శ్రీహరికోట (ఏపీ): ఇస్రోకు చెందిన ఎల్వీఎం3ఎం6 వ్యోమనౌక 24 గంటల కౌంట్డౌన్ మంగళవారం ప్రారంభమైంది.అమెరికాకు చెందిన కమ్యూనికేషన్ ఉపగ్రహం బ్లూబర్డ్ 6 ను తీసుకుని బుధవారం ఉదయం 8.54 గంటలకు నింగి లోకి ఎగరనున్నట్టు ఇస్రో అధికారులు తెలిపారు. ఈ ఉపగ్రహం బరువు సుమారు 6500 కిలోలు. స్పేస్ ఫోర్ట్ లోని రెండో లాంచ్ ప్యాడ్ నుంచి ఎల్వీఎం3ఎం6 వ్యోమనౌకను ప్రయోగించనున్నట్టు వెల్లడించారు.
అమెరికాకు చెందిన ఎఎస్టీ స్పేస్ మొబైల్ సంస్థతో కలిసి ఇస్రో వాణిజ్య విభాగం న్యూస్పేస్ ఇండియా లిమిటెడ్ ఈ ప్రయోగాన్ని నిర్వహిస్తోంది. బ్లూబర్డ్ బ్లాక్2 మిషన్…శాటిలైట్ ద్వారా నేరుగా మొబైల్ కనెక్టివిటీ కోసం ఉద్దేశించిన ప్రాజెక్టు . ప్రపంచ వ్యాప్తంగా ఎక్కడ ఉన్నా, ఏ సమయంలోనైనా 4 జీ, 5 జీ వాయిస్, వీడియో కాల్స్, మెసేజ్లు , వీడియో ప్రసారాలు చేసేందుకు వీలుగా ఈ ప్రయోగం చేపట్టారు. వాణిజ్య, ప్రభుత్వ అప్లికేషన్లకు సపోర్టు చేసేలా దీన్ని డిజైన్ చేశారు.