మక్కల్ సెల్వన్ విజయ్ సేతుపతి కుమారుడు సూర్య సేతుపతి హీరోగా పరిచయమవుతున్న చిత్రం ఫీనిక్స్. ప్రముఖ స్టంట్ మాస్టర్ అనల్ అరసు దర్శకత్వం వహించారు. ఏకే బ్రేవ్మ్యాన్ పిక్చర్స్ బ్యానర్ పై రాజలక్ష్మి అనల్ అరసు ఈ సినిమాని నిర్మించారు. ఇప్పటికే తమిళ్ లో విడుదలైన ఈ సినిమా బ్లాక్ బస్టర్ హిట్ అయ్యింది. ఈ చిత్రం తెలుగులో నవంబర్ 7 రిలీజ్ కానుంది. ఈ సందర్భం మేకర్స్ ప్రీరిలీజ్ ఈవెంట్ నిర్వహించారు. ప్రీరిలీజ్ ఈవెంట్ లో హీరో విజయ్ సేతుపతి మాట్లాడుతూ “ఈ సినిమా మా అబ్బాయికి చాలా మంచి ఆరంభం. ఒక తండ్రిగా నేను చాలా ఆనందంగా ఉన్నాను. తనకు చిన్నప్పటి నుంచి యాక్షన్ సినిమా చేయాలని ఉండేది. తనకి యాక్షన్ చాలా ఇష్టం. నన్ను యాక్షన్ సినిమాలు చేయమని చెబుతుండేవాడు. యాక్షన్ సినిమాలు చేయడం తన కల. ఒకరోజు తను యాక్టర్ కావాలి అని చెప్పాడు. అలా చెప్పిన ఏడాదిలోనే సినిమా చేశాడు. అదంతా డైరెక్టర్ అనల్ అరసు మాస్టర్, నిర్మాత రాజ్యలక్ష్మి వలన సాధ్యపడింది.
ఈ సినిమాకి తెలుగులో డైలాగ్స్ రాసిన భాష్యశ్రీకి థాంక్యూ. నేను ప్రస్తుతం పూరి సినిమా చేస్తున్నాను. ఆ సినిమా పూర్తయ్యేలోగా తెలుగులో చాలా స్పష్టంగా మాట్లాడుతాను. ఇక ఈ సినిమాలో యాక్షన్, ఎమోషన్ అన్ని చాలా అద్భుతంగా కుదిరాయి. తప్పకుండా ఆడియన్స్కి కనెక్ట్ అవుతుంది”అని అన్నారు. డైరెక్టర్ గోపీచంద్ మలినేని మాట్లాడుతూ “అనల్ అరసు మాస్టర్ ఈ సినిమాలో సూపర్ యాక్షన్ చేశారు. యాక్షన్ కొరియోగ్రఫీని ఒక కథ లాగా చెప్పారు. ఫీనిక్స్ ట్రైలర్ చాలా అద్భుతంగా అనిపించింది. ఈ సినిమా తమిళ్లో రిలీజ్ అయ్యి చాలా పెద్ద హిట్ అయింది. తెలుగులో కూడా ఈ సినిమా మంచి హిట్ అవ్వాలని కోరుకుంటున్నాను”అని తెలిపారు. హీరో సూర్య సేతుపతి మాట్లాడుతూ ఈ సినిమా అందరికీ నచ్చుతుందన్న నమ్మకం ఉందని పేర్కొన్నారు. డైరెక్టర్ అనల్ అరసు మాట్లాడుతూ “ఈ సినిమాలో అందరూ అద్భుతంగా నటించారు. సూర్య సేతుపతికి చాలా టాలెంట్ ఉంది”అని తెలియజేశారు. ఈ కార్యక్రమంలో వరలక్ష్మి శరత్ కుమార్, రాజ్యలక్ష్మి, భాష్యశ్రీ పాల్గొన్నారు.