క్రీడలు,తాజా వార్తలు

టీం ఇండియా టి-20 కెప్టెన్ సూర్యకుమార్ యాదవ్ గత కొంతకాలంగా ఫామ్ లేకపోవడంతో ఇబ్బంది పడుతున్నారు. సూర్య కనీసం అర్థ శతకం సాధించి చాలాకాలమే అయింది. దీంతో అతడిపై భారత మాజీ ఓపెనర్ ఆకాశ్ చోప్రా విమర్శల వర్షం కురిపించాడు. కెప్టెన్సీ అంటే కేవలం టాస్ వేయడమే కాదు అని ఆకాశ్ అన్నాడు. ‘‘కెప్టెన్ పని కేవలం టాస్ వేయడం. బౌలర్లతో ఓవర్లు వేయించడం. వ్యూహాలు రూపొందించడమే కాదు. టాప్-4లో బ్యాటింగ్‌ చేస్తున్నప్పుడు పరుగులు చేయడం కూడా ప్రధాన బాధ్యతే. సూర్యకుమార్ కొన్ని నెలలుగా చాలా మ్యాచుల్లో రాణించలేదు. 17 ఇన్నింగ్స్‌లో యావరేజ్ కేవలం 14 మాత్రమే. స్ట్రైక్‌రేటు కూడా బాగా లేదు. ఒక్కసారి కూడా అర్థ శతకం చేయలేదు. రెండుసార్లు మాత్రమే 25కి పైగా స్కోర్ చేశాడు’’ అని ఆకాశ్ విమర్శించాడు.

అయితే 2026 టి-20 ప్రపంచకప్‌కి ముందు కెప్టెన్ సూర్యకుమార్‌తో పాటు.. వైస్ కెప్టెన్ శుభ్‌మాన్ గిల్ కూడా ఫామ్ కోల్పోవడం భారత్‌కు మంచి సంకేతం కాదని ఆకాశ్ పేర్కొన్నాడు. మూడు లేదా నాలుగో స్థానంలో ఆడుతూ నిలకడగా పరుగులు చేయకపోతే.. ప్రపంచకప్ మొదలైనప్పుడు వాళ్లకి అంత నమ్మకంగా ఉండదు అని తెలిపాడు. కెప్టెన్ సూర్య కుమార్, వైస్ కెప్టెన్ శుభ్‌మాన్ గిల్ పరుగులు చేయడం చాలా అవసరమని ఆకాశ్ విశ్లేషించాడు.

పుణె: సయ్యద్ ముస్తాక్ అలీ ట్రోఫీ టి20 టోర్నమెంట్ సూపర్ లీగ్ గ్రూప్‌బి మ్యాచ్‌లో హైదరాబాద్ ఘన విజయం సాధించింది. శుక్రవారం పుణెలో ముంబైతో జరిగిన మ్యాచ్‌లో హైదరాబాద్ 9 వికెట్ల తేడాతో జయకేతనం ఎగుర వేసింది. ముందుగా బ్యాటింగ్ చేసిన ముంబై 18.5 ఓవర్లలో కేవలం 131 పరుగులకే ఆలౌటైంది. ఓపెనర్ యశస్వి జైస్వాల్ (29), వికెట్ కీపర్ హార్దిక్ తమోర్ (29), సూర్యాన్ష్ షెడ్గె (28) తప్ప మిగతా వారు విఫలమయ్యారు. హైదరాబాద్ బౌలర్లలో సిరాజ్ అద్భుత బౌలింగ్‌ను కనబరిచాడు.

అద్భుతంగా రాణించిన సిరాజ్ 3.5 ఓవర్లలో 17 పరుగులు మాత్రమే ఇచ్చి 3 వికెట్లను పడగొట్టాడు. కెప్టెన్ చామ మిలింద్, తనయ్ త్యాగరాజన్ రెండేసి వికెట్లను పడగొట్టారు. తర్వాత బ్యాటింగ్‌కు దిగిన హైదరాబాద్ 11.5 ఓవర్లలోనే కేవలం ఒక వికెట్‌ను మాత్రమే కోల్పోయి విజయాన్ని అందుకుంది. ఓపెనర్లు అమన్ రావు, తన్మయ్ అగర్వాల్ జట్టుకు విధ్వంసక ఆరంభాన్ని అందించారు. చెలరేగి ఆడిన తన్మయ్ 40 బంతుల్లోనే ఏడు ఫోర్లు, 4 సిక్సర్లతో 78 పరుగులు చేశాడు. అమన్ రావు 29 బంతుల్లోనే 3 సిక్సర్లు, ఐదు బౌండరీలతో 52 పరుగులు సాధించాడు. దీంతో హైదరాబాద్ అలవోక విజయాన్ని అందుకుంది.

మన తెలంగాణ/ హైదరాబాద్: జాతీయ రోలర్ స్కేటింగ్ ఛాంపియన్‌షిప్‌లో తెలంగాణకు చెందిన రాధే లోయ రజత పకతం సాధించింది. విశాఖపట్నం వేదికగా జరుగుతున్న జాతీయ స్థాయి పోటీల్లో రాధే లోయ అసాధారణ ప్రతిభతో రజతం దక్కించుకుంది. బాలికల రోలర్ ఫ్రీస్టయిల్ ఈవెంట్3 విభాగంలో రాధే రెండో స్థానంలో నిలిచి సిల్వర్ మెడల్ సొంతం చేసుకుది. జాతీయ స్థాయి పోటీల్లో ఆమెకు ఇది మూడో పతకం కావడం విశేషం. లోయ హైదరాబాద్‌లోని ఎకె హోమ్స్‌లో శిక్షణ తీసుకొంటోంది. ప్రముఖ టిటి క్రీడాకారిణి నైనా జైస్వాల్ తండ్రి అశ్వని కుమార్ పర్యవేక్షణలో లోయ సాధన కొనసాగుతోంది. కాగా బాలుర విభాగంలో తెలంగాణకు చెందిన మోక్షిత్ రామ్ రెడ్డి ఓ స్వర్ణం, మరో రజతం గెలుచుకున్నాడు.

దుబాయి: ఆసియా అండర్19 వన్డే కప్ క్రికెట్ టోర్నమెంట్‌లో భారత్ శుభారంభం చేసింది. శుక్రవారం యునైటెడ్ అరబ్ ఎమిరేట్స్ (యుఎఇ)తో జరిగిన మ్యాచ్‌లో భారత యువ జట్టు 234 పరుగుల తేడాతో రికార్డు విజయం సాధించింది. యువ సంచలనం వైభవ్ సూర్యవంశీ విధ్వంసక సెంచరీతో చెలరేగడంతో తొలుత బ్యాటింగ్ చేసిన భారత్ 50 ఓవర్లలో 6 వికెట్ల నష్టానికి 433 పరుగుల భారీ స్కోరును సాధించింది. తర్వాత లక్షఛేదనకు దిగిన యుఎఇ 50 ఓవర్లలో ఏడు వికెట్ల నష్టానికి కేవలం 199 పరుగులు మాత్రమే చేసి ఘోర పరాజయం చవి చూసింది. భారత బౌలర్లు కట్టుదిట్టమైన బౌలింగ్‌తో యుఎఇ ఇన్నింగ్స్‌ను తక్కువ స్కోరుకే పరిమితంచేశారు. యుఎఇ టీమ్‌లో ఉద్దిశ్ సురి అజేయంగా 78 పరుగులు చేశాడు. పృథ్వీ మధు (50) పరుగులు చేశాడు. మిగతా వారు విఫలం కావడంతో జట్టుకు ఓటమి తప్పలేదు. భారత బౌలర్లలో దీపేశ్ రెండు వికెట్లను పడగొట్టాడు.

సూర్య వీర విహారం..

తొలుత బ్యాటింగ్ చేసిన భారత్‌కు ఆరంభంలోనే షాక్ తగిలింది. ఓపెనర్‌గా తిగిన కెప్టెన్ అయుష్ మాత్రే (4) ప్రారంభంలోనే పెవిలియన్ చేరాడు. అయితే వన్‌డౌన్‌లో వచ్చిన అరోన్ జార్జ్‌తో కలిసి మరో ఓపెనర్ వైభవ్ సూర్యవంశీ స్కోరును పరిగెత్తించాడు. అరోన్ సమన్వయంతో బ్యాటింగ్ చేయగా సూర్యవంశీ తన మార్క్ బ్యాటింగ్‌తో చెలరేగి పోయాడు. యుఎఇ బౌలర్లను హడలెత్తించిన వైభవ్ వరుస ఫోర్లు, సిక్సర్లతో పరుగుల వరద పారించాడు. అతన్ని కట్టడి చేసేందుకు ప్రత్యర్థి బౌలర్లు చేసిన ప్రయత్నాలు ఫలించలేదు. ఆకాశమే హద్దుగా చెలరేగిన వైభవ్ 55 బంతుల్లోనే సెంచరీని పూర్తి చేశాడు. ఇదే సమయంలో అరోన్ జార్జ్‌తో కలిసి రెండో వికెట్‌కు 146 బంతుల్లోనే 212 పరుగులు జోడించాడు. జార్జ్ (69) పరుగులు చేశాడు. ఇక చిరస్మరణీయ ఇన్నింగ్స్ ఆడిన వైభవ్ 95 బంతుల్లోనే 14 సిక్సర్లు, 9 ఫోర్లతో171 పరుగులు సాధించాడు. ఇక విహాన్ మల్హోత్ర (69), వేదాంత్ త్రివేది (38), అభిజ్ఞాన్ 32 (నాటౌట్) కనిష్క్ (28) పరుగులు చేశారు. దీంతో భారత్ 433 పరుగుల రికార్డు స్కోరును నమోదు చేసింది. ఈ క్రమంలో తన పేరిటే ఉన్న 425 పరుగుల అత్యధిక పరుగుల రికార్డును బద్దలు కొట్టింది.

టీమిండియా స్టార్ ఆటగాడు శుభ్‌మన్ గిల్ వరుసగా రెండు మ్యాచ్‌లలో డకౌట్ కావడాన్ని భారత మాజీ క్రికెటర్లు తప్పుపడుతున్నారు. గిల్‌కు చిన్న వయసులో కెప్టెన్సీ బాధ్యతలు అప్పగించి బిసిసిఐ పెద్ద పొరపాటే చేసిందని ఆకాశ్ చోప్రా, మహ్మద్ కైఫ్, శ్రీకాంత్, అశ్విన్ వంటి మాజీ క్రికెటర్లు విమర్శించారు. గిల్ ఇలాగే ఆడితే టీమిండియాకు ఇబ్బందులు ఖాయమని వారు ఆందోళన వ్యక్తం చేస్తున్నారు. కొంతకాలంగా గిల్ తన స్థాయికి తగ్గ బ్యాటింగ్‌ను కనబరచడంలో విఫలమవుతున్నాడని, ఇది భారత క్రికెట్ మంచి పరిణామం కాదని పేర్కొన్నారు.

న్యూఢిల్లీ: భారత స్టార్ మహిళా రెజ్లర్ వినేశ్ ఫొగాట్ రిటైర్మెంట్ నిర్ణయాన్ని వెనక్కి తీసుకొంది. ఒలింపిక్ కలను నెరవేర్చుకునేందుకు మళ్లీ రింక్‌లోకి అడుగుపెట్టాలని భావిస్తున్నట్టు శుక్రవారం ఎక్స్ వేదికగా వెల్లడించింది. 2024 పారిస్ ఒలింపిక్స్ మహిళల 50 కేజీల విభాగంలో ఫైనల్‌కు చేరిన వినేశ్ రజతం ఖాయం చేసుకుంది. కానీ రెండో రోజు బరువు చూసే సమయానికి గ్రాములు అదనంగా ఉండడంతో వినేశ్‌పై అనర్హత వేటు పడింది. దీంతో మనో వేదనకు గురైన రెజ్లింగ్ నుంచి తప్పుకుంది. తాజాగా తన నిర్ణయాన్ని మార్చుకుని తిరిగి రెజ్లింగ్‌లో ప్రవేశించేందుకు సిద్ధమైంది. రానున్న ఒలింపిక్స్ కోసం త్వరలోనే సాధన ప్రారంభిస్తానని తెలిపింది.

 అంతర్జాతీయ క్రికెట్ మండలి (ఐసిసి) బుధవారం ప్రకటించిన వన్డే బ్యాటింగ్ ర్యాంకింగ్స్‌లో భారత స్టార్ బ్యాటర్ విరాట్ కోహ్లి రెండో స్థానానికి చేరుకున్నాడు. సౌతాఫ్రికాతో జరిగిన వన్డే సిరీస్‌లో రెండు సెంచరీలతో పాటు ఓ అజేయ హాఫ్ సెంచరీ సాధించిన విరాట్ కోహ్లి తన ర్యాంక్‌ను మెరుగు పరుచుకున్నాడు. ఇంతకుముందు నాలుగో స్థానంలో ఉన్న కోహ్లి తాజా ర్యాంకింగ్స్‌లో 773 పాయింట్లతో రెండో స్థానానికి ఎగబాకాడు. భారత్‌కే చెందిన రోహిత్ శర్మ తాజా ర్యాంకింగ్స్‌లో అగ్రస్థానాన్ని కాపాడుకున్నాడు. రోహిత్ 781 పాయింట్లతో టాప్ ర్యాంక్‌లో కొనసాగుతున్నాడు. అతనికి కోహ్లి నుంచి గట్టి పోటీ నెలకొంది. రానున్న న్యూజిలాండ్ సిరీస్‌లో కోహ్లి టాప్ ర్యాంక్‌ను అందుకున్న ఆశ్చర్యం లేదు. డారిల్ మిఛెల్ (కివీస్) మూడో, ఇబ్రహీం జద్రాన్ (అఫ్గాన్) నాలుగో, గిల్ (భారత్) ఐదో ర్యాంక్‌లో నిలిచారు.

జిఎంఆర్ స్పోర్ట్, ప్రభుత్వం మధ్య చారిత్రాత్మక ఒప్పందం

మన తెలంగాణ/హైదరాబాద్ : జిఎంఆర్ స్పోర్ట్ సంస్థ, తెలంగాణ ప్రభుత్వంతో ఒప్పందం (ఎంవొయు) పై సంతకం చేసింది. ఈ ఒప్పందం తెలంగాణ రైజింగ్ గ్లోబల్ సమ్మిట్ 2025 సందర్భంగా భారత్ ఫ్యూచర్ సిటీలో జరిగింది. ఈ భాగస్వామ్యంతో తెలంగాణ రైజింగ్ అజెండా కింద రాష్ట్రాన్ని ప్రపంచ పెట్టుబడులు, ఆవిష్కరణల కేంద్రంగా తీర్చిదిద్దాలనే తెలంగాణ ప్రభుత్వ భవిష్యత్తు దృక్పథానికి జిఎంఆర్ తమ అంకిత భావాన్ని పునరుద్ఘాటించింది. దుబాయ్ స్పోర్ట్ సిటిని జ్ఞాన భాగస్వామ్య సంస్థగా చేసుకొని, జిఎంఆర్ స్పోర్ట్ భారత్ ఫ్యూచర్ సిటీలో శాటిలైట్ స్పోర్ట్ సిటీని అభివృద్ధి చేయనుంది. ఈ ప్రాజెక్ట్‌లో ఆధునిక శిక్షణా కేంద్రాలు, అంతర్జాతీయ ప్రమాణాల స్టేడియాలు, హై-పర్ఫార్మెన్స్ రిహాబి లిటేషన్ సెంటర్లు, స్పోర్ట్ సైన్స్ సదుపాయాలు వంటి అంతర్జాతీయ ప్రమాణాల వసతులు ఏర్పాటు చేయబడతాయి.

ఈ ప్రణాళిక తెలంగాణను గ్లోబల్ స్పోర్ట్ ఎక్సలెన్స్ హబ్‌గా నిలబెట్టడమే లక్ష్యం. ఒప్పందం సందర్భంగా జిఎంఆర్ గ్రూప్ కార్పొరేట్ చైర్మన్, జిఎంఆర్ స్పోర్ట్ చైర్మన్ కిరణ్ కుమార్ గ్రoధి మాట్లాడుతూ, తెలంగాణ ప్రభుత్వంతో కలిసి శాటిలైట్ స్పోర్ట్ సిటీని అభివృద్ధి చేయడం ద్వారా క్రీడా రంగంలో కొత్త అవకాశా లను సృష్టిస్తున్నాము. ఈ కార్యక్రమం తెలంగాణను వేగంగా అభివృద్ధి చెందుతున్న గ్లోబల్ క్రీడా కేంద్రంగా నిలబెడుతుందన్నారు. దుబాయ్ స్పోర్ట్ సిటీ సేల్స్, లీజింగ్, ఇన్వెస్ట్మెంట్ హెడ్ రానియా ఓస్లాటి మాట్లాడుతూ, భారత్ ఫ్యూచర్ సిటీలో శాటిలైట్ స్పోర్ట్ సిటి రూప కల్పనలో భాగస్వామ్యం కావడం మా గర్వకారణం.

ఈ భాగస్వామ్యం అంతర్జాతీయ ప్రమాణాల క్రీడా వసతులను తెలంగాణకు అందించేందుకు సహక రిస్తుందన్నారు. టిజి ఐ పాస్ విధానం కింద తెలంగాణ ప్రభుత్వం ఈ ప్రాజెక్ట్‌కు అవసరమైన అనుమతులు, మద్దతు అందించనుంది. భారత్ ఫ్యూచర్ సిటి, భారత్‌లో తొలి నెట్-జీరో స్మార్ట్ ఇండస్ట్రియల్ సిటీగా రూపుదిద్దుకుంటూ, ఆర్టిఫిషియల్ ఇంటెలిజెన్స్, ఎలక్ట్రిక్ మొబిలిటీ, లైఫ్ సైన్సె స్, ఎంటర్‌టైన్‌మెంట్ రంగాలలో కొత్త పెట్టుబడులు, అవకాశాలను ప్రోత్సహిస్తోంది. తెలంగాణ రాష్ట్రం ఇప్పటికే ఐటి, లైఫ్ సైన్సెస్, ఏరోస్పేస్, గ్రీన్ ఎనర్జీ రంగాలలో వేగవంతమైన అభివృద్ధిని నమోదు చేస్తోంది.

టీమిండియా స్టార్ బౌలర్ జస్ప్రీత్ బుమ్రా అరుదైన రికార్డు నెలకొల్పాడు. మంగళవారం భారత్, దక్షిణాఫ్రికా మధ్య జరిగిన తొలి టీ20లో బుమ్రా రెండు వికెట్లతో రాణించాడు. ఈ క్రమంలో టీ20ల్లో 100 వికెట్లు పూర్తి చేసుకుని బుమ్రా చరిత్ర పుస్తకాల్లో తన పేరును లిఖించుకున్నాడు. టీ20ల్లో 100 వికెట్లు తీసిన రెండవ భారత బౌలర్ గా.. మూడు ఫార్మాట్లలో 100 వికెట్లు పూర్తి చేసుకున్న తొలి భారత బౌలర్ గా బుమ్రా రికార్డు సృష్టించాడు. ఓవరాల్ గా ఇంటర్నేషనల్ క్రికెట్ లో అన్ని ఫార్మాట్లలో 100 వికెట్లు పూర్తి చేసుకున్న ఐదవ బౌలర్ గా బుమ్రా నిలిచాడు. టెస్టుల్లో 234, వన్డేల్లో 149, టీ20ల్లో 101 వికెట్లు సాధించాడు బుమ్రా.

క్రికెట్‌లోని మూడు ఫార్మాట్లలో 100 వికెట్లు తీసిన బౌలర్లలో బుమ్రా కంటే ముందు.. న్యూజిలాండ్ ఐకాన్ టిమ్ సౌథి ఉన్నారు. సౌథి107 టెస్టుల్లో 391, 161 వన్డేల్లో 221, 126 టీ20ల్లో 164 వికెట్లు పడగొట్టాడు. అయితే, డిసెంబర్ 2024లో టెస్టుల నుంచి రిటైర్ అయ్యాడు.. కానీ వైట్-బాల్ ఫార్మాట్‌లో అందుబాటులో ఉన్నాడు. ఆ తర్వాత శ్రీలంక దిగ్గజం లసిత్ మలింగ మూడు ఫార్మాట్లలో సెంచరీ వికెట్లు తీసిన మరో బౌలర్. మలింగ 30 టెస్టుల్లో 101 వికెట్లు, 226 వన్డేల్లో 228 వికెట్లు, 338 వికెట్లు, 84 టీ20ల్లో 107 వికెట్లు పడగొట్టాడు. మలింగ 2021 సెప్టెంబర్‌లో అన్ని రకాల క్రికెట్‌ల నుంచి రిటైర్ అయ్యాడు.

అలాగే, పాకిస్తాన్ స్టార్ షాహీన్ షా అఫ్రిది కూడా ఈ జాబితాలో ఉన్నారు. గత ఏడాది డిసెంబర్‌లో షహీన్ 100 టీ20 వికెట్లు పూర్తి చేసి మూడు ఫార్మాట్లలో 100 వికెట్లు సాధించాడు. షహీన్ 33 టెస్టుల్లో 121 వికెట్లు, 71 వన్డేల్లో 135 వికెట్లు, 96 టీ20ల్లో 126 వికెట్లు పడగొట్టాడు.ఇక, బంగ్లాదేశ్ స్టార్ ఆల్ రౌండర్ షకీబ్ అల్ హసన్ కూడా మూడు ఫార్మాట్లలో 100 వికెట్ల ఫీట్ ను అందుకున్నాడు. షకీబ్ 2021లో తన 100వ టీ20 వికెట్‌ను సాధించాడు. షకీబ్ 71 టెస్టుల్లో 246 వికెట్లు, 247 వన్డేల్లో 317 వికెట్లు, 129 టీ20ల్లో 149 వికెట్లు పడగొట్టాడు.

అబుదాబి వేదికగా డిసెంబర్ 16న జరిగే ఇండియన్ ప్రీమియర్ లీగ్ (ఐపిఎల్) మినీ వేలం పాటలో 350 మంది క్రికెటర్లు బరిలో నిలిచారు. ఐపిఎల్ వేలం పాట కోసం నమోదు చేసుకున్న ఆటగాళ్ల జాబితా నుంచి బిసిసిఐ ఏకంగా 1005 మంది క్రికెటర్ల పేర్లను తొలగించింది. అబుదాబిలో జరిగే వేలం పాటలో 350 మంది క్రికెటర్లు తమ అదృష్టాన్ని పరీక్షించుకోనున్నారు. ఇక ఐపిఎల్ మినీ వేలం అబుదాబిలో జరుగుతుందని బిసిసిఐ ఆయా ఫ్రాంచైజీలకు అధికారికంగా తెలిపింది. ఈ మేరకు ఫ్రాంచైజీలకు మెయిళ్లను పంపించింది మొదట బిడ్డిం ప్రక్రియ, బ్యాటర్లు, ఆల్‌రౌండర్లు, వికెట్ కీపర్లు/బ్యాటర్లు, ఫాస్ట్ బౌలర్లు, స్పిన్ బౌలర్లు అనే విభాగాల వారీగా వేలం పాట కొనసాగనుంది. తొలుత క్యాప్డ్ ఆటగాళ్లతో ప్రారంభమయ్యే ఆక్షన్ తర్వాత అన్‌క్యాప్ట్ ఆటగాళ్ల వేలంతో ముగుస్తోంది.