పారిస్ : ఫ్రాన్స్లో రాజకీయ సంక్షోభం కొనసాగుతోంది. కొత్త ప్రధాని సెబాస్టియన్ లెకోర్ను ప్రధాని పదవికి సోమవారం రాజీనామా చేశారు. సెప్టెంబర్ 9న పదవిని చేపట్టిన ఆయన నెలలోపే రాజీనామా చేయాల్సి వచ్చింది. ఫ్రాన్స్ అధ్యక్షుడు ఇమాన్యుయేల్ మెక్రాన్కు అత్యంత సన్నిహితుడిగా సెబాస్టియన్కు పేరుంది. సెబాస్టియన్ ఆదివారం కొత్త క్యాబినెట్ను ఏర్పాటు చేయగా, కూర్పుపై రాజకీయంగా విమర్శలు వచ్చాయి. దీంతో నియామకాలు జరిగిన కొన్ని గంటల్లోనే రాజీనామా చేయాల్సి వచ్చింది. దానిని మెక్రాన్ కూడా ఆమోదించారు. బడ్జెట్ సమస్యలు, ఉక్రెయిన్ యుద్ధం, గాజా పరిస్థితి, అమెరికా అధ్యక్షుడి విధానాలతో ఏర్పడ్డ గందరగోళం కారణంగా ఫ్రాన్స్ ఇప్పటికే అనేక సవాళ్లను ఎదుర్కొంటోంది. అవే రాజకీయ అనిశ్చితికి దారి తీశాయి. ఇక ఫ్రాన్స్లో సెబాస్టియన్తో కలిపి రెండేళ్లలో ఐదుగురు ప్రధానులు రాజీనామా చేయడం గమనార్హం.
గత రెండేళ్లలో ఫ్రాన్స్లో రెండుసార్లు తాత్కాలిక ప్రభుత్వం నడిచింది. ఫ్రాన్స్ పార్లమెంట్లో ప్రధాని విషయంలోభిన్నాభిప్రాయాలు వ్యక్తమవుతున్నాయి. దీంతో ప్రధాని నియామకం మెక్రాన్కు పెద్ద తలనొప్పిగా మారింది. ప్రస్తుతం ఆయన వద్ద రెండు ఆప్షన్లు మాత్రమే ఉన్నాయి. కొత్త ప్రధానిని నియమించడం లేదా జాతీయ అసెంబ్లీని రద్దు చేసి మళ్లీ ఎన్నికలు నిర్వహించడమే. గత రెండేళ్ల నుంచి ఇదే సమస్య వస్తున్నా , ఎన్నికలు నిర్వహించేందుకు మాత్రం దేశాధ్యక్షుడు మొగ్గు చూపలేదు. ఒకవేళ ఈసారి ఎన్నికలకు వెళ్తే , ప్రభుత్వాన్ని రద్దు చేసిన 29 నుంచి 49 రోజుల మధ్య ఎన్నికలు నిర్వహించాల్సి ఉంటుంది. అత్యధిక సీట్లు గెలిచిన పార్టీ నుంచి ప్రధాని వ్యక్తిని అధ్యక్షుడు నియమిస్తారు.