admin

త్వరలోనే భారతీయ రోడ్లపైకి వినూత్న రీతిలో ఉండే భారత్ టాక్సీలు ప్రవేశించనున్నాయి. ఇప్పుడున్న ఉబెర్, ఓలా, రాపిడో వంటి ప్రయాణ సాధనాలకు ఇవి పూర్తిగా భిన్నమైనవి.భారత ప్రభుత్వ తెరవెనుక సంపూర్ణ మద్దతుతో పలు విశిష్ట ప్రత్యేకతలతో ఇవి సత్వర సుఖవంత ప్రయాణాలు ఆశించే ప్రజల కోసం అందుబాటులోకి రానున్నాయని వెల్లడైంది. మెట్రో నగరాలలో ఇప్పుడు ప్రభుత్వ రంగ రవాణా సంస్థల వాహనాలను తలదన్నుతూ ప్రైవేటు రంగ వాహనాలు దూసుకుపోతున్నాయి. ప్రయాణికుల అవసరాలను తీరుస్తున్నాయి. అయితే అత్యధిక రేటు, కొన్ని భద్రతాపరమైన కారణాలతో వీటిని కూడా వద్దనుకునే వారి సంఖ్య పెరుగుతోంది. ఈ క్రమంలో అందరికి అందుబాటులో ఉండేలా కొత్త సంవత్సరం జనవరి 1 నుంచి ఈ భారత్ టాక్సి అందుబాటులోకి రానుంది. సంబంధిత వాహనాల ఫోటోలు కూడా వెలువడ్డాయి. ఈ వాహన సేవలను సహకార్ టాక్సీ కో ఆపరేటివ్ లిమిటెడ్ నిర్వహిస్తుంది. పలు ఉన్నత స్థాయి ప్రతిష్టాత్మక కంపెనీలు అమూల్, ఇఫ్కో , నాబార్డ్ వంటి వాటి సహకారంతో ఈ కో ఆపరేటివ్ సంస్థ ఏర్పడింది. ఈ ప్రయత్నానికి కేంద్ర ప్రభుత్వం సహకారం ఉండటంతో భారత్ టాక్సి పూర్తి స్థాయి పారదర్శకతతో సాగుతుందని ఆశలు వ్యక్తం అవుతున్నాయి. ఇప్పటికే ప్రయోగాత్మకంగా ఈ టాక్సీలను ఢిల్లీ, గుజరాత్‌లోని కొన్ని ప్రాంతాలలో నడిపిస్తున్నారు. పది పదిహేను రోజుల్లోనే దేశమంతటా ఇవి విస్తరిస్తాయి. ఇక భారత్ టాక్సీ యాప్ కూడా ఆండ్రాయిడ్ , ఐఒఎస్‌లలో డౌన్‌లోడ్ చేశారు. ఇతర రవాణా సంస్థల లోటుపాట్లను గుర్తించి తగు విధంగా సర్దుబాట్లతో వినూత్న రీతిలో భారత్ టాక్సీలు రంగంలోకి దిగేందుకు కొత్త సంవత్సరం వరకూ ఆగి ఉంటే చాలునని రవాణా సంబంధిత అధికారులు తెలిపారు. అయితే వాటిపై అధికారిక నిర్థారణ ఇంతవరకూ వెలువడలేదు. 

ప్రభుత్వం గురువారం నాడు రీజినల్ రూరల్ బ్యాంక్స్ (ఆర్‌ఆర్‌బి) కొత్త లోగోను ఆవిష్కరించింది. ఒకటే, ఏకైక బ్రాండ్ గుర్తింపును సూచించడానికి ఈ లోగోను తీసుకొచ్చినట్టు కేంద్ర ఆర్థిక మంత్రిత్వశాఖ వెల్లడించింది. ప్రభుత్వం ఆవిష్కరించిన వన్ స్టేట్ వన్ ఆర్‌ఆర్‌బి అనే విధానంతో 11 రాష్ట్రాలు, కేంద్రపాలిత ప్రాంతాల్లోని 26 ప్రాంతీయ గ్రామీణ బ్యాంకులు (ఆర్‌ఆర్‌బి) 2025 మే 1 నుంచి ఏకమయ్యాయి. మరింత పటిష్టమైన, సమర్థవంతమైన ఆర్‌ఆర్‌బిల నిర్మాణం దిశగా ముందు వెళ్లడంలో ఈ సంస్కరణ ముఖ్యమైన అడుగు కానుంది. ప్రస్తుతం దేశవ్యాప్తంగా 28 ఆర్‌ఆర్‌బిలు దాదాపు 700కి పైగా జిల్లాల్లో 22 వేల శాఖల నెట్‌వర్క్‌తో సేవలందిస్తున్నాయి. కీలక విలీనం ప్రక్రియ తర్వాత ప్రాంతీయ బ్యాంకులకు ఒకే బ్రాండ్ గుర్తింపు తీసుకురావడంలో భాగంగా 28 ఆర్‌ఆర్‌బిలకు కామన్ లోగోను ఆవిష్కరించినట్టు కేంద్ర ఆర్థిక మంత్రిత్వశాఖ ఒక ప్రకటనలో తెలిపింది.

కాంగ్రెస్ నాయకురాలు, కేరళ వయినాడ్ ఎంపీ ప్రియాంక గాంధీ వద్ర గురువారం నాడు పార్లమెంటు ప్రాంగణంలోని కేంద్ర రోడ్డు రవాణా, జాతీయ రహదారుల శాఖమంత్రి నితిన్ గడ్కరీని కలుసుకున్నారు. ఈ సందర్భంగా కేరళ గుండా వెళ్తున్న ఆరు రోడ్డు ప్రాజెక్టుల ప్రగతిని చర్చించారు. ఈ సందర్భంగా నితిన్ గడ్కరీ ఆత్మీయంగా అందించిన అల్పాహారాన్ని ప్రియాంక గాంధీ రుచి చూశారు.చర్చల సందర్భంగా కొన్ని ప్రాజెక్టులు కేరళ ప్రభుత్వం ఆధ్వర్యంలో ఉన్నాయని, కాబట్టి కేంద్రం వాటిని నిర్వహించలేమని రహదారుల శాఖమంత్రి అన్నారు. అయినా కేరళ ప్రభుత్వంతో చర్చించి, వాటిని తాను పరిశీలిస్తానని హామీ ఇచ్చారు. ఈ సందర్భంగా రాహుల్ గాంధీ ఇటీవల తన నియోజకవర్గం రాయ్ బరేలి లోని కొన్ని రోడ్ల గురించి తనను కలిసిన విషయాన్ని గుర్తుచేస్తూ, తమ్ముడి మాట ఆలకించి, మీ మాట వినకపోతే, మీరు ఫిర్యాదు చేస్తారు కదా అని గడ్కరి అనడంతో గదిలో నవ్వులు వెల్లివిరిశాయి.

ముంబైలో కుంద్రాలో నటి శిల్పా శెట్టి ఇంటిపై ఆదాయపు అధికారులు గురువారంనాడు సోదాలు నిర్వహించారు. ఆమె నిర్వహిస్తున్న బాస్టియన్ రెస్టారెంట్ కు సంబంధించిన కేసులో ఈ దాడి జరిగింది. 2014లో స్థాపించిన ఈ రెస్టరెంట్ లో ఆమె సహ యజమాని. ఈ కేసుకు సంబంధించి బెంగళూరు లోని కొన్ని ప్రదేశాలలోకూడా ఆదాయపు పన్ను అధికారులు సోదాలు నిర్వహించినట్లు అధికారులు తెలిపారు. బెంగళూరులోని రెస్టారెంట్ బాస్టియన్ గార్డెన్ సిటీ అవుట్ లెట్ చట్టబద్దమైన సమయాన్ని మించి పని చేస్తున్నందు వల్ల దానిపై బెంగళూరు పోలీసులు కేసు నమోదు చేసిన ఒక రోజు తర్వాత ఆదాయ పన్ను ఈ చర్య తీసుకున్నారు.మరో పక్క ఒక వ్యాపారవేత్తను పెట్టుబడికి సంబంధించిన ఒప్పందంలో రూ.60 కోట్లకు మోసం చేసుకునే ఆరోపణలపై శిల్పాశెట్టి, ఆమె భర్త రాజ్ కుంద్రా మరో కేసు ఎదుర్కొంటున్నారు. ముంబై పోలీసుల ఆర్థిక నేరాల విభాగం ఈ జంటపై మోసం అభియోగం మోపింది.

ఐబొమ్మ రవి కేసులో సంచలన విషయాలు వెలుగు చూస్తున్నాయి. పోలీసుల విచారణలో ఐబొమ్మ వెబ్ సైట్ నిర్వాహకుడు రవి ఎట్టకేలకు సినిమా పైరసీకి పాల్పడిన విధానాన్ని వెల్లడించాడు. టెలిగ్రామ్ ఛానల్ ద్వారా కొత్త సినిమాల పైరసీ ప్రింట్లతో వ్యాపారం చేసినట్లు ఒప్పుకున్నాడు. గురువారం జరిగిన విచారణలో పైరసీకి సంబంధించిన కీలక వివరాలను రవి వెల్లడించాడు. కేవలం సాధా రణ ప్రింట్లే కాకుండా, ఏకంగా క్యూబ్ నెట్‌వర్క్‌ను, శాటిలైట్ లింక్‌ను హ్యాక్ చేసి సినిమాలను హెచ్‌డి ఫార్మాట్‌లో రికార్డు చేసినట్లు తెలి పాడు. ఈ విధంగా పైరసీ చేసిన సినిమాలను అమ్మేందుకు ’హెచ్‌డి హబ్’ పేరుతో ప్రత్యేకంగా ఒక టెలిగ్రామ్ ఛానల్ ఏర్పాటు చేసినట్లు చెప్పాడు. ఈ ఛానల్‌లో పైరసీ లింకులను అప్‌లోడ్ చేసి, ఒక్కో లింక్‌కు 100 నుంచి 300 డాలర్ల వరకు వసూలు చేసినట్లు స్పష్టం చేశాడు. ముఖ్యంగా ’హిట్-3’, ’కిష్కింద పురి’ సినిమాలను శాటిలైట్ లింక్ ద్వారానే పైరసీ చేసినట్లు అంగీకరించాడు. ఈ నేపథ్యంలో, మూడు వేర్వేరు కేసుల్లో విచారణ నిమిత్తం నాంప ల్లి కోర్టు ఇమ్మడి రవికి 12 రోజుల పోలీస్ కస్టడీకి అనుమ తించింది. కోర్టు ఆదేశాల మేరకు సైబర్ క్రైమ్ పోలీసులు గురువారం చంచల్‌గూడ జైలు నుంచి అతడిని అదుపులోకి తీసుకుని విచారణ కొనసాగిస్తున్నారు. కాగా, ఐ బొమ్మ సూత్రధారి ఇమ్మడి రవిని విదేశాల నుంచి హైదరాబాద్ రాగా ఈ ఏడాది నవంబర్ 14న పోలీసులు కూకట్‌పల్లిలోని ఒక అపార్ట్‌మెంట్‌లో అదుపులోకి తీసుకున్నారు. పైరసీ ద్వారా రవి దాదాపు రూ. 20 కోట్ల వరకు సంపాదించాడని, ఆ డబ్బుతో ఫ్లాట్లు, స్థలాలు కొనుగోలు చేసినట్లు విచారణలో పోలీసులు గుర్తించారు. ఇప్పటికే అతని బ్యాంకు ఖాతాల్లోని రూ. 3.5 కోట్లను ఫ్రీజ్ చేశారు. 2019 నుంచి ఐబొమ్మ, బప్పం టీవీ వంటి 65కి పైగా మిర్రర్ వెబ్‌సైట్ల ద్వారా రవి సుమారు 21,000 సినిమాలను పైరసీ చేసినట్లు పోలీసుల విచారణలో తేలింది. భార్యతో ఉన్న గొడవల కారణంగా ఆస్తి లావాదేవీల కోసం రహస్యంగా హైదరాబాద్ వచ్చిన రవిని విశ్వసనీయ సమాచారంతో పోలీసులు అరెస్టు చేశారు.

 ఆంధ్రప్రదేశ్‌లోని పసిబిడ్డల విక్రయాలకు పాల్పడుతున్న ఓ ముఠా గుట్టును విజయవాడ పోలీసులు రట్టు చేశారు ఢిల్లీ, యూపితో పాటు ఇతర రాష్ట్రాల నుంచి నెలల వయసున్న శిశువులను తెప్పించి అక్రమంగా విక్రయిస్తున్న ముఠాను అరెస్టు చేసి, ఐదుగురు పసిబిడ్డలను పోలీసులు స్వాధీనం చేసుకున్నారు. ఒక్కో శిశువును రూ.3 లక్షల నుంచి రూ.5 లక్షల వరకు విక్రయిస్తున్నట్టు పోలీసుల ప్రాథమిక విచారణలో తేలింది. గతంలో అరెస్ట్ అయిన బండి సరోజ ముఠానే ఈ అక్రమ శిశు విక్రయాలకు పాల్పడుతున్నట్టు పోలీసులు గుర్తించారు. మూడు నెలల క్రితం అరెస్ట్ అయిన అనంతరం బయటకు వచ్చిన సరోజ ముఠా మళ్లీ ఈ దందాను కొనసాగి స్తున్నట్టు పోలీసులు నిర్ధారించారు.

కేసులో మొత్తం 13 మందిని పోలీసులు అదుపులోకి తీసుకున్నారు. వీరిలో ఆరుగురు మహిళలు, ఏడుగురు పురుషులు ఉన్నట్లు పోలీసులు తెలిపారు. నిందితులు విజయవాడ, పాయకాపురం, గుంటూరు, నరసరావుపేట ప్రాంతాలకు చెందినవారిగా పోలీసులు గుర్తించారు. ముఠా నుంచి స్వాధీనం చేసుకున్న ఐదుగురు పసిబిడ్డలను ఐసిడిఎస్ అధికారులకు పోలీసులు అప్పగించారు. పిల్లలకు అవసరమైన వైద్య పరీక్షలు నిర్వహించి, రక్షణ చర్యలు చేపట్టినట్టు వెల్లడించారు. కేసు నమోదు చేసి దర్యాప్తు చేపట్టిన పోలీసులు అక్రమ శిశు విక్రయాల వెనుక ఉన్న పెద్ద నెట్‌వర్క్ ఛేదించే దిశగా చర్యలకు ఉపక్రమించారు.

 పథకాల పేర్లు మార్చడంలో, వాటిని నిర్వీర్యం చేయడంలోనూ కేంద్రంలోని బిజెపి, రాష్ట్రంలోని కాంగ్రెస్ ప్రభుత్వాలు పార్టీలు దొందు దొందే అని బిఆర్‌ఎస్ వర్కింగ్ ప్రెసిడెంట్ కెటిఆర్ విమర్శించారు. జాతీయ ఉపాధి హామీ పథకం నుండి మహాత్మా గాంధీ పేరును తొలగించడం ద్వారా బిజెపి తన సంకుచితత్వాన్ని చాటుకుందని, పల్లె ప్రజల ఉపాధిని దెబ్బతీసేలా కేంద్రం వ్యవహరిస్తోందని మండిపడ్డారు. జాతిపిత పేరును తొలగించిన బిజెపికి జాతీయ పార్టీ అని చెప్పుకునే నైతిక హక్కు లేదని ఒక ప్రకటనలో పేర్కొన్నారు. తెలంగాణలోని కాంగ్రెస్ ప్రభుత్వం పేదలకు రూ. 5లకే భోజనం అందించే అన్నపూర్ణ క్యాంటీన్ల పేరును ఇందిరమ్మ క్యాంటీన్లుగా మార్చడం చిల్లర రాజకీయమని విమర్శించారు. తెలంగాణ సంస్కృతికి ప్రతీకలైన బతుకమ్మ చీరలను నిలిపివేసి, నేతన్నల పొట్టకొట్టి, ఇప్పుడు వాటికి రాజకీయ రంగు పులుముతూ ఇందిరమ్మ చీరలుగా మార్చడాన్ని ఆయన తీవ్రంగా ఖండించారు. అలాగే తెలంగాణ ఆత్మగౌరవ చిహ్నమైన తెలంగాణ తల్లి విగ్రహాన్ని మార్చి, కాంగ్రెస్ తల్లిని ప్రజలపై రుద్దడం అమానుషమని ధ్వజమెత్తారు.

కెసిఆర్ ప్రవేశపెట్టిన విప్లవాత్మక పథకాలైన రైతుబంధును రైతుభరోసాగా మార్చి రైతులకు అందకుండా చేస్తున్నారని, కెసిఆర్ కిట్లు, న్యూట్రీషన్ కిట్లను నిలిపివేసి తల్లీబిడ్డల ఆరోగ్యంతో కాంగ్రెస్ ఆటలాడుతోందని ఆవేదన వ్యక్తం చేశారు. గతంలో అవార్డులు తెచ్చిపెట్టిన పల్లె ప్రగతి, హరితహారం వంటి పథకాల పేర్లు మార్చి వాటికి నిధులు ఇవ్వకుండా ఎండబెడుతున్నారని ఆరోపించారు.గతంలో వైఎస్సార్ ప్రవేశపెట్టిన ఆరోగ్యశ్రీ, ఫీజు రీయింబర్స్‌మెంట్ వంటి పథకాలను అదే పేర్లతో కొనసాగించి కెసిఆర్ తన విశాల దృక్పథాన్ని చాటుకున్నారని గుర్తు చేశారు. ప్రజలకు మేలు చేయడం కంటే కేవలం పేర్లు మార్చి ప్రజలను ఏమార్చడమే లక్ష్యంగా ఈ ఢిల్లీ పార్టీలు పనిచేస్తున్నాయని విమర్శించారు. దేశ ముఖచిత్రాన్ని మార్చే ఆలోచన ఈ పార్టీలకు లేదని, 150 కోట్ల భారతీయులు ఈ రాజకీయాల వల్ల నష్టపోతున్నారని పేర్కొన్నారు. ప్రజలు త్వరలోనే ఈ రెండు పార్టీల భరతం పడతారని కెటిఆర్ హెచ్చరించారు.

రైలు మొదటి జనరల్ బోగి కింద మంటలు చెలరేగిన ఘటన రంగారెడ్డి జిల్లా శంకర్ పల్లి రైల్వే స్టేషన్ సమీపంలో గురువారం రాత్రి చోటుచేసుకుంది. వివరాలలోకి వెళితే.. హైదరాబాద్ నుంచి కర్ణాటకలోని బెళగావికి వెళ్తున్న ప్రత్యేక రైలు(07043) లో శంకర్ పల్లి రైల్వే స్టేషన్ సమీపంలోకి రాగానే జనరల్ బోగి కింద మంటలు చెలరేగాయి.గమనించిన ప్రయాణికులు రైల్వే సిబ్బందికి సమాచారం అందించారు. సమాచారం మేరకు వెంటనే అప్రమత్తమైన సిబ్బంది మంటలు ఆర్పి వేశారు. బ్రేక్ జామ్ అయ్యి మంటలు చెలరేగినట్లు రైల్వే అధికారులు తెలిపారు. 

సయ్యద్ ముస్తాక్ అలీ టి20 ట్రోఫీ టైటిల్ ను ఝార్ఖండ్ జట్టు కైవసం చేసుకుంది. హరియాణాతో జరిగిన ఫైనల్ లో 69 పరుగుల తేడాతో ఘన విజయం సాధించింది. మొదట టాస్ ఓడి బ్యాటింగ్ కు దిగిన ఝార్ఖండ్ నిర్ణీత 20 ఓవర్లలో 3 వికెట్లు కొల్పోయి 262 పరుగులు చేసింది. కెప్టెన్, ఓపెనర్ ఇషాన్ కిషన్ (101; 49 బంతుల్లో 6 ఫోర్లు, 10 సిక్స్ లు) సెంచరీ చేశాడు. కుమార్ కుశాగ్రా(81; 38 బంతుల్లో 8 ఫోర్లు,5 సిక్స్ లు) మెరుపులు మెరిపించాడు. 263 పరుగుల లక్ష్య చేధనలో బరిలోకి దిగిన హరియాణా 18.3 ఓవర్లలో 193 పరుగులకు ఆలౌటైంది. హరియాణా బ్యాటర్లలో యశ్వర్థన్ (53; 22 బంతుల్లో 2 ఫోర్లు, 5 సిక్స్ లు) ,నిశాంత్ సింధు(31; 15 బంతుల్లో 6 ఫోర్లు), సమంత్ జాఖర్ (38; 17 బంతుల్లో 2 ఫోర్లు,4 సిక్స్ లు) రాణించారు. ఝార్ఖండ్ బౌలర్లలో బాల క్రిష్ణ 3,సుశాంత్ మిశ్రా 3, అనుకుల్ రాయ్,వికాష్ సింగ్ రెండేసి వికొట్లు తీశారు.

పంచాయతీ ఎన్నికల ఫలితాలు చూసిన సిఎం రేవంత్ రెడ్డి ఫ్రస్టేషన్ పీక్స్‌కు చేరిందని మాజీ మంత్రి, బిఆర్‌ఎస్ ఎంఎల్‌ఎ హరీష్‌రావు విమర్శించారు. రోజురోజుకీ పరిస్థితులు చేజారి పోతున్నాయనే సత్యం జీర్ణం కాక అవాకులు చెవాకులు పేలుతూ అక్కసు వెళ్లగక్కారని మండిపడ్డారు. త్వరలోనే తనకు పతనం తప్పదనే సంగతి అర్థమై ఆగమాగం అవుతున్నారని ఒక ప్రకటనలో పేర్కొన్నారు. త్వరలోనే తన కుర్చీ ఊడుతుందని, తన దోపిడీ ఆగిపోతుందనే భయంతో రేవంత్ రెడ్డి మీడియా సమవేశంలో అడ్డగోలుగా మాట్లాడారని ఆగ్రహం వ్యక్తం చేశారు. తనకు, కెటిఆర్‌కు మధ్య మిత్ర బేధం సృష్టించాలని, తద్వారా బిఆర్‌ఎస్‌ను బలహీన పరచాలని రేవంత్‌రెడ్డి ఒక చీప్ ట్రిక్ ప్లే చేస్తున్నారని ఆరోపించారు. కానీ రేవంత్ రెడ్డి చీప్ ట్రిక్కులకు, చిల్లర రాజకీయాలకు ఎవరు పడిపోరు అని, ఆయన కుట్రలు, కుత్సితాలు ఫలించవు గాక ఫలించవు అని పేర్కొన్నారు. ఎప్పటికైనా హరీష్ రావు గుండెల్లో ఉండేది కెసిఆరే, హరీశ్ రావు చేతిలో ఉండేది గులాబీ జెండానే అని మరోసారి స్పష్టం చేశారు.

రేవంత్‌రెడ్డి దాష్టీకాలు, దుర్మార్గలకు వ్యతిరేకంగా తానూ, కెటిఆర్ మరింత సమన్వయంగా, మరింత సమర్థవంతంగా రెట్టించిన ఉత్సాహంతో పోరాడుతాం, ఆయన అవినీతిని ఎండగడుతాం, అసమర్థతను నిలదీస్తామని వెల్లడించారు. ఉద్యమ కాలం నుంచి నేటి దాకా తెలంగాణకు తీరని ద్రోహం చేస్తున్న రేవంత్‌రెడ్డిని, కాంగ్రెస్‌ను గద్దె దించుతామని, తన లక్ష్యమైనా, కెటిఆర్ లక్ష్యమైనా, లక్షలాది గులాబీ సైనికుల లక్ష్యమైనా ఇదే అని ప్రకటించారు. బిఆర్‌ఎస్ విజయపథంలో పురోగమించడం ఖాయం..మరోసారి కెసిఆర్ ముఖ్యమంత్రి కావడం ఖాయం..తెలంగాణ ప్రజల ఆకాంక్షలను సంపూర్ణంగా నెరవేర్చడం ఖాయం అంటూ ధీమా వ్యక్తం చేశారు. రేవంత్‌రెడ్డి చిల్లర వేషాలు, చెత్త రాజకీయాలను చూసి ప్రజలు ఛీ కొడుతున్నారంటూ ధ్వజమెత్తారు. మిగిలిన కొద్ది కాలమైనా సరిగ్గా వినియోగించుకోవాలని హితవు పలికారు. కమీషన్లు, రియల్ ఎస్టేట్ దందాలే కాదు..ప్రజలకు అక్కరకు వచ్చే పనులు చేయాలని, లేకుంటే ఉద్యమ ద్రోహి గానే కాదూ, చేవలేని, చేతగాని ముఖ్యమంత్రిగా కూడా చరిత్రలో నిలిచిపోతావు అని పేర్కొన్నారు.