admin

ఓటమి జీర్ణించుకోలేక ప్రత్యర్థుల దాడి

సర్పంచ్ కవిత భర్త భరత్ కుమార్‌పై దాడి

బిఆర్ఎస్ తరఫున సర్పంచ్‌గా పనిచేసిన భరత్ కుమార్

మన తెలంగాణ/పెద్దేముల్: వికారాబాద్ జిల్లా పెద్దేముల్ మండల పరిధిలోని పాషాపూర్ సర్పంచ్‌గా గెలుపొందిన కవిత భర్త భరత్‌ కుమార్‌పై శుక్రవారం రాత్రి దాడి జరిగింది. గ్రామానికి చెందిన ఓ పార్టీ నాయకులు మాజీ సర్పంచ్ భరత్ కుమార్‌, ప్రస్తుతం గెలుపొందిన వార్డు సభ్యులపై దాడికి పాల్పడినట్లుగా భరత్ కుమార్ ఆరోపిస్తున్నారు. భరత్ కుమార్ భార్య బిఆర్ఎస్ మద్దతుతో గెలుపొందారు. ఈ నేపథ్యంలో ఓటమి చవిచూసిన కాంగ్రెస్ నాయకులే తమపై దాడికి పాల్పడ్డారని భరత్ ఆరోపిస్తున్నారు. భరత్ కుమార్ సైతం ఇదివరకు బిఆర్ఎస్ హయాంలో సర్పంచ్‌గా సేవలందించారు. ప్రస్తుతం ఆయన సతీమణి గెలుపొందడంతో ప్రత్యర్థి వర్గీయులు దాడికి పాల్పడ్డారని భరత్ ఆరోపిస్తున్నారు. పోలీసులు గ్రామానికి చేరుకొని విచారణ చేపట్టారు. కాగా ఈ సంఘటనకు సంబంధించి పూర్తి వివరాలు తెలియాల్సి ఉంది.

భూపాలపల్లి: భార్య వేధింపులు తట్టుకోలేక ఆమెను చంపేసి అనంతరం వాట్సాప్‌లో స్టేటస్ పెట్టి అతడు ఆత్మహత్య చేసుకున్నాడు. ఈ సంఘటన జయశంకర్ భూపాలపల్లి జిల్లా ఘణపురం మండలంలో జరిగింది. సీతారాంపురం గ్రామంలో రామాచారి(45), సంధ్య(42) అనే దంపతులు నివసిస్తున్నారు. మొదటి భార్య చనిపోవడంతో సంధ్యను రెండో వివాహం చేసుకున్నాడు. పెళ్లైనప్పటి నుంచి భర్తను భార్యవేధించడంతో ఓపిక పట్టాడు. భార్య వేధింపులు తారాస్థాయికి చేరుకోవడంతో ఆమెను హత్య చేశాడు. భార్య వేధింపులు తట్టుకోలేకపోతున్నానని వాట్సాప్ స్టేటస్ పెట్టాడు. అనంతరం అతడు ఆత్మహత్య చేసుకున్నాడు. గ్రామస్థుల సమాచారం మేరకు పోలీసులు ఘటనా స్థలానికి చేరుకొని కేసు నమోదు చేసి దర్యాప్తు చేస్తున్నారు. దీంతో గ్రామంలో విషాదచాయలు అలుముకున్నాయి. మృతుల కుటుంబ సభ్యులు శోకసంద్రంలో మునిగిపోయారు.  

అమరావతి: కన్నతండ్రి కళ్ల ముందే ఆటో కింద పడి కూతురు మృతి చెందిన సంఘటన ఆంధ్రప్రదేశ్ రాష్ట్రం అనకాపల్లి జిల్లాలో సుంకరమెట్ట దగ్గర జరిగింది. పోలీసులు తెలిపిన వివరాల ప్రకారం…. సునీత(18) అనే యువతి టెట్ ఎగ్జామ్ ప్రిపేర్ అవుతోంది. టెట్ ఎగ్జామ్ రాయడానికి సెంటర్‌కు తండ్రి లక్ష్మణరావు తన ఆటోలో తీసుకెళ్తున్నాడు. సెంటర్ అడ్రస్ కోసం ఫోన్‌లో గూగుల్ మ్యాప్ ఓపెన్ చేసి వెళ్తున్నారు. ఎగ్జామ్ మంచిగా రాయాలి తల్లి అని కబుర్లు చెబుతూ బయటకు వెళ్తున్నారు. సుంకరమెట్ట జంక్షన్ వద్దకు రాగానే స్పీడ్ బ్రేకర్ రావడంతో ఆటోలో తండ్రి పక్కన కూర్చున్న కూతురు రోడ్డుపై పడింది. ఆమె పైనుంచి ఆటో పోవడంతో ఘటనా స్థలంలోనే కూతురు చనిపోయింది. తన కళ్ల ముందే కూతురు మృతి చెందడంతో తండ్రి కన్నీంటి పర్యంతమయ్యారు. ఆ కుటుంబం శోకసంద్రంలో మునిగిపోయింది. కూతురు మృతదేహాన్ని ఎన్‌టిఆర్ ఆస్పత్రికి తరలించారు.  

కోల్‌కతా: అర్జెంటినా ఫుట్‌బాల్ దిగ్గజం మెస్సీ భారత్‌ పర్యటనకు వచ్చిన విషయం తెలిసిందే. ఆయన ప్రస్తుతం కోల్‌కతాలో పర్యటిస్తున్నారు. అయితే కోల్‌కతాలోని సాల్ట్ లేక్ స్టేడియంకి వచ్చిన మెస్సీని చూసేందుకు పెద్ద ఎత్తున అభిమానులు తరలివచ్చారు. మెస్సీ మ్యాచ్ ఆడకుండానే అక్కడి నుంచి వెళ్లిపోయారు. దీంతో అభిమానులు ఆగ్రహానికి గురయ్యారు. ఫ్యాన్స్ గొడవ చేయడంతో సొరంగం ద్వారా మెస్సీ టీమ్ బయటకు వెళ్లిపోయింది. దీంతో ఫ్యాన్స్ స్టేడియంలోని సీట్లను ధ్వంసం చేశారు. గ్రౌండ్‌లోకి కుర్చీలు, వాటర్ బాటిళ్లు విసిరేశారు. బారికేడ్లు దాటుకొని చొచ్చుకెళ్లేందుకు ప్రయత్నించారు. మైదానంలోకి వెళ్లి టెంట్లు, బోర్డులు ధ్వంసం చేశారు. పోలీసులు ప్రస్తుతం అభిమానులను అదుపు చేస్తున్నారు. 

అమరావతి: గ్రామసభలు నిర్వహించి రైతులతో మాట్లాడుతున్నామని ఎపి కేంద్రమంత్రి పెమ్మసాని చంద్రశేఖర్ తెలిపారు. అమరావతి పనులు వేగంగా సాగుతున్నాయని అన్నారు. సిఆర్ డిఎ కార్యకలాపాలపై కేంద్రమంత్రి సమీక్ష నిర్వహించారు. ఈ సందర్భంగా ఆయన మీడియాతో మాట్లాడుతూ.. జరీబు భూముల సమస్యలపై నెల రోజుల సమయం ఇవ్వాలని కేంద్రాన్ని కోరామని, నేల స్వభావంపై పరీక్షలు నిర్వహించి నిర్ణయం తీసుకుంటామని తెలియజేశారు. ఉండవల్లి లేఔట్ అభివృద్ధి ప్రారంభమైందని, లంక భూముల సమస్య కూడా పరిష్కారమైందని అన్నారు. 7 వేల ప్లాట్ల రిజిస్ట్రేషన్ పెండింగ్ లో ఉందని, భూసమీకరణ చేయని భూముల్లో ప్లాట్లు పొందిన వారి సమస్య పెండింగ్ లో ఉందని పేర్కొన్నారు. అక్కడ రైతులతో ఎమ్మెల్యే, మంత్రి మాట్లాడాక భూసేకరణకు వెళ్తామని, వేరే చోట ప్లాట్లు కావాలని అడిగిన వారికి లాటరీ ద్వారా కేటాయించే చర్యలు తీసుకుంటామని అన్నారు.

పెద్ద ప్లాట్లు పొందేవారు కొంత సమయం వేచి ఉండాలని, కమర్షియల్ ప్లాట్లలో వాస్తు ప్రకారం ఉండాలని కొందరు అడిగారని అన్నారు. 7 ఎకరాల మేర ప్లాట్లు మార్చాల్సి ఉంటుందని, రైతులు మళ్లీ వాస్తు పేరిట రావొద్దని కోరుతున్నామని విజ్ఞప్తి చేశారు. 18 వేలమంది రైతులు, రైతు కూలీలకు హెల్త్ కార్డులు, 26 గ్రామాల్లో అభివృద్ధి పనుల డిపిఆర్ లు సిద్ధం చేస్తున్నామని చెప్పారు. వారంలో డిపిఆర్ లు సిద్ధంచేసి నెలాఖరులోగా పనులు ప్రారంభం చేస్తామని, సామాజిక అభివృద్ధిలో భాగంగా కమ్యూనిటీ హాళ్లు, శ్మశానాల నిర్మాణాలకు భూమి, నిధులు సమకూరుస్తామని అన్నారు. రాజధాని గ్రామాల్లో పారిశుద్ధ్య సిబ్బంది సంఖ్య పెంచుతామని పెమ్మసాని చంద్రశేఖర్ స్పష్టం చేశారు.   

అమరావతి: గోదావరి పుష్కరాల తేదీలను ఆంధ్రప్రదేశ్ రాష్ట్ర రాష్ట్ర ప్రభుత్వం ప్రకటించింది. 2027 జూన్ 26 నుంచి జులై 7 వరకు గోదావరి పుష్కరాలు నిర్వహిస్తామని తెలిపింది. 12 రోజుల పాటు గోదావరి పుష్కరాలు కొనసాగుతాయని ప్రభుత్వం వెల్లడించింది. తిరుమల తిరుపతి దేవస్థానాల ఆస్థాన సిద్ధాంతి తంగిరాల వెంకట కృష్ణ పూర్ణ ప్రసాద్ అభిప్రాయం మేరకు తేదీలను అధికారులు ప్రకటించారు. విజయవాడలోని ఎండోమెంట్స్ కమిషనర్ నుంచి అందిన ప్రతిపాదనలను రాష్ట్ర ప్రభుత్వం ఆమోదించింది.  ఈ మేరకు దేవాదాయ శాఖ ప్రభుత్వ ఎక్స్ అఫీషియో కార్యదర్శి ఎం. హరి జవహర్ లాల్ నోటిఫికేషన్ జారీ చేశారు.