క్రీడలు,తాజా వార్తలు

గెలుపే లక్షంగా ఆస్ట్రేలియా

నేడు తొలి వన్డే

పెర్త్: ఆసియా కప్ గెలుచుకుని జోరుమీదున్న టీమిండియా మరో సమరానికి సిద్ధం అయ్యింది. ఆస్ట్రేలియాతో మూడు మ్యాచ్‌ల వన్డే సిరీస్‌కు సన్నద్ధమైంది. అందులో భాగంగా తొలి వన్డే ఆదివారం జరగనుంది. భారత కాలమానం ప్రకారం ఉదయం 9 గంటలకు మ్యాచ్ మొదలవుతుంది. వన్డే సారథిగా శుభ్‌మన్ గిల్‌కు తొలి సిరీస్ కూడా ఇదే కావడం ప్రాధాన్యతను సంతరించుకుంది. ఇక ఏడు నెలల అనంతరం రోహిత్ శర్మ, విరాట్ కోహ్లీ బ్యాట్ పట్టనున్నారు. దీంతో అందరి చూపూ మాజీ కెప్టెన్ రోహిత్, కోహ్లీ మీదే ఉంది. 2027 ఐసిసి వరల్డ్ కప్ వరకూ జట్టులో కొనసాగాలంటే వీరిద్దరూ ఈ సిరీస్‌లో అంచనాలకు మించి రాణించాల్సి ఉంటుంది. పైగా- కెప్టెన్సీ పోయిన తర్వాత రోహిత్ శర్మ ఆడుతున్న తొలి మ్యాచ్ కూడా ఇదే కావడం అతనిపై మరింత ఉండే అవకాశం లేకపోలేదు.

ఈ మూడు మ్యాచ్‌లలో ఏ మాత్రం రాణించకపోయినా వారి కేరీర్‌కు ఎండ్ కార్డు పడనుందనడంలో ఎలాంటి సందేహం లేదు. 50 ఓవర్ల ఫార్మట్ లో సాగిన ఛాంపియన్స్ ట్రోఫీ గెలిచిన తర్వాత రోహిత్ శర్మ, విరాట్ కోహ్లీ మళ్లీ గ్రౌండ్‌లో దిగడం ఇదే తొలిసారి కూడా. స్పెషలిస్ట్ వికెట్ కీపర్‌గా కెఎల్ రాహుల్ తుదిజట్టులో చోటు దక్కించుకోవచ్చు. బ్యాటింగ్ ఆర్డర్‌కు వెన్నెముకగా భావించే నంబర్ 4 స్థానంలో వైస్ కెప్టెన్ శ్రేయాస్ అయ్యర్ బరిలో దిగొచ్చు. జస్‌ప్రీత్ బుమ్రా అందుబాటులో లేకపోవడం వల్ల బౌలింగ్ దళాన్ని మహ్మద్ సిరాజ్, అర్ష్‌దీప్ సింగ్ ముందుండి నడపాల్సి ఉంది. వాషింగ్టన్ సుందర్, కుల్ దీప్ యాదవ్ స్పిన్నర్లుగా ఆడటం దాదాపుగా ఖాయమైనట్టే. ఆల్ రౌండర్లుగా అక్షర్ పటేల్, నితీష్ కుమార్ రెడ్డి మొదటి వన్డే మ్యాచ్‌లో ఆడొవచ్చు.

ఆస్ట్రేలియాకు గాయాల బెడదా..

మరోవైపు- మిచెల్ మార్ష్ నాయకత్వాన్ని వహిస్తోన్న ఆస్ట్రేలియా.. టీమిండియాను ఎలా ఎదుర్కొంటుందనేది ఆసక్తి రేపుతోంది. గాయాలు ఆ జట్టును కలవరపెడుతున్నాయి. మాట్ రెన్‌షా, మిచ్ ఓవెన్ మిడిల్ ఆర్డర్‌లో వన్డేల్లో అరంగేట్రం చేయనున్నారు. జోష్ ఫిలిప్ 2021 తర్వాత తన తొలి వన్డే ఆడనున్నాడు. ఎడమచేతి వాటం స్పిన్నర్ మాట్ కుహ్నెమాన్ కూడా తొలి మ్యాచ్ ఆడనున్నాడు. స్వదేశంలో ఇదే అతనికి తొలి మ్యాచ్. అయినా వారు దేశవాళీలో రాణించిన అనుభవం లేకపోలేదు. ట్రావీస్ హెడ్, ట్రావిస్ హెడ్, మాట్ షార్ట్, మాట్ రెన్షా, జోష్ ఫిలిప్, మిఛెల్ ఓవెన్ వంటి బ్యాటర్లతో ఆస్ట్రేలియా బ్యాటింగ్ లైనప్ చాలా బలంగా ఉంది. మిఛెల్ స్టార్క్, నాథన్ ఎల్లిస్, మాట్ కుహ్నెమాన్, జోష్ హాజిల్‌వుడ్ వంటి బౌలర్లతో బౌలింగ్ విభాగం సయితం ప్రమాదకరంగా ఉంది. దీంతో ఆసీస్ జట్టును తక్కువ అంచనా వేయలేం. ఇక, వారికి సొంత గడ్డ, సొంతం మైదానం కాబట్టి వానికి కలిసొచ్చే అవకాశాలూ ఉన్నాయి.

అఫ్ఘానిస్థాన్‌పై పాకిస్థాన్ మరోసారివైమానిక దాడులకు పాల్పడింది. అఫ్ఘాన్ సరిహద్దుల్లో ఉన్న పాక్టికా ప్రావిన్స్‌లో దాడులకు తెగబడింది. దీంతో పది మంది మరణించారు. మృతుల్లో ముగ్గురు దేశవాళీ క్రికెటర్లు కూడా ఉన్నారని అఫ్ఘాన్ స్థాన్ క్రికెట్ బోర్డు (ఎసిబి) పేర్కొంది. దీంతో నవంబర్‌లో పాకిస్థాన్, శ్రీలంక జట్లతో తలబడబోయే ముక్కోణపు సిరీస్ నుంచి తప్పుకుంటున్నట్లు అఫ్ఘాన్ క్రికెట్ బోర్డు స్పష్టం చేసింది. మృతి చెందిన క్రికెటర్లకు సంతాపం తెలుపుతూ సోషల్ మీడియాలో పోస్టు చేసింది. ‘పాక్ వైమానిక దాడిలో పాక్టికా ప్రావిన్స్‌లోని ఉర్గున్ జిల్లాకు చెందిన క్రికెటర్లు మృతి చెందారని, దాడిలో ఎనిమిది మంది ప్రాణాలు చనిపోగా.. అందులో ముగ్గురు క్రికెటర్లు ఉన్నారని. ఫ్రెండ్లీమ్యాచ్ ఆడేందుకు పాక్టికా ప్రావిన్స్ రాజధాని శరణకు వెళ్లిన ముగ్గురు క్రికెటర్లు కబీర్ అఘా, సిబ్గుతుల్లా, హరూర్ తిరిగి సొంత ప్రాంతానికి వస్తుండగా ఈ దాడిలో మృతి చెందారు’ అని తెలిపింది. మృతుల కుటుంబ సభ్యులకు ప్రగాఢ సానుభూతి తెలియజేస్తున్నాం. ఈ దాడికినిరసనగా వచ్చే నెలలో జరుగనున్న ముక్కోణపు టీ20 సిరీస్ నుంచి వైదొలగాలని నిర్ణయించాం’ అని స్పష్టం చేసింది.

కాబూల్: పాకిస్థాన్ వైమానిక దాడిలో ముగ్గురు ఆఫ్ఘాన్ క్రికెటర్ల మృతి చెందారు. పాక్టికా ప్రావిన్స్‌లో పాకిస్తాన్‌ వైమానిక దాడి జరిపింది. ముగ్గురు ఆఫ్ఘనిస్థాన్‌ క్రికెటర్ల సహా 8 మంది చనిపోయారు. పాక్, శ్రీలంకతో ట్రైసిరీస్ ఆడేందుకువెళ్తుండగా ఈ దాడి జరిగింది. మృతి చెందిన క్రికెటర్లు కబీర్, సిబాతుల్లా, హరూన్‌గా ఆప్ఘాన్ క్రికెట్ బోర్డు అధికారులు వెల్లడించారు. విమానంలో క్రికెటర్లు ఉర్ఘున్ నుంచి షారానా వెళ్తుండగా ఈ ప్రమాదం చోటుచేసుకుంది. ఈ ఘటనపై ఆప్ఘనిస్థాన్ క్రికెట్ బోర్డు దిగ్భ్రాంతి వ్యక్తం చేసింది. మృతులకు ప్రగాఢ సానుభూతి ప్రకటించింది.  గత వారం రోజుల నుంచి పాకిస్థాన్ అఫ్గానిస్థాన్ సరిహద్దుల్లో రెండు దేశాల సైనికులు కాల్పులు జరుపుకోవడంతో వందల మంది మృతి చెందారు. చనిపోయిన వారిలో సైనికులు కూడా ఉన్నారు. 

కొలంబో: మహిళల వన్డే ప్రపంచకప్‌లో భాగంగా శుక్రవారం జరిగే మ్యాచ్‌లో ఆతిథ్య శ్రీలంకతో సౌతాఫ్రికా తలపడనుంది. వరుస విజయాలతో జోరుమీదున్న దక్షిణాఫ్రికా ఈ మ్యాచ్‌లోనూ గెలిచి సెమీస్ అవకాశాలను మరింత మెరుగు పరుచుకోవాలనే పట్టుదలతో ఉంది. లంకతో పోల్చితే బ్యాటింగ్, బౌలింగ్ విభాగాల్లో సౌతాఫ్రికా చాలా బలంగా ఉంది.

ఇప్పటికే హ్యాట్రిక్ విజయాలు నమోదు చేసి జోరుమీదుంది. శ్రీలంకపై కూడా అదే సంప్రదాయాన్ని కొనసాగించాలనే లక్షంతో పోరుకు సిద్ధమైంది. కెప్టెన్ లౌరా వాల్‌వర్డ్, సూనె లూస్, మరిజానె కాప్, ట్రియన, డి క్లార్క్ వంటి మ్యాచ్ విన్నర్‌లు జట్టులో ఉన్నారు. ఈ సీజన్‌లో సౌతాఫ్రికా ఇప్పటికే న్యూజిలాండ్, భారత్ వంటి బలమైన జట్లను చిత్తుగా ఓడించింది.

అంతేగాక బంగ్లాదేశ్‌తో జరిగిన కిందటి మ్యాచ్‌లో కూడా జయకేతనం ఎగుర వేసింది. మూడు మ్యాచుల్లో వరుస విజయాలు సాధించడంతో సఫారీ ఆత్మవిశ్వాసం రెట్టింపు అయ్యింది. ఇక శ్రీలంక ఇప్పటి వరకు నాలుగు మ్యాచ్‌లు ఆడి ఒక్క విజయం కూడా సాధించలేదు. రెండు మ్యాచుల్లో ఓటమి పాలు కాగా, మరో రెండు పోటీలు వర్షం వల్ల అర్ధాంతరంగా రద్దయ్యాయి.

పెర్త్: ఆస్ట్రేలియాతో జరిగే వన్డే సిరీస్‌కు టీమిండియా సీనియర్ క్రికెటర్లు విరాట్ కోహ్లి, రోహిత్ శర్మలు ప్రత్యేక ఆకర్షణగా మారారు. సుదీర్ఘ విరామం తర్వాత కోహ్లి, రోహిత్‌లు ఆడుతున్న సిరీస్ ఇదే కావడంతో ప్రాధాన్యత సంతరించుకుంది. ఇద్దరు ఇప్పటికే టి20, టెస్టు క్రికెట్‌కు రిటైర్మెంట్ ప్రకటించారు. ప్రస్తుతం వన్డేల్లో మాత్రమే ఆడుతున్నారు. టెస్టులకు వీడ్కోలు పలికిన తర్వాత కోహ్లి, రోహిత్‌లు ఆడుతున్న తొలి సిరీస్ ఇదే కావడంతో అందరి దృష్టి వీరిపైనే నిలిచింది. ఇద్దరికి సిరీస్ చాలా కీలకంగా మారింది. రానున్న రోజుల్లో టీమిండియాలో చోటు నిలబెట్టుకోవాలంటే ఆస్ట్రేలియా గడ్డపై మెరుగైన ప్రదర్శన చేయక తప్పదు.

ఇలాంటి స్థితిలో రోహిత్, కోహ్లిలపై తీవ్ర ఒత్తిడి నెలకొంది. కానీ అపార అనుభవజ్ఞులైన వీరిని తక్కువ అంచన వేసే పరిస్థితి లేదు. ఎలాంటి బౌలింగ్‌నైనా చిన్నాభిన్నం చేసే సత్తా వీరికుంది. ఇప్పటికే టెస్టులకు రిటైర్మెంట్ ప్రకటించడంతో వీరు కేవలం వన్డేల్లో మాత్రమే ఆడాల్సిన పరిస్థితి ఏర్పడింది. ఈ పరిస్థితుల్లో టీమిండియాలో చోటు కాపాడు కోవడం చాలా కష్టంతో కూడుకున్న అంశంగా చెప్పాలి. నిలకడైన ఆటను కనబరిచి నప్పుడే వీరికి జట్టులో స్థానం ఉంటుంది. అంతేగాక రానున్న వన్డే వరల్డ్‌కప్ టీమ్‌లో చోటు కాపాడుకోవాలంటే ఆడే ప్రతి సిరీస్‌లోనూ సత్తా చాటాల్సిన అవసరం వీరికి ఉంది. ఏమాత్రం విఫలమైన జట్టులో స్థానం గల్లంతు కావడం ఖాయం. ఇలాంటి పరిస్థితుల్లో ఆస్ట్రేలియాతో జరిగే మూడు వన్డేల సిరీస్ కోహ్లి, రోహిత్‌లకు చాలా కీలకమని చెప్పక తప్పదు.

కాగా, ఆస్ట్రేలియా, భారత్ జట్ల మధ్య తొలి వన్డే అక్టోబర్ 19న పెర్త్‌లో జరుగనుంది. రెండో వన్డే 23న అడిలైడ్‌లో, మూడో, చివరి వన్డే 25న సిడ్నీలో జరుగుతుంది. ఆ తర్వాత ఇరు జట్ల మధ్య ఐదు మ్యాచ్‌ల టి20 సిరీస్ జరుగుతుంది.

మహిళల వన్డే వరల్డ్‌కప్.. సెమీ ఫైనల్లో ఆస్ట్రేలియా

విశాఖపట్నం: డిఫెండింగ్ ఛాంపియన్ ఆస్ట్రేలియా మహిళల వన్డే ప్రపంచకప్‌లో సెమీ ఫైనల్‌కు చేరుకుంది. గురువారం విశాఖపట్నం వేదికగా జరిగిన మ్యాచ్‌లో ఆస్ట్రేలియా విమెన్స్ టీమ్ పది వికెట్ల తేడాతో బంగ్లాదేశ్‌ను చిత్తు చేసి సెమీస్ బెర్త్‌ను సొంతం చేసుకుంది. ఇప్పటి వరకు 5 మ్యాచ్‌లు ఆడిన ఆస్ట్రేలియా నాలుగింటిలో విజయం సాధించింది. ఇక శ్రీలంకతో జరిగిన మ్యాచ్ వర్షం వల్ల రద్దయ్యింది. ఈ నేపథ్యంలో 9 పాయింట్లతో ఆస్ట్రేలియా నాకౌట్‌కు అర్హత సాధించింది. ఈ సీజన్‌లో సెమీస్‌కు చేరిన తొలి జట్టుగా ఆస్ట్రేలియా నిలిచింది. తొలుత బ్యాటింగ్ చేసిన బంగ్లాదేశ్ 50 ఓవర్లలో 9 వికెట్ల నష్టానికి 198 పరుగులు మాత్రమే చేసింది. తర్వాత లక్షఛేదనకు దిగిన ఆస్ట్రేలియా 24.5 ఓవర్లలోనే ఒక్క వికెట్ కూడా కోల్పోకుండానే విజయాన్ని అందుకుంది. ఓపెనర్లు అలీసా హీలీ, ఫోయెబ్ లిచ్‌ఫీల్డ్ అద్భుత బ్యాటింగ్‌తో ఆస్ట్రేలియాకు చిరస్మరణీయ విజయం సాధించి పెట్టారు. హీలీ కెప్టెన్సీ ఇన్నింగ్స్‌తో అలరించింది. బంగ్లా బౌలర్లను హడలెత్తించిన అలీసా వరుస ఫోర్లతో పరుగుల వరదను పారించింది. లిచ్‌ఫీల్డ్ కూడా తన మార్క్ షాట్లతో చెలరేగి పోయింది. ఈ జోడీని కట్టడి చేసేందుకు బంగ్లా బౌలర్లు చేసిన ప్రయత్నాలు ఫలించలేదు. విధ్వంసక ఇన్నింగ్స్ ఆడిన హీల 77 బంతుల్లోనే 20 ఫోర్లతో అజేయంగా 113 పరుగులు సాధించింది. చూడచక్కని షాట్లతో అలరించిన హీలీ కళ్లు చెదిరే శతకంతో జట్టుకు ఘన విజయం అందించింది. లిచ్‌ఫీల్డ్ కూడా తనవంతు సహకారం అందించింది. బంగ్లా బౌలర్లను దీటుగా ఎదుర్కొన్న లిచ్‌ఫీల్డ్ 72 బంతుల్లో 12 ఫోర్లు, ఒక సిక్స్‌తో అజేయంగా 84 పరుగులు చేసింది. దీంతో ఆస్ట్రేలియా సగానికి పైగా ఓవర్లు మిగిలివుండగానే జయకేతనం ఎగుర వేసింది.

కట్టుదిట్టమైన బౌలింగ్‌తో..

అంతకుముందు తొలుత బ్యాటింగ్ చేసిన బంగ్లాదేశ్‌ను తక్కువ స్కోరుకే పరిమితం చేయడంలో ఆస్ట్రేలియా బౌలర్లు సఫలమయ్యారు. సమష్టిగా రాణించిన బౌలర్లు ఏ దశలోనూ బంగ్లా బ్యాటర్లకు కోలుకునే అవకాశం ఇవ్వలేదు. అలనా కింగ్ అసాధారణ బౌలింగ్‌ను కనబరిచింది. 10 ఓవర్లలో 4 మెయిడిన్‌లతో 18 పరుగులు మాత్రమే ఇచ్చి రెండు వికెట్లను పడగొట్టింది. జార్జియా వెరెహమ్ కూడా పొదుపుగా బౌలింగ్ చేసి తనవంతు పాత్ర పోషించింది. జార్జియాకు కూడా రెండు వికెట్లు దక్కాయి. మిగతా బౌలర్లలో సదర్లాండ్, గార్డ్‌నర్‌లు చెరో రెండేసి వికెట్లను పడగొట్టారు. బంగ్లా టీమ్‌లో శోభన మోస్టరి అజేయంగా 66 పరుగులు చేసింది. ఓపెనర్ రాబ్యా హైదర్ (44) పరుగులతో తనవంతు పాత్ర పోషించింది. మిగతా బ్యాటర్లు విఫలం కావడంతో బంగ్లా ఆశించిన స్థాయిలో పరుగులు సాధించలేక పోయింది.

దుబాయి: అంతర్జాతీయ క్రికెట్ మండలి (ఐసిసి) బుధవారం తాజాగా ప్రకటించిన వన్డే ర్యాంకింగ్స్‌లో అఫ్గానిస్థాన్ స్టార్ రషీద్ ఖాన్ బౌలింగ్ విభాగంలో టాప్ ర్యాంక్‌ను సొంతం చేసుకున్నాడు. భారత కెప్టెన్ శుభ్‌మన్ గిల్ బ్యాటింగ్‌లో అగ్రస్థానాన్ని నిలబెట్టుకున్నాడు. బంగ్లాదేశ్‌తో జరిగిన వన్డే సిరీస్‌లో అసాధారణ బౌలింగ్‌ను కనబరిచి అఫ్గాన్‌కు సిరీస్‌ను సాధించి పెట్టిన రషీద్ ర్యాంకింగ్స్‌లో అగ్రస్థానానికి దూసుకెళ్లాడు. తాజా ర్యాంకింగ్స్‌లో రషీద్ ఏకంగా ఐదు స్థానాలు ఎగబాకి టాప్ ర్యాంక్‌ను దక్కించుకున్నాడు.

ఈ క్రమంలో ఇప్పటి వరకు అగ్రస్థానంలో కొనసాగిన సౌతాఫ్రికా స్టార్ కేశవ్ మహరాజ్‌ను వెనక్కి నెట్టి టాప్ ర్యాంక్‌ను సొంతం చేసుకున్నాడు. మహీశ్ తీక్షణ (శ్రీలంక) మూడో, జోఫ్రా ఆర్చర్ (ఇంగ్లండ్) నాలుగో ర్యాంక్‌ను సాధించారు. భారత స్టార్ స్పిన్నర్ కుల్దీప్ యాదవ్ ఒక ర్యాంక్‌ను కోల్పోయి ఐదో స్థానంలో నిలిచాడు. మరో భారత స్పిన్నర్ రవీంద్ర జడేజా పదో ర్యాంక్‌లో కొనసాగుతున్నాడు.

బ్యాటింగ్ విభాగంలో టీమిండియా స్టార్ ఆటగాడు శుభ్‌మన్ గిల్ అగ్రస్థానాన్ని నిలబెట్టుకున్నాడు. గిల్ 784 పాయింట్లతో టాప్ ర్యాంక్‌ను కాపాడుకున్నాడు. అఫ్గాన్ స్టార్ ఇబ్రహీం జద్రాన్ తాజా ర్యాంకింగ్స్‌లో ఏకంగా 8 ర్యాంక్‌లు ఎగబాకి ఏకంగా రెండో ర్యాంక్‌ను దక్కించుకున్నాడు. బంగ్లా సిరీస్‌లో రాణించడంతో ఇబ్రహీం ర్యాంక్ గణనీయంగా పెరిగింది. భారత ఆటగాళ్లు రోహిత్ శర్మ మూడో, విరాట్ కోహ్లి ఐదో, శ్రేయస్ తొమ్మిదో ర్యాంక్‌లో కొనసాగుతున్నారు.

ప్రపంచ ఫుట్‌బాల్ చరిత్రలో ఆఫ్రికా దేశం కేప్ వెర్డె పెను సంచలనం సృష్టించింది. వచ్చే ఏడాది అమెరికా, కెనడా వేదికగా జరుగనున్న ఫుట్‌బాల్ ప్రపంచకప్ టోర్నీకి కేప్ వెర్డె అర్హత సాధించింది. కేవలం ఐదు లక్షల 25 వేల జనాభా మాత్రమే కలిగిన కేప్ వెర్డె ఆఫ్రికా జోన్ గ్రూప్‌డి పోటీల్లో అద్భుత ఆటను కనబరిచిన మెగా టోర్నీకి దూసుకెళ్లింది.

కీలకమైన మ్యాచ్‌లో కేప్ వెర్డె త్రీ-0 గోల్స్ తేడాతో ఈశ్వతిని టీమ్‌ను చిత్తు చేసింది. ఐస్‌లాండ్ తర్వాత ప్రపంచకప్‌కు అర్హత సాధించిన అతి తక్కువ జనాభా కలిగిన రెండో దేశంగా కేప్ వెర్డె అరుదైన రికార్డును సొంతం చేసుకుంది. వచ్చే ఏడాది జరిగే వరల్డ్‌కప్‌లో 48 దేశాలు పోటీ పడనున్నాయి. ఆఫ్రికా జోన్‌కు 9 బెర్త్‌లు కేటాయించగా ఆరు జట్లు ఇప్పటికే వరల్డ్‌కప్ బెర్త్‌లను ఖరారు చేసుకున్నాయి.

2030లో అహ్మదాబాద్ వేదికగా మెగా పోటీలు

లండన్: ప్రతిష్ఠాత్మకమైన కామన్‌వెల్త్త్ క్రీడలకు భారత్ రెండో ఆతిథ్యం ఇవ్వనుంది. గుజరాత్‌లోని అహ్మదాబాద్ వేదికగా 2030లో కామన్‌వెల్త్త్ పోటీలు జరుగనున్నాయి. ఇంతకుముందు 2010లో రాజధానిఢిల్లీలో కామన్‌వెల్త్త్ పోటీలను నిర్వహించారు. తాజాగా రెండోసారి మెగా పోటీలకు భారత్ వేదికగా నిలువనుంది. ఒలింపిక్స్ తర్వాత ప్రపంచ క్రీడల్లో రెండో అతి పెద్ద క్రీడా సంగ్రామంగా కామన్‌వెల్త్ గేమ్స్ పేరు తెచ్చుకున్నాయి. మరో ఐదేళ్ల తర్వాత జరిగే పోటీలను అహ్మదాబాద్‌లో నిర్వహించేందుకు కామన్‌వెల్త్ స్పోర్ట్ బాడీ నిర్ణయం తీసుకుంది. ప్రపంచంలోనే అతి పెద్ద స్టేడియంగా పేరు తెచ్చుకున్న అహ్మదాబాద్‌లోని నరేంద్ర మోడీ క్రీడా మైదానం ఈ పోటీలకు వేదికగా ఎంపికైంది. నైజీరియాలోని అబూజా నగరంతో పోటీ పడి అహ్మదాబాద్ మెగా క్రీడలను నిర్వహించే ఛాన్స్‌ను దక్కించుకుంది.

నవంబర్ 26న గ్లాస్గోలో జరిగే కామన్‌వెల్త్ గేమ్స్ ప్రత్యేక వార్షిక సమావేశంలో ఈ నిర్ణయాన్ని అధికారికంగా ప్రకటించనున్నారు. కాగా, ఢిల్లీ తర్వాత ఈ పోటీలకు ఆతిథ్యం ఇస్తున్న నగరంగా అహ్మదాబాద్ అరుదైన గౌరవాన్ని దక్కించుకుంది. ఇంగ్లండ్, కెనడా, భారత్, పాకిస్థాన్, ఆస్ట్రేలియాలతో సహా గతంలో ఆంగ్లేయుల పాలనలో ఉన్న దేశాలు ఈ పోటీల్లో పాల్గొనడం అనవాయితీగా వస్తోంది. కొన్నేళ్లుగా జరుగుతున్న కామన్‌వెల్త్ గేమ్స్‌లో భారత్ అసాధారణ ఆటతో పతకాల పంట పండిస్తోంది. ఇక సొంత గడ్డపై జరిగే క్రీడల్లో మరింత మెరుగైన ప్రదర్శన చేయడం ఖాయం.