హైదరాబాద్: మీ ఓటును ఆయుధంగా మార్చి గడీల పాననను కూల్చారని సిఎం రేవంత్ రెడ్డి తెలిపారు. ప్రజాపాలనకు రెండేళ్లు పూర్తవుతుందని అన్నారు. వరంగల్ జిల్లా నర్సంపేటలో సిఎం రేవంత్ పర్యటించారు. రూ.532 కోట్ల విలువైన అభివృద్ధి పనులకు, రూ.200 కోట్లతో నిర్మించే యంగ్ ఇండియా స్కూల్ నిర్మాణానికి శంకుస్థాపన చేశారు. వరంగల్ గడ్డకు చెందిన ఎందరో వీరులు తమ పరాక్రమాన్ని ప్రపంచానికి చూపారని, కాకతీయ యూనివర్శిటీ పోరాటాలు ఎప్పుడూ స్ఫూర్తినిస్తాయని తెలియజేశారు. తెలంగాణ వస్తే.. సమస్యలు పరిష్కారం అవుతాయని ఈ జిల్లా ప్రజలు కూడా ఆశించారని, కుర్చీలో కూర్చున్న వారి ఆస్తులు పెరిగాయి.. కానీ ప్రజల జీవితాలు మారలేదని విమర్శించారు. వరి వేస్తే.. ఉరి వేసుకున్నట్లే అని ఆనాటి మాజీ సిఎం కెసిఆర్ అన్నారని, కాంగ్రెస్ వస్తే.. కరెంటు ఉండదని, ఆనాటి సిఎం ప్రచారం చేశారని మండిపడ్డారు. ఈ ప్రభుత్వం మాత్రం.. రైతు పండించిన చివరి గింజ వరకు కొంటోందని, కాంగ్రెస్ వస్తే.. రైతుబంధు బంద్ అవుతుందని ప్రజలను బెదిరించారని ఆగ్రహం వ్యక్తం చేశారు.
కాంగ్రెస్ పవర్ లోకి వచ్చాక.. రాష్ట్రాన్ని దోచుకున్న వారి పవర్ మాత్రమే కట్ అయిందని సిఎం పేర్కొన్నారు. సాగుకు ఉచిత కరెంటుపై పేటెంట్ హక్కు ఉన్నది కాంగ్రెస్ కు మాత్రమేనని కొనియాడారు. గత సీజన్ లో 9 రోజుల్లోనే రూ.9 వేల కోట్లను రైతు భరోసా కింద ఇచ్చామని, గత బిఆర్ఎస్ ప్రభుత్వం రుణమాఫీ పేరిట రైతులను మోసం చేసిందని ఆవేదన వ్యక్తం చేశారు. రుణమాఫీని 9 ఏళ్లపాటు సాగదీయడంతో అప్పుడు ఇచ్చిన డబ్బులు వడ్డీలకే సరిపోలేదని అన్నారు. సన్న వడ్లకు క్వింటాల్ కు రూ. 500 బోనస్ ఇస్తున్నామని, గత ప్రభుత్వం పదేళ్లపాటు పేదలకు కొత్తగా ఒక్క రేషన్ కార్డు కూడా ఇవ్వలేదని ఎద్దేవా చేశారు. రేషన్ కార్డుల్లో కొత్తవారి మార్పులు చేర్పులకు కూడా అవకాశం ఇవ్వలేదని, ఈ ప్రభుత్వం ఇప్పటికే 1.10 కోట్ల కొత్త రేషన్ కార్డులను ఇచ్చిందని చెప్పారు. గత ప్రభుత్వం ఇచ్చిన దొడ్డు బియ్యం పేదవాడి ఆకలిని తీర్చలేదని, మిల్లర్లు, దళారులు దొడ్డు బియ్యాన్ని ప్రాసెసింగ్ చేశారని.. వాళ్లే లాభపడ్డారని అన్నారు. కాంగ్రెస్ ప్రభుత్వం రేషన్ కార్డులపై సన్నబియ్యం ఇచ్చి పేదల ఆకలితీరుస్తోందని రేవంత్ స్పష్టం చేశారు.