ఆదిలాబాద్,కుమ్రం భీం ఆసిఫాబాద్,తాజా వార్తలు

తెలంగాణలో ఇవాళ మూడో విడత పంచాయతి ఎన్నికల పోలింగ్ జరుగుతోంది. అయితే, కొమురంభీం జిల్లాలో ఓ సర్పంచ్‌ అభ్యర్థి ఆత్మహత్యాయత్నానికి పాల్పడ్డాడు. రాస్‌పెల్లిలో సర్పంచ్‌ అభ్యర్థి రాజయ్య ఓటమి భయంతో పురుగులమందు తాగాడు. తన దగ్గర డబ్బులు లేవని.. దీంతో తనకు ఓటు వేస్తారో వేయరోనని రాజయ్య ఆవేదన వ్యక్తం చేస్తూ… ఓడిపోతాననే భయంతో ఆత్మహత్యాయత్నానికి పాల్పడ్డాడు. దీంతో వెంటనే రాజయ్యను గ్రామస్తులు ఆసుపత్రికి తరలించారు. మరోవైపు, రాష్ట్రంలో పంచాయతి ఎన్నికల పోలింగ్ కొనసాగుతోంది. పలు ప్రాంతాల నుంచి ప్రజలు.. ఓటు వేసేందుకు సొంత ఊళ్లకు చేరుకుంటున్నారు. ఈ ఎన్నికల్లో అధికార పార్టీ కాంగ్రెస్, బిఆర్ఎస్ మధ్య పోటీ రసవత్తరంగా జరుగుతోంది.

కొమురం భీం ఆసిఫాబాద్ జిల్లా, చింతలమానెపల్లి మండలం, బాలాజీ అనుకోడ గ్రామంలో రెండో విడత పంచాయతీ ఎన్నికల్లో ఓడిపోయిన సర్పంచ్ అభ్యర్థి వగాడి శంకర్ మంగళవారం గ్రామంలో విచిత్రమైన రీతిలో నిరసన వ్యక్తం చేశారు. ఈ ఎన్నికల్లో తనకు ఓటు వేయని వారు.. తాను ఇచ్చిన డబ్బులు తిరిగి ఇవ్వాలంటూ, లేదంటే తనకు ఓటు వేశారని గుర్తుగా పసుపు బియ్యం పట్టాలంటూ భార్యాపిల్లలతో కలిసి మంగళహారతిలో పసుపు, బియ్యం తీసుకొని ఇంటింటికీ తిరిగారు. ఈ సమాచారం అందుకున్న పోలీసులు సంఘటనా స్థలానికి చేరుకొని వారిని అదుపులోకి తీసుకొని ఇంటికి పంపించారు.

 రాత్రి వేళ బయట అడుగు వేయడానికే భయంగా ఉంది అంటూ సాత్‌మెరి గ్రామస్తులు వణికిపోతున్నారు. పొలంలో ఉన్న మండపానికి కట్టిన ఆవుపై పులి దాడి చేయడంతో కలకలం రేగింది. ఆవు అక్కడికక్కడే మృతి చెందడంతో గ్రామంలో భయాందోళన నెలకొంది. ఘటన విషయం తెలుసుకున్న వెంటనే అటవీశాఖ సిబ్బంది సంఘటన స్థలానికి చేరుకుని పరిస్థితిని పరిశీలించారు. మొదట ఇది చిరుత దాడి అనుకున్నా రేంజ్ అధికారి నాగవత్ స్వామి నేతృత్వంలోని బృందం పరిశీలనలో అది పెద్ద పులి (టైగర్) దాడి అని నిర్ధారించారు. గ్రామ పరిసరాల్లో పులి అడుగుజాడలు కనబడడంతో రాత్రివేళల్లో ఎవరూ బయటకు రావడం లేదు. పిల్లలు కూడా భయంతో ఇళ్లలోనే ఉన్నారు. పశువులను రైతులు ఇంటి ముందు కడుతున్నారు. అటవీశాఖ అధికారులు రెండు రోజులపాటు ప్రజలు అప్రమత్తంగా ఉండాలని సూచించారు. పులి కదలికలను గమనించేందుకు ప్రత్యేక బృందాలు కెమెరాలు ఏర్పాటు చేశాయి. గ్రామంలో భద్రత చర్యలను మరింత కట్టుదిట్టం చేశారు. ఈ కార్యక్రమంలో ఎస్‌ఎస్‌ఓ చంద్రారెడ్డి, బీట్ ఆఫీసర్లు సంతోష్, భీంజి, నాయక్, బేస్ క్యాంప్ సిబ్బంది జుగాందిరావ్, మారుతి, జంగు తదితరులు పాల్గొన్నారు.

కేంద్ర ప్రభుత్వం పత్తి రైతుల జీవితాలను కష్టాల పాలు చేస్తుందని తేమ శాతంతో పాటు కొత్తగా కాపాస్ కిసాన్ ఆప్ ప్రవేశంతో సమస్యలకు తెర లేపిందని పత్తి రైతులు ఆందోళన బాట పట్టారు. నేరడిగొండ రైతుల వద్ద కొనే పత్తి పంట కొనుగోలు లో తేమ శాతాన్ని పెంచి తీసుకోవాలని మండల కేంద్రంలోని జాతీయ రహదారిపై రాస్తా రోకో నిర్వహించారు.రాకపోకలను స్థభింప చేశారు. కేంద్ర ప్రభుత్వానికి వ్యత రేకంగా నినాదాలు చేశారు. ఈ సందర్భంగా బోథ్ వ్యవసాయ మార్కెట్ కమిటీ ఉప అధ్యక్షులు ఆడే వసంత్ రావు మాట్లాడుతూ పత్తి లో తేమ శాతాన్ని 12 నుండి 20 శాతానికి పెంచి రైతుల వద్ద పత్తి కొనుగోలు చేయాలని, సోయాబీన్ తేమశాతాన్ని ఎనిమిది శాతం

నుండి 18 శాతం వరకు పెంచాలని డిమాండ్ చేశారు. కొత్తగా ప్రవేశ పెట్టిన కాపాస్ కిసాన్ ఆప్ ను రద్దు చేయాలని డిమాండ్ చేశారు.పత్తి రైతులను ఆదుకోవాలని అన్నారు. సమస్యను పరిష్కరించేందుకు కలెక్టర్ రావాలని డిమాండ్ చేశారు.రైతుల ఆందోళనతో రహదారికి ఇరువైపులా కిలోమీటర్ల వాహనాలు నిలిచిపోయాయి,తేమ శాతం పేరుతో సీసీఐ రైతులను ఇబ్బందులకు గురి చేస్తుందని, కఫాస్ కిషన్ యాప్ సమస్యలు తప్పడం లేదని వెంటనే కపాస్ కిషన్ యాప్ రద్దు చేయాలని కేంద్ర ప్రభుత్వానికి సిసిఐ కి వ్యతిరేకంగా నినాదాలు చేశారు, ఈ కార్యక్రమంలో మండల రైతులు నాయకులు పాల్గొన్నారు.

రాష్ట్రం లో పత్తి రైతుల పరిస్థితి చాలా ఘోరంగా ఉందని, వారి సమస్యలు పరిష్కరించాలని జన జాగృతి అ ధ్యక్షురాలు కల్వకుంట్ల కవిత డిమాండ్ చేశారు. తాను చేపట్టిన జాగృతి జనం బాటలో భాగంగా జిల్లా కేంద్రంలోని మార్కెట్ యార్డ్‌లో పత్తి కొనుగోళ్ళు జరుగుతున్న తీరును ఆమె సోమవారం ప రిశీలించారు. రైతులకు మేలు చేసేలా సమస్యను కేంద్ర, రాష్ట్ర ప్రభుత్వలా దృష్టికి తీసుకెళ్లాలని కలెక్టర్‌తో ఫోన్‌లో సంప్రదించారు. ఈ విషయమై కేం ద్రప్రభుత్వంతో మాట్లాడతానని రైతులకు భరోసా ఇచ్చారు. తేమ శాతం పెంచే విధంగా కృషి చేస్తానని అన్నారు. ఆదిలాబాద్ ఎంపి, ఎంఎల్‌ఎ, బిజెపికి చెందిన వారు ఉన్నా పత్తి రైతులను ఆదుకునే బాధ్యత లేదా అని ప్రశ్నించారు. పత్తి రైతులను చూస్తుంటే కళ్లలో నీళ్లు వస్తున్నాయని ఆవేదన వ్యక్తం చేశారు. తక్షణం బ్రిడ్జిని వెంటనే పూర్తి చే యాలని, ఇందుకు ఎంపి, ఎంఎల్‌ఎ చొరవ చూ పాలని అన్నారు. అంతకుముందు జిల్లా కేంద్రం లోని ఆదివాసీ పోరాటయోధుడు కొమురం భీం విగ్రహానికి నివాళులు అర్పించారు. ఆమె వెంట ఆదిలాబాద్ జాగృతి అధ్యక్షుడు శ్రీనివాస్ రావు తదితరులు ఉన్నారు.

కొమురం భీం ఆసిఫాబాద్ జిల్లా, దహెగాం మండలం, గెర్రె గ్రామంలో శనివారం దారుణం చోటుచేసుకుంది. నిండు గర్భిణి అయిన కోడలిని స్వంత మామే గొడ్డలితో దారుణంగా నరికి హతమార్చాడు. స్థానికులు తెలిపిన వివరాల ప్రకారం.. తలండి లచ్చయ్య, అనసూర్య దంపతుల కుమార్తె శ్రావణి (23), అదే గ్రామానికి చెందిన శివర్ల సత్తయ్య, సత్తక్క దంపతుల చిన్న కొడుకు శేఖర్ ప్రేమ వివాహం చేసుకున్నారు. ప్రస్తుతం శ్రావణి 9 నెలల గర్భిణి. వచ్చే నెల వైద్యులు ప్రసవం కోసం ఆమెకు డేట్ కూడా ఇచ్చారు. అయితే, శ్రావణి, శేఖర్ కులాలు వేర్వేరు కావడంతో శేఖర్ తండ్రికి వీరి వివాహం ఇష్టం లేదు. శ్రావణి ప్రస్తుతం వారి తల్లిగారింటిలో ఉంది. వారి ఇంటిలో ఎవరూ లేని సమయం చూసిన మామ సత్తయ్య గొడ్డలితో దాడి చేసి దారుణంగా హత్య చేశాడు. కాగజ్‌నగర్ డిఎస్‌పి వహిదుద్దీన్, సిఐ కుమార స్వామి సంఘటన స్థలానికి చేరుకుని పరిశీలించారు. మృతురాలు శ్రావణి తండ్రి లచ్చయ్య ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.

ఆసిఫాబాద్: భార్య మీద కోపంతో ఆమె పుట్టింటినే భర్త తగలబెట్టాడు. ఈ సంఘటన కుమురంభీం జిల్లా లింగాపూర్ మండలంలో జరిగింది. పోలీసులు తెలిపిన వివరాల ప్రకారం… జైనూరు మండల కేంద్రానికి చెందిన ముజాహిద్ బేగ్ అనే యువకుడు ఎల్లాటాపార్‌కు చెందిన షమాబీ అనే యువతిని పెళ్లి చేసుకున్నాడు. ముజాహిద్‌కు ఆమెను పెళ్లి చేసుకోవడంతో ఇష్టం లేకపోవడంతో భార్యతో గొడవకు దిగాడు. దంపతుల మధ్య వివాహం జరిగినప్పటి నుంచి గొడవలు జరుగుతున్నాయి. 20 రోజుల క్రితం షమాబీ తన పుట్టింటికి వెళ్లింది. అల్లుడు అత్తారింటికి చేరుకొని భార్యతో గొడవకు దిగాడు. ఇద్దరు మధ్య గొడవ తారాస్థాయికి చేరుకోవడంతో గ్యాస్ సిలిండర్ లీక్ చేసి ఇంటికి నిప్పంటించి వెళ్లిపోయాడు. ఇల్లు పూర్తిగా దహనమైంది. స్థానికుల సమాచారం మేరకు పోలీసులు ఘటనా స్థలానికి చేరుకొని కేసు నమోదు చేసి దర్యాప్తు చేస్తున్నారు.