హైదరాబాద్: సినిమాల్లో అవకాశాలు కల్పిస్తామని చెప్పి తొమ్మిదవ తరగతి విద్యార్థినిపై కో డైరెక్టర్, కెమెరామెన్ లైంగిక దాడికి పాల్పడ్డారు. ఈ సంఘటన హైదరాబాద్ ల్ లోని ఫిలింనగర్ లో జరిగింది. కో డైరెక్టర్, కెమెరామెన్, వారికి సహకరించిన బాలిక పెద్దమ్మను పోలీసులు అరెస్టు చేసి రిమాండ్ కు తరలించారు. పోలీసులు తెలిపిన వివరాల ప్రకారం… ఓ బాలిక (13) తొమ్మిదో తరగతి చదువుతూ తన పెద్దమ్మ ఇంట్లో ఉంటుంది. బాలిక పెద్దమ్మకు పరిచయమైన కడప జిల్లాకు చెందిన సినిమా కో డైరెక్టర్ బండి వెంకట శివారెడ్డి, కెమెరామెన్ పెనికెలపాటి అనిల్ ఆమె ఇంటికి తరచూ వస్తున్నారు. బాలికపై ఇద్దరు కన్నేసి సినిమాలు అవకాశాలు ఇప్పిస్తామని ఆశ కల్పించారు. ఇదే విషయాన్ని వారు బాలిక పెద్దమ్మకు తెలపగా, వారిద్దరికి సినీ పరిశ్రమలో మంచి పలుకుబడి ఉందని వారితో చనువుగా ఉంటే మంచి అవకాశాలు వస్తాయని బాలికను ఇద్దరు నమ్మించారు. పెద్దమ్మ మాటలు విని వారితో మాట్లాడుతున్న సమయంలో పలుమార్లు బాలికపై నిందితులు లైంగిక దాడికి పాల్పడ్డారు. జరిగిన విషయాన్ని బాలిక తన పాఠశాల ఉపాధ్యాయురాలికి తెలిపింది. ఉపాధ్యాయురాలు ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. వెంకట శివారెడ్డి, పెనికెలపాటి అనిల్ పై పోలీసులు పోక్సో కేసు నమోదు చేసి అరెస్టు చేశారు.