admin

న్యూఢిల్లీ: దట్టమైన పొగమంచు రాజధాని ఢిల్లీని ఉక్కిరిబిక్కిరి చేస్తోంది. కాలుష్యంపై యుద్ధం ప్రకటించిన ఢిల్లీ ప్రభుత్వం కాలుష్య నివారణ చర్యల్లో భాగంగా డిసెంబర్ 18 నుంచి కాలుష్య నియంత్రణ సర్టిఫికెట్ (పియుసి) లేని వాహనాలకు పెట్రోల్ బంకుల్లో ఇంధనం సరఫరా చేయబడదని ఢిల్లీ పర్యావరణ మంత్రి మంజిందర్ సింగ్ సిర్సా ప్రకటించారు. అంతేకాకుండా బిఎస్6 ప్రమాణాల కంటే తక్కువ ఉన్న ఢిల్లీయేతర వాహనాల ప్రవేశాన్ని పూర్తిగా నిషేధిస్తున్నట్టు తెలిపారు. అత్యవసర సేవల్లో లేని ట్రక్కులు, వాణిజ్య వాహనాలకు నగరంలో ప్రవేశం నిరాకరిస్తారు. ల్యాండ్‌ఫిల్ సైట్‌ల ఎత్తును 15 మీటర్లు తగ్గించామని, సుమారు 8 వేల పరిశ్రమలను కఠినమైన కాలుష్య నియంత్రణ నిబంధనల కింద తీసుకు వచ్చామన్నారు. కాలుష్యానికి పాల్పడిన పరిశ్రమలకు రూ. 9 కోట్ల జరిమానా విధించామని చెప్పారు.

ప్రజలకు క్షమాపణలు

తొమ్మిది,పది నెలల్లో ఢిల్లీలో కాలుష్యాన్ని పూర్తిగా నిర్మూలించడం ఏ ప్రభుత్వానికైనా సాధ్యం కాదని మంత్రి అంగీకరిస్తూ ఈ విషయంలో ప్రజలకు ఆయన క్షమాపణలు చెప్పారు. ఆమ్ ఆద్మీ పార్టీ ప్రభుత్వ హయాంతో పోలిస్తే రోజువారీ గాలి నాణ్యత సూచీ తగ్గించేందుకు అవిశ్రాంతంగా కృషి చేస్తామని హామీ ఇచ్చారు. 

మధుర: యమునా ఎక్స్‌ప్రెస్ రహదారిపై పొగమంచు కారణంగా మంగళవారం తెల్లవారు జామున 4.30 గంటల ప్రాంతంలో ఎనిమిది బస్సులు, మూడు కార్లు ఒకదాన్నొకటి ఢీ కొనడంతో భారీగా మంటలు చెలరేగి 13 మంది కాలిన గాయాలతో మృతి చెందారు. 43 మంది గాయపడ్డారు. బలదేవ్ పోలీస్ స్టేషన్ పరిధిలో ఈ ప్రమాదం జరిగింది. ఆగ్రా-నొయిడా వైపు యమునా ఎక్స్‌ప్రెస్ వే వద్ద దట్టమైన పొగమంచు వల్ల వాహనాలు ఒకదానినొకటి ఢీకొన్నాయని దీంతో మంటలు చెలరేగి, బస్సులు, కార్లు నిమిషాల్లోనే దగ్ధమయ్యాయని గాయపడిన వారిని ఆస్పత్రికి తరలించామని మధుర సీనియర్ సూపరింటెండెంట్ ఆఫ్ పోలీస్ ష్లోక్ కుమార్ తెలిపారు. మృతుల్లో గుర్తించిన ఇద్దరిలో ఒకరు ప్రయాగ్ రాజ్‌కు చెందిన 44 ఏళ్ల అఖిలేంద్ర ప్రతాప్ కాగా, మరొకరు మహరాజ్‌గంజ్ జిల్లాకు చెందిన 75 ఏళ్ల రామ్‌పాల్ అని బలదేవ్ పోలీస్ స్టేషన్ ఎస్‌హెచ్‌ఒ రంజన సచన్ చెప్పారు.

మూడో వ్యక్తి గోండా జిల్లాకు చెందిన 62 ఏళ్ల సుల్తాన్ అహ్మద్‌గా బృందావన్ చీఫ్ మెడికల్ ఆఫీసర్ గుర్తించారు. కాలిన బస్సులు, కార్లు శిథిలాలుగా మారాయి.రోడ్డుపై నుంచి వీటిని తొలగించడానికి క్రేన్లను రప్పించారు. కాలిన మృతదేహాల డిఎన్‌ఎను భద్రపరిచామని, సంబంధిత కుటుంబీకులు వస్తే వారితో పోల్చి పరీక్షిస్తామని, ఇంతవరకు గుర్తించిన ముగ్గురి మృతుల బంధువులకు తెలియజేస్తున్నామని ష్లోక్ కుమార్ వివరించారు. గుర్తించిన ముగ్గురి మృతుల అంత్యక్రియలకు ఏర్పాట్లు చేస్తున్నట్టు జిల్లా మెజిస్ట్రేట్ చంద్రప్రకాష్ సింగ్ చెప్పారు. ఈప్రమాదంపై దర్యాప్తునకు నలుగురితో బృందాన్ని ఏర్పాటు చేశారు. రెండు రోజుల్లో కమిటీ నివేదిక సమర్పించ వలసి ఉంది. ఇంకా గుర్తించని డ్రైవర్‌పై బలదేవ్ పోలీస్ స్టేషన్‌లో కేసు నమోదైందని ఎస్‌ఎస్‌పి తెలిపారు. మృతదేహాల పోస్ట్‌మార్టమ్‌కు, డిఎన్‌ఎ నమూనాల సేకరణకు, రెండు వైద్య బృందాలను ఏర్పాటు చేశారు. తీవ్రంగా గాయపడిన వారిని ఆగ్రా లోని ఎస్‌ఎన్ మెడికల్ కాలేజీ, ఆస్పత్రికి పంపించారు. మంగళవారం మధ్యాహ్నం వైద్య చికిత్స కోసం 43 మందిని బృందావన్ లోని జాయింట్ డిస్ట్రిక్ట్ ఆస్పత్రికి తీసుకురావడమైందని సిఎంఒ తెలిపారు.

యూపి సిఎం యోగి ఆదిత్యనాథ్ సంతాపం

ఉత్తరప్రదేశ్ ముఖ్యమంత్రి యోగి ఆదిత్యనాథ్ మృతుల కుటుంబాలకు తీవ్ర సంతాపం తెలియజేశారు. గాయపడిన వారికి సరైన చికిత్స అందేలా చూడాలని జిల్లా అధికార యంత్రాంగాన్ని ఆదేశించారు. మృతుల కుటుంబాలకు రూ. 2 లక్షలు, గాయపడిన వారికి రూ. 50 వేలు వంతున ముఖ్యమంత్రి ఎక్స్‌గ్రేషియో ప్రకటించారు.

పొగమంచుతో మరికొన్ని ప్రమాదాలు

హర్యానా లోని సోనిపట్, నూహ్ జిల్లాల్లో పొగమంచు కారణంగా సోమవారం రోడ్డు ప్రమాదాలు సంభవించి ఇద్దరు పోలీసు అధికారులతో సహా ముగ్గురు మృతి చెందారు. ఢిల్లీ ముంబై ఎక్స్‌ప్రెస్ వేపై వాహనాలు ఢీకొని సిఐఎస్‌ఎఫ్‌ఇన్‌స్పెక్టర్‌తోసహా ఇద్దరు చనిపోయారు. సోనిపట్‌లో మహిళా అసిస్టెంట్ సబ్ ఇన్‌స్పెక్టర్ తాను ప్రయాణిస్తున్న కారుకు ట్రక్కు ఢీకొనడంతో ప్రాణాలు కోల్పోయారు.

విమానాల రాకపోకలపై ప్రభావం

వాయు కాలుష్యంతోపాటు దట్టంగా పొగమంచు కారణంగా ఢిల్లీ ఇందిరాగాంధీ విమానాశ్రయంలో పెద్ద ఎత్తున ఇండిగో, ఎయిర్ ఇండియా విమానాలు రద్దయ్యాయి. ఈ సందర్భంగా ఢిల్లీ ఎయిర్‌పోర్టు ప్రయాణికులకు అడ్వైజరీ చేసింది. ఢిల్లీ విమానాశ్రయంలో విమాన సర్వీసుల కార్యకలాపాలు యథావిధిగా కొనసాగుతున్నాయని పేర్కొంది. అయితే పలు విమానాల రాకపోకలపై ప్రభావం ఉండవచ్చని, ప్రయాణికులకు సహాయం అందించేందుకు తమ సిబ్బంది అన్ని టెర్మినల్స్‌లో అందుబాటులో ఉన్నారని పేర్కొంది. 

 యాదగిరిగుట్ట శ్రీలక్ష్మీ నరసింహస్వామి వారికి ఒక భక్తుడు బంగారు చీరను సమర్పించాడు. అగ్గిపెట్టెలో ఇమిడే రెండు గ్రాముల బంగారు చీరను రాజన్న సిరిసిల్లకు చెందిన చేనేత కార్మికుడు నల్ల విజయ్ ఆలయ అధికారులకు అందజేశాడు. ఈ చీర పొడవు 5.30 మీటర్లు, వెడల్పు 48 ఇంచీలు ఉంటుందని తెలిపారు. కాగా స్వామి వారి ఆలయంలో కొలువైన శ్రీఆంజనేయ స్వామి వారికి ప్రత్యేక పూజలు, అభిషేకాలు జరిగాయి. మంగళవారం ఆంజనేయుడికి ఆకుపూజను అర్చకులు వేదోక్తంగా నిర్వహించారు. ఈ సందర్భంగా భక్తులు ఆంజనేయుడిని దర్శించుకొని మొక్కులు చెల్లించుకున్నారు. 

బెంగళూరు: డిజిటల్ అరెస్టు భయంతో 2 ప్లాట్లు, ఓ ఫ్లాట్ అమ్మి సైబర్ నేరస్థులకు రూ.2 కోట్లు చెల్లించిన సంఘటన తాజాగా వెలుగులోకి వచ్చింది. పోలీసులు తెలిపిన వివరాల ప్రకారం.. బెంగళూరులోని ఓ సాఫ్ట్‌వేర్ సంస్థలో పనిచేస్తున్న బబితా దాస్ తన పదేళ్ల కుమారుడితో కలిసి నివసిస్తోంది. జూన్‌లో ఓ వ్యక్తి కొరియర్ అధికారిగా నటిస్తూ, ఆమెకు కాల్ చేశాడు. తన ఫోన్ నెంబర్, ఆధార్ కార్డు వివరాలతో అనుసంధానమై ఉన్న పార్శిల్‌లో అనుమానాస్పద వస్తువులు వచ్చినట్టు తెలిపాడు. ఆ తరువాత మరికొందరు వ్యక్తులు తాము ముంబయికి చెందిన పోలీసులమంటూ బబితా దాస్‌కు ఫోన్ చేశారు. తనకు వచ్చిన పార్శిల్‌లో అనుమానాస్పద వస్తువులు ఉండడంతో డిజిటల్ అరెస్టు చేసినట్టు తెలిపారు.

ఈ విషయంలో దర్యాప్తు పూర్తయ్యేవరకు బయటకు వెళ్లొద్దని హెచ్చరించారు. వారు చెప్పిన ఓ మొబైల్ యాప్‌ను డౌన్‌లోడ్ చేయాలని, లేదంటే ఆమె కుమారుడు తీవ్ర పరిణామాలు ఎదుర్కోవలసి వస్తుందని బెదిరించారు. పరిశీలన కోసం ఖాతాల్లో ఉన్నడబ్బు, ఆస్తుల వివరాలు తెలపాలని డిమాండ్ చేశారు. తన కుమారుడి భవిష్యత్తు గురించి భయపడిన టెకీ తన ఆస్తుల వివరాలన్నీ వారికి తెలియజేసింది. అనంతరం వారు సూచించిన విధంగా విజ్ఞాన్ నగర్ లోని ఫ్లాట్‌ను, మలూర్ లో తనకున్న రెండు ప్లాట్‌లను అమ్మి మొత్తం డబ్బులను సైబర్ నేరగాళ్లు పంపిన బ్యాంకు ఖాతాలకు బదిలీ చేసింది. ఇంకా డబ్బులు పంపాలని వారు బెదిరించడంతో బ్యాంకు నుంచి లోన్ తీసుకుని మరీ చెల్లించింది.

తాజాగా ఆమెకు కాల్ చేసిన సైబర్ నేరగాళ్లు చెల్లించిన మొత్తం డబ్బును తిరిగి పొందడానికి దగ్గరలోని పోలీస్ స్టేషన్‌ను సంప్రదించమని చెప్పి కాల్ కట్ చేశారు. తర్వాత వారిని సంప్రదించడానికి ప్రయత్నించగా, ఫోన్‌లు స్విచ్‌ఆఫ్ రావడంతో మోసపోయానని గ్రహించి టెకీ వైట్‌ఫీల్డ్ సైబర్‌క్రైమ్ పోలీస్ స్టేషన్‌లో ఫిర్యాదు చేయడంతో ఈ విషయం వెలుగు లోకి వచ్చింది. దీనిపై కేసు నమోదు చేసి దర్యాప్తు చేస్తున్నామని పోలీసులు తెలిపారు. డబ్బు బదిలీ చేసిన బ్యాంకు ఖాతాలను గుర్తించామని, వాటిని బ్లాక్ చేయడానికి చర్యలు తీసుకుంటున్నామన్నారు. 

కొమురంభీం ఆసిఫాబాద్ జిల్లా సిర్పూర్(యు) మండలంలోని అడవుల్లో 16 మంది మావోయిస్టులను పోలీసులు అదుపులోకి తీసుకున్నట్లు సమాచారం. ఎఎస్పీ చిత్తరంజన్ ఆధ్వర్యంలో స్పెషల్ పార్టీ పోలీసులు కూంబింగ్ నిర్వహిస్తుండగా వారంతా చిక్కినట్లు తెలుస్తోంది. ఆపరేషన్ కగార్ పేరట కేంద్ర ప్రభుత్వం మావోయిస్టులపై ప్రత్యేక దృష్టి సాధించటంతో చత్తీస్‌గఢ్ నుండి మావోలు తెలంగాణలో తలదాచుకోవడానికి వస్తున్నట్లు నిఘా వర్గాలు తెలపడంతో రాష్ట్ర పోలీసులు అడవుల్లోలో కూంబింగ్‌ను ముమ్మరం చేశారు. జిల్లా ఏఎస్పీ చిత్తరంజన్ ఆధ్వర్యంలో స్పెషల్ పార్టీ పోలీసులు ప్రత్యేక ఆపరేషన్ చేపట్టగా సోమవారం రాత్రి పోలీసులు వారిని అదుపులోకి తీసుకున్నట్లు సమాచారం. పట్టుబడిన వారిలో రాష్ట్ర కమిటీ సభ్యుడు బడే చొక్కారావుతోపాటు మరో 15 మంది సభ్యులు ఉన్నట్లు తెలుస్తోంది. వీరిని మంగళవారం మధ్యాహ్నం విచారణ నిమిత్తం హైదరాబాద్‌లోని డిజిపి కార్యాలయానికి తరలించినట్లు తెలిసింది.

గ్రామ పంచాయతీ ఎన్నికలతో తమ పార్టీలో జోష్ మరింత పెరిగిందని, బిఆర్‌ఎస్ (కారు)లో కంగారు మొదలైందని కాంగ్రెస్ ఎమ్మెల్సీ బల్మూరి వెంకట్ అన్నారు. గ్రామ పంచాయతీకి జరిగిన రెండు విడతల ఎన్నికల్లోనూ ప్రజలు కాంగ్రెస్‌ను ఆదరించారని ఆయన మంగళవారం విలేకరుల సమావేశంలో తెలిపారు. ఇరవై ఏళ్ళ రాజకీయ జీవితంలో ఐదు సార్లు ఎమ్మెల్యేగా గెలుపొందిన కెటిఆర్ నాలుగు సర్పంచులను గెలిపించుకుని హడావుడి చేస్తున్నారని ఆయన విమర్శించారు. పదేళ్ళు అధికారంలో ఉన్న బిఆర్‌ఎస్‌కు ముప్పై శాతం సర్పంచ్ స్థానాల్లోనైనా విజయం సాధించలేకపోయిందని అన్నారు. అరవై శాతానికి పైగా స్థానాల్లో విజయం సాధించిన తాము ఏమనాలని ఆయన ప్రశ్నించారు. తమ పార్టీలో సర్పంచ్ స్థానాలకు ఏర్పడిన తీవ్ర పోటీ కారణంగానే బిఆర్‌ఎస్‌కు ఆ మాత్రం స్థానాలైనా దక్కాయని ఆయన తెలిపారు. బిఆర్‌ఎస్‌కు అనేక చోట్ల అభ్యర్థులే లేరని అన్నారు. మీ చెల్లి కవిత చేసిన అవినీతి, కుంభకోణాలకు ముందుగా కెటిఆర్ సమాధానం చెప్పాలని ఎమ్మెల్సీ బల్మూరి వెంకట్ డిమాండ్ చేశారు.

గ్రామ పంచాయతీలో పారిశుద్థ్య కార్మికురాలిగా పనిచేసిన ఓ మహిళ అదే గ్రాయ పంచాయతీ సర్పంచ్ గా గెలుపొందిన సంఘటన వరంగల్ జిల్లా దుగ్గొండి మండలం రేఖంపల్లి గ్రామంలో చోటుచేసుకుంది. వివరాలలోకి వెళితే.. రేఖంపల్లి గ్రామానికి చెందిన కొలువురు సుజాత భర్త శ్రీను గ్రామ పంచాయతీలో పంప్ ఆపరేటర్ గా విధులు నిర్వర్తించేవారు. సంవత్సరం క్రితం శ్రీను చనిపోవడంతో సుజాతను పారిశుద్ధ్య కార్మికురాలిగా గ్రామ ప్రజలు నియమించారు. గ్రామ సర్పంచ్‌ ఎస్సీ మహిళకు రిజర్వేషన్‌ రావడంతో సుజాత కాంగ్రెస్ పార్టీ తరపున ఎన్నికల్లో పోటీ చేసి విజయం సాధించింది. 

 ఆనాటి భారత సైనికులు ధైర్య సాహసాలతో బంగ్లాదేశ్ కు విముక్తి కల్పించిన రోజు విజయ్ దివస్ అని, ఈరోజు చరిత్రలో గర్వించదగిన, గుర్తుంచుకోదగిన రోజు అని డిప్యూటీ సీఎం మల్లు భట్టి విక్రమార్క అన్నారు. విజయ్ దివస్ సందర్భంగా గవర్నర్ జిష్ణుదేవ్ వర్మతో కలిసి డిప్యూటీ సీఎం భట్టి విక్రమార్క మల్లు సికింద్రాబాద్ పెరేడ్ గ్రౌండ్ లోని అమర జవాన్ల స్తూపం వద్ద పుష్పగుచ్చాలు ఉంచి నివాళులు అర్పించారు. అనంతరం డిప్యూటీ సీఎం మీడియాతో మాట్లాడారు. విజయ్ దివస్ సందర్భంగా ఆనాటి అమర జవాన్లను స్మరించుకోవడం గుర్తించుకోదగిన సందర్భమని డిప్యూటీ సీఎం భట్టి విక్రమార్క మల్లు అన్నారు. యుద్ధ సమయంలో భారతదేశ ఔన్నత్యాన్ని కాపాడిన నాటి ప్రధాని ఇందిరా గాంధీ, సైనిక నాయకులు, అమర జవాన్లు అందరికీ వందనాలు అని డిప్యూటీ సీఎం తెలిపారు.

వాయు కాలుష్యం ప్రజలను ఉక్కిరి బిక్కిరి చేస్తోంది. పలు ప్రాంతాల్లో వాయు కాలుష్య తీవ్రత ఆందోళన కలిగిస్తోంది. తెలంగాణ రాష్ట్రంలోని పలు ప్రాంతాల్లో వాయు కాలుష్య తీవ్రత పెరుగడంలో ఊపిరి తీసుకోలేక ప్రజలు విలవిలలాడుతున్నారు. రోజురోజుకు భాగ్యనగరంలో గాలి నాణ్యత సూచీ క్షీణిస్తోంది. ఢిల్లీని వాయు కాలుష్యం వణికిస్తుండగా గాలి కాలుష్యం హైదరాబాద్‌ను కూడా కలవరపెడుతోంది. హైదరాబాద్‌లో గాలి నాణ్యత తగ్గిపోవడం ప్రజలను కలవరపెడుతోంది. ఈ ఏడాది జనవరి నుంచి డిసెంబర్ వరకు 110 రోజులు గాలి నాణ్యత పూర్ కేటిగిరీలో ఉంది. నిర్మాణ పనులు, వాహనాల రద్దీ, పరిశ్రమల ఉద్గారాలు వాయు కాలుష్యానికి కారణం అవుతున్నాయి. హైదరాబాద్‌లో స్వచ్ఛమైన గాలి కరువవుతున్న నేపథ్యంలో ఢిల్లీ వంటి పరిస్థితి రాకుముందే కాలుష్య కట్టడిపై ప్రభుత్వం కఠిన చర్యలు తీసుకోవాలని ప్రజలు కోరుతున్నారు. దేశ రాజధాని ఢిల్లీ కాలుష్య కోరల్లో చిక్కుకుని ఉక్కిరిబిక్కిరి అవుతున్న సంగతి తెలిసిందే. శీతాకాలంలో పరిస్థితి మరింత దిగజారుతోంది. హైదరాబాద్‌లో కూడా వాయు నాణ్యతపై ఆందోళనలు వ్యక్తమవుతున్నాయి. నగరంలో స్వచ్ఛమైన గాలి దొరకడం కష్టంగానే మారుతోందని నివేదికలు చెబుతున్నాయి.

వాయు కాలుష్యం ప్రజలను ఉక్కిరి బిక్కిరి చేస్తోంది. పలు ప్రాంతాల్లో వాయు కాలుష్య తీవ్రత ఆందోళన కలిగిస్తోంది. వాయు కాలుష్య తీవ్రత పెరుగడంలో ఊపిరి తీసుకోలేక ప్రజలు విలవిలలాడుతున్నారు. రోజురోజుకు భాగ్యనగరంలో గాలి నాణ్యత సూచీ క్షీణిస్తోంది. ఢిల్లీని వాయు కాలుష్యం వణికిస్తుండగా గాలి కాలుష్యం హైదరాబాద్‌ను కూడా కలవరపెడుతోంది. హైదరాబాద్‌లో గాలి నాణ్యత తగ్గిపోవడం ప్రజలను కలవరపెడుతోంది. ఈ ఏడాది జనవరి నుంచి డిసెంబర్ వరకు 110 రోజులు గాలి నాణ్యత పూర్ కేటిగిరీలో ఉంది. నిర్మాణ పనులు, వాహనాల రద్దీ, పరిశ్రమల ఉద్గారాలు వాయు కాలుష్యానికి కారణం అవుతున్నాయి. హైదరాబాద్‌లో స్వచ్ఛమైన గాలి కరువవుతున్న నేపథ్యంలో ఢిల్లీ వంటి పరిస్థితి రాకుముందే కాలుష్య కట్టడిపై ప్రభుత్వం కఠిన చర్యలు తీసుకోవాలని ప్రజలు కోరుతున్నారు. దేశ రాజధాని ఢిల్లీ కాలుష్య కోరల్లో చిక్కుకుని ఉక్కిరిబిక్కిరి అవుతున్న సంగతి తెలిసిందే. శీతాకాలంలో పరిస్థితి మరింత దిగజారుతోంది. హైదరాబాద్‌లో కూడా వాయు నాణ్యతపై ఆందోళనలు వ్యక్తమవుతున్నాయి. నగరంలో స్వచ్ఛమైన గాలి దొరకడం కష్టంగానే మారుతోందని నివేదికలు చెబుతున్నాయి.