జాతీయ వార్తలు,తాజా వార్తలు

న్యూఢిల్లీ: మద్రాస్ హైకోర్టు జడ్జి జిఆర్ స్వామినాథన్‌పై అభిశంసనకు డిఎంకె చేస్తున్న ప్రయత్నాలను తీవ్రంగా ఖండిస్తూ 56 మాజీ జడ్జీలు శుక్రవారం ఒక సంయుక్త ప్రకటన విడుదల చేశారు. తమిళనాడు లోని మధురై పర్వత ప్రాంతంపై ఆరోశతాబ్దానికి చెందిన తిరుప్పరన్ కుండ్రం సుబ్రహ్మణ్యస్వామి ఆలయం, ఆ ప్రాంగణం లోనే 14 వ శతాబ్దానికి చెందిన దర్గా ఉన్నాయి. ఈ నేపథ్యంలో ఆలయం కింద ఉన్న స్తంభం వద్ద కార్తీక దీపోత్సవం నాడు భక్తులు దీపం వెలిగించడం వందల ఏళ్లుగా ఆనవాయితీగా వస్తోంది. అయితే డిసెంబర్ 1న ఈ అంశానికి సంబంధించి దాఖలైన పిటిషన్లపై విచారణ జరిపిన మధురై బెంచ్ జడ్జి జస్టిస్ స్వామినాథన్ , కింద ఉన్న స్తంభంలో కాకుండా

ఆలయం పైన ఉన్న స్తంభంపైనే దీపం వెలిగించాలని తీర్పు ఇచ్చారు. ఈ తీర్పుపై ప్రభుత్వం, ఆలయ నిర్వాహకులు అభ్యంతరం లేవదీశారు. ఆలయం వద్ద దీపాలు వెలిగిస్తే మతపరమైన ఉద్రిక్తతలు తలెత్తుతాయని ప్రభుత్వం కోర్టు దృష్టికి తెచ్చినా కోర్టు అంగీకరించలేదు. దీంతో డిఎంకె నేతృత్వం లోని అనేక మంది ఎంపీలు లోక్‌సభ స్పీకర్ ఓం బిర్లాకు ఆ జడ్జీని తొలగించాలని కోరుతూ తీర్మానం చేశారు. దీనిపై 56 మంది మాజీ జడ్జీలు శుక్రవారం తీవ్ర నిరసన తెలియజేస్తూ జడ్జి స్వామినాథన్‌కు మద్దతుగా ప్రకటన విడుదల చేశారు. అభిశంసన నిర్ణయం న్యాయవ్యవస్థను బెదిరించడమేనని, ఇది ప్రజాస్వామ్యానికి అత్యంత ప్రమాదకరమని పేర్కొన్నారు. అభిశంసనను న్యాయవ్యవస్థ స్వేచ్ఛను కాపాడడానికి ఉపయోగించాలే కానీ , రాజకీయ ఒత్తిడికి కాదని వారు ప్రకటనలో పేర్కొన్నారు. 

భారత జనాభా లెక్కలు 2027 నిర్వహణ కోసం కేంద్ర ప్రభుత్వం రూ. 11,718 కోట్లు ఆమోదించిందని కేంద్ర మంత్రి అశ్విని వైష్ణవ్ శుక్రవారం నాడు వెల్లడించారు. ప్రధాని నరేంద్రమోదీ అధ్యక్షతన కేంద్ర కేబినెట్ శుక్రవారం నాడు సమావేశమై పలు కీలక నిర్ణయాలు తీసుకుంది. జనాభా లెక్కల నిర్వహణ ప్రతిపాదనకు కేబినెట్ ఆమోదం తెలిపింది. మొట్టమొదటి సారిగా 2027లో డిజిటల్ పద్ధతిలో జనాభా లెక్కల గణన నిర్వహిస్తారని కేంద్ర సమాచార, ప్రసారాల శాఖ మంత్రి అశ్విని వైష్ణవ్ విలేకరుల సమావేశంలో తెలిపారు.

జనాభా గణన రెండు దశల్లో నిర్వహించబడుతుంది.తొలివిడతలో ఇళ్లలెక్కలు, తర్వాత జనాభా లెక్కలు చేపడతారు. 2026 ఏప్రిల్ నుంచి సెప్టెంబర్ వరకూ గృహాల లెక్కలు, 2027 ఫిబ్రవరిలో జనాభా గణన (పాపులేషన్ ఎన్యూమరేషన్ ) చేపడతారు. కేంద్రపాలిత ప్రాంతాలైన జమ్మూకశ్మీర్, లడఖ్, హిమాచల్ ప్రదేశ్, ఉత్తరాఖండ్ వంటి మంచు ఎక్కువ కురిసే ప్రాంతాలలో జనాభా గణన 2026 సెప్టెంబర్ లో నిర్వహిస్తారు. 20 లక్షల సిబ్బంది తో జనాభా లెక్కల సేకరణ చేపట్టనున్నారు. ఈసారి జనాభా లెక్కల సేకరణలో ఎలక్ట్రానిక్ పద్ధతిలో కులగణన డేటా కూడా సేకరిస్తారు. డేటా సేకరణ కోసం మొబైల్ యాప్ వినియోగించుకుంటారు. సెంట్రల్ పోర్టల్ మానిటరింగ్ వ్యవస్థ ద్వారా పర్యవేక్షణ కార్యక్రమం సాగుతుంది.

రాయ్‌పూర్: మావోయిస్టుల లొంగుబాటు కొనసాగుతోంది. తాజాగా మరో 10 మంది నక్సలైట్లు పోలీసుల ముందు లొంగిపోయారు. శుక్రవారం ఛత్తీస్‌గఢ్‌లోని సుక్మా జిల్లాలో ఆరుగురు మహిళలు సహా కనీసం 10 మంది నక్సలైట్లు లొంగిపోయారని పోలీసులు తెలిపారు. లొంగిపోయిన వారి తలపై రూ. 33 లక్షల రివార్డు ఉన్నట్లు పోలీసులు తెలిపారు. ఈ సంవత్సరం జిల్లాలో మొత్తం 263 మంది మావోయిస్టులు హింసను విరమించుకుని లొంగిపోయారని పోలీసు సూపరింటెండెంట్ కిరణ్ చవాన్ చెప్పారు. కాగా, లొంగిపోయిన వారిలో మావోయిస్టుల కంపెనీ ప్లాటూన్ కమాండర్ మిదియం భీమా(30) రూ. 8 లక్షల రివార్డును ప్రకటించారు. గంగా కుంజం (22), లేకం రామ, తాటి సోని (32), శాంతి సోధి (21) ఒక్కొక్కరికి రూ. 5 లక్షల రివార్డును ప్రకటించారు, మద్వి నవీన్ (20), మద్వి రుక్ని (24), ఓయం మంగ్లీ (22), పోడియం మంగి (20), మద్వి గంగి (19) ఒక్కొక్కరికి రూ.1 లక్ష రివార్డును ప్రకటించారు.

న్యూఢిల్లీ ః దేశ రాజధాని ఢిల్లీ ఇతర ప్రధాన నగరాలు కాలుష్య వాయువుల కాసారంతో కొట్టుమిట్టాడుతున్నాయని లోక్‌సభలో ప్రతిపక్ష నేత రాహుల్ గాంధీ ఆందోళర వ్యక్తం చేశారు. శుక్రవారం ఆయన కాలుష్య అంశాన్ని ప్రస్తావించారు. ఇది మనిషి మనుగడకు సంబంధించిన విషమ పరిస్థితి. దీనిపై వెంటనే లోక్‌సభలో చర్చ జరగాలని పట్టుపట్టారు. జీరో అవర్‌లో ఆయన ఈ విషయాన్ని లేవనెత్తారు. ఢిల్లీనే కాదు పలు పట్టణాలలో దట్టమైన కాలుష్య పొగమంచు తెరలు కమ్ముకుని ఉన్నాయి. ప్రజలకు శ్వాస తీసుకోవడం కష్టం అవుతోందని ఆయన తెలిపారు. ఈ విషయం సిద్ధాంతపరమైనది లేదా రాజకీయభరితం అయినది కాదని తెలిపారు. దీనిపై పరస్పర దూషణలకు తావులేకుండా చర్చకు వీలు కల్పించాలని కోరారు.

ప్రతిపక్షాలు, అధికార పక్షం దీనిపై చర్చించి సవ్యమైన పరిష్కారానికి వీలు అయ్యే విధంగా వ్యవహరించాలని సూచించారు. ఈ విషయంపై పార్లమెంట్‌లో సమగ్ర వివరణాత్మక చర్చ జరిగితేనే సవ్యమైన పరిష్కారానికి వీలేర్పడుతుందని స్పష్టం చేశారు. ప్రజల జీవనం చిక్కులు లేకుండా చేసేందుకు రంగంలోకి దిగాల్సి ఉంది. ప్రధాని మోడీ స్పందించాలి. ప్రతి నగరానికి విడిగా పద్థతి ప్రకారం , కాలుష్య నివారణ కార్యాచరణ అమలు చేయాల్సి ఉందన్నారు. వచ్చే 5 నుంచి 10 సంవత్సరాల పాటు సాగే చర్యలతోనే వాయు కాలుష్య సమస్యకు పరిష్కారం దక్కుతుందని అన్నారు. పార్లమెంటరీ వ్యవహారాల మంత్రి కిరెణ్ రిజిజూ దీనపై స్పందించారు. కాలుష్య సమస్యపై చర్చకు ప్రభుత్వం సిద్ధం అని, లోక్‌సభ నిర్వహణ వ్యవహారాల కమిటీ (బిఎసి) దీనిపై సమయం ఖరారు చేస్తుందని వెల్లడించారు.

న్యూఢిల్లీ : శుక్రవారం రాజ్యసభలో విచిత్ర పరిస్థితి ఏర్పడింది. సభలో కేబినెట్ మంత్రులు ఎవరూ లేకపోవడంతో పది నిమిషాల పాటు రాజ్యసభ కార్యకలాపాఉ నిలిపివేయాల్సి వచ్చింది. 2001 డిసెంబర్ 13న పార్లమెంట్‌పై ఉగ్రవాదుల దాడిని విఫలం చేస్తూ వీరోచితంగా పోరాడి ప్రాణాలు వదిలిన భద్రతా సిబ్బందికి సభ ముందుగా నివాళులు అర్పించింది. తరువాత ప్రతిపక్ష ఎంపిలు కొందరు లేచి సభలో కేబినెట్ మంత్రులు ఎవరూ లేరని సభాధ్యక్షులకు తెలిపారు. దీనితో స్పందించిన ఛైర్మన్ సిపి రాధాకృష్ణన్ సభను పది నిమిషాల పాటు నిలిపివేశారు. జూనియర్ మంత్రులు వెంటనే స్పందించి సీనియర్లు సభకు వచ్చేలా చూడాలని కోరారు. ఐదు నిమిషాలు గడిచినా ఫలితం లేకుండా పోవడంతో సభను పది నిమిషాలు వాయిదా వేశారు. 

పనాజి: గోవా నైట్‌క్లబ్ అగ్నిప్రమాదంపై ముమ్మరంగా దర్యాప్త జరుగుతోంది. ఈ కేసులో ప్రధాన నిందితులు క్లబ్ యజమానులు సౌరభ్ లూధ్రా, గౌరవ్ లూధ్రాలను థాయ్‌లాండ్‌లో అదుపులోకి తీసుకున్నారు. అక్కడి అధికారులు వారిని అదుపు లోకి తీసుకున్న దృశ్యాలు వెలుగు లోకి వచ్చాయి. ఈనెల 6 న రాత్రి 11.45 గంటల సమయంలో ప్రమాదం చోటు చేసుకోగా, నిందితులిద్దరూ 7న ఉదయం 5.30 గంటలకు ఓ విమానంలో థాయ్‌లాండ్ లోని ఫుకెట్‌కు పారిపోయినట్టు ముంబై లోని బ్యూరో ఆఫ్ ఇమిగ్రేషన్ గుర్తించినట్టు ఇప్పటికే పోలీసులు తెలిపారు. వారి పాస్‌పోర్టులు సస్పెండ్ అయిన నేపథ్యంలో ఆ దేశంలో ఉండటం చట్టవిరుద్ధం. దాంతో అధికారులు వారిని అదుపు లోకి తీసుకున్నారు. వారిని 24 గంటల్లో భారత్‌కు తరలించే అవకాశం ఉందని సంబంధిత వర్గాలు వెల్లడించాయి. గోవా లోని బిర్క్ బై రోమియో లేన్ నైట్ క్లబ్‌లో చోటు చేసుకున్న అగ్నిప్రమాదంలో 25 మంది మృతి చెందిన సంగతి తెలిసిందే.

ఢిల్లీ నుంచి గోవాకు సహ యజమాని అజయ్‌గుప్తా తరలింపు

గోవా క్లబ్ దుర్ఘటన కేసులో సహ యజమాని అజయ్ గుప్తాను దర్యాప్తు కోసం ఢిల్లీ పోలీసులు గోవాకు తీసుకు వచ్చారు. జమ్ముకు చెందిన గుప్తాను బుధవారం ఉదయం ఢిల్లీ లోని అడిషనల్ చీఫ్ జ్యుడీషియల్ మెజిస్ట్రేట్ వినోద్ జోషి ముందు హాజరు పరిచారు. 36 గంటల ట్రాన్సిట్ రిమాండ్‌లో ఉంచడానికి పోలీసులకు మెజిస్ట్రేట్ అనుమతించడంతో గోవా పోలీసులు మోపా మనోహర్ ఇంటర్నేషనల్ విమానాశ్రయంలో గుప్తాను తీసుకుని బుధవారం రాత్రి 9.45 గంటలకు దిగారు. ఆ తరువాత విచారణ కోసం అంజునా పోలీస్ స్టేషన్‌కు తీసుకెళ్లారు. అంతకు ముందు గుప్తాకు వ్యతిరేకంగా లుక్ అవుట్ సర్కులర్ జారీ అయింది. ఈ కేసుకు సంబంధించి ఐదుగురు మేనేజర్లు, స్టాఫ్ సభ్యులు, ఇప్పటివరకు అరెస్ట్ అయ్యారు. 

న్యూఢిల్లీ : భారత ప్రధాని నరేంద్ర మోడీ గురువారం అమెరికా అధ్యక్షులు డొనాల్డ్ ట్రంప్‌తో ఫోన్ లో మాట్లాడారు. భారత్ అమెరికా మధ్య వాణిజ్య , సుంకాల ఉద్రిక్తత, అనిశ్చితత నెలకొన్న తరుణంలోనే ఇరువురు నడుమ సంభాషణ జరిగింది. ఇరుదేశాల మధ్య సమగ్ర భాగస్వామ్య ఒప్పందం ఖరారు విషయంలో పురోగతి గురించి మోడీ ప్ర స్తావించారు. అన్ని రంగాల్లోనూ పరస్పర సహకా రం ఇనుమడిస్తోందని ఇరువురు నేతలు సంతృప్తి వ్యక్తం చేసినట్లు వెల్లడైంది. రష్యా అధ్యక్షులు పుతి న్ భారత్ పర్యటన తరువాత ట్రంప్‌తో ప్రధాని మోడీ మాట్లాడటం ఇదే తొలిసారి. తామిరువురం అన్నిన అంశాలపై మాట్లాడుకున్నట్లు ఆ తరువాత ప్రధాని మోడీ ఎక్స్ సామాజిక మాధ్యమం ద్వారా స్పందించారు.

ఉభయదేశాల మధ్య సంబంధాల లో పురోగతి, ప్రాంతీయ, అంతర్జాతీయ పరిణామాలపై అభిప్రాయాలను పంచుకున్నట్లు తెలిపా రు. ప్రపంచ శాంతి, సుస్థిరతలకు సౌభాగ్యానికి పాటుపడాలనేదే తమ ఇరువురి ఆకాంక్ష అని ప్ర ధాని తెలిపారు. కీలక సాంకేతిక పరిజ్ఞానం, ఇం ధనం, భద్రతా, రక్షణ వంటి విషయాలపై కూడా సమీక్షించారు. ఇరుదేశాల మధ్య ప్రధానమైన అ వకాశాలు, సైనిక భాగస్వామ్యం, 21వ శతాబ్ధికి అనుగుణంగా వాణిజ్య, శాస్త్ర సాంకేతిక భాగస్వా మ్యం (కాంపాక్ట్) మరింతగా ఇనుమడింపచేసుకునే విషయంలో కూడా చర్చ జరిగింది. 

న్యూఢిల్లీ: బాలీవుడ్ హీరో సల్మాన్ ఖాన్ వ్యక్తిత్వ హక్కుల పరిరక్షణకు చర్యలు తీసుకోవాలని ఢిల్లీ హైకోర్టు గురువారం సోషల్ మీడియా వేదికలను ఆదేశించింది. ఇందుకు మూడు రోజుల గడువు విధించింది. కొన్ని సామాజిక మాధ్యమాలు అనధికారికంగా తన పేరు, ఫోటోలు తన ఇష్టాయిష్టాలు చివరికి తన వ్యక్తిత్వాన్ని కూడా తరచూ తమ వేదికల ద్వారా వాడుకుంటున్నాయి. ఈ విధంగా ఇకామర్స్ వెబ్‌సైట్లు ద్వారా కూడా చర్యలకు పాల్పడుతూ తనకు మానసిక క్షోభ కల్గిస్తున్నారని సల్మాన్ ఖాన్ హైకోర్టును ఆశ్రయించారు. దీనిపై న్యాయమూర్తి మన్‌మీత్ ప్రీతం సింగ్ అరోరా స్పందించారు. తాము తరువాత పూర్తి స్థాయి ఆదేశాలను వెలువరిస్తామని, ఈ లోగా మూడు రోజులలో సామాజిక మాధ్యమాలు తగు విధంగా స్పందించాల్సి ఉందని ఆమె తెలిపారు. 

దిబ్రూఘర్: అరుణాచల్ ప్రదేశ్‌లో గురువారం జరిగిన రోడ్డు ప్రమాదంలో కనీసం 14 మంది కూలీలు దుర్మరణం చెందారు. అసోంలోని టినుసూకియా జిల్లాకు చెందిన వీరి ట్రక్కు అదుపు తప్పి లోయలో పడిపోయింది.అరుణాచల్ ప్రదేశ్‌లోని అన్‌జా జిల్లాలో ఘటన జరిగింది. వెంటనే అక్కడికి సహాయక బృందాలు చేరుకున్నాయి. 14 మృతదేహాలను వెలికి తీశారు. ఓ వ్యక్తి సజీవంగా ఉన్నట్లు గుర్తించారు. ఏడుగురు జాడ తెలియడం లేదని జిల్లా ఉన్నతాధికారిస్వప్నీల్ పాల్ తెలిపారు. ఉదయం 11 గంటల ప్రాంతంలోనే ప్రమాదం జరిగింది. ఓ ప్రాజెక్టు పనికి కూలీలను కాంట్రాక్టరు ట్రక్కులో తీసుకువెళ్లుతుండగా అది అదుపు తప్పింది. వేయి అడుగుల లోతైన లోయలో పడటంతో అత్యధికులు మృతి చెందారు.