జిల్లాలు,తాజా వార్తలు,హైదరాబాద్

జూబ్లీహిల్స్‌లో కాంగ్రెస్ పార్టీకి ఓటు వేస్తే మీ ఇంటికి బుల్డోజర్ వస్తుంది

రాబందు ప్రభుత్వం పోవాలి.. కెసిఆర్ రైతు ప్రభుత్వం రావాలి

బిఆర్‌ఎస్ వర్కింగ్ ప్రెసిడెంట్ కెటిఆర్

మనతెలంగాణ/హైదరాబాద్ : రాష్ట్రంలో పరిపాలన రౌడీ షీటర్ల పాలన అయ్యిందని బిఆర్‌ఎస్ వర్కింగ్ ప్రెసిడెంట్ కెటిఆర్ విమర్శించారు. అలీబాబా దొంగల ముఠాలా పాలన తయారైందని ఎద్దేవా చేశారు. మంత్రి ఒఎస్‌డి తుపాకీతో బెదిరించారని మంత్రి ఇంటికి పోలీసులు వెళ్లారని, మంత్రి బిడ్డ బయటకొచ్చి తుపాకీ ఇచ్చింది రేవంత్ రెడ్డి, రోహిన్ రెడ్డి అన్నారని గుర్తు చేశారు. మంత్రి భర్త తుపాకీ ఇచ్చారని పోలీసులు అంటున్నారని చెప్పారు. తుపాకీ రోహిన్ రెడ్డి పెట్టిండా..సుమంత్ పెట్టిండా..? అని ప్రశ్నించారు. తెలంగాణ భవన్‌లో ఆదివారం హోటల్స్ కార్మిక యూనియన్ నేతలతో కెటిఆర్ సమావేశమయ్యారు.

ఈ సందర్భంగా కెటిఆర్ మాట్లాడుతూ, పలువురు హోటల్స్ కార్మిక నాయకులు బిఆర్‌ఎస్ పార్టీలో చేరారు. వారికి కెటిఆర్ గులాబీ కండువాలు కప్పి పార్టీలోకి సాదరంగా ఆహ్వానించారు. హోటల్‌లో పనిచేసే కార్మికులు బ్రతుకుదెరువు కోసంహైదరాబాద్‌కు వచ్చారని, బిఆర్‌ఎస్ హయాంలో హోటల్ కార్మికులకు ఎలాంటి ఇబ్బంది కలిగించలేదని అన్నారు. లిక్కర్ బాటిల్స్ స్టిక్కర్ కాంట్రాక్టు కోసం సిఎం అల్లుడు,మంత్రి కొడుకు పోటీ పడ్డారని, ఎవరికీ చెప్పలేక ఐ.ఏ.ఎ.స్ రాజీనామా చేశారని ఆరోపించారు. హైదరాబాద్ ప్రజలు కాంగ్రెస్ పార్టీని నమ్మలేదని, ఓఆర్‌ఆర్ లోపల కాంగ్రెస్ పార్టీకి ఒక్క సీటు రాలేదని చెప్పారు.

రెండేళ్లలో రాష్ట్రాన్ని,హైదరాబాద్ నగరాన్ని కాంగ్రెస్ నాశనం చేసిందని ఆగ్రహం వ్యక్తం చేశారు. ఎన్నికల ముందు హామీల్లో కాంగ్రెస్ అర్రాస్ పాట పాడిందని విమర్శించారు. హైడ్రాలో పేదవాళ్లకు మాత్రమే నిబంధనలు ఉంటాయని, పెద్దలకు రూల్స్ ఉండవు అని పేర్కొన్నారు. జూబ్లీహిల్స్ ఉప ఎన్నికలో కాంగ్రెస్ పార్టీకి చురుకు పెట్టాలని, తెలంగాణకు లాభం చేసే తీర్పు ప్రజలు ఇవ్వాలని కోరారు. జూబ్లీహిల్స్‌లో పోటీ చేస్తున్న కాంగ్రెస్ అభ్యర్ధి చరిత్ర మీకు తెలుసు అని, రౌడీషీటర్లు, నేరచరిత్ర, బెదిరింపులకు పాల్పడే వాళ్ళను గెలిపిస్తారా…? అని అడిగారు. కాంగ్రెస్ పార్టీకి ఓటు వేస్తే బుల్డోజర్ మీ ఇంటికి వస్తుందని హెచ్చరించారు. రాబందు ప్రభుత్వం పోవాలి..కెసిఆర్ రైతు ప్రభుత్వం రావాలని ఆకాంక్షించారు.

పదేళ్ల బిఆర్‌ఎస్ ప్రగతి, రెండేళ్ల కాంగ్రెస్ మోసాల పాలన చూసి- జూబ్లీహిల్స్‌లో ఓటు వేయాలని కెటిఆర్ విజ్ఞప్తి చేశారు. షేక్‌పేటలోని రిలయన్స్ జూబ్లీ గేటెడ్ కమ్యూనిటీ అపార్ట్‌మెంట్‌లో జరిగిన సమావేశంలో కెటిఆర్ మాట్లాడారు. రెండు సంవత్సరాలుగా అన్ని వర్గాల ప్రజలను కాంగ్రెస్ మోసం చేసిందని విమర్శించారు. మైనార్టీ ప్రాతినిధ్యం లేని తొలి కాంగ్రెస్ ప్రభుత్వం తెలంగాణలో ఏర్పడిందని పేర్కొన్నారు. కాంగ్రెస్, బిజెపి పార్టీలు కలిసి తెలంగాణలో లోపాయి కారీగా కలిసి పని చేస్తున్నాయని ఆరోపించారు. బలమైన ప్రాంతీయ పార్టీలన్నింటిని కాంగ్రెస్, బిజెపి బీ టీం అంటుందని మండిపడ్డారు. తెలంగాణలో బుల్డోజర్ రాజ్యం నడుస్తుందని అన్నారు. బిజెపితో కలిసి పని చేస్తున్న రేవంత్ రెడ్డి గురించి రాహుల్ గాంధీ సమాధానం చెప్పాలని డిమాండ్ చేశారు. మళ్లీ అధికారంలోకి వస్తామన్న నమ్మకం ముఖ్యమంత్రితో పాటు మంత్రులకు కూడా లేదని పేర్కొన్నారు.

మన తెలంగాణ/హైదరాబాద్ : రాష్ట్ర భవిష్యత్ ను నిర్దేశించే జూబ్లీ హిల్స్ ఉప ఎన్నికలో చారిత్రక తీర్పు ఇవ్వాలని జూబ్లీ హిల్స్ ఓటర్లకు మంత్రి తుమ్మల విజ్ఞప్తి చేశారు. ఆదివారం వెంగళరావు నగర్ డివిజన్ మధురా నగర్ లో ఎన్నికల ప్రచారంలో మంత్రి తుమ్మల నాగేశ్వరరావు పాల్గొని మాట్లాడుతూ.. పదేళ్ల బిఆర్‌ఎస్ పాలనలో హైదరాబాద్ లో విధ్వంసం జరిగిందని,అసెంబ్లీ పార్లమెంట్ ఎన్నికల్లో పరాజయం పాలైన బిఆర్‌ఎస్ కుయుక్తులు ఈ ఉప ఎన్నికలో తిప్పి కొట్టాలని మంత్రి పేర్కొన్నారు. ఈ ఉప ఎన్నికతో బిఆర్‌ఎస్ కథ పరిసమాప్తమవుతుందని మంత్రి తెలిపారు.

మినీ ఇండియా లాంటి హైదరాబాద్ అభివృద్ధికి సిఎం రేవంత్ రెడ్డి విజనరీగా పని చేస్తున్నారని ఉప ఎన్నికలో జూబ్లీ హిల్స్ ఓటర్లు సిఎం రేవంత్ రెడ్డికి మద్దతుగా నిలవాలని మంత్రి కోరారు. నియోజకవర్గంలో స్థానికుడిగా, ప్రజా సమస్యలపై పూర్తి అవగాహన ఉన్న నవీన్ యాదవ్‌ను గెలిపించడంతో జుబ్లీహిల్స్‌ను మరింత అభివృద్ధి చేసుకోవచ్చని మంత్రి తుమ్మల స్పష్టం చేశారు. కాంగ్రెస్ అభ్యర్థి శ్రీ వి. నవీన్ యాదవ్ మాట్లాడుతూ స్థానిక సమస్యలు మాధుర నగర్ కాలనీలోని మౌలిక వసతుల లోపాలను, డ్రైనేజీ, తాగునీటి సమస్యలను పరిష్కరించేందుకు మొదటి ప్రాధాన్యత ఇస్తానని ప్రజలకు హామీ ఇచ్చారు. ఈ కార్యక్రమంలో వర్దన్నపేట ఎంఎల్‌ఏ నాగరాజు, కాంగ్రెస్ సీనియర్ నేత బండి రమేష్ తదితరులు పాల్గొన్నారు.

హైదరాబాద్: చాదర్ఘాట్ కాల్పుల కేసులో విచారణ కొనసాగుతుంది. మరోసారి విక్టోరియా గ్రౌండ్స్లో క్లూస్ టీమ్ దర్యాప్తులో చేస్తోంది. చాదర్‌ఘాట్ విక్టోరియా గ్రౌండ్ కాల్పుల కేసు ఎఫ్ఐఆర్ లో కీలక అంశాలను పొందుపరిచారు. కాల్పుల ఘటనపై సుల్తాన్ బజార్ పోలీసులకు డిసిపి చైతన్య ఫిర్యాదు చేశారు. ఒమర్తో ఉన్న మరో నిందితుడు అన్సారీ కోసం పోలీసులు గాలింపు చర్యలు చేపట్టారు. శనివారం సాయంత్రం సౌత్ ఈస్ట్ డిసిపి చైతన్య గన్ మెన్ పై దాడికి యత్నించిన విషయం తెలిసిందే. దీంతో చైన్ స్నాచర్పై డిసిపి కాల్పులు జరిపారు. వెంటనే రౌడీ షీటర్ ఒమర్ ను ఆస్పత్రికి తరలించారు. అతడి ఆరోగ్య పరిస్థితి విషమంగానే ఆస్పత్రి వర్గాలు వెల్లడించాయి. ఒమర్కు వైద్య పరీక్షలు పూర్తికాగానే ఇవాళ ఒమర్కు వైద్యులు ఆపరేషన్ నిర్వహించనున్నారు. 

కోఠి వద్ద ఓ వ్యక్తి మొబైల్ స్నాచింగ్ చేసి ఆటోలో పారిపోయేందుకు ముగ్గురు నిందితులు ప్రయత్నించారు. ఆటోలో మొత్తం ముగ్గురు పారిపోతుండగా ఒమర్ ను పట్టుకునేందుకు తన గన్ మెన్ మూర్తి ప్రయత్నించాడని డిసిపి తెలిపాడు. ఒమర్ నెట్టడంతో తాము కిందపడిపోయామని, గన్ మెన్ ను కత్తితో పొడిచి చంపేందుకు ఒమర్ ప్రయత్నించడంతో తాను కాల్పులు జరిపానని వివరణ ఇచ్చాడు. ఈ సమయంలో మిగతా ఇద్దరు దొంగలు ఆటోలో పారిపోయారన్నారు. తన గన్ మెన్ ను కాపాడేందుకు కాల్పులు జరిపానని డిసిపి వెల్లడించారు. 

ఫేస్ చూసి మోసపోవద్దు

హైదరాబాద్ సిపి ఫొటోతో సైబర్ నేరస్థుల మోసాలు

నమ్మవద్దని కోరిన సిపి విసి సజ్జనార్

మన తెలంగాణ/ సిటిబ్యూరో: తన ఫొటో పెట్టి సైబర్ నేరస్థులు డబ్బులు వసూలు చేస్తూ మోసాలు చేస్తున్నారని, ఫేస్ చూసి మోసపోవద్దని హైదరాబాద్ పోలీస్ కమిషనర్ విసి సజ్జనార్ కోరారు. సైబర్ నేరస్థులు హైదరాబాద్ పోలీస్ కమిషనర్ విసి సజ్జనార్ ఫొటోను వాట్సాప్ డిపిగా పెట్టుకుని మోసాలు చేస్తున్నారు. కమిషనర్‌కు తెలిసిన వారికి మెసేజ్‌లు పంపి డబ్బులు అడుగుతున్నారు.

ఈ విషయం తెలిసిన పోలీస్ కమిషనర్ విసి సజ్జనార్ తన ఫొటోతో ఉన్న వాట్సాప్ డిపితో వచ్చిన సందేశాలను నమ్మవద్దని, అవి నకలీ ఖాతాలని, మోసపూరితమైనవని, ఇలాంటి మెసేజ్‌లకు స్పందించవద్దని కోరారు. వెంటనే ఆ నంబర్లను బ్లాక్ చేసి సైబర్ క్రైం పోలీసులకు ఫిర్యాదు చేయాలని కోరారు. డబ్బులు అడిగితే పంపవద్దని, నకిలీ వాట్సాప్ ఖాతాల గురించి 1930కి ఫోన్ చేసి ఫిర్యాదు చేయాలని కోరారు.

హైదరాబాద్: పాతబస్తీ ప్రాంతం బండగూడ జాగీర్ సమీపంలోని హైదర్ షాకోట్ లో హిట్ అండ్ రన్ కేసు నమోదైంది. హైదర్ షాకోట్ చౌరస్తా లో కృష్ణ అనే వ్యక్తిని కారు ఢీకొట్టింది. కారు కింద నలిగి కృష్ణా ఘటనా స్థలంలోనే ప్రాణాలు విడిచాడు. డ్రైవర్  కారు ఆపకుండా అతివేగంతో పారిపోయాడు. వాహనదారులు చూస్తుండగా కారు బీభత్సం సృష్టించింది. స్థానికులు కారును పట్టుకొనే ప్రయత్నం చేశారు. గుర్తు తెలియని వ్యక్తి మితిమీరిన వేగంతో కారుతో సహా పారిపోయాడు. స్థానికుల సమాచారం మేరకు పోలీసులు ఘటనా స్థలానికి చేరుకొని కేసు నమోదు చేసి దర్యాప్తు చేస్తున్నారు. స్థానికంగా ఉన్న సిసి కెమెరాలను పోలీసులు పరిశీలిస్తున్నారు. మృతదేహాన్ని శవ పరీక్ష గాంధీ ఆస్పత్రికి తరలించారు. 

 ఈనెల 28వ తేదీ నుంచి 30వ తేదీ వరకు విక్రయం

 రాజీవ్ స్వగృహ కార్పొరేషన్ నిర్ణయం

మన తెలంగాణ/హైదరాబాద్: రంగారెడ్డి జిల్లా కుర్మల్‌గూడ, తొర్రూర్, మేడ్చల్ జిల్లా బహదూర్‌పల్లి ప్రాంతాల్లోని రాజీవ్ స్వ గృహ కార్పొరేషన్‌కు సంబంధించి మొత్తం 167 ఓపెన్ ప్లాట్‌లకు ఈనెల 28వ తేదీ నుంచి 30వ తేదీ వరకు ఈ -వేలం నిర్వహించనున్నారు. తొర్రూర్‌లో 200 నుంచి 500 చదరపు గజాల విస్తీర్ణంలోని 120 ప్లాట్లకు, కుర్మల్‌గూడలో 200 నుంచి -300 చదరపు గజాల విస్తీర్ణంలోని 29 ప్లాట్లు, బహదూర్‌పల్లిలోని 200 నుంచి 1,000 చదరపు గజాల విస్తీర్ణంలోని 18 ప్లాట్లను ఈ -వేలం ద్వారా విక్రయించనున్నారు. ఈ ప్రాంతాల్లోని ప్లాట్లకు గతంలో బహిరంగ వేలం నిర్వహించగా ప్రస్తుతం ఈ–వేలం ద్వారా విక్రయించాలని అధికారులు నిర్ణయించారు. కుర్మల్ గూడ, బహదూర్ పల్లిలోని ప్లాట్ల రిజిస్ట్రేషన్ కు ఆఖరు తేదీ అక్టోబరు 27వ తేదీ కాగా, అక్టోబరు 28వ తేదీ ఉదయం, మధ్యాహ్నాం సమయాల్లో ఈ-వేలం నిర్వహించనున్నారు. 

ఓఆర్‌ఆర్ బౌండరీ, మూసీనది వెడల్పును..

ఆదిత్య భూమి సరిహద్దును.. నిర్ధారించండి

బఫర్ జోన్‌లో నిర్మాణాలు వస్తున్నాయి

నాలా ఏర్పాటు చేయకుండానే కట్టడాలు

లేఖలో వివరించిన కమిషనర్ రంగనాథ్

మనతెలంగాణ, సిటీబ్యూరో: మూసీ సదిని ఆక్రమించి నిర్మాణాలు చేపట్టడంపై హైడ్రా సీరియస్‌గా పరిగణిస్తుంది. ప్రకృతిపరంగా ప్రవహిస్తున్న నదిలో ఆక్రమణలు చేపట్టడంపై హైడ్రా కమిషనర్ ఏవి రంగనాథ్ ఉపేక్షించేది లేదంటూనే మూసీని ఆక్రమించినట్టుగా వచ్చిన ఆరోపణలపై ఆయన స్పందించారు. ఈమేరకు గండిపేట్ మండల తహాశీల్దార్‌కు ఈ నెల 22నసరిహద్దులను ఫిక్స్ చేయాల్సిందిగా లేఖ రాశారు. ఆ లేఖలో మంచిరేవుల గ్రామ రెవెన్యూ పరిధిలోని సర్వే నెం. 476 సరహద్దులతో పాటు ఔటర్ రింగ్ రోడ్ సరిహద్దును నిర్దారించాలని సూచించారు.

ఈ క్రమంలోనే శ్రీఆదిత్య నిర్మాణంపై స్థానిక ప్రజలతో పాటు ప్రజాప్రతినిధుల నుండి కూడా ఫిర్యాదులు అందుతున్న నేపథ్యంలో ఆ సంస్థ చేపడుతున్న నిర్మాణ స్థలాన్ని, అక్కడ నది వెడల్పును, ఔటర్ రింగ్ రోడ్ బౌండరీని కూడా నిర్థారించాలని కమిషనర్ రంగనాథ్ ఆలేఖలో సూచించారు. హైడ్రా పరిశీలనలో మంచిరేవుల గ్రామం సర్వే నెం. 476లో నాలా ఆక్రమణలు జరిగినట్టు, నదిని పూడ్చినట్టు, ఓఆర్‌ఆర్ ప్రాజెక్టులో పోయిన భూమిని నది తీరాన్ని కబ్జా చేయడం ద్వారా లబ్దిపొందినట్టు గుర్తించినట్టు హైడ్రా భావించినట్టు లేఖలో పేర్కొన్నది.

నాలా నిర్మించకుండానే.. నిర్మాణాలు..

డేమ్(డీఈఎం) వివరాల ప్రకారం.. శ్రీఆదిత్య కేడియా రియల్టర్ సంస్థ చేపట్టిన భవన నిర్మాణం మూసీ నది పాయలు కలిపే 0.37 ఎకరాల వాగును ఆక్రమించినట్టుగా తెలుస్తుంది. ఈ ప్రదేశంలో నదిని వెడల్పును 23 మీటర్లు. నది బఫర్ జోన్ కూడా భవన నిర్మాణం ద్వారా 0.48 ఎకరాల విస్తీర్ణంలో ఆక్రమించినట్టుగా వెల్లడవుతోంది. నాలా (వాగు) సగటు వెడల్పు 16 మీ.లు ముస్కిన్ చెరువు/నాగిరెడ్డి కుంట నుండి ఈ నాలా వస్తూ కోకాపేట, నార్సింగి పరివాహక ప్రాంతం మీదుగా మూసీకి వస్తోంది. బిల్డర్లు ప్రస్తుతమున్న నాలాను మళ్లించాలనుకుంటే.. వారు నీటిపారుదల శాఖ మార్గదర్శకాల ప్రకారం బిల్డర్ తన సొంత ఖర్చులతో భూమిని తీసుకుని కొత్త నాలాను ఏర్పాటు చేయాలి.

నీటిపారుదల అధికారులు 08-10-2021న బిల్డర్‌కు జారీ చేసిన ఎన్‌ఓసి ప్రకారం ఓఆర్‌ఆర్ ఈ నాలాను ఏర్పాటు చేసిన అనంతరమే నిర్మాణాలు చేపట్టాలని స్పష్టంచేయడం జరిగింది. కానీ, శ్రీఆదిత్య కేడియా రియల్టర్లు అన్ని షరతులను ఉల్లంఘించి, కొత్త వరద నీటి కాలువను పూర్తి చేయకుండానే ప్రాజెక్టు నిర్మాణాన్ని ప్రారంభించారు. 16 మీటర్ల వెడల్పున్న నాలాను మూసివేయడం వల్ల ఇటీవలి వర్షాలలో కోకాపేట, నార్సింగి ప్రాంతాలలో వరదలు సంభవించాయి. అని లేఖలో కమిషనర్ రంగనాథ్ లేవనెత్తారు.

ఆక్రమణలు..

నేషనల్ రిమోట్ సెన్సింగ్ సెంటర్ డీఈఎం డేటా ప్రకారం, మూసీ నదిని శ్రీ ఆదిత్య కేడియా రియల్టర్స్ 2.34 ఎకరాల విస్తీర్ణాన్ని ఆక్రమించింది. హెచ్‌ఎంసి మంజూరు చేసిన బిల్డింగ్ పర్మిషన్‌లో బఫర్ జోన్‌గా చూపించారు. కానీ, డీఈఎం డేటా ప్రకారం అక్కడ 3.03 ఎకరాల భూమి ఆక్రమణలకు గురైందనీ, బఫర్ జోన్‌లో భవన నిర్మాణాలు వస్తున్నాయని కమిషనర్ పేర్కోన్నారు. సర్వే ఆఫ్ ఇండియా టోపో-షీట్ ప్రకారం, మూసీ నది ప్రాంతం 1.77 ఎకరాల వరకు. మూసీనది బఫర్ జోన్ 2.58 ఎకరాల వరకు ఆక్రమణకు గురైందని రంగనాథ్ తెలిపారు.

సర్వే నెం. 476లోనూ భూముల వివరాలలో తేడాలున్నాయి. ఆసర్వే నెంబర్‌లోని భూములు, వాటి సరిహద్దులను నిర్ధారించాలని గండిపేట్ తహాశీల్దార్‌కు హైడ్రా కమిషనర్ రంగనాథ్ సూచించారు.

మన తెలంగాణ/విద్యానగర్: బలహీన వర్గాలకు 42 శాతం రిజర్వేషన్లు చట్టపరంగానే ఇవ్వాలని బిసి సంక్షేమ సంఘం జాతీయ అధ్యక్షుడు, రాజ్యసభ సభ్యుడు అర్ కృష్ణయ్య డిమాండ్ చేశారు. రాజకీయ పార్టీలు ఇచ్చే కోటాతో బడుగులకు ఎలాంటి ప్రయోజనం ఉండదని వ్యాఖ్యానించారు. ఈ మేరకు బుధవారం ముఖ్యమంత్రికి ఆయన ఒక లేఖ రాశారు. గురువారం జరిగే కేబినెట్ భేటీలో స్థానిక సంస్థల్లో 42 శాతం రిజర్వేషన్లకు సంబంధించిన స్పష్టత ఇవ్వాలని కోరారు.

పార్టీ పరంగా బిసిలకు 42 శాతం రిజర్వేషన్లు ఇవ్వాలనే ఆలోచనలు ప్రభుత్వం చేస్తున్నట్టు తమకు సమాచారం ఉందని చెప్పిన ఆయన ఈ తరహా వాటాతో బలహీన వర్గాలకు సరైన న్యాయం జరగదని అభిప్రాయపడ్డారు. ఎవరి భిక్షం వద్దని, చట్టబద్ధంగానే బిసిల జనాభా ఎంతో అంతా వాటా ఇవ్వాలని డిమాండ్ చేశారు. రిజర్వేషన్ల అంశం కోర్టులో పరిధిలో ఉందని, మరో రెండు నెలల్లో తీర్పు రానుండగా తొందరపాటు నిర్ణయాలు ఎందుకని ప్రశ్నించారు. బిసి సంఘాల జెఎసి ఆధ్వర్యంలో ఈనెల 18వ తేదీన జరిగిన రాష్ట్ర బంద్ చారిత్రాత్మకమని, అన్ని పార్టీలు, అన్నివర్గాలు బంద్‌కు మద్దతు ఇచ్చాయని గుర్తు చేశారు.

బిసిల డిమాండ్ న్యాయమైనదని, బంద్ తీవ్రతను పాలకులు గుర్తించాలన్నారు. స్థానిక సంస్థలలో బిసిలకు ఇచ్చిన రిజర్వేషన్లకు రాజ్యాంగబద్ధమైన చట్టబద్ధత, న్యాయబద్ధత ఉందని అన్నారు. ఆర్టికల్ 243- డి-6 ప్రకారం రిజర్వేషన్లు నిర్ణయించే అధికారం రాష్ట్ర ప్రభుత్వానికి ఉందన్నారు. జనాభా లెక్కలు తీసి అసెంబ్లీలో చట్టం చేసినందున, వాస్తవాలను న్యాయస్థానం దృష్టికి తీసుకెళ్ళే ప్రయత్నం చేయాలని సూచించారు. గతంలోనూ సుప్రీంకోర్టు అనేక తీర్పులలో జనాభా లెక్కలు ఉంటే రిజర్వేషన్లు పెంచవచ్చని చెప్పినందున 42 శాతం చట్టబద్ధ రిజర్వేషన్ల కోసం అవసరమైన చర్యలు తీసుకోవాలని ఆ లేఖలో ముఖ్యమంత్రికి ఆయన విజ్ఞప్తి చేశారు.

రాజేంద్రనగర్ పోలీస్ స్టేషన్ పరిధిలోని హనుమాన్ నగర్ బస్తీ వద్ద రోడ్డు దాటుతున్న దినకర్ (44)ను కారు ఢీకొట్టడంతో తీవ్రంగా గాయపడి మృతి చెందాడని స్థానికులు ఈరోజు తెలిపారు. హోటల్లో పని ముగించుకుని ఇంటికి వెళ్తుండగా ఈ దుర్ఘటన జరిగిందన్నారు.స్థానికులు ఆంబులెన్స్ లో ఆసుపత్రికి తరలించగా అతడు అప్పటికే మృతిచెందినట్లు డాక్టర్లు తెలిపారు.కేసు నమోదు చేసిన రాజేంద్రనగర్ పోలీసులు డ్రైవర్ను అరెస్ట్ చేశారు.