admin

ప్రస్తుత సాంకేతిక యుగంలో మొబైల్ ఫోన్ ద్వారానే అన్ని పనులు జరిగిపోతున్నాయి. ఏమి కావాలన్నా ఆన్‌లైన్‌లోనే ఆర్డర్లు చేయడం, వాటి చెల్లింపులన్నీ మొబైల్ ద్వారానే జరుగుతున్నాయి. ఏది నిజమో ఏది అబద్దమో తెలుసుకోలేని స్థితి నెలకొంది. హైదరాబాద్ లాంటి మహానగరంలో ట్రాఫిక్ సమస్య, బిజి లైఫ్‌తో పూర్తిగా ఆన్‌లైన్ మీదనే ఆధారపడుతున్నారు. ఇదే అదనుగా సైబర్ నేరగాళ్లు సిద్దంగా ఉంటున్నారు. సైబర్ కేటుగాళ్లు అమాయకులకు వల వేసి వారి ఖాతాల్లోని నగదును సునాయాసంగా కాజేస్తున్నారు. తాజాగా సైబర్ నేరగాళ్లు ఏకంగా ఇన్‌కమ్ ట్యాక్స్ ఆఫీసర్‌నే బురిడీ కొట్టించారు. Jubliehillswinespot.in వెబ్‌సైట్ నుంచి ఇన్‌కమ్ టాక్స్ కమిషనర్ వైన్ ఆర్డర్ చేశారు.

గూగుల్ పే ద్వారా మొదట రూ. 2,320 చెల్లింపు చేశారు. అనంతరం హోమ్ డెలివరీ సౌకర్యం అందుబాటులో ఉందని, డెలివరీ డబ్బులు చెల్లిస్తే ఇంటికే డెలివరీ చేస్తామని వెబ్‌సైట్ నుండి మరో స్కానర్ పంపారు. దీంతో ఇన్‌కమ్ ట్యాక్స్ కమిషనర్ ఆ స్కానర్‌ను స్కాన్ చేయగా, వెంటనే అతడి ఖాతా నుంచి రూ.40 వేలు కట్ అయ్యాయి. ఈ సంఘటనకు ఆ ఇన్‌కమ్ ట్యాక్స్ కమిషనర్ షాకయ్యారు. తేరుకుని వెంటనే సైబర్ క్రైమ్ పోలీసులకు ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేస్తున్నారు.

 ప్రధాని నరేంద్రమోడీ శనివారం గుజరాత్ రాష్ట్రం లోని సూరత్‌లో నిర్మాణంలో ఉన్న బుల్లెట్ ట్రైన్ స్టేషన్‌ను సందర్శించి ముంబైఅహ్మదాబాద్ హైస్పీడ్ రైలు కారిడార్ (ఎంఎహెచ్‌ఎస్‌ఆర్ ) పనుల పురోగతిని సమీక్షించారు. శనివారం ఉదయం సూరత్ విమానాశ్రయంలో దిగిన వెంటనే బుల్లెట్ ట్రైన్ స్టేషన్ నిర్మాణం అవుతున్న అంట్రోలి ఏరియాకు వెళ్లారు. దేశం లోనే అత్యంత ప్రతిష్టాత్మక మౌలిక వసతుల ప్రాజెక్టుల్లో ఈ కారిడార్ ఒకటి. దీని పొడవు సుమారు 508 కిమీ. ఇందులో 352 కిమీ లైను గుజరాత్ , దాద్రా, నగర్‌హవేలీ మీదుగా నిర్మాణమవుతోంది.

మరో 156 కిమీ లైను నిర్మాణం మహారాష్ట్ర పరిధిలోకి వస్తుంది. ఈ కారిడార్ సబర్మతి, అహ్మదాబాద్, ఆనంద్, వడోదరా, భరూచ్, సూరత్, బిలిమోరా, వాపి, బోయినర్, విరార్,థానే, ముంబై వంటి ప్రధాన నగరాలను కలుపుతుంది. ఆ తరువాత గిరిజన ప్రాంతమైన నర్మదా జిల్లా లోని డెడియాపడ పట్టణంలో గిరిజన పోరాట యోధుడు బిర్సాముండా జయంతి వేడుకలకు హాజరయ్యారు. అక్కడ రూ.9700 కోట్ల విలువైన అభివృద్ధి పనులను ప్రారంభించారు. అంతకు ముందు సగ్‌బర తాలూకా దేవ్‌మోగ్రా ఆలయంలో పండోరి మాత కు పూజలు చేశారు. 

వాషింగ్టన్ : విధించిన టారీఫ్‌లపై జనం నుంచి తీవ్ర స్థాయి నిరసన వ్యక్తం కావడంతో అమెరికా అధ్యక్షులు డొనాల్డ్ ట్రంప్ వెనకకు తగ్గారు. వెంటనే బీఫ్, కాఫీ, పండ్లపై విధించిన సుంకాలను ఉపసంహరించుకున్నారు. ఈ మేరకు శనివారం కార్యనిర్వాహక ఉత్తర్వులపై సంతకాలు చేశారు. నిత్యావసర సరుకులపై సుంకాలతో వినియోగదారులపై ధరల భారం పడుతూ ఉండటంతో, తీవ్ర స్థాయిలో ఆందోళన వ్యక్తం అయింది. దీనితో ట్రంప్ దూకుడుకు బ్రేక్ వేసుకోవల్సి వచ్చింది. ఇటీవలి పలు ఎన్నికలలో ఆర్థిక అంశాలే ఓటర్లను ఎక్కువగా ప్రభావితం చేశాయి. వర్జీనియా, న్యూజెర్సీ ఇతర ప్రాంతాల్లో డెమోక్రాట్లు విజయం సాధించారు. అయితే టారీఫ్‌లతో ప్రజలపై నిత్యావసర సరుకుల ధరలపై ప్రభావం పడదని ట్రంప్ అధికార యంత్రాంగం చెపుతూ వచ్చింది.

కానీ పౌరులకు దైనందిన అవసరాలలో కీలఅం అయిన బీఫ్, కాఫీల ధరలపై టారీఫ్‌ల ప్రభావం పడుతూ వచ్చింది. బ్రెజిల్ ఇతర దేశాల నుంచి అమెరికాకు ఎక్కువగా బీఫ్, ఇతరత్రా సీజనల్ పండ్లు కూరగాయలు వస్తుంటాయి. ఇతర దేశాల నుంచి వచ్చే మామిడి పండ్లు, ఆపిల్స్ వంటివి అమెరికన్లు ఎక్కువగా తీసుకుంటారు. అయితే తన సార్వత్రిక టారీఫ్ విధానంలో భాగంగా ట్రంప్ ఆయా దేశాలపై భారీ సుంకాల విధింపుతో ఈ పండ్లు కూరగాయలపై కూడా పన్నుల భారం పడింది. దీనితో అమెరికా మాల్స్ , మార్కెట్‌కు ఈ సరుకు తగ్గిపోవడం, లేదా ఎక్కువ ధరలకు కొనుక్కోవల్సి రావడంతో జనం ఆందోళనకు గురి అయ్యారు. దీనితో ఈ టారీఫ్‌లను వెనకకు తీసుకోవల్సిన అత్యవసర పరిస్థితి ఏర్పడింది.

 కరీంనగర్ జిల్లా మానకొండూర్ మండలం సదాశివపల్లి గ్రామ స్టేజ్ వద్ద శనివారం ఆర్టీసీ బస్సు ముందు వెళుతున్న లారీని ఢీకొనడంతో బస్సులో ఉన్న 15 మంది ప్రయాణీకులకు గాయాలయ్యాయి.స్థానికులు తెలిపిన వివరాల మేరకు.. నిజామాబాద్ 1వ డిపోకు చెందిన ఆర్టీసీ బస్సు నిజామాబాద్ నుండి వరంగల్ వైపు వెళుతూ ముందు వెళుతున్న మహారాష్ట్రకు చెందిన లారీని ఢీకొంది.ప్రమాదం జరిగిన సమయంలో బస్సులో 60 మంది ప్రయాణీకులు ఉండగా వారిలో 15 మంది ప్రయాణీకులు గాయపడినట్లు తెలిపారు.గాయపడిన వారిని చికిత్స నిమిత్తం కరీంనగర్ ఆసుపత్రికి తరలించారు.సమాచారం అందుకున్న మానకొండూర్ సిఐ సంజీవ్ సంఘటనా స్థలానికి చేరుకొని ప్రమాద వివరాలు తెలుసుకుని కేసు దర్యాప్తు చేస్తున్నారు.

స్వాతంత్య్ర సమరయోధుడు, ఆదివాసీల ఆరాధ్య దైవం బిర్సా ముండా జయంతి సందర్భంగా ప్రజా భవన్‌లో శనివారం ఆయన విగ్రహానికి పూలమాల వేసి పంచాయతీరాజ్, గ్రామీణాభివృద్ధి శాఖ మంత్రి సీతక్క నివాళులు అర్పించారు. ఈ సందర్భంగా మంత్రి మాట్లాడుతూ దేశ స్వాతంత్ర ఉద్యమంలో, ఆదివాసుల స్వేచ్ఛా పోరాటంలో బిర్సా ముండా సేవలను మంత్రి సీతక్క గుర్తు చేసుకున్నారు.

భారత దేశంలో అత్యంత ప్రతిష్టాత్మక ఇండియన్ ఫోటో ఫెస్టివల్ 11వ ఎడిషన్ నవంబర్ 20 నుండి జనవరి 4 వరకు మాదాపూర్‌లోని స్టేట్ ఆర్ట్ గ్యాలరీలో జరుగనున్నట్లు రాష్ట్ర ప్రభుత్వ ప్రత్యేక ప్రధాన కార్యదర్శి జయేష్ రంజన్ తెలిపారు. ఫోటో జర్నలిజం నుండి లలిత కళ వరకు, డాక్యుమెంటరీ నుండి ల్యాండ్‌స్కేప్ వరకు కేవలం ఒక్క భారతదేశమే కాకుండా ప్రపంచవ్యాప్తంగా అద్భుత ఫోటో, డాక్యుమెంటరీ దృశ్యాలను ఈ ఇండియన్ ఫోటో ఫెస్టివల్ లో ప్రదర్శించనున్నారు. ఈ సంవత్సరం హైదరాబాద్‌లో నిర్వహించే ఐపిఎఫ్ ఎడిషన్‌లో సోలో ఎగ్జిబిషన్‌లు, గ్రూప్ షోకేస్‌లు, ఆర్టిస్ట్ టాక్స్, వర్క్‌షాప్‌లు, డాక్యుమెంటరీ ఫిల్మ్ స్క్రీనింగ్‌లు ఉంటాయి. ఈ ఫోటో ఫెస్టివల్ ఎడిషన్ కోసం ప్రపంచవ్యాప్తంగా 50 దేశాల నుండి 820 ఎంట్రీలు వచ్చాయి. వీటిని నిష్టాతులైన జ్యూరీ సభ్యులు నికోల్ తుంగ్ (ఫోటో జర్నలిస్ట్, 7 ఫోటో), గురిందర్ ఒసాన్ (ఫోటో ఎడిటర్, ప్రెస్ ట్రస్ట్ ఆఫ్ ఇండియా), సుకృతి అనా స్టానెలీ (క్రియేటివ్ డైరెక్టర్, ది కారవాన్), మాధవన్ పిళ్లై (ఫోటోగ్రాఫర్ అండ్ క్యూరేటర్) ఫైనలిస్టులను ఎంపిక చేశారు. ఈ సందర్భంగా జరిగే ప్రధాన ఫోటో ఎగ్జిబిషన్లలో శాశ్వత ముసుగులు -అలెశాండ్రో సెలాంటే (బ్రెజిల్), రెయిన్ డాగ్స్ – రోహిత్ చావ్లా (భారతదేశం), బెటర్ డేస్ – సెంగు కిమ్ (దక్షిణ కొరియా) : స్లో ఫోటోగ్రఫీ, ముర్కీ వాటర్స్ -ది కారవాన్ ఎక్స్ ఎం. పళని కుమార్ (భారతదేశం),

సూడాన్: యుద్ధ సమయంలో – గైల్స్ క్లార్క్ (యుకె) : సూడాన్, లింగరింగ్ షాడోస్- నజానిన్ అలిపూర్ జెడ్డీ (ఇరాన్), స్లాష్ అండ్ బర్న్ – గ్లోరియానా జిమెండాజ్ (కోస్టా రికా), ఫ్రంట్‌లైన్స్ ఆఫ్ డిగ్నిటీ, ష్రెడెడ్ స్కైస్, ఇతర ప్రేమ కథలు మేరీలిస్ విగ్నేయు (ఫ్రాన్స్), నో మ్యాన్స్ ల్యాండ్ – ఎల్కే స్కోలియర్స్ (బెల్జియం), టాబూతో వంట – హృదయ సదానంద్ (భారతదేశం) లచే ప్రదర్శనలను ఏర్పాటు చేశారు. జెన్నిఫర్ ఆల్ఫోన్స్ దర్శకత్వం వహించిన నాగోబా జాతరతో పాటు అనేక అంశాలపై డాక్యుమెంటరీలు ప్రదర్శన ఉంటుంది. నవంబర్ 20న సాయంత్రం 5:30 గంటలకు స్టేట్ ఆర్ట్ గ్యాలరీలో ఐపిఎఫ్ 2025 – ఫెస్టివల్ ప్రారంభోత్సవ కార్యక్రమమే ఉంటుందని రాష్ట్ర ప్రభుత్వ ప్రత్యేక ప్రధాన కార్యదర్శి జయేష్ రంజన్ తెలిపారు. ఈ ప్రతిష్టాత్మక ఇండియన్ ఫోటో ఫెస్టివల్‌లో పాల్గొనేందుకు ముందస్తు రిజిస్ట్రేషన్ చేసుకోవాలని, మరిన్ని వివరాలకు www.indianphotofest.com వెబ్ సైట్‌ను సందర్శించాలని జయేష్ రంజన్ ఒక ప్రకటనలో తెలిపారు.

ఢిల్లీ: ప్రజల్లో వ్యతిరేకతల మధ్య జూబ్లీహిల్స్ ఉప ఎన్నిక గెలుపుతో అధికార కాంగ్రెస్ పార్టీలో మళ్లీ జోష్ నెలకొంది. ఈ విజయం అనంతరం శనివారం ముఖ్యమంత్రి రేవంత్ రెడ్డి ఢిల్లీలో పార్టీ జాతీయ అధ్యక్షుడు మల్లికార్జున్ ఖర్గేతో భేటీ అయ్యారు. సిఎం రేవంత్ తోపాటు ఏఐసిసి ఇన్‌ఛార్జ్‌ మీనాక్షి నటరాజన్‌, పిసిసి చీఫ్ మహేష్‌ కుమార్‌ గౌడ్‌, డిప్యూటీ సీఎం భట్టి విక్రమార్క, ఎమ్మెల్యే నవీన్‌ యాదవ్‌ లు ఖర్గేను కలిశారు. ఈ సందర్భంగా ఖర్గే.. నవీన్ యాదవ్ ను అభినందించారు. అనంతరం తెలంగాణలో తాజా పరిస్థితులు, బిసి రిజర్వేషన్ అంశం, స్థానిక సంస్థల ఎన్నికలపై ఖర్గే చర్చించినట్లు తెలుస్తోంది. అంతకుముందు రాహుల్ గాంధీతోనూ వీరు భేటీ అయ్యారు. కాగా, జూబ్లీహిల్స్ ఉప ఎన్నికలో బిఆర్ఎస్ ప్రత్యర్థి మాగంటి సునీతపై నవీన్ యాదవ్ గెలుపొందారు.