Breaking News,క్రీడలు,తాజా వార్తలు

జాతీయ స్థాయి ఈఎంఆర్‌ఎస్ క్రీడల్లో…

ఛాంపియన్‌గా నిలిచి చరిత్ర సృష్టించిన తెలంగాణ జట్టు

మన తెలంగాణ / హైదరాబాద్ : నాల్గవ జాతీయస్థాయి ఏకలవ్వ మోడల్ రెసిడెన్షియల్ స్కూల్ (ఈఎమ్‌ఆర్‌ఎస్) క్రీడల్లో తెలంగాణ ఏకలవ్య మోడల్ రెసిడెన్షియల్ స్కూల్స్ జట్టు ఛాంపియన్‌గా నిలిచి చరిత్ర సృష్టించింది. ఒడిశా సుందర్ఘర్‌లోని రూర్కెలాలో నవంబర్ 11 నుండి 15 వరకు 4వ ఎకలవ్య మోడల్ రెసిడెన్షియల్ స్కూల్స్ జాతీయ క్రీడలు జరిగాయి. ఈ క్రీడల్లో తెలంగాణ జట్టు చరిత్ర సృష్టించింది. ఓవరాల్ చాంపియన్, టీమ్ చాంపియన్, వ్యక్తిగత చాంపియన్‌షిప్- మూడు కేటగిరీల్లోనూ విజేతగా నిలిచి అపూర్వ రికార్డు నమోదు చేసింది. ఈ జాతీయ స్థాయిలో తెలంగాణ నుంచి 580 మంది క్రీడాకారులు, 68 మంది ఎస్కార్ట్ టీచర్లు పాల్గొన్నారు. వివిధ విభాగాల్లో అద్భుత ప్రతిభ ప్రదర్శించి రాష్ట్రానికి మూడంకెల పతకాల పంటను అందించారు.

230 పతకాలు – చరిత్రలో తొలిసారి

తెలంగాణ ఈఎమ్‌ఆర్‌ఎస్ విద్యార్థులు మొత్తం 230 పతకాలు సాధించారు. అందులో- 88 బంగారు పతకాలు, 66 వెండి పతకాలు, 76 కాంస్య పతకాలు ఉన్నాయి. మొత్తం 230 మెడల్ సాధించి తెలంగాణ ఓవరాల్ చాంపియన్‌గా నిలిచి ప్రత్యర్థి రాష్ట్రాలపై ఆధిపత్యం చాటింది. జాతీయ స్థాయి క్రీడలకు తెలంగాణ ఈఎమ్‌ఆర్‌ఎస్ కార్యదర్శి కె. సీతా లక్ష్మి హాజరై విద్యార్థులను అభినందించి, మరింత ఉన్నత లక్ష్యాల వైపు దూసుకెళ్లాలని ప్రోత్సహించారు. ప్రతిష్ఠాత్మకంగా జరిగిన ముగింపు కార్యక్రమంలో ఒడిశా ముఖ్యమంత్రి మొహన్ చరణ్ మజ్ఝి, గిరిజన వ్యవహారాల కేంద్ర మంత్రి జువాల్ ఓరం, ఎన్‌ఈఎస్‌టిఎస్ కమిషనర్ అజీత్ కుమార్ శ్రీవాస్తవ ముఖ్య అతిథులుగా పాల్గొన్నారు. వీరు తెలంగాణ బృందం కృషి, క్రమశిక్షణ, అద్భుత ప్రతిభను ప్రశంసించారు. ఈఎంఆర్‌ఎస్ పాఠశాలల్లో క్రీడా మౌలిక సదుపాయాలు, శిక్షణా కార్యక్రమాల బలోపేతానికి తెలంగాణ ప్రభుత్వం కట్టుబడి ఉందని వెల్లడిస్తూ, రాష్ట్రవ్యాప్తంగా ఉన్న అన్ని విద్యార్థులకు, కోచ్‌లకు, సిబ్బందికి ప్రభుత్వం అభినందనలు తెలిపింది. జాతీయ స్థాయిలో సాధించిన ఈ ఘనవిజయం గిరిజన విద్యార్థులకు ప్రేరణగా నిలుస్తూ, క్రీడా రంగంలో తెలంగాణ ప్రతిభకు కొత్త మైలురాయిగా నిలిచింది.

దోహా: ఆసియా కప్ రైజింగ్ స్టార్స్‌లో భారత యువ సంచలనం వైభవ్ సూర్యవంశీ అదరగొడుతున్నాడు. యుఎఇ అండర్‌19తో జరిగిన మ్యాచ్‌లో కేవలం 32 బంతుల్లోనే శతకం సాధించిన వైభవ్.. ఆ మ్యాచ్‌లో 42 బంతుల్లో 144 పరుగులు చేశాడు. ఇందులో 11 ఫోర్లు, 15 సిక్సులు ఉన్నాయి. ఆ తర్వాత పాకిస్థాన్‌ అండర్19తో జరిగిన మ్యాచ్‌లో 28 బంతుల్లో 45 పరుగులు సాధించాడు. ప్రస్తుతానికి రెండు మ్యాచుల్లో కలిపి 189 పరుగులతో టోర్నమెంట్‌లో అత్యధిక పరుగులు చేసిన ఆటగాడిగా వైభవ్ నిలిచాడు. కాగా, మంగళవారం భారత ఏ జట్టు, ఒమన్‌తో తలపడనుంది. ఈ సందర్భంగా వైభవ్‌ని కలుసుకోవడం ఆనందంగా ఉందని ఒమన్ ఆటగాళ్లు ఆర్యన్ బిస్త్, సమయ్ శ్రీవాత్సవ అన్నారు.

‘వైభవ్‌ని కేవలం టివిల్లో చూడటమే.. మరికాసేపట్లో ప్రత్యక్షంగా అతడితో తడపడనున్నాం. మనకు 14 సంవత్సరాల వయసున్నప్పుడు బంతిని అంత దూరం బాదలేం. కానీ, వైభవ్‌ మాత్రం అందుకు మినహాయింపు. అతడు అద్భుతంగా, అలవోకగా సిక్సులు బాదుతున్నాడు’ అని ఆర్యన్ బిస్త్ అన్నాడు.

‘అతన్ని కలవబోతున్నందుకు చాలా ఆనందంగా ఉంది. నేను క్రికెట్‌పై అతడి దృక్పథం ఏంతో తెలుసుకొనేందుకు ఉత్సాహంగా ఉన్నాను. అతడు కేవలం 14 సంవత్సరాల వయసులోనే అంత పెద్ద సిక్సులు కొడుతున్నాడు. నేను అతడిని కలిసి.. మాట్లాడదామని అనుకుంటున్నా’ అని సమయ్ శ్రీవాత్సవ తెలిపాడు.

కోల్‌కతాలో దక్షిణాఫ్రికాతో జరిగిన తొలి టెస్ట్ మ్యాచ్‌ టీం ఇండియా కెప్టెన్ శుభ్‌మాన్ గిల్ గాయపడిన విషయం తెలిసిందే. మెడ గాయంతో విలవిలలాడిన గిల్‌ను ఆస్పత్రిలో చేర్పించి చికిత్స అందించారు. రెండో ఇన్నింగ్స్‌లో గిల్ స్థానంలో రిషబ్ పంత్ కెప్టెన్‌ా వ్యవహరించాడు. అయితే గిల్‌కి పూర్తిగా గాయం నుంచి కోలుకోకపోతే.. రెండో టెస్ట్‌కి కూడా గిల్ దూరమయ్యే అవకాశం ఉంది.

దీంతో గిల్ రెండో టెస్ట్‌లో పాల్గొన పోతే అతడి స్థానంలో రుతురాజ్ గైక్వాడ్‌కి జట్టులోకి తీసుకోవాలని మాజీ క్రికెటర్ ఆకాశ్ చోప్రా అన్నారు. ఇప్పటికే ప్రకటించిన జట్టును ప్రకటించారు కాబట్టి.. రుతురాజ్‌ను ఎలా తీసుకుంటారనే ప్రశ్న వస్తుంది. ‘‘సాయి సుదర్శన్, దేవ్‌దత్ పడిక్కల్ రిజర్వ్‌లో ఉన్నారు. వీరిద్దరు ఎడమ చేతి వాటం బ్యాటర్లు. ఇప్పటికే తుది జట్టులో ఆరుగురు లెఫ్ట్ హ్యాండర్లు ఉన్నారు. ఆ ఇద్దరిలో ఎవరిని తీసుకున్న మొత్తం ఏడుగురు ఎడమచేతి వాటం బ్యాటర్లు అవుతారు. ఇది సమంజసం కాదు’’ అని ఆకాశ్ పేర్కొన్నారు.

అభిమన్యు ఈశ్వరన్, సర్ఫరాజ్ ఖాన్ ఇద్దరు కుడి చేతి వాటం బ్యాటర్లు అయినప్పటికీ.. ఆకాశ్ మాత్రం రుతురాజ్‌కే మద్దతు ఇస్తున్నారు. ‘రుతురాజ్ అద్భుతమైన ఫామ్‌లో ఉన్నాడు. భారత్ ఏ తరఫున వన్డేల్లో పరుగులు రాబడుతున్నాడు. అతడికి రెడ్ బాల్ క్రికెట్‌లో అవకాశం దక్కడం లేదు. రుతురాజ్.. రంజీ దులీప్ ట్రోఫీలో చక్కగా రాణించాడు’’ అని ఆకాశ్ చోప్రా పేర్కొన్నారు.

జపాన్‌లో జరుగుతున్న డెఫ్లింపిక్స్ (బధిర) స్పోర్ట్స్ 10 మీటర్ల ఎయిర్ రైఫిల్ విభాగంలో స్వర్ణ పతకం సాధించి దేశ కీర్తిని చాటిన హైదరాబాద్ షూటర్ ధనుష్ శ్రీకాంత్‌కు ముఖ్యమంత్రి రేవంత్ రెడ్డి అభినందనలు తెలిపారు. సంకల్పం ఉంటే వైకల్యం అడ్డురాదని ధనుష్ నిరూపించి యువ క్రీడాకారులకు స్ఫూర్తిగా నిలిచారని ప్రశంసించారు. స్వర్ణ పతకం సాధించడమే కాకుండా 10 మీటర్ల ఎయిర్ రైఫిల్ విభాగంలో సరికొత్త ప్రపంచ రికార్డును సృష్టించిన ధనుష్ శ్రీకాంత్, భవిష్యత్తులో మరిన్ని రికార్డులను సాధించాలని, ఆత్మవిశ్వాసం, పట్టుదలతో ముందుకు సాగాలని ఆకాంక్షించారు. ప్రభుత్వం అన్ని విధాలుగా అండగా నిలబడుతుందని చెప్పారు. టోక్యోలో ఆదివారం జరిగిన పురుషుల 10 మీటర్ల ఎయిర్‌ రైఫిల్‌ ఈవెంట్‌ ఫైనల్లో ధనుష్ శ్రీకాంత్‌ 252.2తో ప్రపంచ రికార్డు స్కోరు చేసి బంగారు పతకం దక్కించుకున్నాడు. భారత్‌కే చెందిన ముర్తజా వానియా 250.1 స్కోరుతో రజతం పతకం గెలుచుకన్నాడు. రాష్ట్రంలో అమలవుతున్న క్రీడా విధానం ప్రకారం డెఫ్లింక్స్‌లో స్వర్ణం అందుకున్న శ్రీకాంత్‌కు రూ. 1.20 కోట్లు ప్రోత్సాహక బహుమతి కింద ఇవ్వనున్నట్టు రాష్ట్ర క్రీడాశాఖ మంత్రి వాకిటి శ్రీహరి ప్రకటించిన విషయం తెలిసిందే. 

హైదరాబాద్: బౌలింగ్‌కే అనుకూలించే పిచ్‌లు తయారు చేసి టెస్టు క్రికెట్‌ను నాశనం చేస్తున్నారని టీమిండియా మాజీ బౌలర్ హర్బజన్ సింగ్ మండిపడ్డారు. ప్రత్యర్థి బౌలర్లు అద్భుతంగా బౌలింగ్ చేయడంతో బ్యాట్స్‌మెన్లు ఔట్ కాలేదన్నారు. పిచ్ బౌలింగ్‌కు అనుకూలించడంతో బ్యాట్స్‌మెన్లు ఔటయ్యారని చెప్పుకొచ్చారు. సమర్ధుడైన బౌలర్, సమర్థుడైన బ్యాట్స్‌మెన్‌కు గల తేడా ఏంటని అడిగారు. దక్షిణాఫ్రికాతో జరిగిన టెస్టు మ్యాచ్‌లో టీమిండియా మూడో రోజుకే 24 పరుగుల తేడాతో ఓటమిని చవిచూసింది. ఈ నేపథ్యంలో హర్భజన్ సింగ్ మీడియాతో మాట్లాడారు. ఎన్నో సంవత్సరాల నుంచి ఇలాంటి పిచ్‌లు తయారు చేస్తున్నారని, కానీ దీని గురించి ఎవరు మాట్లాడరని దుయ్యబట్టారు. ఎక్కువ వికెట్లు తీసిన జట్టు గెలిచిందని, వికెట్లు తీసిన బౌలర్ గొప్ప క్రికెటర్‌గా మారారని చురకలంటించారు. భారత బ్యాట్స్‌మెన్లు బ్యాటింగ్ చేసిన తీరు తనకు నచ్చలేదని, క్రీజు వదిలి బయటకు వచ్చి బ్యాటింగ్ చేయలేదని విమర్శించారు. స్పీన్ పిచ్‌పై బ్యాటింగ్ ఎలా చేయాలో తెలియడంలేదని ఎద్దేవా చేశారు.

ఈడెన్ గార్డెన్స్‌లో సౌతాఫ్రికా-భారత్ మధ్య జరిగిన తొలి టెస్టులో సపారీలు విజయం సాధించారు. మూడో రోజు మ్యాచ్ ముగియడంతో టెస్టు క్రికెట్ నాశనం చేస్తున్నారని మాజీలు, క్రికెట్ అభిమానులు మండిపడుతున్నారు. స్పిన్‌కు అనుకూలించే పిచ్‌లు తయారు చేయడం మంచిద కాదని క్రికెట్ పండితులు సలహా ఇస్తున్నారు. ప్రత్యర్థులకు వేస్తున్న స్పిన్ ఉచ్చులో పడి భారత జట్టు ఓటమి పాలు అవుతుందని అభిమానులు ఆవేదన వ్యక్తం చేస్తున్నారు.  

కోల్‌కతా: సౌతాఫ్రికాతో జరిగిన తొలి టెస్టులో టీమిండియా ఓటమి అనంతరం భారత మాజీ కెప్టెన్ సౌరవ్ గంగూలీ పలు సూచనలు చేశారు. పాస్ట్ బౌలింగ్ విభాగంలో జస్ప్రీత్ బుమ్రా, మహ్మద్ సిరాజ్‌కు తోడుగా మహ్మద్ షమీని జట్టులోకి తీసుకోవాలన్నాడు. కోచ్ గౌతమ్ గంభీర్ అంటే తనకు చాలా ఇష్టమని, 2011, టి20 ప్రపంచ కప్‌లలో అద్భుతంగా బ్యాటింగ్ చేశాడని కొనియాడారు. భారత్‌లో మంచి పిచ్‌లు ఎంచుకోవాలని సలహా ఇచ్చారు. షమీకి జట్టులోకి చోటు కల్పించడంతో బుమ్రా, సిరాజ్‌పై నమ్మకం కల్పించాలని తెలియజేశారు. భారత బ్యాట్స్‌మెన్లు 300కు పైగా పరుగులు చేస్తేనే విజయం సాధిస్తామన్నారు. గంభీర్ మంచి పిచ్‌లను ఎంచుకోవడంతో పాటు ఆటగాళ్లపై నమ్మకం ఉంచాలన్నారు. టెస్టు మ్యాచ్‌లంటే ఐదు రోజుల్లో గెలవాలి కానీ మూడు రోజుల్లో గెలవడం కాదు అని గంగూలీ చురకలంటించారు. ఈడెన్ గార్డెన్‌లో జరిగిన తొలి టెస్టులో భారత్ 30 పరుగుల తేడాతో ఓటమిని చవిచూసింది. దీంతో కోచ్ గౌతమ్ గంభీర్ నిర్ణయాలపై క్రికెట్ అభిమానులు, మాజీలు మండిపడుతున్నారు. బ్యాట్స్ మెన్లకు బదులుగా వాషింగ్టన్ సుందర్ ను ఎందుకు తీసుకున్నారని క్రికెట్ పండితులు ప్రశ్నిస్తున్నారు. మెయిన్ బ్యాట్స్ మెన్ ను తీసుకుంటే ఈ రోజు భారత్ గెలిచే అవకాశం ఉండేదని వాపోతున్నారు.  భారత బ్యాట్స్‌మెన్లు 124 పరుగుల లక్ష్యాన్ని కూడా చేధించలేకపోయారు. రెండో టెస్టు గౌహతిలో నవంబర్ 22 నుంచి జరగనుంది. 2023లో షమీ టీమిండియా తరపున టెస్టు మ్యాచ్ ఆడాడు. ఇంగ్లాండ్, ఆస్ట్రేలియా సిరీస్‌లకు అతడిని సెలెక్ట్ చేయలేదు. ఈ మధ్యలో జరిగిన రంజీ ట్రోఫీలో షమీ 115 ఓవర్లు వేసి 17 వికెట్లు పడగొట్టిన విషయం తెలిసిందే. 

రాజ్‌కోట్: దక్షిణాఫ్రికా-ఎతో జరిగిన రెండు అధికారిక వన్డే మ్యాచ్‌లో భారత్-ఎ జట్టు 9 వికెట్ల తేడాతో ఘన విజయం సాధించింది. ఈ క్రమంలో మూడు వన్డేల సిరీస్‌ని 2-0 తేడాతో ఒక మ్యాచ్ మిగిలి ఉండగానే కైవసం చేసుకుంది. ఈ మ్యాచ్‌లో తొలుత బ్యాటింగ్‌ చేసిన దక్షిణాఫ్రికా 30.3 ఓవర్లలో 132 పరుగులు చేసి ఆలౌట్ అయింది. ఈ లక్ష్యాన్ని భారత్-ఎ 27.5 ఓవర్లలోనే కేవలం ఒక వికెట్ కోల్పోయి చేధించింది. భారత బ్యాటింగ్‌లో రుతురాజ్ గైక్వాడ్ 68 పరుగులతో కదం తొక్కాడు. అభిషేక్ శర్మ 32, తిలక్ వర్మ 29 పరుగులతో రాణించాడు. హాఫ్ సెంచరీతో జట్టు విజయానికి తొడ్పడిన రుతురాజ్‌కి ప్లేయర్ ఆఫ్ ది మ్యాచ్ అవార్డు లభించింది. ఈ సిరీస్‌లో చివరి మ్యాచ్ నవంబర్ 19న జరగనుంది.

కోల్‌కతా: ఈడెన్ గార్డెన్స్ వేదికగా సౌతాఫ్రికాతో జరిగిన తొలి టెస్ట్ మ్యాచ్‌లో భారత్ 30 పరుగుల తేడాతో ఓటమిపాలైన విషయం తెలిసిందే. 124 పరుగుల లక్ష్య చేధనలో భారత జట్టు 93 పరుగులకే ఆలౌట్ అయింది. దీంతో దాదాపు 15 ఏళ్ల తర్వాత భారత్‌లో సౌతాఫ్రికా టెస్ట్ మ్యాచ్‌లో విజయం సాధించింది. ఈ మ్యాచ్ విజయం తర్వాత వరల్డ్ టెస్ట్ ఛాంపియన్‌షిప్ పాయింట్ల పట్టికలో సౌతాఫ్రికా స్థానం మెరుగుపడింది. ఇప్పటివరకూ డబ్ల్యూటిసిలో మూడు మ్యాచ్‌లు ఆడిన సఫారీలు రెండింట గెలిచి ఒక మ్యాచ్‌లో ఓడిపోయారు. దీంతో 66.67 విజయశాతంతో ఐదో స్థానం నుంచి రెండో స్థానానికి ఎగబాకింది సౌతాఫ్రికా.

ఇక ఈ మ్యాచ్‌లో ఓటమిపాలైన భారత్ మూడో స్థానం నుంచి నాలుగో స్థానానికి పడిపోయింది. డబ్ల్యూటిసిలో ఎనిమిది మ్యాచ్‌లు ఆడిన భారత్, 4 మ్యాచుల్లో గెలిచి, 3 మ్యాచుల్లో ఓడి, ఒక మ్యాచ్‌ డ్రాగా ముగిసింది. దీంతో 54.17 విజయశాతంతో నాలుగో ప్లేస్‌లో స్థిరపడింది భారత్. ఇక 100 విజయశాతంతో ఆస్ట్రేలియా మొదటిస్థానంలో ఉండగా.. శ్రీలంక 66.67 శాతంతో శ్రీలంక మూడో స్థానంలో ఉంది. పాకిస్థాన్ (50.00), ఇంగ్లండ్ (43.33), బంగ్లాదేశ్ (16.67) వరుసగా ఐదు, ఆరు, ఏడు స్థానాల్లో ఉన్నాయి. ఇక వెస్టిండీస్ ఆడిన ఐదు మ్యాచుల్లో ఓడి.. ఎనిమిదో ప్లేస్‌లో ఉంది. న్యూజిలాండ్ ఈ డబ్ల్యూటిసిలో ఇంకా ఒక్క మ్యాచ్ కూడా ఆడలేదు.

హైదరాబాద్: టోక్కో వేదికగా జరుగుతున్న డెఫ్లంపిక్స్‌లో హైదరాబాద్‌కి చెందిన ధనుష్ శ్రీకాంత్ అద్భుత ప్రదర్శన చేశాడు. 10 మీటర్ల ఎయిర్ రైఫిల్ ఈవెంట్ స్వర్ణపతకం సాధించాడు. ఫైనల్స్‌లో 252.2 పాయింట్లు సాధించి అగ్రస్థానంలో నిలిచిన ధనుష్.. తద్వారా డెఫ్లంపిక్స్‌లో 10 మీటర్ల ఎయిర్ రైఫిల్ విభాగం ఫైనల్‌లో అత్యధిక పాయింట్ల సాధించిన షూటర్‌గా రికార్డు సృష్టించాడు. సూరత్‌కు చెందిన షూటర్ మహ్మద్ వానియా 250.1 పాయింట్లతో రెండో స్థానంలో నిలిచి రజత పతాకం సొంతం చేసుకున్నాడు. తద్వారా రెండు పతకాలు భారత్‌నే వరించాయి.

ఈ నేపథ్యంలో ధనుష్ శ్రీకాంత్‌కు తెలంగాణ సర్కార్ భారీ సజరానా ప్రకటించింది. స్పోర్ట్స్ పాలసీ ప్రకారం రూ.1.20 కోట్లు నగదు బహుమతిగా ఇవ్వనున్నట్లు మంత్రి వాకిటి శ్రీధర్ ప్రకటించారు. ఆదివారం (నవంబర్ 16) హన్మకొండ స్పోర్ట్స్ స్కూల్ ప్రారంభంలో ఈ విషయాన్ని వెల్లడించారు.

రాజ్‌కోట్: భారత పర్యటనలో ఉన్న సౌతాఫ్రికా-ఎ జట్టు, భారత-ఎ జట్టుతో రెండు అనధికారిక టెస్టులు, మూడు అనధికారిక వన్డేల సిరీస్‌లో తలపడుతున్న విషయం తెలిసిందే. ఈ క్రమంలో ఇరు జట్ల మధ్య జరిగిన టెస్ట్ సిరీస్ డ్రాగా ముగియగా.. వన్డే సిరీస్‌లో తొలి మ్యాచ్‌లో భారత-ఎ జట్టు విజయం సాధించింది. ప్రస్తుతం జరుగుతున్న రెండో వన్డేలో సఫారీ ఆటగాళ్లకి భారత బౌలర్లు చుక్కలు చూపించారు. ఫలితంగా సఫారీలను స్వల్ప స్కోర్‌కే పరిమితం చేశారు.

ఈ మ్యాచ్‌లో టాస్ గెలిచి బ్యాటింగ్ ఎంచుకున్న దక్షిణాఫ్రికా-ఎ జట్టు 30.3 ఓవర్లలో 132 పరుగులకే ఆలౌట్ అయింది. సౌతాఫ్రికా బ్యాటింగ్‌లో రివాల్డో మూన్సామి (33) టాప్ స్కోరర్‌గా నిలవగా.. డెలానో పోట్గీటర్ 23, డయాన్ ఫారెస్టర్ 22, లువాన్-డ్రే ప్రిటోరియస్ 21, ప్రేనేలన్ సుబ్రాయోన్ 15 పరుగులు చేశారు. భారత బౌలింగ్‌లో నిషాంత్ సింధు నాలుగు వికెట్లు, హర్షిత్ రాణా 3 తీసి సఫారీలను కుప్పకూల్చారు. వీరికి ప్రసిద్ధ్ కృష్ణ 2, తిలక్ వర్మ 1 వికెట్‌తో తమ వొంతు సహకారం అందించారు. ప్రస్తుతం ఇండియా 2 ఓవర్లలో వికెట్ కోల్పోకుండా 15 పరుగులు చేసింది. క్రీజ్‌లో అభిషేక్ శర్మ (12), రుతురాజ్ గైక్వాడ్ (3) ఉన్నారు.