admin

నవీన్ యాదవ్ గెలుపు జూబ్లీహిల్స్ అభివృద్ధికి మలుపు అవుతుందని పంచాయతీరాజ్, గ్రామీణాభివృద్ధి శాఖ మంత్రి సీతక్క అన్నారు. జూబ్లీహిల్స్ నియోజకవర్గంలోని బోరబండ వీకర్ సెక్షన్‌లో సీతక్క శుక్రవారం ఇంటింటి ప్రచారం చేశారు. కాంగ్రెస్ అభ్యర్థి నవీన్ యాదవ్ కు ఒక అవకాశం ఇచ్చి ఆశీర్వదించాలని ఓటర్లకు విజ్ఞప్తి చేశారు. ఈ ప్రచారంలో కార్పొరేషన్ చైర్మన్లు మువ్వ విజయ్ కుమార్, బండ్రు శోభారాణితో కలసి మంత్రి ప్రచారం కొనసాగించారు. మంత్రి సీతక్క ప్రచారంలో పెద్ద ఎత్తున కార్యకర్తలు పాల్గొన్నారు. ఈ సందర్భంగా సీతక్క మాట్లాడుతూ చేయి గుర్తుకు ఓటేసి నవీన్ యాదవ్ ని గెలిపించాలని ఓటర్లకు మంత్రి సీతక్క విజ్ఞప్తి చేశారు. ఓటర్లను ఆప్యాయంగా పలకరిస్తూ కాంగ్రెస్‌ను

గెలిపిస్తే ప్రతి ఇంటికి సంక్షేమం అందుతుందని వివరించారు. మూడు పర్యాయాలు బీఆర్‌ఎస్‌ను గెలిపించారని, కనీసం మంచినీళ్లు లేవు, డ్రైనేజ్ వ్యవస్థ సరిగా లేదని అన్నారు. స్వయంగా ముఖ్యమంత్రి రేవంత్ రెడ్డి మున్సిపల్ శాఖ మంత్రిగా ఉన్నారని తెలిపారు. కాంగ్రెస్ అభ్యర్థి నవీన్ యాదవ్ ఎమ్మెల్యేగా గెలిస్తే జూబ్లీహిల్స్‌లో సమస్యలు పరిష్కారం అవుతాయని తెలిపారు. కాంగ్రెస్ ప్రభుత్వం ప్రతి ఇంటికి సంక్షేమ పథకాలు అందిస్తోందని తెలిపారు. ఇండ్లు లేని నాలుగున్నర లక్షల మంది పేద కుటుంబాలకు ఇందిరమ్మ ఇండ్లు మంజూరు చేశామని వివరించారు. టిఆర్‌ఎస్ హయాంలో కనీసం 10 సంవత్సరాల్లో రేషన్ కార్డు ఇవ్వలేదన్న మంత్రి సీతక్క ఒక జూబ్లీహిల్స్ నియోజకవర్గం లోనే తాము 15 వేల కుటుంబాలకు రేషన్ కార్డులు ఇచ్చామని తెలిపారు.

 మహిళల వన్డే ప్రపంచకప్ టోర్నీకి వర్షం బెడద వెంటాడుతూనే ఉంది. వర్షం వల్ల ఇప్పటికే పలు మ్యాచ్‌లు అర్ధాంతరంగా రద్దయ్యాయి. తాజాగా శుక్రవారం శ్రీలంక, పాకిస్థాన్ జట్ల మధ్య జరగాల్సిన లీగ్ మ్యాచ్ కూడా వర్షం వల్ల రద్దయ్యింది. ఎడతెరిపి లేకుండా కురిసిన భారీ వర్షంతో కొలంబోలోని ప్రేమదాస స్టేడియం తడిసి ముద్దయ్యింది. పాకిస్థాన్ స్కోరు 4.2 ఓవర్లలో 18/0 ఉన్న సమయంలో వర్షం మొదలైంది. అది కుంభవృష్ఠిగా మారడంతో మైదానం మొత్తం చిత్తడిగా మారిపోయింది. కుండపోతగా కురిసిన వర్షంతో మ్యాచ్ ముందుకు సాగలేదు. పలు సార్లు మైదానాన్ని పరిశీలించిన అంపైర్లు చివరికి మ్యాచ్‌ను రద్దు చేస్తున్నట్టు ప్రకటించారు.

దీంతో పాకిస్థాన్, శ్రీలంక జట్లకు చెరో పాయింట్ లభించింది. కాగా, వన్డే వరల్డ్‌కప్‌లో పాక్, లంక జట్లు ఇప్పటికే సెమీ ఫైనల్ రేసు నుంచి వైదొలిగాయి. డిఫెండింగ్ ఛాంపియన్ ఆస్ట్రేలియా, మాజీ విజేత ఇంగ్లండ్‌తో పాటు ఆతిథ్య టీమిండియా, సౌతాఫ్రికా టీమ్‌లు సెమీస్ బెర్త్‌లను దక్కించుకున్నాయి. బంగ్లాదేశ్, న్యూజిలాండ్ జట్లు కూడా లీగ్ దశలోనే ఇంటిదారి పట్టాయి. పాకిస్థాన్ ఇప్పటి వరకు ఏడు మ్యాచులు ఆడగా ఒక్క దాంట్లో కూడా విజయం సాధించలేక పోయింది. మూడు మ్యాచ్‌లు రద్దు కావడంతో పాయింట్ల ఖాతా తెరిచింది. లంక కూడా ఏడు మ్యాచ్‌లు ఆడి మూడింటిలో ఓటమి పాలైంది. మూడు మ్యాచ్‌లు వర్షం వల్ల రద్దయ్యాయి. బంగ్లాదేశ్‌తో జరిగిన మ్యాచ్‌లో లంక విజయం సాధించింది.

మంచిర్యాల జిల్లా, జన్నారం మండలం, రేండ్లగూడలో మతిస్థిమితం లేక వ్యవసాయ బావిలో తల్లి తన కూతురు (9 నెలలు)తో సహా శుక్రవారం ఉదయం ఆత్మహత్యకు పాల్పడింది. ఈ ఘటనతో గ్రామంలో విషాదఛాయలు అలుముకున్నాయి. కుటుంబ సభ్యులు, పోలీసులు తెలిపిన వివరాల ప్రకారం.. ఐదేళ్ల క్రితం చెట్పల్లి గంగయ్య, లక్ష్మిల చిన్న కుమారుడు శ్రీనివాస్‌కు జగిత్యాల జిల్లా, సారంగపూర్‌కు చెందిన సుగంధతో వివాహమైంది. ప్రస్తుతం శ్రీనివాస్ గుడిపేట బెటాలియన్‌లో కానిస్టేబుల్‌గా విధులు నిర్వహిస్తున్నాడు. పెళ్లయిన తర్వాత మూడేళ్ల వరకు కలసిమెలసి సంతోషంగా ఉండేవారు. వీరికి ఇద్దరు కుమార్తెలు మోక్ష, వేదశ్రీ. , చిన్న కూతురు వేదశ్రీ జన్మించినప్పటి నుండి సుగంధ ఏదో ఆలోచనల విధానంతో మానసిక స్థితికి లోనైంది. తాను చనిపోతాను అంటుండేది. దీంతో ఆమె అత్తమామలు ఆమెను నిత్యం గమనిస్తూ ఉండేవారు. శుక్రవారం ఉదయం సుగంధ తన చిన్న కూతురు వేదశ్రీ (9 నెలలు)కి భోజనం చేయిస్తానని బయటకు వెళ్లి..

తమ ఇంటికి సమీపంలో ఉన్న వ్యవసాయ బావిలో కూతురుతో సహా దూకి ఆత్మహత్యకు పాల్పడింది.సుగుంధ కోసం అత్తమామలు వెతకగా వ్యవసాయ బావిలో కోడలు, మనుమరాలు కనిపించడంతో చుట్టుపక్కల వారిని పిలిచి బావిలో నుండి మృతదేహాలను బయటకు తీశారు. ప్రయివేటు ఆసుపత్రికి తరలించగా అప్పటికే వారు మృతి చెందారని వైద్యులు ధ్రువీకరించారు. కాగా, తన భార్య చిన్నకుమార్తెతో సహా బావిలో దైకి ఆత్మహత్య చేసుకున్న విషయం తెలిసి వచ్చిన శ్రీనివాస్ వారి మృతదేహాలను చూసి సొమ్మసిల్లి కింద పడిపోయాడు. సంఘటన స్థలాన్ని లక్షటిపేట సిఐ రమణమూర్తి, ఎస్‌ఐ గొల్ల అనూష, తహసిల్దార్ రాజమనోహార్‌రెడ్డి సందర్శించారు. సంఘటనపై మృతురాలి తల్లి బూదరి ఈశ్వరి, సుగంధ ఆత్మహత్య విషయంలో ఎవరి ప్రమేయం లేదని ఫిర్యాడు చేసింది. ఈ మేరకు కేసు నమోదు చేసి దర్యాప్తు చేస్తున్నట్లు జన్నారం ఎస్‌ఐ గొల్లపల్లి అనూష తెలిపారు. మృతదేహాలను పోస్టుమార్టం నిమిత్తం ఆసుపత్రికి తరలించారు.

 దేశ రాజధాని ఢిల్లీలో ఉగ్రదాడులకు ప్లాన్ చేసిన ఇద్దరు ఐఎస్‌ఐఎస్ సంబంధిత అనుమానితులను పోలీసులు అరెస్టు చేశారు. దక్షిణ ఢిల్లీలోని అత్యంత రద్దీగా ఉండే ఒక మాల్‌లో, పబ్లిక్ పార్కులో దీపావళి నాడు ఆత్మాహుతి దాడులకు వీరు ప్లాన్ చేసినట్టు అధికారులు చెప్పారు. ఢిల్లీ లోని సాదిక్ నగర్ లోను, భోపాల్ లోనూ ఢిల్లీ సూపర్ సెల్ పోలీసులు ఆపరేషన్ నిర్వహించారు. వీరిద్దరూ ఆత్మాహుతి దాడులకు శిక్షణ పొందుతున్న అనుమానిత ఉగ్రవాదులుగా పేర్కొన్నారు. నిందితుల్లో ఒకరు భోపాల్‌కు చెందిన అద్నాన్ కాగా, మరొకరు మధ్యప్రదేశ్‌కు చెందిన వ్యక్తిగా సీనియర్ పోలీస్ అధికారి వెల్లడించారు. ఢిల్లీలో ఓ పెద్ద ఆత్మాహుతి దాడికి ప్లాన్ చేశారని ప్రాథమిక దర్యాప్తులో తేలిందని చెప్పారు. వారి నుంచి ఆయుధాలు , మందుగుండు సామగ్రితోపాటు పలు ఎలక్ట్రానిక్ పరికరాలను వీడియోను స్వాధీనం చేసుకున్నట్టు తెలిపారు. ఆ వీడియోలో వారు ఐఎస్‌ఐఎస్‌కు విధేయత ప్రమాణం చేస్తున్నట్టు ,

ఢిల్లీలో ఎక్కడ ఉగ్రదాడికి పాల్పడాలనుకున్నారో ఆ ప్రదేశాల ఫోటోలు చిత్రీకరించి ఉన్నాయి. టైమ్ బాంబు తయారు చేయడానికి కావలసిన పేలుడు సదార్ధాలను, వాటిని ఎక్కడ సేకరించారో ఆ ఫోటోలు , అవన్నీ స్వాధీనం చేసుకోవడమైందని అడిషనల్ కమిషనర్ ఆఫ్ పోలీస్ ప్రమోద్ కుష్వాహా పాత్రికేయ సమావేశంలో వెల్లడించారు. ఎక్కడ దాడి చేయాలనుకున్నారో ఆ ప్రాంతాల్లో నిందితులు రెక్కీ నిర్వహించారని చెప్పారు. అక్టోబర్ 16న సాదిక్ నగర్ లో ఒక నిందితుడిని, మరో నిందితుడిని భోపాల్ నుంచి అరెస్టు చేసినట్టు చెప్పారు. భోపాల్‌కు చెందిన అద్నాన్ తాను జ్ఞానవాపి మసీదు సర్వే చేస్తున్న ఆర్కెయాలజీ సర్వే ఆఫ్ ఇండియా ( ఎఎస్‌ఐ) అధికారినని సోషల్ మీడియాలో బెదిరించడంతో ఉత్తరప్రదేశ్ పోలీసులు అరెస్టు చేశారు. వారి నుంచి మరింత సమాచారం తెలుసుకొనేందుకు విచారిస్తున్నామని, వీరి మొత్తం నెట్‌వర్క్‌ను గుర్తించేందుకు ఆపరేషన్ ఇంకా కొనసాగుతుందన్నారు.   

 మెదక్ జిల్లా, నర్సాపూర్ మండల పరిధిలోని నారాయణపూర్ గ్రామ సమీపంలో గల తెలంగాణ గిరిజన సంక్షేమ గురుకుల పాఠశాల, కళాశాల (బాలికలు)లో చదువుతున్న 8 మంది ఇంటర్ విద్యార్థినులను ఎలుకలు కరవడం శుక్రవారం కలకలం రేపింది. గురుకుల వసతి గృహంలో రాత్రి నిద్రిస్తున్న విద్యార్థినులను ఎలుకలు కాలు మడమ దగ్గర కరిచాయి. వీరితోపాటు పాఠశాలలో చదువుతున్న పలువురు విద్యార్థినులకు చర్మంపై దురద రావడంతో వారిని చికిత్స నిమిత్తం నర్సాపూర్ ఏరియా ప్రభుత్వ ఆస్పత్రికి తరలించి ప్రథమ చికిత్స అందించారు. ఇంటర్మీడియట్ చదువుతున్న నికిత, జ్యోతి, ఉష, గీతాంజలి, సంధ్య, అశ్విత మరో ఇద్దరు విద్యార్థినులపై ఎలుకలు దాడి చేశాయి.

ఈ విషయంపై పాఠశాల ప్రిన్సిపాల్ లలితాదేవిని వివరణ కోరగా.. హాస్టల్లో ఎలుకల బెడద విపరీతంగా ఉందని, రాత్రి సమయంలో తనపై నుంచి కూడా ఎలుకలు తిరుగుతున్నాయని అన్నారు.. ఎలుకలే కాకుండా కోతులు కూడా విద్యార్థులపై దాడి చేస్తున్నాయని తెలిపారు. ఎలుకలు కరిచిన విద్యార్థులను ప్రభుత్వ దవాఖానకు పంపించి ప్రథమ చికిత్స చేయించామని తెలిపారు. హాస్టల్లో 540 మంది విద్యార్థినులు విద్యను అభ్యసిస్తున్నారని, వారికి సరిపడా సరైన వసతులు లేవని, పడుకోవడానికి సరిపోయినంత స్థలం లేదని, హాస్టల్ చుట్టుపక్కల వ్యవసాయ పంట పొలాలు ఉండడం వల్ల ఎలుకలు, కోతులతో అనేక ఇబ్బందులు పడుతున్నామని తెలిపారు.

కర్నూల్ జిల్లాలో శుక్రవారం తెల్లవారుజామను జరిగిన ప్రైవేట్ ట్రావెల్స్ బస్సు ప్రమాదంలో మెదక్ జిల్లా, శివ్వాయిపల్లి గ్రామానికి చెందిన మంగ సంధ్యారాణి (43), ఆమె కూతురు చందన (23) సజీవదహనమయ్యారు. ఈ విషాద సంఘటన వారి కుటుంబీకులను, బంధువులను శోకసంద్రంలో ముంచెత్తింది. మృతుల సన్నిహితులు తెలిపిన వివరాల ప్రకారం… సంధ్యారాణి కుటుంబంతో సహా బంధువుల వివాహం కోసం హైదరాబాద్ చేరుకున్నారు. అనంతరం తన కొడుకు శ్రీ వల్లభ్ ఉత్తరప్రదేశ్‌లో ఇంజనీరింగ్ చదువుతుండటంతో వెంటనే వెళ్లిపోగా ఆమె భర్త ఆనంద్‌కుమార్‌గౌడ్ దుబాయ్ వెళ్లారు. అయితే, సంధ్యారాణి స్వల్ప ఆనారోగ్య కారణంగా దుబాయ్ ప్రయాణం వాయిదా వేసుకుని బెంగుళూరులో సాఫ్ట్‌వేర్ ఉద్యోగం చేస్తున్న తన కూతురు చందనను బెంగుళూరుకు పంపేందుకు తోడుగా వెళ్లింది. బెంగుళూరు నుంచి సంధ్యారాణి దుబాయ్ వెళ్లాల్సి ఉంది. ఈ తరుణంలో ఈ దుర్ఘటన చోటుచేసుకుని తల్లి, కుమార్తెలు ఇద్దరూ సజీవదహనమయ్యారు. విషయం తెలుసుకున్న ఆమె భర్త, కుమారుడు హుటాహుటిన సంఘటన స్థలికి చేరుకున్నారు. దీంతో వారి కుటుంబంతో పాటు స్వగ్రామమైన శివ్వాయిపల్లిలో విషాదఛాయలు అలుముకున్నాయి.

కట్టుకున్న భార్యను గొడ్డలితో నరికి చంపిన కసాయి భర్త సంఘటన శుక్రవారం ఖమ్మం జిల్లా, ఏన్కూరు మండలంలో చోటుచేసుకుంది. ఏన్కూరు పోలీసులు తెలిపిన వివరాల ప్రకారం… కాలనీ నాచారం గ్రామానికి చెందిన తాటి రామారావు, తాటి గోవర్షిని భార్యాభర్తలు. వీరికి ముగ్గురు పిల్లలు ఉన్నారు. గోవర్షిని అదే గ్రామానికి చెందిన అఖిల్ అలియాస్ ఆదామ్ అనే యువకుడితో వివాహేతర సంబంధం పెట్టుకుంది. సుమారు ఎనిమిది నెలల క్రితం భర్త, పిల్లలను వదిలిపెట్టి ఆమె అఖిల్‌తో పారిపోయింది. ఈ నేపథ్యంలో రామారావు తన భార్యను పలుమార్లు ఇంటికి పిలుచుకుని వచ్చినా, ఆమె మళ్లీ అఖిల్ వద్దకే వెళ్లిపోయేది.మూడు రోజుల క్రితం పాల్వంచలో చదువుతున్న తమ కుమార్తెను చూడడానికి గోవర్షిని వచ్చింది.

ఈ సమయంలో రామారావు తన భార్యను పట్టుకొని ఇంటికి పిలుచుకుని వచ్చాడు. అయితే, భర్తతో ఉండడానికి ఆమె నిరాకరించింది. దీంతో శుక్రవారం ఉదయం సుమారు నాలుగు గంటల సమయంలో ఇంటి బయట ఆవరణలో గోవర్షిని నిద్రిస్తుండగా, రామారావు గొడ్డలితో ఆమె తలపై నరికాడు. దీంతో ఆమె అక్కడికక్కడే మృతి చెందింది. మృతురాలి తల్లి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. కుటుంబ కలహాలు, వివాహేతర సంబంధమే ఈ హత్యకు కారణమా లేక వేరే అంశాలు ఏమైనా ఉన్నాయా అనే కోణంలో పోలీసులు దర్యాప్తు చేస్తున్నారు.

బిఆర్‌ఎస్ అధ్యక్షుడు, మాజీ ముఖ్యమంత్రి కె. చంద్రశేఖర్ రావు కుంభ కర్ణుడిలా వ్యవహారిస్తున్నారని కాంగ్రెస్ ఎమ్మెల్యే, ప్రభుత్వ విప్ బీర్ల ఐలయ్య విమర్శించారు. రామాయణంలో కుంభ కర్ణుడు ఆరు నెలలు తిని, ఆరు నెలలు పడుకున్నట్లు పురాణంలో ఉందని ఆయన శుక్రవారం విలేకరుల సమావేశంలో అన్నారు. జూబ్లీహిల్స్ కాంగ్రెస్ అభ్యర్థి నవీన్ యాదవ్ రౌడీ షీటర్ అంటూ కెసిఆర్ చేసిన వ్యాఖ్యలను ఆయన తీవ్రంగా ఖండించారు. కాంగ్రెస్ అభ్యర్థి నవీన్ యాదవ్‌ను లక్ష ఓట్ల మెజారిటీతోఒ గెలిపించాలని ఆయన పార్టీ శ్రేణులను, ప్రజలను కోరారు జూబ్లీహిల్స్ ఉప ఎన్నికపై బిఆర్‌ఎస్ నాయకులతో మాట్లాడాలి అనుకున్న కెసిఆర్ పార్టీ ఆఫీసుకు వెళ్ళకుండా, తాను ఉంటున్న ఫామ్ హౌజ్‌కే పిలిపించుకున్నారని ఆయన విమర్శించారు. తెలంగాణలో దళితులు, బడుగు, బలహీనవర్గాల ప్రజలు ఓట్లు వేస్తేనే గతంలో కెసిఆర్ సిఎం అయ్యారని ఆయన అన్నారు. గత సార్వత్రిక ఎన్నికల్లో బిఆర్‌ఎస్ ఓటమి చవి చూసినా, కెసిఆర్ అహంకారం మాత్రం తగ్గలేదని ఆయన విమర్శించారు.

బీర్లపై ఎసిబి, ఆదాయ పన్నుశాఖలకు సామాజిక కార్యకర్త ఫిర్యాదు

ఇదిలాఉండగా బీర్ల ఐలయ్య రెండేళ్ళలో రెండు వందల కోట్ల రూపాయలు ఎలా ఆర్జించారన్న అంశంపై దర్యాప్తు చేయాలని ఆయన ప్రాతినిధ్యం వహిస్తున్న ఆలేరు నియోజకవర్గంలోని గొల్లగూడెం గ్రామానికి చెందిన సామాజిక కార్యకర్త మహేష్ బొడుసు అవినీతి నిరోధక శాఖ డిజికి, ఆదాయ పన్ను శాఖ డైరెక్టర్‌కు లిఖితపూర్వకంగా ఫిర్యాదు చేశారు.

ముఖ్యమంత్రి సిఎం రేవంత్ రెడ్డితో ప్రముఖ నటుడు, ఎపి సిఎం చంద్రబాబునాయుడి సోదరుడి కుమారుడు నారా రోహిత్ సమావేశం అయ్యారు. ఈనెల 30న జరిగే తన వివాహానికి రావాలని నారా రోహిత్ సిఎం రేవంత్‌ను ఆహ్వానించారు. కాగా, నటి శిరీషను నారా రోహిత్ ఈనెల 30న పెళ్లి చేసుకోబుతున్న సంగతి తెలిసిందే. నేటి నుంచి మొదలయ్యే హల్దీ వేడుకలకు ఏర్పాట్లు జరుగుతున్నాయి. 26వ తేదీన పెళ్లికొడుకు వేడుక, 28వ తేదీన మొహంది వేడుక జరగనుండగా 30వ తేదీన రాత్రి 10.35 గంటలకు కుటుంబ సభ్యులు, సన్నిహితులు సమక్షంలో వారి వివాహం జరగనుంది. వివాహానికి అన్ని ఏర్పాట్లు పూర్తి కాగా, ఈ వేడుకలో ఎపి సిఎం చంద్రబాబు నాయుడుతో సహా, పలువురు మంత్రులు, అన్ని పార్టీల ముఖ్య నేతలు, పలువురు సినీ ప్రముఖులు హాజరు కానున్నారు.

పాన్ ఇండియా సినిమాలతో వరుస హిట్లు అందుకుంటోంది రష్మిక. రీసెంట్ ఆయుష్మాన్ ఖురానాతో కలిసి ‘థామా’ అనే హారర్, కామెడీ చిత్రంతో ప్రేక్షకుల ముందుకు వచ్చింది. ఈ సినిమా బాక్సాఫీస్ వద్ద గ్రాండ్ సక్సెస్‌ని అందుకుంది. రష్మిక తన అందంతో యువతను ఆకట్టుకుంది. ముఖ్యంగా ‘తుమ్ మేరీ నా హుయే’ పాటలో డ్యాన్స్‌తో అదరగొట్టింది. ఈ నేపథ్యంలో ఈ పాట షూటింగ్‌కి సంబంధించి ఓ ఆసక్తికర విషయాన్ని రష్మిక వెల్లడించింది.

తన కాలికి ఫ్యాక్చర్ అయినా కూడా ఈ పాట షూటింగ్ పూర్తి చేసినట్లు తెలిపింది. ఈ ఏడాది జనవరిలో తాను జిమ్ చేస్తూ గాయపడినట్లు రష్మిక స్వయంగా ఇన్‌స్టాగ్రామ్ ద్వారా కాలికి కట్టుకట్టుకొన్న ఫోటోను షేర్ చేస్తూ వెల్లడించింది. తన వల్ల షూటింగ్‌కి ఆలస్యం అవుతున్నందుకు దర్శకులకు క్షమాపణ చెప్పింది. ‘‘వైద్యులు మూడు నెలలు విశ్రాంతి తీసుకోని చెప్పారు. అప్పుడు ‘ఛావా’ ప్రమోషన్స్ కోసం 30 రోజులు తిరుగుతూనే ఉన్నా. కాలి నొప్పి తీవ్రం కావడంతో మళ్లీ డాక్టర్ వద్దకు వెళ్లాను. ఆయన విషయం తెలుసుకుని నన్ను మందలించారు. కాలు వాచి, మొత్తం రూపు మారిపోయింది. అప్పటికే సాంగ్‌కు సంబంధించిన షెడ్యూల్ ఖరారు చేయడంతో నొప్పితోనే ఈ సాంగ్ చేశాను. ఈ రోజు ప్రేక్షకులు సినిమాను ఆదరిస్తుంటే. అప్పుడు పడిన బాధ మర్చిపోయాను. ఎప్పుడూ నేను ప్రశాంతంగా ఉంటాను. ఎందుకంటే నేను ఏది చేసినా అది ప్రేక్షకుల కోసమే. వారి ముఖాల్లో ఆనందం నింపడం కోసమే’’ అని రష్మిక పేర్కొంది.