ఓ సినీనటికి కాబోయే భర్త ఉరివేసుకుని ఆత్మహత్య చేసుకున్న సంఘటన జూబ్లీహిల్స్ పోలీస్ స్టేషన్ పరిధిలోని ప్రశాసన్ నగర్లో చోటుచేసుకుంది. పోలీసుల కథనం ప్రకారం…రాజస్థాన్కు చెందిన సోహాని బాలీవుడ్, టాలీవుడ్తోపాటు పలు భాషల సినిమాల్లో నటిస్తోంది. ఆమెకు రాజస్థాన్కు చెందిన సవాయ్ సింగ్ అనే యువకుడు ఇన్స్టాగ్రాంలో పరిచయమయ్యాడు. ఇద్దరి మధ్య ఏర్పడిన పరిచయం ప్రేమకు దారితీయడంతో జూలైలో నిశ్చితార్ధం చేసుకున్నారు. సోహాని ప్రశాసన్ నగర్లో ఫ్లాట్ను అద్దెకు తీసుకుని ఉంటూ సినిమాల్లో నటిస్తోంది. శనివారం ఉదయం సవాయ్ సింగ్ ప్రశాసన్ నగర్ లోని ఆమె ఇంటికి వచ్చాడు. తర్వాత ఇద్దరూ కలిసి గచ్చిబౌలిలోని ఎవరి కార్యాలయాలకు వారు వెళ్లి పోయారు. సాయంత్రం సోహాని ఇంటికి వచ్చి తాళం తీసి లోపలికి వెళ్లి చూడగా డైనింగ్ హాల్లో సవాయ్ సింగ్ ఉరేసుకొని ఆత్మహత్య చేసుకున్నట్లు గుర్తించి పోలీసులకు ఫిర్యాదు చేసింది.
ఘటనా స్థలానికి చేరుకున్న పోలీసులు దర్యాప్తు చేపట్టగా ఆత్మహత్య చేసుకునే ముందు అతను సెల్ఫీ వీడియో తీసుకున్నట్లు గుర్తించారు. సోహాని కుమారితో పరిచయానికి ముందు సవాయ్ సింగ్ మరో యువతితో స్నేహం ఉండేదని ఆమెను మర్చిపోలేకపోవడం, ఆర్థిక సమస్యల వల్ల ఉరివేసుకుని ఆత్మహత్య చేసుకున్నట్లు సోహాని పోలీసులకు ఇచ్చిన ఫిర్యాదులో పేర్కొంది. పోలీసులు సీసీ ఫుటేజీలు పరిశీలించగా శుక్రవారం ఉదయం 11.47 గంటలకు సవాయ్ సింగ్ ఆమె ఉంటున్న ఫ్లాట్ వెనుక డోర్ ద్వారా ఇంట్లోకి వెళ్లి ఆత్మహత్య చేసుకున్నట్లుగా నిర్ధారించారు. కేసు నమోదు చేసుకుని దర్యాప్తు చేపట్టిన పోలీసులు క్లూస్ టీమ్ సహాయంతో ఘటనా స్థలంలో ఆధారాలు సేకరించారు. సవాయ్ సింగ్ మాజీ స్నేహితురాలిని కూడా విచారిస్తున్నారు.