ఆంధ్రప్రదేశ్ వార్తలు,తాజా వార్తలు

అమరావతి: పల్నాడు జిల్లా సత్తెన్న పల్లి మండలం ధూళిపాళ్ళలో దారుణం చోటు చేసుకుంది. దుండగులు ఇంట్లోకి చొరబడి తల్లి, కుమారుడిపై హత్యాయత్నం చేశారు. కుమారుడు మృతి చెందగా, తల్లి పరిస్థితి విషమంగా ఉంది. స్థానికులు సమాచారం మేరకు పోలీసులు ఘటనా స్థలానికి చేరుకుని కేసు నమోదు చేసుకుని.. దర్యాప్తు చేస్తున్నారు. వివరాల్లోకి వెళితే.. తల్లి కృష్ణకుమారి, కుమారుడు సాంబశివరావుగా గుర్తించారు. నిందితులను పోలీసులు అదుపులోకి తీసుకున్నారు. 

అమరావతి: కూటమి పాలనలో రైతన్నలను పట్టించుకోవడం లేదని వైసిపి మాజీ మంత్రి బొత్స సత్యనారాయణ తెలిపారు. రైతుల తరపున వైఎస్ఆర్ సిపి నేతలు మాట్లాడితే.. రాజకీయాలు చేస్తున్నారంటున్నారని అన్నారు. ఈ సందర్భంగా ఆయన మీడియాతో మాట్లాడుతూ.. రైతు సమస్యలను పట్టించుకోకుండా కేంద్రానికి లేఖలు రాస్తే ఊరుకుంటారా? అని ప్రశ్నించారు. మార్క్ ఫెడ్ ద్వారా మొక్క జొన్న ఎందుకు కొనుగోలు చేయలేదని, బడా బాబుల గురించే బాబు ఆలోచిస్తున్నారని విమర్శించారు. చంద్రబాబు భూములు రియల్ ఎస్టేట్ కు కట్టబెడుతున్నారని, ప్రజల ఆస్తులను, ప్రజాధనాన్ని కారు చౌకగా ప్రైవేట్ వ్యక్తులకు కట్టబెడుతున్నారని మండిపడ్డారు. ప్రజలు మంచి చేస్తారని అధికారమిస్తే.. కూటమి పాలకులు దోపిడీకి పాల్పడుతున్నారని, ప్రజలకు మంచి చేయాలనే ఆలోచన కూటమి పాలకులకు లేదని ధ్వజమెత్తారు.

18 నెలల్లో కూటమి పాలకులు ప్రజలకు చేసిన మేలు ఏంటీ? అని రైతులకు సహాయం ఎప్పుడు చేస్తారో కూటమి పాలకులు చెప్పాలి? అని ప్రశ్నించారు. కూటమి పాలనలో పథకాలు పేదవాళ్ల దగ్గరకు వెళ్లడం లేదని, వైఎస్ఆర్ సిపి చరిత్రలో నిలిచిపోయే పాలనా సంస్కరణలు తెచ్చిందని, గ్రామాల్లో గ్రామ స్వరాజ్యం తీసుకొచ్చింది వైఎస్ఆర్ సిపి ప్రభుత్వమని కొనియాడారు. పథకాల పేర్లు మార్చడానికి కూటమి అధికారంలోకి వచ్చినట్లుందని, ప్రభుత్వ మెడికల్ కాలేజీలను ప్రైవేటు పరం చేయడమేంటీ? అని నిలదీశారు. కూటమి ప్రభుత్వం పాలనలో వైఫల్యం చెందిందని ఎద్దేవా చేశారు. మంత్రులు, అధికారులు, సహచరుల మీద కూడా చంద్రబాబుకు నమ్మకం లేదని అన్నారు. గిరిజన విద్యార్థులకు సరైన పోషకాహారం అందక ప్రాణాలు కోల్పోతున్నారని బొత్స సత్యనారాయణ ఆగ్రహం వ్యక్తం చేశారు.   

అమరావతి: అన్నమయ్య జిల్లా మదనపల్లె పట్టణంలో కారుకు అగ్ని ప్రమాదం జరిగింది. కారులో ఒక్కసారిగా మంటలు చెలరేగాయి. కారులో ఉన్నవారు అప్రమత్తమై కిందికి దిగడంతో పెను ప్రమాదం తప్పింది. కదిరి రోడ్డులో రాయలసీమ స్కూల్ వద్ద ఈ ఘటన చోటు చేసుకుంది. స్థానికుల సమాచారం మేరకు పోలీసులు, అగ్నిమాపక సిబ్బంది ఘటనా స్థలానికి చేరుకుని.. మంటలు ఆర్పే ప్రయత్నం చేశారు. పోలీసులు కేసు నమోదు చేసుకుని దర్యాప్తు చేశారు. కారులో ప్రయాణించిన వారికి ఏమీ కాకపోవడంతో వారందరూ ఊపిరి పీల్చుకున్నారు.

యువకుడి కాలికి శస్త్రచికిత్స చేసిన వైద్యులు సర్జికల్ బ్లేడ్ కాలు లోపల మర్చిపోయి కుట్లు వేసిన సంఘటన ఆంధ్రప్రదేశ్ లోని కాకినాడ జిల్లా తుని ప్రభుత్వ ప్రాంతీయ ఆసుపత్రిలో చోటుచేసుకుంది. వివరాలలోకి వెళితే.. చిన్నా అనే యువకుడు తుని మండలం ఎస్ అన్నవరం పంచాయతీ పరిధిలోని రామక్రిష్ణ నగర్ లో నివసిస్తున్నాడు. కాగా సంవత్సరన్నర క్రితం కాలికి గాయం అవ్వడంతో విశాఖపట్నంలో శస్త్రచికిత్స చేయించుకున్నాడు. ఆ సమయంలో కాలులో స్టీల్ రాడ్డు, స్క్రూ వేశారు. కొన్నిరోజులుగా కాలులో నొప్పి రావడంతో తుని ఆసుపత్రికి వచ్చి కాలులో ఉన్న స్క్రూ ను తొలగించాలని డాక్టర్లను సంప్రదించాడు. డాక్టర్లు శస్త్రచికిత్స చేసి కాలులో ఉన్న స్క్రూను తొలగించారు. ఈ క్రమంలో శస్త్రచికిత్సకు ఉపయోగించిన సర్జికల్ బ్లేడ్ ను కాలు లోపల ఉంచేసి కుట్లు వేశారు.ఆ తర్వాత ఎక్స్ రేలో కనపడడంతో మళ్లీ ఆపరేషన్ చేసి ఆ బ్లేడును తొలగించారు. 

అమరావతి: ప్రపంచవ్యాప్తంగా ఎపి సిఎం చంద్రబాబు నాయుడు అప్పులు తీసుకొస్తున్నారని వైసిపి మాజీ మంత్రి అంబటి రాంబాబు తెలిపారు. అమరావతిని అడ్డం పెట్టుకుని చంద్రబాబు భూములను దోచుకుంటున్నారని అన్నారు. ఈ సందర్భంగా అంబటి మీడియాతో మాట్లాడుతూ.. చంద్రబాబు అధికారంలోకి రాగానే భూముల ధరలు తగ్గాయని, అమరావతి కోసం ఇన్నీఅప్పులు తీసుకొచ్చి రూ.3 వేల కోట్లకే టెండర్లు పిలిచారని విమర్శించారు. చంద్రబాబు నిజస్వరూపం రాష్ట్ర ప్రజలకు ఇప్పుడిప్పుడే అర్థమౌతుందని, రాజధానిని పూర్తి చేయకుండా సీరియల్ కథలా నడపాలన్నది చంద్రబాబు ప్లాన్ అని అంబటి మండిపడ్డారు. అమరావతిలో ఒక్క శాశ్వత భవనం లేదని, అమరావతిలో నిర్మించిన భవనం తాత్కాలికమేనని ఎద్దేవా చేశారు. పార్లమెంట్ కు రూ.970 కోట్లు, కానీ తాత్కాలిక అసెంబ్లీకే రూ.700 కోట్లు ఖర్చు, తెలంగాణ సచివాలయానికి రూ.500 కోట్లు ఖర్చు చేశారని అంబటి రాంబాబు పేర్కొన్నారు. 

కర్నూలు జిల్లాలో ఘోర రోడ్డు ప్రమాదం జరిగింది. ఎమ్మిగనూరు మండలంలోని కోటేకల్‌ సమీపంలో వేగంగా దూసుకొచ్చిన రెండు కార్లు ఢీకొన్నాయి. ఈ ప్రమాదంలో ఐదుగురు మృతి చెందినట్లు తెలుస్తోంది. చినిపోయిన వారిలో ఇద్దరు చిన్నారులు కూడా ఉన్నారు. ఈ ఘటనలో పలువురికి తీవ్ర గాయాలయ్యాయి. సమాచారం అందుకున్న పోలీసులు వెంటనే సంఘటనాస్థలానికి చేరుకుని సహాయక చర్యలు చేపట్టారు. గాయపడిన వారిని చికిత్స కోసం సమీపంలోని ఆస్పత్రికి తరలించారు. ఈ ప్రమాదంపై కేసు నమోదు చేసి దర్యాప్తు చేయనున్నట్లు పోలీసులు తెలిపారు. ఈ ఘటనకు సంబంధించిన పూర్తి వివరాలు తెలియాల్సి ఉంది.

నివాసాల వద్దకు కొండచిలువ రావడంతో స్థానికులు భయాందోళనకు గురైన సంఘటన ఆంధ్రప్రదేశ్ లోని కడప జిల్లా కొండాపురం సిఎంఆర్ కాలనీలో శుక్రవారం చోటుచేసుకుంది. ఓ ఇంటి వద్ద కొండచిలువ కోడిపుంజును మింగుతుండగా స్థానికులు గమనించి దాడి చేశారు. దీంతో కొండచిలువ కోడిపుంజును వదిలిపెట్టింది. ఆ తర్వాత స్థానికులు కొండచిలువను కొట్టి చంపారు. గంటికోట జలాశయం వెనుక జలాల నుంచి కొండచిలువ వచ్చినట్లు స్థానికులు తెలిపారు.

అమరావతి: ఎపిలో ఐదేళ్ళు విధ్వంసం జరిగిందని సిఎం చంద్రబాబు నాయుడు తెలిపారు.రాజధాని నిర్మాణానికి రైతులు స్వచ్ఛందంగా ముందుకొచ్చారని అన్నారు. ప్రధాని నరేంద్ర మోడీ వచ్చి రాజధాని పనులను పునః ప్రారంభించారని చెప్పారు. రూ.1,334 కోట్లతో 15 బ్యాంకులు, బీమా సంస్థలకు శంకుస్థాపనలు జరిగాయని అన్నారు. ఈ సందర్భంగా ఆయన మీడియాతో మాట్లాడుతూ..34 వేల ఎకరాలు ఇచ్చిన రైతులకు మనస్ఫూర్తిగా ధన్యవాదాలు తెలియజేశారు. 2028 మార్చి నాటికి పూర్తి చేసేలా పనులు జరుగుతున్నాయని, పనులు వేగవంతానికి ఆర్థిక మంత్రి నిర్మలా సీతారామన్ ముఖ్య కారణమని అన్నారు. తమ కంటే వేగంగా అమరావతికి రూ. 15 వేల కోట్ల నిధులిచ్చారని, దేశ ఆర్థిక వ్యవస్థను నిర్మల గాడిన పెడుతూ వస్తున్నారని చంద్రబాబు పేర్కొన్నారు.

ఇక్కడున్న ఫైనాన్సియల్ సిటీ దేశంలో ఎక్కడా లేదని, వినూత్న నగరాన్ని నిర్మిస్తున్నామని అన్నారు. బ్యాంక్ కార్యాలయాన్ని ఒకేచోట ఉండటంతో ఎన్నో ప్రయోజనాలని, 6,576 మందికి ఉపాధి అవకాశాలు వస్తాయని ఆనందాన్ని వ్యక్తం చేశారు. వచ్చే ఏడాది 3వ లార్జెస్ట్ ఎకానమీగా మారబోతున్నామని, రాష్ట్ర విభజనతో పదేళ్లపాటు ఎన్నో ఇబ్బందులు పడ్డామని అన్నారు. అమరావతి పనులు ఊపందుకున్న సమయంలో ప్రభుత్వం పడిపోయిందని, వెంటిలేటర్ పై ఉన్న ఎపిని నిర్మలా సీతారామన్ బయటకు తీసుకొచ్చారని చెప్పారు. ఎపి ఆర్థిక స్థితి ఇంకా ఎంతో కోలుకోవాల్సి ఉందని, అమరావతి నెక్ట్స్ లెవల్ కు తీసుకెళ్లేందుకు అన్ని చర్యలు తీసుకుంటున్నామని అన్నారు. దేశం గర్వపడేలా అమరావతి రూపుదిద్దుకుంటుందని, సాంకేతికతను అందిపుచ్చుకునే హబ్ గా అమరావతి తయారవుతుందని సూచించారు. 7 జాతీయ రహదారులు అమరావతికి అనుసంధానం అవుతామని, 2028 నాటికి అమరావతిలో అన్ని నిర్మాణాల పూర్తికి కార్యాచరణ జరుగుతుందని చంద్రబాబు నాయుడు స్పష్టం చేశారు. 

అమరావతి: దేవతల రాజధాని.. రైతుల త్యాగం.. అమరావతి అని ఎపి విద్యాశాఖ మంత్రి లోకేష్ కొనియాడారు. గత వైసిపి ప్రభుత్వం విధ్వంసం చేయాలని చూసిందని అన్నారు. 15 బ్యాంకులు, ప్రభుత్వ రంగ సంస్థల ప్రధాన కార్యాలయాల నిర్మాణాలకు కేంద్రమంత్రి నిర్మల సీతారామన్ శంకుస్థాపన చేశారు. ఈ సందర్భంగా లోకేష్ మీడియాతో మాట్లాడుతూ.. మూడు రాజధానులని చెప్పి ఒక్క ఇటుక కూడా వేయలేదని, ఒక వ్యక్తి నివాసానికి రూ. 700 కోట్లు పెట్టి విశాఖలో ప్యాలెస్ కట్టారని విమర్శలు గుప్పించారు. ఎన్ని ఇబ్బందులు పెట్టినా జై అమరావతి నినాదంతో ముందు కెళ్లామని తెలియజేశారు. ఒకే రాష్ట్రం.. ఒకే రాజధాని అని ఆనాడు పోరాటం చేశామని, జై అమరావతి అన్నందుకు వైసిపి ప్రభుత్వం రైతులపై కేసులు పెట్టారని మండిపడ్డారు. 631 రోజులు అమరావతి ఉద్యమం నడిపించిందని, 270 మంది రైతులు ప్రాణాలు కోల్పోవడం చూశామని ఆవేదన వ్యక్తం చేశారు.  సుమారుగా 3 వేల మంది రైతులపై ఆనాడు కేసులు పెట్టారని, కూటమి ప్రభుత్వంలో అమరావతి పనులు వేగంగా సాగుతున్నాయని లోకేష్ పేర్కొన్నారు. స్త్రీశక్తి అంటే తనకు గుర్తొచ్చే మొదటి వ్యక్తి నిర్మలా సీతారామన్ అని ప్రశంసించారు.పార్లమెంట్ లో  ప్రతిపక్ష సభ్యులకు సరైన సమాధానం చెబుతారని, వరుసగా 8 కేంద్ర బడ్జెట్ లు నిర్మలాసీతారామన్ ప్రవేశ పెట్టారని అన్నారు. నిర్మలా సీతారామన్ జీవితం మనకు ఒక పాఠం అని లోకేష్ గుర్తుచేశారు. 

అమరావతి: తిరుమలలో ఎన్నో సంస్కరణలు, ప్లాస్టిక్ బ్యాన్ చేశామని టిడిపి మాజీ చైర్మన్ వైవి సుబ్బారెడ్డి తెలిపారు. తన హయాంలో టిడిపిలో అవినీతి అనేది లేదని అన్నారు. ఈ సందర్భంగా ఆయన మీడియాతో మాట్లాడుతూ.. టిటిడి ఆస్తులపై శ్వేతపత్రం విడుదల చేశామని, తిరుమల లడ్డూపై దుష్ప్రచారం చేస్తున్నారని వైసిపి ప్రభుత్వంపై విమర్శించారు. రాజకీయాల కోసం ఆలయాలను వాడుకుంటున్నారని, తాను తప్పు చేసి ఉంటే.. సుప్రీంకోర్టుకు ఎందుకు వెళ్తా? అని వైవి సుబ్బారెడ్డి ప్రశ్నించారు. టిటిడి లడ్డూ వ్యవహారంపై లైడిటెక్టర్ పరీక్షకు కూడా సిద్ధమని తెలియజేశారు. కల్తీ నెయ్యి అంటూ భక్తుల మనోభావాలను దెబ్బతీశారని, లడ్డూ ప్రసాదంపై ఇప్పటి వరకు స్పష్టత ఇవ్వలేదని వైసిపి ప్రభుత్వంపై మండిపడ్డారు.

తమ హయాంలో రూ. 326కి నెయ్యి కొంటే కల్తీ జరిగిందని అంటున్నారని, 2014-19 మధ్య నెయ్యిని రూ. 270 కి కొనుగోలు చేశారని ధ్వజమెత్తారు. మరి అప్పుడు కల్తీ జరిగినట్టు కాదా? అని ప్రశ్నించారు. 2019- 24 సమయంలోనే కాదు.. అంతకుముందు కూడా దర్యాప్తు జరిపించాలని సూచించారు. టిటిడి ద్వారా లాభపడాలని తనకు, తన కుటుంబానికి లేదని అన్నారు. పరకామణి విషయంలో ఏం జరిగిందో తనకు తెలియదని, పరకామణి అంశంలో రేపు విజయవాడలో సిఐడి విచారణకు హాజరవుతానని పేర్కొన్నారు. అప్పన్న గతంలో తనకు పిఎ మాత్రమేనని.. తర్వాత తనతో లేరని, టిటిడి వ్యవహారంతో అప్పన్నకు సంబంధం లేదని.. అదే విషయం సిట్ కు చెప్పానని అన్నారు. శ్రీవారి దర్శనానికి అప్పన్న వచ్చారేమో తనకు తెలియదని వైవి సుబ్బారెడ్డి స్పష్టం చేశారు.