Breaking News,క్రీడలు,తాజా వార్తలు

అహ్మదాబాద్: ఐదు టి-20ల సిరీస్‌లో భాగంగా నరేంద్ర మోడీ స్టేడియం వేదికగా సౌతాఫ్రికాతో జరుగుతున్న చివరి టి-20 మ్యాచ్‌లో భారత్ రెండు వికెట్లు కోల్పోయింది. ఈ మ్యాచ్‌లో టాస్ గెలిచిన సౌతాఫ్రికా భారత్‌ను బ్యాటింగ్‌కి ఆహ్వానించింది. దీంతో తొలుత బ్యాటింగ్‌కి దిగిన భారత్‌కి ఓపెనర్లు అభిషేక్ శర్మ, సంజూ శాంసన్లు శుభారంభం అందించారు. తొలి వికెట్‌కి 63 పరుగులు జోడించారు. అయితే బాష్ వేసిన 6వ ఓవర్ నాలుగో బంతికి అభిషేక్(34), కీపర్ డికాక్‌కి క్యాచ్ ఇచ్చి ఔట్ అయ్యాడు. ఆ తర్వాత లిండే వేసిన 10వ ఓవర్‌ తొలి బంతికి శాంసన్(37) క్లీన్ బౌల్డ్ అయ్యాడు. దీంతో 12 ఓవర్లు ముగిసేసరికి భారత్ 2 వికెట్ల నష్టానికి 115 పరుగులు చేసింది. క్రీజ్‌లో తిలక్ వర్మ (34), సూర్యకుమార్(5) ఉన్నారు.

దుబాయ్: అండర్-19 ఆసియాకప్‌ టోర్నమెంట్‌లో భారత తమ విజయ పరంపరని కొనసాగిస్తోంది. శుక్రవారం శ్రీలంకతో జరిగిన సెమీఫైనల్ మ్యాచ్‌లో ఘన విజయం సాధించి.. ఫైనల్స్‌‌కు చేరింది. వర్షం, తడి ఔట్ ఫీల్డ్ కారణంగా ఈ మ్యాచ్‌లో 20 ఓవర్లకు కుదించారు. ఈ నేపథ్యంలో తొలుత బ్యాటింగ్ చేసిన శ్రీలంక 20 ఓవర్లలో 8 వికెట్లు కోల్పోయి 138 పరుగులు చేసింది. శ్రీలంక బ్యాటింగ్‌లో చమిక హీనతిగల(42), విమత్ దిన్సారా(32), సేథ్మికా సెనెవిరత్నే(30) రాణించారు. భారత బౌలింగ్‌లో హెనిల్ పటేల్, కనిష్క్ చౌహాన్ చెరి రెండు, కిషన్ కుమార్ సింగ్, దీపేశ్ దేవేంద్రన్, ఖిలన్ పటేల్ తలో వికెట్ తీశారు.

అనంతరం భారత్ ఆరంభంలోనే రెండు వికెట్లు కోల్పోయింది. 25 పరుగుల స్కోర్ వద్దే కెప్టెన్ ఆయుష్ మాత్రే(7), వైభవ్ సూర్యవంశీ(9) ఔట్ అయ్యారు. ఈ దశలో అరోన్ జార్జ్(58), విహాన్ మల్హోత్రా(61) ఇద్దరు జట్టును గెలిపించే భారాన్ని తమ భుజాలపై వేసుకున్నారు. ఇద్దరు కలిసి 114 పరుగుల భాగస్వామ్యాన్ని జోడించారు. ఈ క్రమంలో ఇరువురు అర్థశతకాలు సాధించారు. దీంతో భారత్ 18 ఓవర్లలో 2 వికెట్లు కోల్పోయి 139 పరుగులు చేసి ఈ మ్యాచ్‌లో విజయం సాధించింది. మరో సెమీ ఫైనల్‌లో బంగ్లాదేశ్‌పై పాకిస్థాన్ విజయం సాధించింది. దీంతో డిసెంబర్ 21న జరిగే ఫైనల్ మ్యాచ్‌లో భారత్, పాకిస్థాన్‌తో తాడోపేడో తేల్చుకోనుంది. 

అహ్మదాబాద్: ఐదు టి-20ల సిరీస్‌లో భాగంగా భారత్-సౌతాఫ్రికా మధ్య నరేంద్ర మోడీ స్టేడియం వేదికగా జరుగుతున్న చివరి టి-20లో సౌతాఫ్రికా టాస్ గెలిచి బౌలింగ్ ఎంచుకుంది. ఈ సిరీస్‌లో తొలి మ్యాచ్‌లో భారత్ విజయం సాధించగా.. రెండో మ్యాచ్‌లో సౌతాఫ్రికా నెగ్గింది. మూడో మ్యాచ్‌లో మళ్లీ భారత్ గెలిచి సిరీస్‌లో 2-1 తేడాతో ఆధిక్యంలో ఉంది. నాలుగో మ్యాచ్ పొగమంచు కారణంగా రద్దైంది. దీంతో ఈ మ్యాచ్ ఇరు జట్లకు కీలకం కానుంది. ఈ మ్యాచ్‌లో గెలిచి సిరీస్‌ను కైవసం చేసుకోవాలని భారత్ భావిస్తుంటే.. ఎలాగైనా ఈ మ్యాచ్‌లో విజయం సాధించి సిరీస్‌ను సమం చేయాలని సౌతాఫ్రికా పట్టుదలతో ఉంది. ఈ మ్యాచ్‌లో భారత్ రెండు మార్పులు చేసింది. కుల్దీప్ స్థానంలో వాషింగ్టన్ సుందర్, గిల్ స్థానంలో సంజూ శాంసన్‌ను జట్టులోకి తీసుకుంది. సౌతాఫ్రికా కూడా ఒక మార్పు చేసింది. నోర్ట్జే స్థానంలో లిండే జట్టులోకి వచ్చాడు.

తుది జట్లు:

భారత్: అభిషేక్ శర్మ, సంజూ శాంసన్, తిలక్ వర్మ, సూర్యకుమార్ యాదవ్(కెప్టెన్), హార్థిక్ పాండ్యా, శివమ్ దూబే, జితేశ్ శర్మ(కీపర్), వాషింగ్టన్ సుందర్, వరుణ్ చక్రవర్తి, జస్ప్రీత్ బుమ్రా, అర్ష్‌దీప్ సింగ్.

సౌతాఫ్రికా: క్వింటన్ డి కాక్(కీపర్), రీజా హెండ్రిక్స్, ఐడెన్ మార్క్రామ్(కెప్టెన్), డెవాల్డ్ బ్రీవిస్, డేవిడ్ మిల్లర్, డోనోవన్ ఫెరీరా, జార్జ్ లిండే, మార్కో జాన్సెన్, కార్బిన్ బాష్, లుంగి ఎన్గిడి, ఒట్నీల్ బార్ట్‌మాన్.

ఇండియన్ ప్రీమియర్ లీగ్ 19వ సీజన్ కోసం కొన్ని రోజుల క్రితమే మినీ వేలం జరిగిన విషయం తెలిసిందే. అబుదాబీ వేదికగా ఈ వేలం జరిగింది. ఈ వేలం పాటలో ఓ ఫ్రాంచైజీ చాలా తెలివిగా వ్యవహరించిందని టీం ఇండియా మాజీ క్రికెటర్ రవిచంద్రన్ అశ్విన్ కితాబిచ్చాడు. ఆ ఫ్రాంచైజీనే రాయల్ ఛాలెంజర్స్ బెంగళూరు. అండర్-19 ఆసియాకప్‌లో ఆడుతున్న కౌశిక్ చౌహాన్, విహాన్ మల్హోత్రాలను కనీస ధర రూ.30 లక్షలకే ఆర్‌బిసి సొంతం చేసుకుంది. అలాగే వెంకటేశ్ అయ్యర్‌ను రూ.7 కోట్లకు కొనుగోలు చేసిన విషయం తెలిసిందే.

‘‘రాయల్ ఛాలెంజర్స్ బెంగళూరు విహాన్ మల్హోత్రా, కౌశిక్ చౌహాన్‌లను రూ.30 లక్షలకే సొంతం చేసుకుంది. ఈ విషయంలో నేను ఆర్‌సిబిని అభినందిస్తున్నా. ఇది ప్రత్యేకమైన ప్రణాళిక. దీనిలో పెద్దగా పోటీ ఉండదు. కౌశిక్ చౌహాన్ అద్భుతాలు చయనున్నాడు. వేలంలో ఆర్‌సిబికి అంత అదృష్టం ఎలా వచ్చింది? గతంలో వెంకటేశ్ అయ్యర్ కోసం వారు పూర్తిగా ప్రయత్నించారు. అప్పుడు కెకెఆర్ వైదొలగి ఉంటే.. ఆర్‌సిబి వేలం అక్కడే ముగిసి ఉండేది. కానీ ఈసారి కెకెఆర్ పర్స్‌లో డబ్బు ఉన్నా.. ఆర్‌సిబి అతడిని రూ.7 కోట్లకు దక్కించుకోగలిగింది. ఆర్‌సిబి మరోసారి అద్భుతమైన వేలం నిర్వహించింది’’ అని అశ్విన్ తన యూట్యూబ్ ఛానల్‌లో అన్నాడు.

కొన్ని రోజుల క్రితమే ఇండియన్ ప్రీమియర్ లీగ్-2026 కోసం మినీ వేలం జరిగిన విషయం తెలిసిందే. ఇందులో కొందరు ఆటగాళ్లకి కాసుల వర్షం కురువగా.. మరికొందరికి నిరాశే మిగిలింది. అలా బంపర్ బోనాంజా దక్కిన ఆటగాళ్లలో ఒకడు ఆస్ట్రేలియా వికెట్ కీపర్-బ్యాట్స్‌మెన్ జోష్ ఇంగ్లిస్. ఐపిఎల్-2026 మినీ వేలంలో ఇంగ్లీస్‌ను ఏకంగా రూ.8.6 కోట్లకు లక్నో సూపర్ జెయింట్స్ జట్టు దక్కించుకుంది. ఇక్కడే అసలు ట్విస్ట్ ఉంది. ఇంగ్లిస్ తన పెళ్లి, హనీమూన్ కారణంగా ఐపిఎల్‌లో కేవలం నాలుగు మ్యాచ్‌లు మాత్రమే ఆడుతానని ముందే ప్రకటించాడు.

ఇంగ్లిస్ వచ్చే ఏడాది ఏప్రిల్‌లో వివాహం చేసుకోనున్నాడు. దీంతో అతడు మూడు లేదా నాలుగు మ్యాచ్‌లు మాత్రమే ఆడుతానని తెలిపాడు. దీంతో అతన్ని పంజాబ్ కింగ్స్ జట్టు రిటైన్ చేసుకోకుండా వదిలేసింది. ఈ విషయంపై పంజాబ్ కింగ్స్ జట్టు కో-ఓవర్ వాడిగా స్పందించారు. ఇంగ్లిస్‌పై ఆయన ఆగ్రహం వ్యక్తం చేశారు. అతడికి ప్రొఫెషనలిజం లేదని మండిపడ్డారు. ఇంగ్లిస్‌ని తొలుత రిటైన్ చేసుకుందామని భావించామని.. కానీ, అతడు రిటెన్షన్ గడువు ముగిసే కేవలం 45 నిమిషాలకు ముందు తన వ్యక్తిగత కారణాలు చెప్పాడని అన్నారు. పెళ్లి, హనీమూన్ కారణంగా కేవలం మూడు మ్యాచ్‌లు మాత్రమే ఆడుతానని అతడు చెప్పాడని, అందుకే అతడిని వదులుకోవాల్సి వచ్చిందని పేర్కొన్నారు.

ఇలా చెప్తూనే ఇంగ్లిస్‌కి వాడియా శుభాకాంక్షలు తెలిపారు. అతడు మంచి ఆటగాడని ప్రశంసించారు. ఆస్ట్రేలియా తరఫున కూడా మెరుగ్గా రాణిస్తున్నాడని.. మరి ఇప్పుడు ఐపిఎల్‌లో అన్ని మ్యాచ్‌లు ఆడుతాడో లేదో చూడాలని అన్నారు. అయితే లక్నో జట్టు భారీ ధర వెచ్చించి ఇంగ్లిస్‌ని కొనుగోలు చేయడంతో అతడు తన హనీమూన్ ప్లాన్‌ని రద్దు చేసుకున్నట్లు తెలుస్తోంది. ఏప్రిల్ 18న అతడి వివాహం జరిగిన వెంటనే అతడు లక్నో క్యాంప్‌కి వస్తాడని సమాచారం. అయినప్పటికీ.. ఐపిఎల్‌ ఆరంభ మ్యాచ్‌లకు అతడు దూరం అయ్యే అవకాశం ఉంది.

సౌతాఫ్రికాకు చావోరేవో

నేడు చివరి టి20

అహ్మదాబాద్: భారత్, సౌతాఫ్రికా జట్ల మధ్య శుక్రవారం అహ్మదాబాద్ వేదికగా చివరి టి20 మ్యాచ్ జరుగనుంది. ఐదు మ్యాచ్‌ల సిరీస్‌లో భారత్ 21 ఆధిక్యంలో కొనసాగుతోంది. ఈ మ్యాచ్‌లోనూ గెలిచి సిరీస్‌ను సొంతం చేసుకోవాలనే పట్టుదలతో బరిలోకి దిగుతోంది. లక్నోలో బుధవారం జరగాల్సిన నాలుగో టి20 మ్యాచ్ పొగమంచు కారణంగా కనీసం టాస్ కూడా పడకుండానే రద్దయ్యింది. ఇలాంటి స్థితిలో సిరీస్‌ను సమం చేయాలంటే ఈ మ్యాచ్‌లో కచ్చితంగా గెలవాల్సిన పరిస్థితి సఫారీ టీమ్‌ను నెలకొంది. ఇక భారత్ ఈ మ్యాచ్‌లో ఓడినా పెద్దగా నష్టం ఉండదు. 22తో సిరీస్ సమంగా ముగుస్తోంది. ఒకవేళ సౌతాఫ్రికా పరాజయం పాలైతే సిరీస్‌ను కోల్పోక తప్పదు. దీంతో తీవ్ర ఒత్తిడిలో కూరుకు పోయింది. ధర్మశాలలో ఘన విజయం సాధించిన భారత్ ఈ మ్యాచ్‌కు సమరోత్సాహంతో సిద్ధమైంది. ఇందులో కూడా గెలిచి సిరీస్‌ను దక్కించుకోవాలనే లక్షంతో ఉంది. అయితే స్టార్ ఆటగాడు శుభ్‌మన్ గిల్ చివరి టి20లో ఆడతాడా లేదా అనే దానిపై ఇంకా స్పష్టత రాలేదు.

ఒకవేళ గిల్ దూరమైతే సంజు శాంసన్‌ను తుది జట్టులోకి తీసుకునే ఛాన్స్ ఉంది. అభిషేక్ శర్మ, సూర్యకుమార్ యాదవ్, హార్దిక్ పాండ్య, తిలక్ వర్మ, శివమ్ దూబె, జితేశ్ శర్మ తదితరులతో భారత బ్యాటింగ్ చాలా పటిష్టంగా ఉంది. అంతేగాక హర్షిత్ రాణా, వరుణ్ చక్రవర్తి, కుల్దీప్, హార్దిక్, అర్ష్‌దీప్ తదితరులతో బౌలింగ్ కూడా బాగానే ఉంది. దీంతో ఈ మ్యాచ్‌లో భారత్ ఫేవరెట్‌గా బరిలోకి దిగుతోంది. సౌతాఫ్రికాలో స్టార్ ఆటగాళ్లకు కొదవలేదు. క్వింటన్ డికాక్, మార్‌క్రమ్, రిజా హెండ్రిక్స్, స్టబ్స్, బ్రెవిస్, జాన్సన్ వంటి మ్యాచ్ విన్నర్లు జట్టులో ఉన్నారు.దీంతో భారత్‌కు గట్టి పోటీ ఎదురైనా ఆశ్చర్యం లేదు. ఇదిలావుంటే ఈ మ్యాచ్‌కు కూడా పొగమంచు ప్రమాదం పొంచి ఉంది. సాయంత్ర వేళ మంచు కురిసే అవకాశాలు అధికంగా ఉన్నాయని వాతావరణ శాఖ హెచ్చరించింది. దీంతో ఈ మ్యాచ్ కూడా సాగుతుందా లేదా అనేది సందేహంగా మారింది.

అబుదాబీ: బుధవారం జరిగిన ఐపిఎల్ మినీ వేలంలో ఇంగ్లండ్ క్రికెటర్ లైమ్ లివింగ్‌స్టోన్‌ని రూ.13 కోట్లు వెచ్చించి సన్‌రైజర్స్ హైదరాబాద్ జట్టు దక్కించుకున్న విషయం తెలిసిందే. ఇదే జోరును అతడు ఇంటర్‌నేషనల్ లీగ్ టి-20లో సత్తా చాటాడు. ఈ లీగ్‌లో అబుదాబీ నైట్‌రైడర్స్ జట్టుకు ప్రతినిధ్యం వహిస్తున్న లైమ్, డెజర్ట్ వైపర్స్‌తో జరిగిన మ్యాచ్‌లో అర్థశతకంతో రాణించాడు.

ఈ మ్యాచ్‌లో తొలుత బ్యాటింగ్ చేసి అబుదాబీ నైట్‌రైడర్స్ జట్టు 20 ఓవర్లలో 5 వికెట్లు కోల్పోయి 181 పరుగులు చేసింది. నైట్‌రైడర్స్ బ్యాటింగ్‌లో లైమ్ 76, షరఫు 39, హేల్స్ 25 పరుగులు చేశారు. ఇక లక్ష్య చేధనలో డెజర్ట్ వైపర్స్ జట్టుకు అద్భుత ఆరంభం లభించింది. హోల్డర్, జమాన్‌లు తొలి వికెట్‌కి 97 పరుగులు జోడించారు. ఈ క్రమంలో హోల్డర్ హాఫ్ సెంచరీ కూడా నమోదు చేశాడు. కానీ, ఆ తర్వాత స్వల్ప తేడాలతో వికెట్లు కోల్పోతూ వచ్చారు. చివరి ఓవర్‌లో 13 పరుగులు కాల్సి ఉండగా. అజయ్ కుమార్ ఆ స్కోర్‌ని డిఫెండ్ చేశాడు. దీంతో డెజర్ట్ వైపర్స్ జట్టు 20 ఓవర్లలో6 వికెట్లు కోల్పోయి 180 పరుగులు చేయడంతో అబుదాబీ నైట్‌రైడర్స్ 1 పరుగు తేడాతో విజయం సాధించింది. బ్యాటింగ్‌లో రాణించిన లైమ్ లివింగ్‌స్టోన్‌కి ప్లేయర్ ఆఫ్ ది మ్యాచ్ అవార్డు లభించింది.

అడిలైడ్: ప్రతిష్టాత్మక యాషెస్ 2025-26లో భాగంగా అడిలైడ్ ఓవెల్ వేదికగా జరుగుతున్న మూడో టెస్ట్ మ్యాచ్‌లో తొలి రోజు ఆట ముగిసింది. ఇప్పటికే ఈ సిరీస్‌లో ఆస్ట్రేలియా రెండు మ్యాచుల్లో విజయం సాధించి ఆధిక్యంలో ఉంది. ఇక మూడో మ్యాచ్‌లో టాస్ గెలిచిన ఆస్ట్రేలియా బ్యాటింగ్ చేసేందుకు ముందుకొచ్చింది. ఈ మ్యాచ్‌ ఇంగ్లండ్‌కి చావో-రేవో తేల్చుకొనే పరిస్థితి వచ్చింది. దీంతో ఇంగ్లండ్ బౌలర్లు కట్టుదిట్టంగా బౌలింగ్ చేశారు. 94 పరుగులకే నాలుగు వికెట్లు పడగొట్టారు. ఐపిఎల్‌లో అత్యధికంగా రూ.25.20 కోట్లకు అమ్ముడుపోయిన కామరూన్ గ్రీన్ ఈ మ్యాచ్‌లో డకౌట్ అయ్యాడు.

ఈ నేపథ్యంలో అలెక్స్ క్యారీ, ఉస్మాన్ ఖవాజాలు కలిసి మ్యాచ్‌ను తమకు అనుకూలంగా మార్చే ప్రయత్నం చేశారు. ఐదో వికెట్‌కి 91 పరుగులు జోడించారు. ఆ తర్వాత ఖవాజా (82) హాఫ్ సెంచరీ చేసి ఔట్ కాగా, క్యారీ మాత్రం పట్టు వదలకుండా బ్యాటింగ్ చేశాడు. ఈ క్రమంలో అతడు సెంచరీ సాధించాడు. అయితే విల్ జాక్స్ బౌలింగ్‌లో క్యారీ(106) ఔట్ అయ్యాడు. అనంతరం బ్యాటింగ్‌కి వచ్చిన జోష్ ఇంగ్లీస్(32) ఫర్వాలేదనిపించినా.. కెప్టెన్ ప్యాట్ కమ్మిన్స్(13) విఫలమయ్యాడు. దీంతో 83 ఓవర్లలో ఆస్ట్రేలియా 8 వికెట్లు కోల్పోయి 326 పరుగులు చేసింది. క్రీజ్‌లో స్టార్క్(33), లైయన్(0) ఉన్నారు. ఇంగ్లండ్ బౌలింగ్‌లో ఆర్చర్ 3, కార్స్, జాక్స్ చెరి రెండు, టంగ్ 1 వికెట్ తీశారు.

దుబాయ్: అండర్‌-19 ఆసియా కప్‌లో భారత్ విజయ పరంపర కొనసాగుతోంది. ఇప్పటికే యుఎఇ, పాకిస్థాన్‌లపై విజయం సాధించిన యువ ఇండియా.. తాజాగా మలేషియాపై భారీ తేడాతో విజయం సాధించింది. ది సెవెన్స్ స్టేడియం వేదికగా.. జరిగిన మ్యాచ్‌లో తొలుత బ్యాటింగ్ చేసిన ఇండియా 50 ఓవర్లలో 7 వికెట్లు కోల్పోయి 408 పరుగులు చేసింది. ఆ తర్వాత భారీ లక్ష్యంతో బరిలోకి దిగిన మలేషియా ఘోరంగా తడబడింది. భారత బౌలర్ల దెబ్బకు విలవిలలాడిపోయింది. హంజా పంగి (35) మినహా మిగితా వాళ్లెవరూ చెప్పుకోదగ్గ స్కోర్ చేయలేదు. మరోసారి దీపేశ్ దేవేంద్రన్ బంతితో విజృంభించాడు. దీంతో మలేషియా 32.1 ఓవర్లో కేవలం 93 పరుగులకే ఆలౌట్ అయింది. ఫలితంగా భారత్ ఈ మ్యాచ్‌లో 315 పరుగుల తేడాతో విజయం సాధించింది. భారత బౌలింగ్‌లో దీపేశ్ 5, ఉద్ధవ్ 2, కిషన్, ఖిలన్, కనిష్క్ తలో వికెట్ తీశారు.

కోల్‌కతా: అర్జెంటీనా ఫుట్‌బాల్ స్టార్ మెస్సీ భారత పర్యటనలో భాగంగా కోల్‌కతాలోని సాల్ట్ లేక్ స్టేడియంలో ఉద్రిక్తతలు చోటు చేసుకున్న విషయం తెలిసిందే. ఈ ఘటనపై బెంగాల్ ప్రభుత్వం దర్యాప్తు చేస్తున్న నేపథ్యంలో కీలక పరిణామం చోటు చేసుకుంది. ఆ రాష్ట్ర క్రీడా శాఖ మంత్రి అరూప్ బిశ్వాస్ తన పదవికి రాజీనామా చేశారు. స్టేడియంలో గందరగోళం నేపథ్యంలో ఆయనపై తీవ్రస్థాయిలో విమర్శలు వస్తున్నాయి. దీంతో ఈ ఘటనపై న్యాయబద్ధంగా దర్యాప్తు జరిగేందుకు వీలుగా తాను రాజీనామా చేస్తున్నట్లు బిశ్వాస్ తెలిపారు. ఈ మేరకు ఆయన తన రాజీనామా లేఖను ముఖ్యమంత్రి మమతా బెనర్జీకి పంపించినట్లు పేర్కొన్నారు.