తాజా వార్తలు,రాష్ట్ర వార్తలు

రాష్ట్రంలో జోరుగా ధాన్యం కొనుగోళ్ల ప్రక్రియ

80 లక్షల మెట్రిక్ టన్నుల ధాన్యాన్ని సివిల్ సప్లయ్ ద్వారా

కొనుగోలు చేయాలని లక్ష్యంగా పెట్టుకున్న ప్రభుత్వం

ఇప్పటికే 8,433 కొనుగోలు కేంద్రాలను ఏర్పాటు

డిసెంబర్ 10వ తేదీ నాటికి 51.86 లక్షల మెట్రిక్ టన్నుల ధాన్యం కొనుగోళ్లు

మనతెలంగాణ/హైదరాబాద్: రెండేళ్లలో రైతు సంక్షేమం కోసం ప్రజా ప్రభుత్వం రూ.లక్ష కోట్లకు మించి ఖర్చు చేయడంతో వ్యవసాయ సాగులో తెలంగాణ సరికొత్త రికార్డులు సృష్టించింది. దీంతో సుస్థిర పాలన, రైతులకు లాభం చేకూర్చే విధానాలు, విస్తరణ ఫలితాలతో రాష్ట్రంలో వ్యవసాయం ఏటేటా అంతకంతకు పెరుగుతోంది. అందులో భాగంగా రాష్ట్రంలో ధాన్యం కొనుగోళ్ల ప్రక్రియ ఈసారి జోరుగా పెరుగుతోంది. ఈ వానాకాలంలో రాష్ట్రంలో రికార్డు స్థాయిలో పండించిన ధాన్యంలో 80 లక్షల మెట్రిక్ టన్నుల ధాన్యాన్ని సివిల్ సప్లయ్ ద్వారా కొనుగోలు చేయాలని ప్రభుత్వం లక్ష్యంగా పెట్టుకుంది. అందులో భాగంగా ఎన్నడూ లేని విధంగా రాష్ట్రవ్యాప్తంగా 8,433 కొనుగోలు కేంద్రాలను నెలకొల్పింది. డిసెంబర్ 10వ తేదీ నాటికి 51.86 లక్షల మెట్రిక్ టన్నుల ధాన్యాన్ని ప్రభుత్వం కొనుగోలు చేసింది. కొనుగోలు చేసిన ధాన్యం విలువ మొత్తం రూ.13,661 కోట్లుగా ప్రభుత్వం పేర్కొంది. ఇందులో 26.37 లక్షల మెట్రిక్ టన్నుల దొడ్డు రకం కాగా, 25.49 లక్షల మెట్రిక్ టన్నుల సన్న రకం ధాన్యమని ప్రభుత్వం తెలిపింది.

గత వానాకాలం తరహాలోనే ఈసారి కూడా సన్నాల ఉత్పత్తి పెరిగింది. సన్న ధాన్యం పండించిన రైతులకు క్వింటాల్‌కు రూ.500 అదనపు బోనస్ చెల్లిస్తుండటంతో సన్నరకాల సాగుకు రైతులు మొగ్గుచూపారు. ఇప్పటి వరకు రూ.314 కోట్లు ప్రభుత్వం సన్నాలకు బోనస్‌గా చెల్లించింది. ప్రభుత్వం రైతులకు దన్నుగా నిలుస్తుండడంతో రాష్ట్ర స్థూల ఉత్పత్తి విలువలో (జిఎస్‌విఏ) వ్యవసాయం వాటా 6.7 శాతం పెరిగింది. ప్రస్తుత ధరల ప్రకారం వ్యవసాయ రంగం వాటా గతేడాది రూ.1,00,004 కోట్లు నమోదవ్వగా, 2024-,25 అంచనాల ప్రకారం రూ. 1,06,708లకు చేరింది.

2024,-25 సీజన్‌లో 220.77 లక్షలకు పెరిగిన సాగు విస్తీర్ణం

2023-,24 సీజన్ లో 209.62 లక్షల ఎకరాల్లో అన్ని పంటలు సాగు చేయగా 296.17 లక్షల మెట్రిక్ టన్నుల దిగుబడి వచ్చింది. 2024,-25 సీజన్ లో సాగు విస్తీర్ణం ఏకంగా 220.77 లక్షలకు పెరిగింది. దిగుబడి 320.62 లక్షల మెట్రిక్ టన్నులకు చేరింది. తెలంగాణలో ప్రధాన పంటైన వరి 2023-,24లో 118.11 లక్ష్లల ఎకరాల్లో సాగు చేశారు. 2024,-25లో అది 127.03 లక్షల ఎకరాలకు పెరిగింది. ధాన్యం దిగుబడి 260.88 లక్షల మెట్రిక్ టన్నుల నుంచి ఈ ఏడాది వానాకాలం, యాసంగిలో కలిపి 284.16 లక్షల మెట్రిక్ టన్నులకు పెరిగింది. ధాన్యం ఉత్పత్తిలో తెలంగాణ దేశంలో అగ్రగామిగా నిలిచింది. పత్తి సాగు విస్తీర్ణం ఇంచుమించుగా రెండేళ్లుగా ఒకే తీరుగా ఉంది. రెండేళ్లలో 66.77 లక్షల ఎకరాల్లో వరి సాగు చేయగా గతంలో ఎన్నడూ లేని విధంగా 153 లక్షల టన్నుల దిగుబడి వచ్చింది.

 ఇది రైతు వ్యతిరేక చట్టం

 కార్పొరేట్ కంపెనీల ప్రయోజనాలకు పెద్దపీట వేస్తున్న విత్తన బిల్లును వెంటనే ఆపివేయాలి

 ఎలాంటి ట్రయల్స్ లేకుండా విదేశీ విత్తనాలు దేశంలోకి వచ్చే ప్రమాదం ఉంది

 రైతే కేంద్రంగా, రైతు ప్రయోజనాలే పునాదిగా నూతన విత్తన బిల్లు ఉండాలి

 విత్తనాల అంశంలో రాష్ట్రాల పాత్ర లేకుండా చేస్తున్న ఈ బిల్లును అందరూ వ్యతిరేకించాల్సిన అవసరం ఉంది

 రైతు సంఘాలు, విత్తన నిపుణులు, వ్యవసాయ రంగ నిపుణులు, రాజకీయ పార్టీలతో చర్చ తర్వాతే ఈ బిల్లుపై ముందుకు పోవాలి

 కేంద్ర ప్రభుత్వం ప్రతిపాదించిన విత్తన బిల్లు డ్రాఫ్ట్‌పై పార్టీ తరఫున సుదీర్ఘమైన ఫీడ్‌బ్యాక్ అందించిన కేటీఆర్

మన తెలంగాణ / హైదరాబాద్ : కేంద్ర ప్రభుత్వం ప్రతిపాదిస్తున్న విత్తన బిల్లు డ్రాఫ్ట్‌ను భారత రాష్ట్ర సమితి తీవ్రంగా వ్యతిరేకించింది. కేంద్రం ప్రతిపాదిస్తున్న ఈ విత్తన బిల్లు వలన రైతన్నలకు తీవ్రమైన నష్టం జరుగుతుందని భారత రాష్ట్ర సమితి వర్కింగ్ ప్రెసిడెంట్ కేటీఆర్ అన్నారు. అందుకే కేంద్ర ప్రభుత్వం ప్రతిపాదిస్తున్న ఈ బిల్లును పూర్తిగా ఆపివేసి, రైతన్నలతో, రైతు సంఘాలతో, నిపుణులతో, రాజకీయ పార్టీలతో చర్చ చేసిన అనంతరం ఈ బిల్లుఅంశంపై ముందుకు పోవాలని కేటీఆర్ డిమాండ్ చేశారు. ముఖ్యంగా ఈ బిల్లులో నకిలీ విత్తనాలను కట్టడి చేసే అంశంపై స్పష్టత లేదని, నకిలీ విత్తనాల వల్ల నష్టపోయిన రైతన్నలకు నిర్దిష్ట సమయంలోనే నష్టపరిహారం అందించే అంశంపై గ్యారంటీ లేదని కేటీఆర్ అన్నారు. దీంతో పాటు కార్పొరేట్ కంపెనీలకు అనుకూలంగా విత్తనాల ధరలను నిర్ణయించే విధంగా ఈ బిల్లులో నిబంధనలు ఉన్నాయని, గతంలా విత్తనాల ధరల నిర్ణయంపై రాష్ట్ర ప్రభుత్వానికి అధికారం లేకుండా పోతుందని కేటీఆర్ అన్నారు. నకిలీ విత్తనాల తయారీలో కంపెనీలను బాధ్యులను చేయకుండా, కేవలం అమ్మకదారులను బాధ్యత వహించేలా, కేవలం సప్లై చైన్‌పై నకిలీ విత్తనాల బాధ్యతను ఉంచేలా ఈ చట్టం రూపొందించబడిందని అన్నారు.

మరోవైపు, నకిలీ విత్తనాలకు సంబంధించిన అంశంలో జాతీయ స్థాయిలో ఆయా కంపెనీలను బ్లాక్‌లిస్ట్ చేయడం, భారీ పెనాల్టీలు, కఠిన జైలు శిక్ష వంటి అంశాలకు ఇందులో పెద్దగా ఆస్కారం లేదని కేటీఆర్ అన్నారు. దీంతో పాటు సాంప్రదాయంగా రైతన్నలే విత్తనాలను తయారు చేసుకొని పండించుకునే వ్యవసాయ సాంప్రదాయాలు ఇప్పటికీ అనేక చోట్ల ఉన్నాయని, అయితే ఇలాంటి రైతన్నల సమూహానికి ఈ బిల్లులో ఏమాత్రం రక్షణ లేకుండా పోయిందని అన్నారు. వీటితో పాటు విదేశాల నుంచి నేరుగా ఆయా కంపెనీలు ఎలాంటి విత్తన ట్రయల్స్ లేకుండానే దేశంలో తమ విత్తనాలను అమ్ముకునే విధంగా సులభమైన నిబంధనలు ఉన్నాయని, వీటి వలన దేశీయ విత్తన భద్రత, విత్తన సార్వభౌమత్వం ప్రమాదంలో పడుతుందని కేటీఆర్ అన్నారు. ఈ అంశానికి సంబంధించి రాష్ట్రాలకు, రాష్ట్రంలోని వ్యవసాయ యూనివర్సిటీలకు ఎలాంటి ప్రాధాన్యత లేకుండా చేశారని అన్నారు. దీంతో పాటు ఈ మొత్తం బిల్లు రాష్ట్రాల పరిధిలోని వ్యవసాయ రంగంలో కీలకమైన విత్తనాల అంశంపై కేంద్ర ఆధిపత్యానికి దారితీస్తుందని, స్థానిక పరిస్థితులకు అనుగుణంగా రాష్ట్రాలు సొంత చట్టాలు చేసుకుని ముందుకు పోయే అంశాన్ని బలహీనం చేస్తుందని కేటీఆర్ అన్నారు.

అందుకే రైతే కేంద్రంగా ఉండే విత్తన బిల్లును రూపకల్పన చేయాల్సిన బాధ్యత కేంద్ర ప్రభుత్వంపై ఉందని, ఈ అంశంలో ఈజ్ ఆఫ్ బిజినెస్ పేరుతో కార్పొరేట్ కంపెనీలకు ఆధిపత్యం అప్పగించే ప్రయత్నాలను పక్కన పెట్టాలని కేటీఆర్ తమ పార్టీ తరపున ప్రతిపాదించిన సవరణల్లో పేర్కొన్నారు. దీతో పాటు విత్తన సార్వభౌమత్వం, దేశీయ బయోసేఫ్టీ అంశాలకు ప్రాధాన్యత ఇవ్వాలని, రాష్ట్రాల అంశంపై కేంద్రానికి ఆధిపత్యం ఇవ్వకుండా రూపకల్పన చేయాలని ఈ బిల్లుకు సవరణలు ప్రతిపాదించారు. దీంతో పాటు నకిలీ విత్తనాల వల్ల నష్టపోయిన రైతన్నలకు ఎకరానికి పండే పంటలో గరిష్ఠ ఉత్పత్తి మేరకు నష్టపరిహారం నిర్దిష్ట సమయంలో అందేలా కఠిన నిబంధనలు ఇందులో ఉంచాలని సూచించారు. కేంద్ర ప్రభుత్వం కంపెనీల ప్రయోజనాల కోసం కాకుండా రైతన్నల ప్రయోజనాలకు, వ్యవసాయ సంక్షేమ అభివృద్ధికి ఉపయోగపడేలా అత్యంత పారదర్శకంగా, కఠినమైన నిబంధనలతో కూడిన విత్తన బిల్లును తీసుకురావాల్సిన అవసరం ఉందని కేటీఆర్ సూచించారు. త్వరలోనే ఈ అంశంపై మాజీ వ్యవసాయశాఖ మంత్రి నిరంజన్ రెడ్డి తో పాటు ఎంపీ వినోద్ కుమార్ ఆధ్వర్యంలో పార్టీ తరఫున ఒక రౌండ్ టేబుల్ సమావేశాన్ని ఏర్పాటు చేసి కేంద్రానికి మరిన్ని సూచనలు ఇస్తామని కేటీఆర్ తెలిపారు.

తెలంగాణలో బిజెపి ఎంపిల పనితీరు ఏమాత్రం బాగా లేదు

ప్రతిపక్ష పాత్ర పోషించడంలోనూ పార్టీ నేతలు వైఫలం

మీకంటే అసదుద్దీన్ సోషల్ మీడియా చురుగ్గా ఉంది

బిజెపి గ్రాఫ్ పెరిగే అవకాశం ఉన్నా ఎందుకు పని చేయడం లేదు

బిజెపి తెలంగాణ యూనిట్‌లో వర్గపోరు, ఆదిపత్య పోరే కారణం

ఇద్దరు కేంద్రమంత్రులు ఉన్నా ఎవరి దారి వారిదే

గ్రూపు రాజకీయాలు, సమన్వయ లోపమే కారణం

వెరసి జూబ్లీహిల్స్ ఉప ఎన్నికలో డిపాజిట్ గల్లంతు

ప్రధానికి నివేదికలు అందడంతో అసంతృప్తి వ్యక్తం చేసినట్లు సమాచారం

ఏపిలో చంద్రబాబు పాలన భేష్…ప్రశంసించిన ప్రధాని మోడీ

జగన్, ఆయన సోషల్ మీడియాలో విమర్శలను ధీటుగా తిప్పికొట్టాలని పిలుపు

మన తెలంగాణ/హైదరాబాద్: ప్రధానమంత్రి నరేంద్రమోడీ తెలంగాణ బిజెపి పార్లమెంటు సభ్యులకు క్లాస్ తీసుకున్నారు. రాష్ట్రంలో ఎంపిల పనితీరు ఏ మాత్రం బాగా లేదని, కలిసొచ్చే అవకాశం ఉన్నా పార్టీ కార్యక్రమాలను చురుగ్గా ముందుకు తీసుకెళ్లడం లేదని, ప్రతిపక్ష పాత్ర కూడా చురుగ్గా పోషించడం లేదని అసంతృప్తి వ్యక్తం చేశారు. ఢిల్లీలో ప్రధాని మోడీ గురువారం ఏపీ, తెలంగాణ, అండమాన్ రాష్ట్రాలకు చెందిన బీజేపీ ఎంపీలతో ప్రధాని అల్పాహార విందు సమావేశం నిర్వహించారు. ఈ సందర్భంగా సుమారు అరగంట పాటు ఆయన ఎంపీలతో మాట్లాడారు.

ఆంధ్రప్రదేశ్‌లో ముఖ్యమంత్రి చంద్రబాబుతో కలిసి ముందుకు సాగడం శుభపరిణామమని ప్రధానమంత్రి ప్రశింసించారు. ఏపిలో పరిపాలనపై తనకు మంచి సమాచారం వచ్చిందని, పెట్టుబడులు కూడా ఏపీ వైపు వెళుతుండటం హర్షణీయమని పేర్కొన్న మోడీ అది అభివృద్ధికి సూచిక అని ప్రశంసించారు. ఈ సందర్భంలోనే తెలంగాణ బిజెపి ఎంపిలపై తీవ్ర అసంతృప్తి వ్యక్తం చేసినట్లు తెలిసింది. ‘మీకంటే అసదుద్దీన్ ఓవైసీ బెటర్’ అంటూ వ్యాఖ్యానించిన మోడీ ఒవైసి సోషల్ మీడియా చాలా యాక్టివ్‌గా ఉందని, తెలంగాణ బిజెపి సోషల్ మీడియా ఆ స్థాయికి ఎందుకు చేరుకోవడం లేదని ఎంపిలను ఉద్దేశించి చెప్పడం చర్చనీయాంశంగా మారింది.

గ్రూపు రాజకీయాలు, సమన్వయ లోపం

ఇదిలావుంటే ప్రధాని తెలంగాణ బిజెపి ఎంపిలపై ఈ స్థాయిలో సీరియస్ కావడం వెనుక ఆ పార్టీ రాష్ట్ర నాయకుల పనితీరుపై తీవ్ర అసహనంతో ఉన్నట్లు సమాచారం. పార్టీలో అంతర్గత కుమ్ములాటలు, వర్గవిభేధాలు, గ్రూపు రాజకీయాలను ప్రధాని త్రీవంగా పరిగణించినట్లు చెబుతున్నారు. రాష్ట్రంలో ఎనిమిది మంది ఎంపిలు, ఎనిమిది ఎమ్మెల్యేలు, రాజ్యసభ సభ్యులు, ఎమ్మెల్సీలు ఉన్నా ఆశించిన స్థాయిలో పార్టీ తెలంగాణలో బలపడ్డం లేదన్న ఫీడ్ బ్యాక్‌తో నాయకులపై అసంతృప్తిగా ఉన్నారు. ఇద్దరు కేంద్రమంత్రులు ఉన్నా పార్టీ కార్యకలాపాలు అంతంతమ్రాతంగానే ఉన్నట్లు నివేదికలు అందడంతో ఎంపిలతో మోడీ ఇలా అసంతృప్తి స్వరంతో మాట్లాడినట్లు తెలుస్తోంది. ముఖ్యంగా ఇటీవల జరిగిన జూబ్లీహిల్స్ ఉప ఎన్నికలో బిజెపి డిపాజిట్లు కోల్పోవడాన్ని కూడా ఆ పార్టీ జాతీయ నాయకత్వం తీవ్ర అసంతృప్తితో ఉంది.

ఆంధ్రప్రదేశ్‌తో పోలుస్తూ అక్కడ సమన్వయంతో పని చేసి పార్టీని ముందుకు తీసుకు వెళుతున్నారని, ఇక్కడ ఎందుకు చేయడం లేదంటూ ప్రధాని ఎంపిలను ప్రశ్నించినట్లు చెబుతున్నారు. తెలంగాణ బిజెపి ఎంపిలు ఇకనైనా పద్దతి మార్చుకోవాలని నరేంద్రమోడీ హితబోధ చేశారు. రాష్ట్ర నాయకత్వం ఒక తీరు, కేంద్ర మంత్రులు చెరో తీరు, ఎమ్మెల్యేల గ్రూపు రాజకీయాలు వెరసి రాష్ట్రంలో ఆశించిన స్థాయిలో పార్టీ ముందుకెళ్లడం లేదనే నివేదికలు ప్రధానికి చేరడంతో అసంతృప్తి వ్యక్తం చేసినట్లు చెబుతున్నారు. ఈ నేపధ్యంలోనే రాష్ట్రంలో బిజెపి ప్రతిపక్ష పాత్రను కూడా సమర్థంగా పోషించడం లేదని వ్యాఖ్యానించిన ప్రధాని రాష్ట్ర బిజెపికి మంచి టీమ్‌ను ఏర్పాటు చేసుకుని రాష్ట్ర ప్రభుత్వాన్ని ఎదుర్కోవడానికి ఉన్న సమస్యేంటని ప్రశ్నించినట్లు తెలిసింది. బిజెపి రాష్ట్రంలో గ్రాఫ్ పెంచుకోవడానికి మంచి అవకాశం ఉన్నా ఎందుకు విఫలమవుతున్నారని ప్రశ్నించినట్లు సమాచారం.

ముఖ్యంగా తెలుగు రాష్ట్రాల ఎంపీలు జాతీయ అంశాలపై చురుగ్గా స్పందించాలని, దేశంలోని ఇతర రాష్ట్రాల్లో కూడా పర్యటించి ప్రజా సమస్యలను తెలుసుకోవాలని మోడీ వారికి ఉద్భోధించారు. కేంద్ర ప్రభుత్వ పథకాలను ప్రజల్లోకి తీసుకెళ్లాలని, సోషల్ మీడియాలో చురుగ్గా ఉండాని ప్రధాని ఎంపిలకు దిశానిర్దేశం చేశారు. నిత్యం ప్రజలతో సంబంధాలు కలిగి ఉండాలని, వారి సమస్యల పట్ల సత్వరమే స్పందించాలని హితబోధ చేశారు. ఆంధ్రప్రదేశ్‌లో వైసీపీ అధ్యక్షుడు జగన్, ఆయన పార్టీ సోషల్ మీడియాలో చేస్తున్న విమర్శలను కూడా అంతే ధీటుగా తిప్పికొట్టాలని ప్రధాని మోడీ ఆ రాష్ట్ర బిజెపి ఎంపీలకు దిశానిర్దేశం చేశారు. ఏపీలో బిజెపికి సానుకూల వాతావరణం ఉందని, దానిని కాపాడుకోవాలని ఈ సమావేశంలో బీజేపీ ఎంపీలకు మోడీ కీలక సూచన చేశారు.

 హైదరాబాద్ లోని రాష్ట్రపతి నిలయంలో బస

 17 నుండి 21 వరకు పర్యటన

 సమన్వయంతో పని చేసి విస్తృత ఏర్పాట్లు చేయాలి

 సచివాలయంలో ఉన్నతాధికారులతో సమీక్షించిన రాష్ట్ర ప్రభుత్వ ప్రధాన కార్యదర్శి కె. రామకృష్ణారావు

మన తెలంగాణ / హైదరాబాద్ : శీతాకాల విడిదిలో భాగంగా రాష్ట్రపతి ద్రౌపది ముర్ము ఈనెల 17 నుంచి 21 వరకు హైదరాబాద్ లోని రాష్ట్రపతి నిలయంలో బస చేస్తారని రాష్ట్ర ప్రభుత్వ ప్రధాన కార్యదర్శి కె. రామకృష్ణారావు తెలిపారు. ఐదు రోజులపాటు రాష్ట్రంలో రాష్ట్రపతి పర్యటన నేపథ్యంలో చేపట్టాల్సిన ఏర్పాట్లపై గురువారం డాక్టర్ బి.ఆర్.అంబేద్కర్ రాష్ట్ర సచివాలయంలో ఉన్నతాధికారులతో సమీక్షించారు. రాష్ట్రపతి పర్యటనకు సంబంధిత అధికారులు సమన్వయంతో ప చేసి విస్తృత ఏర్పాట్లు చేయాలని సి.ఎస్. ఆదేశించారు. కేంద్ర ప్రభుత్వ విభాగాలు, రాష్ట్ర ప్రభుత్వ అధికారులు, రాష్ట్రపతి నిలయం అధికారులు సమన్వయంతో ఏర్పాట్లు చేయాలని సూచించారు. పోలీసు శాఖ తగు భద్రతా, ట్రాఫిక్, బందోబస్త్ ప్రణాళికను రూపొందించాలని, అగ్నిమాపక శాఖ అవసరమైన సిబ్బందితో పాటు తగిన అగ్నిమాపక ఏర్పాట్లు, ఫైర్ టెండర్లను ఏర్పాటు చేయాలని, వైద్య, ఆరోగ్యశాఖ వైద్య బృందాన్ని అందుబాటులో ఉంచాలని ఆదేశించారు.

రోడ్డు భవనాల శాఖ విభాగం అవసరమైన బారికేడింగ్‌లు, ఇతర ఏర్పాట్లు చేయాలని, జీహెచ్‌ఎంసీ, పోలీసు శాఖల సమన్వయంతో రోడ్ల మరమ్మతులు చేపట్టాలని, నిరంతర విద్యుత్ సరఫరా ఉండే విధంగా తగు చర్యలు తీసుకోవాలని విద్యుత్ శాఖ అధికారులకు సూచించారు. రాష్ట్రపతి నిలయంలో 24 గంటలు స్నేక్ క్యాచర్ బృందాన్ని అందుబాటులో ఉంచాలని ఆదేశించారు. జీహెచ్‌ఎంసీ సమన్వయంతో రాష్ట్రపతి నిలయం పరిసరాల్లో కోతుల బెడదను ఎదుర్కొనేందుకు ప్రత్యేక బృందాలను నియమించాలని, తేనెటీగలను పట్టుకోవడానికి ముందుస్తు ఏర్పాట్లు చేయాలని జీహెచ్‌ఎంసీ అధికారులను ఆదేశించారు.

ఈ సమీక్షా సమావేశంలో డీజీపీ శివధర్ రెడ్డి, రోడ్లు భవనాల శాఖ ప్రత్యేక ప్రధాన కార్యదర్శి వికాస్ రాజ్, హోమ్ శాఖ ప్రత్యేక ప్రధాన కార్యదర్శి సి.వీ ఆనంద్, హైదరాబాద్ నగర పోలీస్ కమీషనర్ వీసీ సజ్జనార్, ఇంధన శాఖ ముఖ్య కార్యదర్శి నవీన్ మిట్టల్, పొలిటికల్ కార్యదర్శి ఈ. శ్రీధర్, అదనపు డిజిపిలు మహేష్ భగవత్, జీహెచ్‌ఎంసీ కమీషనర్ ఆర్.వి.కర్ణన్, అగ్నిమాపక శాఖ డీజీ విక్రమ్ సింగ్ మాన్, సమాచార పౌర సంబంధాల శాఖ స్పెషల్ కమీషనర్ సీహెచ్. ప్రియాంక, ప్రొటోకాల్ డైరెక్టర్ శివలింగయ్య ఇతర ఉన్నత అధికారులు పాల్గొన్నారు.

 రాహుల్ గాంధీ, ప్రియాంక గాంధీలకు సీఎం రేవంత్ రెడ్డి ఆహ్వానం

 ఢిల్లీలో విలేఖరులతో ముఖ్యమంత్రి 

మనతెలంగాణ/హైదరాబాద్: హైదరాబాద్‌లో జరగబోయే మెస్సీ ఫుట్‌బాల్ కార్యక్రమానికి కాంగ్రెస్ అగ్రనేతలు రాహుల్ గాంధీ, ప్రియాంక గాంధీలను ఆహ్వానించినట్టు సిఎం రేవంత్‌రెడ్డి తెలిపారు. ఢిల్లీ పర్యటన ముగించుకొని హైదరాబాద్ బయలుదేరే ముందు పార్లమెంట్ ఆవరణలో సిఎం మీడియాతో పలు విషయాలపై మాట్లాడారు. ఈ నెల 13వ తేదీన ప్రముఖ ఫుట్‌బాల్ దిగ్గజ క్రీడాకారుడు లియోనల్ మెస్సీ హైదరాబాద్‌కు వస్తున్నారని, ఓ ప్రముఖ సంస్థ ఏర్పాటు చేసిన కార్యక్రమంలో పాల్గొంటారని సిఎం రేవంత్‌రెడ్డి తెలిపారు. తనను కూడా ఒక అతిథిగా ఆ మ్యాచ్‌కు పిలిచారని రేవంత్ రెడ్డి స్పష్టం చేశారు. రాష్ట్ర ప్రభుత్వానికి, మెస్సీ ఫుట్‌బాల్ మ్యాచ్‌కు ఎలాంటి సంబంధం లేదని సిఎం రేవంత్ వెల్లడించారు. ప్రపంచంలోనే ప్రముఖ క్రీడాకారుడు మెస్సీ హైదరాబాద్‌కు వస్తున్నందున ప్రభుత్వం నుంచి పూర్తి సహకారం అందిస్తున్నట్లు ఆయన తెలిపారు. ఢిల్లీలో కలిసిన రాహుల్‌గాంధీ, ప్రియాంకలను కూడా ఈ మ్యాచ్‌కు రావాలని పిలిచినట్లు సిఎం రేవంత్ చెప్పారు. గురువారం సాయంత్రం సిఎం రేవంత్‌రెడ్డి ఢిల్లీ నుంచి తిరిగి హైదరాబాద్‌కు వచ్చారు.

మూడు రోజులపాటు భారత్‌లో మెస్సీ పర్యటన

‘గోడ్ ఇండియా టూర్ 2025’ పేరుతో అర్జెంటీనా ఫుట్ బాల్ దిగ్గజం మెస్సీ మూడు రోజుల పాటు భారత్ లో పర్యటించనున్నారు. ఈ నెల 13,14,15 తేదీల్లో కోల్‌కతా, హైదరాబాద్, ముంబయి, న్యూఢిల్లీ నగరాల్లో పర్యటించబోతున్నారు. ఇందులో భాగంగా 13వ తేదీన కోల్ కతా పర్యటన ముగించుకుని మెస్సీ హైదరాబాద్ చేరుకుంటారు. ఇక్కడ ఉప్పల్ స్టేడియంలో సిఎం రేవంత్ రెడ్డితో కలిసి మెస్సీ ఫుట్‌బాల్ మ్యాచ్ ఆడతారు. మెస్సీ పర్యటన, ప్రముఖుల రాక నేపథ్యంలో పోలీసులు కట్టుదిట్టమైన భద్రతా ఏర్పాట్లు చేస్తున్నారు. ఈనెల 13వ తేదీ శనివారం రోజున సాయంత్రం 4 గంటలకు లియోనల్ మెస్సీ శంషాబాద్ ఎయిర్‌పోర్టుకు చేరుకుంటారు. అక్కడి నుంచి బయలుదేరి ఫలక్‌నుమా ప్యాలెస్‌లో జరిగే కార్యక్రమంలో పాల్గొంటారు. తర్వాత ఉప్పల్ స్టేడియంలో ఏర్పాటు చేసిన మ్యాచ్‌కు ఆయన హాజరవుతారు. కేవలం ఉప్పల్ స్టేడియంలోనే రాచకొండ కమిషనరేట్‌కు సంబంధించిన పోలీసులు సుమారు 2వేల మందితో భారీ బందోబస్తు ఏర్పాట్లు చేస్తున్నారు.

మన తెలంగాణ/హైదరాబాద్ : నటుడు నందమూరి బాలకృష్ణ, దర్శకుడు బోయపాటి శ్రీను కాంబినేషన్‌లో తెరకెక్కిన అంఖడ 2 సినిమాకు భారీ షాక్ తగిలింది. టిక్కెట్ల రేట్లు పెంచుకునేందుకు ప్రభుత్వం ఇచ్చిన జీఓను హైకోర్టు రద్దు చేస్తూ ఆదేశాలు జారీ చేసింది. అఖండ 2 సినిమా టిక్కెట్ల ధరలు పెంపు జీఓను సవాల్ చేస్తూ శ్రీనివాస్ రెడ్డి అనే న్యాయవాది గురువారం హైకోర్టులో లంచ్‌మోషన్ పిటిషన్ దాఖలు చేశారు. ఈ పిటిషన్‌ను జస్టిస్ ఎన్.వి శ్రావణ్ కుమార్ ధర్మాసనం విచారించిది. టికెట్ల ధరల పెంపుతో పాటు ప్రత్యేక షోల నిర్వహణపై ధర్మాసనం విచారణ చేపట్టింది. ఈ క్రమంలో ధర్మాసనం హోం శాఖపై ఆగ్రహాం వ్యక్తం చేసింది. టికెట్ ధరల విషయంలో ఏం జరుగుతుందని హోంశాఖ జీపిని ధర్మాసనం నిలదీసింది. ప్రతి సినిమాకు ధరలు పెంచుకునేందుకు పదేపదే జీఓలు జారీ చేస్తున్నారని అసహనం వ్యక్తం చేసింది. కోర్టు ఆదేశాలంటే లేక్కలేదా అని హోంశాఖపై తీవ్ర ఆగ్రహాం వ్యక్తం చేసింది. టికెట్ ధరల విషయంలో గతంలోనే ధర్మాసనం ఉత్తర్వులు జారీ చేసింది కదా అని ప్రశ్నించింది.

టికెట్ ధరలు పెంచుతూ మెమోలు జారీ చేయడం కోర్టు ధిక్కరణ కాదా అని, ఇలాంటి మెమోలు ఎందుకు జారీ చేస్తున్నారని హోంశాఖ జీపిని ధర్మాసనం అడిగింది. ఈ క్రమంలో హోంశాఖ ప్రత్యేక కార్యదర్శిపై కోర్టు ధిక్కరణ కింద ఎందుకు చర్యలు తీసుకోరాదో చెప్పాలని జీపిని హైకోర్టు ప్రశ్నించింది. ఈ దశలో ప్రభుత్వ న్యాయవాది స్పందిస్తూ హోంశాఖ ప్రత్యేక కార్యదర్శిగా కొత్తగా నియమితులయ్యారని కోర్టు ఆదేశాలపై పూర్తి అవగాహన లేదని జీపి కోర్టుకు తెలిపారు. వాదనలు విన్న ధర్మాసనం అఖండ2 సినిమా ప్రీమియర్ షోతో పాటు టికెట్ ధరలను పెంచుతూ జారీ చేసిన జీఓను రద్దు చేసింది. ఈ క్రమంలో హోంశాఖ, నిర్మాత 14 రీల్స్ ప్లస్, ఫిలిం డెవలప్మెంట్ కార్పోరేషన్‌కు నోటీసులు జారీ చేసింది. తదుపరి విచారణను శుక్రవారానికి వాయిదా వేసింది. కాగా, అఖండ 2 సినిమా ప్రీమియర్ షో, టిక్కెట్ల ధరలు పెంచుకునేందుకు అనుమతిస్తూ హోంశాఖ ఉత్తర్వులు జారీ చేసిన విషయం తెలిసిందే. ఈ జీఓలో గురువారం రాత్రి 8 గంటలకు ప్రీమియర్ షోకు రూ.600 టికెట్ ధరను నిర్ణయించింది. శుక్రవారం నుంచి సింగిల్ స్కీన్‌కు రూ.50, మల్టీప్లెక్స్ థియేటర్లకు రూ.100 అదనంగా పెంచుకునేలా అనుమతిచ్చింది. ఈ టికెట్ల రేట్లు 12, 13, 14 తేదీల్లో మాత్రమే పెంచుకునేలా జీఓలో హోంశాఖ స్పష్టం చేసింది.

అప్పుడు ఓజి ఇప్పుడు అఖండ 2

ఇటీవల కాలంలో సినిమా రేట్ల పెంపు విషయం తీవ్ర దుమారం చెలరేగుతొంది. కొత్త సినిమా విడుదల అవుతన్న క్రమంలో సదరు నిర్మాతలు టిక్కెట్ల ధరలు పెంచాలని ప్రభుత్వాన్ని కోరిన తరుణంలో ప్రభుత్వం ఒక దశలో పది రోజుల పాటు టిక్కెట్ల ధరలు పెంచుకునేందుకు అనుమతి ఇచ్చింది. అయితే ఇష్టారీతిన టిక్కెట్లు ధరలు పెంచుతున్నారంటూ ప్రజల నుండి ఆగ్రహావేశాలు వెల్లువెత్తడం, పలువురు కోర్టులను ఆశ్రయిస్తున్నారు. ఈ నేపథ్యంలో నటుడు పవన్ కళ్యాణ్ నటించిన ఓజి సినిమా విషయంలో సైతం టిక్కెట్ల ధరల పెంచుకునేందుకు ప్రభుత్వం జీఓ జారీ చేసింది. దీన్ని సవాల్ చేస్తూ పలువురు కోర్టును ఆశ్రయించడంతో సదరు జీఓను కోర్టు రద్దు చేసింది. దీన్ని సవాల్ చేస్తూ నిర్మాత, ఫిలిం డెవలెప్‌మెంట్ కార్పొరేషన్‌లు హైకోర్టు డివిజన్ బెంచ్‌ను ఆశ్రయించింది. ఈ క్రమంలో హైకోర్టు డివిజన్ బెంచ్ సింగిల్ బెంచ్ ఉత్తర్వులను రద్దు చేసి ఓజి సినిమాకు టిక్కెట్ల ధరల పెంపునకు గ్రీన్ సిగ్నల్ ఇచ్చింది. ఈ క్రమంలో అఖండ 2 సినిమాపై దాఖలయిన పిటిషన్ విచారణలో హైకోర్టు జీఓ రద్దు చేయడంతో పాటు ఇలా ఎందుకు జీఓలు జారీ చేస్తున్నారంటూ హోం శాఖపై తీవ్ర ఆగ్రహాం వ్యక్తం చేసింది. ఈ నేపథ్యంలో శుక్రవారం సినిమా విడుదలకు సిద్దం కావడం, ఇప్పటికే సినిమా టిక్కెట్లు దాదాపుగా అమ్ముడు కావడంతో కోర్టులో విచారణ కీలకం కానుంది.

మన తెలంగాణ/హైదరాబాద్ : ఫోన్ ట్యాపింగ్ కేసులో ప్రధాన నిందితుడిగా ఉన్న ఎస్‌ఐబి మాజీ చీఫ్ ప్రభాకర్ రావుకు అనూహ్య పరిణామం ఎదురయింది. శుక్రవారం జూబ్లీహిల్స్ పోలీస్ స్టేషన్‌లో సిట్(ప్రత్యేక దర్యాప్తు బృందం) అధికారుల ఎదుట బేషరతుగా లొంగిపోవాలని సుప్రీం కోర్టు ఆదేశించింది. శుక్రవారం ఉదయం 11 గంటలకు జూబ్లీహిల్స్ పోలీస్ స్టేషన్‌లో సిట్ అధికారుల ముందు హాజరు కావాలని ఆయనకు స్పష్టం చేసింది. సిట్ అధికారి ఏసిపి వెంకటగిరి ఎదుట హాజరుకావాలని ప్రభాకర్ రావుకు ధర్మాసనం సూచించింది. ఎస్‌ఐబి మాజీ చీఫ్ ప్రభాకర్ రావు ప్రత్యేక రిలీఫ్, ముందస్తు బెయిల్ రద్దు చేయాలని సిట్ అధికారులు దాఖలు చేసిన పిటిషన్ గురువారం మరోసారి న్యాయమూర్తి జస్టిస్ బి.వి నాగరత్నం, ఆర్.మహదేవన్ లతో కూడిన డివిజన్ ధర్మాసనం విచారణ చేపట్టింది.

ఈ సందర్భంగా ధర్మాసనం కీలక ఆదేశాలు జారీ చేసింది. విచారణ సమయంలో ప్రభాకర్ రావును ఎటువంటి టార్చర్ చేయవద్దంటూ సిట్ అధికారులకు సుప్రీంకోర్టు ధర్మాసనం తెలిపింది. కస్టడి సమయంలో ప్రభాకర్ రావుకు ఇంటి నుంచి భోజనాన్ని తీసుకు వెళ్లేందుకు న్యాయస్థానం అనుమతించింది. మరో వైపు ఈ కేసులో 14 రోజుల పాటు ప్రభాకర్ రావును విచారణకు అనుమతించాలని ప్రభుత్వం తరపు న్యాయవాది సొలిసిటర్ జనరల్ తుషార్ మెహతా వాదించారు. నిందితుడు ప్రభాకర్ రావుకు ప్రత్యేక రక్షణ కల్పిస్తూ విచారణకు సహకరించాలని న్యాయస్థానం చెప్పినా ఆయన దర్యాప్తునకు సహకరించడం లేదని రాష్ట్ర ప్రభుత్వం తరపున హాజరైన సీనియర్ న్యాయవాది సిద్ధార్థ లూథ్రా కోర్టు దృష్టికి తీసుకెళ్లారు. ఐక్లౌడ్ పాస్‌వర్డ్‌లను రీసెట్ చేసి అందులోని వివరాలను దర్యాప్తు అధికారులకు చూపించాలని కోర్టు ప్రభాకర్‌రావుకు చెప్పిందని గుర్తు చేశారు.

కోర్టు ఆదేశాలు ఇచ్చినా ఐదు పాస్‌వర్డ్‌లలో కేవలం రెండు మాత్రమే ప్రభాకర్ రావు రీసెట్ చేశారని, అందులో డేటా ముందే తొలగించారని ధర్మాసనానికి తెలిపారు. ఈ దశలో న్యాయమూర్తి జస్టిస్ బి.వి నాగరత్న స్పందిస్తూ పిటిషనర్‌కు ప్రత్యేక రక్షణ కల్పించడం వల్ల దర్యాప్తునకు ఏ మాత్రం సహకరించడం లేదని రాష్ట్ర ప్రభుత్వం చెబుతోందని దీనిపై సమాధానం చెప్పాలని ప్రభాకర్‌రావు తరపు న్యాయవాది రంజిత్ కుమార్‌ను ప్రశ్నించారు. పిటిషనర్ దర్యాప్తునకు పూర్తిగా సహకరిస్తున్నారని, అందుకు సంబంధించిన పలు విషయాలను వివరిస్తూ అఫిడవిట్ దాఖలు చేసినట్లు న్యాయవాది రంజిత్ కుమార్ కోర్టుకు చెప్పారు. అనంతరం ఈ కేసు తదుపరి విచారణను ఈ నెల 19వ తేదీకి ధర్మాసనం వాయిదా వేసింది.

మన తెలంగాణ/హైదరాబాద్: రాష్ట్ర మంత్రి కొండా సురేఖకు నాంపల్లి ప్రజాప్రతినిధుల కోర్టులో గట్టి ఎదురుదెబ్బ తగిలింది. బిఆర్‌ఎస్ వర్కింగ్ ప్రెసిడెంట్ కెటిఆర్ దాఖలు చేసిన క్రిమినల్ పరువు నష్టం కేసులో నాంపలి కోర్టు మంత్రిపై నాన్-బెయిలబుల్ వారెంట్ జారీ చేసింది. కెటిఆర్ దాఖలు చేసిన పరువు నష్టం కేసు గురువారం విచారణకు రాగా, మంత్రి గైర్హాజరును న్యాయమూర్తి తీవ్రంగా పరిగణించారు. కోర్టు ప్రొసీడింగ్స్‌కు సహకరించకుండా నిరంతరం గైర్హాజరవుతున్న తీరును సీరియస్‌గా తీసుకున్న న్యాయమూర్తి, ఆమెపై నాన్-బెయిలబుల్ వారెంట్ జారీ చేశారు. ఎలాంటి ముందస్తు అనుమతి లేకుండా కోర్టుకు హాజరుకాకపోవడంపై ఆగ్రహం వ్యక్తం చేస్తూ తక్షణమే ఆమెను అరెస్టు చేసి కోర్టు ముందు హాజరుపరచాలని ఆదేశించారు.

కాగా, నటి సమంత విడాకుల వ్యహరంలో కెటిఆర్‌ను ఉద్దేశిస్తూ మంత్రి కొండా సురేఖ సంచలన వ్యాఖ్యలు చేశారు. వీటిని తీవ్రంగా పరిగణించిన కెటిఆర్ మంత్రిపై క్రిమినల్ పరువు నష్టం పిటిషన్ దాఖలు చేసిన సంగతి తెలిసిందే. కాగా, మంత్రి కొండా సురేఖపై న్యాయస్థానం నాన్‌బెయిలబుల్ వారెంట్ జారీ అవాస్తవమని మంత్రి కార్యాలయం ఓ ప్రకటలో వెల్లడించింది. ఫిబ్రవరి 5వ తేదీన హాజరు కావాలని మాత్రమే న్యాయస్థానం తెలిపిందని స్పష్టం చేసింది.

ఉప ముఖ్యమంత్రి భట్టి విక్రమార్క తన సింగరేణి శాఖను సీఎం రేవంత్ టీమ్‌కు స్పాన్సరుగా ఉండడానికి ఎందుకు అంగీకరించారో చెప్పాలని బిజెపి ఎమ్మెల్యే ఏలేటి మహేశ్వర్‌రెడ్డి నిలదీశారు. సిఎం రేవంత్ రెడ్డికి డిప్యూటీ సీఎం భట్టి పూర్తిగా సరెండర్ అయ్యారని విమర్శించారు. భట్టి ఆర్ధిక శాఖ బిల్లుల క్లియరెన్సుకు 30 శాతం కమిషన్లు తీసుకుంటున్నా సీఎం పట్టించుకోవడం లేదని, అందుకే ఇపుడు సీఎం రేవంత్ ఫుట్ బాల్ సరదా కోసం డిప్యూటీ సీఎం తన సింగరేణి శాఖ ద్వారా పూర్తిగా సహకరిస్తున్నారని ఆరోపించారు. తెలంగాణ రైజింగ్ గ్లోబల్ సమ్మిట్‌లో భాగంగానే ఈ ఫుట్ బాల్ ఎగ్జిబిషన్ మ్యాచ్ అని సిగ్గులేకుండా చెప్తున్న మంత్రులు భట్టి విక్రమార్క, శ్రీధర్ బాబు, ఈ ఫుట్ బాల్ మ్యాచ్ తో తెలంగాణ ఎలా రైజింగ్ అవుతుందో చెప్పాలని డిమాండ్ చేశారు. అసలు గ్లోబల్ సమ్మిట్ ప్లానింగ్‌లో ఈ ఫుట్ బాల్ మ్యాచ్ లేనే లేదని తెలిపారు.

కేరళ ప్రభుత్వం ఫుట్ బాల్ ఎగ్జిబిషన్ మ్యాచ్ నిర్వహించడం తమ వల్ల కాదని నిరాకరిస్తే, మెస్సీ ఇండియా టూర్‌ను ప్లాన్ చేసిన ఈవెంట్ ఆర్గనైజేషన్ సీఎం రేవంత్ రెడ్డిని ముంబైలో కలిసి తెలంగాణలో నిర్వహించాలని కోరారు. బీఆర్‌ఎస్ సర్కార్ ఈ కార్ రేసింగ్ ఈవెంట్ ద్వారా ప్రజాధనాన్ని దుర్వినియోగం చేసిందంటున్న రేవంత్ సర్కార్ మరి ఇప్పుడు ఫుట్ బాల్ మ్యాచ్ ఆడడం అంటే ప్రజాధనం దుర్వినియోగం కాదా అని ఏలేటి నిలదీశారు. ఇందుకు సీఎం రేవంత్ రెడ్డి శిక్షార్హుడు కాదా అని వ్యాఖ్యానించారు. ప్రజా ధనాన్ని దుర్వినియోగం చేస్తున్న ప్రభుత్వ వైఖరికి వ్యతిరేకంగా శుక్రవారం హైదరాబాద్ రెడ్ హిల్స్‌లోని సింగరేణి ప్రధాన కార్యాలయం ఎదుట భారతీయ జనతా పార్టీ ఆధ్వర్యంలో నిరసన కార్యక్రమం చేపడతామని తెలిపారు.