ఆంధ్రప్రదేశ్ వార్తలు,తాజా వార్తలు

అమరావతి: కుటుంబాన్ని కూడా పక్కన పెట్టి ఏ పరిస్థితిలోనైనా ప్రజల రక్షణ కోసం ప్రాణాలను కూడా పణంగా పెట్టే పోలీసులు అంటే తనకు ఎప్పుడూ గౌరవం ఉంటుందని ముఖ్యమంత్రి చంద్రబాబు నాయుడు తెలిపారు. లా అండ్ అర్డర్ కంటే ఏదీ ముఖ్యం కాదని, పోలీసులకు పూర్తి స్వేచ్ఛ ఇచ్చామన్నారు. ఆడ బిడ్డలపై అఘాయిత్యం చేస్తే ఎంతటివాడైనా సరే అదే వాడికి చివరి రోజు కావాలన్నారు. లా అండ్ ఆర్డర్ కాపాడటం కోసం, ప్రజల భద్రత కోసం రాజీ లేని పోరాటం చేశానని, దాని ఫలితమే 2003లో తన మీద 23 క్లైమోర్ మైన్స్ బ్లాస్ట్ ఘటన జరిగిందని గుర్తు చేశారు. ప్రభుత్వానికి, ప్రజలకు అండగా ఉండే పోలీసులకే ఎప్పుడూ మద్దతుగా ఉంటానని స్పష్టం చేశారు. మంగళగిరి ఏపీఎస్పీ బెటాలియన్ గ్రౌండ్స్ లోని పోలీస్ అమరవీరుల సంస్మరణ సభలో ముఖ్యమంత్రి చంద్రబాబు నాయుడు, హోం మంత్రి అనిత, డిజిపి హరీష్ కుమార్ గుప్తా, తదితరులు పాల్గొన్నారు. సిఎం చంద్రబాబు భద్రతా దళాల గౌరవ వందనం స్వీకరించారు. అనంతరం పోలీస్ అమరవీరులకు సిఎం నివాళులర్పించారు. అనంతరం చంద్రబాబు ప్రసంగించారు. 

పాస్టర్ ప్రవీణ్ హత్య కేసును రెండు మతాల మధ్య చిచ్చు పెట్టే ప్రయత్నం చేశారని, సిసి కెమెరాల సహాయంతో పోలీసులు కేసును ఛేదించారని ప్రశంసించారు. సకాలంలో పోలీసు వ్యవస్థ పనిచేసింది కాబట్టి తీవ్రమైన నష్టాన్ని నివారించగలిగామన్నారు. మనం చేసే పనులే శాశ్వతమని, ప్రాణాలకు భయపడే వ్యక్తిని తాను కాదన్నారు.  కల్తీ మద్యంపై ముఖ్యమంత్రి చంద్రబాబు కీలక వ్యాఖ్యలు చేశారు. ఎవడు ఎక్కడ తప్పుచేసినా, దోషి ఎక్కడున్నా, ఏ పార్టీ వాడైనా సరే యాక్షన్ తీసుకోవాలని స్పష్టంగా చెప్పానని, రాష్ట్రంలో ఎవరు చనిపోయినా కల్తీ మద్యం వల్లే చనిపోయారని దుష్ప్రచారం చేయడం తగదని హెచ్చరించారు. పోలీసు వ్యవస్థ అప్రమత్తంగా ఉంటేనే ఇలాంటి వారి ఆటలు సాగవన్నారు.

సమాజంలో అశాంతి సృష్టించి లబ్ది పొందడం కోసం రాజకీయ ముసుగులో కొత్త నేరగాళ్లు బయలు దేరారని, వీళ్లు అసలు క్రిమినల్స్ కంటే ప్రమాదమన్నారు.  దొంగ ఒక సారి ఒక్క ఇంటినే దోచుకుంటాడని, కానీ ఈ కుట్ర రాజకీయం చేసే వాళ్లతో, ఫేక్ ప్రచారాలు చేసేవాళ్లతో చాలా ఎక్కువ నష్టం జరుగుతుందని చంద్రబాబు తెలియజేశారు. ప్రజలు లోతుగా ఆలోచించాలని, అర్థం చేసుకోవాలని సూచించారు.  సోషల్ మీడియా అనేది ఇప్పుడు పెద్ద ఛాలెంజ్ గా మారిందని, ఒకప్పుడు ప్రింట్ మీడియా, ఎలక్ట్రానిక్ మీడియాలే ఉండేవని, కానీ ఈ రోజు సోషల్ మీడియా వచ్చిందన్నారు. వాళ్లు ఏది అనుకుంటే అది పెట్టేసి వ్యక్తిగత హననానికి పాల్పడుతున్నారని,  దీన్ని కొత్త ఛాలెంజ్ గా తీసుకోవాలని పోలీసులకు సలహా ఇచ్చారు.  కొత్త ట్రెండ్స్ ను అరికట్టడానికి చొరవ తీసుకుని ముందుకెళ్లాలన్నారు. విశాఖకు 15 బిలియన్ డాలర్ల గూగుల్ పెట్టుబడి వచ్చిందంటే అది ఓ నమ్మకం అని, రాష్ట్రంలో పెట్టే పెట్టుబడులకు భద్రత ఉంటుందనే విశ్వాసంతోనే గూగుల్ ఇంత భారీ పెట్టుబడికి ముందుకొచ్చిందని, ప్రపంచానికే విశాఖ ఓ ఐటి, ఎఐ హబ్ గా తయారవుతుందని చంద్రబాబు పేర్కొన్నారు.  

అమరావతి: ఆంధ్రప్రదేశ్ రాష్ట్రం శ్రీసత్యసాయి జిల్లా ధర్మవరంలో మంగళవారం ఉదయం ఘోర రోడ్డు ప్రమాదం జరిగింది. ముదిగుబ్బ మండలం గుంజేపల్లిలో జెసిబిని బైక్ ఢీకొట్టడంతో ఇద్దరు వ్యక్తులు మృతిచెందారు. పోలీసులు ఘటనా స్థలానికి చేరుకొని కేసు నమోదు చేసి దర్యాప్తు చేస్తున్నారు. మృతులు కృష్ణాపురం గ్రామానికి చెందిన శేషు, కృష్ణగా గుర్తించారు. అతివేగమే ఈ ప్రమాదానికి కారణమని పోలీసులు భావిస్తున్నారు. ఇంకా వివరాులు తెలియాల్సి ఉంది. 

అమరావతి: ఆధ్యాత్మిక న‌గ‌రం తిరుప‌తిలో మందుబాబుల వీరంగం సృష్టిస్తున్నారు. బైక్ వెళ్తుండగా మ‌ద్యం మ‌త్తులో మ‌హిళ‌తో ముగ్గురు యువ‌కులు అస‌భ్యంగా ప్ర‌వ‌ర్తించారు. మ‌హిళ బంధువులు, స్థానికులు మందుబాబుల‌కు దేహ‌శుద్ధి చేశారు. వీడియో సోష‌ల్ మీడియాలో వైర‌ల్‌గా మారింది. తిరుపతి సమీపంలోని గూడూరులో విద్యార్థులు రెచ్చిపోయారు. మద్యం మత్తులో ఇంజనీరింగ్ కళాశాల విద్యార్థుల హల్‌చల్ చేశారు. జర్నలిస్టు, షాపు యువకుడిపై విచక్షణ రహితంగా దాడి చేశారు. సాధుపేట సెంటర్ లో దాడులకు సంబంధించిన దృశ్యాలు సీసీ కెమెరాల్లో రికార్డయ్యాయి. జర్నలిస్టుకు కూడా భద్రత క‌రువైందని, లా అండ్ ఆర్డ‌ర్ ప‌ర్య‌వేక్ష‌ణ‌పై విమ‌ర్శ‌లు వస్తున్నాయన్నారు.

గూడూరులో తరచూ విద్యార్థుల దాడులపై పోలీస్ అధికారులు దృష్టిసారించాలని స్థానికులు డిమాండ్ చేస్తున్నారు. ఒక్క జర్నలిస్టుకు భద్రత లేకపోతే ప్రజల పరిస్థితి ఏంటని నెటిజన్లు ప్రశ్నిస్తున్నారు. తిరుపతిలో గంజాయి రాయుళ్లు వీరవిహారం చేస్తున్నారు. తిరుమలకు వచ్చిన భక్తులపై దాడులు జరిగిన దాఖలలు చాలానే ఉన్నాయన్నారు. మందుబాబులు, గంజాయి రాయుళ్లపై పోలీసులు కఠిన చర్యలు తీసుకోవడంలేదన్నారు. పోలీసులు ఉన్నారా? లేరా? సోషల్ మీడియాలో కామెంట్లు వెల్లువెత్తుతున్నాయి. తిరుపతిలో భక్తులు వస్తూ పోతూ ఉంటారు, వాళ్లకు రక్షణ లేకుండాపోయిందని నెటిజన్లు వాపోతున్నారు. మద్యం మత్తులో బైక్ లపై విచ్చలవిడిగా డ్రైవింగ్ చేస్తూ స్థానికులను భయభ్రాంతులకు గురి చేస్తున్నారని వాళ్లు వాపోతున్నారు. ఇప్పటికే తిరుపతి నగరంలో ఎన్నో సంఘటన జరిగిన కూడా శాంతి భద్రతల విషయంలో మార్పు రావడం లేవని స్థానిక ప్రజలు ఆందోళన వ్యక్తం చేస్తున్నారు. 

రాజమండ్రిలో దర్శకుడు రామ్‌గోపాల్‌వర్మపై కేసు

అమరావతి: ప్రభుత్వ డిపోల నుంచి కాకుండా బయట్నుంచి పెద్ద ఎత్తున సరుకు తెచ్చి విక్రయిస్తున్నారని వైసిపి మాజీ మంత్రి పేర్నినాని తెలిపారు. ఎపి సిఎం చంద్రబాబు నాయుడుపై పేర్నినాని మండిపడ్డారు. ఈ సందర్భంగా ఆయన మీడియాతో మాట్లాడుతూ.. బార్లలో జరుగుతున్న అవినీతిని బయట పెట్టే దమ్ముందా? అని ప్రశ్నించారు. నెలకు రూ. 5 కోట్లు దండుకుని బార్లలో పెద్ద ఎత్తున స్కాం చేస్తున్నారని విమర్శించారు. నెలకు రూ. 5 కోట్లు లంచాల కింద వసూలు చేస్తున్నారని, ఆ డబ్బంతా ఎవరి జేబుల్లోకి వెళ్తోంది? అని నిలదీశారు.

చంద్రబాబుకు దమ్ముంటే బార్లలో తనిఖీలు చేసేందుకు రాగలరా? అని ప్రశ్నించారు. బార్లలో విక్రయించే మద్యం ఎక్కడిదో లెక్క తేల్చేందుకు.. ఎల్లోమీడియా, రాజకీయ పార్టీల సమక్షంలో తాము సిద్ధమని పేర్నినాని సవాల్ విసిరారు. నకిలి మద్యంపై డిప్యూటి సిఎం పవన్ కల్యాణ్ ఎందుకు మాట్లాడటం లేదు? అని అన్నారు. 16 నెలలుగా రాష్ట్రంలో నకిలీ మద్యం ఏరులై పారుతోందని ధ్వజమెత్తారు. రాష్ట్రంలో లక్షన్నర బెల్టు షాపులు ఉన్నాయని బెల్టు షాపులు ఉన్నట్లు చంద్రబాబే ఒప్పుకున్నారని, నకిలీ మద్యం కేసులో మిగతా వారిని ఎందుకు అరెస్టు చేయలేదు? అని పేర్నినాని ప్రశ్నించారు.

రేపోమాపో జయచంద్రా రెడ్డిపై సస్పెన్షన్ ఎత్తేస్తారని, జయచంద్రారెడ్డి, జనార్ధన్, సురేంద్ర ఫోన్లను ఎందుకు సీజ్ చేయలేదని, సంబంధం లేని జోగి రమేష్ ఫోన్లను ఎందుకు సీజ్ చేశారని పేర్నినాని ఆగ్రహం వ్యకం చేశారు.   

అమరావతి: జ‌ల‌పాతంలో యువ‌కుడు గ‌ల్లంతైన సంఘటన ఆంధ్రప్రదేశ్ రాష్ట్రం చిత్తూరు జిల్లా పలమనేరు రూరల్ మండలంలో జరిగింది.  యూనిస్ అనే యువకుడు తన స్నేహితులతో కలిసి కళ్యాణరేవు జలపాతానికి వెళ్లాడు.  యూనిస్ జలపాతంలో దూకి ఒడ్డుకు వస్తుండగా ఒక్కసారిగా మునిగిపోయాడు. సుడిగుండంలో చిక్కుకుని గల్లంతయ్యాడు. వెంటనే స్నేహితులు అగ్నిమాపక సిబ్బంది, పోలీసులకు సమాచారం ఇచ్చారు. పోలీసులు ఘటనా స్థలానికి చేరుకొని యువకుడి కోసం గాలింపు చర్యలు చేపట్టారు. గజఈతగాళ్లతో సహాయంతో కూడా గాలింపు చర్యలు చేపట్టారు. జలపాతంలో దూకిన దృశ్యాలు స్నేహితులు సెల్ ఫోన్ లో వీడియో తీశారు. దీనికి సంబంధించిన వీడియో సోషల్ మీడియాలో వైరల్ గా మారింది. 

అమరావతి: అనంతపురం జిల్లా గార్లదిన్నె మండలం కలగాసుపల్లి క్రాస్ వద్ద ఘోర అగ్ని ప్రమాదం జరిగింది. ప్రైవేటు బస్సు దగ్దం అయ్యిది. బెంగళూరు నుంచి రాయచూర్ వెళ్తున్న ప్రైవేటు బస్సులో టైరు పేలి మంటలు చెలరేగాయి. ఈ ఘటనలో డ్రైవర్ అప్రమత్తంగా ఉండడంతో ప్రాణనష్టం తప్పింది. స్థానికుల సమాచారం మేరకు అగ్నిమాపక సిబ్బంది ఘటనా స్థలానికి చేరుకొని మంటలను అదుపులోకి తీసుకొచ్చారు. 

మన తెలంగాణ / అమరావతి : 21వ శతాబ్దం 140 కోట్ల భారతీయులదని ప్రధాని నరేంద్ర మోడీ అన్నారు. ప్రజలే ప్రాధాన్యంగా తమ ప్రభుత్వ నిర్ణయాలు ఉంటాయని, అభివృద్ధే తమ విధానమని స్పష్టం చేశారు. 2047 నాటికి మన దేశం వికసిత భారత్‌గా మారాలన్న లక్ష్యంలో ఆంధ్రప్రదేశ్ తన వంతు కీలక సహకారం అందిస్తోందని చెప్పారు. గూగుల్ లాంటి ప్రపంచ ప్రఖ్యాత సంస్థ ఏపీలో భారీ పెట్టుబడి పెట్టేందుకు ముందుకు వచ్చిందని గుర్తుచేశారు. ‘అమెరికా వెలుపల తమ అతిపెద్ద పెట్టుబడిని ఏపీలో పెడుతున్నట్లు గూగుల్ సీఈఓ స్వయంగా చెప్పారన్నారు. విశాఖలో ఆర్టిఫిషియల్ ఇంటెలిజెన్స్ (ఏఐ) హబ్, డేటా సెంటర్, సబ్-సీ కేబుల్ వంటి భారీ ప్రాజెక్టులు రాబోతున్నాయని,

ఈ సబ్- సీ కేబుల్ వ్యవస్థకు విశాఖ గేట్‌వేగా మారనుందని మోదీ తెలిపారు. గురువారం కర్నూలు శివారులోని నన్నూరు వద్ద ‘సూపర్ జీఎస్టీ- సూపర్ సేవింగ్స్’ పేరుతో ఏర్పాటు చేసిన బహిరంగసభకు ప్రధాని మోదీ హాజరయ్యారు. ఈ సందర్భంగా రాష్ట్రవ్యాప్తంగా పలుచోట్ల నిర్మించిన, నిర్మించబోతున్న రూ.13,429 కోట్ల విలువైన ప్రాజెక్టులకు ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్ తో కలిసి ప్రధాని నరేంద్రమోదీ వర్చువల్‌గా ప్రారంభోత్సవాలు, శంకుస్థాపనలు చేశారు. అనంతరం ఆయన మాట్లాడుతూ గత 16 నెలల్లో డబుల్ ఇంజిన్ సర్కార్ కారణంగా ఏపీ అనూహ్య ప్రగతి సాధిస్తోందని, ఢిల్లీ, అమరావతి కలిసి పనిచేస్తుండటంతో అభివృద్ధి వేగంగా సాగుతోందని ప్రధాని మోదీ పేర్కొన్నారు. ఆంధ్రప్రదేశ్, భారతదేశ అభివృద్ధిని ప్రపంచమంతా గమనిస్తోందన్నారు. సీఎం చంద్రబాబు నాయుడు, గవర్నర్ జస్టిస్ అబ్దుల్ నజీర్, డిప్యూటీ సీఎం పవన్ కల్యాణ్, నారా లోకేశ్ తదితరులు సభలో పాల్గొన్నారు. సైన్స్, ఆవిష్కరణల కేంద్రంగా ఆంధ్రప్రదేశ్ ఉందని, రాష్ట్రంలో అనంత అవకాశాలతో పాటు యువతకు అపార శక్తి ఉందని ప్రధాని మోదీ అన్నారు.

అభివృద్ధి పనులకు శ్రీకారం : రూ.9,449 కోట్ల విలువైన పనులకు ప్రధాని మోదీ శంకుస్థాపనలు చేశారు. రూ.1,704 కోట్ల విలువైన ప్రాజెక్టులను ప్రధాని మోదీ ప్రారంభించారు. రూ. 2,276 కోట్ల విలువైన ప్రాజెక్టులను ప్రధాని జాతికి అంకితం చేశారు. కర్నూలులో రూ.2,880 కోట్లతో విద్యుత్ ట్రాన్స్‌మిషన్ వ్యవస్థకు, రూ.4,920 కోట్లతో ఓర్వకల్లు, కొప్పర్తి పారిశ్రామిక కారిడార్‌లకు, రూ.493 కోట్లతో కొత్తవలస-విజయనగరం మధ్య 4వ లైన్‌కు, రూ.184 కోట్లతో పెందుర్తి-సింహాచలం నార్త్ మధ్య రైల్ ఫ్లైఓవర్ లైన్‌కు ప్రధాని శంకుస్థాపన చేశారు.

మోదీ లాంటి నాయకుడిని చూడలేదు : చంద్రబాబు

మన అందరి భవిష్యత్తు కాపాడే నాయకుడు ప్రధాని మోదీ అని సీఎం చంద్రబాబు కొనియాడారు. 21వ శతాబ్దం మోదీకి చెందుతుందనడంలో సందేహం లేదన్నారు.

25 ఏళ్లుగా ప్రజా సేవలో సీఎంగా, ప్రధానిగా మోదీ ఉన్నారని తెలిపారు.మోదీ వంటి నాయకుడిని పొందడం దేశం ఎంతో అదృష్టం చేసుకుందన్నారు. 2047 నాటికి ప్రపంచంలో భారత్ అగ్రస్థానంలో నిలుస్తుందని, మోదీ సంకల్పంతో 11వ స్థానం నుంచి నాలుగో స్థానానికి చేరామన్నారు. మాటలతో కాదు చేతలతో చూపించే వ్యక్తి ప్రధాని మోదీ అని, జీఎస్టీ తగ్గింపుతో 99 శాతం వస్తువులు 5 శాతంలోపు పరిధిలోకి వచ్చాయన్నారు.

దేశం కోసం పనిచేసే కర్మయోగి మోదీ : ఉప ముఖ్యమంత్రి పవన్ కల్యాణ్

ప్రధానమంత్రి నరేంద్ర మోదీ ఏ విధమైన ఫలితాలూ ఆశించకుండా దేశం కోసం పనిచేసే ఒక కర్మయోగి అని ఆంధ్రప్రదేశ్ ఉప ముఖ్యమంత్రి పవన్ కల్యాణ్ కొనియాడారు. దేశ సేవే లక్ష్యంగా ప్రధాని ముందుకు సాగుతున్నారని ఆయన ప్రశంసించారు.

కూటమి ఎలాంటి ఇబ్బందులు ఎదురైనా తట్టుకుని నిలబడాలని, కనీసం 15 ఏళ్లకు తక్కువ కాకుండా బలంగా కొనసాగాలని ఆయన ఆకాంక్షించారు. ప్రధాని మోదీ, సీఎం చంద్రబాబు నాయకత్వంలో తామంతా సమష్టిగా పనిచేస్తామని, రాబోయే తరాల ఆకాంక్షలను నెరవేర్చేందుకు కృషి చేస్తామని పవన్ కల్యాణ్ స్పష్టం చేశారు.

కర్నూలు నుండి హెలికాప్టర్లో శ్రీశైలం బయలుదేరిన ప్రధాని మోదీమల్లికార్జున స్వామిని దర్శించుకున్నారు. ఈ సందర్భంగా అర్చకులు ప్రత్యేకపూజలు నిర్వహించి స్వామివారి తీర్థప్రసాదాలు అందజేశారు. మల్లికార్జునస్వామి ఆలయంలో మోడీ రుద్రాభిషేకం చేయగా, భ్రమరాంబ అమ్మవారి ఆలయంలో కుంకుమార్చన పూజ చేశారు. ప్రధానితో పాటు కర్నూలు నుండి చంద్రబాబు, పవన్ కల్యాణ్ ఒకే హెలికాప్టర్లో శ్రీశైలం వెళ్లారు. సున్నిపెంట హెలిప్యాడ్ వద్ద హెలికాప్టర్ ల్యాండ్ అవ్వడగా అక్కడ నుండి రోడ్డు మార్గంలో శ్రీశైలం చేరుకున్నారు.

శ్రీశైలంలో ప్రధాని మోదీభ్రమరాంబ మల్లికార్జున స్వామిని దర్శించిన అనంతరం ఆయన ఛత్రపతి శివాజీ స్పూర్తి కేంద్రాన్ని సందర్శించారు. సీఎం చంద్రబాబు నాయుడు, డిప్యూటీ సీఎం పవన్ కల్యాణ్తో కలసి శివాజీ దర్బార్ హాల్, రాజ దర్బార్లో ఉన్న శిల్పాలు, చిత్రాలను చూశారు. ఛత్రపతి శివాజీ స్పూర్తి కేంద్రం వివరాలను అడిగి తెలుసుకున్నారు. ఈ సందర్భంగా అక్కడి శివాజీ విగ్రహానికి పుష్పాలను సమర్పించారు. చత్రపతి శివాజీ స్ఫూర్తి కేంద్ర నిర్వహణ బాగుందని ట్రస్ట్ నిర్వాహకులను అభినందించారు.