ఎసిబికి చిక్కిన మరో అవినీతి తిమింగలం
ఇబ్రహీంబాగ్ ఎడిఈగా ఇళ్లల్లో ఎసిబి సోదాలు
రూ.2.18కోట్ల నగదు స్వాధీనం.. రూ.50కోట్లకు పైగా అక్రమాస్తులు
పది ప్రాంతాల్లో ఎసిబి అధికారుల సోదాలు
ఎడిఈ అంబేద్కర్ అరెస్టు, రిమాండ్‌కు తరలింపు
మనతెలంగాణ, సిటిబ్యూరోః అక్రమాస్తుల కేసులో మరోభారీ తిమింగలం ఎసిబికి చిక్కింది. ఆదాయానికి మించి ఆస్తులు కలిగి ఉన్నరన్న ఆరోపణలతో ఎసిబి అధికారులు విద్యుత్ శాఖ ఎడిఈ ఇల్లు, బంధువుల ఇళ్లపై ఎసిబి మంగళవారం దాడులు చేశారు. ఎసిబి అధికారుల దాడులో ఇంజనీర్‌కు సంబంధించిన ఆస్తులను భారీగా కనుగొన్నారు. ఎరుగు అంబేద్కర్ టిజిఎస్‌పిడిసిఎల్, ఇబ్రహీంబాగ్ పరిధిలో ఆపరేషన్స్ ఎడిఈగా(అసిస్టెంట్ డివిజన్ ఇంజనీర్) పనిచేస్తున్నాడు. అంబేద్కర్ ఆదాయానికి మించి ఆస్తులు కూడబెట్టారని పలువురు ఎసిబికి ఫిర్యాదు చేశారు. దీంతో విచారణ చేసిన ఎసిబి అధికారులు కొండాపూర్‌లో ఎడిఈ ఇల్లు, బంధువులు, బినామీలకు చెందిన 15 ప్రాంతాల్లో ఏకకాలంలో దాడులు నిర్వహించారు. మెదక్, సూర్యపేట, నల్గొండ, రంగారెడ్డి, హైదరాబాద్ తదితర ప్రాంతాల్లో 12 బృందాలు దాడులు చేశాయి. ఎసిబి సోదాల్లో ఎడిఈకి సంబంధించిన ఆస్థులు భారీగా కనుగొన్నారు. ఎడిఈ బినామి ఇంట్లో రూ.2,18,00,000 కోట్ల నగదును స్వాధీనం చేసుకున్నారు.
ఎడిఈకి శేరిలింగంపల్లిలో ఫాట్, గచ్చిబౌలిలో జి ప్లస్ ఫైవ్ భవనం, అంతార్ కెమికల్ కంపెనీ పేరుతో 10 ఏకరాల భూమి, హైదరాబాద్‌లో ఖరీదైన ప్రాంతంలో ఆరు ప్లాట్లు, ఫాం హౌస్, రెండు కార్లు, బంగారు ఆభరణాలు, బ్యాంక్ డిపాజిట్లను కనుగొన్నారు. ఎడిఈకి సంబంధించిన ఆస్తులు ప్రభుత్వ విలువ ఆధారంగా రూ.50కోట్లు ఉండగా, మార్కెట్ విలువ దీనికి పది రెట్లు ఉంటుందని తెలిసింది. మరికొన్ని ప్రాంతాల్లో దాడులు కొనసాగుతున్నాయని ఎసిబి అధికారులు పేర్కొన్నారు. ఎఈడి అంబేద్కర్ కారులో రూ.5.50లక్షల నగదు, బ్యాంక్‌లో రూ.70లక్షల డిపాజిట్లు, స్టాక్ మార్కెట్ షేర్లలో రూ.36లక్షలు పెట్టుబడిపెట్టాడని ఎసిబి డిఎస్పి తెలిపారు. ఎడిఈ అంబేద్కర్‌ను అరెస్టు చేసిన ఎసిబి అధికారులు వైద్య పరీక్షలు చేయించి, నాంపల్లిలోని ఎసిబి కోర్టులో ప్రవేశపెట్టారు. జడ్జి ఆదేశాల మేరకు అంబేద్కర్‌ను రిమాండ్‌కు తరలించారు.