admin

మనతెలంగాణ/హైదరాబాద్ : అసిస్టెంట్ ప్రొఫెసర్లు, డిగ్రీ లెక్చరర్ల నియామకంలో కనీస అర్హత కోసం నిర్వహించే తెలంగాణ స్టేట్ ఎలిజిబిలిటీ టెస్ట్ (టిజిసెట్ 2025) పరీక్షలు సోమవారం ప్రారంభమయ్యాయి. ఉస్మానియా విశ్వవిద్యాలయం ప్రాంగణంలోని టిజిసెట్ కార్యాలయంలో ఉన్న కమాండ్ కంట్రోల్ సెంటర్ నుండి వైస్ ఛాన్స్‌లర్ కుమార్ మొలుగరం ఉదయం 8.30 గంటలకు పరీక్షల పాస్‌వర్డ్ విడుదల చేసి, రాష్ట్రవ్యాప్తంగా పరీక్ష ప్రక్రియను ప్రారంభించారు. ఈ కార్యక్రమంలో ఒయు రిజిస్ట్రార్ జి. నరేష్ రెడ్డి, ఓ.ఎస్.డి ఎస్. జితేంద్ర కుమార్ నాయక్, టిజిసెట్ మెంబర్ సెక్రటరీ బి. శ్రీనివాస్, కాకతీయ యూనివర్సిటీ విసి ప్రతాప్ రెడ్డి, తెలుగు యూనివర్సిటీ విసి నిత్యానంద రావు, పిజి అడ్మిషన్స్ డైరెక్టర్ ఐ. పాండురంగారెడ్డి, ఆడిట్ సెల్ డైరెక్టర్ ఎన్.కిషన్ సహా ఇతర సీనియర్ అధికారులు పాల్గొన్నారు.

పరీక్షల నిర్వహణలో సాంకేతిక పరిజ్ఞానాన్ని వినియోగిస్తూ, పారదర్శకతకు పెద్దపీట వేసిన టిజిసెట్ బృందాన్ని వైస్ ఛాన్సలర్ ఈ సందర్భంగా అభినందించారు. ఈ సందర్భంగా టిజిసెట్ మెంబర్ సెక్రటరీ బి. శ్రీనివాస్ మాట్లాడుతూ… సోమవారం నుంచి ఈ నెల 24 వరకు జరిగే టిజి సెట్ 2025 పరీక్షల్లో 45 వేల 127 మంది అభ్యర్థులు హాజరు కానున్నట్లు వెల్లడించారు. సాంకేతిక ఇబ్బందులు తలెత్తితే తక్షణమే పరిష్కరించేందుకు, ఎలాంటి అక్రమాలకు తావులేకుండా పూర్తి పారదర్శకంగా పరీక్షలు నిర్వహించేందుకు అన్ని ఏర్పాట్లు చేశామని స్పష్టం చేశారు.

మన తెలంగాణ/హైదరాబాద్‌ః ఉపాధి హామీ పథకం చట్టానికి బిజెపి నేతృత్వంలోని కేంద్ర ప్రభుత్వం ఉరి వేసిందని రాష్ట్ర గిరిజన సంక్షేమ శాఖ మంత్రి సీతక్క మండిపడ్డారు. ఈ పథకాన్ని కాపాడుకోవాల్సిన బాధ్యత అందరిపైనా ఉందన్నారు. ఉపాధి హామీ పథకాన్ని కాపాడాలని గ్రామాల్లో తీర్మానాలు చేసి కేంద్రానికి పంపిస్తామని ఆమె సోమవారం విలేకరుల సమావేశంలో తెలిపారు. అంతేకాకుండా కేంద్ర ప్రభుత్వ వైఖరిని నిరసిస్తూ ఈ నెల 27, 28 తేదీల్లో ర్యాలీలు నిర్వహిస్తామని ఆమె చెప్పారు.

గ్రామీణ ఉపాధి హామీ పథకం నుంచి మహాత్మా గాంధీ పేరు తొలగించి బిజెపి మరోసారి గాంధీని హత్య చేసిందని ఆమె దుయ్యబట్టారు. ఉపాధి హామీ పథకంలో కేంద్రం ప్రతి ఏడాది పని దినాలను తగ్గిస్తూ వచ్చిందని, సొంత గ్రామాల్లో పని హక్కు లేకుండా చేస్తున్నదని ఆమె విమర్శించారు. ఉపాధి హామీ పథకాన్ని నిర్వీర్యం చేస్తే గ్రామాల్లో కూలీలకు పని ఉండదని ఆమె ఆందోళన వ్యక్తం చేశారు. కేంద్రం బిక్షగా కాకుండా ఉపాధి హక్కుగా లభించే విధంగా ఉన్న ఉపాధి హామీ చట్టాన్ని అందరూ కాపాడుకోవాల్సిన అవశ్యకత ఉందన్నారు. కేంద్రం తెచ్చిన కొత్త చట్టానికి తాము వ్యతిరేకమని ఆమె తెలిపారు. బిఆర్‌ఎస్ వర్కింగ్ ప్రెసిడెంట్ కెటిఆర్‌ను ఎలా ఫుట్‌బాల్ ఆడుకోవాలో ముఖ్యమంత్రి రేవంత్ రెడ్డికి తెలుసునని ఆమె అన్నారు. కొత్తగా ఎన్నికైన సర్పంచులు, ఉప సర్పంచులకు ఆమె శుభాకాంక్షలు తెలిపారు.

మలయాళ స్టార్ హీరో మోహన్ లాల్ నటిస్తున్న ప్రతిష్టాత్మక మూవీ ‘వృషభ‘. ఈ భారీ బడ్జెట్ చిత్రాన్ని ఈ నెల 25న గీతా ఫిలిం డిస్ట్రిబ్యూషన్ గ్రాండ్ థియేట్రికల్ రిలీజ్ కు తీసుకొస్తోంది. ‘వృషభ‘ చిత్రాన్ని కనెక్ట్ మీడియా, బాలాజీ టెలిఫిల్మ్, అభిషేక్ ఎస్ వ్యాస్ స్టూడియోస్ బ్యానర్లపై శోభా కపూర్, ఏక్తా ఆర్ కపూర్, సి.కె. పద్మ కుమార్, వరుణ్ మాథుర్, సౌరభ్ మిశ్రా, అభిషేక్ ఎస్ వ్యాస్, ప్రవీర్ సింగ్, విశాల్ గుర్నాని, జూహి పరేఖ్ మెహతా నిర్మిస్తున్నారు. విమల్ లహోటి సహ నిర్మాతగా వ్యవహరిస్తున్న ‘వృషభ‘ సినిమాను దర్శకుడు నందకిషోర్ మలయాళం, తెలుగులో రూపొందించారు. ఈ సినిమా ప్రీ రిలీజ్ ఈవెంట్ ను హైదరాబాద్‌లో గ్రాండ్ గా నిర్వహించారు. ఈ కార్యక్రమంలో హీరో సమర్జీత్ లంకేష్ మాట్లాడుతూ “వృషభ‘ బిగ్గెస్ట్ యాక్షన్ ఫిలిం. అలాగే లవ్, ఫాదర్, సన్ మధ్య ఎమోషన్ కూడా చాలా ఉంటుంది” అని అన్నారు.

ప్రొడ్యూసర్, డిస్ట్రిబ్యూటర్ బన్నీ వాస్ మాట్లాడుతూ “భారీ బడ్జెట్‌తో ‘వృషభ‘ సినిమాను నిర్మించారు. ఈ సినిమా విజువల్స్ గ్రాండ్‌గా ఉంటాయి. కింగ్ ఎపిసోడ్ వచ్చినప్పటి నుంచి సినిమా మరో స్థాయికి వెళ్తుంది. ఫైట్స్, ఎమోషనల్ కంటెంట్ కూడా బాగుంటుంది. సామ్ సీఎస్ మంచి మ్యూజిక్ ఇచ్చారు. సమర్జిత్ పెద్ద స్టార్ అవుతాడు. నయన్… ఆయ్, క సినిమాల తర్వాత వృషభతో హ్యాట్రిక్ అందుకోవాలి. మోహన్ లాల్ ఈ సినిమాను రిలీజ్ చేసే అవకాశం మాకు ఇచ్చినందుకు సంతోషంగా ఉంది”అని తెలిపారు. నటుడు అలీ మాట్లాడుతూ “ఈ చిత్ర దర్శకుడు నందకిషోర్ కన్నడలో చేసిన ప్రతి సినిమా హిట్టే. పొగరు, కరెంట్ తీగ వంటి చిత్రాలు ఆయనవే. ఈ సినిమాను ఎంతో కష్టపడి నందకిషోర్ రూపొందించారు. మలయాళ సూపర్ స్టార్ మోహన్ లాల్ ఈ సినిమాలో నటిస్తే, తెలుగు ప్రొడ్యూసర్స్ లో సూపర్ స్టార్ అయిన అల్లు అరవింద్ ‘వృషభ‘ సినిమాను రిలీజ్ చేస్తున్నారు”అని పేర్కొన్నారు. ఈ కార్యక్రమంలో హీరోయిన్ నయన్ సారిక, బలగం సంజయ్ పాల్గొన్నారు.

మాస్కో: మాస్కోలో సోమవారం కారు బాంబు పేలి కీలక సైనిక ఉన్నతాధికారి ప్రాణాలు కోల్పోయారు. రష్యా సాయుధ దళాల ఆపరేషనల్ ట్రైనింగ్ విభాగం అధిపతిగా పనిచేస్తున్న లెఫ్టినెంట్ జనరల్ ఫానిల్ సర్వరోవ్ కారు కింద అమర్చిన పరికరం పేలడంతో ఈ సంఘటన జరిగిందని ఇన్వెస్టిగేటివ్ కమిటీ వెల్లడించింది. అపార్టుమెంట్ దగ్గర కారు పార్కింగ్ ప్రాంతంలో ఈ దాడి జరిగింది. దీని వెనుక ఉక్రెయిన్ ఇంటిలిజెన్స్ హస్తం ఉందన్న అనుమానంతో రష్యా అధికారులు దర్యాప్తు చేస్తున్నారు. 2022 నుంచి రష్యాఉక్రెయిన్ మధ్య యుద్ధం జరుగుతోంది.

ఈ యుద్ధం ఆపేందుకు ఓవైపు చర్చలు జరుగుతుండగా,మరో వైపు రెండు దేశాల మధ్య ఉద్రిక్తతలు రోజురోజుకీ తీవ్రమవుతున్నాయి. ఇటీవల కాస్పియన్ సముద్రం లోని రష్యా కీలక చమురు క్షేత్రంపై ఉక్రెయిన్ డ్రోన్ దాడులు చేసింది. రానున్న రోజుల్లో మరిన్ని దాడులు చేస్తామని వెల్లడించింది. ఈ తరుణంలో తాజా సంఘటన చోటు చేసుకుంది. 

స్టార్ హీరో విజయ్ దేవరకొండ ప్రతిష్టాత్మక నిర్మాణ సంస్థ శ్రీ వెంకటేశ్వర క్రియేషన్స్ లో నటిస్తున్న క్రేజీ మూవీ ‘రౌడీ జనార్థన‘. స్టార్ ప్రొడ్యూసర్స్ దిల్ రాజు, శిరీష్ ఈ చిత్రాన్ని నిర్మిస్తున్నారు. టాలెంటెడ్ యంగ్ డైరెక్టర్ రవి కిరణ్ కోలా ఈ సినిమాకు దర్శకత్వం వహిస్తున్నారు. రూరల్ యాక్షన్ డ్రామా నేపథ్యంతో భారీ పాన్ ఇండియా ప్రాజెక్ట్ గా ‘రౌడీ జనార్థన‘ సినిమా రూపొందుతోంది. ఈ సినిమా టైటిల్ గ్లింప్స్ ను హైదరాబాద్ లో విజయ్ దేవరకొండ అభిమానుల కేరింతల మధ్య గ్రాండ్ గా రిలీజ్ చేశారు.

ఈ కార్యక్రమంలో డైరెక్టర్ రవికిరణ్ కోలా మాట్లాడుతూ.. “రౌడీ జనార్థన టైటిల్ అందరికీ నచ్చిందని అనుకుంటున్నా. ఈ కథ చెప్పిన కొద్దిసేపటికే విజయ్ ఆ క్యారెక్టర్ లా మాట్లాడటం, చెప్పే సీన్ కు రౌడీ జనార్థనలా స్పందించడం మొదలుపెట్టాడు. కథ ఎంత బాగుందో సినిమాలో ఈస్ట్ గోదావరి యాసలో విజయ్ మాట్లాడటం అనేది కూడా అంతే బాగుందని దిల్‌రాజు అనేవారు” అని అన్నారు. పొడ్యూసర్ దిల్ రాజు మాట్లాడుతూ.. “విజయ్ దేవరకొండ డిఫరెంట్ మూవీస్ చేస్తూ వచ్చాడు కానీ తొలిసారిగా ఈ మూవీలో ఆంధ్రలోని ఈస్ట్ గోదావరి యాసలో మాట్లాడిస్తున్నాం. విజయ్…పెళ్లి చూపులు, అర్జున్ రెడ్డి, గీత గోవిందం వంటి యూత్ ఫుల్ మూవీస్ చేశాడు. కానీ ఇప్పటిదాకా ఇంత మాస్, బ్లడ్ షెడ్ ఉన్న క్యారెక్టర్ చేయలేదు. ఔట్ అండ్ ఔట్ మాస్ క్యారెక్టర్‌లో విజయ్ కనిపించబోతున్నాడు”అని తెలిపారు. ఈ కార్యక్రమంలో శిరీష్, ఆనంద్ సి.చంద్రన్, డినో శంకర్ పాల్గొన్నారు.

మన తెలంగాణ / హైదరాబాద్ : సామాజిక కార్యకర్త, అనాధాశ్రమాన్ని నిర్వహిస్తున్న గాదె ఇన్నయ్యను ఎన్‌ఐఎ అధికారులు అప్రజాస్వామికంగా అరెస్టు చేశారని సిపిఎం తెలంగాణ కమిటీ ఆరోపించింది. ఆయన అరెస్టును తీవ్రంగా ఖండిస్తున్నట్లు ఆ పార్టీ రాష్ట్ర కార్యదర్శి జాన్ వెస్లీ తెలిపారు. మావోయిస్టు నేత కాతా రామచంద్రారెడ్డి అంత్యక్రియలో పాల్గొని అక్కడ జరిగిన సభలో మావోయిస్టులకు అనుకూలంగా మాట్లాడారనే నెపంతో ఈ అరెస్టు జరిగినట్లు పోలీసులు చెబుతున్నానని ఆయన అన్నారు.

ఆపరేషన్ కగార్, కేంద్ర ప్రభుత్వ నిరంకుశ ధోరణులను వ్యతిరేకిస్తున్నవారిని, సామాజిక సమస్యలపై స్పందించే వ్యక్తులను అరెస్టులు చేయడం ప్రజాస్వామిక గొంతుకలను అణచివేయడమేనని ఆయనన్నారు. ఇన్నయ్య అరెస్టును అభిప్రాయ వ్యక్తీకరణ స్వేచ్ఛపై జరిగిన దాడిగా భావించి ప్రజాస్వామిక వాదులందరూ వ్యతిరేకించాలని జాన్ వెస్లీ పిలుపునిచ్చారు.

మన తెలంగాణ / హైదరాబాద్: మహిళలకు ఆర్‌టిసి బస్సుల్లో ఉచిత బస్ పాస్ కార్డులను జారీ చేయాలన్న ప్రభుత్వ నిర్ణయానిన ఆర్‌టిసి జెఎసి స్వాగతించింది. మహాలక్ష్మి పథకం ఆర్‌టిసిలో అమలు జరగబట్టి రెండేళ్లు కావొస్తున్న విషయం తెలిసిందే. ఈ పథకం వల్ల మహిళలకు ఆర్‌టిసి బస్ లలో ‘O‘ టికెట్ తో ఉచిత ప్రయాణం అమలు చేయడం వల్ల కండక్టర్లు మహిలకు 0 టికెట్, పురుషులకు డబ్బుల టికెట్ ఇస్తున్నప్పుడు అధిక రద్దీ కారణంగా అనుకోకుండా పురుషులకు 0 టికెట్ రావడం వీటిపై టిటిఐ లు కేసులు నమోదు చేయడం జరుగుతోందని ఆర్‌టిసి జెఎసి చైర్మన్ ఈదురు వెంకన్న, నాయకులు ఎం. థామస్ రెడ్డి(టిఎంయు), ఎండి మౌలానా (ఎన్‌ఎంయు), కత్తుల యాదయ్య (బికెయు), సుద్దాల సురేష్ (బిడబ్లుయు), బి.యాదగిరి (కెపి) తెలిపారు. అధికారులు ఈ కేసులకు గురైన వారిని నిర్ధాక్షణ్యంగా ఉద్యోగాల నుండి తీసివేయడం జరుగుతోందన్నారు.

ఈ విధానాన్ని ఆర్‌టిసి జెఎసి మొదటి నుండి వ్యతిరేకిస్తూ O టికెట్ బదులు ఉచిత బస్సు పాస్ కార్ద్ ఇవ్వాలని డిమాండ్ చేస్తోందన్నారు. జెఎసి .దీనిపై పలు దఫ్ఫాలుగా ప్రభుత్వం, యాజమాన్యాల దృష్టికి తీసుకపోవడంతో పాటు జెఎసి ఆధ్వర్యంలో నిర్వహించిన ప్రతి పోరాట కార్యక్రమంలో ఈ డిమాండ్ ను పెట్టి వివిధ ప్రసార సాధనాలా ద్వారా విస్తృతంగా ప్రచారం చేసినట్లు తెలిపారు. మే 6 న మంత్రితో జరిపిన చర్చలల్లో ఉచిత బస్ పాస్ గురించి ప్రస్థావించామని, మంత్రి సానుకూలంగా స్పందించారని గుర్తు చేశారు.

కొంత ఆలస్యం అయినప్పటికీ ఆర్థిక మంత్రి బట్టి విక్రమార్క ఆర్‌టిసి సమీక్ష సమావేశంలో మహిళలకు O టికెట్ బదులు ఉచిత బస్ పాస్ కార్డు ఇవ్వాలని నిర్ణయిoచినట్లు చెప్పడం పట్ల జెఎసి హర్షం వ్యక్తం చేస్తుందన్నారు. ప్రభుత్వం ఇచ్చిన ప్రధాన హామీలు యూనియన్ పునరుద్దరణ, 2021, 2025 వేతన సవరణ, ఉద్యోగ భద్రత, ప్రభుత్వంలో విలీనంతో పాటు పనిభారం తగ్గింపు, సిబ్బంది ఖాళీల భర్తీ తదితర ప్రధాన అంశాలను కూడా పరిష్కరించాలని జెఎసిగా కోరుతున్నామన్నారు. ఉచిత బస్ పాస్ కార్డు జారికి కృషి చేసిన ఆర్ధిక మంత్రి బట్టి విక్రమార్క, రవాణా శాఖ మంత్రి పొన్నం ప్రభాకర్, ఎండి నాగిరెడ్డికి కృతజ్ఞతలు తెలిపారు.

రైతుల సౌకర్యం కోసమే యూరియా సరఫరాలో యాప్

రైతుల గురించి మాట్లాడే అర్హత బిఆర్‌ఎస్‌కు లేదు

మంత్రి తుమ్మల నాగేశ్వరరావు

మన తెలంగాణ/హైదరాబాద్: కాంగ్రెస్ ప్రభుత్వం అధికారంలోకి వచ్చిన రెండు సంవత్సరాల కాలంలో తీసుకున్న సాహసోపేతమైన నిర్ణయాలతో రైతు ప్రభుత్వం అనే పేరు తెచ్చుకుందని రాష్ట్ర వ్యవసాయ శాఖ మంత్రి తుమ్మల నాగేశ్వరరావు అన్నారు. రైతుల పట్ల బిఆర్‌ఎస్ అధినేత, మాజీ సిఎం కెసిఆర్ చేసిన వ్యాఖ్యలను సోమవారం మంత్రి ఓ ప్రకటనలో ఖండించారు. రైతుల సమయాన్ని ఆదా చేసేందుకు రాష్ట్ర ప్రభుత్వం యూరియా సరఫరాలో యాప్ తీసుకొస్తుందని స్పష్టం చేశారు. పదేళ్ళు అధికారంలో ఉన్నామని చెప్పుకొనే వారికి యూరియా ఎవరిస్తారు ? ఎక్కడి నుండి వస్తుంది, ఎలా వస్తుంది అని తెలియక మాట్లాడుతున్నారో లేక ఎప్పటిలాగే స్వార్ధరాజకీయాల కోసం మాట్లాడుతున్నారో ప్రజలు గమనించాలని కోరారు. రాష్ట్ర ప్రభుత్వం వద్ద సరిపడా యూరియా నిల్వలు ఉన్నా, ప్రతిపక్ష పార్టీ నాయకులు రైతులను మరింత భయపెట్టే విధంగా మాట్లాడి, రైతులు యూరియా కోసం ఒకేసారి కొనుగోళ్ల కోసం వచ్చే విధంగా చేశారని మంత్రి ఆరోపించారు.

కొందరు యూరియాను పక్కదారి పట్టించినట్టు ప్రభుత్వం దృష్టికి వచ్చిందని, ఈ మోసాన్ని రాష్ట్ర ప్రభుత్వం మీద నెట్టి రాజకీయ పబ్బం గడుపుకోవాలని చూస్తున్నారని దుయ్యబట్టారు. ఈ విషయాన్ని గ్రహించిన గ్రామీణ ప్రజలు మరొక్కసారి బిఆర్‌ఎస్‌ను తిరస్కరించారన్నారు. యూరియా పక్కదారి పట్టకుండా, రైతులు క్యూ లైన్లలో సమయాన్ని వృధా చేసుకొకుండా, పారదర్శకంగా అమ్మకాలు జరగాలనే ఉద్దేశ్యంతోనే రాష్ట్ర ప్రభుత్వం యాప్ ని తీసుకొస్తుందని మంత్రి స్పష్టం చేశారు. ప్రతిపక్ష నాయకులు కావాలనే యాప్ మీద అనుమానాలు రేకెత్తిస్తు మాట్లాడుతున్నారని మంత్రి ఆరోపించారు. ఇప్పటికే కిసాన్ కపాస్ యాప్ ద్వారా పత్తి కొనుగోళ్లను సమర్థవంతంగా నిర్వహించినట్లు మంత్రి గుర్తు చేశారు. యూరియా యాప్‌ను సైతం విజయవంతంగా అమలుచేసి, పారదర్శకంగా యూరియా అందించి, ప్రతిపక్ష నాయకుల అనుమానాలు పటాపంచలు చేస్తామని మంత్రి ధీమా వ్యక్తం చేశారు.

పది సంవత్సరాల పాటు బిఆర్‌ఎస్ నాయకులు చెప్పిన కథలు, చేసిన ఉత్తుత్తి హామీలతో ప్రజలు విసిగెత్తిపోయి మార్పు కోరుకుంటున్నారని తెలిపారు. పదేళ్ల బిఆర్‌ఎస్ ప్రభుత్వ హయాంలో కనీసం లక్ష రుణమాఫీ చేయడానికే నానా అవస్థలు పడిందని, కాంగ్రెస్ ప్రభుత్వం రెండు లక్షల రుణమాఫీని అధికారంలోకి వచ్చిన సంవత్సరలోపే పూర్తి చేసి, రుణమాఫీ కోసం రూ. 20,600 కోట్లు ఖర్చు చేశామని చెప్పారు. వరి వేస్తే ఉరి అని బిఆర్‌ఎస్ రైతులను బెదిరిస్తే, కాంగ్రెస్ ప్రభుత్వం బోనస్ ఇచ్చి కొనుగోలు చేస్తుందని మంత్రి వెల్లడించారు. అలాంటి బిఆర్‌ఎస్ నాయకులు వడ్ల కొనుగోలు, బోనస్‌ల గురించి మాట్లాడటం దయ్యాలు వేదాలు వల్లించినట్టు ఉందని ఏద్దేవా చేశారు. బిఆర్‌ఎస్ నాయకులు ఎన్ని విమర్శలు చేసినా రైతును రాజును చేయాలనే లక్షానికి అనుగుణంగా కాంగ్రెస్ ప్రభుత్వం ముందుకు

మన తెలంగాణ/హైదరాబాద్ : రాష్ట్రపతి ద్రౌపదీ ముర్ము హైదరాబాద్ శీతాకాల విడిది ముగిసింది. ఆరు రోజుల శీతాకాల విడిది ముగించుకున్న రాష్ట్రపతి ప్రత్యేక విమానంలో ఢిల్లీ పయనమయ్యా రు. ఆమెకు గవర్నర్ జిష్ణుదేవ్‌వర్మ, సిఎం రేవంత్‌రెడ్డి, కేంద్ర మంత్రి కిషన్‌రెడ్డి, మంత్రి సీతక్క, ప్రభుత్వ సలహాదారు హర్కర వేణుగోపాల్ రావు, ప్రభుత్వ ప్రధాన కార్యదర్శి రామకృష్ణారావు తదితరులు వీడ్కోలు పలికారు.

ఈ నెల 17న హైదరా బాద్ చేరుకున్న ఆమె పలు కార్యక్రమాల్లో పాల్గొన్నారు. 19న రామోజీ ఫిల్మ్‌సిటీలో నిర్వహించిన పబ్లిక్ సర్వీస్ కమిషన్ చైర్‌పర్సన్ల, జాతీయ సద స్సుకు ఆమె ముఖ్య అతిథిగా హాజరయ్యారు. 20న గచ్చిబౌలిలో బ్రహ్మాకుమారీస్ శాంతి సరోవర్ సంస్థ నిర్వహించిన కార్యక్రమంలో పాల్గొన్నారు. 21న రాష్ట్రపతి నిలయంలో ఎట్ హోమ్ నిర్వహించారు. ప్రతి ఏటా రాష్ట్రపతి శీతాకాల విడిది కోసం హైదరాబాద్ రావడం ఆనవాయతీ. ఈ సమ యంలో రాష్ట్రపతి నిలయం నుంచే అధికారిక కార్యకలాపాలు నిర్వహిస్తారు. 1860లో నిర్మించిన ఈ భవనం, 1948లో హైదరాబాద్ భారత్‌లో విలీనమైన తర్వాత రాష్ట్రపతి విడిది కేంద్రంగా మారింది.