admin

డిజిటల్ అరెస్టు పేరుతో బెదిరించి ఓ వృద్ధుడి నుంచి సైబర్ నేరస్థులు రూ.51 లక్షలు కొట్టేశారు. నగరంలోని శ్రీనగర్ కాలనీకి చెందిన వృద్ధుడు (78) కేంద్ర ప్రభుత్వ సంస్థలో పనిచేసి ఉద్యోగ విరమణ పొందారు. వృద్ధుడికి వాట్సాప్ వీడియో కాల్ చేసిన సైబర్ నేరస్థులు తాము ముంబాయి క్రైం బ్రాంచ్ పోలీసులమని చెప్పారు. మీ సిమ్ కార్డును బాంబు పేలుళ్లు, కిడ్నాప్ కేసుల్లో వాడారంటూ క్రైమ్ బ్రాంచ్ ఏసీపీ పేరుతో సైబర్ నేరగాళ్లు ఆయనకు వాట్సప్ కాల్ చేశారు. సీబీఐ పేరుతో ఉన్న నోటీసులు చూపి బెదిరించారు. బాధితుడి పేరుతో ఇతరులు సిమ్ కార్డులు తీసుకుని బాంబు పేలుళ్లకు వాడారని బెదిరించారు.

మనీలాండరింగ్ లోనూ భాగస్వామ్యం ఉన్నట్లు చెప్పారు. డిజిటల్ అరెస్టు చేస్తున్నామని చెప్పి వృద్ధుడిని సైబర్ నేరస్థులు వీడియో కాల్‌లో 24 గంటలపాటు నిర్బంధించారు. ఈ సమయంలో ఎవరితోనూ మాట్లాడనివ్వకుండా వృద్ధుడి బ్యాంకు ఖాతా వివరాలు తెలుసుకున్నారు. కేసు నుంచి తప్పించాలంటే ఖాతాలోని 95 శాతం నగదు పంపాలన్నారు. దర్యాప్తు అనంతరం తిరిగి ఇస్తామని చెప్పారు. కేసు భయంతో బాధితుడు రూ.51 లక్షలు బదిలీ చేశారు. అనంతరం మోసపోయినట్లు గ్రహించి హైదరాబాద్ సైబర్ క్రైమ్ పోలీసులకు ఫిర్యాదు చేశారు. పోలీసులు కేసు నమోదు చేసి దర్యాప్తు చేస్తున్నారు.

మెడకు బంతి తగిలి తీవ్ర గాయాలు

మృత్యువుతో పోరాడి యువ క్రికెటర్ అస్టిన్ మృతి

మెల్‌బోర్న్: ప్రాక్టీస్ సమయంలో బంతి మెడకు తగిలి మైదానంలోనే కుప్పకూలిన ఆస్ట్రేలియా యువ క్రికెటర్ బెన్ అస్టిన్ కథ విషాదాంతంగా ముగిసింది. దశాబ్దం క్రితం ఫిల్ హ్యూస్ అనే ఆస్ట్రేలియా క్రికెటర్ మైదానంలోనే కుప్పకూలిన ఉదంతం ఇప్పటికీ క్రికెట్ అభిమానులను కలచి వేస్తూనే ఉంది. తాజాగా ఇలాంటి విషాద ఘటనే మరోసారి పునరావృతమైంది. తాజాగా మెల్‌బోర్న్‌కు చెందిన 17 ఏళ్ల యువ ఆటగాడు బెన్ అస్టిన్ మెడకు బంతి బలంగా తగలడంతో మైదానంలోనే కుప్పకూలి పోయారు. సహచర ఆటగాళ్లు అతన్ని వెంటనే ఆసుపత్రికి తరలించారు.

అయితే దాదాపు రెండు రోజుల పాటు మృత్యువుతో పోరాడిన యువ క్రికెటర్ గురువారం ఉదయం ప్రాణాలు విడిచాడు. ఈ విషయాన్ని క్రికెట్ ఆస్ట్రేలియా ధ్రువీకరించింది. బెన్ అస్టిన్ 20 మ్యాచ్ కోసం సన్నద్ధమవుతున్నాడు. ప్రాక్టీస్ సెషన్‌లో బంతి అతడి మెడకు బలంగా తగిలింది. వెంటనే అతన్ని ఆసుపత్రికి తరలిచించి చికిత్స అందించారు. వైద్యులు అతన్ని కాపాడేందుకు చేసిన ప్రయత్నాలు ఫలించలేదు. చివరికి బెన్ మృత్యు ఒడిలోకి వెళ్లిపోయాడు. అతని మరణంతో ఆస్ట్రేలియా క్రికెట్‌లో మరోసారి విషాదం నెలకొంది.

 మొంథా తుఫాన్ తో ఏపీకి భారీ స్థాయిలో నష్టం వాటిల్లింది. ఈ తుఫాన్ కారణంగా రూ.5,265 కోట్లు నష్టం వాటిల్లిందని రాష్ట్ర ప్రభుత్వం ప్రాథమిక అంచనా వేసింది. ఇందుకు సంబంధించిన వివరాలను సిఎం చంద్రబాబు వివరించారు. వ్యవసాయ రంగంలో రూ.829 కోట్లు నష్టం జరిగింది. ఇక హార్టికల్చర్ రంగంలో రూ.39 కోట్లు, సెరికల్చర్ రంగంలో రూ.65 కోట్లు నష్టం, పశుసంవర్ధక శాఖలో రూ.71 లక్షల నష్టం జరిగింది. ఇక ఆక్వారంగంలో రూ.1,270 కోట్లు.. మున్సిపల్ శాఖలో రూ.109 కోట్లు నష్టం, హౌసింగ్‌లో రూ.5.53 కోట్లు నష్టం జరిగిందని తెలిపారు. అయితే అదృష్టవశాత్తు తుఫాన్ కారణంగా ఎటువంటి ప్రాణనష్టం జరగలేదని.. కానీ 120 వరకు పశువులు మృత్యువాత పడ్డాయని తెలిపారు. అయితే తుఫాన్ బీభత్సాన్ని ముందుగానే అంచనా వేసి తగిన చర్యలు తీసుకోవడంతోనే చాలా వరకు నష్టాన్ని నివారించగలినట్టు ఆయన తెలిపారు.

తుపాను కారణంగా మారుతున్న పరిణామాలను అంచనా వేసి వాటికి తగ్గట్లుగా నిర్ణ యాలు తీసుకున్నామని తెలిపారు. వరద ప్రభావిత ప్రాంతాల్లో విద్యుత్ సరఫరాను పునరుద్దరించడానికి గతంలో 10 గంటల సమయం పట్టేది. కానీ ప్రస్తుతం విద్యుత్ సరఫరా ఆగినా 3 గంటల్లోనే పునరుద్ధరించగలిగామని ఆయన తెలిపారు. ప్రభుత్వంలోని అన్ని శాఖల అధికారులు, సిబ్బంది నిబద్ధతతో పని చేశారని, ఎలా ప్రాణ నష్టం లేకుండా తుఫాన్‌ను ఎదుర్కొవడం చాలా సంతోషంగా ఉందన్నారు. విస్తారంగా వర్షాలు కురుస్తున్నా కూలిన చెట్లను ఎప్పటికప్పుడు తొలగించారని, గతంలో చెట్లు కూలితే తొలగించేందుకు వారం పట్టేదని తెలిపారు. ప్రకృతి విపత్తులను ఎవరూ ఆపలేరని, కానీ ముందస్తు చర్యల వల్ల జరిగే నష్టాన్ని తగ్గించవచ్చుని సిఎం చంద్రబాబు వెల్లడించారు.

హుద్‌హుద్ తుఫాన్‌తో విశాఖపట్నం అతలాకుతలం అయ్యింది. వారం రోజుల్లోనే పరిస్థితులను చక్కదిద్దాం. తరువాత వచ్చిన తిత్లీ తుఫాన్ సమయంలోనూ సమర్థంగా పనిచేశాం. బుడమేరు వరదను ఎదుర్కొన్నాం. టెక్నాలజీని సమర్థంగా వినియోగిస్తున్నాం. శాటిలైట్ ఇమేజ్‌ల ఆధా రంగా తుఫాన్ పరిస్థితులను అంచనా వేశాం. రాష్ట్ర సచివాలయం నుంచి గ్రామ సచివా లయం వరకు ఎప్పటికప్పుడు ఇన్ఫర్మేషన్ తీసుకున్నాం అని సీఎం చంద్రబాబు గురువారం చెప్పారు. ప్రతి ఒక్కర్నీ ఆదుకుంటామని స్పష్టం చేశారు.

మన తెలంగాణ/యాదగిరిగుట్ట: లంచం తీసుకుంటూ ఏసీబీ అధికారులు రెడ్ హ్యాండెడ్‌గా పట్టుబడ్డ యాదగిరిగుట్ట శ్రీలక్ష్మీనరసింహస్వామి వారి ఆలయ విద్యుత్ ఈఈ ఊడెపు రామారావును జ్యుడిషియల్ రిమాండ్‌కు తరలించినట్లు ఏసీబీ డీఎస్పీ జగదీష్ చందర్ తెలిపారు. గురువారం యాదగిరిగుట్టలో ఆయన విలేఖరులతో మాట్లాడుతూ రామారావు ప్రస్తుతం దేవాదాయశాఖలో విద్యుత్ ఇంచార్జ్‌గా వ్యవహరిస్తున్నారని తెలిపారు. ఓ కాంట్రాక్టర్ యాదగిరిగుట్ట ఆలయంలో లడ్డూ మిషనరీని మూడు నెలల క్రితం టెండర్ ద్వారా సప్లై చేశాడు. దీనికి సంబంధించి రూ.11.90 లక్షల బిల్లు అయిందని, బిల్లు మంజూరు చేయడానికి బిల్లులో 20 శాతం లంచాన్ని రామారావు డిమాండ్ చేశాడని తెలిపారు.

లంచం ఇవ్వడం ఇష్టం లేక నల్గొండ ఏసీబీ అధికారులను బాధితుడు సంప్రదించాడని, పక్కాగా నిఘా పెట్టి రామారావును పట్టుకున్నట్లు తెలిపారు. ప్రస్తుతం రామారావు మేడారం జాతర ఇంచార్జ్ ఎస్‌ఈగా వ్యవహరిస్తున్నాడని, బుధవారం మేడారం నుంచి వస్తుండగా బోడుప్పల్‌లో కాంట్రాక్టర్‌ను కలవమని చెప్పాడని తెలిపారు. కాంట్రాక్టర్‌ను కలిసిన రామారావు అతని దగ్గర నుంచి రూ.1.90 లక్షలు తీసుకుంటుండగా రామారావును పట్టుకున్నట్లు తెలిపారు. రామారావు దగ్గర నుంచి నగదు స్వాధీనం చేసుకున్నామని, నాంపల్లి ఏసీబీ కోర్టులో ప్రవేశపెట్టి అక్కడి నుంచి జ్యుడిషియల్ రిమాండ్‌కు తరలించినట్లు తెలిపారు. యాదగిరిగుట్ట ఆలయ కొండపైన రామారావు కార్యాలయంలో కూడా తనిఖీలు నిర్వహించామని, అతనికి సంబంధించిన ఇళ్లు, బంధువుల ఇళ్లలోనూ సోదాలు కొనసాగాయని తెలిపారు. త్వరలో పూర్తిస్థాయి వివరాలు అందజేస్తామని తెలిపారు.