admin

న్యూఢిల్లీ: అరుణ్ జైట్లీ స్టేడియంలో భారత్‌తో జరుగుతున్న రెండో టెస్ట్‌లో వెస్టిండీస్ ఆలౌట్ అయింది. 311 పరుగుల వద్దే 9 వికెట్లు కోల్పోయిన వెస్టిండీస్‌కి గ్రీవ్స్, సీల్స్‌ల జోడీ అండగా నిలిచింది. వీరిద్దరు కలిసి చివరి వికెట్‌కి 79 పరుగులు జోడించారు. ఈ క్రమంలో గ్రీవ్స్(50) అర్థశతకం కూడా సాధించాడు. అయితే బుమ్రా బౌలింగ్‌లో సీల్స్ (32) సుందర్‌కు క్యాచ్ ఇచ్చి ఔట్ కావడంతో వెస్టిండీస్ ఇన్నింగ్స్ ముగిసింది. భారత్ విజయానికి 121 పరుగుల లక్ష్యాన్ని ముందుంచారు. అయితే లక్ష్య చేధనలో భారత్ ఆరంభంలోనే తొలి వికెట్‌ను కోల్పోయింది. వారికన్ బౌలింగ్‌లో యశస్వీ జైస్వాల్(8) క్యాచ్ ఔట్ అయ్యాడు. దీంతో 2 ఓవర్లు ముగిసే సరికి భారత్ 1 వికెట్ నష్టానికి 9 పరుగులు చేసింది. క్రీజ్‌లో రాహుల్ (1), సుదర్శన్ (0) ఉన్నారు. భారత్ విజయానికి ఇంకా 112 పరుగులు చేయాల్సి ఉంది.

న్యూఢిల్లీ: భారత్ వెస్టిండీస్ మధ్య రుగుతున్న రెండో టెస్ట్‌ మ్యాచ్ ఆసక్తికరంగా మారింది. ఫాలో ఆన్‌తో రెండో ఇన్నింగ్స్‌ను ప్రారంభించిన వెస్టిండీస్ జట్టు భారత్‌కు గట్టి పోటీ ఇస్తుంది. ఆరంభంలో వేగంగా రెండు వికెట్లు కోల్పోగా.. ఆ తర్వాత క్యాంప్‌బెల్ (115), హోప్‌ (103)లు జట్టుకు మంచి స్కోర్ అందించారు. ఇద్దరు సెంచరీలు సాధించారు. కానీ, ఈ ఇద్దరు ఔట్ అయిన తర్వాత కెప్టెన్ చేజ్ (40) మినహా మిగితా వాళ్లెవరూ చెప్పుకోదగ్గ స్కోర్ చేయలేకపోయారు. అయితే వెస్టిండీస్ 9 వికెట్లు కోల్పోయి ఏకపక్షంగా మారిన మ్యాచ్‌ను జెస్టిన్ గ్రీవ్స్, జేడన్ సీల్స్‌ల జోడీ మలుపు తిప్పింది. చివరి వికెట్‌కు వీరిద్దరు కలిసి 50 పరుగులు జోడించారు. టీ-బ్రేక్ సమయానికి వెస్టిండీస్ 9 వికెట్ల నష్టానికి 361 పరుగులు చేసి 91 పరుగుల ఆధిక్యంలో ఉంది. 

చిన్న వయస్సులోనే ఐపిఎల్‌లో కాంట్రాక్ట్ సంపాదించుకొని.. టోర్నమెంట్ చరిత్రలోనే అత్యంత వేగవంతమైన సెంచరీ సాధించిన భారత క్రికెటర్‌గా చరిత్ర సృష్టించాడు వైభవ్ సూర్యవంశీ. తన బ్యాటింగ్‌తో ప్రపంచ క్రికెట్ అభిమానుల దృష్టిని తనవైపునకు తిప్పుకున్నాడు. ఆ తర్వాత భారత అండర్-19 జట్టులో చోటు సాధించి.. పలు సిరీస్‌లలో అదిరిపోయే పర్ఫార్మెన్స్ ఇచ్చాడు. దీంతో వైభవ్‌కి బిహార్ క్రికెట్ అసోసియేషన్ ప్రమోషన్ ఇచ్చింది.

రంజీ ట్రోఫీ 2025-26లో తలపడే బిహార్ జట్టుకి వైభవ్‌ని వైస్ కెప్టెన్‌గా ఎంపిక చేసింది. సోమవారం ఈ దేశవాళీ టోర్నీలో తలపడే 15 మంది సభ్యులతో కూడిన జట్టును బిసిఎ ప్రకటించింది. ఈ జట్టుకు కెప్టెన్‌గా సకిబుల్ గని ఎంపిక కాగా.. అతడి డిప్యూటీగా వైభవ్ వ్యవహరించనున్నాడు. బిహార్ తమ తొలి మ్యాచ్‌లో అక్టోబర్ 15వ తేదీన అరుణాచల్ ప్రదేశ్‌తో తలపడనుంది. బిహార్ జట్టులో పియూష్ కుమార్ సింగ్, భాష్కర్ దూబే, సచిన్ కుమార్ సింగ్, హిమాన్షు సింగ్ వంటి స్టార్ ఆటగాళ్లు కూడా ఉన్నారు. రాబోయే దేశీయ సీజన్‌కు జట్టును ఎంపిక చేయడానికి రాష్ట్రంలో తగినంత మంది సెలెక్టర్లు లేరని తెలుస్తోంది. అందుకే జట్టు ప్రకటన ఆలస్యమైందని సమాచారం.

అమరావతి: ఆంధ్రప్రదేశ్ రాష్ట్రం ఒంగోలు జిల్లా కేంద్రంలో రోడ్డు ప్రమాదం జరిగింది. పిఎస్ కాలేజీ సమీపంలో మినీ బస్సు బోల్తాపడడంతో ఒకరు మృతి చెందగా 16 మంది గాయపడ్డారు. క్షతగాత్రులను ఒంగోలు ఆస్పత్రికి తరలించారు. గాయపడిన వారిలో ఇద్దరి పరిస్థితి విషమంగా ఉన్నట్టు సమాచారం. పోలీసులు ఘటనా స్థలానికి చేరుకొని సహాయక చర్యలు చేపట్టారు. మృతుడు పత్తికొండకు చెందిన జూనియర్ లైన్‌మెన్‌ చరణ్ గా గుర్తించారు. విద్యుత్ ఉద్యోగుల ధర్నా చేయడానికి పలమనేరు నుంచి విజయవాడకు బస్సులో వెళ్తుండగా ఈ ప్రమాదం చోటుచేసుకుంది.