admin

మన తెలంగాణ/సిటీ బ్యూరో: జూబ్లీహిల్స్ నుంచి నాకొక కుడి భుజాన్ని ఇవ్వండి. మీ సమస్యలను పరిష్కరించే బాధ్యత నేను తీసుకుంటానని ఓటర్లను రాష్ట ముఖ్యమంత్రి రేవంత్‌రెడ్డి కోరారు. అవకాశం వచ్చినప్పుడు మన బిడ్డను గెలిపించుకోకపో తే చారిత్రక తప్పిదం అవుతుందని ఆయన చెప్పా రు. జూబ్లీహిల్స్ నియోజకవర్గం ఎన్నికల ప్రచారం సందర్భంగా వెంగళరావు నగర్, ఎల్లారెడ్డి గూడ లో కాంగ్రెస్ పార్టీ నిర్వహించిన రోడ్ షోలో సిఎం మాట్లాడారు. కంటోన్మెంట్ లోనూ సానుభూతితో గెలవాలని మొసలి కన్నీరు కార్చారనీ, కానీ ప్రజ లు అభివృద్ధికే ఓటు వేసి శ్రీగణేశ్ ను గెలిపించార ని రేవంత్‌రెడ్డి గుర్తుచేశారు. పీజేఆర్ అకాల మర ణం చెందితే ఆనాడు 2007లో వైరి పక్షాలు బీజే పీ, టీడీపీలు ఆయనపై ఉన్న గౌరవంతో పీజేఆర్ కుటుంబాన్ని ఏకగ్రీవం చేయాలంటే.. పీజేఆర్ కుటుంబంపై టీఅరెస్ నుంచి అభ్యర్థిని బరిలోకి దింపింది కేసీఆర్ కాదా?.. ఈ దుష్ట సంప్రదాయానికి తెర తీసింది ఆయన కాదా?.. అలాంటి వాళ్లు ఇవాళ సానుభూతితో ఓట్లు పొందాలని చూస్తున్నా రు. ఆనాడు పీజేఆర్ కుటుంబంపై పోటీ పెట్టిన మీకు ఇవాళ సానుభూతి ఓట్లు అడిగే హక్కు లేదు. అని సిఎం విమర్శించారు. గంజాయి, డ్రగ్స్ ను పెంచి పోషించిన వాళ్లు రౌడీలా.. పేదోళ్లకు అండగా ఉండే నవీన్ యాదవ్ రౌడీనా మీరే ఆలోచించండి అని రేవంత్‌రెడ్డి సూచించారు.

కెసిఆర్‌ను అడగదలుచుకున్నా..

బీఆరెస్ సెంటిమెంట్‌ను సొమ్ముచేసుకునే ప్రయత్నంలో కెసీఆర్‌ను ఓ మాట అడగదలచుకున్నా.. ఇవాళ 4 వేల కోట్లతో కంటోన్మెంట్ అభివృద్ధి జరుగుతోంది. పదేళ్లు అధికారంలో ఉన్నవాళ్లు.. ఆనా టి ముఖ్యమంత్రిగా ఉన్నాయన, మున్సిపల్ మం త్రిగా ఉన్నాయన జూబ్లీహిల్స్‌కు వచ్చారా..? ఇక్క డి ప్రజల ముఖం చూశారా..? ఈ ప్రజల సమస్యల గురించి పట్టించుకున్నారా? అని జూబ్లీహిల్స్ నియోజకవర్గం ప్రజలనుద్దేశించి సిఎం అడిగారు. పార్లమెంట్ ఎన్నికల్లో 8 నియోజకవర్గాల్లో బీఆరెస్ అవయవదానంచేసి బీజేపీని గెలిపించిందని ఆరోపించారు. ఆడబిడ్డలకు ఆర్టీసీ బస్సుల్లో ఉచిత ప్ర యాణ సౌకర్యం మేం కల్పిస్తే.. ఆటోవాళ్లను రెచ్చగొట్టి ఫ్రీ బస్సు బంద్ చేయాలని బయలుదేరారం టూ సిఎం విమర్శించారు. బిల్లా రంగాలు ఆటోలలో తిరుగుతూ.. ఫోటోలు దిగుతున్నారు. బీఆరెస్ వాళ్లు వస్తే మా అక్కలు కర్రు కాల్చి వాత పె ట్టండి. అని రేవంత్‌రెడ్డి కోరారు. బిఆర్‌ఎస్ వస్తే మీకు సన్నబియ్యం బంద్ అయితాయ్.. ఉచిత బస్సు, 200 యూనిట్ల ఉచిత విద్యుత్ బంద్ అయితాయ్. రేషన్ కార్డులు రద్దు చేస్తారు. అని ముఖ్యమంత్రి రేవంత్ రెడ్డి ఆరోపించారు.

కిషన్‌రెడ్డి అడ్డుపడుతుండు..

బీఆరెస్‌తో కుమ్మక్కై కిషన్ రెడ్డి హైదరాబాద్ అభివృద్ధిని అడ్డుకుంటుండు. బీజేపీ, బీఆరెస్‌ది ఫెవికా ల్ బంధం అని సిఎం విమర్శించారు. మా ప్రభు త్వం నగరాన్ని అభివృద్ధిని చేయాలనుకుంటుంటే, కిషన్ రెడ్డి మెట్రో రైలుకు అడ్డం పడుతుండు.. మూసీ నది సుందరీకరణకు అడ్డుపడుతుండు.. రేవంత్ రెడ్డికి, కాంగ్రెస్‌కు పేరొస్తుందనే.. అక్కసుతో అడ్డుపడుతున్నారని రేవంత్‌రెడ్డి ఆగ్రహం వ్యక్తం చేశారు. మోది ఏం ఇచ్చారని బీజేపీ ఎంపీ లు ఇక్కడ తిరుగుతున్నారనీ రేవంత్‌రెడ్డి ప్రశ్నల వ ర్షం కురిపించారు. బీజేపీ ఇద్దరు కేంద్ర మంత్రు లు ఉండి నగరానికి ఏమైనా నిధులు తెచ్చారా? అ ని ముఖ్యమంత్రి ప్రశ్నించారు. సిగ్గులేకుండా జూబ్లీహిల్స్‌లో కార్పెట్ బాంబింగ్ చేస్తామని చెబుతున్నారనీ ఆయన విమర్శించారు.

అభివృద్ధి అంటే ఏమిటో చూపిస్తా..

జూబ్లీహిల్స్ అభివృద్ధి అంటే ఏంటో చూపిస్తా. నవీన్ యాదవ్‌ను గెలిపించండి.. అసెంబ్లీలో మీ గొంతుకై మీ సమస్యలను ప్రస్తావిస్తాడు. ఎమ్మెల్యే గా నవీన్ యాదవ్, మంత్రిగా అజారుద్దీన్ మీకు అండగా ఉంటారు. పదేళ్లు దోచుకున్న దోపిడీ దొం గలు ముసుగు వేసుకుని జూబ్లీహిల్స్ వస్తున్నారు. అజారుద్దీన్ కు మంత్రి పదవి ఇస్తే బీజేపీకి ఎందుకంత కడుపుమంట అని రేవంత్‌రెడ్డి ప్రశ్నించారు. 

మన తెలంగాణ/చింతకానిః సిపిఎం రాష్ట్ర కమిటీ సభ్యుడు, రైతు సంఘం రాష్ట్ర ప్రధాన కార్యదర్శి సామినేని రామారావు దారుణంగా హత్యకు గురయ్యా రు. ఈ సంఘటన ఖమ్మం జిల్లా, మధిర నియోజకవర్గం, చింతకాని మం డలం, పాతర్లపాడు గ్రామంలో శుక్రవారం చోటుచేసుకుంది. పాతర్లపాడు గ్రామంలోని తన నివాసంలో శుక్రవారం ఉదయం ఆరు గంటల సమయంలో సామినేని వాకింగ్ చేస్తున్నారు. ఆ సమయంలో గుర్తు తెలియని వ్యక్తులు మాటువేసి కత్తులతో పొడిచి గొంతు కోసి అతికిరాతకంగా చంపేశారు. రాజకీయంగా ఎదుర్కోలేక ఉద్దేశపూర్వకంగానే కిరాయి గుండాలతో హత్య చేయించారని కుటుంబ సభ్యులు ఆరోపించారు. పార్టీలో నీతి, నిజాయితీతో గ్రామస్థాయి నుండి రాష్ట్ర స్థాయి వారికి పార్టీని ముందుండి నడిపిన వ్యక్తి సామినేని రామారావు హత్యను తీవ్రంగా ఖండిస్తున్నామని సిపిఎం పోలిబ్యూరో సభ్యుడు తమ్మినేని వీరభద్రం అన్నారు.

సామినేని రామారావు సిపిఎం రాష్ట్ర కమిటీ సభ్యుడిగా ఉమ్మడి ఆంధ్రప్రదేశ్‌లో రైతు సంఘం రాష్ట్ర ప్రధాన కార్యదర్శిగా పార్టీకి ఎనలేని సేవలు చేశారని తెలిపారు. ఆయన మృతికి పార్టీ రాష్ట్ర కార్యదర్శి జాన్‌వెస్లీ, రాష్ట్ర కమిటీ సభ్యుడు పోతినేని సుదర్శన్, ం జిల్లా కార్యదర్శి నున్నా నాగేశ్వరరావు, రైతు సంఘం జిల్లా కార్యదర్శి మాదిని రమేష్, జిల్లా కమిటీ సభ్యుడు బండి రమేష్, సిపిఎం నేత సామినేని రామారావును హత్య చేసిన దుండగులను వెంటాడి, వేటాడి కఠినంగా శిక్షిస్తామని రాష్ట్ర ఉప ముఖ్యమంత్రి భట్టి విక్రమార్క తెలిపారు. సామినేని రామారావు హ త్యకు గురవడంతో యన తీవ్ర దిగ్భ్రాంతికి గురయ్యారు. పోలీస్ అధికారులు స్నిఫర్ డాగ్స్, క్లూస్‌టీమ్స్, సైబర్ వర్గాలు పట్టుకోవాలని ఆదేశించారు. 

మన తెలంగాణ/హైదరాబాద్: రాష్ట్రంలో ఇంటర్మీడియేట్ వార్షిక పరీక్షలు నిర్వహించే తేదీలను ఇంటర్మీడియేట్ బోర్డు ప్రకటించింది. 2026 ఫిబ్రవరి 25 నుంచి ప్రథమ సంవత్సరం, 26 నుంచి ద్వితీయ సంవత్సరం పరీక్షలు ప్రారంభమవుతాయి. మార్చి 18వ తేదీతో ఇంటర్ పరీక్షలు ముగియనున్నాయి. ఉదయం 9 నుంచి మధ్యాహ్నం 12 గంటల వరకూ పరీక్షలు జరుగుతాయి. ఫిబ్రవరి 2 నుంచి 21 వరకు ప్రాక్టికల్ పరీక్షలు నిర్వహించనున్నట్లు ఇంటర్ బోర్డ్ తెలిపింది. రోజుకు రెండు సెషన్లలో ఈ పరీక్షలు జరుగనున్నాయి. ఉదయం 9 నుంచి 12 గంటల వరకూ ఒక సెషన్, మధ్యాహ్నం 2 నుంచి సాయంత్రం 5 గంటల వరకు రెండో సెషన్ ఉంటుంది. ఇంగ్లీష్ ప్రాక్టికల్ పరీక్షలు మొదటి సంవత్సరం విద్యార్థులకు జనవరి 21న, రెండో సంవత్సరం విద్యార్థులకు జనవరి 22వ తేదీన నిర్వహించనున్నారు. ప్రాక్టికల్ పరీక్షలు జరిగే తేదీలలో జెఇఇ మెయిన్ పరీక్షలు ఉంటే, ఆ పరీక్షలకు హాజరయ్యే విద్యార్థులకు ప్రత్యామ్నాయ ఏర్పాట్లు చేయనున్నట్లు ఇంటర్ బోర్డు తెలిపింది. శనివారం(నవంబర్ 1) నుంచి ఇంటర్ పరీక్ష ఫీజుల స్వీకరించనున్నట్లు ఇంటర్ బోర్డు వెల్లడించింది.

25.02.2026 ద్వితీయ భాష పేపర్-1

26.02.2026 ద్వితీయ భాష పేపర్-2

27.02.2026 ఇంగ్లీష్ పేపర్ -౧

28.02.2026 ఇంగ్లీష్ పేపర్-2

02.03.2026 గణితం పేపర్ -1ఎ

03.03.2026 గణితం పేపర్-2ఎ

బోటనీ పేపర్-1 బోటనీ పేపర్-2

పొలిటికల్ సైన్స్-1 పొలిటికల్ సైన్స్-2

05.03.2026 గణితం పేపర్-1బి

06.03.2026 గణితం పేపర్-2బి

జువాలజి పేపర్-1 జువాలజి పేపర్-2

చరిత్ర పేపర్-1 చరిత్ర పేపర్-2

09.03.2026 భౌతిక శాస్త్రం పేపర్-1

10.03.2026 భౌతిక శాస్త్రం పేపర్-2

అర్థశాస్త్రం పేపర్-1 అర్థశాస్త్రం పేపర్-2

12.03.2026 కెమిస్ట్రీ పేపర్-1

13.03.2026 కెమిస్ట్రీ పేపర్-2

కామర్స్ పేపర్-1 కామర్స్ పేపర్-2

14.03.2026 పబ్లిక్ అడ్మినిస్ట్రేషన్

16.03.2026 పబ్లిక్ అడ్మినిస్ట్రేషన్

(పేపర్-1) (పేపర్-2)

బ్రిడ్జి కోర్సు గణితం బ్రిడ్జి కోర్సు గణితం

(పేపర్-1) (పేపర్-2)

(బైపిసి అభ్కర్థుల కోసం) (బైపిసి అభ్కర్థుల కోసం)

17.03.2026 మోడ్రన్ లాంగ్వేజ్

18.03.2026 మోడ్రన్ లాంగ్వేజ్

(పేపర్-1) (పేపర్-2)

జియోగ్రఫీ పేపర్-1 జియోగ్రఫీ పేపర్-2

హర్యానాలోని రొహతక్‌లో ఉన్న మహార్షి దయానంద యూనివర్శిటీ (ఎండియు) అధికారులు మహిళా పారిశుద్ధ కార్మికులు ఇద్దరి పట్ల రాక్షసంగా, జుగుప్సాకరంగా వ్యవహరించారు. పారిశుద్ధం పనుల్లో వేగంగా పనిచేయని వారిని నిలిపివేసి అవమానించారు. తమకు నెలసరి రోజులు అని , కడుపు నొప్పితో పనిచేయలేకపోతున్నామని చెప్పగా , ఈ అధికారులు వితండవాదానికి దిగారు. మీకు అదే ..అని నమ్మడానికి ఏదైనా ఆధారం ఉందా? బాత్‌రూంకు వెళ్లి మీ లోపలి భాగాలు, శాపిటరీ ప్యాడ్స్ ఫోటోలు తీసుకుని రండి, చూసి నిజమైతే పనిలో ఉంచుతాం లేకపోతే ఏకంగా ఉద్యోగం నుంచి ఊడబెరుకుతామని బెదిరించారు. దీనితో వారు చేసేది లేక ఆ పని చేశారు. తరువాత విషయం ఇతర సిబ్బందికి తెలియడం, పెద్ద ఎత్తున విద్యాసంస్థలో పలువురు గుమికూడి ఆందోళనకు దిగడంతో పరిస్థితి ఉద్రిక్తతకు దారితీసింది. దీనితో అధికారులు రంగంలోకి దిగి ఇద్దరు శానిటరీ సూపర్‌వైజర్లు వితేందర్, వినోద్ హుండాను , అసిస్టెంట్ రిజిస్ట్రార్ శ్యామ్ సుందర్‌ను సస్పెండ్ చేశారు. తరువాత స్థానిక పోలీసు స్టేషన్‌లో వారిపై కేసులు నమోదు చేశారు. నాలుగైదు రోజుల క్రితమే దారుణ ఘటన జరిగింది. అయితే ఉన్న ఉపాధి పోతుందనే భయంతో బాధితులు తమ ఇబ్బందిని తెలియచేసుకోలేదు. 

పెళ్లి వేడుక ముగించుకుని తిరిగి వస్తున్న ఓ కుటుంబంలో ఘోర రోడ్డు ప్రమాదం రూపంలో అంతులేని విషాదం చోటుచేసుకుంది. హనుమకొండ జిల్లా, భీమదేవరపల్లి మండలం, కొత్తపల్లి గ్రామ శివారులో గురువారం రాత్రి అతివేగంగా వచ్చిన డిసిఎం వాహనం బొలెరో వాహనాన్ని బలంగా ఢీకొంది. ఈ ప్రమాదంలో ముగ్గురు వ్యక్తులు అక్కడికక్కడే మృతి చెందగా, మరో 10 మందికి తీవ్ర గాయాలయ్యాయి. పోలీసులు తెలిపిన వివరాల ప్రకారం.. మెదక్ జిల్లా, వెంకటాపురం గ్రామానికి చెందిన రెడ్డబోయిన శ్రీకాంత్ కుటుంబ సభ్యులు మహబూబాబాద్ జిల్లా, కురవి మండలం, సుధన్‌పల్లికి చెందిన నాగల, సిద్దిపేట జిల్లా, వెంకటాపురంనకు చెందిన భాస్కర్ వివాహ నిమిత్తం సుధన్‌పల్లి వెళ్లారు. పెళ్లి పూర్తయ్యాక, మరుసటిరోజు మారుపెళ్లి కోసం వెంకటాపురం వచ్చి,

అక్కడ నుండి రాత్రి 8 గంటలకు మళ్లీ సుధన్‌పల్లికి బొలెరో వాహనంలో బయలుదేరారు. మార్గమధ్యంలో భీమదేవరపల్లి మండలం, కొత్తపల్లి గ్రామ శివారులో మూత్రవిసర్జన కోసం వాహనాన్ని రోడ్డు పక్కకు ఆపారు. సరిగ్గా అదే సమయంలో, ఎల్కతుర్తి వైపు అతివేగంగా, అజాగ్రత్తగా వచ్చిన డిసిఎం వాహనం బలంగా ఢీకొట్టింది. ఈ ఘోర ప్రమాదంలో రెడ్డబైన స్వప్న (16), శ్రీనాథ్ (6), కలమ్మ (55) అక్కడికక్కడే మృతి చెందారు. అనసూయ, అక్షయ, మారుతి, రమాదేవి, దేవేందర్, నవలోక్, రిత్విక్, సరోజన, కార్తిక్, శ్రీరామ్ సహా మొత్తం 10 మందికి తీవ్ర గాయాలయ్యాయి. క్షతగాత్రులను వెంటనే వరంగల్‌లోని ఎంజిఎం ఆసుపత్రి, రాజు గార్డెన్ ఆసుపత్రికి తరలించి చికిత్స అందిస్తున్నారు. వీరిలో కొందరి పరిస్థితి విషమంగా ఉన్నట్లు సమాచారం.

బాధితులకు అండగా నిలిచిన డిప్యూటీ స్పీకర్ రామచంద్రనాయక్

రోడ్డు ప్రమాదంలో డోర్నకల్ నియోజకవర్గం, కురవి మండలానికి చెందిన మృతులతోపాటు బాధితుల ఎక్కువగా ఉండడంతో ఎంఎల్‌ఎ, శాసనసభ డిప్యూటీ స్పీకర్ రామచంద్రనాయక్ బాధితులకు అండగా నిలిచారు. శుక్రవారం మధ్యాహ్నం మృతదేహాలతోపాటు ఎంజిఎంతోపాటు ప్రైవేటు ఆసుపత్రిలో చికిత్స పొందుతున్న బాధితులను పరామర్శించి వారి బంధువులను ఆయన ఓదార్చారు. బాధిత కుటుంబాలకు ప్రభుత్వం అండగా ఉంటుందని, వారిని అన్నివిధాలుగా ఆదుకుంటామని హామీనిచ్చారు.

ఎంజిఎం ప్రధాన రహదారిపై రాస్తారోకో బాధిత కుటుంబ సభ్యుల ఆందోళన

ఇదిలాఉంటే బాధితులను పోలీస్ శాఖ పట్టించుకోవడంలేదని ఆక్రోశంతో గ్రామస్థులంతా ఎంజిఎం ప్రధాన రహదారిపై రాస్తారోకో చేశారు. కలెక్టర్ వచ్చి తమకు న్యాయం చేసే వరకు ఇక్కడి నుండి కదిలేది లేదని డిమాండ్ చేశారు. అదే సందర్భంలో డాక్టర్ రామచంద్రనాయక్ బాధితులతో మాట్లాడినప్పటికీ వారు ఆగ్రహంతో ఊగిపోయారు. ముఖ్యమంత్రి పర్యటన ఉండడంతో పోలీసు ఉన్నతాధికారులు హుటాహుటిన అక్కడికి చేరుకొని పరిస్థితిని అర్థం చేసుకొని బాధితులకు తగిన న్యాయం చేస్తామని డిప్యూటీ స్పీకర్ రామచంద్రనాయక్‌తో కలిసి ఎంజిఎంలోని బాధితుల వద్దకు వెళ్లారు. దీంతో రాస్తారోకోను విరమించారు.

 ఆటో డ్రైవర్ హత్య కేసును టోలీచౌకి పోలీసులు 24 గంటల్లోనే ఛేదించారు. హత్య చేసిన నిందితుడిని అరెస్టు చేశారు. ఎడిసిపి టోలీచౌకి పోలీస్ స్టేషన్‌లో శుక్రవారం ఏర్పాటు చేసిన విలేకరుల సమావేశంలో వివరాలు వెల్లడించారు. టోలీచౌకి, హకీం పేటకు చెందిన మహ్మద్ ముజామిల్ అలియాస్ ఆయుబ్ ఆటోడ్రైవర్‌గా పనిచేస్తున్నాడు. ఈ నెల 30 తేదీన ఎస్‌ఎస్ ఫంక్షన్ హాల్ సమీపంలో ఆటోలో హత్యకు గురయ్యాడు. బాధితుడి సోదరుడి ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేసి నిందితుడిని అదుపులోకి తీసుకున్నారు. నగరంలోని చాంద్రాయణగుట్ట, వాహిద్ ముస్తాఫా కాలనీకి చెందిన మహ్మద్ ఇషాక్ అలియాస్ ఖలీద్ ఎలక్ట్రిషన్‌గా పనిచేస్తున్నాడు.

ఇషాక్, ముజామిల్, మరికొంత మంది స్నేహితులు కలిసి ఆటోలో రాత్రి 2 గంటల వరకు మద్యం తాగారు. మద్యం తాగే సమయంలో ఇద్దరి మధ్య మొబైల్ ఫోన్ కోసం గొడవ జరగడంతో ఖలీద్ తాడును ముజామిల్ మెడకు బిగించి హత్య చేసినట్లు పోలీసులు గుర్తించారు. హత్య చేసిన తర్వాత నిందితుడు హకీం పేటలోని ఓయో రూంలో ఉన్నట్లు గుర్తించారు. వెంటనే నిందితుడిని అదుపులోకి తీసుకుని రిమాండ్‌కు తరలించారు. ఇన్స్‌స్పెక్టర్ రమేష్ నాయక్, ఎస్సైలు సతీష్ కుమార్, రాఘవేందర్ తదితరులు నిందితుడిని పట్టుకున్నారు.

ముఖ్యమంత్రి ప్రజావాణి చొరవతో బాలిక సౌమ్యకు పునర్జన్మ లభించింది. ఊపిరితిత్తులు పూర్తిగా దెబ్బ తిని ప్రాణాపాయ స్థితిలో ఉన్న సౌమ్యకు సిఎం ప్రజావాణి కొండంత అండగా నిలిచి ఆ బాలిక చికిత్సకు అవసరమైన రూ. 9 లక్షలు ఆర్థిక సాయం సమకూర్చి ఆ బాలిక నిండు ఆరోగ్యంతో ఉండేందుకు సహకారాన్ని అందించింది. శుక్రవారం ప్రజాభవన్‌లో నిర్వహించిన సిఎం ప్రజావాణికి సౌమ్య తన తండ్రి తల్లిదండ్రులతో కలిసి వచ్చి సీఎం ప్రజావాణి ఇన్చార్జి, రాష్ట్ర ప్రణాళికా సంఘం వైస్ చైర్మన్ డాక్టర్ జి చిన్నారెడ్డి, స్టేట్ నోడల్ అధికారి దివ్యలకు ధన్యవాదాలు తెలిపారు. సిఎం రేవంత్ రెడ్డి చల్లని దీవెనలు తన ఆయుష్షును పెంచిందని సౌమ్య సంతోషాన్ని వ్యక్తం చేసింది.

ఈ సందర్భంగా సీఎం ప్రజావాణిలో సౌమ్యకు రూ. 4 లక్షల సిఎంఆర్‌ఎఫ్ చెక్కును చిన్నారెడ్డి, దివ్య అందించారు. సొసైటీ ఫర్ ఎలిమినేషన్ ఆఫ్ రూరల్ పావర్టి ( సెర్ప్ ) నుంచి మరో రూ. 5 లక్షల ఆర్థిక సహాయాన్ని సౌమ్యకు అందించారు. కర్ణాటక రాష్ట్రం బెంగళూరు ఆసుపత్రిలో శస్త్రచికిత్స విజయవంతమైంది. జనగాం జిల్లా వెంకిర్యాల గ్రామానికి చెందిన ఈర్ల శ్రీనివాస్, అనురాధ తమ కుమార్తె సౌమ్య అనారోగ్య సమస్యను రెండు నెలల క్రితం సిఎం పజావాణి దృష్టికి తీసుకువచ్చారు. తల్లి అనురాధ స్వయం సహాయక గ్రూపు సభ్యురాలు కాగా తండ్రి ఈర్ల శ్రీనివాస్ సన్నకారు రైతు. సౌమ్య దీనస్థితి గమనించి సిఎం ప్రజావాణి అండగా నిలిచింది.

మంత్రిగా ప్రమాణ స్వీకారం చేసిన క్రికెట్ మాజీ కెప్టెన్ అజహరుద్దీన్ క్రికెట్‌లోనే కాదు రాజకీయాల్లోనూ మ్యాచ్ ఫిక్సింగ్‌కు పాల్పడిన ఫిక్సరేనని బజెపి శాసనసభాపక్షం నాయకుడు ఏలేటి మహేశ్వర్ రెడ్డి విమర్శించారు. మజ్లీస్ పార్టీ అధినేత అసదుద్దీన్ ఒవైసీ అండదండలతో, ఆశీస్సులతో మంత్రి పదవి దక్కిందని ఆయన శుక్రవారం విలేకరుల సమావేశంలో అన్నారు. జూబ్లీహిల్స్ ఉప ఎన్నికలో ఓటమి భయంతోనే కాంగ్రెస్ పార్టీ మస్లింల ఓట్ల కోసం ఉన్నఫళంగా అజహరుద్దీన్‌కు మంత్రి పదవి ఇచ్చిందని ఆయన విమర్శించారు.

అజహరుద్దీన్‌ను భారత దేశ క్రికెట్ కెప్టెన్‌గా చేస్తే, ఆయన దేశం కోసం కాకుండా డబ్బుల కోసం కక్కుర్తితో మ్యాచ్ ఫిక్సింగ్‌కు పాల్పడ్డారని ఆయన విమర్శించారు. దీంతో రెండు వేల సంవత్సరంలో మ్యాచ్ ఫిక్సింగ్ ఆరోపణల నేపథ్యంలో బిసిసిఐ జీవితకాలం నిషేధం విధించిందని ఆయన గుర్తు చేశారు. కాంగ్రెస్‌కు మైనారిటీ ఓట్లు మాత్రమే కావాలి కానీ వారి బాగోగులు పట్టించుకోదని ఆయన తూర్పరబట్టారు. మైనారిటీల పట్ల చిత్తశుద్ధి ఉంటే రెండేళ్ళుగా మంత్రివర్గంలోకి మైనారిటీ నాయకునికి ప్రాతినిథ్యం ఎందుకు కల్పించ లేదని ఆయన ప్రశ్నించారు. ముఖ్యమంత్రి ఎ. రేవంత్ రెడ్డి హైదరాబాద్‌ను మజ్లీస్ పార్టీకి రాసి ఇచ్చేస్తారేమోనన అనుమానాన్ని మహేశ్వర్ రెడ్డి వ్యక్తం చేశారు. కాంగ్రెస్ బుజ్జగింపు రాజకీయాలకు, మజ్లీస్ ఆగడాలకు వ్యతిరేకంగా బిజెపికి ఓటు వేయాలని ఆయన ఓటర్లను కోరారు.