admin

మన తెలంగాణ/హైదరాబాద్: జూబ్లీహిల్స్ ఉపఎన్నికలో బిఆర్‌ఎస్ పార్టీ ఓటమి తర్వాత పార్టీ అధినేత కెసిఆర్‌ను, వర్కింగ్ ప్రెసిడెంట్ కెటిఆర్ కలిశారు. శనివారం ఎర్రవెళ్లిలోని కెసిఆర్ నివాసానికి వెళ్లిన కెటిఆర్ జూబ్లీహిల్స్ ఉప ఎన్నికలో ఓటమికి గల కారణాలు అధినేతకు వివరించారు. జూబ్లీహిల్స్ బైపోల్స్‌లో బిఆర్‌ఎ స్ ఓటమి.. తదనంతర పరిణామాలపై కెసిఆర్ ఆరా తీసినట్లు తెలిసింది. భవిష్యత్ కార్యచరణపైనా సమాలోచనలు చేసినట్లు సమాచారం. స్థానిక సంస్థల ఎన్నికల ప్రారంభానికి ముందు జిల్లాల పర్యటనకు సిద్ధం కావాలని కెటిఆర్‌ను కెసిఆర్ ఆదేశించినట్లు తెలిసింది. ఈ నేపథ్యం లో మంగళవారం నాడు తెలంగాణ భవన్ వేదికగా బిఆర్‌ఎస్ పార్టీ ముఖ్యనేతలు, కార్యకర్తల తో కెటిఆర్ భేటీ కానున్నారు. జూబ్లీహిల్స్‌లో ఓ టమి నేపథ్యంలో పార్టీ కేడర్‌తో సమీక్షా సమావేశం నిర్వహించనున్నారు. పరాజయం తర్వా త జూబ్లీహిల్స్ కార్యకర్తలు నిరాశతో ఉన్నట్లు తెలుస్తోంది. దీంతో వారితో ప్రత్యేకంగా సమావేశం నిర్వహించాలని కెటిఆర్ నిర్ణయించినట్లు సమాచారం. అలాగే గ్రామస్థాయి నుంచి కార్యకర్తలను ఉత్తేజపరచడం, ప్రజా సమస్యలు తెలుసుకునేందుకు రాష్ట్రవ్యాప్తంగా అన్ని జిల్లాల్లో కెటిఆర్ పర్యటించనున్నారు. కాంగ్రెస్ ప్రభుత్వ వైఫల్యాలపై మరింతగా పోరాటం చేయాలని, అందుకు అనుగుణంగా కార్యాచరణ సిద్ధం చే స్తున్నట్లు తెలుస్తోంది. రాష్ట్రంలో 2023లో జరిగిన శాసనసభ ఎన్నికల్లో ఓటమి తర్వాత వరుస పరాజయాలతో బిఆర్‌ఎస్ సతమతమవుతోంది.

విజయం ఖాయమనుకున్న జూబ్లీహిల్స్ ఉపఎన్నికలో ఓటమి పాలై, మరో సిట్టింగ్ అసెంబ్లీ స్థానాన్ని బిఆర్‌ఎస్ పార్టీ కోల్పోయింది. ప్రచారంలో ముందంజలో ఉన్నప్పటికీ పోల్ మేనేజ్‌మెంట్‌లో విఫలమై భారీ తేడాతో జూబ్లీహిల్స్‌లో ఓటమి పాలైనట్లుగా పార్టీ వర్గాలు విశ్లేషించుకుంటున్నట్లు తెలిసింది. బిఆర్‌ఎస్ పార్టీ ఎంఎల్‌ఎ మాగంటి గోపీనాథ్ అకాల మరణంతో వచ్చిన ఉప ఎన్నికలో ఆయన సతీమణి మాగంటి సునీతను పార్టీ అభ్యర్థిగా బిఆర్‌ఎస్ బరిలో దింపింది. మాగంటి గోపీనాథ్ సంస్మరణ సభల నుంచే ఉపఎన్నిక ప్రచారానికి బిఆర్‌ఎస్ పార్టీ శ్రీకారం చుట్టింది. బాకీ కార్డుల పేరిట కాంగ్రెస్ పార్టీ అమలు చేయని ఎన్నికల హామీలు, గ్యారంటీలను ప్రజల్లోకి తీసుకెళ్లారు. హైడ్రా, ఆటో డ్రైవర్లు, తదితర అంశాలను విస్తృతంగా ప్రచారం చేశారు. పార్టీ వర్కింగ్ ప్రెసిడెంట్ కెటిఆర్ అన్నీ తానై ఉపఎన్నిక బాధ్యతను భుజానికెత్తుకున్నారు. పార్టీ అగ్రనేత హరీష్ రావు సహా మాజీ మంత్రులు, ఎంఎల్‌ఎ, ఎంఎల్‌సి, పార్టీ యంత్రాంగం అంతా ఉపఎన్నికల్లో పని చేశారు. మిగిలిన పార్టీల కన్నా ముందుగానే బిఆర్‌ఎస్ ఎన్నికల ప్రచారాన్ని ప్రారంభించినప్పటికీ జూబ్లీహిల్స్‌లో బిఆర్‌ఎస్ ఓటమి పాలు కావడంపై పార్టీలో తీవ్ర చర్చ జరుగుతున్నట్లు తెలుస్తోంది.

ప్రచారంలో ముందంజ…పోల్ మేనేజ్‌మెంట్‌లో డీలా

అధికార కాంగ్రెస్ పార్టీ వ్యూహాలను తగినట్లుగా ప్రతి వ్యూహాలు రచించడంలో కొంత వెనుబడినట్లుగా బిఆర్‌ఎస్ శ్రేణులు భావిస్తున్నట్లు తెలిసింది.సైలెంట్ ఓటింగ్‌పై బిఆర్‌ఎస్ భారీగా ఆశలు పెట్టుకొంది. ప్రజల్లో కాంగ్రెస్ ప్రభుత్వంపై తీవ్ర వ్యతిరేకత ఉందని, ప్రజలు ఓట్ల రూపంలో తమ వ్యతిరేకతన చూపుతారని ఆశించారు. అందుకే కాంగ్రెస్ నేతలు ఇచ్చే డబ్బులు తీసుకొని తమకు ఓటు వేయాలని కెటిఆర్ రోడ్ షోలలో బహిరంగంగానే ప్రజలకు విజ్ఞప్తి చేశారు. కానీ బిఆర్‌ఎస్ పార్టీ నమ్ముకొన్న సైలెంట్ ఓటింగ్ అంతగా ప్రభావం చూపినట్లుగా కనిపించలేదు. ముందు జూబ్లీహిల్స్‌లో విజయం ఖాయమన్న ధీమాతో గులాబీ పార్టీ కనిపించింది. సర్వేలు తమకు పూర్తి అనుకూలంగా ఉన్నాయని, విజయం ఖాయమన్న విశ్వాసంతో నేతలు కనిపించారు.ఎన్నికల ప్రచారం ముగిసే వరకు పైచేయిగా ఉన్న బిఆర్‌ఎస్ పార్టీ, ఆ తర్వాత డీలా పడిందన్న వాదనలు బలంగా వినిపిస్తున్నాయి.

నియోజకవర్గంలో బిఆర్‌ఎస్ పార్టీ ద్వితీయ శ్రేణి నాయకులు బలంగా లేకపోవడం, సంస్థాగత నిర్మాణం లేని లోటు స్పష్టంగా కనిపించింది. బిఆర్‌ఎస్ ప్రచార పర్వాన్ని ఇతర ప్రాంతాలకు చెందిన ప్రజాప్రతినిధులు, పార్టీ సీనియర్ నేతలు ముందుండి నడిపించారు. ఎన్నికల ప్రచారం గడువు ముగిసిన తర్వాత వారు వెళ్లిపోవడంతో, ప్రభావవంతంగా పోల్ మేనేజ్‌మెంట్ చేసే వారు లేకపోవడం బిఆర్‌ఎస్ ఓటమికి ప్రధాన కారణంగా పార్టీ వర్గాలు భావిస్తున్నట్లు సమాచారం. ప్రచారం గడువు ముగిసిన తర్వాత అధికార పార్టీ నేతలు ఇంటింటికీ తిరిగి సమర్థవంతంగా పోల్ మేజేజ్‌మెంట్ చేయడం, పోల్ మేనేజ్‌మెంట్‌లో బిఆర్‌ఎస్ పార్టీ కొంత వెనుకబడిపోవడం వల్లనే జూబ్లీహిల్స్‌లో ఓటమి పాలయ్యామని బిఆర్‌ఎస్ శ్రేణులు విశ్లేషించుకున్నట్లు తెలిసింది.

కలిసి రాని సానుభూతి

సిట్టింగ్ ఎంఎల్‌ఎ మరణిస్తే ఉప ఎన్నికలో కుటుంబసభ్యులకు టికెట్ ఇవ్వడం ద్వారా సానుభూతి కలిసి వస్తుందన్న సెంటిమెంట్ బిఆర్‌ఎస్‌కు పెద్దగా కలిసి రానట్లుగా తెలుస్తోంది. నాగార్జునసాగర్‌లో నోముల నర్సింహయ్య కుమారుడు నోముల భగత్ మాత్రమే ఈ తరహాలో గెలుపొందారు. దుబ్బాక, ఇటీవల జరిగిన కంటోన్మెంట్‌తోపాటు తాజాగా జూబ్లీహిల్స్‌లోనూ బిఆర్‌ఎస్‌కు సానుభూతి కలిసి రాలేదు.

మన తెలంగాణ/హైదరాబాద్: తెలంగాణను 2030 నాటికి దేశ ‘ఏరో ఇంజిన్ రాజధాని’గా తీర్చిదిద్దాలన్నదే తమ ప్రభుత్వ సంకల్పమని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీ ధర్ బాబు అన్నారు. ఇందుకోసం ప్రపంచంతో పోటీపడేలా దిగ్గజ పరిశ్రమలు, ప్రముఖ విద్యాసంస్థల భాగస్వామ్యంతో ‘ఏరోస్పేస్, డిఫెన్స్ ఎకోసిస్టమ్’ను రాష్ట్రంలో అభివృద్ధి చేసేందుకు రోడ్డు మ్యాప్‌ను రూపొందిస్తున్నామన్నారు. ‘ఎండ్ టూ ఎండ్ ఎకోసిస్టం’ కోసం గత కాంగ్రె స్ ప్రభుత్వాలు వేసిన పునాదులే ప్రస్తుతం తెలంగాణను దేశ స్ట్రాటెజిక్ డిఫెన్స్ హబ్‌గా మార్చాయని వివరించారు. కాలేజ్ ఆఫ్ డిఫెన్స్ మేనేజ్‌మెంట్, ఐఎస్‌బీ, ముంజాల్ ఇన్సిట్యూట్ ఫర్ గ్లోబల్ మాన్యుఫ్యాక్చరింగ్ సంయుక్తాధ్వర్యంలో శనివారం గచ్చిబౌలి లోని ఇండియన్ స్కూల్ ఆఫ్ బిజినెస్ (ఐఎస్‌బీ)లో నిర్వహించిన ‘ఎంపవరింగ్ 

ఆత్మనిర్భర్ భారత్: ఇండియాస్ ఏరోస్పేస్ అండ్ డిఫెన్స్ మ్యానుఫ్యాక్చరింగ్ సమ్మిట్’కు ఆయన ముఖ్య అతిథిగా హాజరై కీలకోపన్యాసం చేశారు. ఈ సందర్భంగా మంత్రి శ్రీధర్ బాబు మాట్లాడుతూ ప్రపంచవ్యాప్తంగా ఏఅండ్ డీ రంగంలో నమోదవుతున్న వేగవంతమైన వృద్ధిని మనకు అనుకూలంగా మార్చుకునేందుకు రాష్ట్ర ప్రభుత్వం చిత్తశుద్ధితో కృషి చేస్తుందన్నారు. ఈ కార్యక్రమంలో హీరో ఎంటర్ ప్రైజెస్ ఛైర్మన్ సునీల్ కాంత్ ముంజాల్, ఐఎస్ బీ డీన్ ప్రొఫెసర్ పి.మదన్, ప్రొఫెసర్ చందన్ చౌదరి పాల్గొన్నారు.

మన తెలంగాణ/హైదరాబాద్ : విన్‌గ్రూప్ ఆసియా సీఈఓ ఫామ్ సన్ చౌ శనివారం న్యూ ఢిల్లీలో తెలంగాణ ముఖ్యమంత్రి రేవంత్ రెడ్డితో సమావేశమయ్యారు. రాష్ట్రంలో కీలక ప్రా జెక్టులను స్థాపించడంపై ఆయన బలమైన ఆసక్తిని వ్యక్తం చేశారు. ఈ సమావేశంలో తెలంగాణలో ఎలక్ట్రిక్ వెహికల్ (ఈవీ) తయారీ యూనిట్లు, బ్యాటరీ స్టోరేజ్ సౌకర్యాలను ఏర్పా టు చేయాలన్న విన్‌గ్రూప్ తపనను ఫామ్ సన్ చౌ తెలిపారు. సుస్థిర, స్వచ్ఛ ఇంధన విస్తర ణ దిశగా తెలంగాణ చేస్తున్న కృషికి అనుగుణంగా సౌర, పవన ఇంధన ప్రాజెక్టులలో అవకాశాలను అన్వేషించడంపై కూడా ఆయన ఆసక్తి కనబరిచారు. ప్రతిపాదిత ‘భారత్ ఫ్యూ చర్ సిటీ’పై సీఈఓ ప్రత్యేక ఆసక్తి కనబరిచారు.

దాని దార్శనిక సామర్థ్యాన్ని అభినందిస్తూ, దాని అభివృద్ధిలో పెట్టుబడి పెట్టడానికి విన్‌గ్రూప్ సిద్ధంగా ఉందని ఆయన తెలిపారు. డి సెంబర్ 8, -9 తేదీల్లో జరగనున్న ‘తెలంగాణ రైజింగ్ గ్లోబల్ సమ్మిట్ 2025’లో పాల్గొనాలని ఫామ్ సన్ చౌ, విన్‌గ్రూప్ ఛైర్మన్ ఫామ్ నట్ వువోంగ్‌లను ముఖ్యమంత్రి రేవంత్ రెడ్డి సాదరంగా ఆహ్వానించారు. ఈ సమావేశంలో పరిశ్రమలు, వాణిజ్య శాఖ ప్రత్యేక ప్రధాన కార్యదర్శి సంజయ్ కుమార్, ముఖ్యమంత్రి ప్రత్యేక కార్యదర్శి బి. అజిత్ రెడ్డి, సమన్వయ కార్యదర్శి డాక్టర్ గౌరవ్ ఉప్పల్ పాల్గొన్నారు. తెలంగాణ ప్రపంచ పెట్టుబడి భాగస్వామ్యాలను బలోపేతం చేయడానికి, భవిష్యత్, హరిత, ఆవిష్కరణల నేతృత్వంలోని అభివృద్ధిని పెంపొందించడానికి ఈ సమావేశం ఒక ముఖ్యమైన ముందడుగుగా నిలుస్తుంది.

సూరత్: విద్వేషకర శక్తులకు బీహార్ ఎన్నికల్లో ప్రజానీకం ఘాటైన జవాబు ఇచ్చిందని ప్రధాని నరేంద్ర మోడీ చెప్పారు. గుజరాత్‌లోని సూరత్‌లో తనకు బీహారీలు జరిపిన సన్మాన కార్యక్రమంలో శనివారం ఆయన మాట్లాడారు. దేశంలో కులాల విషం చిమ్మిన వారికి, మతాల చిచ్చు రగిల్చిన కాంగ్రెస్‌కు ప్రజలు తమ తిరస్కార ఓటుతో పరాజయం పాలుచేశారని, ఇందుకు తాను బీహారీలను అభినందిస్తున్నానని తెలిపారు. ఈ సందర్భంగా ఆయన కాంగ్రెస్ నేత రాహుల్ గాంధీపై విరుచుకుపడ్డారు. మాజీ ప్రధానులు ఇందిరా గాంధీ, రాహుల్ గాంధీలతో కలిసి పనిచేసిన కాంగ్రెస్ జాతీయ స్థాయి నాయకులు ఇప్పటి ఈ గాంధీలతో విసిగివేసారి, బాధపడుతున్నారని చెప్పారు.

బీహార్‌లో బిజెపి సారధ్యపు ఎన్‌డిఎ ఘనవిజయంపై మోడీ నాయకత్వాన్ని అభినందించేందుకు సూరత్‌కు చెందిన బీహారీలు ప్రధానిని ఆహ్వానించి సన్మానించారు. గడిచిన దశాబ్ధంలో కాంగ్రెస్ పార్టీ అనేక ఎన్నికల పరాజయాలను మూటగట్టుకుంది. ఇప్పటికైనా కొందరు ఈ సంకుచిత, విద్వేషపూరిత కాంగ్రెస్ నేతలకు అంతర్మథనం మొదలవుతుందా? చూడాల్సి ఉందన్నారు. కాంగ్రెస్ పార్టీ ఇప్పుడు ముస్లిం లీగ్ మావోయిస్టు పార్టీగా మారింది. అంతా అరాచకంగా వ్యవహరిస్తోందని విమర్శించారు. దీనిపేరు ఇప్పుడు పొడిపొడిగా చెప్పాలంటే ఎంఎంసి అని వ్యాఖ్యానించారు. 

ఆన్‌లైన్ బెట్టింగ్, గేమింగ్ యాప్‌ల ప్రమోషన్ కేసులో సిఐడి సిట్ దర్యాప్తు ముమ్మరంగా సాగుతోంది. ఈ కేసుకు సంబంధించి ప్రముఖ నటుడు రానా దగ్గుబాటి, యాంకర్ విష్ణుప్రియలు శనివారం సిఐడి సిట్ విచారణకు హాజరయ్యారు. సుమారు గంటన్నర పాటు అధికారులు వారిని విచారించి స్టేట్‌మెంట్లను రికార్డు చేశారు. విష్ణుప్రియ బ్యాంక్ అకౌంట్ వివరాలతోపాటు బ్యాంక్ స్టేట్‌మెంట్ వివరాలను సిట్ అధికారులకు అందజేశారు. బెట్టింగ్ యాప్స్ ప్రమోట్ చేసేందుకు కుదుర్చుకున్న ఒప్పందంపై అధికారులు ఆమెను ప్రశ్నించారు. ప్రమోషన్ ద్వారా వచ్చిన పారితోషికాలపైనా అధికారులు విచారణ చేశారు. కాగా, తాజ్ 777 బుక్ డాట్ కామ్(Taj777 Book.com) సహా మరో రెండు బెట్టింగ్ యాప్స్‌ను విష్ణు ప్రియ ప్రమోట్ చేశారు. సినీ నటుడు దగ్గుబాటి రానా సైతం సిఐడి సిట్ విచారణకు హాజరయ్యారు. రానా తన బ్యాంక్ ఖాతా వివరాలు, స్టెట్‌మెంట్‌లతో విచారణకు వచ్చారు.

బెట్టింగ్ యాప్‌తో చేసుకున్న అగ్రిమెంట్, ఆ యాప్ యాజమాన్యం ద్వారా వచ్చిన పారితోషికంపై రానాను అధికారులు ప్రశ్నించారు. కాగా, రానా 2017లో బెట్టింగ్ అండ్ గేమింగ్ యాప్‌ను ప్రమోట్ చేశారు. స్కిల్ బేస్డ్ గేమ్ యాప్‌ను మాత్రమే తాను ప్రమోట్ చేశానని సిఐడికి రానా వాంగ్మూలం ఇచ్చినట్లు తెలుస్తోంది. విచారణ అనంతరం రానా మీడియాతో మాట్లాడుతూ ఒప్పందం చేసుకునే సమయంలో తన నాయ్యబృందం అన్ని పరిశీలించాకే ఒప్పందం చేసుకున్నట్లు తెలిపారు. చట్టబద్ధమైన యాప్ అని తెలుసుకున్న తర్వాతే ప్రమోట్ చేసినట్లు చెప్పారు. నిబంధనలకు విరుద్ధంగా పని చేస్తున్న ఏ సంస్థతోనూ తాను ఒప్పందం చేసుకోలేదని రానా స్పష్టం చేశారు. తన న్యాయబృందం పూర్తిగా పరిశీలించిందని రానా వెల్లడించారు. దీనికి సంబంధించిన వివరాలన్నీ సిట్ అధికారులకు ఇచ్చానని, విచారణకు పూర్తిగా సహకరించినట్లు రానా పేర్కొన్నారు.

జాతర సమయాల్లో అన్ని శాఖల అధికారులు, సిబ్బంది సమన్వయంతో పని చేయాలి

ప్రమాదాలు జరగకుండా విద్యుత్ లైన్లను ముందస్తుగా సరి చేసుకోవాలి

కలెక్టర్ హైమావతి ఆదేశం

మన తెలంగాణ/సిద్దిపేట అర్బన్: కొమురవెళ్లి మల్లికార్జునస్వామి బ్ర హ్మోత్సవాలను వైభవంగా నిర్వహించాలని జిల్లా కలెక్టర్ హైమావతి ఆలయ అధికారులకు సూచించారు. కొమురవెల్లి శ్రీమల్లికార్జున స్వామి వారి కళ్యాణం జాతర బ్రహ్మోత్సవాల ఏర్పాట్లపై శనివారం కలెక్టరేట్లో సమన్వయ సమావేశం నిర్వహించారు. ఈ సందర్భంగా జిల్లా కలెక్టర్ మాట్లాడుతూ శ్రీ మల్లికార్జునస్వామి దేవస్థానం కొమురవెల్లి నందు తేదీ 14 డిసెంబర్ 2025 ఆదివారం రోజున ఉదయం 10:45 నిమిషాల కు స్వామి వారి కళ్యాణం నిర్వహించబడి 18 జనవరి 2026 నుండి 16 మార్చి 2026 వరకు ప్రతి ఆదివారం, బుధవారంలలో జాతర అ త్యంత వైభవంగా నిర్వహించడం జరుగుతుందని అన్నారు. ఈ జాతరకు జిల్లా నుండే కాకుండా హైదరాబాద్, సికింద్రాబాద్, రాష్ట్రవ్యాప్తంగా ఇతర ప్రాంతాల నుండి అధిక సంఖ్యలో భక్తులు వస్తారు కాబట్టి వారికి ఎలాంటి ఇబ్బంది కలగకుండా సంబంధిత శాఖలకు సమన్వయంతో ముందస్తు ఏర్పాటు చేయాలని, జాతర జరిగినన్ని రోజులు శాఖలకు కేటాయించిన విధులను సక్రమంగా నిర్వహించాలని అన్నారు.

ఈ సారి మేడారం జాతర కూడా ఉన్నందున అక్కడికి వెళ్లే భక్తులు, అక్కడి నుండి దర్శనం చేసుకొని వచ్చే భక్తులు మల్లన్న దర్శనానికి వచ్చే అవకాశం ఉన్నందున భక్తుల సంఖ్య పెరిగే అవకాశం ఉన్నదని ఎలాంటి అంచనీయ సంఘటనలు జరగకుండా సీసీ కెమెరాలు ఏర్పాటుచేసి మా నిటరింగ్ చేయాలని, పార్కింగ్, బ్యారికెడింగ్ చేసి భక్తుల రద్దీని కంట్రోల్ చేయాలని, పోలీస్ కంట్రోల్ రూమ్ లో మైకుల ద్వారా అవసరమైన విషయాలను అనౌన్స్ చేయాలని, లడ్డు కౌంటర్ లను మరింత పెంచి భక్తులు ఒకే చోట గుమి కాకుండా చూడాలని, భక్తుల క్యూ లైన్ ను సరిగా మైంటైన్ చేయాలని, దర్శనానికి వచ్చే భక్తులకు అన్నదానం సమయంలో రద్దీ కలుగకుండా వివిధ ప్రాంతాలలో అన్నదానం చేయాలని, విధులు నిర్వహించే సిబ్బందికి భోజన వసతి ఎక్కడికక్కడే ఏర్పా టు చేయాలన్నారు.

శాశ్వత మరుగుదొడ్ల నిర్మాణం, సిసి రోడ్ల నిర్మాణానికి ప్రతిపాదనలు సిద్ధం చేయాలని, పంచాయతీరాజ్ ద్వారా నిర్మాణంలో ఉన్న వివిధ నిర్మాణాలను ఈ నెలాఖరులోగా పూర్తి చేయాలని, విద్యుత్ సమస్యలు ఎదురుకాకుండా ప్రమాదాలు జరగకుండా విద్యుత్ లైన్లను ముందస్తుగా సరి చేసుకోవాలని, అదనంగా అవసరమైన ట్రా న్స్ఫార్మర్లను సమకూర్చాలని అన్నారు. భక్తులకు అత్యవసర వైద్య సేవలతో పాటు సాధారణ వైద్య సేవలు అందించుటకు మెడికల్ క్యాంప్ ల ను ఏర్పాటుచేసి వైద్య సిబ్బందిని 3 షిఫ్ట్ లలో 24 గంటలు అందుబాటులో ఉంచాలని, అవసరమైన మందులను, అంబులెన్స్ ను అందుబాటులో ఉంచుకోవాలని అన్నారు.

జాతర జరిగే అన్ని రోజులు పారిశు ద్ధ్యం అతి ముఖ్యమైనదని అవసరమైన సంఖ్యలో సానిటేషన్ సిబ్బందిని నియమించుకొని మూడు షిఫ్టులలో శానిటేషన్ కార్యక్రమాలు పగడ్బందీగా నిర్వహించాలని, త్రాగునీరు సమస్య రాకుండా అవసరమైన ఏ ర్పాట్లు చేయాలని, మద్యం అమ్మకాలు జరుగకుండా చూడాలని, ట్రా ఫిక్ సమస్య కాకుండా ఆర్టీసీ బస్సులను రూట్ల వారీగా నడపాలని, నిర్దేశిత ప్రాంతాల్లో మాత్రమే పార్కింగ్ చేయాలని, అగ్నిమాపక యం త్రా లు సిద్ధంగా ఉండాలని అన్నారు. ఈ కార్యక్రమంలో జిల్లా అదనపు క లెక్టర్ అబ్దుల్ హమీద్, అడిషనల్ డీసీపీ కుశాల్కర్, హుస్నాబాద్ ఏసీబీ సదానందం, ఆలయ ఈవో వెంకటేశ్వర్, కొమురవెల్లి సిఐ, ఎక్సైజ్ సూ పరింటెండెంట్ శ్రీనివాసమూర్తి, డిఎం అండ్ హెచ్‌ఓ డాక్టర్ ధన్ రాజ్, డిపిఓ విజయ్ కుమార్, విద్యుత్, ఆర్డబ్ల్యూఎస్, టీజీఎస్‌ఆర్టిసి, ఆర్ అండ్ బి, అగ్నిమాపక, పంచాయతీరాజ్ ఇంజనీరింగ్ శాఖల అధికారులు తదితరులు పాల్గొన్నారు. 

మన తెలంగాణ/హైదరాబాద్:తాము బిఆర్‌ఎస్‌లోనే కొనసాగుతున్నామని, ‘కారు’ ది గలేదని బిఆర్‌ఎస్ ఎంఎల్‌ఏలు తెల్లం వెంకట్రావ్, సంజయ్‌లు ‘క్రాస్ ఎగ్జామినేషన్’ సందర్భంగా తేల్చి చెప్పారు. బిఆర్‌ఎస్ నుంచి కాంగ్రెస్ పార్టీలోకి ఫిరాయించారని ఆరోపణలు ఎదుర్కొంటున్న ఎంఎల్‌ఏల అ నర్హత పిటిషన్లపై విచారణ జరుపుతున్న అ సెంబ్లీ స్పీకర్ గడ్డం ప్రసాద్ కుమార్ శనివారం ఇద్దరు ఎంఎల్‌ఏలు తెల్లం వెంకట్రావు, సంజయ్‌లపై దాఖలైన పిటిషన్లపై వాదన లు విన్నారు.పార్టీ ఫిరాయింపుల నిరోధక చట్టం కింద తెల్లం వెంకట్రావ్ శాసనసభ్యత్వాన్ని రద్దు చేయాల్సిందిగా బిఆర్‌ఎస్ ఎంఎల్‌ఏ కెపి వివేకానంద పిటిషన్ దాఖ లు చేశారు. ఎంఎల్‌ఏ సంజయ్‌పై అనర్హత వేటు వేయాల్సిందిగా బిఆర్‌ఎస్ ఎంఎల్‌ఏ జగదీశ్వర్ రెడ్డి దాఖలు చేసిన పిటిషన్లపై శనివారం స్పీకర్ ప్రసాద్ కుమార్ వాదన లు విన్నారు. పిటిషనర్ల తరపున న్యాయవాదులు ఎంఎల్‌ఏలు తెల్లం వెంకట్రావు ను, సంజయ్‌ను క్రాస్ ఎగ్జామ్ చేశారు.

ఇదిలాఉండగా శుక్రవారం ఎంఎల్‌ఏలు అరికెపూ డి గాంధీ, పోచారం శ్రీనివాస్ రెడ్డిల అనర్హత పిటిషన్లపైనా స్పీకర్ ప్రసాద్ కు మార్ విచారణ ఎదుట విచారణ జరిగింది. ఆరోపణలు ఎదుర్కొంటున్న ఎంఎల్‌ఏలు కాలే యాదయ్య, ప్రకాష్ గౌడ్, గూడెం మహిపాల్ రెడ్డి, బండ్ల కృష్ణమోహన్ రెడ్డిల విచారణ గత నెలలో ముగిసింది. ఫిరాయింపు ఎంఎల్‌ఏలు మొత్తం పది మందికి స్పీకర్ కార్యాలయం నోటీసులు పంపించగా, ఎంఎల్‌ఏలు కడియం శ్రీహరి, దానం నాగేందర్ కౌంటర్ దాఖలు చేయలేదు.ఇదిలాఉండగా ఎంఎల్‌ఏల అనర్హత పిటిషన్లపై మూడు నెలల్లోగా విచారణ పూర్తి చేయాల్సిందిగా సుప్రీం కోర్టు ఇదివరకే స్పీకర్‌కు సూచించిన సంగతి తెలిసిందే. ఆ గడువు అక్టోబర్ నెలాఖరుతో ముగిసింది. అయితే తాను స్పీకర్ల సదస్సుకు హాజరు కావడం వల్ల, అసెంబ్లీ సమావేశాల నేపథ్యంలో సకాలంలో విచారణ పూర్తి చేసేందుకు సమయం సరిపోలేదు కాబట్టి మరో రెండు నెలల గడువు ఇవ్వాలని కోరుతూ స్పీకర్ ప్రసాద్ కుమార్ సుప్రీంలో పిటిషన్ దాఖలు చేసిన సంగతి తెలిసిందే.