admin

ఓ వ్యక్తి నడవలేని స్థితిలో ఉండి కూడా అంబులెన్స్‌లో వచ్చి ఓటు హక్కును వినియోగించుకున్నారు. ఈ ఘటన నిజామాబాద్ జిల్లా సాలూర మండలం జాడి జామాల్‌పూర్ పోలింగ్ కేంద్రంలో జరిగింది. గ్రామానికి చెందిన ఆరోగ్య రాజు నెల రోజుల క్రితం ప్రమాదానికి గురయ్యారు. నడవలేని స్థితిలో ఉన్న ఆయనను కుటుంబ సభ్యులు ఇంటి నుంచి పోలింగ్ కేంద్రానికి అంబులెన్స్‌లో తీసుకెళ్లగా, పోలింగ్ అధికారులు అంబులెన్స్ వద్దకే వచ్చి ఆయనతో వాహనంలోనే ఓటు వేయించి పంపించారు. గ్రామ పంచాయతీ ఎన్నికలు ఎంత రసవత్తరంగా సాగుతున్నాయని చెప్పడానికి ఇదో నిదర్శనం.

ఓ యువతి గువాహటి నుంచి వచ్చి తన ఓటు హక్కును వినియోగించుకుంది. మొదటిసారి ఆమె ఓటేసింది. ఈ ఘటన సంగారెడ్డి జిల్లాలో జరిగింది. సంగారెడ్డి జిల్లా కందిలో అశ్విత ఐఐటీ గువాహటిలో మూడో సంవత్సరం చదువుతుంది. మొదటి విడత పంచాయతీ ఎన్నికల నేపథ్యంలో కంది పోలింగ్ కేంద్రంలో ఆమె ఓటు హక్కును వినియోగించుకున్నారు.

తల్లిని గెలిపించేందుకు ఓ కుమారుడు ఆస్ట్రేలియా నుంచి వచ్చి మరీ ఓటేశాడు. కరీంనగర్ జిల్లా కోరుట్ల మండలం సంగెం గ్రామంలో చీటి స్వరూప బీఆర్‌ఎస్ బలపరిచిన సర్పంచి అభ్యర్థిగా పోటీ చేశారు. ఆమె కుమారుడు ఆస్ట్రేలియాలో సాఫ్ట్‌వేర్ ఉద్యోగం చేస్తున్నాడు. తల్లిని సర్పంచిగా గెలిపించేందుకు ఈనెల 4న ఆస్ట్రేలియా నుంచి వచ్చి ప్రచారం చేపట్టి గురువారం ఓటు వేశారు.

మన తెలంగాణ/వికారాబాద్ జిల్లా బ్యూరో: సర్పంచ్‌గా పోటీచేసి ఓడిపోయిన ఓ మహిళా ఆత్మహత్యాయత్నానికి పాల్పడిన సంఘటన వికారాబాద్ జిల్లా కొడంగల్ మండలం ఖాజాహైమద్‌పల్లిలో చోటుచేసుకుంది. ఖాజాహైమద్‌పల్లి గ్రామ సర్పంచ్‌గా కాంగ్రెస్ పార్టీ నుంచి ఇద్దరు మహిళలు పోటీపడ్డారు. వారిలో లక్ష్మి అనే మహిళ సర్పంచ్ అభ్యర్థిగా పోటీచేసి సమీప ప్రత్యర్థి చేతిలో గురువారం వెలువడిన ఫలితాల్లో ఓడిపోయింది.

ఈ ఓటమిని తట్టుకోలేక తీవ్ర మనస్థాపం చెందిన లక్ష్మి పురుగుల మందు తాగిన ఆత్మహత్యాయత్నానికి పాల్పడింది. విషయం తెలుసుకున్న కుటుంబ సభ్యులు, స్థానికి హుటాహుటినా కొడంగల్ ఆసుపత్రికి తరలించారు. ఆమె ఆసుపత్రిలో చికిత్స పొందుతున్నారు. ఈ ఘటనతో గ్రామంలో టెన్షన్ వాతావరణం నెలకొంది.

మాజీ మంత్రి గుంటకండ్ల జగదీశ్ రెడ్డి తండ్రి గంటకండ్ల రామచంద్రారెడ్డి సర్పంచ్‌గా గెలుపొందారు. 95 ఏళ్ల వయసులో ఎన్నికల్లో పోటీ చేసిన ఆయన మండల కేంద్రమైన నాగారం సర్పంచ్‌గా ఎన్నికయ్యారు. తద్వారా రాష్ట్ర చరిత్రలో అత్యధిక వయస్కుడైన సర్పించ్‌గా రామచంద్రారెడ్డి రికార్డు నెలకొల్పారు.

జగిత్యాల జిల్లా కోరుట్ల మండలం తిమ్మయ్యపల్లె గ్రామ పంచాయతీ ఎన్నికల్లో తల్లి, కుమార్తె మధ్య పోటీ నెలకొంది. రిజర్వేషన్‌లో బీసీ మహిళకు కేటాయించడంతో శివరాత్రి గంగవ్వను బీఆర్‌ఎస్ బలపరచగా ఆమె కుమార్తె సుమలతను కాంగ్రెస్ బలపరిచింది. పోలింగ్ అనంతరం ఓట్ల లెక్కింపులో తల్లి గంగవ్వపై కుమార్తె సుమలత 91 ఓట్ల మెజారిటీతో గెలుపొందారు. తల్లి గంగవ్వపై 91 ఓట్ల తేడాతో కుమార్తె పల్లెపు సుమ గెలిచినట్లు అధికారులు ప్రకటించారు.

జయశంకర్ భూపాలపల్లి జిల్లా గోరి మండలంలోని కొత్తపల్లి గ్రామంలో సర్పంచ్, వార్డు సభ్యుల ఎన్నికల పోలింగ్‌ను విశేషంగా టెంట్ కింద నిర్వహించారు. ఇప్పుడిది సోషల్ మీడియాలో చక్కర్లు కొడుతోంది. స్థానిక పాఠశాల గదులు సరిపోయినన్ని లేకపోవడంతో టెంట్ కింద ఎన్నికల నిర్వహణ జరిగింది. గ్రామంలోని ఓటర్లకు ఎటువంటి ఇబ్బందులు కలగకుండా స్థానిక ఎన్నికల అధికారులు తాత్కాలిక టెంట్లు ఏర్పాటు చేసి పోలింగ్ బూతులను సిద్ధం చేశారు. ఒకే ప్రైమరీ పాఠశాలలో రెండు బూతులు, మిగతా 4 బూత్‌లను టెంట్ కింద ఏర్పాటు చేశారు.

రాష్ట్రవ్యాప్తంగా మొదటి విడత పంచాయతీ ఎన్నికల పోలింగ్ ప్రశాంతంగా ముగిసింది. అక్కడక్కడ చెదురుమదురు ఘటనలు మినహా పోలింగ్ ప్రశాంతంగా సాగింది. ఓటర్లు తమ అమూల్యమైన ఓటు హక్కును వినియోగించుకునేందుకు పోలింగ్ కేంద్రాల బాట పట్టారు. అయితే ఎన్నికల సంఘం నియమావళి ప్రకారం మధ్యాహ్నం 1 గంట వరకే ఓటేసేందుకు ఓటర్లకు అనుమతి ఉంటుంది. ఆ తర్వాత ఓ ఓటరు వచ్చిన ఓటేసేందుకు సిబ్బంది అనుమతించరు. అప్పటివరకూ పోలింగ్ కేంద్రం వద్ద క్యూ లైన్‌లో ఉన్నవారికి ఓటుహక్కును వినియోగించుకునేందుకు అవకాశం కల్పిస్తారు. సిద్దిపేట జిల్లా రాయపోల్ పోలింగ్ కేంద్రంలో ఐదుగురు ఓటర్లకు చేదు అనుభవం ఎదురైంది.

నిర్ణీత సమయం దాటడంతో ఎన్నికల సిబ్బంది వారిని లోపలికి అనుంతించలేదు. దీంతో పోలింగ్ కేంద్రం వద్ద స్వల్ప ఉద్రిక్తత పరిస్థితి నెలకొంది. దీంతో వారు అక్కడి నుంచి వెనుదిరగడ తప్పలేదు. మధ్యాహ్నం ఒంటిగంట దాటిన తర్వాత ఓటు వేసేందుకు వచ్చిన ఐదుగురు స్థానిక ఓటర్లను పోలింగ్ కేంద్ర సిబ్బంది అడ్డుకున్నారు. నిబంధనల ప్రకారం పోలింగ్ సమయం ముగిసిందని, ఇక అనుమతించలేమని వారు స్పష్టం చేశారు. ఈ విషయమై ఓటర్లు, ఎన్నికల సిబ్బంది మధ్య వాగ్వాదం చోటుచేసుకుంది. ఓటు వేయకుండా వెనుతిరగాల్సి రావడంతో ఆ ఐదుగురు ఓటర్లు తీవ్ర అసంతృప్తి వ్యక్తం చేశారు. ప్రజాస్వామ్య ప్రక్రియలో తమ హక్కును అడ్డుకోవడంపై వారు ఆగ్రహం వ్యక్తం చేయగా సిబ్బంది మాత్రం ఉన్నతాధికారుల ఆదేశాల మేరకే సమయం పాటించామని బదులిచ్చారు.

మన తెలంగాణ /వేములవాడ రూరల్: రాష్ట్రంలో గురువారం జరిగిన స్థానిక సంస్థల ఎన్నికల్లో భాగంగా నిర్వహించిన పోలింగ్‌లో అనూహ్య పరిణామం చోటుచేసుకుంది. వేములవాడ అర్బన్ మండలం చింతల్ ఠాణా ఆర్ అండ్ ఆర్ కాలనీలో మరణించిన సర్పంచ్ అభ్యర్థి విజేతగా నిలిచాడు. వివరాల్లోకి వెళితే.. గ్రామానికి చెందిన చెర్ల మురళి (50) అనే అభ్యర్థి బిఆర్‌ఎస్ పార్టీ తరఫున సర్పంచ్ అభ్యర్థిగా పోటీ చేసి గత గురువారం రోజున హార్ట్ ఎటాక్‌తో మరణించాడు.

మరణించాక సర్పంచ్‌గా గెలిచిన చెర్ల మురళి

అయితే గురువారం జరిగిన ఎన్నికల్లో ఆయనే సుమారు 700 పైచిలుకు ఓట్లు సాధించి తన సమీప అభ్యర్థిపై 378 ఓట్ల భారీ మెజారిటీతో గెలుపొందినట్లు ఎన్నికల అధికారులు ప్రకటించారు. దీంతో గెలిచిన అభ్యర్థి లేనందున ప్రస్తుతానికి గ్రామానికి సంబంధించిన సర్పంచ్ ఎన్నికల ప్రక్రియను తాత్కాలికంగా నిలిపివేశారు. తదుపరి చేపట్టాల్సిన చర్యలపై అధికారులు చర్చిస్తున్నారు. ఏం జరుగుతుందోనని గ్రామస్తులంతా ఉత్కంఠకు ఎదురుచూస్తున్నారు.

ప్రజాస్వామ్యాన్ని నిలబెట్టడానికి కల్పించిన ఓటు హక్కును ఎలాగైనా ఉపయోగించుకోవాలని 93 ఏళ్ల వృద్ధుడు పోలింగ్ కేంద్రానికి వచ్చి ఓటేశారు. ఈ ఘటన ఇల్లంద పోలింగ్ కేంద్రంలో చోటుచేసుకుంది. వరంగల్ జిల్లా వర్ధన్నపేట మండలం ఇల్లంద గ్రామ పంచాయతీకి చెందిన మిట్టపల్లి తిరుపతిరెడ్డి అనే వృద్ధుడు గత కొంతకాలంగా అనారోగ్య బారినపడి లేవలేని స్థితిలో ఉన్నాడు. ఈసారి కూడా తనకు కల్పించిన ఓటు హక్కును ఎలాగైనా ఉపయోగించుకోవాలని పోలింగ్ కేంద్రానికి వచ్చారు. తన కుమారుల సహాయంతో కనీసం నడవలేని స్థితిలో కూడా ప్రత్యేక గొట్టాల ద్వారా ఆహారం తీసుకునే స్థితిలో స్టేచర్ నుంచి పోలింగ్ కేంద్రానికి వచ్చి తన ఓటు హక్కును వినియోగించుకుని ఆనందపడ్డాడు.