జపాన్ తొలి మహిళా ప్రధానిగా అతివాద నేతగా పేరున్న సనే తకైచి ఎన్నికయ్యారు. జపాన్ పార్లమెంట్ మంగళవారం దేశం లోని తొలి మహిళా ప్రధాన మంత్రిగా సనేతకైచిని ఎనున్నకుంది. పార్టీలో అంతర్గత విభేదాల నేపథ్యంలో జపాన్ ప్రధానిగా ఉన్న షిగెరు ఇషిబా ఇటీవల తన పదవికి రాజీనామా చేసిన సంగతి తెలిసిందే. ఈ క్రమంలో అధికార లిబరల్ డెమోక్రటిక్ పార్టీ అధ్యక్షురాలిగా సనైతకైచి ఎన్నికయ్యారు. ఇటీవల దేశంలో జరిగిన ఎన్నికల్లో పార్లమెంట్ ఎగువ సభలో అధికార పార్టీ మెజార్టీని సాధించలేక పోయింది.దీనికి ముందు దిగువ సభలో కూడా మెజార్టీ కోల్పోయింది.
దీంతో ఇషిబాపై ఒత్తిడి పెరగ్గా, ఆయన తన పదవికి రాజీనామా చేశారు. ఈ క్రమం లోనే శనివారం పార్టీలో ఎన్నికలు జరగ్గా, మాజీ ప్రధానికుమారుడు షింజిరో కోయిజుమితోపాటు మరో ముగ్గురు అభ్యర్థులను ఓడించి తకైచి విజయం సాధించారు. నేడు పార్లమెంట్లో జరిగిన ఓటింగ్లో లిబరల్ డెమోక్రటిక్ పార్టీ జపాన్ ఇన్నోవేషన్ పార్టీ కూటమితో తకైచికి భారీ మద్దతు లభించింది. దీంతో జపాన్కు తొలి మహిళా ప్రధానిగా తకైచి అరుదైన ఘనత సాధించారు. 64 ఏళ్ల తకైచి 1993 లో స్వస్థలమైన నారా నుంచి పార్లమెంట్కు ఎన్నికయ్యారు. ఎల్డీపీలో ఆర్థిక భద్రత, అంతర్గత వ్యవహారాలు, లింగ సమానత్వ మంత్రితో సహా పలు కీలక పదవుల్లో పనిచేశారు.
మోడీ శుభాకాంక్షలు
జపాన్ తొలి మహిళా ప్రధానిగా ఎన్నికైన సానే తకైచికి భారత ప్రధాని నరేంద్రమోడీ శుభాకాంక్షలు తెలిపారు. భారత్ జపాన్ల ప్రత్యేక వ్యూహాత్మక ప్రపంచ భాగస్వామ్యాన్ని మరింత బలోపేతం చేయడానికి తకైచితో కలిసి పనిచేయడానికి ఎదురు చూస్తున్నట్టు పేర్కొన్నారు. ఇండో పసిఫిక్ ప్రాంతంలో శాంతి, స్థిరత్వం, శ్రేయస్సుల విషయంలో ఇరు దేశాల బంధాలు, కీలక పాత్ర పోషిస్తాయన్నారు.