admin

హైదరాబాద్: జూబ్లీహిల్స్ ఉప ఎన్నిక ఫలితాలు శుక్రవారం వెలువడిన విషయం తెలిసిందే. ఈ ఫలితాల్లో అధికార కాంగ్రెస్ ఘన విజయం సాధించింది. ఈ నేపథ్యంలో రాష్ట్ర వ్యాప్తంగా కాంగ్రెస్ పార్టీ శ్రేణులు సంబరాల్లో మునిగిపోయారు. అయితే ఈ ఫలితాల తర్వాత తెలంగాణ జాగృతి అధ్యక్షురాలు కవిత ఎక్స్‌లో పెట్టిన ఓ పోస్ట్ ఆసక్తికరంగా మారింది. ‘కర్మ హిట్స్ బ్యాక్’ అంటూ ఆమె పోస్ట్ పెట్టారు. జూబ్లీహిల్స్ ఫలితాల్లో బిఆర్ఎస్ పార్టీ ఓటమిని ఉద్దేశించే ఆమె ఈ పోస్ట్ పెట్టి ఉంటారని నెటిజన్లు భావిస్తున్నారు. ఇక ఈ ఉప ఎన్నికలో కాంగ్రెస్ అభ్యర్థి నవీన్ యాదవ్‌కు 98,988 ఓట్లు రాగా, బిఆర్ఎస్ అభ్యర్థి మాగంటి సునీతకు 74,259 ఓట్లు పోల్ అయ్యాయి. బిజెపి అభ్యర్థి దీపక్ రెడ్డికి 17,061 ఓట్లు వచ్చి.. డిపాజిట్ గల్లంతు అయింది. 

కోల్‌కతా: ఈడెన్ గార్డెన్స్ వేదికగా.. సౌతాఫ్రికా, భారత్ మధ్య జరుగుతున్న తొలి టెస్ట్ మ్యాచ్.. తొలి రోజు ఆట ముగిసింది. ఈ మ్యాచ్‌లో టాస్ గెలిచి తొలుత బ్యాటింగ్ చేసిన సౌతాఫ్రికాకు భారత బౌలర్లు చుక్కలు చూపించారు. ముఖ్యంగా బుమ్రా ఐదు వికెట్ల పడగొట్టి సఫారీలను చిత్తు చేశాడు. దీంతో సౌతాఫ్రికా 159 పరుగులు చేసి ఆలౌట్ అయింది. ఆ తర్వాత తొలి ఇన్నింగ్స్ ఆరంభించిన భారత్.. నిదానంగా బ్యాటింగ్ చేస్తూ వచ్చింది. అయితే జెన్సన్ బౌలింగ్‌లో ఓపెనర్ జైస్వాల్(12) క్లీన్ బౌల్డ్ అయ్యాడు. మూడో బ్యాటర్‌గా వాషింగ్టన్ సుందర్‌ని బరిలోకి దింపారు. దీంతో తొలి రోజు ఆట ముగిసే సమయానికి భారత్ 20 ఓవర్లలో ఒక వికెట్ నష్టానికి 37 పరుగులు చేసి 122 పరుగుల వెనుకంజలో ఉంది. క్రీజ్‌లో రాహుల్(13), సుందర్(6) ఉన్నారు.

హైదరాబాద్: జూబ్లీహిల్స్ ఉపఎన్నికలో తనని నమ్మి ఓటు వేసిన అందరికీ కాంగ్రెస్ అభ్యర్థి నవీన్ యాదవ్ ధన్యవాదాలు తెలిపారు. ఉపఎన్నికలో ఆయన బిఆర్ఎస్ అభ్యర్థి మాగంటి సునీతపై దాదాపు 24వేలకు పైగా ఓట్ల తేడాతో విజయం సాధించారు. అనంతరం ఆయన మీడియాతో మాట్లాడుతూ.. సిఎం రేవంత్ రెడ్డి, నేతలందరికీ ధన్యవాదాలు తెలిపారు. బిఆర్ఎస్ నేతలు తనపై ఎన్నో దుష్ప్రచారాలు చేశారని అన్నారు. అన్ని దుష్ప్రచారాలను ప్రజలు తమ ఓటుతో తిప్పికొట్టారని పేర్కొన్నారు. నియోజకవర్గ సమస్యలను సిఎం దృష్టికి తీసుకెళ్తానని.. పదేళ్లలో బిఆర్ఎస్ చేసిందేమీ లేకనే ప్రచారంలో చెప్పుకోలేదని తెలిపారు. కేవలం తనపై దుష్ప్రచారం చేసి గెలవాలని బిఆర్ఎస్ చూసిందని.. బెదిరిస్తే ప్రజలు ఓటు వేసే రోజులు ఎప్పుడో పోయాయని స్పష్టం చేశారు. 

కోల్‌కతా: ఈడెన్ గార్డెన్స్ వేదికగా భారత్‌తో జరుగుతున్న తొలి టెస్ట్ మ్యాచ్‌ తొలి ఇన్నింగ్స్‌లో సౌతాఫ్రికా ఆలౌట్ అయింది. టీం ఇండియా స్టార్ బౌలర్ జస్ప్రీత్ బుమ్రా తన బౌలింగ్‌తో సౌతాఫ్రికా పతనాన్ని శాసించాడు. ఈ ఇన్నింగ్స్‌లో ఐదు వికెట్లు తీసి మరోసారి తనకు తానే సాటి అని నిరూపించాడు. ఈ మ్యాచ్‌లో టాస్ గెలిచిన సౌతాఫ్రికా బ్యాటింగ్ చేసేందుకు ముందుకు వచ్చింది. అయితే 71 పరుగులకే 3 వికెట్లు కోల్పోయింది. లంచ్ బ్రేక్ సమయానికి 3 వికెట్ల నష్టానికి 105 పరుగులు చేసింది. అయితే భారత బౌలర్లు సఫారీ బ్యాటర్లకు క్రీజ్‌లో కుదురుకునే అవకాశం ఇవ్వలేదు. రెండో సెషన్ ముగిసే సమయానికే సౌతాఫ్రికా 8 వికెట్ల నష్టానికి 154 పరుగులు చేసింది. అయితే మూడో సెషన్‌లో 55వ ఓవర్ వేసిన బుమ్రా అదే ఓవర్‌లో 3 బంతికి హార్మర్‌(5)ని క్లీన్ బౌల్డ్ చేయగా.. చివరి బంతికి మహరాజ్(0) ఎల్‌బీడబ్ల్యూగా వెనక్కి పంపాడు. దీంతో సౌతాఫ్రికా 55 ఓవర్లలో 159 పరుగులు చేసి ఆలౌట్ అయింది. భారత బౌలింగ్‌లో బుమ్రా 5, సిరాజ్, కుల్దీప్ చెరి 2, అక్షర్ ఒక వికెట్ తీశారు. బుమ్రా కెరీర్‌లో ఇది 16వ ఐదు వికెట్ల హౌల్ కావడం విశేషం.

కోల్‌కతా: ప్రస్తుత తరం బౌలర్లలో టాప్ బౌలర్ ఎవరంటే.. అందరు చెప్పే పేరు జస్ప్రీత్ బుమ్రా. తనదైన శైలీ బౌలింగ్‌తో ప్రత్యర్థులకు చుక్కలు చూపించడంలో బుమ్రా ముందుంటాడు. అతడు బౌలింగ్ వస్తున్నడంటే.. ప్రత్యర్థ బ్యాటర్ల కాస్త జంకుతారు. కోల్‌కతా ఈడెన్ గార్డెన్స్ వేదికగా దక్షిణాఫ్రికాతో జరుగుతున్న తొలి టెస్ట్ మ్యాచ్‌లోనూ బుమ్రా మరోసారి సూపర్ స్పెల్ బౌలింగ్ చేశాడు. మూడు కీలక వికెట్లు తీసి.. తన సత్తా ఏంటో మరోసారి చూపించాడు.

ఈ నేపథ్యంలో బుమ్రా ఓ అరుదైన ప్రపంచ రికార్డును తన ఖాతాలో వేసుకున్నాడు. టెస్టుల్లో కనీసం 200 వికెట్లు తీసుకున్న బౌలర్లలో అతి తక్కువ యావరేజ్ నమోదు చేసిన బౌలర్‌గా చరిత్ర సృష్టించాడు. 51 టెస్టుల్లో 19.70 యావరేజ్‌తో 228 వికెట్లు తీశాడు. దీంతో టెస్టుల్లో 200లకు పైగా వికెట్లు తీసి 20 కన్న తక్కువ యావరేజ్ ఉన్న బౌలర్ కేవలం బుమ్రా మాత్రమే కావడం విశేషం. వెస్టిండీస్ దిగ్గజ ఫాస్ట్ బౌలర్ మాల్కం మార్షల్ 20.9 యావరేజ్‌తో ఈ జాబితాలో రెండో స్థానంలో ఉన్నారు. ప్రస్తుత ఆటగాళ్లలో రబడా (22), కమ్మిన్స్ (22.1) ఆ తర్వాతి స్థానంలో నిలిచారు.

ఇక తొలి టెస్ట్‌లో బుమ్రా మూడు, కుల్దీప్ 2 వికెట్లు తీశారు. దీంతో 43 ఓవర్లలో సౌతాఫ్రికా 144 పరుగులు చేసి 5 వికెట్లు కోల్పోయింది. క్రీజ్‌లో వెర్రెయిన్(15), స్టబ్స్ (10) ఉన్నారు. 

కోల్‌కతా: ఈడెన్ గార్డెన్స్ వేదికగా భారత్, సౌతాఫ్రికా మధ్య జరుగుతున్న తొలి టెస్ట్ మ్యాచ్ రసవత్తరంగా సాగుతోంది. ఈ మ్యాచ్‌లో టాస్ గెలిచిన దక్షిణాఫ్రికా తొలుత బ్యాటింగ్‌కి దిగింది. లంచ్ బ్రేక్ సమయానికి 3 వికెట్లు కోల్పోయిన సఫారీ జట్టు 105 పరుగులు చేసింది. ఆ తర్వాత కొంత సమయానికే కుల్దీప్ వేసిన 30వ ఓవర్ ఐదో బంతికి ముల్డర్ (24) ఎల్‌బిడబ్ల్యూ రూపంలో పెవిలియన్ చేరాడు. ఆ తర్వాత బుమ్రా వేసిన 33వ ఓవర్ 3వ బంతికి క్రీజ్‌లో స్థిరపడుతున్న డి జోర్జి (24) కూడా ఎల్‌బిడబ్ల్యూగా వెనుదిరిగాడు. ప్రస్తుతం 36 ఓవర్లు ముగిసేసరికి దక్షిణాప్రికా 5 వికెట్ల నష్టానికి 130 పరుగులు చేసింది. క్రీజ్‌లో స్టబ్స్ (5), వెర్రెయిన్ (5) ఉన్నారు.