేందుకు సిద్ధమవుతోంది. ఇప్పటివరకూ భారత్, ఆస్ట్రేలియాలు 32 టి-20ల్లో తలపడగా.. 20 మ్యాచుల్లో భారత్, 11 మ్యాచుల్లో ఆస్ట్రేలియా విజయం సాధించాయి. ఒక మ్యాచ్ ఫలితం తేలలేదు. దీంతో భారత్‌ను ఈ సిరీస్‌లో ఎదురుకొనేందుకు ఆసీస్ వ్యూహాలు రచిస్తోంది. ముఖ్యంగా యువ సంచలనం అభిషేక్ శర్మను ఎదుర్కొనేందుకు సిద్ధంగా ఉన్నామని ఆసీస్ కెప్టెన్ మిచెల్ మార్ష్ తెలిపాడు.

కాన్‌బెర్రా వేదికగా బుధవావరం (అక్టోబర్ 29) జరిగే తొలి టి-20కి ముందు మార్ష్ మీడియాతో మాట్లాడుతూ ‘‘అభిషేక్ శఱ్మ అద్భుతమైన నైపుణ్యం ఉన్న ఆటగాడు. ఐపిఎల్‌లోనూ సన్‌రైజర్స్ హైదరాబాద్ తరఫున చక్కగా ఆడాడు. నిజంగా అతడు మాకో ఛాలెంజ్. కానీ, మేం అతణ్ని ఎదుర్కొనేందుకు సిద్ధంగా ఉన్నాం. ప్రపంచంలోని అత్యుత్తమ ఆటగాళ్లతో తలపడి మనల్ని మనం పరీక్షించుకోవాలి’’ అని అన్నాడు. అలాగే జోష్ ఇంగ్లిస్ ఇటీవల జరిగిన న్యూజిలాండ్ సిరీస్‌కి ఇంగ్లిస్ గాయం కారణంగా దూరమయ్యాడు. కానీ, ఇప్పుడు అతడు ఫిట్‌నెస్ సాధించాడని తెలిపాడు. ‘‘జోష్ ఇంగ్లిస్ జట్టుకు అందుబాటులో ఉన్నాడు. అతడు మాకు చాలా ముఖ్యమైన ఆటగాడు. నాలుగో స్థానంలో బ్యాటింగ్‌కు దిగుతాడు’’ అని మార్ష్ వివరించాడు.

టీం ఇండియా స్టార్ ఆటగాడు విరాట్ కోహ్లీ రిటైర్‌మెంట్ గురించి గత కొంతకాలంగా చర్చ జరుగుతోంది. ఇప్పటికే టి-20, టెస్ట్ ఫార్మాట్‌లకు రిటైర్‌మెంట్ ప్రకటించాడు కింగ్ కోహ్లీ. ప్రస్తుతం వన్డే ఫార్మాట్‌లోనే కొనసాగుతున్నాడు. ప్రస్తుతం భారత్ ఆస్ట్రేలియా పర్యటనలో ఉంది. ఈ క్రమంలో జరిగిన వన్డే సిరీస్‌లో తొలి రెండు వన్డేల్లో డకౌట్ అయి నిరాశ పరిచిన కోహ్లీ. చివరి వన్డేలో మాత్రం 74 పరుగులు చేసి నాటౌట్‌గా నిలిచాడు. దీంతో తన ఫామ్ ఇంకా తగ్గలేదని విమర్శకులకు నిరూపించాడు.

అయితే ఈ మ్యాచ్‌లో కోహ్లీ ప్రదర్శన చూసిన సౌతాఫ్రికా దిగ్గజ క్రికెటర్, కోహ్లీ స్నేహితుడు ఎబి డివిలియర్స్ కోహ్లీ రిటైర్‌మెంట్‌పై ఆసక్తికర వ్యాఖ్యలు చేశాడు. కోహ్లీ ఇంకో ఐదేళ్ల పాటు క్రికెట్ ఆడుతాడని తనకు అనిపిస్తుందని ఎబిడి అన్నాడు. తన అభిప్రాయం 2027లో జరిగే వన్డే ప్రపంచకప్ తర్వాత కోహ్లీ అంతర్జాతీయ వన్డేలకు గుడ్ బై చెప్పే అవకాశం ఉందని పేర్కొన్నాడు. ఆ తర్వాత ఐపిఎల్‌లో కొనసాగుతాడని వెల్లడించాడు. మరో ఐదేళ్ల కోహ్లీ మనకు మైదానంలో కనిపిస్తాడని అభిప్రాయపడ్డాడు. ఐపిఎల్ కంటే ప్రపంచకప్ సన్నద్ధతకు చాలా సమయం వెచ్చించాల్సి వస్తుందని డివిలియర్స్ తన యూట్యూబ్ ఛానెల్‌లో తెలిపాడు.

అయితే విరాట్ వంటి ఆటగాడు జట్టులో ఉండటం ఎంతో ముఖ్యమని డివిలియర్స్ పేర్కొన్నాడు. ‘‘జట్టులో కోహ్లీ ఉంటే చాలు.. మిగితా యువ ఆటగాళ్లు మానసికంగా దృఢంగా ఉంటారు. విరాట్, రోహిత్ శర్మ వంటి ఆటగాళ్లు ఇతర ప్లేయర్ల మదిలో ఆత్మ విశ్వాసాన్ని నింపుతారు. మరో విషయం ఏంటంటే.. వారు కొన్నిసార్లు బ్యాట్‌తో మంచి ప్రదర్శన చేయనప్పటికీ.. జట్టుపై తమదైన ముద్ర వేయగలరు’’ అని ఎబిడి అన్నాడు.

ఇటీవలే వెస్టిండీస్‌తో టెస్ట్ సిరీస్‌ పూర్తి చేసుకున్న టీం ఇండియా ప్రస్తుతం ఆస్ట్రేలియా పర్యటనలో ఉంది. ఈ సిరీస్ తర్వాత భారత్ సౌతాఫ్రికాతో రెండు టెస్ట్‌లు, మూడు వన్డేలు, ఐదు టి-20లలో తలపడనుంది. ఈ ప్రతిష్టాత్మక పోరులో భారత్‌తో తలపడే జట్టును సఫారీ క్రికెట్ బోర్డు సోమవారం ప్రకటించింది. కెప్టెన్ టెంబా బవూమా గాయం నుంచి కోలుకోవడంతో సౌతాఫ్రికా అతడి సారథ్యంలో ఈ సిరీస్ బరిలోకి దిగనుంది.

తాజాగా సౌతాఫ్రికా వరల్డ్ టెస్ట్ ఛాంపియన్‌షిప్ 2025-27లో భాగంగా పాకిస్థాన్‌తో తలపడింది. డిఫెండింగ్ ఛాంపియన్స్‌గా బరిలోకి దిగిన సఫారీలు పాక్‌తో జరిగిన తొలి టెస్ట్ మ్యాచ్‌లో ఓటమిని చవిచూశారు. ఆ తర్వాత జరిగిన రెండో టెస్ట్‌లో విజయం సాధించి.. సిరీస్‌ని 1-1గా సమం చేసుకున్నారు. ఇప్పుడు భారత్‌తో తలపడే జట్టులో స్వల్ప మార్పులు చేశారు. ఇక ఆస్ట్రేలియా పర్యటన నుంచి తిరిగి వచ్చిన తర్వాత ఈ సిరీస్ కోసం తలపడే భారత జట్టును బిసిసిఐ ప్రకటించే అవకాశం ఉంది.

టెస్టుల్లో భారత్‌తో తలపడే సౌతాఫ్రికా జట్టు ఇదే:

టెంబా బవుమా (కెప్టెన్‌), ఐడెన్‌ మార్క్రమ్‌, రియాన్‌ రికెల్టన్‌, ట్రిస్టన్‌ స్టబ్స్‌, కైలీ వెరెన్నె, డెవాల్డ్‌ బ్రెవిస్‌, జుబేర్‌ హంజా, టోనీ డీ జోర్జి, కార్బిన్‌ బాష్‌, వియాన్‌ ముల్దర్‌, మార్కో యాన్సెన్‌, కేశవ్‌ మహరాజ్‌, సెనురాన్‌ ముత్తుస్వామి, కగిసో రబడ, సైమన్‌ హార్మర్‌.