admin

రాష్ట్ర ముఖ్యమంత్రి ఎ. రేవంత్ రెడ్డి మెస్సీతో ఫుట్ బాల్ ఆడేందుకు వంద కోట్ల రూపాయల ప్రజాధనాన్ని దుర్వినియోగం చేస్తున్నారని సింగరేణి కార్యాలయం ముట్టడించేందుకు బిజెపి నాయకులు, కార్యకర్తలు చేసిన ప్రయత్నాలను పోలీసులు అడ్డుకుని అరెస్టు చేశారు. బిజెపి శాసనసభాపక్షం నాయకుడు ఏలేటి మహేశ్శర్ రెడ్డి నాయకత్వంలో పార్టీ నాయకులు, కార్యకర్తలు పెద్ద ఎత్తున లక్‌డీకాపూల్ లోని సింగరేణి భవనం వద్దకు చేరుకున్నారు. అయితే సింగరేణి భవనం చుట్టూ పోలీసులు వలయాకారంగా నిలబడి వారిని ముందుకు రానీయకుండా అడ్డుకున్నారు. ఈ సమయంలో పోలీసులుకు కార్యకర్తలకు మధ్య తోపులాట జరిగింది. చివరకు ఏలేటి మహేశ్వర్ రెడ్డిని పోలీసులు చుట్టుముట్టి అరెస్టు చేసి పోలీసు వాహనం ఎక్కించారు. ఈ సమయంలో ఏలేటిని అరెస్టు చేయకుండా కార్యకర్తలు ప్రయత్నించగా, పోలీసులు వారిని అరెస్టు చేసి వాహనం ఎక్కించి బేగంబజార్ పోలీసు స్టేషన్‌కు తరలించారు.

ఎవడబ్బ సొమ్ము: ఏలేటి మండిపాటు

ఇదిలాఉండగా ఏలేటి మహేశ్వర్ రెడ్డి మీడియాతో మాట్లాడుతూ ఎవడబ్బ సొమ్మని ముఖ్యమంత్రి రేవంత్ రెడ్డి తన ఫుట్ బాల్ సరదా కోసం వంద కోట్ల రూపాయల ప్రజాధనాన్ని దుర్వినియోగం చేస్తున్నారని ప్రశ్నించారు. ప్రజాధనంతో ఫుట్ బాల్ ఆడుకుంటున్న ముఖ్యమంఅతి రేవంత్ రెడ్డి ఇచ్చిన హామీలు అమలు చేయకుంటే ప్రజలు ఆయనను ఫుట్ బాల్ ఆడుకుంటారని ఆయన ధ్వజమెత్తారు. సిఎం రేవంత్ రెడ్డి టీంను సింగరేణి స్పాన్సర్ చేస్తున్నదని తెలిసి సింగరేణి భవన్ ముందు ధర్నా చేసేందుకు వచ్చామని ఆయన ఒక ప్రశ్నకు సమాధానంగా అన్నారు. సిఎం ఫుట్ బాల్ సరదా కోసం వంద కోట్ల రూపాయలు ఖర్చు చేయడం ప్రజాధనం దుర్వినియోగం కాదా?

అని ఏలేటి ఎదురు ప్రశ్నించారు. ఉప్పల్ క్రికెట్ స్టేడియంలో మెస్సీతో ఫుట్‌బాల్ మ్యాచ్ ఆడడానికి ప్రభుత్వం ఎన్ని కోట్లు ఖర్చు చేసేందుకు సిద్ధమైందో, ఇంకా ఏయే శాఖల నుంచి ఎంత విడుదల చేసిందో ప్రభుత్వం వివరణ ఇవ్వాలని ఆయన డిమాండ్ చేశారు. ఇవే డబ్బులను సింగరేణిలో ఉన్న క్రీడాకారులను ప్రోత్సహించేందుకు వినియోగిస్తే బాగుంటుందని ఆయన సూచించారు. గతంలో బిఆర్‌ఎస్ ఈ-కార్ రేసింగ్ నిర్వహించి ప్రజాధనం దుర్వినియోగం చేసినట్లు కాంస్ ప్రభుత్వుం ఇప్పుడు గ్లోబల్ సమ్మిట్ పేరిట ప్రజాధనాన్ని దుర్వినియోగం చేస్తున్నదని ఏలేటి మహేశ్వర్ రెడ్డి విమర్శించారు.

రాయ్‌పూర్: మావోయిస్టుల లొంగుబాటు కొనసాగుతోంది. తాజాగా మరో 10 మంది నక్సలైట్లు పోలీసుల ముందు లొంగిపోయారు. శుక్రవారం ఛత్తీస్‌గఢ్‌లోని సుక్మా జిల్లాలో ఆరుగురు మహిళలు సహా కనీసం 10 మంది నక్సలైట్లు లొంగిపోయారని పోలీసులు తెలిపారు. లొంగిపోయిన వారి తలపై రూ. 33 లక్షల రివార్డు ఉన్నట్లు పోలీసులు తెలిపారు. ఈ సంవత్సరం జిల్లాలో మొత్తం 263 మంది మావోయిస్టులు హింసను విరమించుకుని లొంగిపోయారని పోలీసు సూపరింటెండెంట్ కిరణ్ చవాన్ చెప్పారు. కాగా, లొంగిపోయిన వారిలో మావోయిస్టుల కంపెనీ ప్లాటూన్ కమాండర్ మిదియం భీమా(30) రూ. 8 లక్షల రివార్డును ప్రకటించారు. గంగా కుంజం (22), లేకం రామ, తాటి సోని (32), శాంతి సోధి (21) ఒక్కొక్కరికి రూ. 5 లక్షల రివార్డును ప్రకటించారు, మద్వి నవీన్ (20), మద్వి రుక్ని (24), ఓయం మంగ్లీ (22), పోడియం మంగి (20), మద్వి గంగి (19) ఒక్కొక్కరికి రూ.1 లక్ష రివార్డును ప్రకటించారు.

ముఖ్యమంత్రి రేవంత్ రెడ్డితో ఉత్తరప్రదేశ్ మాజీ సిఎం అఖిలేష్ యాదవ్ భేటీ అయ్యారు. జూబ్లీహిల్స్ నివాసంలో శుక్రవారం ఆయన సిఎం రేవంత్‌రెడ్డిని మర్యాదపూర్వకంగా కలిశారు. ఇరువురు తాజా రాజకీయ పరిస్థితుల గురించి చర్చించారు. రాష్ట్రంలో ప్రభుత్వం అమలు చేస్తున్న అభివృద్ధి, సంక్షేమ కార్యక్రమాల గురించి అఖిలేష్‌కు సిఎం రేవంత్ రెడ్డి వివరించారు. ఈ సమావేశంలో రాజ్యసభ సభ్యుడు అనిల్ కుమార్ యాదవ్, మాజీ ఎంపి అంజన్‌కుమార్ యాదవ్, రామగుండం ఎమ్మెల్యే రాజ్ ఠాకూర్, కాంగ్రెస్ సీనియర్ నేత రోహిన్ రెడ్డి పాల్గొన్నారు. అంతకుముందు ఎమ్మెల్యే క్వార్టర్స్‌లో నిర్వహించిన సదర్ సమ్మేళనంలోనూ మాజీ సిఎం అఖిలేష్ యాదవ్ పాల్గొన్నారు.

న్యూఢిల్లీ ః దేశ రాజధాని ఢిల్లీ ఇతర ప్రధాన నగరాలు కాలుష్య వాయువుల కాసారంతో కొట్టుమిట్టాడుతున్నాయని లోక్‌సభలో ప్రతిపక్ష నేత రాహుల్ గాంధీ ఆందోళర వ్యక్తం చేశారు. శుక్రవారం ఆయన కాలుష్య అంశాన్ని ప్రస్తావించారు. ఇది మనిషి మనుగడకు సంబంధించిన విషమ పరిస్థితి. దీనిపై వెంటనే లోక్‌సభలో చర్చ జరగాలని పట్టుపట్టారు. జీరో అవర్‌లో ఆయన ఈ విషయాన్ని లేవనెత్తారు. ఢిల్లీనే కాదు పలు పట్టణాలలో దట్టమైన కాలుష్య పొగమంచు తెరలు కమ్ముకుని ఉన్నాయి. ప్రజలకు శ్వాస తీసుకోవడం కష్టం అవుతోందని ఆయన తెలిపారు. ఈ విషయం సిద్ధాంతపరమైనది లేదా రాజకీయభరితం అయినది కాదని తెలిపారు. దీనిపై పరస్పర దూషణలకు తావులేకుండా చర్చకు వీలు కల్పించాలని కోరారు.

ప్రతిపక్షాలు, అధికార పక్షం దీనిపై చర్చించి సవ్యమైన పరిష్కారానికి వీలు అయ్యే విధంగా వ్యవహరించాలని సూచించారు. ఈ విషయంపై పార్లమెంట్‌లో సమగ్ర వివరణాత్మక చర్చ జరిగితేనే సవ్యమైన పరిష్కారానికి వీలేర్పడుతుందని స్పష్టం చేశారు. ప్రజల జీవనం చిక్కులు లేకుండా చేసేందుకు రంగంలోకి దిగాల్సి ఉంది. ప్రధాని మోడీ స్పందించాలి. ప్రతి నగరానికి విడిగా పద్థతి ప్రకారం , కాలుష్య నివారణ కార్యాచరణ అమలు చేయాల్సి ఉందన్నారు. వచ్చే 5 నుంచి 10 సంవత్సరాల పాటు సాగే చర్యలతోనే వాయు కాలుష్య సమస్యకు పరిష్కారం దక్కుతుందని అన్నారు. పార్లమెంటరీ వ్యవహారాల మంత్రి కిరెణ్ రిజిజూ దీనపై స్పందించారు. కాలుష్య సమస్యపై చర్చకు ప్రభుత్వం సిద్ధం అని, లోక్‌సభ నిర్వహణ వ్యవహారాల కమిటీ (బిఎసి) దీనిపై సమయం ఖరారు చేస్తుందని వెల్లడించారు.

న్యూఢిల్లీ : శుక్రవారం రాజ్యసభలో విచిత్ర పరిస్థితి ఏర్పడింది. సభలో కేబినెట్ మంత్రులు ఎవరూ లేకపోవడంతో పది నిమిషాల పాటు రాజ్యసభ కార్యకలాపాఉ నిలిపివేయాల్సి వచ్చింది. 2001 డిసెంబర్ 13న పార్లమెంట్‌పై ఉగ్రవాదుల దాడిని విఫలం చేస్తూ వీరోచితంగా పోరాడి ప్రాణాలు వదిలిన భద్రతా సిబ్బందికి సభ ముందుగా నివాళులు అర్పించింది. తరువాత ప్రతిపక్ష ఎంపిలు కొందరు లేచి సభలో కేబినెట్ మంత్రులు ఎవరూ లేరని సభాధ్యక్షులకు తెలిపారు. దీనితో స్పందించిన ఛైర్మన్ సిపి రాధాకృష్ణన్ సభను పది నిమిషాల పాటు నిలిపివేశారు. జూనియర్ మంత్రులు వెంటనే స్పందించి సీనియర్లు సభకు వచ్చేలా చూడాలని కోరారు. ఐదు నిమిషాలు గడిచినా ఫలితం లేకుండా పోవడంతో సభను పది నిమిషాలు వాయిదా వేశారు. 

రాష్ట్రంలో ఇకపై ఏ సినిమా టికెట్ ధరలు పెంచే ప్రసక్తే లేదని రోడ్లు, భవనాలు, సినిమాటోగ్రఫీ శాఖ మంత్రి కోమటిరెడ్డి వెంకట్‌రెడ్డి పేర్కొన్నారు. ‘అఖండ-2’ సినిమా టికెట్ల పెంపు వివాదం నేపథ్యంలో ఆయన చేసిన ఈ వ్యాఖ్యలు ప్రాధాన్యత సంతరించుకున్నాయి. భవిష్యత్‌లో టికెట్ రేట్లు పెంచాలని కోరుతూ నిర్మాతలు, దర్శకులు ఎవరూ తన వద్దకు రావొద్దని ఆయన విజ్ఞప్తి చేశారు. శుక్రవారం ఆయన విలేకరులతో మాట్లాడుతూ తమది పేదల కోసం పనిచేసే ఇందిరమ్మ ప్రభుత్వమని, సామాన్యుడికి అందుబాటులో ఉండేలా నిర్ణయాలు తీసుకుంటామని మంత్రి స్పష్టం చేశారు. ‘హీరోలకు వందల కోట్ల రూపాయల రెమ్యునరేషన్లు ఇచ్చి, ఆ భారాన్ని పేదలపై మోపడం సరికాదన్నారు. టికెట్ ధరలు పెంచాలని ప్రభుత్వంపై ఒత్తిడి తేవడాన్ని అంగీకరించమని కోమటిరెడ్డి పేర్కొన్నారు.

సామాన్య కుటుంబం థియేటర్‌కు వెళ్లి సినిమా చూడాలంటే ధరలు అందుబాటులో ఉండాలని ఆయన అభిప్రాయపడ్డారు. ఈసారి ‘అఖండ-2’ విషయంలో పొరపాటు జరిగిందని, భవిష్యత్‌లో ఇది పునరావృతం కాదని ఆయన వ్యాఖ్యానించారు. అంతకుముందు, నందమూరి బాలకృష్ణ నటిస్తున్న ‘అఖండ-2’ సినిమా టికెట్ రేట్ల పెంపు, ప్రత్యేక షోలకు అనుమతిస్తూ ప్రభుత్వం జారీ చేసిన ఉత్తర్వులను హైకోర్టు సింగిల్ బెంచ్ రద్దు చేసింది. అయితే, ఈ తీర్పును సవాలు చేయగా, డివిజనల్ బెంచ్ నేడు సింగిల్ బెంచ్ ఉత్తర్వులను కొట్టివేసింది. దీంతో ‘అఖండ-2’ సినిమాకు పెంచిన టికెట్ ధరలు రాష్ట్రవ్యాప్తంగా యధావిధిగా అమల్లో ఉండనున్నాయి. ఈ పరిణామాల నేపథ్యంలోనే మంత్రి కోమటిరెడ్డి భవిష్యత్ విధానంపై స్పష్టత ఇచ్చారు.

పనాజి: గోవా నైట్‌క్లబ్ అగ్నిప్రమాదంపై ముమ్మరంగా దర్యాప్త జరుగుతోంది. ఈ కేసులో ప్రధాన నిందితులు క్లబ్ యజమానులు సౌరభ్ లూధ్రా, గౌరవ్ లూధ్రాలను థాయ్‌లాండ్‌లో అదుపులోకి తీసుకున్నారు. అక్కడి అధికారులు వారిని అదుపు లోకి తీసుకున్న దృశ్యాలు వెలుగు లోకి వచ్చాయి. ఈనెల 6 న రాత్రి 11.45 గంటల సమయంలో ప్రమాదం చోటు చేసుకోగా, నిందితులిద్దరూ 7న ఉదయం 5.30 గంటలకు ఓ విమానంలో థాయ్‌లాండ్ లోని ఫుకెట్‌కు పారిపోయినట్టు ముంబై లోని బ్యూరో ఆఫ్ ఇమిగ్రేషన్ గుర్తించినట్టు ఇప్పటికే పోలీసులు తెలిపారు. వారి పాస్‌పోర్టులు సస్పెండ్ అయిన నేపథ్యంలో ఆ దేశంలో ఉండటం చట్టవిరుద్ధం. దాంతో అధికారులు వారిని అదుపు లోకి తీసుకున్నారు. వారిని 24 గంటల్లో భారత్‌కు తరలించే అవకాశం ఉందని సంబంధిత వర్గాలు వెల్లడించాయి. గోవా లోని బిర్క్ బై రోమియో లేన్ నైట్ క్లబ్‌లో చోటు చేసుకున్న అగ్నిప్రమాదంలో 25 మంది మృతి చెందిన సంగతి తెలిసిందే.

ఢిల్లీ నుంచి గోవాకు సహ యజమాని అజయ్‌గుప్తా తరలింపు

గోవా క్లబ్ దుర్ఘటన కేసులో సహ యజమాని అజయ్ గుప్తాను దర్యాప్తు కోసం ఢిల్లీ పోలీసులు గోవాకు తీసుకు వచ్చారు. జమ్ముకు చెందిన గుప్తాను బుధవారం ఉదయం ఢిల్లీ లోని అడిషనల్ చీఫ్ జ్యుడీషియల్ మెజిస్ట్రేట్ వినోద్ జోషి ముందు హాజరు పరిచారు. 36 గంటల ట్రాన్సిట్ రిమాండ్‌లో ఉంచడానికి పోలీసులకు మెజిస్ట్రేట్ అనుమతించడంతో గోవా పోలీసులు మోపా మనోహర్ ఇంటర్నేషనల్ విమానాశ్రయంలో గుప్తాను తీసుకుని బుధవారం రాత్రి 9.45 గంటలకు దిగారు. ఆ తరువాత విచారణ కోసం అంజునా పోలీస్ స్టేషన్‌కు తీసుకెళ్లారు. అంతకు ముందు గుప్తాకు వ్యతిరేకంగా లుక్ అవుట్ సర్కులర్ జారీ అయింది. ఈ కేసుకు సంబంధించి ఐదుగురు మేనేజర్లు, స్టాఫ్ సభ్యులు, ఇప్పటివరకు అరెస్ట్ అయ్యారు.